Xizmat safari bilan hududlarga tashrif buyurganimda vazirlik tasarrufidagi ta’lim muassasalarining ta’lim berish metodikasi bilan tanishib, shunga amin bo‘ldimki har hududda har xil ta’lim berish metodikasi mavjud.

Ba’zi hududlarda ta’lim jarayoni juda a’lo yo‘lga qo‘yilgan bo‘lsa, ba’zilarida aksini kuzatdim.

Umumiy xulosam shu bo‘ldiki, respublikaning barcha hududida bir xil imkoniyatli madaniy ta’limni yo‘lga qo‘yish lozim, aks holda san’atga qobiliyatli bolalarni madaniy ta’lim olish imkoniyatlari chegaralanib qoladi. Bu holatni shundayligicha qoldirishga esa, biz mas’ullarning haqqi yo‘q.

Shu maqsadda, ilk marotaba kengaytirilgan avgust anjumanini tashkil etish va unda barcha metodikalarni umumlashtirish hamda tajriba almashish maqsadida, yurtimizning barcha hududlaridan 800 nafarga yaqin soha vakillarini bir joyga jamladik.

Shuningdek, hamkorlikka Ta’limni rivojlantirish respublika ilmiy-metodik markazini ham taklif etdik, tadbirda markaz direktori Yuliya Risyukova ishtirok etib, o‘z tajribasi bilan bo‘lishdi.

Seminar davomida, ta’lim jarayonlarini raqamlashtirish, sun’iy intellekt imkoniyatlaridan foydalanish, ilg‘or metodik ishlanmalarni yaratish va xalqaro hamkorlik aloqalarini yanada mustahkamlash bo‘yicha rejalarni belgilab oldik.

O‘ylaymanki avgust kengashi ishtirokchilari va ular ortidagi ta’lim muassasalari uchun manfaatli bo‘ldi. Chunki ta’lim jarayonida o‘zaro tajriba almashinuv muhimdir.