"ဟန်နီ"

ဝေးဖို့တွေအများကြီးရှိခဲ့ပါရဲ့ . . .

အဖေက အမေက
အသိုင်းက အဝိုင်းက

နင်တကယ်ပျော်ရဲ့လား အခု ။

ချစ်ရသူတွေအများကြီးအနားမှာ
သိပ်ချစ်ရတဲ့နင်မရှိတော့တဲ့အခါ
အောင်မြင်မှုဆိုတာ ဘာလဲ ။

ရထားတစ်စီးတည်းကိုပဲ
ဘူတာတစ်ခုတည်းမှာ
နင်နဲ့ငါ အကြိမ်ကြိမ်လွဲချော် . . .

ပြန်ဆုံခဲ့တယ်ဆိုပေမယ့်
ပြန်မဆုံနိုင်တော့ဘူးမလား ။

အရေးကြီးပါတယ်
ချစ်တယ်ဆိုတာ
တခါတလေ မိတ်ပြတ်ဆွေပြတ်ပဲ ။

စက်ဘီးလေးတစ်စီးနဲ့
ငါတို့သွားချင်တဲ့နေရာကို
ရောက်မယ်မဟုတ်ဘူးမဟုတ်လား . . .

ငါကြိုးစားတယ်
ငါရုန်းကန်တယ်
ဒါပေမယ့်
မတော်တဆတွေဟာ ခဏခဏပဲ ။

ပြောပြပါဦး
ချယ်ရီတွေအကြောင်း . . .
ကိုယ့်ကိုကိုယ်သတ်သေသွားတဲ့
ဆာမူရိုင်းတွေအကြောင်း . . .
အဲ့မှာ နေသာကြောင်း. . . မိုးရွာကြောင်း . . .

ကျည်ဆံရထားတွေဟာ
အရမ်းအပြေးမြန်တယ်နော်
နင့်လိုပဲ. . .

ပျော်ရွှင်စရာ အမှတ်တရတွေက
သေရာပါဒဏ်ရာတွေလား . . .

အခုတော့ အသည်းပုံလေးဟာ
အသည်းပုံလေးအတိုင်း ကျန်ခဲ့ပြီပေါ့လေ ...

ငါလွှတ်လိုက်တဲ့စက္ကူစွန်လေး
ပျော်ရွှင်ခြင်းဆီ စိုက်စိုက်မြိုက်မြိုက်ရောက်ပါစေ ။

- ယဥ်ဝယ်ထက်

အသည်းကွဲတယ်ဆိုတာကလည်း
အသည်းရှိခဲ့လို့ပါပဲ
အချစ်မှာ အခြားဘာရှိရမှာလဲ ။

- စိုင်းဝင်းမြင့်

လိုအပ်ရင် ရွှေနန်းပြဿဒ်တွေထိ
ဇိမ်ပြေနပြေ မီးတင်ရှို့လို့ရပါတယ်
ကိုယ်ဟာ အမှိုက်တစ်စ။

- လင်းမာအို

အဲ့ဒီတုန်းက မိုက်မဲမှုကို
အခု လိမ္မာယဉ်ကျေးမှုနဲ့ မလဲပါဘူး
ဘာနဲ့မှလည်း မလဲပါဘူး

- အောင်ချိမ့်

ဘ၀ဟာ လက်တွေ့သိပ်ဆန်တယ်
ရက်စက်တယ်
ကျနော်တို့က အဲ့ဒီရက်စက်မှုကို
လိုချင်လို့ အဝေးကြီးက ရောက်လာတာ။

-အောင်ခင်မြင့်

ထောင့်ချိုးတွေ သိပ်များပေမဲ့
ကမ္ဘာဟာ လုံးဝန်းတယ်လို့
အယောင်ဆောင်ထားတယ်
ဘေဘီရယ်
ဒါကြောင့်
ငါတို့ တိုက်မိတယ်
ဒါကြောင့်
ငါတို့ ခိုက်မိတယ်

-မြကျေး

ဘ၀အဆက်ဆက်
တစ်စက်ချင်း ကျလာတဲ့
ရေစက်ကလေးတွေ စုပြီး
မင်းနဲ့ ဆုံချင်တယ်။

ချစ်ခြင်းမေတ္တာကသာ အနိုင်ရရှိပါစေ။

•ဆူးရစ်နွယ်

ကိုယ် မကြားချင်တဲ့ အတိတ်တွေကို
သတ်ိရတိုင်း တူးဆွပြီး
ဘယ်အချိန်ထိ နာကျင်စေမှာလဲ ။

အဖန် ငါးရာ ငါးကမ္ဘာ
ကိုယ် ငိုခဲ့ပါတယ်...

-မောင်ဆောင်းခ
-တိတ်တဆိတ်နာကျင်ရခြင်းတွေ

ပင်ပန်းတယ် မဟုတ်လား
ထုတ်မပြောချင်တာတွေလည်း
ရှိတယ်မဟုတ်လား
ငိုလို့မရလို့ ရယ်လိုက်ရတဲ့
ဟာသတွေလည်း များပြီမဟုတ်လား
အဆင်ပြေရဲ့လားမေးတိုင်း
ဒီလိုပါပဲလို့ ဖြေတတ်ခဲ့တာ
ဘယ်အ ချိန်လောက်ကတည်းကဆိုတာ
မမှတ်မိတော့ဘူး မဟုတ်လား ။

▪️မြကျေး

" ငါ့ဆီမှာ အကြာကြီးမနေချင်တဲ့သူ "

မဝယ်လည်း
စျေးမေးကြည့်လို့တော့ရတယ်
ဒါအပေါစားပဲဟ ဆိုပြီး
ငါ့ကိုစိတ်မဝင်စားခဲ့တဲ့နှစ်များ
ငါနေစရာမရှိတဲ့နှစ်များ
နေချင်သလိုနေခဲ့တဲ့နှစ်များ
ပြီးတော့
နေလို့လည်းဖြစ်ခဲ့တဲ့ နှစ်များ
နင်ပစ်ချတာကိုခံရတာတန်တယ်
ကြီးကြီးကျယ်ကျယ်ပြောရရင်
လူတစ်ယောက် အသည်းကွဲပြီဆို
ဆုံလည်ကုလားထိုင်ပေါ်ကနေ
ဒိုင်တစ်ယောက်လို ငါအကဲ ဖြတ်နေခဲ့တာ
တစ်ယောက်မှငါ့ကီး မမှီဘူး
ခုထိရင်ဘတ်တစ်ခြမ်းကို ဆရာခိုလူးနေရတုန်း
ဒါပေမယ့် အပြစ်မမြင်ပါဘူး
နားထောင်မယ်ဆို
သတင်းကောင်းပဲပြောပြချင်တာ
အောက်လမ်းနည်းတွေသုံးရတာ စိတ်ကုန်နေပြီ
ကျန်ရစ်ခဲ့သူတစ်ယောက်ဆိုပေမယ့်
ရက်စက်ခဲ့သူတစ်ယောက်လို့တော့
နင့်ကိုနောက်ဆံမတင်းစေချင်
အမြဲတမ်း စိတ်ထည့်ထားတယ်
ကိုယ်က ကျေကျေနပ်နပ်ပေးရမယ့်သူ
ဘာတွေဖြစ်ခဲ့ဖြစ်ခဲ့
ကျေရတာလည်းတန်တယ်
သေရတာလည်းတန်တယ်
ပြန်လည် ကြိုဆိုခွင့်ရရင်တော့ အတန်ဆုံးပဲ
ပြတင်းပေါက်သာပိတ်ရင်ပိတ်မယ်
ခွင့်လွှတ်ခြင်းကိုမပိတ်ပစ်ဘူး
မိုးတွေသည်းလာတိုင်းလည်း
ဟိုငေးဒီငေးနဲ့ မျှော်နေကျ

စိတ်မကောင်းစရာပါ …..

ပြန်တော့ပြန်လာပါတယ်
အဝတ်အိတ်ပါမလာဘူး ။

-ချောနကျယ်

နေထိုင်ချင်တဲ့မြို့ရယ်လို့မရှိပါဘူး။
မင်းရှိနေလို့ သွားချင်တာကို
သွယ်ဝှိုက်ပြီးပြောလိုက်တာပါ။

-မောင်မြင့်လွင်

မြို့သားတွေကို လိုက်မကြည့်နဲ့
ခင်ဗျားကိုယ်တိုင် မြို့ပြင်ရောက်သွားလိမ့်မယ်

ပတ်ထား နာရီစင်ကိုပတ်ထား
နန်းမြို့ရိုးကို ပတ်ထား
ရှိနေတုန်း ဝအောင်ကြည့်ထား

နောက်ဆို ဧရာဝတီလည်း မသေချာဘူး
ရှမ်းရိုးမလည်း ဖြူရင်ဖြူသွားမှာ
မန္တလေးတောင်နဲ့ ဓာတ်ပုံတွဲရိုက်ထား
ကျောက်စာတွေ အလွတ်ကျက်ထား
ဒါတွေလည်း မသေချာဘူး

တောင်သမန်ကို အမှတ်တရ လက်မှတ်ထိုးခိုင်းထား
မဟာမြတ်မုနိရောက် အမှတ်တရ
ငွေမပိုလည်း ဝယ်ထား
ရွှေကျောင်းကြီး၊သုဓမ္မာဇရပ်တန်း၊ပန်တျာကျောင်း

နောက်ဆို
နှောင်းလူတွေကို ကျိန်ပြောရင်ပြောနေရမှာ
သတိထား...
သတိကြီးကြီးထား ၊ကြပ်ကြပ်သတိထား
သူတို့က တတိတိနဲ့ ပိပိရိရိဖဲ့စားနေကြတာ
ခင်ဗျား သိပ်မကျန်တော့ဘူးဆိုတာ သိလား

အခုက လမ်းအစုတ်တွေပေါ်က
ဘီးစုတ်လေးကြည့်ပြီး
ရင်မောရမယ့်အချိန် မဟုတ်တော့ဘူး ကိုယ့်လူ

လာပါ..
သေချာတုန်းလေး စကားစမြည်ပြောရအောင်

ဒီကဗျာရွတ်ပြီးရင်
ကျွန်တော်လည်း စကားဝဲရင် ဝဲသွားမှာ ။

- ယဥ်ဝယ်ထက်

မချစ်ဘူးလို့ပဲ လိမ်လို့ရခဲ့တယ်
သတိရခြင်းကိုတော့ လိမ်လို့မရခဲ့ဘူး ။

#ဂန္ဓမာ

ပျက်နေတဲ့ နာရီတောင်
တစ်နေ့ကို နှစ်ချိန်မှန်တယ်တဲ့

ရှိမှာပါ
သတိရတာချင်း တိုက်ဆိုင်တာမျိုး

- ကျော်ထက်ထွေး

ကဗျာ

ကျွန်တော်က ပြုံးလိုက်တယ်
ဒါကို အမေက မြင်တော့
"ငါ့သား ၊ ရူးသွားပြီ …" တဲ့
အပေါင်းအသင်းတွေက
"ဟာ…ဒီကောင်တော့
သွားပြီ…" တဲ့
ကျန်တဲ့လူတွေကလည်း
ဒီအတိုင်းပါပဲ ။
ညီမလေးရေ …
မင်းကရောကွယ် ။ ။

-စိုင်းဝင်းမြင့်

ကျွန်တော်တို့ ဆုံရန်မရှိတော့ပါဘူး
နောက်နောင်နွေမှာလည်း
ကျွန်တော်တို့ ဆုံရန်မရှိတော့ပါဘူး ။

*အောင်ချိမ့်

" လမ်းခွဲ "

ဘာမှမဖြစ်ပါဘူးဆိုပေမယ့်
ဘာမှမဖြစ်ဘူးတော့မဟုတ်ဘူး
ဒါပေမယ့် ဘာမှမဖြစ်ပါဘူး ။

ပျော်စရာတွေဆီသွားမလို့မဟုတ်လား။

ငါ့နာမည် ထိပ်ဆုံးမှာရေးပြီး
သေချာပေါက်မေ့ပစ်လိုက်ရမှာတွေကို
စာရင်းလုပ်ပေးလိုက်တယ်
မပျောက်စေနဲ့ဦး ။

ဘာပဲပြောပြော စောင့်နေမိမှာမို့
ဘာမှမပြောနဲ့ ရတယ် ။

တကယ်ပျော်အောင်နေ ကြားလား ။

နင်လမ်းလျှောက်တဲ့အခါ
ခဏခဏခလုတ်တိုက်မိရင်လည်း ဆောရီး
လွမ်းနေမှာတော့ သိတယ်မလား ။

ဘိုင့် . . . ။

- ယဉ်ဝယ်ထက်

တစ်ယောက်တည်းနေတတ်ပြီဆို
တစ်ယောက်ယောက် ရောက်လာတယ်
သိပ်မကြာတဲ့အချိန်အတွင်းမှာပဲ
အဲ့တစ်ယောက်ယောက်က အဝေးကြီးထွက်သွားတယ်။

ငါ့မှာတစ်ယောက်တည်း ပြန်နေသားကျအောင်
ပြန်ပြီးပုံသွင်းယူရတယ်။

အရာရာကို ဘဝကြီးနဲ့ချီပြီး
မျှော်လင့်တတ်တဲ့ငါ့အတွက်တော့
တော်တော်လေးအလုပ်ရှုပ်ပါတယ်။

-လင်းညီ

ကျွန်တော့်ကိုယ် ကျွန်တော်
ဘဝင်မြင့်နေတာဆိုလို့
ခင်ဗျားကို ကျွန်တော်ကလွဲရင်
တခြားတစ်ယောက်ယောက်က
ဂရုမစိုက်နိုင်ဘူး
အကာအကွယ်မပေးနိုင်ဘူး
ကျွန်တော့်လောက် မချစ်ပေးနိုင်ဘူးပဲ
ထင်နေတာ
ခင်ဗျားက ကျွန်တော်မရှိလည်း အေးဆေးပဲဆိုတာ
မေ့မေ့သွားတယ်
ဒါဟာ ဘယ်လောက်ရူးသွပ်တဲ့ခံစားချက်လဲ။

- လင်းမာအို

ငါ့ထက်အပုံကြီးသာတဲ့ရည်းစားရလို့တဲ့

ငါ့ကိုလာမော်ကြွားတယ်

မယ်မင်းကြီးမက ။

အေးလေ ဝမ်းသာပါတယ်။

“ မိဘအသိုင်းအဝိုင်းတောင့်တယ်

ချမ်းသာတယ် ရုပ်ချောတယ်

ယောက်ျားပီသတယ် ” တဲ့

ငါကအေးအေးဆေးဆေးပဲလူသေကောင်လို

ငါကလူသေကောင်လိုအေးအေးဆေးဆေးပဲ။

“ နင့်ကောင်ငါ့လိုကဗျာရေးတတ်ရင်ခက်မယ် ”

အေး ခက်မယ် ။

- အောင်ချိမ့် -

ကျွန်တော့်ဘဝမှာ
စိတ်ကြီးဝင်စရာ ဘာမှမရှိပါဘူး
ဒါပေမဲ့
သူမရဲ့အသံလေးကို
နားနဲ့ဆက်ဆက်ကြားရတဲ့အချိန်မျိုးမှာတော့
ကျွန်တော်ဟာ ဘဝမေ့တတ်ပါတယ် ။

~ မောင်သိန်းဇော်