#رغبة_جسد 16/17/18 ¥
بقلم : آلاء آدم إبراهيم
‏الصراحة انا ما حاسة بنفسي غلطانة!! ولو التاريخ أعاد نفسه كنت تاني حأختار محبه عصام!! ما بهمني إذا كان ببادلني ذات الشعور ولا لا؟؟! لأنه بكفيني مجرد أنه قريب لي وقد يكون حاسي بمشاعري!! كتار جداً بختلفو معاي وبالأخص المتزوجات!! خايفين يحصل ليهم نفس الشيء!! بس ليهم الحق يخافو إذا رجالهم زي عصام!! ومليحيظة صغيييرة الراجل ما ملك حر ورثتية من ابوك؟! ده مخلوق ضعيف واضعف منك في الأمور دي بالتحديد !! و عشان كده ربنا حلل ليه اربعة!! والعندها إعتراض في حكم ربنا!؟ تبقى دي مشكلتها وتشوف ليها حل برضيها؟! زي تطلق مثلاً!!؟ (بهزر والله😁) اصلا انا آخر واحدة ممكن تقدم نصيحة في الموضوع ده...!! المهم كل واحدة وأدري بزوجها، وحبها، وصبرها، وقدرة تحملها، وثقتها في نفسها..!!؟
المهم وانا خايفة وبلجلج عيوني!؟
عبير قالت لي كيف؟! عايزة تتعلمي منها الشلب؟!
_ضحكت وقلت ما بالضرورة يكون شلب راجل متزوج؟! عايزة اتعلم كيف اصتاد راجل!! علي قولك لازم اتلحلح والرجال ما كائنات فضائية؟!
_سكتت وهي بتعاين لي وهي مغبونة مني؟! سبحان الله اول مره ألاحظ لعبير زعلانة كده لمن عرق جبينها وقف؟! وقلت الليلة سجمي الزوله دي حست علي؟!
_بت خالتها قالت خلونا في المهم!! البت جات ضيفة عايزة تقرأ الجامعة مع بت خالتها!! وقاعده معاهم والمسكينة مأمناها علي بيتها واولادها وبطلع الشغل مرات بتخليها في البيت!!! ومرات بكون ما عندها جامعة؟! والبت اخر اهتمام ودلع للراجل الأكل في المواعيد والبيت نظيف ومرتب والبخور وهي تلبس الا البجامات التلت اربع؟! وتتجدع قدام الراجل؟! والغبيانة ديك ما حست علي شيء لحدي ما يقوم تعبت في الشغل ورجعت البيت بدري وقبضتهم في غرفة نومها؟! فضحتهم وبشعت بيهم وبعد َده كلو ما بردو ليها قلبها وعرس بت خالتها بعد هي طلبت الطلاق؟! وبقت سيرتها على كل لسان!! وهي مبسوطة وقالو سافرت بره السودان!! وخلت دي خاشة في حاله صدمة ونفسيات وبتربي في عيالها!؟
_قلت ليهم اعوذ بالله!! معقوله في بنات كده!؟
_عبير قالت لي كتااااااار وفي كل مكان!!
_قلت ليها ممازحة اعملي حسابك طيب!! وبقيت اضحك؟!
_هي ابتسمت وما ردت علي مباشر!! اخدت صننة كده وقالت لي انا بصراحة بثق في راجلي لكن ما بثق في بنات الحر*م!!؟
اتاريها بت خالتها اتحسست من كلامي وكانت بتعاين لي من فوق لتحت والكلام في رأس لسانها؟! وانا ما انتبهت ليها والله وما قصدتها بشيء؟!
لكن عبير لاحظت وقالت ليها مالك اتغيرتي فجأة!!؟ طلعت غير انها سقيلة وما بتعرف تتكلم ومعقدة كمان!!؟ قالت ليها جارتك بعد سمعت القصة قالت ليك اعملي حسابك؟! يعني تقصد عشان البت شلبت راجل بت خالتها معقولة انا بت خالتك اعمل فيك زيها؟!
_انا ضحكت من أعماق قلبي؟! شوف البت دي بتفكر كيف؟! والله ولا ختيت الموضوع في رأسي!! وشكلها اتغاظت تاني؟!
اعتذرت وقلت مستحيل افكر كده وانا بعرفك من وين اولاً!! وثانياً لوعايزة احذرها منك بجرها طرف وما بقول ليها كده قدامك؟!
_عبير اتدخلت وقالت ليها ما بتكون قصدت كده!! بتكوني فهمتي غلط؟!
حبيت اللطف الجو وامهد الطريق لعبير بما أنها اصلاً طلعت شاكه فيني؟!
_قلت ممازحة ياسلمى تعمل حسابها يعني مننا كلنا؟! وضحكت!! لكن عبير فكت ضحكة شماتة فرمت مصاريني؟! وقالت منك انت؟! وتاني ضحكت!! استفزتني شديد!!؟ بس ما بينت ليها زعلي!! وقلت مستبعدة الفكرة موووش!!!
_ولسسسه سعادتها وبسمتها في وجهها قالت لي عصام ما بعاين ليك!! صاح انت حلوه وفاهمة والف من يتمناك!! بس عصام ما منهم!! انا بعرف زوق راجلي؟!
_لم اتغظت شديد! قلت ليها بإستهتار شفنا زوق راجلك واشرت عليها باصبعي من فوق لتحت؟! قلت التبقى تبقى والتمطر حصو!!!؟
رديتها ليها لمن بسمتها اتجمدت في وجهها!! وقبل ما تردح لي انقذني عصام!! اتصل عليها وسامعاها بتقول ليه لالا ما عايزين حاجة بس سلامتك ياروحي!! انا ابتسمت!!!
_وطوالي فتحت الواتس لقيتو استلم رسالتي لكن ما رادي علي!؟ رسلت ليه اموجي حززين!! يعني ليه ما معبرني!!
لم قفلت وقبلت علي كنت حريصة اغير الموضوع عشان ما نتشاكل وكنت بسأل في سلمى!! اها بورتسودان كيف؟! وجوها والظروف المعيشية!؟ فما اديتها فرصة ترجع للموضوع عشان تبين لي انه واكل معاها جنبة؟!
وشكله بعد قفل من مرتو شاف رسالتي!! واعتذر عشان رد علي بدري وبقى يبرر بالشغل والجري؟!
طوالي ايموجي محمر الخدود وقلت ولا يهمك مقدرين!!؟.
تقول عرفتني بتراسل مع راجلها؟! قالت لي سرحانه وين وبتتبسمي كده؟! معقوله سعادتي بعصام باينة للدرجة دي؟!
ضحكت وقلت ليها بصتاد لي في زول؟! قالت لي ممازحة اعملي حسابك من القوقو!؟ بادلتها الضحكة وقلت ليها في قوقو نضيف ومستورد؟!

_قالت لي شكلك فتحتي ما كنتي كده!!!؟
_ابتسمت وقلت الحياة تطلب كده؟!
وعم السكون!! لحدي ما كسرت سلمى حاجز الصمت وقالت لي اسسه طالعة ونازله كده ما لقيتي ليك عريس نهااائي!! ابتسمت وقلت ليها زي ما انت معدياها من ولاية للتانية ولسسه منتظرة!!؟
_عاينت لعبير وعيونها بتقول يعني حكيتي ليها عني؟!
_عبير صرت وجهها وقالت ليها وهي بتتصنع الضحك!! كلمت قبل ما تجي ولاء عنك وعن جولاتك من كسلا للقضارف وهدا جيتي هنا؟!
_انفعت وقالت مشيت القضارف عشان عرس رنا!! بت عمها، والقضارف وضعت مرت اخوي، يعني ما حايمة ساااي!! بالجد بصلتها محروقة وما عندها أخلاق؟! اتفعاليه خلاص وبتزعل سريع!!
_عبير اعتذرت وقالت قلناها من باب الهزار ما تزعلي!!؟ شالت الجبنة ومشت علي المطبخ!؟ انا شعللتها وهربت! قلت ليها راجعة البيت!! اصلا خليت امي خدرانة ولسسه ما شادة حيلها!!.
_عبير شكلها اتغاظت مني بالجد ولا بالمجاملة ما قالت لي اقعدي حبه!! قمت بصلح في توبي وسمعت صوت العربية ققققف قفل بقوة!! عرفت ده عصام جا؟؟ وكانت بتخارج فيني سريع عايزاني ارجع بيتنا قبل ما يدخل!! عملتها واضحة عديل!! بس انا لو ما شفتو بموت!!؟ طلعت وخليت تلفوني في الكنبة!! ولم وصلت معاي قريب الممر البيناتنا وما فضل ليها الا تدفرني عشان اخش بيتنا؟! خبطت جبيني وقلت ليها نسيت تلفوني!؟ تخيلو قالت اي انا بجيبو ليك!؟ ونادت سلمى سلمى شوفي تلفون ولاء ده جوه؟!
ومن ذكرت اسمي سيد الاسم دخل وحسيته عاين لي قبل ما يعاين لمرتو!! ولا انا بتوهم ما عارفة!!
مشت عليه وسلمت واستلمت منو أكياس!! وانا متسنده علي الخيطة وعاملة نفسي مدنقرة في حين أنه خطوط مكوة قميصه انا شايفاهم بقعر عيني؟!
قبل ما يدخل علي البرنده سلم علي من بعيد!! وقال لي رجلي حارة ولا شنو؟!
_انا لمن اتنهدت بصعوبة لم ريحتو وصلتني في مكاني!! وصوتو كالعادة بربشني وما بقدر اتكلم!! قلت ليه اااااا؟!
ضحك وقال لي دايماً سرحانة وما مجمعة!! انا ضحكت وقبل ما ارد عليه سلمى ختت لي التلفون في وجهي!! شلتو ودخلت بيتنا؟!
كنت مبسوطة شديد وكأني استقبلته بالأحضان!! مشيت لقيت امي نايمة ووعد نايمة جنبها!؟ شربت موية برااحةرجعت غرفتي عشان ما اصحيهم!!؟ قفلت علي الباب!! لكن خليت المفتاح بره عشان لو وعد جات ما تزعجني؟! قلعت توبي وطلعت العطر من دولابي!! ونزلت مرايه الحيطة الكبيرة ديك وختيتها قدامي في السرير وفكيت شعري ورشيت رشتين في رقبتي والتالتة في يدي وفركتهم في بعض وشميتهم!؟ نمت ولا غمرت ما عارفة!! بس لم فتحت لقيت نفسي حاضنة المرايا وشعري منكوش والعصر بأذن!!؟
ابتسمت ورقدت ظهري وزحيت المرايا من جنبي وقلت لمتين حأفضل علي الحاله دي؟! لازم اعرف رأسي من رجلي!! عصام جنني حرفياََ!!
لميت شعري وطلعت على الحمام الله يكرمكم!! واتوضيت صليت!! وانا في صلايتي جاتني وعد!!
_اها حصل معاكم شنو؟!.
_قلت بإستغراب بالنسبة لشنو؟!
_قالت العقده والجبنة وبت خالتها ان شاء الله نكون ظلمناها اليوم داك وطلعت ظريفة؟!
_ابتسمت وقلت لو مهتمة كده كان تمشي انا ما فاضية ليك؟! قمت طبقت صلايتي وخليتها قاعده متنرفزة مني!! طلعت أكلت لأني حموت من الجوع!! ورجعت جهزت غياري!! وقعدت اتونست مع امي وابوي للمغرب!! هم اتغدو وانا كنت شبعانة لاني ماكلة!!
رجعت غرفتي ولقيت رسالة من عصام!! قال لي ان شاء الله العطر عجبك ؟!
_ابتسمت وقلت شديد!! بالجد رغبني في حاجات كتيرة؟! غايتو ختيتها ليه ظط في وجهه لازم اصل لنتيجة لمتين نقعد في التلميح؟!
_رسل لي ايموجي مخلوع وقال لي زي شنو مثلاً؟!
_ضحكت وقلت في نفسي تلقاها في الغافل دي؟! رديت بضحكة وقلت رغبني في الحياة!!
_قرأ الرسالة وما رده مباشرة!!؟ شكلة ده ما الرد المتوقع مني؟! لاني دائماً كاسرة للتوقعات!؟
بعد كم دقيقة قال لي الحياة حلوه بس انت بتخافي تعيشيها؟!
_قلبي بقى يضرب!! ويدي رجفت!! وقلت اعيشها كيف طيب؟؟ ومع منو؟!
رد لي علي مع منو؟! وقال لي حقيقة ما بتتجازف ليك براك لازم يكون جنبك سند؟!.
_ابتسمت! وحبيت اعمل فيها ما فاهمة؟! قلت ليه بس ابوي سندي!!! وامي واخواتي اكبر داعم لي!؟
_رسل لي ضحكة وقال بحب براءتك وطيبة قلبك؟!.
_ضحكت وقلت في نفسي بريئة حبوبتك!! ما شفت انا بتمنى اعيش معاك شنو؟!
رديت ليه بإبتسامة وورده لكن كنت حريصة اني ما ارد عشان يكون رد قصاد رد؟! حبيت اخليه يفتح موضوع عديييل وقد كان؟!
_تاني ماف شيء يرد عليه وفي نفس الوقت شكله حابي يدردش معاي!!!؟ عمل لي احببتة علي إبتسامتي؟!
وصدمني بالرسالة الما كنت متوقعاها في الوقت الحالي؟!
قال لي انت مخطوبة ولا مرتبطة؟!
انا فكيت التلفون من يدي ويديني الاتنين في خشمي عشان يمكن أصرخ لا شعورياً؟!

ضحكت وما عرفت اقول شنو؟! ما عايزة اجابة بنعم ولا لا؟! عايزاه يحس بتقلتي!!
رسلت ضحكة وقلت يهمك في شنو إذا كنت مخطوبة ولا لا؟!
رسل ايموجي محرج وضحكة وقال لي يعني لازم تحرجيني كده؟!
_ضحكت وقلت العفووو منك بس حابه اعرف السبب؟!.
_وتاني صدمني؟! قال مستحيل بنت زيك ما يكون عندها خطيب!! ولو فعلا ماف انا عندي ليك واحد؟!
_انا قمت علي حيلي!! ودقات قلبي بقيت اسمعها في اضني؟! وما عرفت قول شنو؟!
_باغتني تاني وقال لي هربتي ويين!؟ انا منتظر ردك دي مسألة حياة او موت ومعاها ضحكة؟!
_اتشجعت غايتو وقلت في كم خيار لكن لسسسه ما اخترت فيهم واحد؟! لازم اتريث في الأمور دي!!.
_قال لي يعني دي إشارة لأنه ناسك كتاااار اممممم ومعاها ايموجي بنظرة لئيمة!!
_انا ضحكت وقلت انت حبيت تعرف؟!
_قال لي يعني زولي يسحب كرتو ويستسلم؟!
قلت ادرعيها والتبقى تبقى؟! قلت ليه لو زولك بنفس صفاتك بينزل في القائمة؟! رسل لي ضحكة طوييييلة عريييييضة اوحت لي بأنه انتصر علي؟! بالجد دردقني كيف ما عارفة؟! مع اني برد بحذر بس اندحت وختاها لي ظط في وجهي؟!.
_وقال لي انت عايزة زي يعني؟! ومعاها الاموجي النرجسي وشايف حاله داك؟!
اتخلعت واتوترت وقلت لازم اتدارك الموقف؟! ولمن كتبت ليه غلط من شده التوتر!! قلت ده في أحلامك؟! وقفلت الشبكة وقلبي بيرجف؟! والليل كلو متوترة!!
وعاد زاتها كانت متوترة اكتر مني قالو في غلط في حاجة بتخص الإمتحان ويمكن يعيدو ليهم امتحان آخر مادة؟! فكانت متوترة شديد وكل شوية تفتح قروب الدفعة تشوف لو في مستجدات؟!.
لم شافت حالي ما بفرق عنها كتير؟! قالت لي انت مالك خايفة كده؟!
قلت ماف شيء؟!
_قالت لي ارح فضفضي لي خلينا نتخلص من التوتر ده يمكن تجيني زبحة انا من شده الخوف؟!.
_قلت ليها عويرة انت؟! هو امتحان الشهادة بعيدوه خلي حقكم ده؟! خليه على الله؟!!!
_اتنهدت وقالت ونعم بالله!!.
_حبيت اشغل بالها بشي تاني لاني بالجد خفت عليها؟! ولأنها فضولية قلت اكلمها بأنه عبير شكت فيني؟! اكيد ما حأقول عبير!! لاني لسسسه ما صارحتها!!.
_قلت ليها انا متوترة الصراحة لأنه مرت الراجل القلت ليك عايزني شكت فيه؟!
_جات قعدت جنبي وقالت دقيقة دقيقة؟! موووش انت قلتي لي حب من طرف واحد ولسسسه ما عارفة مشاعرة ناحيتك؟!
طيب إذا هو ما عارف مرتو عرفت كيف؟!
_شكلي كذبت الكذبه ونسيت!! قلت ليها بإبتسامة مصطنعة ده من كم يوم!!! لم قلت ليك مبسوطة وكده؟! اعترف لي بمشاعرو لكن لسسسه يعني تواصلنا عادي؟! وشكله مرتو حست بيه متغير؟! ولا شكت انه في مره تانية في الموضوع؟!.
_قالت لي وانت عرفتي كيف؟!
_ياخ انا الخلاني افتح معاها الموضوع شنو؟! لايوقه خلاص ومحقق بس؟! قلت ليها شكلها شافت مسج مني في التلفون ولو فتشت تلفونو وشكت في شي ما بعرف بس قال لي انها غيرانة وشاكلة!!؟
_قالت لي الصراحة ليها حق تغير وتشك؟! ماف مره طبيعية بترضى انها تتخان ولا يتجاب فيها ضرة؟!
_قلت ليها والحل شنو طيب؟!!.
_قالت لي اولا احمدي ربك انها ما بتعرفك ولا كان بشعت بيك؟!
_في سري قلت جارتي بالخيطة والله تصفق لي صفقة وامي من بعدها بتقتلني!!؟ قلت ليها ااي الحمدلله..
_قالت بس الصراحة دي غبية ساااي؟! هي براها عايزة تقلق راحتها وتخرب بيتها؟! الراجل ما بفتشو وراه؟! لازم الواحدة تكسب راحة بالها وما تشتغل بفتافت الأمور؟!
_قلت كيف يعني؟!
_قالت الراجل بتصاحب ما بتراقب؟! ليه الواحدة تنكد علي نفسها وتفتش المشاكل؟! طالما انك مبسوطة وسعيدة وكل احتياجاتك مجابة ليه تفتشي ورا الراجل؟!
فرضا لقيتيه مصاحب ولا بخونك؟! هل عندك الشجاعة تواجهي وتحاربي لحدي ما تحمي بيتك؟! وهل حتضمني انك اذا انتصرتي ما يخونك تاني ولا ثقتك فيه ما حتتهز؟! ولا حتجري شنطتك وانت بتبكي وترجعي بيت اهلك وتخليه ليها؟! لمتين حتقعد مع الوسواس ده؟! فقبل ما تفتش وراه تطرح الأسئلة دي علي نفسها؟! لانه من الآخر الراجل لا بتمسك ولا بتراقب وبمشي بمبدأ الممنوع مرغوب!!
_انا ضحكت وقلت انت؟! بتعرفي الحاجات دي كلها من وين؟!!!!
_بادلتني الضحكة وقالت لي ما متنا لكن شقينا المقابر!! وضحكنا وفجأة اتذكرت الإمتحان!! قالت لي الله يجازيك بالخير!! لهيتيني؟! ودخلت القروب لقت نفي من الإدارة للأخبار المتداولة عن إعادة الامتحان!! لمن صرخت وقامت بتنطط وبترقص وانا بضحك عليها!!
ونمت وانا متوترة ونومي مقطع؟! حيحصل شنو بعد كده؟!
لم الواطا صبحت وجهزت اتصلت لبتاع الترحيل من ستة ونص صباحاً!! شكلي صحيتو من النوم!! بس لازم اعرف جاي ولا لا عشان اطلع بدري؟! قال لي العربية لسسه في التصليح حيستلمها اليوم!! يعني بعدين حيرجعنا بس اسسه نمشي بطريقتنا؟! قفلت منه وطلعت بدري عشان الحق!! لقيت عبير وعصام جنب باب بيتهم؟! اتخلعت وسلمت عليهم وقلت ان شاء الله عافية؟!

_ردو علي وقالو ما عليهم شيء بس عصام ماشي يحجز لبت خاله عبير عند الدكتور عشان يكتب ليهم اللقاح ليها!! وطلع بدري عشان ما يتأخر علي شغله!!؟
قلت ليهم كويس!!
قالت لي منتظرة الترحيل!!؟
_ابتسمت وقلت الترحيل خسران ماشة بالمواصلات!!؟
_قال لي معقولة؟! ارح بوصلك معاي انت في طريقي؟!
_مرتو قالت ليه بس انت ماشي العيادة بتاخرها؟؟!
_انا ابتسمت وقلت شكراً ليكم بمشي بالمواصلات؟!
_انفعل وقال لي معقولة لكن؟! ليه الحاله ما واحدة؟! ولا نسيتي وقفاتك معانا!! وكان بعاين لمرتو نظام قولي حاجة!؟
_ظاهر عليها ما رضيانة وقالتها بتصنع!!؟ كان تمشي معاه خلاص ان شاء الله تصلي نص المسافة ولو وصل شارع العيادة تكملي بالمواصلات!!! اول ما كنت متحمسة للموضوع بس كلامها واسلوبها بغيظني؟! وقلت اوريها امور الشلب الصحي صحي!!؟
_قلت خلاص تمام بما أنكم مصرين!!!
فتحت الباب الأمامي وركبت!!
وخليتها واقفة مخلوعة بترسرس مع راجلها؟!
شوية كده وركب وريحة جسمه طغت علي ريحة ملطف العربية ولمن نفسي كتم!! حاولت افتح القزاز اشم هواء قال لي خليه بزيد ليك درجة التكييف لو سخنتي؟! هو ما عارف انه السخانة جواي؟!.
_قلت ليه خلاص تمام!! ولم مشينا لمده خمس دقائق كان بسألني عن امي وناس بيتنا وونسة عامة كده!! بمهد بيها الطريق؟!
وبعداك سكتنا!! قال لي بالمناسبة قلت لي عريسك عايزة مواصفاتو زي منو؟!
_انا قلبي وقف؟! ودخلت في حالة جمود!! قربت اغمر!!!
_قال لي ولاء!!! ولااااء!!!
وانا ما قادرة أرد!! مسك يدي وقال لي انت كويسة؟!
نواصل بعدين

♥️♥️أشعُر بأنّ المسافات بيننا كذبة؟!!!
أشعُر بِك بداخلي ، بجوار
قلبي ، وبجانبي تماماً!! ❤️♥️

#رغبة_جسد17¥
بقلم : آلاء آدم إبراهيم
في مرحلة من عمركم حتكتشفو أن أشد الأوجاع والآلام هي الآم الروح الما بيقدر يكشفها الطبيب؟!!
‏ وما بنقدر نكلم عنها زول؟!!
‏وما دائماً بتظهرآثارها في ملامحنا!! في اغلب الاحيان بتكون كاوية أعماقنا وبنفضل نتألم بصمت!!؟
لحدي صباح اليوم كنت شايفة اني ماشة صااح وما غلطانة وأنه قلبي حبه وده شيء طبيعي ولا إرادي؟! بس لم مسك يدي حسيت بنفسي رخييييييييصة لدرجة!! معقولة انا ولاء إبراهيم!! الما بخلي راجل يشبع من عيوني!! يجي واحد ويمسك يدي؟! ليه بعمل في نفسي كده؟! ومع اني في الوضع الطبيعي بتمنى احضنه واعيش معاه لحظات كتيرة رومانسية!! بس ما بالطريقة دي!!؟
بكيت بحسرة!! سحبت يدي منه وكان ماسكني شدييد وحاسة بدفء يده بس كانت بتكوي قلبي زي النار!!
_قال لي معليش زعلتك بدون قصد؟!
_قشيت دموعي وقلت نزلني؟!
_هدن العربية وقال لي ممكن اعرف السبب؟! بعتذر والله بس من حقي أعرف انا زعلتك في شنو؟!
_قلت ليه انا غلطت ما كان لازم اركب معاك!!!
_لو سمحتي ممكن تروقي وتشرحي لي؟!
_قلت كفاية لعب!!! انت عايز مني شنو؟! جنب العربية وبقى يعاين لي بس انا عيني ما قادرة ارفعها!! مكسورة شديد!!!؟
_قال لي بالنسبة لشنو؟!
_لو سمحت ياعصام خليك واضح وصريح معاي؟! انت فاهم أنا بقصد شنو؟! يا تجاوبني بصراحة!! ولا نزلني هنا؟؟!
_اتنهد ورفع يديه عن الدركسون!! وبقى بعاين لي؟! قال بصراحة وما اكذب عليك!! انا مرتاح ليك؟ بالرغم من أنه كلامنا محدود وما بنتعارف من زمان!!؟ لكن لم اشوفك بحس بالراحة؟! بتمنى ادردش معاك وتكوني قريبة دائماً!! بس ما اكذب عليك يابت الناس انا ما قادر احدد مشاعري ناحيتك شنو؟! ما ظنيت يكون حب!! لأني والله بحب مرتي وانت عارفة كده كويس!! ولا يمكن يكون عايزك صديقة مقربة!؟ ولا يمكن أكون معجب بيك!!؟ المهم في مشاعر اتحاهك ما قادر اتخطاها ولا اعرف نوعها!! بس بتمنى شوفتك وقربك؟! بتمنى اكون وضحت ليك بالطريقة الصاح والانا بحسها!!؟ وبتمنى ما تزعلي مني!! لأني ملاحظ نظراتك لي وعايش شعورها قبل المره!! يمكن ما تكوني صرحتي بمشاعرك ولا حتعمليها لأني فاهمك أكتر من نفسك؟! بس عيونك فضحتك؟! بتمنى صداقتنا وخوتنا تستمر طول العمر!!؟ بس إذا انت ما بتقدري تسيطري علي مشاعرك وقربك لي بإذيك!! انا مسامحك وبحترم ااي قرار تتخذيه!؟ أهم شيء عندي سعادتك وراحة نفسك؟!
_انا اتخذلت!! احساس مؤلم لدرجة لا توصف!! إحساس أنك غير مرغوب فيك وأنه مشاعرك الطرف التاني ما قادر يفهمها ولا يتقبلها!! شعور أصعب من الموت بالتأكيد!!؟
اقول شنو؟! وهو ما قادر يفهم!! اشرح ليه كيف أنه الأمور خرجت عن سيطرتي؟! بس انا العملتو في نفسي!! انا العاينت لحاجة ما حقتي من الأساس؟! فلازم استحمل العواقب!! وكمان دي حاجة انا كنت متوقعاها بس ما كنت قايلة كسره الخاطر صعبة كده!!؟ اتنهدت بصعوبة وقلت ليه حصل خير!!
_قال لي بدهشة!!! بس كده؟؟!
_ابتسمت وقشيت دموعي!! وقلت متوقع مني احنسك ولا اترجاك مثلاً؟!

_إبتسم وقال لي انت بت مميزة شديد وغاليه علي ووالله ما عايز اخسرك ولا بهون علي اخدعك ولا اعيشك حاجة انا ما بقدر اكملها معاك ولا عارف نهايتها شنو؟! وكمان ما تنسي عبير!!!؟ ده اكتر وقت هي محتاجة لي فيه!! لازم اكون اقرب ليها من نفسها وارعاها!! لاني لم اخدتها من اهلها اتعهدت امام ربنا اني اشيلها في عيوني وما اقصر في حقها!!
_قاطعتو وقلت عارفة ما تشرح لي عشان كده انا متفهمة!!؟
_قال ممازح عشان كده ما بقدر افكر في نفسي ولا في حاجة تانية غيرها؟! لكن خليك قريبة يمكن مستقبلا اغير رأي!! وضحك!!؟
_متأكده انه بهزر بس وجعني شديد وزاد جرحي!! اتنهدت بصعوبة مبالغ فيها لمن نفسي كتم!! وعيوني اتملو دموع بس ابيت اخليهم ينزلو قدامه!!؟ وقلت ليه انا ما خيار تاني؟! ولا علاقة ثانوية معلقة ممكن ترجع ليها وقت ما تحب؟!
_شكله اتأثر وندم على كلمته لأنه ما حسب ليها حساب!!؟ وبقى يتأسف ويقطع الكلمات ما عارف يقول شنو؟ ولا يلطف كلماتة بشنو؟!
شلت شنطتي في كتفي وقلت ليه بإبتسامة مصطنعة! ما تشغل بالك عارفاك ما تقصد تضايقني!! وتصل بالسلامة الزمن فااات!! وفتحت باب العربية وما انتظرته يرد ولا يعقب علي كلامي!! وكان مصدوم ونادي بإسمي!؟ انا حزينة جداً بس ليه لم ينادي بأسمي قلبي بيرجف من الفرح!! ليه بحس كأنه أول مره اسمع اسمي!! ليه انا بحبه للدرجة دي؟!
لم بعدت منه ودخلت بشارع غريب علي ولا عارفة انا ماشة وين؟! المهم مكان بعيد عنه!! قعدت تحت ظل شجرة وبكيت بحرقة!! وماف زول قرب علي ولا سألني؟! كملت بكيتي وغسلت وجهي من سبيل قريب مني وما عارفت زاتو طريق الرجعة لأنه رجولي هي الكانت سايقني!! المهم قدرت اطع علي الزلط وركبت المواصلات ومشيت الشغل وانا ما فاهمة اااي حاجة ولا عندي نفس في شيء!! الزملاء لم شافوني استغربو وقالو لي دامك تعبانة ليه جاية الشغل؟! اخدي اورنيك مرضي واطلعي!! وفي منهم اتبرع أنه يرجعني؟! شكرتهم وقلت انا كويسة بس شوية صداع وفتور!!؟ بس خجلت اقول وقلب مكسور!! وما طلعت من مكتبي لغاية نهاية الدوام وفطور ما فطرت قدر ما اصرو علي!؟ وجابو لي سندوتش رجعت بيه البيت لمن خمر في الشنطة وانا ناسياه!! ده كله كوم وحقيق ناس البيت كوم تاني!! مالك والحاصل عليك شنو؟! وعيونك منفخات ليه؟! امي تسلم الراية لوعد ووعد تسلمها لأبوي؟! بالجد كنت مضغوطة من كل النواحي!! والطامة الكبرى أني ما بقدر اشكي ولا اعبر عن الجواي لأي واحد فيهم!! دخلت ونمت وما قمت الا بعد المغرب!! جو ينادوني للغدا لقوني بصلي وبعد عشرة دقائق وانا علي نفس الحاله!! جمعت صلاة الظهر والعصر والمغرب مع بعض!! كنت محتاجة اني اناجي ربي!! هو الوحيد العارف الجواي!! هو الخلاني اختبر الشعور ده؟! وهو البيده ينتشلني من القاع المظلم الأنا فيه للنور!!؟
بعد خلصت قمت ورقدت وطفيت النور!!! جا ابوي ناداني ابيت أرد وعد بقت تفتش لي اعذار وقالت لأبوي مصدعة بلعت مسكن ونامت!! حاولت تتكلم معاي هي بس بدون فائدة!!؟ ما رديت عليها!! وبعد تأكدت أنهم كلهم نامو قمت براااحة فتحت باب الغرفة ومشيت الحمام الله يكرمكم وجيت صليت العشاء قريب الساعة واحدة ولا اتنين صباحا ورجعت نمت!! والحمد لله صباح اليوم التالي كان الجمعة عطلة نهاية الأسبوع!!؟ لأني بالجد ما كنت قادرة اطلع علي الشغل!! كنت عايزة اعيش حزني زي ما عشت فرحتي الماتمت!! وانا بتسوك امي صبحت علي كانت جايبة اللبن!! رديت عليها!! وقالت لي اها بقيتي أحسن!! أبتسمت وقلت احسن كتير ياغاليه!! بعداك وانا راجعة غرفتي اتلفت ولمحت الممر البينا وبين عبير مقفول؟؟! مبني عديل؟! استغربت وقلت حصلت!! سريع سريع كده يقفل الممر البيناتنا!!؟ العبرة خنقتني ورجعت غرفتي لقيت وعد قاعدة في سريري!! من شفتها قلت اصبحنا واصبح الملك لله!! وابتسمت!!
_قالت لي أمس ما حكيتي لي؟ وقبيل الصبح ما حبيت افتح معاك الموضوع بدري!! واسسسه ما عندك اااي مفر!!
_قلت ليها من الآخر كده نحن افترقنا للأبد!؟
_قالت لي راجل المره!!؟
_ابتسمت وقلت ااااي!!!
_فرحت وقالت لي احسسسن لأنك بتستحقي افضل منه؟!
_عيوني لمعو بالدموع وقلت في سري يمكن يكون في الأفضل بس انا بعشق عصام؟!
_قالت لي ما تتأثري ولا تزعلي والله ربنا خاتي ليك حاجة سمحة!! انت تستاهلي كل الخير!! انا زاتي احترت في أمرك؟! ولاء العمرها ما قالت لراجل بحبك في النهاية تقع ليها في راجل متزوج؟! بالجد الحياة ظالمة وقاسية بس ما للدرجة دي ياااخ واكيد ربنا ما بظلمك بس اصبري!!
حضنتها وبكيت بحرقة!!
بعد هديت وقالت لي ابوي شايل ليك هم من أمس ارح نشرب اللبن معاهم هناك عشان ما تحسسيهم بشيء؟! قلت ليها تمام!!
_بالمناسبة ما وريتيني السبب شنو؟!

_ابتسمت وقلت اختار سعادتو مع مرتو وطلع ما متأكد من مشاعرو ناحيتي عشان كده تركنا؟!
قالت لي بلاء وانجلى؟! ضحكنا وطلعنا ماشين علي ناس امي!! قلت ليها جماعتك شايفاهم قفلو الممر البيناتنا؟!
_قالت لي بدهشة عاد فاتتك كبرة مشكلة؟!
_اتخلعت وقلت مشكلة شنو؟؟!
_قالت لي سيد البيت جاب عمال قفلو الحيطة!! وما كلمو عصام!! ولم اتصل شاكل الراجل قال ليه مرتك اتصلت علي كذا مره عشان نقفلها؟! وهي في نفس الوقت شكلها ما كلمتو عشان كده جا وعمل معاها شكلة لرب السماء واول مره اشوف عصام منفعل كده لمن بيخبط الحيطة بيدوو؟! وبسأل فيها كيف تجيب رجال البيت وما تكلمو!! وهي تبكي وبت خالتها بتهدي فيه وبتسكت فيها؟! َ َوابوي كان في الشغل ولو ما امي اتدخلت وطلعتو بره البيت قرب يطلقها؟؟!
انا لمن قلبي ضرب!!!
_قالت لي شفتي الحسنة جزائها السيئة؟! شابكني عبير عبير هدي مشت تتخلص منكم؟! وبعد ده كله امي متافقاها وقالت ليها عندك حق ومن اول يوم من المفترض الحيطة تتبنى؟! في الآخر دي خصوصية والبيوت ليها حرمات!!؟
وهي تبكي وتتأسف من امي ساااي وانا ولا اشتغلت بيها ولا جيت عليها!! دخلت امي وتبعتها للبيت وقعدت شوية بعد هدت وامي المسكينة ادتها غسلت وجهها وعملت ليها عصير!! حتى نادتها بت خالتها بالحيطة قالت ليها بتك بتبكي؟!
والله كانت دراما بايخة كيف!! ومن اول انا شاماها واسسه خلاص كرهتها مره واحدة؟!
_في سري قلت لو عرفتي سببها حتعذريها!! قلت ليها ما عندنا بيهم شغله ربنا يهدي سرهم!!؟ بس طالما هي اختارت كده من يوم الليلة هي بطريق وانا بطريق؟!
الصراحة سببي بختلف عن سبب وعد!! الأخيرة زعلانة منها بسبب الممر!! بس انا ما عايزة حاجة تربطني بيها وبراجلها خلقتهم ما عايزه اشوفها؟!
بقت تنادي بالحيطة تسلم وبترد ليها امي وانا مره مره كده بسلم!! لكن طوالي بترسل لي في الواتس وانا برد بالنزاجات!؟
وما بلاقي عصام كتير بسمع صوتو لكن ما بشوفو!! لم اطلع الصباح علي الشغل مرات بكون سبقني وطلع!! ومرات بتكون العربية واقفة بس هو ما باين!؟
كانت ايام عصيبة وقضيتها بين غصة حلق ودموع وألم في القلب!!! وفي نفس الوقت كنت بظهر قوتي المصطنعة لناس البيت؟!
ومره أسبوع واكتر وانا مسكت رجلي منهم لكن امي طوالي معاهم!! ومع أني في وضع ما بسمح لي أخوض تجربة جديدة بس كان لازم اتعافى وارمم انكساري!؟؟ ومع أنه ماف راجل بتنسي براجل غيرو وبالذات لو كان زي عصام بس لازم كان اطلع من الحالة الأنا فيها دي ولا حأجن!!؟ في زميلي معاي في الشغل حسيت بيه مستلطفني!! وحسيت بإهتمامة الزائد يوم عصام كسر قلبي وافتكروني مريضة ناس الشغل!؟ كان معاي ما فارقني وجاب لي فطوري الباظ داك واصر يرجعني البيت قبل الدوام!! سبحان الله حسيت أنه في شيء ما طبيعي بس انا منهارة حرفياََ!! وبخش مره والتانية بسلم علي وبدرش معاي دردشة عامة كده وخلاص!!؟ لحدي ما اتعودنا علي بعض لكن والله انا ماشايفاه غير زميل؟! وكلمتو بقصتي مع عصام ودعمني الصراحة وقال انه مستعد يقيف معاي!! ما فيه عيب ولا كلمة شاب اصغر من عصام وموظف في شركة خاصة ومؤدب وجادي عايز يتزوج؟! يعني فرصة ما بتتعوض!! لكن كيف اوافق اتزوج وانا نذرت روحي وجسدي لعصام!!؟ انا لم اجيب سيرتو قلبي بيرجف وبنتفض لم بحس بيه حيتقلع من صدري؟!! كيف أكمل!! انا سعادتي واقفة عليه!!! وهناك ود الناس بالرغم من أنه عارف انا طالعة من صدمة حب من طرف واحد!! الا انه راضي بالواقع ده وقال ما عندو مشكلة نحب بعض في بيتنا ومستعيد ينتظر محبتي ليه العمر كله!!
استخرت ولسسسه خايفة؟! وعصام مرتين بس دخل علي في الواتس وما رديت عليه!! وقلت انا لازم اتعافى!!! لازم ادي نفسي فرصة تانية؟! لازم اكون قوية وما استسلم لرغبتي؟! وقلت لمحمد زميلي خلاص خليني افكر وارد عليك؟! الصراحة محتارة اوافق بمحمد لأنه ارتاح لي واختارني شريكة ليه!! ولا اقعد اعيش حزني واتعلق بحبال من سراب في أنه ممكن عصام يحن ويرجع لي؟!
تنصحوني بشنو؟! ولو كنتو في مكاني حتتصرفو كيف؟!
نواصل بعدين

💔💔 انا لسّت علي ما يُرام ، اشعُر بالحُزن و قلبي يؤلمني ڪثيرًا، أُفڪر ڪثيرًا فيما مضي و فيما سيحدُث ، مُصابة بالأرق و لا استطيع النوم ، أدمَنت الوحده بشڪل مبالغ فيه ، اصبحتُ مدمنًتا لغرفَتي المُظلمة والموسيقي التى اسمعها يوميًا وحدي ، أصبح روتين حياتي مُمل ، اُريد الخَلاص من ڪُل هذا!!
فلقد فقدت شخصًا واحدًا فقط لماذا يبدو العالم فارغًا هكذا؟؟! 💔💔

: #رغبة_جسد18¥
بقلم:آلاء آدم إبراهيم

لم تفقد شخص قريب لقلبك!!! ما حتموت بسبب فقدك ليه ؟ لكن حتكون فارغ داخلك!! بتحس بأنك عايش وبتتنفس بس ده ما انت؟ روحك كأنها منزوعة عنك؟!!! فلا حتقدر تبين أنك بتعاني!! وحتى لو سكتت ألمك ما حيزول!! وحتفضل معلق في المنتصف!!؟

والحاجة المحزنة أنه الناس مستعده تلومني علي مشاعر وهبني ليها ربنا بدون ما يختو نفسهم في مكاني؟؟! لأنهم ما عارفين الحياة هزمتني كم مره وانا قدر شنو قاومت؟!! ولا كم مره بكتني؟! وكل شخص بفكر في سعادتة!!؟ وراحة باله؟ طيب وانا!!!؟ ما من حقي أسعد؟! ليه لم نجي نتخذ قرار مصيري بنفكر في أراء الآخرين وحكمهم عننا؟! ليه ما لازم نكون شجعان ونقاتل عشان سعادتنا!! لأنه لم تكون مخنوق الليل كله وبتبكى ماف واحد فيهم بكون شايفك وحاسي بوجعك؟!! وبالرغم من المعاناة والألم ده كله نحن بنجاهد نفسنا عشان ظهر ليهم برود شخصياتنا وبنتصنع الإتزان؟! وقدر ما حكيت وشكيت؟!! ما حاقدر اوصف الجواي!!! فما كل البتقال بتفهم؟ ولا كل المخبى محسوس!!!
رغم أني ما حابة محمد بس لازم اتبع عقلي واوفق؟! لأني في الأول تبعت قلبي وشفت النتيجة؟! بالرغم من اني ما مقتنعة بس شكلي بحاول أرضي المجتمع؟؟! وحريقة في مشاعري ومستقبلي!!؟ شكلها ما بتهم زول؟؟! وانا فاقدة الشجاعة والأمل في المقاومة!؟ يمكن لأنه عصام قطع حبال الوصل بيناتنا وافلت مشاعري قبل ما يمسك يدي؟!!
بتذكر كان في مساء يوم تلات اتصلت علي محمد وكلمته اني موافقة ارتبط بيه بصورة رسمية ؟! لكن ما عقد وزواج زي ما هو حابي؟! قلت ليه نتخطب؟؟ لحدي ما نتوافق أكتر ونرتب أمورنا وافكارنا وبعداك نشوف الخطوة الجاية؟! كان فرحان كأنه حابني من سنين ؟!!! بالجد حيرني!! مع انه قالها لي بصريح العبارة نحب بعض في بيتنا؟! طيب السعادة المفرطة داعيها شنو؟!
المهم جاريتو في الكلام وكلمتو اني حفتح الموضوع مع أهلي وقد كان؟!
سبحان الله بدون خوف بدون قلق بدون خجل!!؟ كنت شخصية باردة شديد ومجردة من المشاعر؟!! في أثناء ما نحن بنتغدا فتحت ليهم الموضوع؟! انه زميلي في الشغل جاي يطلبني منكم وحبيت افتح اضانكم قبل ما يتصل هو واهلو؟! قلتها وانا متألمة؟! ده كلام شنو؟! انا ليه بعمل في نفسي كده؟! انا الجابرني شنو؟! أهلي فرحو واستغربو وبالأخص امي؟! ولاء المعقدة الخجولة فتحت موضوع زي ده وقدام ابوها وبدون ما تجي واقعة ولا تقلب لينا صينية الأكل؟! بعد كلمتهم قمت ودخلت علي غرفتي؟! وبحاول اقنع نفسي بالفكره؟!
انا قوية وبعملها؟! انا ما عايزة اكسب استعطاف زول ولا عايزة زول يشفق علي؟! ولا بتهمني ارائهم السلبية؟! انا عايزة كده؟ عايزة ابني حياتي بالطريقة البتناسبني وان كانت مخالفة لرغبتي ولقلبي؟!!!
وفعلا اتصلو علي ابوي وقال ليهم اتفضلو علبنا عشان نتعارف؟! وقد كان!!!
يوم الجمعة مباشرة ااي بعد تلاتة يوم كانو معانا في البيت؟!
اهلو ناس طيبين والله وحتى هو شاب مسكين كده وعلى نياته؟!
امي شكلها عايزة تخارجني بأي شكل وقالت لي اهلو كويسين وهو زاتو باين عليه طيبان وافقي طوالي نحن موافقين؟! ضحكت وقلت انا لو ما وافقت ما كان جبتو البيت؟!
وفعلا بعد كم يوم جو علينا وجابو خطوبتي؟! لا مشيت كوفير ولا رسمت ولا كنت متحمسة للموضوع؟! كانت حاجة سريعة وحسيتها مكلفتة كده ولا لأني فاقدة الرغبة ما عارفة؟!
بعد طلعو مننا ورقنا من مباركة الجيران وفضلنا برانا وفي غرفتنا تحديداً ؟!
-وعد قالت لي حاساك ما مبسوطة؟! اتذكرتي داك ولا لسسسه بتفكري فيه ؟!
-ابتسمت بحزن! وقلت انا ما نسيته عشان اتذكرو؟!
-جات قعدت جنبي وقالت لي ولاء انت متخلفة؟! يازوله انت ليه بتلعبي بحياتك كده؟! راجل متزوج وفصلها منك؟! في ستين الف داهية ويمشي باتا يجي جزمة بي رباطها؟! بس انك تدمري نفسك عشان رفضك؟! لا وتدمري حياة شاب مسكين تاني ده يبقى سخف منك؟! اذا ما عايزاه رجعي ليه شبكته بكل ذوق وافصليها عشان ما تندمي بعدين؟!
-ابتسمت ودمعتي في خدي وقلت ليها الراجل المتزوج الما متأكد من مشاعرو اتجاهي!! عصام؟!!!!
-قامت علي طولها وهي مصدومة؟! عصام منو؟! عصام ياهو عصام البنعرفو ده ولا زميلك اسمه عصام؟!
-بقيت ارجف من شده البكاء وقلت بشحمة ولحمه؟! قعدت منهارة ويديها الاتنين علي فمها وقالت لي أكيد بتهزري؟! وبقت تضحك وقالت لي ده مقلب مووش؟!
- انا انهرت شديد ورقدت واديت وجهي الحيطة وداسة راسي تحت المخدة وببكي بغبن؟!! لم شافت حالتي وحست بالموضوع جدي جات قعدت جنبي وقالت لي عملتي شنو في نفسك يا ولاء؟!!
-قلت ليها وانا بقطع الكلام من شده ما مخنوقة لسسه شايفة اني استعجلت واتهورت في موضوع خطوبتي؟!
سكتت!! كنت حابه اسمع مواساتها في اللحظة دي؟! لكن شكلها اتصدمت؟! ما عرفت تقول لي شي؟!
خلتني في حزني لحدي ما نمت؟! بعد الصبح كانت فترانة وما قادرة تفتح عيونها؟!
وقبل ما اسألها قالت لي أمس الليل كله عيني ما غمضت؟! شيلتيني هم الله يسامحك؟! ابتسمت وقلت اعفي لي؟! بس فما بالك انا علي ذات الحالة كل يوم؟! يومي انا في حالة قلق وارق وقله نوم وبكاء؟!

-قالت لي عايزاني اتعاطف معاك يعني؟!
-ضحكنا وقلت ليها انا ما راعيت لنفسي وظلمتها؟! ما منتظرة شفقة من زول؟! حاكتني!! وبقينا بنضحك جاتنا امي نهرتنا!! قالت مالكن بتقرقرن من الصباح؟!
_وعد قالت ليها ما شفتي بتك عملت شنو؟! انا قرصتها؟!
_امي اتخلعت وقالت لي ابقي مره نطي وافسخيها زي ما عملتي مع أحمد؟؟!
ده ودبت خالتها الفسخت خطوبتو زمان داك؟!
_انا ابتسمت وما رديت!! وعد قالت ليها ياريت لو الموضوع كده؟! انا اتخلعت وحمرت لوعد!!
وامي لسسسه متجمدة؟! وعد ضحكت وقالت ما تتخلعي كده بتك قالت عايزة تعرس في الشهر الجاي ده؟! امي ضحكت وقالت ليها سليتن قلبي!!؟ خليها تعرس ساكت البايرة تجيب ليها جنا ينفعها؟! خليتهم بيضحكو وانا سرحت بعيد!؟ كيف يعني؟؟ إذا اتزوجت محمد حيطالب بحقه الشرعي ولا حيصبر علي لحدي ما اتعود عليه؟! وأتذكرت عبير لم عصام امهلها تلاتة يوم؟؟! وقلبي قبضني!!!؟ وبمناسبة عصام وعبير فرحت فرح بخطوبتي؟! زي فرحة الامهات بنجاح أطفالهم!! ووعدتني بخاتم دهب بس انا رفضت وقلت ليها خلي هديتي مفتوحة!! وحيجي اليوم الحأطلبها منك؟!؟
اما عصام كان عادي!! جا بارك لينا وما كنت حتى بعاين في عيونو عشان اتوقع رده فعله شنو؟! والأيام عدت عادي ومتسارعة ووعبير ارتاحت مني لكن صحتها انتكست لفترات طويلة!؟ وكل يوم والتاني مودينها المستشفى!! لكن انا بمشي زي ااي جار بكفر ليها وبرجع؟! ومرات بت خالتها بتجيب لينا ريم!! بتسكت لأبوي وحتى لم تكون معاي بتكون طبيعية لكن فجأة مرات بتتنكد؟!.
_امي قالت الله يستر ببكاها الشديد ده ما تسل امها ولا ابوها؟! في خرافات زي دي ومعتقدات كتييرة في مجتمعنا وما بتمد للواقع بصله!!؟
واموري كانت طيبة وبحاول اتعود علي محمد بس ما قادرة!! لو اتصل علي دقيقتين بس بزهج وبتحجج بأي سبب وبقفل التلفون!! وحتى الدردشة بالكتابة محدودة ومعاملتنا رسمية شديد!! مع أنه بحاول يقرب لي وانا بجبر نفسي اتعود!! لكن لا إرادياً بصدو مني؟!
ما عارفة انا بعذب في نفسي ولا فيه ولا بعمل في شنو؟! ليه انا مضطرة اضحي بنفسي عشان عبير ولا غيرها!! وراسي كابس بالجد وما عارفة اتصرف؟!
خليتها على الله!! حلول الأرض غلبتني بس عشمي ما انقطع من عدالة رب السماء!!؟ في يوم كنت راجعة من الشغل انا ومحمد!! كان منسق معاي من بدري نرجع مع بعض ما بالترحيل!! هو ما عندو عربية بس مرات بشد حقه اخوه الكبير وبتجدع بيها؟!
وفعلا بعد خلصنا الدوام اتغدينا برا ورجعنا البيت!! ودخل سلم علي اهلي وقدمتو وهو ماشي للعربية وقبل ما يتحرك طلع عصام من بيته وشافنا مع بعض؟!
محمد نزل سلم عليه وانا نادتني مره جيرانا سلمت علي وسألتني عن امي وسألت عن خطيبي وانا بالي معاهم؟! ياربي بقولو في شنو؟! وخلاص قلقت كلام المره ما مركزة معاه!؟؟ وانسحبت منها بس اتأخرت؟! محمد ركب عربيتة وعصام اداني ضهرو شكله ماشي البقالة؟!
ودعتو واتحرك وانا دخلت البيت؟!
ولسسسه قلبي بيرجف؟! متمنيه اعيش الشعور ده مع محمد ولو مره وااااحدة بس!! اشوفو قلبي يفحح ولا يضرب!؟ اعاين في عيونو وايدي يبردو وقتي واتربش؟! بس للأسف في برود ما طبيعي بيناتنا!!.؟
بس لاحظت لعصام ضااالي كده وما علي بعضه؟؟ سألت وعد وقلت ليها جيرانا اخبارهم شنو؟!
قالت لي انا قلت ليك شنو؟! مع اني متغاظة من عبير ومن يومي ما ردتها بس ده ما ببرر عملتك؟! اياااك تقربي عليهم؟!
قلت ليها غبية انت؟! سألت بس؟؟!
_قالت لي ما تسألي؟! مالك ومالها؟!
اتأففت وطلعت منها!!! ما بتتجادل نهائي؟! مشيت سألت امي عنها! قالت لي شايفاك واقفة منها؟! ما رديت وقلت اها أخبارها شنو؟!
_قالت لي كوييسة واتحسنت الحمدلله!! بعد مشت للموت وجات والله شلت هم تموت لكن الحمدلله المرض ما بيقتل؟! اتحسنت والدكتور قلل ليها الجرع والجاية بعد تلاتة شهور؟! قلت ماشاءالله تبارك الله!!! يعني اتعالجت؟! قالت لي اااي بقت كويسة!! لكن لسسسه الفتر في؟! وتعب المرض ما طلع منها؟!
_اتنهدت وقلت الحمدلله ربنا يتم ليها عافيتها؟!
واتونست معاها بعداك ونسه عامة لكن العريس كان مسيطر!!؟ حسوي داك واعزم داك وازيد داك وناقصنا داك؟! وخالتك فلانة لازم تجي دي اكتر واحدة بتقيف معاي؟!؟ كانت متحمسة شديد للعرس!! وانا بقول يارب سهلها علي ومضي الأيام دي علي خير....!!
المساء كده وقبل انوم جاتني رسالة من الرقم المستحيل انساه!!؟ قلبي بقي يعمل دق دق دق دق!! في اضني؟! والله ما حاسة بالصوت طالع من صدري!! وعضلات بطني اتشنجت؟!
وقلت افتح الرسالة ولا اصرف النظر عنها؟!
واحترت واترددت كتير بس الفضول قتلني عايزة اعرف قال لي شنو؟! وأول مره يرسل لي ريكورد؟! الصراحة متلهفة لسماع صوتو اكتر من مضمون الكلام؟! وكأنه عايز يعذبني بطريقة جديدة واختار نقطعة ضفي صوتو!!؟ اتنفست بصعوبة مبالغ فيها لمن اتكتمت!! وعايزة افتحه كده وعد جات داخلة علي!!!؟

سألتها بلهفة وتوتر السماعة البلوتوث وين؟!
قالت لي تحت المخدة مالك؟! تلبت من السرير ومديت يدي تحت مخدتها وشلتها؟! ومع انها ما شاحنة كويس بس ربطها كده وفتحتو؟!
وده كلامه؟!
(ولاء كيف اخبارك وصحتك ان شاء الله بخير!! ما عارف اقول ليك شنو ولا أبدا من وين؟! وما عندي حتى حق في أني ارسل ليك؟! بس ما قدرت نفسي ابت إلا اتكلم معاك؟! ممكن اتصل بس ما عندي الشجاعة الكافية عشان أقرر نيابة عنك ولا اتدخل في حياتك؟! لكن اعبريها نصيحة من صديق مخلص ورايد ليك الخير!!! إذا انت ما مقتنعة بمحمد ولا مترددة في موضوع ارتباطتكم!! ما تستعجلي؟! ما تفهميني غلط؟! وبس والله ما بشبهك ولا بستاهلك؟! انا ما حكتر كلامي بس اتزوجي لانك عايزة تتزوجي ما عشان ترضي زول ولا تهربي من زول!! فكري في كلامي ده والقرار برجع ليك وزي ما قلت ليك انا عايز ليك الخير بتمنى ليك السعادة!!)...
انا بكيت؟! بالجد بكيييييت!! ما عارفة من الفرحة لأني سمعت صوته وأنه عايز مصلحتي وخايف علي؟! ولا يمكن يكون غار من محمد وما عايزو في حياتي؟! ياربي يقصد شنو؟! وشغالة اعيد في الريكورد للنص الليل ولم غفيت ونمت وصحيت الصبح تاني شغلتو؟! ومنتظرة الواطا متين تصبح عشان ألقاه واسأله عن السبب الخلاه يقول الكلام ده شنو؟! ما حرسل ريكورد لأنه ده حأستخدمه ضده لو حاول يتسلى بي لأنه اخر مره قال ما عارف هو حاسي يشنو؟! يمكن الزهج والملل والضغوطات ذكرتو فيني؟! ولازم لم اواجه عبير يكون عندي دليل انه راجلها هو الخش علي وطلب مني اترك خطيبي؟! وبقيت احسب الدقايق عشان الواطا تصبح واشرك ليه قبل ما يطلع الشغل!! ورسلت لبتاع الترحيل رساله مفادها اني ما ماشة معاهم ما يجيني بعدين؟! لانه ما ظريفة اتصل عليه من الصبح!!؟
وقعدت والقعاد غلبني!!! ومتوترة شديد وملامحي ما بتتفسر!!؟
بعداك رجعت غياري وطلعت عباية سااي ما عندي صبر لطقم ولبسه ومكياج!! طلعت وانا متحمسة ومنتظرة جنب باب بيتنا وبقول ان شاء الله عبير ما طلع معاه لباب الشارع عشان تقد لي الشغل؟!!
نواصل بعدين

‏♥️♥️أخاف أن يفنى بنا العمر ونحن نحتضن بعضنا بالخيال💔💔
يتبع

#رغبة_جسد 19/20/21¥
بقلم: آلاء آدم إبراهيم
بتمر بينا لحظات بنتمنى الزمن يوقف فيها!! ما بكون عايزنها تنتهي؟! نفضل مع الأشخاص البنحبهم للأبد؟!
طلعت وانا متوترة وما عارفة إذا لقيتو حأقول ليه شنو؟! بس همي الوحيد يشرح لي معاني كلماتة الأمس؟؟ خمس دقائق ما تميتهم في الشارع و طلع علي؟!! كأنه حس بي ولا انا بتوهم كالعادة؟!
لم شافني اندهش؟! حسيته متفاجئ وكأنه ما متوقع شوفتي؟! فأثبت لي نظريتي الأولى اني بتوهم؟!! فإبتسمت وقلت صباح الخير؟!!
-أبتسم واااااخ من مبسمه واسنانه الطويله!!! تاني قلبي البهديه شنو؟!
-منتظرة الترحيل بدري كده؟!
-لا منتظراك انت؟!
تاني اتخلع؟! أبتسم وقال!! ان شاءالله خير؟!
-قلت حنتكلم في الشارع؟؟!
تاني أبتسم!؟ وقال لي عييب!! ارح حوصلك معاي اليوم !!
بادلته الابتسامة وقلت تمام!!!؟
اتحركنا وانا حاسة كأني قاعده في شوك؟ بتململ ومتوتره شديد؟! والصراحة لمن بقيت اتنفس بصوت مسموع؟! غلبني اتحكم في أنفاسي وكأني جارية؟؟!
-هو بقى يضحك لكن ما علق؟!
-انا عرفت سبب ضحكته لكن خجلت اسأله؟!
وعم السكون لقرابة العشرة دقائق لم انتبهت للطريق لقيتو ده ما شارعنا؟! ماشي بوين انت؟!
حك ذقنة وقال لي وهو مسحب عيونو؟!! خاطفك عندك إعتراض؟!
-ابتسمت وقلت في سري ان شاءالله طول العمر!! وما رديت عليه؟
-قال لي زول خاطفك وما خايفة؟!
اتشجعت وقلت على حسب الزول وابتسمت؟!! بادلني الابتسامة لكن ما رد علي!! ما عرفت ماشين علي وين بس المهم إني معاه؟! وفجأة اتذكرت محمد؟! الله ولاء انت ممسوسة؟! انت مووش مخطوبة؟! طيب بتعملي في شنو؟! ليه انا ضعيفة للدرجة دي قدام عصام؟! ليه ما بقدر اقول ليه لا؟ طيب إذا اتمادى معاي أكتر من كده؟؟ حأفضل علي نفس الحالة واسيره؟!
-قال لي الوووو بحكي معاك؟! الصراحة كنت سرحانة؟ اعتذرت وقلت شردت شوية؟!
-قال لي دائما انت سرحانة؟! اموت واعرف بتفكري في شنو بأستمرار كده؟؟ بالك ده الشاغله منو؟!
أخدت نفس عميق وقلت ضغوطات ومشاكل كتيرة؟!
-قال لي اولها خطيبك؟!
-قلت بإستنكار انت شايف أن خطيبي مشكلة؟!
-وقف العربية؟! وقال لي هو في حد ذاته ما عندنا معاه اشكالية بس ارتباطك بيه غلط؟!
- والله لو ما هو فتح الموضوع ما كنت حقدر اتكلم؟!! نقعد نلفلف بالعربية كده لمن يرجعني شغلي؟! ياداب اتشجعت واخدت نفس عميق وقلت؟! الصراحة ده سبب ركوبي معاك اليوم!! ما فهمت رسالتك الأمس؟! ليه انت شفت حاجة في محمد ما كويسة ولا عندك عنه خلفية سيئة وانا ما جايبة خبر؟!
-قال أبدا والله!! الحق يقال؟! محمد بالرغم من اني ما بعرفه معرفة شخصية إلا أنه شاب مسكين وطيب شديد!! بس ده ما زولك؟! ما حتقدري تكملي معاه؟!
-وانا عاقدة حاجبيني مستنكرة؟!! قلت كيف؟ بناءاً علي شنو قلت كلامك ده؟!
_قال بناءً على معرفتي بيك؟!
_الغصة خنقتني وقلت طيب شايف مين بناسبني؟!
_سكت ما رد علي!!
_قدرت اتغلب علي دموعي وما اخليها تنزل؟! قلت ليه طالما انك ما عندك جواب رجعني شغلي!! اصلاً اتأخرت؟!
_خبط علي جبينة وقال ياولاء ما تصغطي علي كده؟!
_انا استغربت الصراحة!؟ وقلت من ياتو ناحية ضاغطة عليك؟!
_لم جيت وحبيت اعرف طبيعة علاقتك معاي شنو صديت وقلت ما عارف انا بعني ليك شنو؟!
قلت ما مشكلة ما قسمتي!! وعصرت علي قلبي ومشاعري وقلت اكمل حياتي من دونه؟؟! فجأة ومن حيث لا أدرى ظهرت في وجهي وقلت لي ما تتزوجي؟! ولم سألتك عن السبب؟ قلت ما اضغط عليك؟؟؟ عايز مني شنو انت ياعصام؟! بالجد حيرتني!!؟
_اخد نفس سخخن ووتغطيبات جبينه ظهرت!! وقال لي حقيقة ما عارف؟! والله ده السؤال المؤرقني من فتره!! حاسك قريبة مني بس ما القرب الكافي البخليني اتجاوز حاجات كتيرة واكسر قلوب كتيرة عشان أكمل معاك؟!! وفي نفس الوقت ما قادر ابعد!! وما قادر ما افكر فيك؟! ولم دخلت ليك امس بالرسالة اترددت كتير في الأول بس ما قدرت!! ما قصدي منها انك تخليه عشاني؟! بس جواي احساس قوي انك ما حتلقي السعادة معاه!؟ والله ما بهون علي اشوفك حزينة!! ياااخ انت تستحقي انك تفرحي؟ انا شفت بنات بشعر رأسي وعاشرت كتيييير بس زيك نااادر!! جادي معاك ما بجامل علي فكرة؟!
_وطبعا انا لساني مربوط كالعادة وما قادرة ارد!!
ابتسم وقال لي شفتي كلامك البدور في بالك ده شاركيني ليه!! ما تسكتي؟!
_قلت الصراحة للان ما فهمت انت عايزني ولا لا؟!؟ عشان كده ما قدرت أرد عليك؟؟؟
_ابتسم وقال سؤال صعب؟!
_انا زعلت وقلت ياااخ إذا انت ما عارف انت عايز شنو؟ بتجي ناحيتي لشنو؟! ليه بتعذب فيني؟! لو كنت شخص نرجسي وبتحب تشوف البنات حوليك وميتين فيك وراغبنك!! شوف غيري حتلقى كتاااار؟!
_قاطعني وقال معقولة انت شايفني واحد باطل ساااااي وعايز يتسلى ولا يقضي بيك زمن؟!؟

بالجد الغضب بان في ملامحه ولمن خفت؟ وقلت طيب اديني تحليل تاني؟؟ ولا قول لي غلطانة انا عايز كذا؟! ما تخليني ضايعة وبتخبط بمشاعري!!؟
_قال لي لو انا كنت صعلوك! كان من يوم اختلينا في غرفة نومي اسسه ولدي بفرفر في بطنك؟!
_انا خفت وقلبي قبضني؟! ونهرتو وقلت ده شنو الأسلوب ده؟؟ كيف تقول لي كده ولا حتى تفكر في حاجة زي دي؟!!
_قال لي زعلتي؟! يلا ده الإحساس الحسيته لم قلتي كلامك من شوية؟! انا ما صعلوك اولا وما بلعب بعروض الناس ولو البنت جاتني بإرادتها؟! لأنه عندي ناسي وبنات بهموني بخاف يحصل ليهم نفس الشي؟!
_قلت بإنفعال حتى ولو قلتها عشان تغيظني ما كان تقولها؟!
_اتلفت وقرب علي شوية وقال لي طيب آسف حقك علي!!!
لم لمحت وجهه أول مره يكون قريب مني للدرجة دي وانتبهت لكثافة رموشة المسحت الزعل عن قلبي في ثانية!! ابتسمت تلقائيا؟!؟
_قلت ليه لقيتني مسكينة!! وبتلعب علي نقطة ضعفي؟!
_قال لي الهي شنو؟!
_كان متوقعني اقول انت؟! منتظرني وهو مبتسم!! قلت ليه طيبة قلبي أكيد!!! بادلني الإبتسامة وقال لي دي برضو حقيقة!! انا خجلت واطرافي بردت!!
_قلت اسسسه متوقع مني ارجع شغلي وافسخ خطوبتي عشان حضرتك شايف أنه العريس ما مناسب؟!
_قال لي ولأني عايزك تنتظريني؟!
_زادت دهشتي؟! عصام ده مالو بناقض نفسه؟! انتظره كيف وهو ما قادر يصرح لي حتى بإعجابه بي؟!!
_قال لي صدمتك عارف؟! بس والله لم شفت محمد السخيف ده واقف وبيضحك قدامك جنب الباب حسيت بحاجة غريبة؟! الزوله دي حقتي وانا ما بفرط في حقي!!؟
_قلت وانا بتأتئ؟! كيف يعني حقتك؟!
_قال وكأني شايف عبير زوجتي ولا مروه اختي واقفة ليها مع راجل في نص الشارع وبضحك معاها؟!
_وقلت في سري عبير؟!
_سبحان الله كأنه حس علي؟؟ قال لي ما تزعلي بس الغيرة شي طبيعي وضربت ليك المثال بعبير عشان تعرفي انه غلاوتك من غلاوتها؟!
_هنا هبش اللحم الحي؟! قلت ليه طالما انت بتحب مرتك للدرجة دي وبتغير عليها شديد!! عايز مني شنو؟! وما خايف علي زعلها إذا عرفت أنك خاتي عينك على واحدة تانية؟!
قال لي الصراحة متردد؟! وخايف عليها عديل!! زوله ما ساهلة!! طيبة وبت ناس وما قصرت معاي في شيء!! بس قلبي انشغل بواحده تانية؟!
_انا حسيت بقلبي برقص علي انغام حلوه خلاص!! معقوله ده الحب كده؟! قلت ليه الزوله دي منو؟!
_ابتسم وقال حلمت بيها أمس والله!!! انا انكسفت!!؟ وما عقبت!!
وواصل كلامة وقال!! عشان كده قلت ليك انتظريني!! ما عشان احدد مشاعري؟! انا عرفت انا عايز شنو؟! بس الزمان ما مناسب!! انا لم قلت ليك في آخر مره ناقشنا فيها الموضوع أني ما متأكد من مشاعري بالجد كنت صادق معاك؟! ما اكذب عليك حاسي بإنجذاب ناحيتك؟ وعايز قربك! بس قلت يمكن لأنه زوجتي مريضة وطولت منها!! وكنت متوتر ومضغوط وخايف عليها؟! قلت يمكن يكون دي رغبة ولا نزوه عابرة!! عشان كده ما حبيت اغشك ولا اوعدك بشيء انا ما متأكد منه!!؟
لكن بعداك لم بعدتي شغلتي بالي اكتر!! بفكر فيك وعايز اشوفك ولو بالصدفة!! ومرتي اتحسنت وحياتنا رجعت شبه طبيعية!! بس لسسسه الإحساس زي ما هو بل زاد اكتر لم شفتك مع محمد؟! وعرفت انا عايز شنو!؟ بس لو صرحنا بالموضوع في الوقت الحالي حنخسر ناس كتار وانتي فاهمة علي!! وكمان عبير خايف عليها تنتكس لو دخلت في اااي صدمة!!؟ عشان كده عايزك تنتظريني لفترة قصيرة ان شاء الله بس ارتب اموري واتأكد انه ام جناي ما حيصيبها مكروه؟!
_قلت ليه بتحبها للدرجة دي؟!
_ابتسم وقال اكيييد ولازم تتصالحي مع الحاجة دي؟! بعدين ما عايز مشاكل ووجع رأس وبقى يضحك؟!
_ما عرفت اقول شنو؟! وسألته محتارة طيب انا هنا دوري شنو؟! قال لي ده حتكتشفيه قريب ان شاء الله!! بس ماف زول بيسأل اهم الوريد ولا الدم الفيه؟! لأنه من دون واحد فيهم حنفقد الحياة!!
_قلت ليه كلامك كان بلسم علي صدري وريح قلبي والصراحة دي أمنيه قلبي!! بس ده ما يعني اني حأنتظرك زي ما انت طلبت؟! يمكن افسخ خطوبتي لأنه حرام اجرح مشاعر محمد واكذب عليه!! لكن اوعدك ما حتلقى مني تواصل ولا لقاءات لحدي ما تظبط امورك واسمع منك كلمة بحبك ياولاء؟!.
_ضحك وقال لي ما عايز اكتر من كده؟! واوعدك يكون قريب بس ادعي لي!!
_قلت ما بنساك!! شكله ربنا استجاب لدعواتي!! ابتسم وما رد!!
لم انتبهت للزمن لقيت الساعة عشره وشوية!! اتخلعت وقلت الشغل؟؟! ضحك وقال ياداب اتذكرتي؟! ضحكت وقلت رجعني شغلي بحاول القى لي عذر للتاخير؟! قال لي نفطر اول وبعداك نشوف البيحصل؟!
_قلت ولا في احلامك!! اصريت عليه نمشي ووافق في الاخر؟! وفعلا رجعني الشغل وانا فرحتي ما سايعاني وانا نازله جنب البوابة اشوف محمد في وشي!! والخلعني اكتر انه عارف بموضوع عصام وفجأة يلقاني راكبة معاه!!!
نواصل بعدين

♥️♥️اكتفيت بك وطنآ فلا أمان غيرك
واكتفيت بك نبضآ فلا حياة لي
إلا بقربك أحبك لأخر يوم بعمري ♥
#_ثًــــــمً
إن لم تكن عيني فإنَّكَ نُورُهَا
أو لم تكن قلبي فأنتَ الحبيبُ!! ♥

#رغبة_جسد20¥
بقلم : آلاء آدم إبراهيم
حاجات بسيطة كل واحد مننا محتاج ليها في حياتة؟!! زي صديق مخلص يكون أمين اسرارك وواعظك لم تغرك حياتك!! ولا رفيق حنين يسهل عينا مرارت الحياة واوجاعها!! زول بتحس أنه ربنا خلقه عشان يكون جنبك ويدعمك ويمكمل نواقصك؟!! حبيب ما بتقدر تزعل منه ولا محتاج انك تبرر ليه تصرفاتك؟! بتعشقه حد الجنون وما بترضى تشوفه مع غيرك؟!! وبخاف عليك حتى من نفسه وما بهون عليه زعلك!!! ده إذا اتلقى عضُ عليه بالنواجز وما تضيعوه مهما كان الثمن!!؟
والصفات دي اتجسدت لي في عصام!! وما حتنازل عنه إلا هو يرفضني ويبعد عني؟! وان شاء الله حتى الموت ما يفرقني عنه!! نزلت من عربيتة وانا مبسوطة!؟ واتفاجأت بمحمد في وجهي؟! وقلبي ضرب من الخوف المره دي ما من شده الحب!! واتلفتت شفت عصام كان بعاين ليه بطريقة غريبة؟ وكأنه حاقد عليه!! في سري قلت ربنا يسترها معاي؟! وقلت لعصام اتحرك ومشيت ناحيه محمد وهو واقف مستغرب!! سلمت عليه وقال لي محتار؟! جاية من وين؟! بتاع الترحيل قال رسلتي ليه انك ما جاية الشغل اليوم؟! وبتصل عليك ما بتردي؟!
_ قلت كنت مشغوله شوية!! ومعليش لقيت مكالمتك لكن في وضع ما بسمح لي أرد!؟ قال لي خير إن شاء الله؟! الحصل معاك شنو؟! ودا جاي معاك لشنو؟! اتخلعت! واتلفت شفت عصام واقف لسسسه ما فات؟! بالجد وقفتو ما مفهومة ولا ليها داعي!؟ عايز يثبت شنو مثلاً!!! ولا يكون عايز مشاكل؟!
خفت اكتر وقلت لمحمد ارح ندخل الشمس حارة؟! قال لي كنت طالع على الكفتيريا عايز أفطر ؟! الشباب منتظرني!!! ارح افطري معانا!!؟ شكرتو وقلت ما جيعانة!! _سألتك وما جاوبتي؟!
_اتنهدت وقلت والله ما ينفع نتكلم كده؟؟ بنتظرك في المكتب بعد تفطر بحكي ليك تمام؟!!!
عايز لي بحيره كده وقال لي خير ان شاء الله!! ومشا علي زملائه!! اتلفتت علي عصام لقيتو ماف!! الحمد لله أنه اتحرك!!! دخلت ومباشرة على مكتب المدير!! اختلقت لي عذر! واعتذرت ووعدتهم أنه تاني ما تنعاد!! وطلعت علي المكتب حقنا!! بعداك ما قدرت احكي مع محمد الزملاء كانو كتار؟! وفي واحدة قالت لي بتغيبي اكتر من المدير!! ولو ما عملتي حسابك بطردوك والله الناس ديل ما بلعبو في أمور الشغل؟! وكذبت ليهم نفس الكذبة القلتها للمدير!! واتملصت من الموضوع!!! محمد سألني!! قلت ليه بعد الدوام؟! اسسسه الزمان والمكان ما مناسبين؟!! وفعلا بعد خلصنا طلعنا بالترحيل لكن ما وصلنا البيت!؟ نزلنا منه جنب مطعم كده مشينا عليه كذا مره!!! وكنت مكسوفة خلاص وما عارفة أبدا من وين ولا أقول شنو؟! بالجد كسرة القلب انا مجرباها فما عايزة اشيل ذنبه هو كمان؟! لكن اذا ما كلمته واتماديت اكتر حأجرحه شديد وهو ما بستاهل والله!!
_قال لي من قبيل ما علي بعضك؟! خير إن شاء الله!!؟
_استجمعت قواي وبديت امهد ليه للموضوع؟! والله يامحمد انت شاب طيب شديد؟ وما شفت منك إلا كل الخير!! وسكتت... جا الجرسون قاطعنا وجاب كاسات العصير!! بعد مشا! كنت لسسه ساكته!! قال لي كملي؟!؟ ختيت عيني في عينو وانا مكسوفه والله!! وقلت بعتذر!! ما بقدر اكمل معاك؟!
_شكله اتفاجأ!!! وخته تلفونو جنب الكاسة وقال لي قلتي شنو؟! ما عايزاني!!!؟
_انا دمعتي جات نازله!! وقلت والله الف بت تتمناك وانت شاب طيب شديد يمكن ربنا عايز يصرفني عن طريقك؟! والله انا ما بستاهك؟! ربنا ابتلاني بمحبه شخص تاني ما معبرني ولا خاتيني في باله!! وحاولت انساه واكمل حياتي وانت عارف كده كويس بس ما قدرت؟!
_قال لي ما قدرتي؟!
_قلت مووش ما قدرت انساه!! ما قدرت افتح ليك قلبي؟! حاولت اجاملك كتير وادي علاقتنا فرصة بس والله صعب!! شعور مؤلم خلاص لم يكون في شخص باني آماله عليك وبخطط لمستقبلك معاه وانت حتى ما قادر تفتح ليه قلبك؟! فأنا ما بهون علي زعلك ولا عايزة اجرحك في يوم؟! ولا تندم لأنك عرفتني؟!!
_قال لي بس انا ما عندي مشكلة أصبر عليك!! واصلا متأكد الحب حيجي بعد الزواج إن شاء الله!!
_بكيت علي حاله!! كيف مستعد يكمل معاي رغم أنه عارف أنا ما بهواه ولا حتى معجبه بيه!!؟ معقوله يكون بحبني؟! معقولة نفس الشيء العامله فيني عصام انا بعيده فيه؟!! وخجلت من نفسي؟! الحب ما بتوسلوه!!! طيب انا ليه جاريه ورا عصام؟! معقوله انا كمان ذاله نفسي؟!
_لم لقاني منهاره وما قادرة أرد قال لي ما بضغط عليك يازوله ما تستعجلي وفكري في الموضوع مره تانيه واستخيري؟! إذا شايفة انك كلك قناعة بأني ما بناسبك ولا ما عايزة تكملي حياتك معاي!! وقتها انا بقبل قرارك بكل رحابة صدر وبقول انت ما قسمتي مع أني بتمنى العكس!! واما إذا شلتي مخاوفك دي من راسك وامنتي بقدر ربنا وبعلاقتنا وحبيتي تدي علاقتنا فرصة!! حكون منتظرك وانا أسعد انسان؟!؟

_بالجد احرجني والله حسيت قدامة اني صغييييرة وفعلا ما بستحقه!! وبعد ما طلعت الدبلة قال لي خليها معاك!! ومهما كان قرارك حتفضل معاك انا اشتريتها ليك ما عشان اشيلها منك في يوم؟!
_رقبتي خنقتني؟! انا مالي بعمل في نفسي كده؟! بسبب كلمتين من عصام غير مجرى حياتي!! ويمكن بعد ده كله ما يتزوجني؟! بس بتبعه وانا عميانة!! ما بقدر الموضوع خارج سيطرتي؟! قلت ليه بشكرك على تفهمك يا محمد بس انا مقتنعة من قراري بس برضو حفكر في الموضوع!! عاين لي بطريقة غريبة؟؟! وقال لي ما يكون جاركم ليه علاقة بالموضوع ولا أثر علي قرارك؟! اللييييلة ما ناقصة مشاكل أنا؟!!! قلت ليه لالا أبدا!!؟ قبيل لأني اتأخرت وصلني معاه؟!
_قال لي بس انا ما سألتك؟؟!
_انا عيوني لجوو!! وبقيت اتمتم!!
_نبره صوته اتغيرت وظهر عليه الغضب!! قال لي اشربي عصيرك عشان نمشي؟!
_خفت وما قدرت اقول ما عايزة؟! مع اني جيعانة وعطشانة بس بأي طريقة عايزة اتخارج وارجع بيتنا!!! شربته من رفعة واحدة نزلت الكاسه فاضية!! وهو بعاين لي بنظرات غريبة؟! شكله حسس بي؟! ولا شك بأنه عصام ليه دخل بالموضوع!! لكن والله انا قبل ما عصام يصارحني اليوم كنت بفكر في الموضوع؟!! ما قادرة اتأقلم معاه نهائي!! وطلعنا ووقف لي ركشة توصلني البيت!!! في الأول رفضت وقلت برجع بالمواصلات!! لكنه رفض وقال لي ما عايز نقاش في الموضوع!؟ ولأنه طريقة مختلف مشا بطريقه بعد ما انا اتحركتا راجعة علي البيت!!؟ لسسسه كنت ماسكة الدبلة وبعاين ليها؟! ما لبستها ودخلتها الشنطة ورجعت البيت وانا مقهورة!!! حسيت أنه محمد خسر توقعاته فيني؟! ما بعرف العجبه فيني شنو بالضبط بس باين عليه انه كان عايزني بالجد!!!؟ معقوله انا سيئة وانانية للدرجة دي؟!!! معقوله ضريبة حبي لعصام تكون كسر قلوب ناس كتاار حوليني؟! انا كل غلطي اني حبيت!! دي ما جريمة بس ليه انا بتعاقب علي الحب ده يومياً؟! ليه يومي بفقد زول!! لكن من ناحية انا سعيدة لأنه ارتاح مني!؟ ان شاء الله يلقى إنسانة تحبه بجنون وتخليه يسجد سجدة شكر لله لانه ابعدني عن طريقة!!! بتمنى يلاقي البت البترجع ليه طمأنينته والبتملا حياته فرح وسعادة وسرور واي شيء اتمتاه معاي يتحقق!!؟
وعد لم شافتني مهمومة قالت لي مالك؟!
_قلت قلبي واجعني؟!
نطت لي في السرير وقالت اوعي تقولي شفتي فلان ولا حنيتي لفلان بقتلك والله؟!
_رفعت ليها اصبعي وقلت فسخت خطوبتي؟!
ما تتخيلو غضبت قدر شنو؟! وجاطت كيف؟؟! انت ما طبيعية!!! انت مجنونة؟؟! انت مممسوسة وبكون عندك جن عاشق؟! والله انت مغفلة!!
_كانت بتتكلم معاي وكأنها هي الكبيرة وبتوبخ في طفل صغير؟! ياربي انا كبيرة لكن عقلي صغييير!!! ياربي عندها حق في كلامها ده؟! والف سؤال وسؤال بطرحو نفسهم في نفس الوقت؟!
الحاله لسسسه ما عرفت بموضوع عصام؟! حقيقي حا تقتلني شكلها؟! اتنهدت بصعوبة وقلت روقي؟! ده رأيك من الأول؟! قلتي لي لو ما مقتنعة اتركي؟!
_قالت لي يعني انا السبب؟؟! انا القلت ليك حبي راجل جارتك وقلت ليك غشي ليك واحد تاني واخطبيه!!؟
_استفزتني شديد الصراحة؟! وقلت ما عندك بي دخل؟! انا ما اخدت رأيك ولا بهمني؟! بس كلمتك بقراري النفذتو؟!
_قعدت في السرير وختت يديها علي رأسها وقالت كلمتي محمد يعني؟! ولاء انت مريضة نفسياً؟!
_ما رديت عليها؟! اصلاً زهجانة وبجلد في ذاتي وهي زادت الطين بله!!؟
_قالت وهي منفعله ما تسكتي لي؟! فكرتي في امي؟! ولا زعلها ما بهمك؟! ولا كسر خاطر محمد عندك عادي؟؟! ما مشكلة الناس كلها تدمر وحريقة فيهم بس حضرت سعادتك ترضي؟! ااي حياتك أهم؟!.
_لم نرفزتني شديد قلت ليها وضيفي عليهم أني حتزوج عصام!! ويمكن نرتبط قريب؟!.
_وعد قامت علي حيلها؟! وبقت تقول لالا لا لا لا انت جنيتي رسمي؟! ده ما شي بنسكت عليه؟! واذا انت نفسك رخيصة عليك وما عندك احترام لنفسك ابوي وامي سمعتهم بتهمهم وما حتتلطخ بسببك؟! انا ما بقدر اوقفك لكن خلي امي تضع ليك حد وتتصرف معاك؟! وطلعت من الغرفة؟!.
_خفت تطلع تكلم امي؟! وبطني وجعتني وقلت امي لو ما راحت فيها بروحني فيها انا!!؟ ولمت نفسي وندمت لأني كلمت وعد بموضوع عصام ولكن حيث لا ينفع الندم؟!! الحصل حصل وبعده لازم استحمل العواقب!!!
وفي أثناء ما انا بفكر وخايفة ومترددة امي نادتني بخلعة وبصوت قوي ومخيييف وقالت ولاااااااء!!؟ انا ركبي رجفت وبقيت اللعن في وعد وما قدرت اقول نعم ولا اقوم امشي عليها!!!!؟
نواصل بعدين

♥️♥️ بعض الرحيل كالدواء تماماً؟!!! طعمُه مر لكنه شفاء!!! ♥️♥️

#رغبة_جسد21¥
بقلم : آلاء آدم إبراهيم
انا حاسة بنفسي ما كويسة!!! قلبي واجعني شديد؟!! وضميري ما مرتاح؟! وبقى تفكيري كله عالق بين الماضي والمستقبل؟! وحاسه بضياع وما قادرة اتخذ اي قرار!!! وكل همي ياربي تاني حيحصل معاي شنو؟!! لدرجة أنه باين علي الأرق و القلق وقله النوم!!! وكمان جات علي أمي وجاطت الأمور أكتر بسبب وعد؟! ما ملكت الشجاعة عشان امشي عليها!! لأنه نبرة صوتها ارعبتني؟! وفي ثواني معدودة القاها في وجههي؟!

_ قالت بغضب ولاء انا ما ناديتك؟!
ما قدرت أرد وجسمي كله برجف؟!
_صحي انت خليتي محمد ورجعتي ليه الدبلة!!؟
كانت بتنظر لي بطريقة مرعبة ولئيمة وكلها غبن وغضب!!! والله اول مره اشوف امي غضبانة للدرجة دي!! حبطت زاوية السرير بيدها وقالت بتكلم معاك انا؟! ما تسرحي لي؟؟!
_انا صوتي رايح عديل من الخوف وما قدرت انطق بس اومآت برأسي بمعني نعم!!!
وطاااااخ كشطتي كف لمن رقبتي طقت واضاني صنت؟! ولسسسه ما فشت غضبها وحاولت تضربني تاني بس وعد دخلت بيناتنا وتحاول تهدي فينا!! وخبطة فيني والتانية في وعد!!؟
_عايزة تقتليني انت؟! متخلفة انتِ!! ولا قايلة أولاد الناس لعبة في يدك؟! كل مره تخطبي وتفسخي؟!!! قايلة نفسك صغيرة؟! القدرك أولادهم ممتحنين الشهادة!!؟ يابايرة!!! والله تعرسي ولا علي كيفك!؟ ضربت ايديها في بعض وكأنها بتصفق؟! وقالت اقول للناس شنو انا؟! اودي وشي وين انا؟! تاني البيجي يطلبك منو؟! تفتري علي شنو انت زاتك؟! وتاني جات هاجمة علي لولا أبوي سمع صوتها في الشارع وجا جاري علينا ومسكها مني وانا ببكي لكن من سريري ما قمت؟! امي منفعلة وجايطة وابوي رفع صوتو فيها ومسكها من يدها وفات بيها وانا فضلت معاي وعد!!؟ حمرت ليها واديتها ظهري ورقدت ببكي؟!
_جات علي وقالت لي انا ما كنت عايزة امي تمد يدها عليك!! بس انت جبتيه لنفسك الصراحة؟! وانا لو ما خفت تجيها زبحة ولا كومة سكري كان كلمتها بموضوع عصام!! وللان ما عرفت سبب فسخك لخطوبتك شنو؟! اتصرفي!!
_انا مغبونة منها شديد وما رديت عليها!! بس لم قربت علي وعايزة تشوف آثار الكف علي خدي ولا شنو ما عارفة دفرتها مني لمن قربت تقع علي ظهرها؟! وهددتها بسبابتي وقلت بحذرك تقربي ناحيتي تاني؟! ووالله لو كترتو معاي كنت حقوم اتضارب معاها!!؟
ما ردت علي بس باين عليها الغضب وطلعت بره خلت لي الغرفة!!؟ شوية كده وابوي ناداني!! عيوني محمرة وورمانة من شده البكاء وخدي لسسه حاساه تقيل من الكف!!ويمكن تكون اصابع امي تركت فيه أثر لكن ما شفتو بالمرايا!!! جرجرت رجولي ومشيت عليه!! امي كان قاعدة في العريشة ولمحتني ببكي!! قالت لي يبكو ليك ان شاء الله!!! انا زدت في البكاء ودخلت الصالون وانا شوف ما بشوف!! بالجد كلامها وجعني؟! والزعلني اكتر انها انفعلت حتى قبل ما تعرف سبب رفضي شنو؟! معقوله لكن؟! بتها انا ولا محمد!؟ بتهمها سعادتي انا ولا كلام الناس؟!! بالجد ده اكتر شيء واجعني!!!
ابوي خلاني كملت بكيتي وكان بعاين لي؟! قال قومي غسلي وجهك؟! قمت غسلته جنب الصالون ودخلت تاني!! قال لي احكي لي الحصل شنو؟!
_قلت ليه امي قالت ليك شنو؟!
_نهرني!!!؟ وقال انا سألتك انت؟! ما ليك دخل بكلام امك؟!
_انا اتخلعت!!! ابوي من متين بنهرني ولا برفع صوته علي!!؟ فخفت وزاد توتري الصراحة؟!
ولسسسه منتظرني احكي؟! اتشجعت واخدت لي نفس عميق وقلت انا ومحمد انفصلنا؟! وسكتت.
_قال لي والسبب؟!؟
_خفت!! احكي ولا اسكت؟! لكن لو خبيت عنهم الحقيقة اقول ليهم شنو؟! ماف سبب مقنع؟! وهم شافو محمد واهله!!؟ بالجد ناس طيبين وبستحي ابهتو ولا اخد في حقه واقول أنه شخص سيء؟!.
_قال بتكلم معاك انا!! السبب شنو؟
_قلت ليه يا ابوي انا خجلانه منك بس لازم اصارحك؟! بعتذر علي الكلام الحاقوله بس ليك وبتمنى ما تزعل مني؟! شكله اتوتر؟! وحسيت بملامحة اتغيرت؟! وقلت عشان ما يفهمني غلط!! والله يا ابوي محمد زول كويس وود ناس!! بس انا لم وافقت اتزوجه كنت ما مستعده ومترددة ومرعوبة عديل!؟
_صلح قعدته وقال لي بغضب في زول هددك ولا جبرك؟ ما يكون في زول عمل ليك حاجة؟!
_أبدا يا ابوي ولا واحدة من ديل!!؟ انا كنت..... وما قدرت اكمل؟!
_قولي قولي انا سامعك قولي؟!
_خجلت ولمن قلبي بيطعني من الخوف!؟ انا كان في واحد متزوج اتمنيت يكون من نصيبي وما بقدر اقول ليه ولا بقدر اتصرف بالخصوص ده عشان كده ودراءً للفتنة وافقت علي محمد!!! لكن ياابوي والله ما قدرت اخدعه!! هو عارف بموضوعي ولأنه متأكد انه ماف اااي شيء بجمعني بالراجل ده عشان كده وافق انه نكمل مع بعض؟! وإلا ماف راجل بتقبلها!! بس الإشكالية انا حاسه بنفسي مجبورة!! والله والله ما قادرة اتقبله ولا حتى اتواصل معاه ياابوي!!! نافرة منه عديل!!؟ وخفت لقدام لو اتزوجنا تحصل خلافات ومشاكل نحن في غنى عنها؟! عشان كده انفصلت عنه؟!
_قال لي غلطانة ؟!
_قلت كيف؟!
_قال انت بت عاقلة وواعية!! كيف تعشمي ود الناس وتوافقي بيه إذا انت مرتدده من البداية؟! ليه تعملي القصة دي كلها لحدي الناس كلها تسمع بخطوبتك! وانت في قرارة نفسك ما متقبلاه؟! ليه تغشيه ياولاء!!!
_بكيت واتخلعت!! وقلت والله ما غشيته ياابوي!! هو عارف من الأول بس قال بعد نتزوج حأكتشف أني كنت غلطانة وكلام من ده؟! لكن انا صريحة معاه من اول يوم؟

_قال طيب ده عرفناه وتقول اتهورتي واندفعتي طيب اسسسه الجده شنو؟! طالما انك خايفة الفتنة وعايزة السترة وعلقتي ود الناس ولبستي دبلتو؟! غيرتي رأيك لشنو وانت من البداية قلت ما عايزاه لشخصة؟!
_انا الدرب راح لي في الموية؟! اقول شنو؟! مستحيل اقول الراجل المتزوج وعدني؟! بس دقيقة وعدني بشنو هو؟! حتى عصام ما وعدني بالزواج!!؟ قال انتظرو لحدي ما يرتب اموره؟! ولو قال لي الراجل ده منو وإذا هم بعرفوه اقول شنو؟!
_قال لي ما تسرحي!! بتكلم سألتك سؤال انا؟!!
_قلت فسختها لأني ما عايزة اخدعه؟! ولا عايزة اعشمه بحاجة انا حاسه بنفسي ما بقدر اعملها؟!
_قال لي يابتي المفاهمة والمحبة بتجي بعد الزواج!!! تلات أرباع الناس المتزوجين وفاتحين بيوت ديل قبل الزواج ما بعرفو عن بعض اااي شيء؟! الحياة والمعاشرة هي البخليهم يفهمو بعض كويس ويتأقلمو!!! ناس المسلسلات اوهموكن؟!!! بأمور الحب والكلام الفارغ ده؟! كم وكم شباب بنعرفهم وبنشوفهم طالعين ونازلين مع البنات وبعد يتزوجو بطلقو من شهر ولا في سنتهم؟! لأنهم ما قدرو يتفاهمو؟! لقو مصطلح الحب وهم ساااكت وما بكفي عشان الحياة الزوجية تستمر!!! لازم يكون في احترام وثقة متبادلات وهن البخلقن الحب!!! وكلام جيلكم ده؟! انا زمان لم زوجوني امكم دي ما شفتها ولا كنت بعرفها الا يوم العرس!؟ شوفي حياتنا؟! قاعدين ومبسوطين ولا اطلقنا ولا سمعنا الجيران مشاكلنا؟! مع انه الخلافات بتحصل!! بس هي زاتها البقوي العلاقة؟! يعني إذا انت عايزة تتزوجي عن حب وكلام فاضي الترابة في خشمك؟! انا ابوك وبتمنى ليكم السعادة انت واخواتك!! بس السعادة زاتها إختيار وقرار حكيم إنت ببتخذيه؟! وانا ما من حقي أسألك ده منو الانت عايزة ده؟! بس انا كلي ثقة فيك؟؟ متأكد انك ما بتخيبي ظني فيك!! ولو كان راجل متزوج ولا عازب ما فارق معاي!! انت البتعيشي معاه!؟ بس اهم شيء تفكري بعقلك وما تبني سعادتك علي سعادة غيرك!!؟ محمد ما عنده ذنب!! وشيء عيب ومخجل العملتيه فيه ده!!؟ ونحن رجال وجو طلبوك رجال؟! كيف ما تقدرينا كلنا وتقولي انا استعجلت وانا اتهورت؟! شافعة انت؟!
المهم انا ما بضغط عليك لكن فكري في كلامي؟! محمد ود ناس وطيب!! وكل شي بوقتو حلو ما تستعجلي الشي قبل أوانه!!؟
_قلت كلامك على عيني وراسي أبوي!! وان شاء الله افكر في الموضوع!! وبستخير تاني وبشوف البيحصل شنو؟!
_قال لي كل الخير ان شاء الله!!! وما تفكري في امور تانية!! مالك ومال أمور الضرات ومشاكلهم!! كفاية عليك شكل امكم!!
_أبتسمت وقشيت دمعتي؟!
قال لي امشي غسلي وجهك بموية باردة خلي الأصابع دي تروح!! الشافهم بقول انا دقيتك!! انا ضحكت وحضنته وبكيت!! قال لي امشي امشي يلا!! ما تملي لي جلابيتي ريالة ومخاخيط!!! وبقى يضحك وانا مبتسمه!! واخدت نفس سخن وقلت ربنا ما يحرمنا منك ياابوي؟! ابتسم وما رد علي وجيت طالعة!!
وقفني جنب الباب وقال ولاء يابتي!! اتلفتت عليه!! قال لي ما تزعلي امك؟! وحسيت بمحبته ليها العمرو ما صرح بيها قدامنا!! ابتسمت وقلت ان شاء الله وطلعت!! دخلت الحمام والمغرب قرب يأذن!! استعجلت وصليت العصر أول وقبل ما ارفع الصلاية المغرب أذن!!؟ صليت وطلعت اخت الأكل؟! مع اني زعلانة بس ما بقدر ازعل ابوي؟! وعايزة امتص غضب أمي عشان غضبها ما يعكسها علي ويحطمني اكتر من الانا فيه ده؟!
جبت الغدا وقالت ما عايزة تاكل!! وعد بتحنس فيها وابوي قال ليها ممازح لو ما اكلتي انا زاتي ما باكل؟! ولا اشتغلت بينا قنتت وشالت توبها وطلعت!؟
اتغدينا من دونها!! هبشت بس وقمت عشان ما احسس أبوي!! بعداك رفعت الصينية ولميت باقي الأكل وانا داخلة علي غرفتي لقيت وعد بتفتش في تلفوني؟! لم شافتني اتخلعت وجدعتو في السرير!!! ما اتكلمت معاها جيت شلته وطلعت علي الحوش!!!
ما لقيتها فاتحة حاجة لكن في اختصار الملفات التم فتحها لقيتها فاتحة الرسائل والماسنجر والواتس وسجل المكالمات !!! كأنها بتفتش لرسائل معينة ومن شخص محدد!! عرفتها عايزة تشوف إذا انا متواصلة مع عصام ولا لا؟!؟ لكن انا ما بتكلم معاه ولا حتى بيناتنا في مكالمات!؟ الا الريكورد الأخير؟؟! لكن ما معروف مستقبلا يمكن يكون في؟!!
عشان كده لغيت بصمتها من تلفوني وغيرت كلمة المرور برضو؟! خليها تاني تحاول تفتحه؟!.
وانا بتصفح في الفيس جاني إشعار في الواتس!! نزلت الستارة لقيتها رساله من عصام!؟
فتحتها علي طول وكأني كنت منتظرة منه يخش علي!!! قال لي مساء الخير ولائي؟! صحي فسختي الخطوبة ومعاها كم قلب وايموجي سعيد!!!!
انا بقرا وبعيد في كلمة ولائي؟؟ ياء الملكية؟! يعني انا مِلكة بقيت؟! وعضلات خدودي وجعوني من شده الإبتسامة!! وقلبي بضرب؟! وكللل الزعل والنكد والعلقة الاخدتها من امي راحو في غمضة عين!!!

_قلت متين بقيت ولائك؟! قال لي من لحظة ما وثقتي فيني ونفذتي اول طلب اطلبه منك بدون ما تترددي! ومعاها ورده وقلب احمر؟!
_رسلت ابتسامة وقلت ما بسببك انت؟! بس انا ما كنت عايزة اخدع ود الناس؟!
_رسل ضحكة وقال المهم النتيجة!! وما بهمنا الاتسبب فيه؟!
قلت عرفت كيف؟! معقوله اصواتنا سمعت الحله كلها؟!
قال لي والدتك معانا وسامعها بتشكي لعبير همها وعايزاها تتكلم معاك؟! قالت انت عنيدة وما بتسمعي كلامها؟!
بالجد زعلت!! وقلت ياحليل عبير!! ما عارفة الجايها؟!!
ما رد علي! ولا عقب علي كلامي؟! وبعد كم دقيقة قال لي ممكن اتصل عليك؟! قلت عادي كده ما خايف؟!
رسل ضحكة ومعاها قلب مكسور؟!
قال انا بخاف علي زعل ناس معينة ولكن ماف زول بخوفني؟!
قلت عايز تقول شنو؟! رسل كلامك في ريكورد؟!
ضحك وقال راحتك؟! كانت عايز اصرح ليك بحاجة لكن أنت ابيتي؟!
_بالجد بلعب باعصابي زي ما عايز؟! عارف انه الفضول قاتلني؟! بس مستحيل ابين ليه؟! ولا اتطلب منه يتصل؟! ولو قال لي لا؟! بموت عديل من الغيظ؟!
قال لي اكيد بتفكري تقولي شنو وتتصرفي كيف ولو انا قلت كده تردي بكده وعوارتك البتعمليها دي؟! انا ضحكت!!
بس ما اظهرت ليه ورسلت ايموجي غاضب ومعاه قلب مكسور!! وقلت انا عويرة؟!
قال حقك علي ما تزعلي!! بهزر معاك ما تتحسسي لازم تتعودي علي؟! انا مزحاتي ثقيلة أحياناً؟!.
قلت مالي ومالك ليه استحملك؟!
_قال لي لازم تستحمليني العمر كله لأنك حتكوني مرتي!! ومعاها غمزة؟!.
انا من الصدمة والفرحة فكيت التلفون من يدي ووقع علي الأرض!!
نواصل بعدين

♥️♥️هو ظلي وخلي ورفيق روحي!!
هو كالأمان الذي أُحارب به مخاوفي!!
هو القمر الذي أضاء عتمة قلبي!!
هو حبيبي! 🥰♥️♥️
يتبع

#رغبة_جسد 22/23/24 ¥
بقلم : آلاء آدم إبراهيم
ليه انا حاسة بيك فريد من نوعك ياعصام!! لدرجة انك مابتشبه زول؟! جملت حياتي وقلبتها رأساً على عقب!!! حاساك بقيت إدمان بالنسبة لي ولا منبه سعادة!!! انا عايزة اخبيك حتى من رغبتي!! لأني ما عارفة ممكن أعمل فيك شنو؟! انت كنت وما زلت الحلم الجمييل داك الما بتمنى أصحى منه!! وبحتار لم اشوف عفويته ومزحاته وتعامله الراقي مع اي زول؟! بحس أنه بليق بكل من شخص يعرفه؟! وفي نفس الوقت ما بليق به أي زول غيري!! اعتبروها أنانية ولا مرض ولا هووس بقت ما فارقة معاي!! وانا ضاغطة علي قلبي عشان ما تقلع من مكانه وابتسامتي ما سايعاني!! وبعاين للرسالة والتلفون لسسه على الأرض!؟ وقلت فعلاً قال مرتي!!! انا ما بتهيء لي؟!
ولو ما أبوي حصلني كنت حااخش في حاله ولا اجن؟! قال لي ولاء بسم الله مالك؟! شافني قاعده علي نفس الهيئة الوصفتها من شوية وبعاين للتلفون!!؟
_قال ارفعي التلفون ده من الأرض إنكسر ولا شنو؟!
_حتى ياداب جمعت!! دنقرت رفعته وابتسمت لأبوي وقلت قرب ينكسر لكن ربنا لطف؟! ما عارفة بتكلم عن قلبي ولا التلفون؟!!
_ابوي ضحك وقال الله يصبرنا عليكم!! وادخلي جوه البرد نزل!! بكره بتمرضي؟ وما تنسي فكري في كلامي!!
كنت ناسية طبعا!!! بس هو انا نفسي ناسياها معقولة اتذكر محمد وخطوبته لي؟!! قلت خير ان شاء الله تصبح على خير... خليته بتوضى قبل ينوم ودخلت علي غرفتي!! شايفة وعد ماسكة تلفونها وبتتصفح!! نفضت سريري ورقدت!! طبعا مخاصماها؟! متأكده أنها ما تقصد تزعلني بل إنها خايفة علي!! لكن تصرفها كان غبي ومتهور!! كنت حكلم امي بأسلوب افضل من ده ما اخليها تنفعل وتغضب للدرجة دي!! لا سمح الله لو كان حصل ليها شيء ما كنت حسامحها ولا حسامح نفسي؟! لكن هي قلبها أبيض طالعة لأمي بتغضب سريع وبتسامح أسرع!! رجعت فتحت الدردشة تاني وبقرا في الكلام حرف حرف وبتبسم وبتكشم لآخر كلمة جهجهتني!! وهي اتضح أنها مركزه معاي؟! ومن حيث لا أدري نطت في وجههي وخطفت التلفون!! خلعتني بالجد ما كنت متوقعة حركة طفوليه زي دي!! وصرخت! لكن تلبت وراها وبقيت الاويها في التلفون وهي بتحاول تقرأ الكلام ولسوء حظي لمحتك آخر كلمة مرتي؟! ومن صدمتها فكت التلفون في يدي زي ما انا اتخلعت قبيل؟! بس انا من شدة الحب! وهي من شده الصدمة!!؟
_وبقت تتأتي؟! ولاء انت ما نصيحة ولاء انت عارفة نفسك بتعملي في شنو؟! لو ما كنت أكبر مني والله كنت ضربتك؟! ولاء اصحي على حالك دي ما انت؟!
_قلت بغضب وخوف في أنً واحد!! ما شغلتك بي إن شاء الله أموت ما بخصك؟!
_دفرتني من كتفي وقالت غبية انت؟! قايلة نفسك محور الكون!! وكل شيء مرتبط بيك؟؟! انا بتكلم عن السمعة! عن أبوي وإحترامك لنفسك؟! ولا حتى ديل بقو ما بهموك؟! والله بدل تعملي فينا كده احسن تموتي ساااي!!
ما رديت عليها ورقدت واديتها ظهري بس كلامها بياكل في عقلي!! انا يومياً بتهرب من فرضية أنه أهلي ممكن يحصل ليهم شيء بسبب رغبتي المجنونة!! اصلاً نظرة المجتمع ما بتهمني!! بس كيف أقدر أقنع أهلي؟ كيف أواجه عبير!! لمتين حاتهرب من الأسئلة دي!!؟
قلت خلاص انا لازم احسم الفارغة مع عصام!! إذا عايزني بالجد يجي يتقدم لأبوي عديييل ويختهم أمام الأمر الواقع وبعداك لكل حادثة حديث!! لأنه الرعب الانا فيه ده والخوف من المجهول ده مؤرقني!! وبكده حااعرف عصام جادي ولا عايز يقضي بي زمن!!!؟
نمت وقمت الصباح شفت وجهي لسسسه اصابع امي ظاهرة على خدي!! اعمل شنو؟! امس المدير والموظفين حذروني من الغياب والتأخير المتكرر!! لو اليوم اخدت إذن وغبت بفصلوني وبقولو لي خليك في بيتكم ما تجي؟! وكمان اداريه بالمكياج محمد يقول البت ما صدقت اتخلصت مني وعشان تثبت لي جات ممكيجة ومبسوطة!! لأنه انا عادتاً بمشي بدون مكياج بس مرطب وشوية فير!! قلت اهون محمد بقنعه!! فمليت وجهي فاونديشن وبدرة لمن ما عرفته الصراحة!! بس شكل شفايفي بقى شين وخاربين الرصه! عملت مرطب بس ما جاي مع مكياج الوجه!! فإضطريت عملت روج!! والله خجلت من نفسي قبل ما اشوف محمد!!
ووعد لم شافتني شكلها فهمتني غلط!! وقالت بغضب ده كله عشان القوقو ده؟! ما تتعبي نفسك؟ الراجل المتزوج محتاجة اكتر من الروج عشان تلفتي انتباه!! لأنه شاف الاكتر إثارة منه!!؟
_عرفتها بتحاول تستفزني؟! لكن ما وقعت في شركها بل كنت حريصة اخليها في اعتقادها ده عشان تتغاظ مني أكتر واكون اخدت حقي منها!! وعشان ما الفت الأنظار اكتر بعد شفت شكلي بالمكياج رجعت لبستي المرقتها اول ولبست عباية كحليه عادية وطلعت اصبح علي أمي وابوي قبل ما الترحيل يجي!! امي لم شافتني استغربت؟! اكيد متوقعة انه يكون وجهي وارم وعيوني منفخة وزعلانة وما عايزة امشي الشغل!! لأنه ده طبعي وماف زول بفهم الولد أكتر أمه!!! بانت عليها الدهشة!! صبحت ليها بإبتسامة وردت عادي لأنها امي وقلبها ابيييييض!!! وشكله ابوي كلمها موضوع الراجل المتزوج لأنها امس كانت منفعله وما عارفة شيء!! ابوي قال لي اشربي الشاي أول!! قلت ماف زمن

الترحيل بكون قرب!! مع السلامة!! وفعلا سمعت البوري!! قلت ليهم جا؟!
_ابوي قال لي موفقة ان شاء الله وما تنسي تكلمي محمد؟!
_اتخلعت وقلت بشنو؟!
_قال لي شكلي نسيت اكلمك امس بالليل؟! قولي ليه أبوي منتظرك بعد دوامكم عايز يشرب معاك كباية شاي؟!
انا قلبي رجف؟! وقلت خير إن شاء الله بكلمه!! وودعتهم وطلعت صبحت علي بعض الزملاء وركبت متوتره وبفكر ابوي عايز من محمد شنو؟؟ ما يكون عايز يعقد لي وانا ما جايبة خبر؟! اتصرف كيف؟ ولا احلها كيف؟ ولو ما كلمته واختلقت ليه عذر! يمكن أبوي يتواصل معاه بالتفون ويطلعوني كذابة!!؟ ولحدي ما وصلنا انا بفكر؟ لم نزلت شايفة عربية اخو محمد واقفة!! اتشجعت واخدت نفس عميق ودخلت!! سلمت عليهم وجا ناحيتي مبتسم!! قال لي شايفك متزينة؟! هل ياترى دي إشارة لي بأنك غيرتي رأيك؟! وضحك!!
_ياسلام ياااخ شوفوه هو بفكر في شنو؟! هو في وادي وانا في وادي آخر!!! بادلته الإبتسامة وقلت يمكن لأني أنثى ولازم أكون حلوه أنيقة!!! أبتسم وقال ممكن برضو؟ بادلته الإبتسامة وكل واحد مشى على مكتبه!! كيف اقول ليه مخبيه دقة امي عشان رفضتك؟! ولا انه عصام يومي بعشمني أكتر!! ولا أبوي الما عارفة عايز منه شنو؟! اتأففت وقعدت في مقعدي وعندي ملفات من المفترض اراجعهم من أمس واسلمهم الإدارة!! فضلت شغاله عليهم ومركزة علي شغلي!! في استراحة الفطور جاني في المكتب قال لي منتظرك ما تقولي لي ما عندي نفس ولا شبعانة؟! ابتسمت وقلت ارح!! شلت معاي ملفاتي الخلصتها وسلمتها لسكرتارية المدير وانا طالعة علي الفطور!! وصلنا الكافيتريا وطلبنا الفطور وعزمنا معانا زميلة جات فطرت معانا!! وانا بطني بتلويني ما عارفة اقول ليه شنو؟! بعداك الزميلة طلبت لينا عصير وشالت حقها وطلعت علي المكتب وخلتنا في حتتنا!! قال لي اهااا حاسي بيك عايزة تقولي حاجة!! قلت والله يامحمد ما عارفة اقول ليك شنو؟! انت غالي علي ما عايزة ازعلك ولا اخسرك انت فاهمني مووش!!
_قال لي لو قصدك موضوع أمس اخدي راحتك وفكري وااي قرار انا بتقبلو والله!! اصلاً ما اول مره اترفض؟! وضحك!!! مع أنه بضحك بس حسيته حزين!! العيون بتفضح أحياناً!! ليه ياولاء بتعملي في نفسك وفي الغير كده؟! واتأثرت شديد لم عيوني رقرقو!!
_قال لي دقيقة عايزة تبكي؟!
_إبتسمت ودمعتي جات نازله!!
_ملامحه اتغيرت!! وقال لي إياك تبكي عشان زول!! معقوله تكوني شفقانة علي!! معقوله انا حالتي بتبكي؟!
_لا دقيقة دقيقة دا ما قصدي والله ما تفهمني غلط!!؟ انت شاب كامل ومكمل بس انا الما بستحقك؟ انا ببكي علي نفسي والله ما عليك انت؟! بالجد أنا بحترمك يامحمد!! حسيته راق شويه!
_قال ولا يهمك!! شكله حس بأنه قراري الأمس كان نهائي!!! قال لي طيب المطلوب مني شنو في الوقت الحالي؟!
_ابتسمت!! بالجد مسكين!! بقول امي انت ما ينفع معاك راجل مسكين؟؟ ينفع معاك البذلك والبهينك وبقطعك النغمة!! اتنهدت بصعوبة!! وقلت انك تكون صديق وزميل وداعم لي!!
_ضحك!! قال لي انت مريضة اتعالجي!!
_بالجد حيرني!؟ قلت وانا مكشرة كيف؟!
_ابتسم وقال انت امس رفضتي قربي منك كخطيب وشريك حياة!! الليله بكل... وسكت شكله عايز يقول بكل وقاحة!! واصل كلامك وانا مندهشة!! بكل عين قوية تقولي عايزاني جنبك كصديق وزميل؟! ما يا اكون معاك يا لا؟! بس ما ممكن اكون ولا اكون في نفس الوقت؟! فكري في الغيرك ياولاء!! نحن كمان عندنا مشاعر!!
وفجأة اتذكرت وعد لم قالت لي انت ما محور الكون!!!؟
انا مالي!!! يارب اهديني!! اعتذرت منه وقلت شكلك فهمتني غلط؟! يا اما انا ما بعرف اوصل الكلام صااح ولا انتو بتفهوني غلط؟! انا لم قلت كده ما كنت عايزة اكسر قلبك ما عايزاك تزعل مني!! وقلت تعاملنا العادي حيبرهن ليك اني ما رافضة الإرتباط بيك لمشكله فيك؟! بل لأنه ما مهيئة للدخول في ااي علاقة!!.
_قال لي فاهمك بس خليني انا الاختار؟! لو عايز قربك بكون جنبك كصديق وفي الحالتين نحن زملاء اصلاً ويومي بنشوف بعض؟! بس ما تقرري نيابة عني!! اسسه يمكن انا الاكون كرهتك وما طايق اشوفك!! فما مضطر اكون جنبك؟! ولا دي ما ممكن حدوثها في قاموسك؟!
_بالجد استفزاني؟! بحرف كلامي كله وكأنه بفتش لمشاكل!! قلت ليه شكله ما حنتفاهم كده؟! بعد تروق بنحكي ورجعت المكتب وانا غضبانة!!! وبرضو نسيت موضوع أبوي؟! ولو كلمته متأكده حيقول لي برضو ما مضطر أمشي لابوك؟! دخلت وانا ما طايقة نفسي!!! بعد نهاية الدوام وانا ماشة علي الترحيل صادفته وقلت ليه ابوي قال عازمك شاي! لو ما حابي تمشي ما مشكلة انا بعتذر ليه!! قال لي خير!! طالما اننا ماشين نفس البيت ارح معاي؟! شكرته وقلت بمشي بالترحيل!!! وجيت ماشة وهو واقف بعاين لي مستغرب!!!