#الشقه13 و 14 :-
بقلمي: فاطمه السر..
قعدت لما معاي لحدي بليل..جو البنات المسا۽.. قاعدين في الصاله انا و ميسون و هند..
جات طالعه شيماء من الغرفه كانت هدت شويه سلمت و قعدت هند:( مالك شكلك تعبانه وله كنتي بتبكي? ) شيما۽:( تعبانه..)
ميسون :(سلامتك مالك! ) شيما۽ سكتت و عاينت لي.. شيما۽:(احكي ليهم ي مرام ماف حاجه بتتدسا..) استغربو عاينو لي..
ميسون :(في شنو? احكي مالا شيماء?)
بقيت ساكته م قادره اتكلم..
هند:( الموضوع خطير قدر ده? احكو في شنو خوفتوني.. )
قلتا ليهم:( طيب بحكي ليكم.. )

قاعده لما في غرفتها بتحضر في التليفزيون سمعت صوت الباب فتح قالت في نفسها( ده صالح..) سمعت معاهو صوت زول تاني... جا صالح داخل الغرفه..
صالح:( معاي كرم صحبي البسي كويس و تعالي سلمي عليهو و اعملي لينا حاجه نشربا..)
لما:( طيب..)
لبست فستان و طرحه و طلعت سلمت علي كرم و مشت المطبخ عملت عصير و جات ختتو ليهم و ماشه علي الغرفه ناداها صالح..
صالح:( تعالي اقعدي معانا )

اتوترت بس م قدرت تقول لا رجعت قعدت .. بقو اتونسو و هي ساكته تسمع فيهم.. و كرم بعاين ليها م نزل عينو منها اتوترت شديد من الحركه و صالح م ركز ليهو..

بعد خلصو العصير مشت تعمل ليهم شاي اتاخرت في المطبخ عشان م تطلع ليهو و اعاين ليها..في الاخر طلعت قدمت ليهم الشاي و قعدت.. م اتكلمت الا لو سالوها.. بتتكلم كلمه كلمتين و بتسكت.. كانت متوتره و خجلانه و نظرات كرم وترتها شدييييد...

قاعدين ميسون و هند مخلوعات بعاينو لي انا و شيما۽ م قادرين اصدقو.. شيما۽ مدنقره بتعاين في الارض و دموعها نازله..
هند بزعل:( كذب عليك و غشاك عشان لقاك هبله و بتحبيهو.. انا م متخيله تكوني غبيه بالطريقه دي.. )
ميسون :(م حيعرسك.. و حتقتلي ولدك و حتشيلي ذنبو..)
شيما۽:( بعرسني م علي كيفو و ولدي م بقتلو.. )
هند بصراخ :(والله م بعرسك..من قال ليك م جاهز دي م حيعرسك..و براهو بخشمو قال ليك نزلي الولد..تستاهلي عشان انتي غبيه حب شنو بتحبيهو لواحد ذي ده مفلس م عندو قرش و كمان ماشه تعرسيهو عرفي.. )
قلتا ليها :(اهدي ي هند.. )
هند:( ياخ انا جد مصدومه.. ياخ شيما۽ العاقله تعمل عمله ذي دي.. و كمان مع واحد حقير م استاهل ي ريت لو كان بستاهل يااخ..)
قلتا ليها:( هند اهدي ياخ الموضوع م بحلوهو كده..)

ميسون :(اهدي ي هند...كدي اسي نشوف حنعمل شنو? )

شيما۽ :(ماف حل غير نعرس بس.. بكرا بمشي الاقيهو و اتفاهم معاهو.. )

قلتا ليها:( ااي اتفاهمي بس بالهداوه كده.. م تكوركي و تجوطي..)
ميسون :(عايني لو مشكلتو قروش بس احنا بنحلها ليهو.. نديهو قروش اجي اعمل العرس م عشان خاطرو هو طبعا بس عشان خاطرك انتي.. قولي ليهو انا بدين ليك قروش العرس.. )
هند :( كمان عايزين تدوهو قروش? والله انتو جنيتو.. )

قلتا ليها :(كلام ميسون صح ي هند.. هو مشكلتو القروش.. نديهو القروش و اعمل العرس و بعدين ربنا يحلها.)

.هند :(ده واحد مستهبل اصلا انا م مصدقاهو..و م تقولو ليهو بنديك قروش عشان م اطمع فيكم سااي..هو الغلط مفروض ابقي راجل و احل المشكله م اجو بنات احلوها ليهو.. )
ميسون :(ي هند احنا بنحلها عشان شيما۽ صحبتنا م عشانو هو.. )
هند :(خلاص يبقي راجل و اتدين قروش و اجي اعرس بس.. )..
نتلاقي🙂
#الشقه14:-
لقلمي: فاطمه السر..
راقد صالح في السرير بشرب في سيجاره جات داخله لما قعدت في السرير..
صالح:( انتي ي لما ليه م اتونستي مع كرم صحبي?)
لما:( انا م بعرف اتونس مع راجل م بعرفو)
صالح:(ده صحبي مفروض تتونسي معاهو.. )
لما:( كرم ..ده صحبك انت م صحبي انا م مجبوره اتونس معاهو و هو ذاتو بعاين نظرات م كويسه..)
صالح:( عاين ليك نظرات م كويسه? )
لما:( ايوا )
صالح:( انتي عارفه ده منو? ده اكبر تاجر مواشي.. قروشو م تاكلا النار..)
لما بزعل :(انا مالي و مال شغلو و قروشو.. بس م يعاين لي كده..)
صالح:( م قصدو شي انتي براك معقده.. )
لما:( ااي معقده..)
صالح:( ي بت ااي بت بتتمني بس نظره منو.. )
لما بخلعه و زعل :(صالح انت جنيت انا مرتك!! كيف تقول لي كده.. )
صالح:(ياخ م تفهمي غلط.. ) قام قعد جمبها..
صالح:( عايني انا داير ادخل معاهو في صفقه بتاعت مواشي..لو رضي ادخلني معاهو حناكل انا و انتي الشهد ي لما.. عشان كده داير بس اكون مبسوط مننا.. )
قامت وقفت بعيد قالت بزعل..
لما:( اسمع ي صالح انا م لي دعوه باصحابك وله بشغلك..لو سمحت م تدخلني معاهم.. )
و طلعت قعدت برا بتبكي..

قاعدين ميسون و عمار في الشقه..مدت ميسون قروش ل عمار شالها..عمار:( م اتحرم منك حبيبتي.. )
ميسون:( حاول حل مشاكلك دي سرعه و رجع شغلك م ممكن كل مره انا اشيل قروش من مجدي و اديك انت.. م عندي تاني انا .. )
عمار:( المرا لو م وقفت مع راجلها حتقيف مع منو? )
ميسون:( انت م راجلي انت حبيبي بس..)
عمار:( الحبيب هو الراجل ذااتو ..انتي قايله الراجل بس في قسيمه الزواج لالا الراجل البكون عايش هنا.. )
و

اشر ليها علي قلبو ...
ميسون:( كويس ي عمار.. بس وريتك م عندي قروش تاني انا ..دي شلتها من ورا مجدي.. م عارفه ذاتو لو سالني اقول ليهو شنو..)
عمار:( قولي ليهو ااديتها لحبيبي)
وضحك..
عاينت لليهو بزعل و قامت شالت شنطتها ..
ميسون:( ماشه لبنات انا..باي.. )

تاني يوم قاعدين شيما۽ و هشام في الشقه هشام قاعد في الكنبه بشرب في سيجاره و شيما۽ قاعده في الكرسي قصادو..هشام اخد نفس من السيجاره و نفخو في الهوا ..
هشام:( انا لو كنت بقدر اعرسك عادي م كنت قلتا ليك نعرس عرفي.. )
شيما۽:( طيب ي هشام انا سمعتا كلامك و عرسنا و اسي انا حامل اعمل شنو ي هشام?)
هشام:( تنزليهو بس م عندي ااي طريقه نعرس اسي..)
شيما۽:( لو علي القروش انا بديك.. م دايره مهر م دايره ااي شي..بس عقد في الجامع )
هشام بكوراك :(ياخ انتي م بتفهمي.. بقول ليك م عندي طريقه اعرس اسي..)
شيما۽:( المشكله وين?)
هشام:( ياخ دي حاجه م بتفهميها انتي..)
مسحت شيما۽ دموعها و قامت قعدت علي الارض جمبو مسكت ليهو يدو..
شيما۽:( هشام م تعمل فيني كده.. انا م بقدر اقتل ولدنا.. هشام عليك الله نعرس.. قروش العرس كللها علي ..عليك الله..انا شيما۽ حبيبتك.. عاين لي هنا..)
سكت م ردا ليها و م عاين ليها باست ليهو يدو..
شيما۽:( عليك الله تعال البيت و اهلي حارضو..و القروش علي.. تاني في شنو??)
شال يدو من يدها و وقف..
هشام:( قلتا اسي م بقدر..نزلي الولد بس م دايره اتحملي البحصل ليك انا م عندي معاك شغله.. )

و مشي علي باب الشقه طلع و خبط وراهو الباب شديد.. شيما۽ قعدت في الارض بقت بتبكي..

قاعدين في شقتي انا و ميسون و هند.. بنضرب لشيما۽ تلفونها مقفول.. قلقنا عليها
قلتا ليهم:( امكن عمل فيها حاجه!)
ميسون :( م ابقي خيالك واسع..اسي بتجي..)
بعد شويه الجرس دقي ختيت كبايه الشاي من يدي و جريت علي الباب لقيتها شيما۽ ..
قلتا ليها:( ليه تلفونك مقفول?)
دخلت قعدت.. دخلتا وراها..
ميسون:( مالك ي شيما۽? حصل شنو??)
شيما۽:(اتكلمتا مع هشام بس رفض قال م عندو ااي طريقه نعرس اسي.. و انزل الولد بس.. )
هند بزعل:( مش قلتا ليكم حقير.. )
ميسون:( قلتي ليهو حتديهو القروش حقت العرس?)
شيما۽:( ااي كلمتو قلتا ليهو القروش كلها علي بس برضو رفض..)
قلتا ليها:( بالجد غشاك الولد ده م اهتما ليك ولا لولدو.. )
شيما۽:( م بتصدقو الموضوع كلو م هاميهو ولا حرك فيهو شعره اتعامل معاي بطريقه بارده شديد عمري م شفتو كده..)
هند كوركت :( عشان شال منك الدايرو ي غبيه..و لو تاني سالتيهو حاشاكلك و ممكن اضرب.. و تستاهلي ااي شي اعملو ليك عشان انتي متخلفه..)
قلتا ليها:( ي هند اهدي ياخ..م ممكن كده.. )
ميسون طلعت علبه سيجائر و بقت تشرب و شكلها متوتر.. شيما۽ شالت منها سيجاره و بقت تشرب برضو.. سكتنا بقينا م عارفين نعمل شنو..
نتلاقي😍

#الشقه15 و 16 :-
بقلمي: فاطمه السر
قلتا ليها:( ي شيما۽ انةتي لازم تنزلي الولد ده.)
عاينت لي بخلعه.. شيما۽:( م بقدر..)
قلتا ليها :(لالا بتقدري لازم انزل.. قبل م بطنك تكبر و تنفضحي..)
ميسون:( كلام مرام صح.. نزلي الفي بطنك و خلاص ماف حل تاني.. )
بقت تبكي.. شيماء:( م بقدر اقتل ولدي والله م بقدر..)
قلتا ليها :(ي شيما۽ خليك من العاطفه دي.. عايني لمواضيع بالعقل.. هشام رفض العرس.. الايام بتمشي و بطنك حتكبر حتعملي شنو? )
شيماء:( م عارفه بس م بقدر والله.. )
ميسون:( بس حتنزلو كيف?)
قلتا ليها:( نشوف وحده تجي هنا تنزلو ليها بس..م تمشي مستشفي لا شي..)
ميسون:( صح فكره كويسه..)
هند :( انا بعرف وحده بتعمل كده..)
قلتا ليها:( خلاص كويس تكلميها تجي تنزلو ليها.. )
شيماء:( لا م بنزلو وريتكم انا..)
هند :(م علي كيفك لازم انزل انتي غبيه!! تعملي شنو لمن بطنك تكبر حتقولي لامك و ناس بيتكم شنو?)
شيماء:( م عارفه ياخ.. بس دايره ولدي انا.. )
و ختت يدها في بطنها..
ميسون:( خلاص ي هند كلميها و خليها تجي هنا بكرا طوالي عشان نخلص من الموضوع ده.. )
هند :(كويس بشوفها و بوريكم الحاصل..)

قاعده لما في غرفتها جا داخل صالح قال ليها :(كرم معاي برا)
لما:( كرم منو? )
صالح:( الكان امبارح معاي..تعالي سلمي عليهو و اعملي لينا حاجه نشربا)
لما كشرت وشها:( حاعمل ليكم بس م حاقعد معاكم.. )
جا عليها مسكها من يدها شديد..
صالح:( لا ح تقعدي م علي كيفك.. م تبقي كده اسمعي الكلام..يلا ارح..)
مشت لما سلمت علي كرم و مسك ليها يدها شديد اتضايقت من الحركه..مشت بزهج علي المطبخ عملت عصير و جات قدمتو ليهم و دايره تمشي ..
صالح:( اقعدي ي لما)
قعدت..
كرم مبتسم و بعاين ليها.. صالح و كرم بتونسو في الشغل و كده.. و لما ساكته بعد شويه كرم قال:( ي صالح امشي جيب لينا حاجه نتعشا بيها..)
صالح:( اوكي طوالي..)
لما اتخلعت بقت تعاين لصالح..
صالح:( م بتاخر اسي بجي )
و قام طلع سرعه..
لما قلبها وقف و خافت شديد.. طوالي كرم جا عليها قعد جمبها زحت منو..
لما:( ابعد عني لو سمحت..)
كرم:( ليه كده ي لما.. انتي عاجباني شديد.. )
لما:( انا متزوجه و انت عارف كده.. )
كرم:(ماف مشكله )
مدا يدو امسك يدها قامت بخلعه من جمبو
لما:( انت زول تافه )
و جرت علي غرفتها قفلتها عليها من جوه.. جا كرم حاول افتح الباب لقاهو مقفول
كرم:( لما افتحي الباب سرعه..)
لما:( م حافتح الباب اطلع من هنا سرعه..)
بقي اضرب في االباب و اقول ليها :(افتحي) بقت تبكي.. في الاخر قال ليها..
كرم:( م حاسيبك ي لما و حاندمك علي العملتيهو ده.. )

و سمعتو فتح باب الشقه و طلع .. بعد شويه جا داخل صالح بكورك:( لما لما..)
جا ضرب ليها الباب..
صالح:( افتحي الباب ي لما افتحي سرعه.. )
خافت من صوتو مشت فتحت الباب ضربها كف..
صالح:( كيف تعاملي كرم كده..)
بقي اضرب فيها..
لما:( ده زول حقير داير اتحرش بي.. )
صالح:( ليه تزحي منو و تقفلي الباب عليك?)
وقعت علي الارض بتبكي..
صالح:( اسمعي هنا.. و رب الكعبه تاني كرم اجي هنا و تعملي العملتيهو ده.. الا اجدع ذي الكلاب برا البيت و شوفي حتعيشي من وين? و اطرد ابوك من الشغل و اشيل منكم بيتكم.. اصلا الاوراق كلها عندي.. نشوف حتعيشي من وين انتي و اهلك..)
و طلع مشي..بقت تبكي و منهاره.. م كانت متخيله راجلها كعب لدرجه دي و كمان داير ابيعها لراجل عشان شغلو ..كرهت روحها شديد و كرهت راجلها و ابوها و ااي زول...
نتلاقي😉

#الشقه16:-
تاني يوم هند كلمتني قالت :(المرا حتجي الساعه 10 بليل) قلتا ليها:( تمام) و ضربتا ل شيما۽ كلمتها.. بس رفضت و بقت تبكي حنستها و قلتا ليها ماف حل غير كده.. ميسون ضربت وريتها الحاصل..قالت بتجي.. فعلا المغرب جات ميسون و هند و شيما۽.. مستنيين المرا تجي..
هند: ( شيماء بيتي هنا الليله)
قلتا ليها:( ااي صح.. اضربي لامك قولي ليها انو انا عيانه و انتي حتبيتي معاي)
هند:( ااي..كلميها اسي..)
شيماء:( كويس)
شالت التلفون و قامت طلعت برا البلكونه..
هند:( العمليه دي كعبه.. انا خايفه عليها.. )
ميسون:( لالا م صعبه هي لسه في شهرها التاني..م صعبه.. ربنا يسهل بس.. )
كنا خايفين شديد علي شيما۽..
شيما۽ جات قعدت..
شيماء:( كلمتها خلاص.. )
طلعت شيماء علبه السيجائر بقت تشرب.. كانت خايفه و متوتره و زعلانه شديد..حاولنا نطمنها بس م قدرنا ..
الساعه 10 جات المرا شايله شنطه.. شكلها سااي اخوف ..شيما۽ من شافتها بقت تبكي.. المرا قالت ليها:( من اسي خايفه كده? طيب بتعملي كده ليه? يلا وين الغرفه تعالي معاي ي حلوه م عندي وقت لدلع ده..)
هند:( تعالي بيجاي الغرفه)
انا و ميسون هدينا شيما۽ و دخلناها وراها الغرفه و قفلت الباب.. بقينا قاعدين برا متوترين شديد و خايفين...بعد ساعه المرا جات طالعه جرينا عليها..
قالت لينا:( البت كويسه بس تعبانه عشان جسمها ضعيف و

النزيف حاستمر لمده كم يوم لحدي م الجنين انزل كلو.. المهم ترتاح و تاكل.. )
هند:( ليها شكرا ليك..)
و وصلتها لحدي الباب و ادتها قروشها..
دخلنا علي شيما۽ لقيناها بتبكي و تعبانه شديد.. خوفنا عليها شديد.. اديناها مسكن و نامت..
قلتا ليهم:( م تخلوني براي معاها.. وحده فيكم تبيت معاي..)
هند:( انا م بقدر ابيت عارفين كده..بيتي انتي ي ميسون..) ميسون:( كويس ببيت انا..)
هند مشت..
قعدنا انا و ميسون خايفين علي شيما۽ كل شويه نمشي نطمن عليها و جاتها حمه بقينا نعمل ليها مكمدات لحدي الصباح حتي الحمه راحت.. بس كانت لسه تعبانه...

صحت لما.. لقت صالح طلع.. لبست و طلعت مشت بيت ناس امها..عشان تشتكي من راجلها لقت امها راقده عيانه م بتتكلم و م واعيه اصلا و ابوها قاعد برا بسكر م جايب خبر الدنيا..و اخوانها الصغار في المدرسه.. اتخلعت علي امها شديد و خافت..ساقتها مع الجيران ودوها المستشفي..
قالو ليها :(عندها جلطه في الراس..)
خافت شديد م كان عندها قروش ضربت لصالح حكت ليهو صالح:(اسي بجيك ) و جا المستشفي..
صالح:(بديك القروش المحتاجا ليها امك كلها و ذياده بس بشرط.. )
لما:( شرط شنو?)
صالح:( تقبلي ب كرم.. )
اتخلعت لما:( لالا م حاقبل بيهو و م دايره اشوف وشو تاني.. )
صالح:( خلاص ماف قروش خلي امك تموت..)
و طلع ماشي.. خافت لما جرت عليهو مسكتو من يدو
لما:(صالح.... خلاص موافقه بس جيب قروش و الله امي تعبانه و حتموت لو م اتعالجت..)
.ابتسم ابتسامه عريييضه و طلع قروش اداها ليها شالتها و جرت علي الحسابات...
نتلاقي😉

#الشقه19 و 20 :-
بقلمي: فاطمه السر..
قاعدين انا و ابوي في البلكونه بشرب في شاي و بتونسو.. ابوي:( انا جاييك في موضوع ضروري ي ميمي..)
قلتا ليهو:( قول ي بابا..)
ابوي:( متذكره معتز ولد عبدالرحيم صحبي? )
قلتا ليهو:( الكان بقرا في كندا داك?)
ابوي:( ايوا.. هو اسي هنا..بس اصلا شغال هناك بجي كل كم سنه مره.. و اسي جا اجازه و جاني مخصوص قال دايرك.. رايك شنو? )
اتخلعتا ..
قلتا ليهو:( بس ي بابا..انا م بعرفو..)
ابوي:( بس انا بعرفو ولد ماشا۽الله عليهو.. تربيه و تهذيب و تعليم.. بالجد ي مرام حابقي متطمن عليك معاهو.. بالجد مناي توافقي..)
قلتا ليهو:( انا اخر مره شفتو قبل اربعه سنه تقريبا..)
ابوي:( م مشكله نعمل خطوبه و تتعرفو.. و بعد داك تحددو العرس.. واصلا الحب الحقيقي بجي بعد العرس)
قلتا ليهو :(م عارفه ي ابوي..)
ابوي:(فكري ي بتي و استخيري و اعرفي دي رغبتي انا عشان اكون مرتاح ي بتي م معروف ربنا باخد امانتو متين.. داير اكون متطمن عليك ي بتي.. )
قلتا ليهو:( ربنا اديك طول العمر ي ابوي..)
و سكتا بقيت افكر في احمد و في كلام ابوي..

طالعه هند من غرفه شيما۽ هي و ميسون.. هند:( خلاص ببقي بتطمن علي شيما۽ بالتلفون.)
ميسون:( طيب.)
هند:( يلا تصبحي علي خير)
ميسون :(وانتي بخير..)
طلعت هند مشت..
و ميسون طلعت فوق..
لفت هند بالشارع لقت مجدي مستنيها في العربيه جرت ركبت سرعه و مشو ...
ميسون فتشت في الغرفه م لقت مجدي.. استغربت قالت في نفسها:( ده كمان مشي وين اسي مش كان قااعد...)

مجدي و هند في العربيه..
مجدي:( ي الله.. صعب علي شديد اشوفك جمبي و م قادر اتكلم معاك.. )
هند:( و انا كمان جد اتضايقتا كان نفسي اقول لميسون لمن سالتني انتي واقفه هنا ليه اقول ليها ده راجلي ي ميسون..)
مجدي ضحك :(جنيتي انتي.. قريب ان شا۽الله حنعلن عرسنا لكل الناس)
هند:( ان شا۽الله..)
مجدي:( دايره تمشي وين? )
هند:( نتعشا في ااي مكان.. )
مجدي:( رايك شنو نشيل الاكل و نمشي بيتنا.. )
هند:( اوكي حبيبي..ي بيبي ممكن طلب حبيبي? )
مجدي:(عيوني ليك.. )
هند:( دايره عربيه.. تعبتا من ركوب التاكسي.. )
مجدي:(بس كده عيوووني ليك.. بكرا نمشي نختار العربيه الدايراها.. )
فرحت هند:( ليهو ربنا يخليك لي حبيبي... )

نتلاقي🙂

: #الشقه20:-
بقلمي: فاطمه السر..
كنت بتكلم مع احمد في التلفون بليل..
قلتا ليهو:( ي احمد ااعمل شنو!!)
احمد:( كنتي تكلميهو بي يااخ.. اكيد م حارفض)
قلتا ليهو :(م عارفه خوفتا و اتفاجآتا.. م قدرتا اكلمو.. ) احمد:( كلميهو ي مرام دي فرصه.. انا كلها سنه ان شا۽الله و بجهز و بنعرس..)
قلتا ليهو :(طيب بكلمو بكرا.. )
احمد:( طيب..و اصري عليهو قولي ليهو بنحب بعض و كده.. )
قلتا ليهو :(طيب..ربنا اسهل.. )
كنت مقلقه شديد و خايفه اكلم ابوي.. صح ابوي بحبني شديد بس المواضيع الذي دي ابوي صعب فيها شدييد..

في الصباح كنا بنشرب في الشاي انا و ابوي.. كنت سرحانه و خايفه افتح معاهو الموضوع و هو ركز لي..
ابوي:( مرام.. مالك ي بتي.. )
سكتا
ابوي:( من كلمتك في موضوع معتز و انتي م كويسه في حاجه?)
م رديت..
ابوي:( عندك زول??)
هزيت راسي قلتا ليهو:( ايوا..)
ابوي:( طيب م تقولي ي بتي.. طول عمرنا انا و انتي صريحين مع بعض)
قلتا ليهو :(صح ي ابوي..)
ابوي:( طيب احكي لي ده منو و اهلو من وين??)
قلتا ليهو:( انت بتعرفو ي ابوي..)
ابوي ااستغرب و قال لي:( ده منو??)
قلتا ليهو:( احمد ولد ناس عمو شاكر..جيرانا في بورسودان)
سكت مساااافه و كان مخلوع.. اتوترتا جدا من رد فعلو.. ابوي:( هو دايرك و كده?)
قلتا ليهو:( ااي و اسي متواصلين مع بعض بس مستني اجهز عشان اجي اتقدم.. )
سكت مسافه ابوي بفكر..
قلتا ليهو:( مالك ي ابوي? )
ابوي:( من الاخر كده ي مرام..احمد م بنفع ليك.. و انا م دايرو ليك..و م تفتحي موضوعو ده تاني.. لمن ارجع حاكلم معتز و تاخدي اجازه من الشغل و تجي هناك نعمل الخطوبه )
قلنا ليهو:( بس ي ابوي.. )
قاطعني..
ابوي:( مرام انا ابوك و عارف مصلحتك.. لو سمحتي ي بتي تسمعي الكلام بدون ااي اعتراض.. انتي م عندك ثقه في اختياري وله شنو?)
قلتا ليهو:( لا طبعا ي ابوي..)
ابوي:(قولي لاحمد ابوي قال ماف نصيب...)
قلبي وجعني شديد و مسكتا روحي عشان م ابكي قدام ابوي خلصنا باقي الشاي سرعه و نزلنا مع بعض ابوي مشي مشاويرو و انا مشيت الشغل..
دخلتا المكتب بقيت ببكي احمد ضرب لي م قدرتا ارد عليهو كنت منهاره شديييد...

قاعـدين ميسون و شيما۽ في الحديقه..
ميسون:( اها ي شيما۽ اسي حاسه روحك كويسه?)
شيما۽ بصوت حزين:( ااي الحمدلله.. امي قلقت علي لازم ارجع البيت خلاص.. )
ميسون:( ي ريت لو تقعدي معاي تاني والله و نستيني..) شيما۽ :( بجيك ان شا۽الله في ظروف احسن من كده..) ميسون :( اسي انتي حتعملي شنو مع مع هشام.. )
شيماء:( بمشي اسال منو اشوفو مشي وين)
ميسون:( بس اتكلمي

براحه م تكوركي معاهو )
شيماء:( بعرف ليهو كويس انا..م بخليهو.)
ميسون اتخلعت :(حتعملي شنو??)
شيما۽ ابتسمت :( لالا م تخافي م بعمل حاجه كعبه.. بتكلم براحه..)
و سرحت بتفكر..
نتلاقي☺

#الشقه21 و 22 :-
بقلمي: فاطمه السر
واقفه هند بعربيتها المظلله قدام بيت ميسون مستنياها تطلع.. بعد شويه ميسون جات طالعه ركبت عربيتها و مشت و هند مشت وراها...بقت متابعاها لمن وصلت الرياض وقفت العربيه تحت عماره و طلعت.. نزلت هند و مشت وراها راقبتها شافتها دخلت ياتو شقه و ابتسمت و نزلت مشت..

لما قاعـده زعلانه في غرفتها و وشها شاحب و حالتها كعبه و م عارفه تعمل شنو.. قامت بتفتش في دولاب صالح علي حاجه.. لقت كيس ابيض صغير فيهو ذي بودره بيضا.. استغربت قالت في نفسها :( دي بودره?الهيروين!! قبل يومين كان بشم في حاجه في الصاله.. تقريبا بشم في ده.. بقولو الهيروين ده بريح الزول و بخليهو مبسوط..كدي اجربو.. اصلا بايظه بايظه.. )
قعدت في الكنبه و فتحت الكيس بقت تتذكر شافت في المسلسلات بشموهو كيف.. ختت حبه في طرف يدها و شمتو...نخرتها حرقتها بس حست انها مبسوووطه رقدت مبتسمه في الكنبه..

كنت قاعده في غرفتي ابوي كان لسه م جا.. كنت بتكلم مع احمد في التلفونو ببكي حكيت ليهو انو ابوي رفضو.. احمد زعل شديد و استغرب..
قلتا ليهو:( م عارفه ابوي قال كده بس.. و انا م بقدر اخالف ابوي.. انت عارف ابوي بالنسبه لي شنو.. )
احمد:( وانا ي مرام?? )
قلتا ليهو:( م عارفه ي احمد انت عارف الموضوع صعب كيف علي..عليك الله م تصعبو ذياده..)
احمد:( م تقنعيني ي مرام.. م بقدر اسيبك انا.. م حاسكت.. ابوك لمن ارجع هنا انا بكلمو لازم اديني عذر مقبول م ممكن ارفضني سااي كده.. انا ولد جيرانكم و متربيين في حته وحده و بتعرفو اهلي كيف ارفضني كده..لازم اسالو..)
قلتا ليهو:( كويس ي احمد كلمو.. بس انا م بكلمو تاني.. خجلتا عديييل..)
احمد:( طيب خلي الباقي علي.. )

نتلاقي😉

: #الشقه22:-
بقلمي: فاطمه السر..
قاعده في الصاله بعاين في التليفزيون بس سرحاانه بفكر في علاقتي انا و احمد و دموعي نازله..
سمعتا صوت الباب فتح..مسحتا دموعي ابوي جا داخل قمتا سلمتا عليهو حضني عليهو ..
ابوي:( مالك زعلانه ي ميمي..)
قعدنا علي الكنبه قعد جمبي.. ماسك يدي..
ابوي:( مالك? احكي لي.. )
قلتا ليهو:( ماف شي بس تعبانه..)
ابوي:( لا انتي م بتعرفي تكذبي انتي زعلانه عشان احمد صح?)
سكتا ..
ابوي:( اسمعي ي بتي..انا ابوك و بعرف مصلحتك.. انا بختار ليك الزول الكويس البعيش معاك العمر كلو و ماف يوم حتندمي علي زواجك منو..احمد امورو جايطه.. انا عارفو كويس و عارف شغلو..احمد م بقدر اعرسك اسي علي الاقل سنتين.. صح احمد ولد ناس و كويس م فيهو كلام لا هو لا اهلو.. بس م حاخليك مستقره.. م حتكوني مرتاحه.. الحب م كل حاجه..الراحه اهم حاجه..انتي بتي وانا بعرفك كويس..والله ي مرام كلامي ده م حتحسي بيهو اسي بس بعدين حتعرفي كلامي كويس.. انا مقلق عليك و خايف عليك و دايرك تعيشي متهنيه و مرتاحه.. و لمن امشي من الدنيا دي ابقي مرتاح و متطمن عليك ي بتي..)
حضنتو و بقيت ببكي..
قال لي:( الله يرضي عليك ي بتي.. انا م عندي هم في الدنيا دي غيرك.. ي مرام انا رفصتا العرس بعد امك الله يرحما..و حياتي كلها بقت ل راحتك و حياتك بس.. اسمعي كلامي و ارضي بيهو.. والله م بتندمي.. خلينا مرتاح و متطمن عليك.. )

بتفتش لما في دولاب صالح علي الهيروين م لقتو.. بقت تفتش ذي المجنونه و جدعت الهدوم علي الارض م لقتو.. م عرفت تعمل شنو.. مشت ضربت ليهو ..
لما:( وين انت?)
صالح:(جاي علي البيت)
لما:(تعالي سرعه يلا..)
قفلت جدعت التلفون.. بقت ماشه و جايه في الغرفه مستنياهو اجي..
جا داخل عاين لغرفه كده اتخلع..
صالح:(في شنو? )
لما:( الكيس الكان في دولابك وينو? )
صالح:( كيس شنو ?و انتي شكلك تعبان كده ليه?)
لما:( الذفت البتشمو ده وينو? )
استغرب صالح:( البودره? دايراها لشنو?)
لما:( اديني منها بس..)
صالح بخلعه:( انتي جربتيها??)
لما:( ااي جربتها كم مره و اسي انا دايراها.. اديني سرعه راسي حانفجر.. )
ابتسم صالح:(ي حبيبتي الحاجه دي غاليه جدا لازم تدفعي عشان تلقيها..)
لما:( م عندي قروش انا.. انت عارف كده)
صالح:( ااي عارف بس حتدفعي بطريقه تانيه )
لما:(حاضر موافقه بس اديني سرعه..)
صالح:( ااي حاجه اقولا ليك تعمليها ? )
لما:( حاضر والله بعمل ااي شي بس يلا اديني..)

ابتسم صالح و طلع من جيبو كيس صغير فيهو بودره.. جرت سرعه شالتو منو و قعدت في السرير كبتها في يدها و شمتها...و صالح واقف مبتسم ليها..
نتلاقي🙂

#الشقه23 و 24 :-
بقلمي: فاطمه السر..
شيماء مشت شقه صاحب هشام الكان بتلاقو فيها هي و هشام.. دقت الباب جا صاحب هشام فتح شافها استغرب شيماء:( هشام وين ي جلال?)
جلال:(م عارف )
شيماء:(م تكذب انت عارف.. هو قال ليك م تقول لي صح? هشام وين ? )
جلال:(سافر مدني عندو عزا م عارف راجع متين..)
شيماء:( عزا? طيب)
و مشت..

قاعده في شقتي.. ابوي سافر.. كلمتا البنات اجو.. جات هند اول..
هند:( دايره احكي ليك موضوع مهم..)
قلتا ليها:( قولي)
هند:(شكي في ميسون طلع صح.. بتحب واحد اسمو عمار و بتمشي ليهو في شقتو في الرياض)
اتخلعتا قلتا ليها :(كذابه عرفتي كيف? )
هند:( لقيت مسجات بينو و بينها في تلفونها..)
قلتا ليها :(انتي فتشتي تلفونها ي هند?? )
هند:( اي كنت دايره اتاكد..)
قلتا ليها:( م عندك حق تفتشي تلفون صحبتك و م عندك حق اصلا تتهميها اتهام ذي ده..و حتي لو صح م انتي البتحاسبيها..)
هند:(بس هي طول عمرها عامله نفسها صح و احنا غلط.. طول عمرها شايفه روحها فوقنا..اسي اهو بقت اكعب مننا..)
استغربتا قلتا ليها:( ميسون عمرها م شافت نفسها علينا ولا مغروره ذي م انتي بتقولي ولا حصل شافت روحها صح و احنا غلط.. دي حاجات في نفسك انتي ي هند م ميسون.. انتي البتغيري منها..)
هند اتخلعت:( انا? انا اغير من وحده ذي ميسون?)
قلتا ليها:( ااي في كم حاجه شفتك بتعايني ليها كيف و بتغيري منها..انتي براك الخاته ميسون في راسك.. م ليك دعوه بيها ابعدي منها و من حياتها و م تتدخلي في حاجات م تعنيك ي هند..)
هند:(مرام انتي مسكينه م بتعرفي ميسون)
قلتا ليها :(انتي الما بتعرفي ميسون.. ميسون دي اكتر وحده بتقيف معانا.. انا وقفت معاي كتير اول من جيت الخرطوم و انتي كمان قبل م تعملي المحل كتير وقفت معاك و اسي وقفت مع شيماء و قعدتها معاها في بيتها و باتت معاي يوم شيماء كانت تعبانه...كل ده و تقولي شايفه روحها علينا!! )
دقي جرس الباب قمتا فتحتا لقيتها ميسون و شيماء سلمو و قعدو..
سالتا شيماء قلتا ليها :(بقيتي كيف?)
شيماء:( احسن كتير الحمدلله.. )
قلتا ليها :(كويس انك قررتي تطلعي و تجي هنا..)
شيماء:(دي ميسون جاتني قالت لي الا اجي معاها هنا.. م حبيت احرجا جيت معاها..)
قلتا ليها:( والله ي ميسون فيك الخير..حاقوم اعمل شاي..)

مشيت علي المطبخ.. جرس الباب دقي ..
قلتا ليهم :(دي بتكون لما.. ماف غيرها )
قامت ميسون ..فتحت لقتها لما..
ميسون صرخت: لما!!..
جيت جاريه من المطبخ اشوفها.. لقيتها مغيره استايل لبسها كلو كلو... بقت تلبس بناطلين و تيشيرتات و فاكه شعرها و عامله فل ميكب.. وقفنا مستغربين فيها ..
سلمت علينا و هي مبسووطه و دخلت قعدت و خلفت رجلها.. مشينا قعدنا..
ميسون:( م عرفتك ي لما والله وين الاسكيرت و الطرحه!!)
لما:( غيرتا استايلي رايكم شنو..)
ضحكنا..
قلتا ليها :(قمر والله..)
شيماء :( اشتقنا لينا..)
لما مدت يدها حضنت شيماء..
هند:(شنو الغيرك كده??)
لما:(حياتي الجديده.. لما الزمان مشت اسي انا لما الجديده)
قلتا ليها:( والله بخت العريس.. البغير الناس كده.. انا قررتا اعرس خلاص.. )
ضحكو..
لما:(يلا ي بنات احكو لي الشمارات حصل شنو الاسابيع الفاتت دي??)
كانت مرحه و مبسوطه. و واثقه من نفسها شديد..غير لما الكنتا بعرفها.. ميسون طلعت سيجائر ولعتها..لما شالت منها وحده بقت تشرب ..
قلتا ليها :(بقيتي تشربي سيجائر??)
لما:(ايوا طبعا ..انا لما الجديده..)
حكينا ليها عن مشكله شيماء و الحصل..و العريس الجايبو لي ابوي و كده..

نتلاقي☺

#الشقه24:-
بقلمي: فاطمه السر..
يوم ميسون جايه داخله بيتها.. جات ميري جاريه ليها قالت ليها:( بابا عيان..) ميسون اتخلعت قامت جاريه طلعت فوق سرعه لقت مجدي واقف في الحمام بستفرغ وقفت جمبو مسكت و سالتو..
ميسون:( انت كويس ي مجدي?)
كانت خايفه شديد..
مجدي:( تعبان.. شكلي اكلتا حاجه م نفعت معاي )
ميسون:( يلا الدكتور طيب..)
مجدي:( لالا انا كويس)
ميسون:(شكلك تعبان شديد يلا ارح الدكتور نتطمن)
مسكتو و مشو الدكتور..
مجدي كان عندو تسمم و ادوهو درب و حبوب بقي كويس رجعو البيت.. ميسون كانت مقلقه شديد عليهو.. حتي مجدي لاحظ لقلقها ده..

رقدتو ميسون في السرير.. مجدي مستغرب في تعامل ميسون معاهو..بعاين ليها..
مجدي بصوت حنين :(ميسون انتي بالجد خفتي علي? )
ابتسمت ميسون:( طبعا ي مجدي.. )
مجدي:( يعني انتي لسه بتحبيني?)
ميسون:( م عارفه.. بس خوفتا عليك شديد م عارفه ليه..)
مجدي:( معناها لسه بتحبيني.. )
ميسون:( احتمال.. صح احنا بنتشاكل كتير و بزهج منك بسرعه و بكورك فيك...بس اسي خوفتا عليك.. حسيت لو حصل ليك حاجه انا م حابقي كويسه.. )
مجدي مسك يدها باسها ليها ..
مجدي:(رايك شنو ننسي الفات و نبدا من الاول!!)
ابتسمت ميسون:( اتفقنا.. )

ضرب لي احمد زعلان قال لي:( لاقيت ابوك و قال لي كلام كتيير.. و قال هو م متطمن عليك معاي

و داير ليك الزول الاختارو هو..و انتي حتوافقي عليهو.. م قدرتا اقنعو بقي علي رائو.. م عارف اعمل شنو.. )
قلتا ليهو:( جد م عارفه حل.. ابوي صعب في المواضيع دي و لو كان داير يغير رائو كان غيرو لمن لقاني زعلانه.. بس م حاغيرو .. م بقدر اكسر كلام ابوي ي احمد..)
احمد:( اسمعي كلام ابوك ي مرام.. صح انا بحبك و م عارف حاعيش كيف بدونك.. بس ابوك ادري بمصلحتك حبنا حاكون ذكري حلوه طول عمرنا.. و انا حابقي اخوك لو احتجتي لاي شي م تترددي ولا لحظه انك تكلميني.. و خلي بالك من نفسك ي مرام.. مع السلامه.. )
و قفل..
حسيتو ماسك نفسو عشان م ابكي في التلفون و ختيت التلفون و بكيت...

قاعده لما في غرفتها بتجهز علي المرايا و مبسوطه تغني جا داخل صالح..
صالح :( يلا ي حبيبتي حنتاخر علي الناس كرم مستنينا تحت..)
لما:( خلاص جايه.. )
شالت شنطتها و نزلو سلمو علي كرم و ركبو العربيه..

في فندق كبير دخلو المطعم .. لما و صالح و كرم..لقو نسوان و رجال كتار قاعدين بعرفو صالح و كرم.. شغاله اغاني بصوت عالي و كلهم بشربو في شراب و سيجائر و النسوان لابسين لبس كعب.. سلمو عليهم و قعدو..

في راجل من القاعدين كان بعاين للما بطريقه غريبه و غمز ليها.. صالح ركز ليهو.. دنقر علي لما..
صالح:( شايفه الراجل البعاين ليك داك.. امشي ادخلي.. ظبطي الموضوع.. )
لما:( حاضر..)
قبلت لما علي الراجل ابتسمت ليهو و غمزت ليهو.. اشر ليها علي برا و قام طلع..
صالح :( الحقيهو.. )
قامت مشت وراهو سلم عليها..
قال ليها:( ارح معاي نتفسح شويه و نقضي ليلي حلوه)
لما:( يلا ورانا شنو..)
و مشت معاهو و هي مبسووطه...

نتلاقي🙂

#الشقه25:-
بقلمي: فاطمه السر..
هند ماشه و جايه ذي المجنونه في المحل بتاعها و شايله التلفون بتضرب لمجدي و م برد عليها.. و بقت مقلقه م عرفت تعمل شنو.. ضربتا ليها..
هند:( كيفك ي مرام?)
قلتا ليها:( تمام ..وينك?)
هند:( في المحل.. جاياك)
قلتا ليها:( يلا تعالي م تتاخري)
هند:( مسافه السكه بس )
جات لقتني زعلانه بقيت بحكي ليها باحمد و الحصل هدتني..
هند:( ابوك صح.. اسمعي كلامو م حتندمي)
قلتا ليها:( بس احمد.. بحبو انا)
هند:( الحب م كل حاجه ي مرام.. لازم اكون مناسب ليك.. احمد زول كويس.. بس لسه بدري عليهو.. و ابوك قاعد معاهم هناك و عارف ظروفو.. م حاجهز اسي ولا حتعوسو اسي.. احسن ليك معتز ده.. عايش برا و مرتاح و ابوك موافق بيهو.. انتي بتو الوحيده.. مستحيل م تسمعي كلامو.. هو م جبرك علي العرس.. قال ليك اعملو خطوبه لو م نفع معاك خليهو.. )
قلتا ليها:( م عارفه والله.. جد متلخبطه.. و احمد زعلان شديد.. )
هند:( كدي شوفيهو و بعدين احكمي.. امكن انفع معاك.. و استخيري.. ربنا بسهل ليك)
قلتا ليها:( ان شاء الله)
هند:( ان شاءالله.. وين البنات الليله? )
قلتا ليها:( شيماء قالت تعبانه م قادره تجي و لما م بترد و ميسون قاعده مع راجلها.. )
استغربت هند :( كيف? ميسون قاعده مع راجلها)
قلتا ليها:( ي بت العلاقه بينها و بين مجدي رجعت ضربت لي مبسووطه قالت لي حاقعد مع مجدي م جايه الليله.. جد انبسطا ليها..)
هند قامت مخلوعه وقفت ..
هند:( شنو? رجعت لمجدي??)
قلتا ليها:( ااي.. مالك زعلانه و مخلوعه كده?? )
عند:( م حاخليهو والله م حاخليهو)
شالت شنطتها و طلعت..
ناديتها:( هند هند في شنو مالك?)
ابت ترد و مشت..
بقيت مستغربه و قلتا في نفسي:( هند مالا و مال ميسون و راجلا.. شنو البزعلا لو رجعو لبعض)

قاعدين ميسون و مجدي مع بعض في الصاله بحضرو في التليفزيون و بضحكو و بتونسو و ماسكين يدين بعض.. مجدي:( انا مبسوط شديد حبيبتي.. انا بحبك شديد ي ميسون..)
ميسون:(و انا كمان بحبك شديد ي مجدي انا م عارفه ليه ضيعتا الوقت ده كلو من عمري و انا بعيده منك جد ندمتا علي كل لحظه ضيعتها بعيد عنك.. )
مجدي:(لسه الوقت قدامنا..حنعوض ااي حاجه..رايك شنو نسافر نمشي نعمل شهر عسل جديد..)
ميسون ضحكت :(انت جادي?)
مجدي:( ااي والله..نفسك تمشي وين? )
ميسون:( ماليزيا.. )
مجدي:( حااضر من عيوني بكرا الصباح بحجز اول طياره ماشه ماليزيا و نمشي)
ميسون:( طيب.. مجدي في موضوع كده دايره اكلمك فيهو.. )
مجدي:( قولي.. )
فجاه سمعو صوت زول طالع في السلم اتلفتو لقوها هند.. اتخلعو الاتنين.. و وقفو علي حيلهم..
ميسون :( هند!! )
هند كانت زعلانه شديد...
هند:( الله ي بيه انت قاعد هنا و عايش في العسل و تضحك و تتونس..)
ميسون :( بتتكلمي عن شنو ي هند?)
هند:( اسكتي انتي ي ميسون بتكلم مع مجدي..)
ميسون استغربت و عاينت لمجدي..
مجدي:( مالك ي هند? انا كنت عيان في شنو? )
هند:( م ترد علي? عشان لقيت الهانم? رجعتا لمرتك و نسيتني خلاص??)
ميسون اتخلعت :(كيف يعني نساك?)
مجدي بزعل :(هند ...اسكتي و اطلعي من هنا )
هند :(م بسكت و م طالعه و حاحكي ااي شي..)
مجدي مشي عليها مسكها من يدها شديد..
مجدي:( اسكتي ي هند و اطلعي من هنا سرعه..)
و لزاها قربت تقع..
و ميسون واقفه مخلوعه م فاهمه حاجه..
هند:( ابيت م بسكت..)
و قبلت علي ميسون ..
هند:(اعرفك بنفسي ي ميسون...انا هند زوجه مجدي راجلك..و مجدي بحبني انا و بعمل لي ااي شي عايزاهو..و هو العمل لي المحل و هو الجاب لي العربيه..بحبني انا م بحبك انتي..)
ميسون بقت مخلوعه قربت تقع مسكت في الكنبه..
مجدي :( كذابه ي ميسون م تصدقيها.. )
هند:( م كذابه انا مرتو لينا 8 شهور معرسين.. تحبي اوريك القسيمه.. مجدي ناوي يطلقك و يعلن عرسنا لناس كلها)
ميسون قعدت في الكنبه و دموعها نزلت..
مجدي جرا عليها قعد جمبها في الارض..
مجدي:( ميسون م تصدقيها البت دي مجنونه..)
قبل علي هند..
مجدي:( اطلعي برا ي هند كفايا لحدي هنا..انا بحب ميسون و م حاسيبها.. و انا م دايرك تاني.. )
هند ضحكت و قالت:( ميسون العاجباك دي بتخونك..) ميسون اتخلعت رفعت راسها بقت تعاين ليها..
مجدي :(اطلعي برا ي كذابه...)
هند:( م كذابه انا.. ميسون بتخونك مع واحد اسمو عمار ساكن في الرياض.. كل يوم بتمشي ليهو.. كان م مصدقني بس افتح تلفونها اقرا المسجات.. )
مجدي اتخلع بقي بعاين لي ميسون و اعاين لي هند...
هند:( يلا كده اتهني بمرتك.. عشان تاني م تحاول تبيعني بالرخيص كده ي مجدي)
و طلعت مشت...
مشت شيماء لشقه جلال صاحب هشام..وقفت جمب الباب سمعت صوت ونسه و ضحك و سمعت صوت هشام دقت الباب.. جا فتح ليها جلال اتخلع:) شيماء!!)
لزت شيماء الباب و دخلت لقت هشام قاعد و معاهو بت و في بت تانيه قاعده ..هشام من شافها اتخلع قام علي حيلو..
شيماء:( دي منو ي هشام)
و جرت عليهو دايره تضربو مسك ليها يدها

..
شيماء:(اوعي تمدي يدك ي حقيره علي.. )
شيماء:( انا حقيره ي هشام?)
هشام:( ااي.. و امشي اطلعي برا سرعه م داير اشوف خلقتك دي تاني..)
شيماء اتخلعت شديد..
شيماء:( بعد كل العملتو معاك ي هشام? و كل الحاجات الاتنازلتا منها عشانك? في الاخر ترميني كده.. )
بقت تبكي ..
هشام ضحك:( انتي براك الرضيتي انا م جبرتك علي حاجه يلا ي حلوه اطلعي برا سرعه و انسب حاجه اسمها هشام..)
لزاها وقعت علي الارض بقي اضحك عليها.. شيماء زعلت شديد و عاينت حولها لقت فاظه بتاعت زجاج كبيره قامت سرعه شالتها و ضربت بيها هشام في راسو.. هشام وقع علي الارض و الدم نزل من راسو و صحبو واقف مخلوع و البنات بقو بكوركو..
و شيماء تضحك و تقول :( اخدت حقي منك ي تافهه.. الله يلعنك..)
مشت عليهو بقت تضرب فيهو وتضحك ..
شيماء:( ااي قتلك ذي م قتلتني..موت ذي م موتني)

نتلاقي😉

#الشقه26 ( الاخيرة )
بقلمي: فاطمه السر..
ميسون دخلت غرفتها لمت هدومها و هي بتبكي و نادت ميري تنزل ليها شنطها تحت و مجدي قاعد في الصاله بعاين بس م قدر اتكلم..
جات طالعه عاينت ليهو ..
ميسون:( ورقه طلاقي تصلني بكرا..)
و طلعت جاتني في البيت بتبكي حكت لي الحصل اتخلعتا شديد في هند كيف تكون دي صحبتنا طول السنين دي.. و اكون قلبها اسود كده و تعرس راجل ميسون صحبتا عدييل..
اتصدمتا فيها عدييل..
ميسون:( انا م قادره اصدق.. مجدي معرس علي.. و كمان صحبتي.. و طول اليوم قاعدين انا و هي مع بعض بحبها و بعاملا كويس.. كيف تعرس راجلي.. عرفتو كيف و اتفقو كيف و حبو بعض كيف.. كل ده انا كنت وين.. م قادره اصدق ي مرام.. لو كانت وحده غريبه معليش.. بس صحبتي..و هند.. م قادره اصدق والله.. حاسه نفسي بحلم..)
قلتا ليها :(اهدي بالرواقه ااي شي بتحلا..)
ميسون:( م دايره احل شي انا حامشي دبي لناس امي م دايره اقعد هنا يوم واحد.. )
قلتا ليها :( لا انا بحاول احل ليك الموضوع بس قولي لي عمار ده منو?)
ميسون:( واحد م بعرفو.. شال صوري لعب لي فيها و هددني انو حاوريها لمجدي.. خوفتا..طلب قروش اديتو.. شويه شويه حبيت احسن علاقتي معاهو عشان اصل لصور.. و هو بقي طوللي بطلب قروش بديهو.. صح حسيت اني بحبو و هو كمان وقال بحبني و بقي اقول لي كلام حلو وكده .. لقيت منو الحاجات الما كنت لاقياها من مجدي و علاقتنا انا وهو حلوه.. بس بطلب قروش طوالي.. م حسيت بروحي اني بعمل حاجه غلط الا لمن رجعتا لمجدي حسيت اني عملتا حاجه غلط كبيره و لازم اعترف لمجدي و كنت دايره اعترف ليهو و احكي ليهو انو عمار كان بستغلني و بشيل مني قروش بس فجاه جات هند داخله و بوظت كل حاجه..)
هديتها..
قلتا ليها:( م تزعلي خلاص مجدي طيب و حيسامحك.. انتي بس احكي ليهو..)
ميسون:( لالا الموضوع انتهي خلاص.. الثقه بينا راحت م بترجع تاني.. م بقدر اسامحو انا.. و لا هو بسامحني.. خلاص كل واحد فينا يشوف حالو...)
كانت حالتها كعبه شديد و بتبكي و انا بقيت ببكي معاها.. تلفوني ضرب رديت الو...ايوا..... شنو..... اتخلعتا جدعتا التلفون.. ميسون اتخلعت..
ميسون:( في شنو??)
قلتا ليها:( شيماء قتلت هشام..)
ميسون قامت مخلوعه:( شنووو?? ?? )

جرينا علي بيت هشام لقينا هشام شايلنو بالنقاله و البواليس و الناس متلمين.. و جو البواليس ماسكين شيمااء و هي بتعاين سااي حتي عاينت لينا بس كانو م بتعرفنا و دموعها كانت نازله.. انا و ميسون وقعنا علي الارض بقينا بنكي شديد.. منظر شيماء كان كعب علينا م قدرنا نتحملو..

هشام مات..
و شيماء جنت..
ودوها مستشفي المجانين..
و هند اختقت..
م عرفناها مشت وين..و قفلت المحل ..
مشينا انا و ميسون نفتش علي لما وصفو لينا مكان بتقعد في مطعم في فندق كبير.. مشينا لقيناها قاعده مع راجل و لابسه لبس كعب و بتضحك و سكرانه اتخلعنا شديد فيها اشرنا ليها شافتنا.. استآذنت من الراجل و جاتنا ..
لما:( شنو الجابكم هنا?)
ميسون:( ده منو القاعده معاهو ده? وين صالح? )
لما:( تعالو )
طلعنا من جو الموسيقي و الرقيص..
قلتا ليها:( انتي مالك ??.. سكرانه?)
ضحكت لما :( ااي دي لما الجديده.. بتاعت سكر و شراب و بدره و رجال واي حاجه..)
قلنا ليها:( كيف ده? )
لما:( دي حياتي بقت كده خلاص.. من الليله انسو انكم بتعرفو ليكم وحده اسمها لما.. يلا امشو من هنا م دايره اشوفكم تاني يلا.. )
بقت تضحك..
و انا و ميسون مخلوعين..
جا طالع الراجل الكان قاعد معاها مسكها ..
قال ليها:( يلا حبيبتي )
لما:( يلا حبيبي..) مسكو بعض و مشو..
انا و ميسون بقينا مخلوعين شديد طلعنا م مصدقين.. ركبنا العربيه ..
ميسون:( دي لما?? انا م قادره اصدق..)
قلتا ليها:( ولا انا م قادره اصدق.. )
رجعنا منهارين بنبكي علي صحباتنا الضاعو في لحظه وحده..و م قدرنا نعمل ليهم حاجه.. لما مشينا ليها تاني كن مره بس بترفض تلاقينا.. في الاخر خليناها..
ميسون حجزت و ماشه لاهلها في دبي..
.. لمن جات مسافره بكينا انا و هي كتييير.. علي ايامنا القضيناها مع بعض..الايام الحلوه و الكعبه...وعدتها اجيها دبي..
ميسون سافرت و انا لقيت روحي براي مع دموع و الم و صدمات.. م صدمه وحده بس.. م قدرتا اقعد في الخرطوم تاني.. كرهتا اليوم الجيت فيهو الخرطوم..كرهتا حياتي و كرهتا ااي شي.. ضربتا لابوي قلتا ليهو انا جايه بورسودان.. قول لمعتز انا موافقه عليهو.. مشيت قدمتا استغالتي و جيت شلتا حاجاتي من الشقه و سلمتها لسيدها...قلبي وجعني شديد و انا طالعه من الشقه..اتذكرتا صوت صحباتي ميسون...هند.. شيماء.. لما.. اتذكرتا كل لحظه عشناها في الشقه.. لو حلوه لو كعبه.. طلعتا من الشقه.. بس خليت قلبي جوه...احساسي و صحباتي و كل ايامنا الحلوه.. خليتها في الخرطوم و ركبتا مشيت بورسودان
..دخلتا بورسودان بوجع كبير.. و الم...و تمني اني انسي ااي شي حصل لي.. بس ي ريت لو اقدر انسي...
اتزوجتا معتز.. زواجي كان بايخ بدون ااي

طعم لانو صحباتي ماف.. بس ارتحتا لاني حققتا لابوي طلبو...و سافرتا مع معتز كندا.. عشتا هنا...بس م قدرتا انسي صحباتي و الحصل ليهم.. سالتا من هند.. قالو رجعت لشغلها الاول سيد المحل شال منها المحل و العربيه.. رجعت تشتغل في المحلات عن الناس تاني.. عرفتا انو المحل كان حق مجدي طلقها و شالو منها..
حاولتا ارجع ميسون و مجدي لبعض بس م قدرو ارجعو كل واحد كان اتكسر من التاني شديد.. في الاخر اتطلقو..
و ميسون استقرت مع اهلها في دبي م رجعت السودان تاني... انا و هي متواصلين مع بعض طوالي.. و كل م نتكلم مع بعض نتذكر الحصل..كنا محتاجين غسيل مخ عشان نقدر ننسي الحصل..
معتز كان كويس شديد و بعاملني كويس .. بس انا م كنت قادره احبو.. بس م استعجلتا في موضوع حبي ليهو..خليتو للايام.. كفيله بانها تصلح ااي شي....

انتهت😊