ا من وين

نسرين : خالو قال بدفعها لينا

اسماعيل : ما دام حيدفعها مافي داعي اديك المية الجنيه

نسرين : ....

يتبع

انهيار الحلقة الخامسة :-
بقلم : تهاني محي الدين

نسرين : انت قلت حتدينا ليها
اسماعيل : مش قلتي خالك حيتم القروش
نسرين : ليه كدة يا ابوي ، ليه دائما مرخصنا قدام الناس 😭
اسماعيل : خلاص ما تبكي و هدك المية جنيه ، جنك نقة طالعة لامك
نسرين : تشيل القروش و قلبها واجعها من تصرفات ابوها

تاني يوم الصباح يقومو يمشو الجامعة و يقولو لابوهم عايزين قروش المواصلات

عبير : ابوي نحن طالعين ادينا قروش المواصلات

اسماعيل : مش انا اديتكم امس مية جنية و معاها 250 ج

عبير : لكن دي قروش الجامعة
نحن عايزين حق المواصلات

اسماعيل : والله انتو كترتوها ، شيلي من القروش العندك قبل اغير رائي و اشيلها منك كلها بلا جامعة بلا كلام فاضي

عبير : من جواها عايزة تطق و عارفة انو لو اتكلمت زيادة حيشيل منها القروش و سكتت على كدة و مشو هي و نسرين الجامعة

اتصل عليهم خالهم محمد و جاهم في الجامعة

عبير و نسرين : ازيك يا خالو
محمد : كيفكم يا بنات
البنات : كويسين الحمد لله
محمد : وين مكتب المسجل عشان الحق اسجل ليكم و امشي الشغل

نسرين : يلا نوديك ليهو

و يسوقو خالهم مكتب المسجل و يطلعو ليهو القروش المعاهم 330 ج

محمد يشيل القروش و يطلع من جيبو باقي الرسوم و يدفع ليهم الرسوم حقت السمسترين و قال ليهم

محمد : مافي داعي للتقصيد
نسرين : لكن يا خالو دي كتيرة عليك كدة و ابوي حيدفع لينا قروش السمستر الجاي قال

محمد : الظروف ما معروفة و انا معاي هسي و احسن ندفعها من هسي

نسرين : دموعها في عيونها
شكرا ليك يا خالو

محمد : انتو بناتي فاهمين يعني شنو بناتي و عشان كدة ما عايز اي شكر لانو دا واجبي ☺

نسرين : طيب حاضر
عبير : الله يخليك لينا يا خالو

محمد يدفع ليهم الرسوم و يسلم اي واحدة ايصالها و يقول

محمد : انا عندي ساعة لسه على مواعيد شغلي و بصراحة انا جعان
يلاكم المطعم نفطر

نسرين : نحن شبعانين يا خالو
عبير : تقاطعها : طيب يا خالو يلا نمش و تهمس لنسرين : شبعانين متين و احسن ناكل لانو في البيت غير العيش الناشف ما حتلقي ، هو في زول يلقى عزومة و يقول لا

نسرين : لكن خالو حيكلف روحو كدة

عبير : هو لو ما عندو ما بعزمنا

نسرين : خلاص كويس يلا

يمشو المطعم

محمد : اطلبو اي حاجة عايزنها و تجي في نفسكم

نسرين : انا عايزة طعمية
محمد : طعمية شنو يا بت دي نواشف ساي و انتي براك ضعيفة ههههههه
نسرين : انا بحب الطعمية شديد والله
محمد : خلاص حاطلب ليك معاها بيرقر
نسرين : لا كدة كتير يا خالو
محمد : مش بتاكلي البريقر
نسرين : اي باكلو
محمد : طيب حاطلبو ليك و انتي يا عبير عايزة شنو
عبير : عايزة بيرقر جامبو و فطيرة هوت دوق و عصير جامبو

نسرين تقرص عبير لكن عبير تزح منها

عبير : تهمس لنسرين مالك يا بت خلينا نستمتع لانو ديل ما اظن ناكلهم قريب تاني

نسرين : هههه بطلي فجعة لكن هههه

عبير : ما ببطل يا زولة

محمد ينادي الجرسون و يطلب منو الحاجات و كمان عصير جامبو لاي اي زول فيهم

و يقعدو يتونسو و بعد ربع ساعة الجرسون يجيب ليهم طلبهم و يقعدو ياكلو و عبير مبسوطة و كمان نسرين و ينتهو من الاكل

محمد يوصلهم للمواصلات بعربيتو و يدي اي واحدة فيهم 50 ج و يمشي الشغل

نسرين تقول لعبير

نسرين : القروش دي تعالي نديها لامي
عبير : لشنو !!!
نسرين : نحن قاعدين في البيت و الجامعة بعد العيد ، ما اظن نحتاج ليها
عبير : يا نسو انا ما حاديها امي و يمكن نحتاج ليها

نسرين : انا حادي امي قروشي
عبير : طيب لكن ما تجيبي ليها سيرة انو خالي اداني كمان و قولي ليها ادانا الاتنين 50

نسرين : كويس

عبير : كمان اوعي توري ابوي انو خالو دفع كل الرسوم

نسرين : لشنو كمان

عبير : انتي عارفة ابوك حيقطعها علينا لما ننزل الجامعة و بي القروش الحيدينا ليها للسمستر التاني نتصرف بيها

نسرين : لكن كدة حرام و غش

عبير : لي ابوك دا حلال

نسرين : ابوي لو عرف حيطين عيشتنا

عبير : اولا خالو ما حيوريهو و انا متاكدة من كدة و ما اظن يعرف الا توريهو انتي

نسرين : ربنا يستر

يصلو البيت و امهم تسالهم من التسجيل و يوروها انو خالهم دفع كل الرسوم لكن ما عايزين يورو ابوهم و امهم وافقتهم على كدة

نسرين : هاكي يا امي ال50 ج دي ادانا ليها خالو

هناء : خليها معاكم بتحتاجو ليها و انا كمان عندي قروش معاي

نسرين : لا ما اظن نحتاج ليها

عبير : هييي انتو حتتعازمو لي فيها ههههه ادوني ليها خلاص

هناء : هههههه لا والله خلوها معاكم احسن
نسرين : خلاص كويس لكن لو احتجتي ليهم وريني

هناء : كويس

يمشو يغيرو هدومهم و يساعدو امهم في شغل البيت و يجي العصر و ابوهم يجي و عبير تقول لنسرين
عبير : خليني اتكلم معاهو انا لانك حتخربي الموضوع لو اتكلمتي

نسرين : اي احسن لاني ما بقدر اكذب عليهو

يمشو لابوهم و يملحو الغداء و يجيبو ليهو و يختو الصينية

اسماعيل : اي زول يشيل عيشتو و لو كملت مافي زول يقول عايز زيادة عشان كدة كدة

اكلو براحة براحة و الحمد لله ذاتو جايي رمضان عشان نوفر حبة بدل البزار دا

هناء : ببزار شديد طبعا 😏
اسماعيل : عاين ليها و سكت لانو عارف نفسو مقحطها

نسرين : كويس و اصلا ثبتو رمضان بكرة ان شاء الله

اسماعيل : اها عملتو شنو في الجامعة

عبير : سجلنا للسمستر و خالو دفع لينا باقي قروش السمستر

اسماعيل : ما دفع زيادة

عبير : لا ما دفع

اسماعيل : انا حاسألو و لو طلعتو كذابين يا ويلكم مني

نسرين تتوتر و تخاف و تقرر تقول لابوها الحقيقة لانو عارفة لو ابوها عرف يمكن يحرمهم من الجامعة

...
يتبع


شفتو قال عايز يوفر في رمضان بدل البزاز دا 😂😂😂

انهيار الحلقة السادسة :
بقلم : تهاني محي الدين

نسرين : بصراحة يا ابوي

عبير: تقاطعها : اي يا ابوي دفع باقي السمستر بس و امشي اسالو لو ما مصدقنا

اسماعيل : كويس بسألو

اسماعيل بينو و بين نفسو هو ما حيسألو لانو خجلان منو انو بدفع ليهم و ما عندو عين يسالو كمان

و اتغدو و قامو من الاكل والبنات شالو الصينية و دوها المطبخ

نسرين : بيرو بالغتي و ليه ما وريتي ابوي الحقيقة و الليلة لو سال خالو يا حليلنا

عبير : يسال خالو قال
انتي ما بتعرفي ابوك و لا شنو و حيسالو باي وش و على فكرة ابوي بخاف من خالو و ما بقدر يسالو لانو عارف انو خالو ماسك البيت اكتر منو و ابوك اتكالي و عامل نفسو قصاد خالو انو ما عارف انو خالو بساعدنا

نسرين : ان شاء الله ما يسالو
لكن بالجد انا خايفة ربنا يستر

عبير : ابوك دا انا حفظتو حفظ و حفظت طبعو دا و شوفي كلامي

هناء : كلام عبير صاح و ابوك ما حيسالو و نحن ابوك عشان نشيل منو الا نعمل كدة و هو الاضطرانا انو نخبي عليهو بسبب بخلو دا

نسرين : كويس

جاء شهر رمضان و اسماعيل كان ما بصومو عشان عندو سكري و بقية ناس البيت كلهم صايمين حتى بكري صايم معاهم

اسماعيل كان همو الكهربة و بجي بلقاهم فاتحين المروحة و يقفلها منهم

عبير : يا ابوي ليه قفلت المروحة
اسماعيل : الجو برا بارد ، امشي اقعدي في الطراوة البرا دي شوفيها باردة كيف

عبير : يا ابوي نحن صايمين و برا سموم و هو ذاتو المروحة سموم لكن اخير من العدم ،مفروض تجيب لينا مكيف

اسماعيل : مكيف قال ،، مش عشان تكملو الكهربة كلها فيهو ، مستحيل يدخل مكيف في البيت دا

عبير : خلاص ما عايزين مكيف ، عليك الله شغل المروحة

اسماعيل : انا كلامي واحد و بطلع برا و لو جيت لقيت المروحة دي فاتحة يا ويلكم مني لا بعرف صايمة و لا غيرو و يطلع

عبير : ياخ انا كرهت العيشة دي ، اي حاجة مافي حتى المروحة و نحن صايمين ما عايزنا نشغلها

نسرين : تعملي شنو و دا ابوك و لازم نستحملو

عبير : هو لو كان صايم كان حس بينا لكن عشان فاطر ما شغال بينا شغلة و يقول لينا طراوة برا ،، اللهم اني صايمة 😡

نسرين : الجو كتم يلاكي برا

عبير : انا حاشغل المروحة و اليحصل يحصل

نسرين : العني الشيطان يا بيرو و الله لو جاء ابوك و شافها شغالة ممكن يكسرها فينا

عبير : لكن لسع نهار و الجو سخن و اليوم طويل نعمل شنو

نسرين : عندي ليك فكرة حلوة والله احلى من المكيف

عبير : شنو الفكرة اها

نسرين : تعالي نبل تيابنا دي و نمشي نقعد في الراكوبة برا و نقرا شوية قران و التياب المبلولة بتبرد لينا حبة

عبير : طيب يلا نبلهم

يمشو يبلو التياب و يقعدو برا

عبير : كلامك صاح و الله باردة
نسرين : مش قلت ليك بكون بارد
عبير : لكن بنشف التوب بسرعة يا نسوو و عايزين نبلو طوالي عشان يبرد لينا و دا براهو موضوع هههههه

نسرين : اي دي مشكلتو الشحتفة ههههههه

و يقعدو يقرو قران و يصلو العصر و يقومو يساعدو امهم في الافطار

و تقريبا دا نظامهم بقى في شهر رمضان و طوالي ابوهم منكد عليهم كالعادة

العيد قرب فضل ليهو يومين

اسماعيل في الشغل ادوهو كمان حافز للعيد مرتب شهرين و كالعادة مشى شافو في الصراف و لقى رصيدو زايد و شال 500 ج بس زي كل مرة

هناء : اسماعيل جيب لينا حاجات الخبيز عايزين نخبز

اسماعيل : ياريت لكن من وين اجيب

هناء : كيف من وين يا راجل
دا عيد خبيز لازم الخبيز فيهو

اسماعيل : الخبيز دا برنامج و عايز قروش كتيرة

هناء : عليك الله فرحنا يا اسماعيل و جيب حاجات الخبيز

اسماعيل : انا حاجيب ليك كيلوين دقيق ، كيلو للكعك و كيلو للبسكويت و في النهاية هو ضوقة بس

هناء : كيلوين بس
و الله بساط و الناس بجو لازم نقدم ليهم حاجة

اسماعيل : مش في بلح باقي رمضان نقدمهم ليهم بس

هناء : بلح بس ما بنفع ، كمان عايزين كم كيس حلاوة و معاه فشار

اسماعيل : يا ولية انتي بقت طلباتك كتيرة خلاص و احسن تنطمي بدل اسكتك براي

هناء : دا واجبك تجيبهم من غير اطلب

اسماعيل : احسن تسكتي قلت ليك
هناء تمشي من جنبو و كاتمة جواها منو و مشت

اسماعيل مشى الدكان جاب كيلوين دقيق و معاهو باقي المكونات للخبيز و شال ليهو كيس حلاوة و قال الناس اصلا بجو اول يوم بس و كيس الحلاوة دا بقضي

اسماعيل : يا ولية تعالي شيلي الحاجات دي

هناء : هناء شالت الحاجات و قال ليهو: يا اسماعيل

اسماعيل : خير في شنو تاني

هناء : عايزة ملايات جديدة لانو الملايات ديل اتهردو خلاص و كمان البنات ديل جامعتهم قربت جيب لي اي واحدة لبسة على الاقل و جزمة و شنطة و تكون فرحة للعيد و للجامعة في نفس الوقت و كمان بكري ما عندو هدووم جديدة يعيد بيها لانو السنة الفاتت ما جبنا ليهو و هدومو بقت ضيقة عليهو

اسماعيل : لا حول و لا قوة الا بالله ، دا شنو دا كل دي طلبات

هناء : فرحة العيد يا اسماعيل بس، عليك الله ما تحرمهم

اسماعيل : الحاجات دي كتيرة و هسي اختاري اما اكسي الولد و اجيب ليك الملا

يات او اكسي البنتين لانو قروش مافي لكل دا

هناء : لكن البنتين كمان بحتاجو لانو بطلعو للجامعة و لازم يكون عندهم غيار يمشو بيهو

اسماعيل : اصلا الجامعة دي ما واقعة لي في راسي من الاول و شكلو حتبقى لي موضوع و صرف من مافي

يتبع

انهيار الحلقة السابعة :
بقلم : تهاني محي الدين

هناء : كيف الجامعة موضوع و حتى لو كان ما عندهم جامعة مفروض تكسيهم للعيد و تفرحهم

اسماعيل : اسرق مثلا يعني و اكسيهم من وين ديل

هناء : انت عندك يا اسماعيل و مرتبك كويس لكن ما عارفة بتوديهو وين

اسماعيل : زي القطط تاكلو و تنكرو ، مكملو كلو في طلباتكم الما بتخلص دي

هناء : 😏 مكملو فينا ، ياخ انت لمن جيت عرستني ما جبت لي حاجة حتى الشيلة و ابوي قال لي بشتري راجل و انا رضيت لاني كنت قايلاك كدة و عرسوني ليك بالفاتحة حتى الوليمة عملها ابوي الله يرحمو و لو هو كان عارفك بخيل ما كان رماني الرمية دي

اسماعيل : اها كل مرة تذكريني انو ابوك العرس علي و احمدي ربنا لاني لو ما عرستك كنتي بورتي هسي و لا في زول عبرك و اصلا لو ما انتي معيوبة كان ابوك عرسك لي مجان !!!

هناء : بالجد الحمد لله الذي لا يحمد على مكروه سواه
و
هسي عليك الله ما تكسر قلب البنات و جيب ليهم لبسة لاي واحدة فيهم تفرحها و انا لنفسي ما عايزة حاجة

اسماعيل : والله تكتري كلام في الموضوع دا ، بناتك ديل ما بشوفو الجامعة دي الا في الحلم

هناء : حسبي الله و نعم الوكيل ، خلاص سكتا

اسماعيل : امشي جيبي لي موية اشرب

هناء : كويس و تمشي و تقول الحمد لله و يارب صبرني و اديني القدرة استحمل اكتر لاني تعبت خلاص ، الحمد لله على كل حال

اسماعيل يطلع من جيبو يحسب 200 ج عشان يديها لهناء تجيب بيهم الملايات و هدوم بكري لكن خت 150 ج براها عشان لو رضت بيها ما يديها ال 50 ج
و هناء تجيب ليهو الموية

اسماعيل :امسكي ال 150 ج دي للملايات و هدوم بكري ، ياخ كرهتوني بطلباتكم الكتيرة دي و هسي القروش دي كان مشتني كتير في الشهر

هناء : 150 شنو يا راجل و دي يا دوب تجيب لبكري لبسة و الملايات اجيبها بشنو

اسماعيل : انت هسي الملايات ضرورية

هناء : نحن كل سنة بنفرش نفس الملايات لمن اتهردو من كتر الفرش و قدمو و دا عيد يا اسماعيل

اسماعيل : هدك ال50 ج دي و علي الطلاق ما بزيدها

هناء : كم مرة قلت ليك ما صاح تحلف بالطلاق و تدخلنا في حرمة ساي كمان و لو عايز تحلف احلف بالله او ما تحلف و خلاص جيبيها

هناء تشيل منو القروش و على القروش العندها الاداها ليها محمد اخوها تمشي السوق عشان تجيب لبناتها كمان

مشت السوق لقت الحاجات غالية شديد و الاسعار مولعة و القروش المعاها دي ما بتجييب ليها ملايات و لبسات للاولاد و قررت تخلي الملايات و تفرح اولادها و اشترت لاي زول لبسة بسعر معقول و لبسات بسيطة و انيقة و جابتهم البيت

نسرين : امي جيتي ، كنتي توريني امشي معاك بدل تلفي في السوق براك و تتعبي

هناء : احسن براي عشان اكون خفيفة و اجي سرعة ، نادي اختك و اخوك جبت ليكم هدوم العيد

نسرين : 😍 جادة يا امي ، ياااااخ طولنا والله من اشتريتو لينا هدوم للعيد ، بكري و بيرو تعالو اجرو

عبير : في شنو ، و تشوف الهدوم ياااا دي لينا 😍

هناء : اي ليكم ، شوفي دي ليك و دي لنسرين

عبير : و الله اللبسة سمحة يا امي و جاية معانا

نسرين : شكرا يا امي ، ربنا يخليك لينا

بكري : اخيرا بقى عندي هدووم جديدة
هناء : كان نفسي اطقم ليكم اللبسات بالجزم و الشنط لكن القروش نقصت

نسرين : مافي داعي يا امي و كمان نحن اي زول فينا عندو جزمة و مافي داعي تجيبي تاني و شنطنا كويسات كمان

عبيير : مافي داعي شنو ، يعني طول السنة نمشي بجزمة واحدة ، الناس يقولو علينا شنو

نسرين : حتى لو لبستي جزمة كل يوم ، برضو الناس ما بسكتو و عشان كدة ما تشتغلي بيهم كتير

عبير : لكن جزمنا قدمو كمان و اصلا ابوكي دا ما حيدينا حق الجزم بعرفو كويس لكن صحي جبتي القروش من وين يا امي

هناء : ابوكم اداني القروش قال لي اشتري ليكم كلكم

عبير : جادة 😳 ، ابوي دا الليلة الا عيان

هناء : دا العيد ههههههه بعمل اكتر من كدة
عبير : كان يفكها حبة و يديك حق الجزم كمان ، لكن نقول الحمد لله و بركة الطلع حق ديل

عبير و بكري يشيلو لبساتهم و يمشو عشان يجربوها

نسرين فاهمة انو ابوها مستحيل يكون اداها القروش ليهم كلهم و حست انو امها دفعت من قروشها الاداها ليها خالهم عشان تفرحهم بس للعيد

نسرين : شكرا يا امي لكن انتي ليه ما جبتي لنفسك حاجة

هناء : ههههههه يا بنتي انا كبرت و العيد دا للصغار الزيكم

نسرين : لا يا امي العيد دا فرحة للكل و انتي كمان طولتي ما اشتريتي لنفسك حاجة لا توب و لا جلباب و كنتي تجيبي لنفسك كمان

هناء : انا لمن اشوفكم مبسوطين انا كمان بفرح و فرحتي بي فرحتكم

نسرين : الله يخليك لينا يا امي و ربنا يقدرني اعوضك ان شاء الله

هناء : انا ما عايزة اي حاجة غير اشوفكم احسن ناس و افرح بيكم انتو التلاتة

نسرين : انا ماشة للجيران و جاية

هناء : كويس امشي

نسرين تمشي تشيل ال 50 ج العندها و تمشي السوق تشتري لامها بيهم جلباب بيت جديد و تجي جارية عشان تفرح امها

نسرين : امي انا جيت و كانت داسة الجلباب ورا ظهرها

ه

ناء : مالك اتاخرتي كدة

نسرين : تطلع لي امها الجلباب و تقول ليها كل سنة و انتي طيبة يا امي و عيد سعيد عليك كمان

هناء : تدمع و تقول : و انتي طيبة يا نسوو لكن ليه تعبتي نفسك كدة و انا قلت ليك القروش دي بتحتاجي ليها خليها معاك

نسرين : دي حاجة بسيطة يا امي و الله لو كان عندي اكتر من كدة كنت جبت ليك اي حاجة نفسك فيها و السوق كلو ما يغلى علييك يا احلى ام

هناء : تحضن نسرين و تقول ليها : الجلباب دا عندي احلى هدية

نسرين : يلا نلحق نبدا الخبيز عشان نوديهو الفرن قبل العصر

هناء : كويس ، امشي جهزي الحاجات و جيبي المفرمة حقت الخبيز حقت جارتنا سعاد و قول ليها تديك البوري حقها كمان

نسرين : حاضر

نسرين تمشي تجيب الحاجات و يعجنو العجين و يقطعو الخبيز في الصواني و الكيلوين دقيق عمل ليهم زي تلاتة صواني كبيرة و عملو كيلو و نص بسكويت و نص كيلو ناعم

عبير و نسرين شالو الصواني مشو الفرن و البلاقيهم بناديهم يا التومات لانو بتشابهو شديد و الزول الغريب صعب يفرقهم الا زول بعرفهم من قريب بقدر يفرق بينهم
و الخبيز نجض و رجعو البيت ختوهو و مشو جهزو الافطار مع امهم

نسرين قامت الليل و طول الليل بتصلي و بتدعي انو ربنا يقدرها انو تسعد امها و ابوها و تريحهم و انو ربنا يديهم الصحة و العافية و تحججهم و دعت لاخوانها كمان حتى نفسها نست ما تدعي ليها من شدة مناها لاهلها بالراحة اكتر منها

و يجي اسماعيل نص الليل يلقاها فاتحة النور بتاع الاوضة

اسماعيل : النور الفاتح دا شنو ، انتي قايلة الكهربة دي مجان

نسرين : معليش يا ابوي بس انا قاعدة اقرا قران

اسماعيل : القران دا ممكن تقريهو بالنهار بنور الشمس دي لكن انتو الا تكملو الكهربة بي تبذيركم دا

نسرين : حاضر يا ابوي هسي حاقفل النور

اسماعيل : انا البقفلو و يقفل النور و يطلع

نسرين تبكي من تصرفات ابوها و تنوم و الدموع في عيونها و تدعي ليهو انو ربنا يحنن قلبو عليهم اكتر و يخليهو ليهم

..
يتبع

انهيار الحلقة التامنة :
بقلم : تهاني محي الدين

يصبح تاني يوم الوقفة و البنات مع امهم شاغلين نضافة للبيت و رتبو البيت و هناء جابت الابرة و الخيط عملت اكياس مراتب من هدومهم القديمة و كيستها في اللحافات و جابت الملايات و الحتة المشروطة رقعتها في شكل وردة عشان ما تبان

و اصبح الصباح العييد و البيت كلو قام بدري

نسرين : كل سنة و انتي طيبة يا امي و السنة الجاية في عرفات يارب

هناء : اميييين يارب و جمعا و كل سنة انتي طيبة يا نسرين و ان شاء الله القاك زي ما عايزة و ربنا يفرحني بيكم دائما

عبير : كل سنة و انتي طيبة يا امي و ربنا يخليك لينا

هناء : و انتي طيبة يا بيرو و ربنا يخليكم لي و اشوفكم احسن ناس

بكري : كل سنة و انتي طيبة يا امي

هناء : و انت طيب يا بكوري و شد حيلك في المدرسة لانك بعد العيد نازل تالتة و عايزاك تجيب نسبة كبيرة زي اخواتك ان شاء الله

بكري : حاضر يا امي حاقرا و اجتهد ان شاء الله

هناء : يلا امشو باركو العيد لابوكم
الاولاد يمشو لابوهم عشان يباركو ليهو

الاولاد : كل سنة و انت طيب يا ابوي
اسماعيل : و انتو طيبين ان شاء الله
بكري : ابوي عايز العيدية
عبير: اي يا ابوي ادينا العيدية
اسماعيل : عيدية في عينك انت و هي ، امشو من قدامي ، انتو كمان كبرتو على الحاجات دي و العيدية دي للشفع

عبير: يعني انت كنت بتدينا لما كنا صغار 😒

اسماعيل : احسن تسكتي بدل اديك خبطة في يوم العيد دا

يمشو الاولاد من جنبو زعلانين

نسرين : ليه قلتي ليهو عايزة يا بيرو

عبير : ليه ما اقول ليهو مش ابوي

نسرين : اها و استفدتي شنو !!!
، انتي عارفة انو ابوي ما بدينا ، عشان كدة ما تحرقي اعصابك و تطلبي منو لانو من غير فايدة

عبير : كنت قايلاهو المرة دي حيحن علينا و يدينا

نسرين : الله يحنن قلبو علينا
، انا الخايفة منو انو ما يطلع لينا زكاة الفطر

عبير : بالجد كلامك صاح ، يلاكي نكلم امي عشان تذكرو لانو ما حيسمع مننا

و يمشو لامهم

عبير : امي كلمي ابوي يطلع لينا زكاة الفطر

هناء : كويس حاكلمو

هناء تشيل لاسماعيل شاي الصباح و معاهو خبيز و تمشي ليهو

هناء :: كل سنة و انت طيب يا اسماعيل و القابلة في عرفات

اسماعيل : و انتي طيبة يا هناء ، امييين و جمعا يارب

هناء : اتفضل الشاي ، ماشي الصلاة حقت العيد

اسماعيل : اي ماشي بعد اشرب الشاي

هناء : كويس و بعدين ما تنسى تطلع لينا زكاة الفطر لي و للاولاد
اسماعيل : زكاة الفطر دي بطلعوها المقتدرين ما الفقراء الزينا

هناء : ياخ قول الحمد لله و انت عارف نفسك ما فقير و زكاة الفطر دي من السنة لازم تطلعها بعد الصيام و كمان للبملك قوت يومه و انت زول شغال يعني مفروض تطلعها

اسماعيل : يا زولة انا ما عندي و ما بطلع اي حاجة ، مش صمتو ربنا بقبل ان شاء الله و منو القال ليك انا بملك قوت يومي

هناء : لا حول و لا قوة الا بالله ، عليك الله يا اسماعيل طلعها لينا و ما بتكلفك كتير لينا كلنا ما اظن تتم 60 ج

اسماعيل : 60 ج عديل ، انا ما بطلعها و اصلا ما صمت انا ، لو عندك انتي طلعيها و انا طالع ما تاخريني

يطلع يخليها و هناء شغالة تقول حسبي الله و نعم الوكيل و تمشي للبنات

نسرين : اها قال حيطلعها لينا
هناء : قال ما عندو
عبير : كيف ما عندو ، حتى في دي عايز يبخل لينا بيها
هناء : الحمد لله على كل حال
عبير : خلاص يا امي انا حاطلعها لينا ، اصلا عندي 50 ج اداني ليها خالو كنت خاتاها للجامعة
هناء : ما عارفة اقول شنو لكن الحمد لله ، خلاص يا بتي امشو صلو صلاة العيد و ادفعو زكاة الفطر و تعالو

هم طالعين يتصل خالهم محمد عليهم

عبير : الو خالو كل سنة و انت طيب

محمد : و انت طيبة يا هندسة ، عبير مش

عبير : اي يا خالو و القابلة زي ما عايز

محمد : انتي كمان القابلة مهندسة قدر الدنيا ، في البيت انتي
عبير : اميين ، اي في البيت
محمد : طيب اديني امك و اختك اعيد عليهم
عبير : حاضر و تدي التلفون لنسرين
نسرين : السلام عليكم خالو و كل سنة و انت طيب و القابلة على امانيك

محمد : و انتي طيبة يا نسرين و عقبال اشوفك مهندسة مدنية كبيرة
نسرين : امييين يارب و كيف ناس البيت عيد لي عليهم
محمد : يصل ان شاء الله ، اديني امك
نسرين : حاضر
هناء : اهلين محمد و كل سنة و انت طيب وربنا يحقق امانيك
محمد : انتي طيبة و ربنا يحقق امانيك
هناء : ما جاينا اليوم
محمد : اي بزروكم ان شاء الله بعد اغشى الجيران الهنا ، بعد الفطور بكون معاكم ان شاء الله
هناء : منتظرنك ان شاء الله ، اديني سوزان اعيد عليها
محمد : كويس

سوزان : كيفك يا هناء و كل سنة و انتي طيبة
هناء : انتي طيبة كمان و القابلة على امانيك
سوزان : امييين ، هاك محمد عايزك

محمد يمشي بعيد من سوزان و يتكلم

محمد : انا ماشي الصلاة هسي و حاطلع ليك زكاة الفطر ليك انتي و للعيال

هناء : لا مافي داعي ، اسماعيل قال بطلعها لينا

محمد : ما مشكلة زيادة الخير خيرين و انا بطلعها كمان لي

كم و صحي اسماعيل وين اعيد عليه

هناء :تسلم يا اخوي ، اسماعيل طلع الصلاة ، يلا ما أاخرك سلام في انتظارك

محمد : طيب لبعدين و يقفل الخط

سوزان : مالك مشيت بعيد ، كنت تتكلم جنبي
محمد : عادي ما فيها حاجة و اصلا مافي سر اخبيهو عليك

سوزان : اصلا انت غتاتك دي ما بتخليها و انت و اختك دي مواضيعكم كتيرة

محمد : كدي خليك معاي ، بعدين ماشي افطر معاهم جهزي نفسك عشان نمشي

سوزان : بررري امشي لمنو ، انا لا بستحمل و لا حاجة و كمان موية باردة ما عندهم بكون و تكييف ما عندهم ، بمشي امووت ساي

محمد : هم عايشين و ما ماتو

سوزان : بطريقتهم و لو عايز تمش امشي براك لكن انا ما معاك

مصعب : خلاص يا ابوي انا حامشي معاك لاني طولت من شوفة نسرين ، قصدي شوفة عمتو

محمد : طيب يا ولدي يلاكا نلحق الصلاة و يطلعو

سوزان : قال امشي لاختو قال 😏😏 ، ناس بئية و كمان عايزني امشي ، فشر

في الجانب الاخر

هناء : عبير خلاص ما تطلعي زكاة الفطر لانو خالك قال بطلعها

عبير : ربنا دا كريم خلاص ،الحمد لله

نسرين : هههههههه اي ارتحتي شكلك هههههه

عبير : ههههه اي ارتحت و شفتي قروشي دي بتحبني و ما عايزة تخليني

هناء : لا حتخليك 😅 امشي جيبي روب من الدكان عشان اعمل ملاح نعيمة عشان خالك بحبها و يمكن ابوك يتاخر ما يجي عشان اشيل منو

عبير : هههههه طوالي كدة عايزين تجمركو عليها ، كويس يا امي ، بعد اجي من الصلاة بغشى الدكان و اجيب معاي الروب

هناء : تمام

يمشو البنات يصلو و يجيبو الروب و يجو البيت و يستقبلو الضيوف
و بعد الساعة 10 يعملو الملاح و العصيدة و ينتظرو خالهم

سمعو صوت العربية لقو خالهم محمد جاء معاهو ولدو الكبيير مصعب

جو داخلين سلموو عليهم و عيدو ليهم

مشو عملو الفطور و فطرو و محمد عجبتو النعيمة جدا لانو اكتر اكلة بحبها

محمد : شكرا يا هناء و الله الملاح رهيب

هناء : عشان عارفاك بتحبها عملتها ليك

محمد : صحي وين اسماعيل ما جاء لسه
هناء : ما جاء لسه ، بكون بعيد على الجيران

فطرو و محمد قعد مع هناء يتونس معاها و الاولاد قعدو مع بعض

مصعب : نسرين ازيك و مستعدة للجامعة
نسرين : ان شاء الله ، متحمسة شديد ، كمان مبروك عليك التخرج يا هندسة
مصعب : الله يبارك فيك و عقبالك ان شاء الله
نسرين : اميين يارب و حظك كمان لانو قالو لي لقيت شغل
مصعب : اي الحمد لله و شغل كويس في مجالي ، اتخرجي انتي بس و بشغلك معانا ان شاء الله

عبير : احم احم نحن هنا ههههههه

مصعب : .....

يتبع

انهيار الحلقة التاسعة :-
بقلم : تهاني محي الدين

مصعب : هههههه كيفك يا عبير
عبير : الحمد لله ، كيفك انت و كيف خالتو سوزان
مصعب : كويسين الحمد لله

محمد ينادي مصعب عشان ماشين

مصعب : نسرين انتي ما عندك تلفون !؟
نسرين : لا عندي تلفون امي ، شغالين بيهو كلنا
مصعب : لا ما بنفع ، لازم تجيبي تلفون ليك براك عشان الجامعة و ان شاء الله عندك تلفون مني هدية بمناسبة دخولك للجامعة ، يعاين يلقى عبير بتحمر ليه و يقول قصدي عندي ليكم تلفونين هدية لاي واحدة فيكم

نسرين : لا ماف داعي تكلف روحك ، نحن شغالين بتلفون امي و حنشيلو معانا الجامعة

مصعب : بالجد للجامعة ضروري لانو جامعتكم بعيدة و التلفون ضروري عشان لو حصلت حاجة، الزول يطمن عليكم و كمان حتشيليهو انتي و لا عبير تلفون امك و يمكن تحتاجو لبعض و التلفون بسهل التواصل كمان

عبير : تقرص نسرين و تقول : اي ضروري والله ، ما بتقصر يا مصعب والله ، بالجد جامعتنا كبيرة و التواصل الا بتلفون

مصعب : ان شاء الله بعد يومين بجيب ليكم التلفونات ، طيب استاذن انا

نسرين : اتفضل اذنك معاك و يمشو يقدموهم للباب و محمد يدي هناء 300 ج عيدية و يدي الاولاد اي زول 50 ج و يشكروهو و يودعوهو و يمشو

بكري : الله جاتني قروش اخيرا

هناء : امشي اشتري الحاجات العايزها بيها

بكري : انا عايز عجلة لان المدرسة بعيدة و ابوي كل مرة ما بديني حق الركشتين البركبهم و بضطر اركبهم في المشية و الرجعة اجي كداري و المسافة بعيدة يا امي و انا كمان بكون جعان لانو ما بديني حق الفطور ، عشان كدة امسكي لي القروش دي عشان الم حق العجلة و بالقروش البديني ليها ابوي افطر بيها

هناء : خلاص كويس ، جيبها لكن حاتلمها من وين ، هي العجلة بي كم !؟

بكري : انا لقيت واحدة مستعملة بي 600 ج و سمحة يا امي شديد

هناء : خلاص شيل ال300 ج دي مع المعاك ببقو 350 ج و اشتري العجلة

بكري : لكن دي قروشك يا امي و بتحتاجي ليها

هناء : القروش اعمل بيها شنو انا ، اصلا راحتكم عندي اهم

بكري : الله يخليك لي يا امي و يقدرني اعوضك لكن هو قال لي انو 600 اخر كلام للعجلة و تاني فضل 250 ج

نسرين : خلاص شيل خمسيني دي لان جد مدرستكم بعييدة

بكري : ☺ شكرا ليكم ، الله يخليكم لي ، يا امي عايز اشتغل طلبة مع راجل جيرانا جار النبي

هناء : لكن انت لسه صغير

بكري : انا كبرت يا امي و كمان عايز اتم باقي قروش العجلة و لو فضلت حاجة بجيبها ليكم

هناء : كويس خلاص لكن ما تتعب روحك شديد

بكري : حاضر يا امي

هناء : ان شاء الله بعد دا تجيب نسبة كويسة و تبقى دكتور قدر الدنيا

بكري : اي بجتهد يا امي ان شاء الله ، عشان خاطركم

بكري يطلع عشان يكلم جارهم جار النبي يشغلو معاهو في البناء و جار النبي يوافق و يقول ليهو انو حيبدو الشغل بكرة طوالي و اليومية حقتو 20 ج و بكري يوافق و يجيهوو و عبير تتكلم مع نسرين

عبير : و الله يا نسو مصعب دا عندو ليك حاجة

نسرين : شنو الخلاك تقولي كدة

عبير : هو من جاء بتكلم معاك و ناسيني كأني مافي هههههه و انا لاحظت ليهو بسرق النظرات و بعاين ليك

نسرين : هههههه انتي مجنونة يا عبير ، بطلي اوهامك دي " انا شايفة انو بعاملني كبت عمتو بس

عبير : انا كمان بت عمتو لكن بهتم بيك اكتر مني و دي فرصتك يا غبية عشان تخليهو يحبك و تطلعي من الفقر دا

نسرين : يعني امشي اقول ليه تعال حبني او عرسني !! ، بيرو بطلي اوهامك دي للمرة التانية و انا ما شايفة في تعاملو حاجة بتدل على حبو لي

عبير : المهم انتي عندك مانع فيهو لو قال عايزك

نسرين : امممممم ما عندي ، هو شاب ظريف و ملتزم ، هيييي اسكتي يا بت و ما تدخلي لي حاجات في راسي هي ماف اصلا هههههه

عبير : شوفي لو ما قال عايزاك في يوم

نسرين : طيب لحدي يجي وقتو ما تفتحي الموضوع دا

عبير: ههههه حاضر يا نسو يا حبيبتي يا زوجة ود خالي 😁😁😁😁😁

نسرين : مجنونة يا بيرو ههههه

مر العيد و الاسرة فرحت بيهو برغم اوجاعها لكن كانو بحاولو يضربو الهم بالفرح و صابرين على تصرفات ابوهم و مصعب بعد يومين جاءهم في البيت

هناء : اهلين يا ولدي اتفضل
مصعب : ازيك يا عمتو و كيف صحتك
هناء : كويسة الحمد لله

مصعب يتلفت لانو ما شايف نسرين

مصعب : وين ناس نسرين ما شايفهم

هناء : مشو الجيران لان الليلة عرس بت الجيران و هي صحبتهم

مصعب : اي شفت الصيوان لمن كنت جايي ، طيب يا عمتو ، ادي التلفونات دي لنسرين و عبير و كمان الشريحة دي اديها لنسرين ، رقمها مميز لقيتو ، و ادي دي لعبير و معاها الكرتين ديل عشان ينزلوهم في شرايحهم و كلميهم انو عندهم نت هدية لمدة شهر انا فعلتو ليهم في شرايحهم

هناء : ليه يا ولدي مكلف نفسك كدة ، ما كان في داعي للتعب

مصعب : ليه يا عمتو ، انتي شايفاني زول غريب و لا شنو و كمان عبير زي اختي

هناء : ما عارفة اقول شنو ، انت و محمد طوالي بتخجلوني بي طبعكم دا و الله يزيدكم من وسع يارب

مصعب : طيب استاذن انا عشان ماشي

الشغل و سلمي على نسرين لمن تجي

هناء : طيب يا ولدي ، يصل ان شاء الله

مصعب يطلع يمشي شغلو و لمن يجي بالصيوان يحاول يعاين عشان يشوف نسرين في بيت العرس و يقرب يعمل حادث و يتبسم و يواصل في طريقو

نسرين و عبير يجو من بيت العرس و هناء تديهم التلفونات الجاباها ليهم مصعب و تكلمهم بالنت و الشرايح و الاتنين يفرحو بيها شديد و عبير تختار الشريحة الرقمها مميز

عبير : مش قلت ليك يا نسرين مصعب دا عندو ليك حاجة

نسرين : عشان جاب التلفونات يعني

عبير : ما كنت قايلاهو حيجيبهم والله ، لكن من جابهم فهو عندك ليك حاجة بكون و كمان جلكسي s4 , دا تلفون رهييب والله

نسرين : كدي خليك من دا ،،وريني التلفون دا بشغلوهو كيف ،، اصلا الجلكسي ما بعرف ليهو ، هسي لو كان جاب لي نوكيا ما كان احسن

عبير : نوكيا 😏 ، صحي وش فقر انتي ، في زول يلقى تلفون زي دا و يقول عايز نوكيا

نسرين : طيب علميني بشتغلو بيهو كيف ، و انتي عرفتيهو كيف

عبير : دا زي تلفون سحر صحبتنا ، كنت بشيلو منها و علمتني فيهو اي حاجة

نسرين : بالله ، يعني دا زيووو ، هههههههه طلعت غبية في التكنولوجيا انا 😅

عبير : ساهل يا نسو و هسي بعلمك و كمان مصعب منزل لينا فيهو كل البرامج ، فيس و وواتس و ايمو و كمان ضابط لينا فيهو النت

عبير تعلم نسرين كيف تستعمل التلفون و هي بتعلمها جات لعبير رسالة في الواتس من مصعب

مصعب : السلام عليكم يا نسرين ، ان شاء الله التلفون عجبك و رقم الشريحة كمان

عبير : ......

يتبع

انهيار الحلقة العاشرة :-
بقلم : تهاني محي الدين

عبير لنسرين

عبير : الحقي يا نسوو ، مصعب رسل لي قايلني انتي ، مش قلت ليك السنارة قربت تغمز

نسرين : قال شنو

عبير : قال لي ان شاء الله التلفون عجبك يا نسرين و رقم الشريحة ، شفتي يعني الرقم المميز ليك انتي

نسرين : قولي ليهو اي عجبني
عبير : رسلي ليهو من رقمك ، مش عندك تلفون

نسرين : خلاص كويس
عبير : انا حأرد ليهو و اوريهو انو دا رقمي

عبير : سلام مصعب ، معاك عبير
مصعب : ايوا عبير ، معليش كنت قايلك نسرين
عبير : و لا يهمك ، هي اخدت الرقم التاني ، كمان شكرا على التلفونات ، بالجد جميلة جدا

مصعب : العفو ، دا الواجب ، عن اذنك عندي شغل هسي
عبير : اتفضل

عبير : تعالي نكمل ليك شرح التلفون عشان تبقي تفتحية فيهو

نسرين : كويس هههههه

عبير بقت تشرح ليها في الواتس و كيف تتعامل معاهو و كمان الفيس و النسخ و اللصق و الايمو و شرحت ليها اي حاجة في التلفون و نسرين استيعابها كويس و فهمت بسرعة و بعد شوية مصعب اتصل لنسرين

مصعب : سلام نسرين
نسرين : و عليكم السلام لكن معاك عبير
مصعب : اوووو تااااااني
نسرين : هههههه لا بهظر معاك ، انا نسرين
مصعب : ههههههه كويس يا غياظة ، كيفك انتي
نسرين : الحمد لله بخيير ، لو بتعرف تفرق بيني و بين عبير في الحقيقة بتعرف تفرق اصواتنا كمان
مصعب : اي بعرف والله افرق بينكم بالرغم من شبهكم لبعض جدا لكن اصواتكم قريبة اكتر

نسرين : كيف بتفرق بينا

مصعب : انتي فيك هدوء اكتر و ما بتعايني للزول في عيونو و طبيعية اكتر

نسرين : ايوا ، يعني لو غيرت طبعي ما حتعرف تفرق بينا ههههههه

مصعب : قلبي بدلني ، قصدي بحس انك نسرين

نسرين : هههههه تمام ، انت كيفك
مصعب : انا كمان الحمد لله ، حتنزلي متين الجامعة ؟

نسرين : الاسبوع الجاي ان شاء الله
مصعب : بالتوفيق ان شاء الله ليكم فيها ، عايز اوصيك للجامعة
نسرين : اتفضل
مصعب : طبعا الجامعة دي بتختلف عن الثانوي و الاساس لانو حتلاقو ناس من كل الولايات و عالم كبيير ، عشان كدة خلي بالك من نفسك و صاحبي بنات كويسين و ابعدي عن معرفة الاولاد بقدر الامكان

نسرين : ان شاء الله و اصلا ماشة الجامعة عشان اقرا انا و حأحاول امشي بنصيحتك ، تسلم ☺

مصعب : الله يسلمك من كل شر و كمان تتحصني صباح و مساء و خاصة لمن تطلعي من البيت

نسرين : اصلا بواظب على التحصين و شكرا للاهتمام

مصعب : العفو ، انا عندي سفرية تبع الشغل برا السودان ، حأجي بعد شهر ، عايزة اجيب ليك شنو معاي

نسرين : تجي بالسلامة بس ، ما عايزة اي حاجة ، تسلم

مصعب :تسلمي لكن كمان الا اجيب ليك حاجة معاي

نسرين : ما محتاجة اي حاجة و لو احتجت حأطلب منك ان شاء الله ☺

مصعب : وعد
نسرين : بس خلي بالك من نفسك ، عن اذنك
مصعب : ما بدري يا نسرين ، خليك حبة ، طيب ندردش بالواتس

نسرين : عندي حاجة عايزة اعملها لو خصلت بدري برجع ليك

مصعب : طيب في انتظارك ، يلا سلام
نسرين : سلام

عبير : سمعت لي سيرة سفر و طلبات
نسرين : اي قال مسافر برا و قلت ليه ما عايزة اي حاجة

عبير : غبية انتي طبعا ، انا حارسل ليهو يجيب لي حاجات للجامعة لو انتي ما عايزة
نسرين : راحتك لكن ما تدخليني في الموضوع و ما تطلبي حاجة منو باسمي ، ياخ بالجد مضايقة جدا

عبير :مالك في شنو
نسرين : حاسة انو نحن زي الشحادين ،اي حاجة عندنا جايبنها لينا هم و ابوي حارمنا و متاكدة خالو عارفو بخيل عشان كدة بساعدنا و نحن عشان محتاجين بنضطر نشيل منو و متاكدة خالو بتكون مرات ظروفو كعبة لكن برضو بدينا ، لييه كدة يا دنيا ، استغفر الله استغفر الله و هسي كمان مصعب قال لي محتاجة شنو اجيبو ليك !!! ، الحمد لله على كل حال و تدمع
عبير :ما تقلبيها لي مناحة ، ما تخليك حساسة زيادة عن اللزوم و الموضوع ما بستاهل دا كلو

نسرين : الله يصبرنا و انا حاجتهد عشان اتخرج بممتاز و اشتغل ان شاء الله و اعوض امي و اعوضكم كمان
عبير : ربنا يسهل لينا
نسرين :: امييين

بكري كمان اشتغل كتيير عشان يوفر قروش العجلة ليهو و قدر يوفرها من شغلو مع جار النبي
و اشترى العجلة للمدرسة عشان ابوهو ما بديهو حق المواصلات كامل

المدارس فتحت و بكري جاء لابوهو

بكري : يا ابوي جيب لي هدوم المدرسة و شنطة و كراسات

اسماعيل : شيل شنطة السنة الفاتت

بكري : دي شنطة السنة القبل الفاتت و كل مرة تتشرط و امي بتخيطها لي و ما اظن بتخييط تاني

اسماعيل : يا ولد انت في تالتة ثانوي هسي و ما بتحتاج لشنطة ذاتوو و شيل كرساتك في يدك بس

بكري : كيف اشيلها في يدي ، يمكن اليوم يكون طويل و المواد كتيرة و كمان الشنطة مهمة عشان ما انسى الكراسات و ما تضييع مني

اسماعيل : اسمع هنا في فايل شكل ظرف كبير ،، امشي جيب ليك واحد بي تلاتة جنيه و خت فيهو كراسات و اوعى تفتح خشمك تاني تقول عايز شنطة

بكري : طيب يا ابوي ،اها الكراسات جيبها لي

اسماعيل : انت في تالتة ثانوي يعني عندكم سبعة مواد ، يعن

ي عايز سبعة كراسات بس

بكري : يا ابوي المادة الواحدة بكون عندها كم كراس لانو بقرونا ليها كم استاذ و اي استاذ عايز كراس براهو

اسماعيل : انا ما بعرف ليك يقروك عشرة اساتذة و لا استاذ ، و اكتر من سبعة كراسات ما بزيد ليك و كمان انت خطك الكبير صغرو عشان الكراس يكفي ليك

بكري : لا حول و لا قوة الا بالله

اسماعيل : بتطنطن في شنو انت

بكري : مافي حاجة ، طيب الهدوم

اسماعيل : دي اخر سنة ليك ، مافي داعي لهدوم جديدة

بكري : كيف مافي داعي ، ما ممكن لبسة المدرسة حقت سنة اولى امشي بيها كل السنين ،، يااااخ انا كبرت و بقت ضيقة

اسماعيل : كويس انك عارف نفسك كبرت ، كنت تشتغل في الاجازة تطلع حق مدرستك ، بدل تجيني كبير كدة و عايز قروش المدرسة كمان و ما بتخجل كمان

بكري : انا اشتريت العجلة عشان انت بتديني حق المشية بس و حق الرجعة ما بتديني ليهو

اسماعيل : اشتريت عجلة مرة واحدة 😳 و كمان تقول عايز حاجات المدرسة ، هسي امشي جيب العجلة دي عشان ابيعها و بي قروشها تجيب بيها حاجات مدرستك او ما عندك عندي قرش طول السنة ، قال عجلة قال

بكري : .....

يتبع