*#مُراهقات~ولكن《03》*
*#الجزء~الثاني♡♡*
*#بقلم~ريان~عبدالقادر(عشق"ق)*
*☆ـــــــــــہہہـ٨ـــ٨ــــہہہـ٨ـــ٨ــہہـ٨ــــــــــــ☆*‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‏
‌‌‌‌‌‌‌‌‌‌‌‌‌‌‌‌‏ ‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‏
*"مرة واحدة في العمر تلتقي بشخص لا يشبه أحداً ولا أحد يشبهه فلا تضيعه"*

*"جُمان"*

على بال ما لميت لبسي في شنطتي لقيت أمير بتصل علي وقال هو واقف تحت جمب الباب، ختيت طرحتي في راسي وجريت الشنطه بعد قفلت الابواب، كان واقف برا نزل بالحاجات وانا دخلت بيت البواب كان عندنا باقي اكل كتير ومواد تموينة قلت اديها ليهم لانو ماف زول تاني ممكن يستفيد منها وتبقى لينا اجر وحسنه بدل ما تبوظ، ركبت العربية وكنت لابسة نظارتي ختيتها قدامي وشلت تلفوني، ما كنت عارفه اتكلم معاو كيف وفي شنو لانو علاقتنا بقت باردة شديد ياداب ما بينا السلام وخلاص، بعد فترة من الصمت فجأة وقف العربية على جمب وسألني،
أمير: جمان انت مبسوطة؟
- بالنسبة لشنو يعني؟
= عامة كده.
- اي الحمدلله.
= انت رفضتيني لي؟
- انا ما رفضتك يا أمير لكن لأسباب كتيرة انت عارفها ما ينفع نكون مع بعض.
= ما عارف انا ما عارف قولي لي سبب واحد.
- سارة اللي هيا اختي بتحبك وما اظن في سبب مقنع اكتر من ده.
= وانا قلت ليك ألف مرة انا ما بحبها وما شايفها اكتر من اخت بالنسبة لي.
- بمعنى كده نحن الاتنين اخواتك لانو هي اختي برضو.
= سارة دي انا اتربيت معاها في بيت واحد وما شايف نفسي اكتر من اخوها.
- لكن ده ما بحل حاجه وما بلغي مشاعرها تجاهك ما متخيلة نفسي اكون مع واحد وفي وحده غيري كانت بتحبو ومن سنين ما يوم ولا اتنين بعيد عن انو الوحده دي تكون اختي.
= انت كده بتظلميني وبتعاقبيني على ذنب ما لي يد فيو.
- اسفه والله لكن بجد ما بقدر اعمل كده انت متخيل لو عرسنا تم ممكن يحصل شنو؟ سارة اصلا ما بتحبني وما محتاجه سبب زيادة عشان تكرهني بيو، وغير انو ح تحصل مشاكل كتيرة في البيت بسببنا وانا ما عايزة يحصل كده ولا بقدر على الفرهدة دي، وصدقني يا أمير لو كنا في ظروف تاني او حياة تانية زي ما بقولو كان انت ح تكون افضل خيار بالنسبة لي لكن للاسف نحن انتلاقينا في الزمن الغلط وعشان ما عايزة ليك الا كل خير ياريت ما نفتح السيرة دي تاني عشان بنزعل الاتنين، على كده سكت وما اتكلم معاي جه في بالي انو ده نفس الموقف اللي بخت فيه عماد اذا عرف بالحقيقة، وطالما انا ما قدرت اتقبل الفكرة دي والحالة أمير ما بحبها مستحيل عماد يتغاضى عن اننا الاتنين كنا بنحب بعض، كل ما اقول خلاص لقيت ليها حل تتعقد زيادة وخوفي زاد اضعاف مضاعفة، ومن السكته ديك ما اتكلم لغايه ما وصلنا البيت نزل لي حاجاتي واتحرك، لقيت سفيان منتظرني دخل لي الشنطة وجاب لي موية وعصير وقال امو وسارة ماف طلعو مشوار، ومشيت ناس عمتي لقيتها نايمه وأمنة لسه ما رجعت من الجامعة، مشيت البيت التاني ورتبت ملابسي في الدولاب وحاجاتي، سفيان قال جيعان وانا خبرتي في المطبخ صفر قلت ليه: امشي جيب لينا اندومي وشبس وانا بظبطم لينا اكلة روعة، وفعلا مشى جابم وعملت احلى اندومي كسرتو وكبيت فوقو البهارات مع الشبس وعصرت فيهم ليمون ومعاهم كاتشب ومايونيز، كانت حادقة وحامضة لكن في نفس الوقت حلوة خالص وبعدها شربنا بارد وكل واحد اتجدع في سرير وبقينا بنحضر، فجأة بقى يتلوى وقال لي بطنو بتوجعو وما قادر يقعد اديتو ياكل زبادي ما نفعو وغليت ليو نعناع برضو ما فادو، قلت ليه: بعد ده ارح المستشفى ما يكون حاصلة ليك حاجة وبي قعدنا ده حالتك تسوء، لبست عبايتي وشلت قروشي معاي ومشينا، ومن لخمتي وخوفي عليه ما خطر لي اكلم اي زول من ناس البيت، المهم دخلنا للدكتور وبعد عمل ليه الفحوصات طلع عندو مصران عصبي وهاج بسبب الاندومي العملتها دي، احساس الذنب كان عايز يكتلني ما عارفه لو ما جينا كان ممكن يحصل ليه شنو من وراي، لمن مشيت اشتري العلاجات لقيت مكالمات كتيرة من عماد وأمير،
- اي يا عماد.
= انت كويسة؟!
- ما في احسن حال والله لكن الحمدلله.
= خير الحاصل شنو؟
- سفيان اخوي تعب وجبتو المستشفى وطلع عندو مصران عصبي.
= ألف لا بأس عليه يارب ان شاء الله حسنة واجر، وكيف هو حاليا؟
- هو ما كويس تعبان والله لكن احسن من الوقت الجينا فيو زاتو طالعين بعد شويه بعد ما الدكتور يمر عليه ويشوف لو حالتو اتحسنت.
- لا ما تطلعو خليكم وانا بجي ارجعكم.
- ماف داعي والله يا عمده بتكون تعبان من الشغل امشي البيت ارتاح وانا بأجر لينا عربية.
= انا خلاص جاي عليكم.

اشتريت الادوية ورجعت لي الدكتور قال ممكن يطلع لانو حالته اتحسنت بعد اخد العلاج عدد ليه اكلات لازم يبعد عنها ويكون عندو نظام صحي وفي نفس الوقت ما يهمل في ادويتو ولو حصل اي شيء نجي على طول، كنت سانده علي وانتظرنا برا لغايه ما عماد جه سأله عن حال وكان عايز الروشتة عشان يجيب الادوية قلت ليه: ما تتعب نفسك انا جبتها، المهم وصلنا البيت ولقناهم كلم قاعدين على اعصابم، عماد سند سفيان ودخلو جوا وهم كانو بسألوني الحصل شنو، حكيت ليهم انو لمن تعب وديتو للدكتور وطلع عندو مصران، كلم جاطو وكيف اتصرف من راسي من غير ما اقول لي زول وده اهمال شنو ده،
- كان مفترض اعمل شنو يعني انتظرو لغايه ما يموت حتى اتصرف؟!
سارة: لا تتصرفي من راسك زي الكأنك مسؤولة منو، قايلة نفسك امو؟
- ما امو لكن اي مسؤولة منو لانو اخوي الصغير.
سفيان: خلاص ما تجوطو انا كويس الحمدلله.
صفية: لو ما اللغاويس العملتا دي ما كانت جاتك حاجه الله جازيها هي السبب.
سفيان: يا امي ماف داعي لكلامك ده الحصل مكتوب بيها او بلاها كان حصل، ورب ضارة نافعة لو ما هي نحن لي هسي ما عارفين عندي مصران.
سارة: نفسي اعرف انت عايز تقعد تدافع ليها كده لي متين فوق ما غلطانه كمان ما عايز زول يتكلم مع الست هانم.
أمنة: كلام سفيان صاح هي ما غلطت في شيء كلو مقدر ومكتوب.
سارة: انت ماف زول طلب رايك وما تدخلي في حاجه ما بتخصك سامعه كلامي ده.
صفية: انت وامك كرعينكم حارات وعايزين تقشطو رجال البيت ده، ابوك ما تم كم يوم رجع امك عمل حادث وقرب يموت وانت من دخلتي البيت ده ولدي قرب يودع.
سارة: غايتو الله يكفينا شركم ويريحنا منكم.

للحظة بقيت ما مستوعبة بابا الحصل ليه شنو ولي كلهم عارفين الا انا؟ شلت تلفوني وحاولت اتصل عليه كتير ما رده علي وحتى فاتن تلفونها مقفول، لقيت دموعي جارية وما قدرت اقعد معاهم كنت حاسه بالوحده والضعف، الكل بهاجم فيني وما قادرة ادافع عن نفسي وده كلو قدام عماد، ما خاتين اعتبار لي ولا احترام للغريب القاعد وسطهم وشايفهم كيف بتعاملو معاي، طلع بعد شافني قاعدة في الحوش ببكي قال لي: ارح معاي، ما سألتو ماشين وين ولا عايز يقول لي شنو مشيت معاو من غير ما اتكلم، وخالص ما وقفت بكى اول مرة احس نفسي مكسورة للدرجه دي، لمن شافني ما ناوية اسكت قال لي: يا جُمان عليك الله ما تبكي ما بقدر اشوفك كده وافضل قاعد سااي وفي نفس الوقت ولا بقدر اضمك ولا امسح على شعرك ولا حتى دموعك ما في يدي حاجه اعملها ونحن كده، مدى لي منديل مسحت دموعي واخدت نفس وقلت ليه: تمام...تمام انا بقيت كويسه،
= انا ما عايزك تبكي لانو ما بقدر اعمل ليك حاجه تخفف الحاسه بيو بس لو بترتاحي ابكي.
- اول مرة احس نفسي وحيدة وانا وسط اهلي.
= انت ما وحيدة انا معاك.
- متخيل انك تحس بالغربة وانت في نص بيتك.
= معليش مرات كتيرة بتحصل لينا موافق خارج عن إرادتنا لكن كلها بتكون لي مصلحتنا ومنها بنتعلم دورس تساعدنا في حياتنا.
لفيت المراية على جهتي وقلت ليه شوف شكلي بقى عامل كيف من البكى، قال لي ياريت لو كل الناس لمن تبكي بتكون بالحلاوة دي فصلت وقعدت اضحك، تاني تلفوني رنه وكان بابا ومعاو فاتن اتكلم معاي وفهمني انو حصل ليه حادث بسيط وهو كويس وماف داعي اخاف، قلت لي: فاتن كويس بنتحاسب لمن تجي راجعة قالت لي: ما كنت عايزاك تخافي وتقلقي براي قلبي كان مقطوع، قلت ليهم: انا جايه اقعد معاكم كم يوم وارجع بابا اعترض وقال اقعد عشان الجامعة والتسجيل وهو اصلا مقرر يجي راجع لمن حالتو تتحسن، بعد مكالمة طويلة ما سمحو لي اجي وقالو هم بعد بابا يتحسن والدكتور يسمح ليه بالسفر برجعو،
= ها اطمنتي عليه؟
- لسه مقلقه لكن الحمدلله.
= نمسح الدموع دي بعد كده.
- حاضر.
= رأيك شنو نمشي ناكل ايسكريم وبعدها ارجعك البيت.
- ما ترجعني يااخ ما عايزة امشي.
= ياريت لو بيدي ما كنت خليتك تزحي من جمبي شبر.
- ارح نعرس.
= انت جادة؟
- اي المانع شنو مش اصلا مخطوبين خلينا نتم عرسنا ونتلما في بيتنا.
= لو علي عايز اعرسك الليله قبل بكرة.
- وانا قلت ليك موافقة.

*"مُزن"*

في الصباح وبعد نضفت البيت طلعت مشيت كوفير قريب مننا رسمو لي نقش عروس وظبطت نفسي عشان خلاص ايجار الشقة خلص وبنقعد في بيتنا مع اهل هيما، لمن جه لقاني لميت الشنط وجهزت حاجاتنا اتغدينا اول وطلعنا بعد العشاء كده، ونحن في الشارع قلت ليو خلينا نشتري فواكه ومستلزمات بيت عشان ما نمشي يدينا فاضيه مع انو هو اصلا البصرف على البيت لكن برضو، وهو شافها فكرة سمحة واحترم رأي واشترى البقدر عليه، لمن وصلنا وقبل ما ننزل كنت حاسة بهواء بارد في ضهري، قلت لي هيما شوف لي الفستان اتفتح من ورا ولا السسته حلجت، قبلت عكسو وكان بقفلها لي يظهر اتحلجت في اللحظة ديك جات طالعة الاء وشافتنا ونحن في العربية، دنقرت في الشباك وقالت مستعجلين على شنو عندكم بيت يلمكم، دخلت في ضفوري من الخجل لمن وشي بقى احمر وما قدرت ابرر ليها الموقف، بعد دخلنا جوا وسلمنا عليهم كانت بتعاين لينا سااي اصلو ما

اتكلمت، حبوبتو قالت يختو لينا ناكل هيما قال ليها نحن جاهزين من بيتنا عايزين نرتاح بس لي بكرة ان شاء الله اشر لي بيدو عشان اقوم، الاء قالت غايتو جنس استعجال ما طبيعي اقعدو مع الناس اخدو ليكم خشم خشمين ما طايرين من بعض والليل ده ما بنتهي، يا لطيف يارب من البتقولو البت دي قدام الناس لو ما خجلانه لي تخجل لي اخوها البتقول كلامها قدامو ده، حبوبة قالت لينا امشو على بيتكم اخدو راحتكم وسو سواتكم وانت يا ام لسان طويل ماف زول سألك وحق الليل ده انت عايزة وما لاقيه، اقسم بالله لو كان في زول ممكن يموت من الخجل كان مت انا وووبعلي من ديل وده شنو البقولو ده، بعدلي طلعت من هناك على الجزء القاسمنو لي قبل ما اسمع حاجه تانيه وكفاية شكل هيما لي اختو، لقيت الباب فاتح اول شيء في برنده طويلة فيها اربعة سراير حديد وكراسي وطقم ترابيز، مركب ليها سيراميك وفيها مروحتين ومكيف نسمة وشاشة والانوار وتلاجة العصاير الصغيرة ديك وحمامنا منفصل، ما شاء الله طلعت احلى من وصفو لي لانو اخر مرة قال لي عايز يضربها بوهية ويدخل العفش، دخلت غرفتنا وريحة البخور يا سلام اكيد دي حبوبة هي البتعرف عاداتنا ومتمسكة بيها، ختيت طرحتي في السرير وشلت الشنطة رفعتها فوق الطربيزة وبديت اطلع في هدومنا عشان ارتبها، هيما لمن جه قال لي متين نحن جينا لمن عايزة تشتغلي وتعملي لنفسك مواضيع، قلت ليه احسن استثمر وقتي وعلى فكرة الهدوم دي ما بترتب نفسها براها، ضماني من ورا وقال لي ترتيب الهدوم ملحوق.

البتعود يصحى بدري نومة الصباح بتبقى ليو حلم حلم، مسحت البيت والطرابيز وفرشت و ولعت بخوري، مشيت بهناك لقيتم لسه نايمين عملت الشاي وجبتو لي هيما عشان ما يتأخر على الشغل، لمن جه طالع اداني قروش قال لي دي مصاريفك والباقي ادي لي يمه عشان هي البترسل حاجات البيت، قلت ليو طيب وخلي بالك من نفسك وما تتأخر علي قال لي ان شاء الله ولو احتجتي لأي شيء ولا نفسك دخلت في حاجه اتصلي علي وانا بجيبهم ليك معاي، قلت ليو طيب وما بتقصر الله يديك العافية ويخليك لي باس راسي ومشى، لمن ما لقيت حاجه اعملها فتحت التلفزيون في قناة طيبة لانو فيها برامج كتيرة سمحه وبتفيد الواحد في حياتو، جاتني حبوبه وقالت لي انت صحيتي يعني قلت ليها من قبيل والله متعودة اقوم بدري، قالت لي لو ما شربتي الشاي تعالي اشربي معانا قلت ليها شربتو مع هيما قبل ما يمشي، قالت لي تعالي اشربي تاني الما تنى ما بخش الجنة وانت هسي فيك روحين يعني تاكلي اكل نفرين، سمعت الكلام ومشيت معاها ملت لي كباية موية كبيرة كلها شاي لبن وصحن بتاع بسكويت وفطير، قلت ليها والله يا حبوبة لو اكلت ده كلو الا تدردقوني من الحته دي ما بقدر اتحرك تاني، قالت لي اكلي بي عافيتك يابنيتي اكلي وارقدي نومي وما تعملي شيتن، الاء صرت وشها وقالت وقت ما عايزاها تعمل شيء جايباها لي يعني فاظة نختها في البيت ونتفرج عليها؟
ستنا: اي انا دي بدور اتفرج عليها قومي شوفي شغلتك وين الشمس حصلت نص الحوش وانت لسه ما قشيتي وعدتك الضبان ينوني فيها.
الاء: قاعدة في البيت ده براي لمن اشتغل اي حاجه انا ما شايفة ولاء النهار كلو راقدة وماسكة تلفونها.
ستنا: ولاا قعد تقرا ما براك ابيتي العلام وقعدتي في البيت تاني عايزة تعملي شنو الا تخدمي.
الاء: انا دي لو ما فجيت وخليت ليكم البيت ده ترتاحو مني وارتاح منكم.
- لي يا حبوبة زعلتيها لو على العدة انا بغسلها ما مشكلة.
ستنا: هووي يابنيتي اقعدي في سريرك ده وانقرعي وما تجيبي لي كلام مع وليدي ويقول شغلتك وانت حامل، خليها التطنطن زي ما عايزة وتقوم على شغلتا زول بحنسا ماف.

لمن شبعت ونسة مع حبوبة رجعت بيتي صليت الضهر وفتحت المكيف قلت انوم لي شوية لكن ما قدرت، عاينت للتلفون لقيت رسالة حقت نتيجة القبول وانا نسيت عديل انو بتطلع الليلة، جري مشيت الدكان حولت لي رصيد ورسلت رقم الجلوس وضربت لي جمان اذكرها لو نست زي، قالت لي هي ما في البيت ومشت لي عماد في بيتو.

*"جُمان"*

كنت مع عماد واقفين جمب محل الايسكريم وما نزلت من العربية لانو منظري ما كان من احسنو، جابو لينا وكنا بنتونس وفاتحين الشبابيك قال لي: انو امو منتظراني بكرة عشان اجي اشرب معاها الجبنة ونتغدا ومن قبيل بادية شغل وبتجهز في نفسها، قلت ليه: انت عارفه سفرة امي الفجأة دي بوظت لي مواعيدي لانو هي كانت جاية معاي وبعد مشت ما بقدر اجي بيتكم براي وكمان الزاد الطين بلة انو سفيان بقى عيان، قال لي: مقدر الظروف الحصلت ليك وبحاول ان شاء الله اشرح ليها، قلت ليه: ما عايزاها تزعل مني لكن بجد صعبة علي اطلع في الوقت ده، قال لي: ولا يهمك الجايات اكتر بإذن الله قلت ليه: ونعمه بالله ورجعت اكل من كاستي لما تلفوني ضرب وكان أمير،

- ايوا يا أمير.
= وين انت لغاية هسي وحايمه برا مع منو؟
- ما مشيت بعيد وقاعدة مع عماد.
= مالو عماد بقى من بقية اهلك لمن بتلفي معاو للزمن ده تعالي راجعة سرعة قبل ما اصلك في مكانك.
- اولا ما تتكلم معاي بالطريقة دي لانك ما ابوي ولا ولي أمري، وانا حرة اطلع مع اي زول انا عايزاو في الوقت الانا عايزاو.
= حرة دي هناك في بيت ابوك لكن طالما انت قاعدة معانا في البيت الكبير تسمعي كلامي وما تطلعي من شوري، وما اعيد ليك القلتو تاني.
قفل الخط في وشي من غير ما يخليني اكمل كلامي زعلت واتحمقت من الطريقة الكلمني بيها، ورجعت تاني احس اني براي حاولت ما بين لي عماد شيء لكن حسى علي، قال لي: حاصلة حاجه ما يكون اخوك تعب؟ قلت ليه: لا ماف شيء بس رجعني البيت الوقت اتأخر، ما اتناقش معاي كتير وطوالي مشينا وفي الطريق كان بحاول يطمني انو معاي وما اخاف من شيء طالما هو موجود، وقف قصاد الباب وقال لي: المشاكل بتحصل بين الأهل وده شيء طبيعي لكن ما لازم ازعل نفسي ولا اشيلها الهم ولو حصل اي شيء اتصل عليه مهما كان الوقت في نظري ما مناسب، ودعتو ونزلت قبل ما ادق الباب فتح لي أمير طلع وقف مع عماد واتكلم معاو مسافة قال ليه شنو ما عارفه لكن ملامح وشهم الاتنين كانت ما بتتفسر، بس في الاخر عماد ابتسم لي ولوح بيدو حتى مشى، اما أمير جرا الباب قفلو علينا ونحن برا وقال لي: اول تبادي طلوع من البيت من غير ما تقولي لي مافي وختي الكلام ده حلق في اضانك، وتاني تبادي ما عندنا بنات بتقعد برا البيت لحد الزمن ده، وتالت تبادي طلعة مع خطيبك من غير ما يكون معاك أمنة مافي، كنت بعاين ليه مخلوعة معقولة ده أمير البتكلم معاي كده وبكورك في وشي، ما رديت عليه ولا قلت حاجه جريت السلكة بتاعت الباب ودخلت، كان سفيان راقد في السرير ماسك تلفونو وبلعب ببجي، ختيت يدي في راسو عشان اعرف اذا عندو حمه وطلعت خفيفة قال لي اخد ادويتو وبعد شويه بنوم،
سفيان: انت زعلانه مالك؟
- ماف شيء مرهقة بس اول ما انوم ببقى كويسة.
= ده ما ارهاق لكن.
- ما تشغل بالك وما تهمل ادويتك، دخلت الغرفة قعدت في طرف السرير وانا حاسة نفسي مخنوقة، المشاكل كلها جات ورا بعض وقبل ما احل وحدة تظهر لي غيرها، وانا سرحانه في الحاصل لي جات داخلة أمنة وهي شايلة صينيه فيها اكل وعصير، ختتا في الطربيزة وقالت لي: ما لقيت غيرك يجبر بخاطري وياكل الكفته الكلهم قالو ما بتتأكل دي، ناس بيتنا ديل ما عندهم ذوق ولا حصحاص يعني معقوله اكون واقفة اكتر من ساعة ونص في المطبخ بعمل في اكل عشان في اقل من دقيقة يقولو لي اكلك ما بتأكل؟ لكن غلطانه انا تاني لو وقفت ولا عملت ليهم كباية شاي ساكت، ضحكت وقلت ليها: ما تزعلي عادي بكرة لمن تبقي شيف اد الدنيا خليهم يقيفو في الصف عشان ياكلو من طبخك شيء، هي زاتها ضحكت وقالت لي: سمح امانة ما بوريهم شعاع الوقت داك، شلت اول لقمة وما كانت كعبة للدرجة دي بس ملحها زايد، قلت ليها: مشكلتها بسيطة جيبي ليمون بس وبتبقى ارهب ما يكون، فعلا جابتو اكلنا سوا وشربنا العصير ونحن بنتونس بعدها قالت ماشة تنوم بعد ما شكرتني على جبر خاطرها، في نفسي قلت انت الجبرتي بخاطري ما انا والله، وبس فكرت في عماد كده لقيتو متصل علي صحي ود حلال،
- هسي كنت في بالي.
= وانا بالي بيك مشغول.
- وصلت البيت؟!
= اي من شويات وكنت بتونس مع الحجة وقلت ليها يمكن ما تقدري تجي زعلت شوية لكن راضيتها.
- قول ليها ولا تزعل انا جاية بكرة وناوية اشرب معاها الجبنة ونتغدا سوا.
= يا سلام اخبار حلوة.
- ما احلى من وجودك في حياتي.
= حرام عليك والله راجل قدر ده تخلي يخجل وما يعرف يرد.
- يعني انت بنص كلمة تفصلني وتخليني اضحك زي المسطولة ولمن افصلك انا يبقى حرام علي؟!
= ناشف انا ما متعود على الكلام الحلو.
- يبقى ياسيدي تتعود لانك لسه ح تسمع كتير.
= يا لطيف ألطف.
- بكرة حتكون قاعد في البيت.
= كان بودي والله لكن عندي كم شغلة كده طالع اقضيها، لكن ان شاء الله بلحقك قبل ما تطلعي وبرجعك البيت.
- ح ازعل منك لو مشيت وانت ما جيت.
= الله لا جاب الزعل، بإذن الله بحصل خير.
-ونعمة بالله، اتونسنا زي نص ساعة او اكتر بعدها قفلت منو ورقدت نمت، لسة كنت مستوحشة البيت وما حاسة انو بيتنا عشان كده تعبت على بال ما غفيت.

*"في الصباح"*

" أصبحنا و أصبح الملك لله ، و الحمد لله ، لا إله إلا الله وحده لا شريك له ، له الملك و له الحمد وهو على كل شئ قدير ، رب أسألك خير ما في هذا اليوم و خير ما بعده ، و أعوذ بك من شر ما في هذا اليوم و شر ما بعده ، رب أعوذ بك من الكسل ، وسوء الكبر ، رب أعوذ بك من عذاب في النار و عذاب في القبر "

الناس بتقول يا صباح الخير وانا من فتحت عيوني لقيت سارة واقفة في راسي وخاته قدامها جردل مسح وقالت لي: نضفي الغرفة القاعدة فيها دي لانو ماف خدامة هنا عشان تنضفها ليك، قلت ليها: صباح الخير ليك كمان انا بخير الحمدلله لكن انت شكلك صاحية بحمة، طلعت برا غسلت وشي من المغسلة وصبحت على سفيان وسألت عن حالو،

جاتني أمنة وانا قاعدة في السرير برا قالت لي: شربتي الشاي؟ قلت ليها: لسة والله ياداب صحيت من شوية وتعبانة زاتو، سمعت أمير بقول: لو خليتي السهر والكلام بالتلفون كان نمتي كفايتك، ما رديت عليه وقلت ليها: عندك حاجه الليلة عايزاك تمشي معاي مشوار، قالت لي: وين؟ قلت ليها: خالتو إلهام كانت عازماني امشي اشرب معاها الجبنة ونتغدا سوا ويفترض ماما تمشي معاي لكن هسي هي سافرت وما قدرت الغي الموعد، قالت لي: طيب ما مشكلة بنطلع متين بالضبط عشان عندي شغل في البيت عايزة اتمو، قلت ليها: يعني بعد الضهر كده حاولي وحده او وحده ونص، قالت لي: هسي البس فستان ولا اسكيرت وبلوزة قلت ليها: البتكوني مرتاحة فيه البسيه، وقبل ما ترد علي أمير قال لينا: انتو بتخططو وبتجهزو في لبسكم الأذن ليكم تمشو منو؟!
*💜ابقوا عافيه💜*
*☆عشق'ق☆*
*•••••••••••••••••••••••••••••••••••••••••••••••••••••••••••*
*☆يتبــــــــــــــــــــــــــــــــــــــــــــع☆☆*

*#مُراهقات~ولكن《04》*
*#الجزء~الثاني♡♡*
*#بقلم~ريان~عبدالقادر(عشق"ق)*
*☆ـــــــــــہہہـ٨ـــ٨ــــہہہـ٨ـــ٨ــہہـ٨ــــــــــــ☆*‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‏
‌‌‌‌‌‌‌‌‌‌‌‌‌‌‌‌‏ ‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‏
*"إنكِ السبب الأول الذي يدفعني للإستمرار حتى الآن أنتِ لست خطة ثانوية أو ممر جانبي*
*أنتِ الطريق"*

لمن أمير قال لينا: انتو بتخططو وبتجهزو في لبسكم الاذن ليكم تمشو منو؟ ما رديت ليه لانو حسيت ماف كلام ممكن يوصف الشعور الحاسه بيو، بس فضلت بعاين في عيونو وعيوني اتملت دموع وحلفت ما ببكي قدامو، كمل كلامو ولا كأنو حاصل حاجه وقال: وحده فيكم ما تطلع من البيت ده لانو ماف سبب يخليكم تمشو بيت الناس ديلك انت قايلة نفسك مرتو؟ بعد رغى كلام كتير مشى وحكم علينا بعدم المشي وانا من الغضب دخلت الغرفة وبقيت بتنهد وبحاول اهدي من انفاسي المتصاعدة، بعد شوية كده جاتني أمنة وقالت لي: زعلتي صااح؟ ما عارفه اقول ليك شنو لكن أمير اخوي عمرو ما كان كده اول مرة اشوفو بتصرف بالطريقة دي حالو اتبدل وكأنو ما هو، مسحت دمعتي بطرف يدي وقلت ليها: انا عارفه هو بعمل كده لي ولو عامل فيها مجنون انا اجن منو وغصباً عنو بمشي ولو عايز يكسر رجلي، قالت لي: عليك الله يا جمان ما تعملي كده وتعاندي والقصة تتعقد اكتر، قلت ليها: خليها تتعقد لمن ما تنحل وبمشي يعني بمشي لكن ما بغصبك معاي اقعدي انت واتصرفي عادي كأنو ما حصل شيء انا بمسح هنا وانت تمي شغلك وبعدها بطلع ولو سألوك مشيت وين قولي ليهم ما عارفه، قالت لي: خلي المسح انا بمسح ليك لكن اكسري الشر واقعدي في البيت قلت ليها: لا ما بكسر الشر ولا ببعد منو ولا بغني ليو ولو على الشغل خليني اشتغل براي هسي يشاكلوك من غير سبب، قالت لي: انا اتعودت على ام نفسيات ديك لمن تكون رايقة بتبقيني صحبتها وده طبعا من وراه مصالح اول ما تخلص مصلحتها معاي بتشخت لي، قلت ليها: لو انت من البداية رفضتي تصرفاتها معاك ما كان عادتها تاني لكن عشان انت قبلتي منها كل شيء بقت تتصرف معاك حسب مزاجها، قالت لي: فعلا الغلط مني انا الناديت الكلب ياسيدي والحالة ما عندي معاو اي مصلحة، مسحت الغرفة وفرشتها وطلعت لي عباية خليجية باللون الزيتي وعليها تشكيلات بالذهبي والاكسسرز حقها ذهبي برضو، شعري كان منكش شويه قمت كويتو ولميتو وحده وعايشة بكل رواق وكأنو ما حصل شيء، أمنة كانت بتجهز في الفطور حق ناس بيتهم وانا هنا ما عارفاهم ناوين يفطرو بشنو، طلعت الدكان جبت لي اندومي وجبنة وبارد لاقتني سارة قالت لي: تعالي الفطور وخلي شغل الانقسامات ده خلي بتاكلي براك وجاره وراك أمنة الما عندها راس ولا رأي، ما عقبت على كلامها ودخلت المطبخ ختيت الكيس وقعدت معاهم في البرنده فطرنا، كنت بس باكل من الفول واغلبيتم لاحظو لي سارة قالت لي: مالك ما بتاكلي ولا الا يعزموك، قلت ليها: ما يحتاج عزيمة لكني ما باكل فيسخ ولا شوربة سمك ولا حتى عصيدة، امها لوت خشمها وقالت: مشششم نعما ليك شنو يعني نحمر خروف ولا نضبح جمل؟ ما رديت وحسيت نفسي اتسدت من الاكل قلت ليهم: عامرين وقمت.

بعد الفطور مشينا السوبر ماركت اشتريت شوكلت وعنب فراولة موز ومنقا وعملت منها سلطة فواكه، وأمنة قالت بتعرف تعمل كيكة وعملت وحده حقت اسفنج والتانية بتاعت شوكليت، وجابت ساخن بارد من بيتهم ختينا فيه الاكل بعد داك دخلت اخدت لي دُش وغيرت لبسي وبديت اجهز وجاتني هي بعد لبست وكانت عايزاني اعمل ليها ميكب، قلت ليها: انت ماشه معاي؟ قالت لي: ما بقدر اخليك براك ولو أمير بشاكلك يشاكلني معاك، قلت ليها: انت ما مجبورة على فكرة وانا براي بقدر امشي ما عايزة تخرب علاقتك مع اخوك بسببي، قالت لي: انا عارفه اخوي المقوي راسو شنو لكن بس ما قادرة اتكلم الله يجازيها قاعدة زي السوسة، عرفتها بتتكلم عن سارة لكن ما ذكرت اسمها، المهم عملت ليها ميكب وما اتأخرنا شديد وطلعنا بعد الضهر بعد مية سؤال من ناس البيت ماشين وين وراجعين متين وما تتأخرو، وخنقني جو التحكم ده لانو ما متعوده عليو لمن وصلنا كنت حاسه برهبة كده غربية وعليها خوف وضربات قلبي زايده لكن من شنو ما عارفه، اتصلت على خالتو إلهام وقلت ليها: نحن جمب الباب قالت لي: خلاص جاياكم، شويه كده وفتح لينا مهند من شفتو حيلي برد سلم علينا وعلى وشو ابتسامة كده ما تفهم معناها شنو، نظام ما تكوني نسيتي انا موجود بلعت ريقي ودخلت، بعد سلم على أمنة كان مادي لي يدو وانا بعاين ليها وبعاين لي عيونو، لمن حسيت الوقت طال سلم عليه ومسك يدي مسافة وكان بضغط عليها، جات خالتو إلهام طالعة سلمت

علي بالحضن ودخلتنا جوا قعدنا في الصالة، سألتني عن أمي وكده وقلت ليها سافرت لي ابوي عمل حادث وحكيت ليها عن التفاصيل، مهند هو الكان متولي مهمة الضيافة جاب لينا موية وعصير وقعد في الكرسي القصادي وهو بعاين لي ويرفع في حواجبينو، وما ارتحت الا لمن طلع وقال ماشي مشوار لي اصحابو واحتمال يتأخر، اتنفست الصعداء ورخيت جسمي في الكرسي خالتو إلهام قالت الا تقلى البن قدامنا وأمنة دقتو ليها، تاني قالت لي: تعالي اوريك بيتك وساقتني من يدي ركبنا الطابق التاني كان فيو شقتين، وحده حقت عماد والتانية لي مهند فتحت الباب ودخلنا كانت فاضية ما فيها ولا شيء، قالت لي: هي كانت مفروشة قبل كده لكن عماد قال تفرشيها على مزاجك، وبقت تفرجني على المطبخ وغرفة النوم وغرفة الإستقبال والصالة، وكانت حلوة شديد حتى ألوانها هادية وفرايحية، تاني قالت لي اخليك قاعدة شوية اتفرجي براحتك وانزلي لينا تحت قلت ليها طيب ونزلت، كنت بتجول في البيت وبحاول اتخيل فيو لمن نخت الأثاث والديكور حيكون عامل كيف، فجأة حسيت بأنفاس زول وراي وقبل ما اتلفت لقيتو بغطي فمي بيدو وبجراني لغرفة، لحظة الخوف وقطعت القلب خلتني ما قادرة اقاوم تكلني على الحيطة وهو بضحك، قال لي: اياك تطلعي اي صوت عشان يحصل كل خير هزيت راسي بمعنى حاضر وزحى يدو،
- مهند انت مجنون صااح؟
= على اساس انك ما كنتِ عارفة.
- انت لي بتعمل كده؟ مش قلت ليك البينا انتهى ومن غير رجعة، خليني اكمل حياتي وامشي في الطريق الاخترتو.
= كان ممكن اخليك لو طريقك ده ما بتقاطع مع طريقي لكن انت ما تتخطبي لاخوي وتقولي لي اخليك في حالك.
- ده لازم يبقى ليك سبب كوني خطيبة اخوك ده يخليك تحسب الف حساب ولا تحاول تعاين لي حتى خلي تعمل حركاتك دي.
= انا قلت ليك طالما انت مكملة في العلاقة دي وعاملة نفسك نسيتيني استحملي البجي مني.
- انا ما عاملة نفسي نسيتك انا بالجد نسيتك.
= والله؟!
كان بعاين لي جوا عيوني وانا عاملة فيها ثابتة ومن جوا عايزة اسيح عديل، اخد نفس من رقبتي وقال لي عطري البحبو مثلت الثبات ولزيتو لورا بيدي، مسكهم الاتنين وجراني عليو وقال: ما تعملي حاجه انت ما قدرها، قلت ليه: طيب اسفة خليني انزل ضحك وقال لي: لا وكان بقرب مني غمضت عيوني ودموعي نزلت من غير ما احس، رجعة خطوة لورا وما عارفه كان بعمل شنو وجه صوت عماد من بعيد وهو بنادي فيني...

*"سارة"*

اعمل شنو انا عشان البت دي تمشي من بيتنا؟ ما كفاية انها شاغلة تفكيرو وهي هناك، كمان لمن تجي وتقعد معاو في نفس البيت ما معروف البحصل شنو، لكن لو على موتي ما بخليو ليها ما كفاية امها شالت ابوي مني كمان اخلي ليها حبيبي والله بتحلم، كنت قاعدة في الغرفة وباكل في ضفوري وبفكر كيف اخلي جمان تطلع من البيت ده ومن غير رجعة، من جات عملت لينا مشاكل وبسببها سفيان دخل المستشفى واحتمال كان مات عديل لو ما ستر ربنا، سمعتها الصباح قالت ماشه بيت اهل خطيبها الما بتخجل، هو لو ما خطيبك بس بقى راجلك لمن تمشي بيتو صحي الاختشو ماتو، ومنتظرة شنو من واحده امها بتتكلم مع راجل متزوج وبعيالو اصلا اكيد بتها طالعة ليها، عرفت أمير منعها من الطلعة وقلت بركة تستاهل خليها تترزع في البيت ده نحن ما فاتحنو ليها لوكنده كل يوم تطلع وتجي، لكن هي براها جابت الكلام لي نفسها وبعد منعوها قالت بتمشي غصب وكمان سايقه أمنة الما عندها راس دي، هسي هي لو ما غبية مالا ومال جمان تمشي ولا تجي بت طيرة سااي، العصر كده عملت نفسي تعبانه وما قادرة اقعد وقلت لي امي الا تضرب لي أمير يجي يوديني المستشفى، وهي من خوفها علي جري ضربت ليو وهو جه خليتها مشت كده قلت ليو انا ما عندي شيء امي مكبرة المواضيع سااي، قال لي خلينا نمشي عشان نطمن عليك وتعملي فحوصاتك قلت ليه ما محتاجة اعمل شيء كفاية خوفك علي ومسكت يدو، جراها براحه وقال لي بالسلامه ان شاء الله وكان ماشي تاني وقف وقال لي جمان وين؟ قلت ليو انا ما سكرتيرة الهانم عشان اعرف مشت وين وجات من وين؟ لكن شكلها طلعت لانو ما قبيل ما شفتها ما معروف مشت وين ولا كلمت زول فينا زي التقول قاعده في زريبة ما قاعدة مع ناس غايتو البت دي ما عندها احترام لي زول نهائي التقول ما شايفاك راجل البيت ولازم تستأذن منك قبل ما تطلع، حرشتو ومليت راسو لمن بقى ما بشوف قدامو من الغضب الليله ترجى الراجيها الست هانم.

*"جُمان"*

مسحت دموعي بسرعة وطلعت وانا بصلح في طرحتي وارتب مظهري، اتعاملت وكأنو ما حصل شيء وكنت بتفرج على البيت، فتح الباب ولمن لقاني واقفة ابتسم مسافة حتى جه داخل،
- خالتو إلهام قالت لي اشوف البيت.
= وعجبك؟!
- شديد حتى بديت اتخيل بعدين ممكن يطلع حلو لأي درجة.

= انت كويسة؟!
- امم لي السؤال.
= حاسي بيك ما طبيعية.
- ماف شيء شوية ارهاق وتوتر بس.
جه مهند طالع من الغرفة سلم على عماد وقال ليه: وين يا خوة، حضنو بعض واتكلمو مسافة كده انا قلت ليهم نازلة تحت، عماد قال لي انتظر حبة عايز يتكلم معاي ومهند طلع وخلانا، وقف قصادي وكان بتأمل ملامحي وفي كلام كتير في عيونو بتقال لكن
من غير ما ينطق بحرف،
= جُمان.
- نعم.
= انت ما كويسة وانا عارف يمكن توترك مع اهلك في البيت ولا مشاكل تانية حاصلة ليك وما قادرة تحكي لي، لكن لو في يدي حاجه بقدر اعملها ليك وتخفف الحاسة بيه قوليها لي.
قلت ليه بعد فترة من الصمت: انا تعبانة مرهقة ومتوترة مارة بضغوطات وبعيش مشاعر كتيرة لأول مرة في حياتي، بحاول ارجع لي نفسي واكون جُمان المرحة الفرفوشة لكن ما قادرة، احتمال في الفترة دي اكون مقصرة معاك او علاقتنا ما احسن حاجه بس اديني وقت لحد ما اتأقلم على الوضع الجديد وبعوضك.
= عاذرك وما لايمك لانك ما مقصرة في حاجه لكن ما عايز اشوفك بالهيئة دي، كوني بخير لاني بتقوى بيك.

نزلنا تحت وخالتو إلهام كانت مجهزة الجبنة وبتتونس مع أمنة ومهند، قعدت في الكرسي الجمبها وعماد جمبي،
إلهام: عقبال ما نتلمى كده وانت مرتو.
عماد: اميييين يارب عاجلاً غير آجل.
- امين، صوتي طلع براحه وبتأتأ وعيني كانت في عين مهند الحسيتها من لمعتها اتملت دموع، جاني إتصال من زوني استأذنت منهم وطلعت برا رديت عليها قالت لي: انت عارفه الليله نتائج القبول بتطلع؟ قلت ليها: ابدا والله راح من بالي انها الليلة بشوفها وارجع ليك، فصلت منها وبحثت الرصيد لقيتو ما كفاية وما بقدر اطلع احول من هنا، رجعت جوا عماد سألني لو في حاجة قلت ليه: نسيت انو نتايج القبول بتطلع الليلة وما معاي رصيد عشان كده اتوترت، قال لي: دي ما مشكلة طلع تلفونو من غير ما يتكلم وبقى يطبز فيه وبعمل في شنو ما عارفه، بعد زي ربع ساعة كده قال لي: مُبارك عليك طب أسنان جامعة السودان للعلوم والتكنولوجيا، من الفرحة جات دموعي نازلة من غير ما احس وبس بقول الحمدلله كما ينبغي لجلال وجهك وعظيم سلطانك، كلهم باركو لي وخالتو إلهام قالت لي: مرت ولدي الدكتورة بكرة تشيلي شهادتك واتبوبر بيها واقول الدكتورة جات والدكتورة مشت،
عماد: خبر حلو زي ده عايز ليه طلعة ظريفة كده نرتبها وتكون بمزاج.
إلهام: اي اطلعوا واستمتعوا بشبابكم نحن لمن كنا في عمركم شنو الما عملناو، قلبنا الواطى دي وما عدلناها الله يرحم الايام ديك.
مهند: ستو انت قايلة نفسك كبرتي ولا شنو؟ انا لسه شباب وانا بفكر اشوف ليك عريس.
إلهام: يا حليل زمن العرس منو العندو ليه نفس وهو البتعرس زي ابوك ده تاني بتشوف الرجال؟ والله كلهم من بعدو مسخو لي، الحب ده بالنسبة للبت الاول بس هو البتعيشو بجهلها وعدم معرفتها هي حاسة بشنو بكل المشاعر الملخبطة البتمر بيها، مهما عملت وسوت ما بتقدر تنساو وبفضل هو احلى حب عاشتو وحست بيو.
- ما دايما يا خالتو اول حب هو البكون الاحلى انت بتكوني شايفة كده لغايه ما تلقي البحبك بجد وبخاف عليك وبشتري خاطرك وما بهون عليه زعلك، وقتها بس بتعرفي انك في حبك الاول اديتي واكتر من اللازم اديتي من كل طاقتك ومشاعرك وقتك واحاسيسك وللاسف بتنجرحي جدنن لمن تعرفي انك ما كنت كفاية وكل عطائك ده ما اداك الحصانة انك ما بتتبدلي او يتخلى عنك، وفي اللحظة البتقرري فيها تشتري نفسك وتمشي بعد تقتنعي انو المكان ده ما بناسبك حتلقي جاي بكل وقاحة وعايز يرجع ليك، لكن بعد شنو؟ بعد ليالي طويلة قضيتها وانا ببكي وبحاول ارجع لي نفسي، بعد ما خيطت جرح قلبي من غير بنج وشفتو وهو بنزف، وقتها بس بتتخلصي من الكنت قايلة حب وبترجعي احسن من الاول وربنا بعوضك لو ما حب جديد حاجه تانية تنسيك الحب من اساسو.
إلهام: منو الكسر قلب بتي السمحة لمن خلاها تقول الكلام ده كلو؟
- ما عليك بيه ماضي وانتهى، المهم ما نخرب قعدتنا خلونا نتغدا عشان الوقت ما يتأخر ونرجع البيت بدري.

هي دخلت المطبخ تخت الغدا وانا كنت قاعدة رفعت نظري اتجاه مهند عايزة اعرف لو كلامي اثر عليه، ملامح وشو كانت ما بتتفسر ما عارفة اذا كان حاسي بالندم ولا اتهيئ لي كده لكن ده الحسيت بيه، اما عماد كان بعاين لي من غير ما يتكلم عيونو مليانه كلان لكن ما قال منو حاجه، ونحن بنتغدا فتحنا مواضيع العرس وممكن يكون متين وكذه لكن ما في الوقت الحالي، على الاقل سنة سنتين قدام اول احتمال بعد اتخرج من الجامعة، خالتو إلهام جابت سلطة الفواكه العملتها وقالت ليهم اتفضلو عمايل مرت ولدي،
عماد: متعبة نفسك لي؟!
- ما تعب ولا شيء.
إلهام: تعبت والله جابت الكيك والسلطة دي غايتو خجلتني.
- العفو والله ما كان قصدي كده لكن ما حبيت اجي ويدي فاضية.
مهند: عندها ذوق وبتعرف في الأصول.
إلهام: انت زاتك ابقى فالح واختار لي بت زيها.
مهند: زيها ماف لكن الله كريم علينا.

كان قريب المغرب كده لمن جينا طالعين من عندهم وعماد قال ما بخلينا نمشي برانا في الوقت ده والا يوصلنا، وانا ما كنت عايزة يمش عشان ما تحصل بينو مشاحنات مع أمير لو عرفنا طلعنا بالدس وعماد زاتو ما برضى لو عرف، المهم بعد اصرارو ده مشينا معاو وفي الشارع اشترى لينا آيسكريم حتى وصلنا، أمنة نزلت قبلي ودعتو وشكرني على اليوم اللطيف وقال لي: بخصوص كلامك عن الحب عرفت انك انجرحتي قبل كده وما عايز أسألك ده منو ولا هسي هو وين ولا الخلاكم تفترقو شنو، بس عايز اقول ليك اصابع اليد ما وحده وما كل ذكر بتقال عليه راجل، اذا هو ما عرف كيف يحافظ عليك انا مستحيل افرط فيك، عارفك غالية وح اعمل كل البقدر عليه عشان اخليك مبسوطة وانت معاي، وعشان السواي ما حداث ما عايز اتكلم كتير وح اخليك تشوفي حبي ليك بعيونك وتصرفاتي معاك، طلع لي شوكلاته من جيبو وقال لي اتفضلي شلتها منو وانا بضحك وقلت ليه: كوني مطمنة وانا معاك ده احلى شعور ممكن اعيشو او احس بيو وما عايزة منك حاجه تاني، اتبادلنا النظرات من غير ما نتكلم حتى نزلت، كانت أمنة منتظرة جمب الباب جرت السلك وعماد اتحرك وانا بلوح ليه بيدي، جيت ادخل لقيت أمنة لسة واقفة في مكانها لمن قربت اضربها، قلت ليها: مالك واقفة هنا خشي جوا ارفع عيوني كده اشوف ليك أمير واقف ومربع يدينو، يا الله بلعت ريقي ومشيت وانا بجرجر في رجليني خطوة ورا وتانية قدام، عايزة بس اجر من قدام وشو بأي طريقة الساعة الكورك فيني جمان حسيت البيت اترجى من صوتو...

*"مُزن"*

كنت قاعدة على اعصابي لحدي ما الرسالة وصلت الحمدلله يارب طب الخرطوم، اول شيء ضربت لي امي وريتها وبقت تزغرد لي ومن الفرح حسيتها عايزة تطير، قالت بتجيني بكرة من الصباح عشان تبارك لي قلت ليها منتظراك، بعد قفلت منها مشيت لي حبوبة وقلت ليها قبلوني في الجامعة، قالت لي زين يابتي زين العلام سمح حليلنا نحن الما قرينا الواحده تكون بتلعب حجلة مع صحباتها يجي وليها يقول ليها عقدت ليك امشي مع راجلك حليل زمن الجهل، قلت ليها انتو يا حبوبة كان زمنكم سمح ونفوسكم طيبة زمن الجار للجار والاهل عز والصحبات سند، هسي حالنا اتبدل ونفوسنا اتغيرت لو الناس رجعت زي زمان وخلت الحسد والغيرة البوظت علينا الدنيا بنرجع احسن من الاول، قالت لي الله يهدي النفوس ويصفي القلوب والباقي كلو هين، ونحن لسه في كلامنا ده جه هيما خاشي قال لي اها طب الخرطوم مش؟ ضحكت وقلت ليو اي الحمدلله قال لي لو ما العيب كان زغردت ليك ودي برضو عايزة ليها كرامه لكن الوضع قارص شوية، قلت ليو شغلة هي الكرامة دي المرة الفاتت ما قصرت خليها لي وقت تاني، قال لي لكن انت ما تستاهلي والله خجلت خجل وقدام حبوبة كمان، دخل الاكياس بهناك وانا مشيت بيتنا كبيت ليو موية وعصير مسافة ما يجي، اول ما جه باسني في جبيني وحضني وهو بقول لي والله انا فخور بيك أيما فخر وعايز اتباهى بيك قدام اي زول، قلت ليو انت عارف انك كل يوم بتثبت لي انك راجل لانو لو كان واحد تاني ناقص نجاحي ممكن يزعلو ويضايقو ويخليو يحميني القراية، لكن انت غير عنهم كلهم دايما بتفرح لي وتدعمني وبتتمنى لي كل الخير، قال لي اذا ما كان ده الهدف من وجود العلاقة فايدتها شنو؟ لازم انت تساعدني عشان اتحسن وابقى ناجح وانا كمان اساعدك واسهل ليك كل الطرق البتخليك تنجحي وتخليك متميزة في المجال البتحبي، قلت ليو انا ما بحب اي مجال انا بحبك انت مسك قلبو وقال لي واي قلبي عايز يقيف بقيت اضحك وقلت ليو بطل استهبال، قال لي عليك الله المسي وشوفي بقى يدق بسرعة كيف، قلت ليو ده كلو عشان بحبك اها لو قلت ليك بريدك هيمانه بيك وبعشقك بتقول شنو قال لي بتدردق ليك في الارض دي وبقينا نضحك♡

*"جُمان"*

قولت أمير لي جمان دي خلت قلبي يرجف عديل من الخوف واتسمرت في مكاني وما قدرت اتحرك، جات سارة قالت لي: اخيرا شرفتي يا ست هانم ما لقيتي ليك سرير وجيتي راجعة الفندق حقنا ده، وقت بتطلعي ما بتكلمي زول مالك ولا نحن ما عاجبنك؟ ما كنت عايزة ارد لانو الوضع متوتر كفاية، أمنة قالت ليو والله يا أمير نحن ما كنا.. كورك فيها ما عايز اسمع منك حاجه وحسابك معاي في البيت امشي انتظريني هناك، ما خلاها تقول ولا نص كلمة تاني وهي طوالي مشت بيتهم وكان ظاهر الخوف عليها، جه وقف قصادي وانا منزلة راسي ولا بعاين ليه حتى بس تلفوني اتصل وكان عماد ما عارفه نسى يقول لي شنو ولا عايز يسلم علي، وقبل ما ارد أمير شال التلفون من يدي وقال ليه اتكلمت معاك براحه وقلت بتفهم لكن طلعت غلطان البت دي ماف ليك طلوع معاها لمن تعقد عليها ده لو وافقت على العقد طبعا غير كده خليك في مكانك وهي في مكانها وطق قفل الخط في وشو، انا زعلت واتحمقت لي يتكلم معاو كده ولي عدم الاحترام ده؟

- انت قايل نفسك منو لمن بتتحكم فيني وتتشرط في خطيبي؟
أمير: اقول زي ما اقول وكلامي ده ما اعيدو تاني قلت ليك ما تطلعي من البيت وحذرتك ما سمعتي الكلام ما شايفه راجل قدامك ولا شنو؟ في البيت ده لو عايزة تقعدي تحترمي الناس القاعدة، ومن يوم الليلة ماف تلفون وماف طلعة من غير أذني، قلعت تلفوني من يدو وقلت ليه: عشان قاعدة في بيتكم بتعمل لي كده صاح؟ ما غلطان انت لكن غلطانه انا الجيتكم لحدي عندكم، دخلت جوا لميت ملابسي كلها ما خليت حاجه وراي وجيت طالعة، قال لي: ماشة وين قلت ليه: جهنم انت مال اهلك جراني من يدي عايز يوقفني قلت ليه: لو فيك ذرة رجولة وحده وبتحسب نفسك مع الرجال فك لي يدي، قال لي: ما بفكها وما بتطلعي من هنا اتصارعت معاو لغايه ما فكيت نفسي ولزيتو على الحيطة وبحمقة الموقف اداني كف حسيت اصابعو انطبعت في وشي...
*💜ابقوا عافيه💜*
*☆عشق'ق☆*
*•••••••••••••••••••••••••••••••••••••••••••••••••••••••••••*
*☆يتبــــــــــــــــــــــــــــــــــــــــــــع☆☆*

*#مُراهقات~ولكن《05》*
*#الجزء~الثاني♡♡*
*#بقلم~ريان~عبدالقادر(عشق"ق)*
*☆ـــــــــــہہہـ٨ـــ٨ــــہہہـ٨ـــ٨ــہہـ٨ــــــــــــ☆*‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‏
‌‌‌‌‌‌‌‌‌‌‌‌‌‌‌‌‏ ‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‏
*"كان كافياً أن تلمس يدي يداك ليذهب عن قلبي كل هذا التعب..لأشعر أن الحياة تفيضُ من كفّيكك ❤️‍🩹"*

*"جُمان"*

نزل الكف على وشي ومن قوتو قربت اقع في الارض، ختيت يدي في خدي وحاسة خدر شدة ما وجعني، عيوني اتملت دموع وجات جارية في لحظتها، عاينت ليه وانا حاسه بقهر ما طبيعي رجع مني خطوات لورا وهو بقول لي انا اسف يا جمان والله ما كنت قاصد لكن انت، وقبل ما يكمل كلامو جه سفيان اداو بنية وبقى بضرب فيه وبقول ليه: انت منو لمن ترفع يدك وتقول بتدقها، ابوها ما رفع يدو في وشها خلي انت، البيت كلو اتلمو فيهم وفكو سفيان من أمير بعد صعوبة وعمتو قالت ليه: كيف تدقو وهو اكبر منك وفي مقام اخوك؟ قال ليها: لمن القى رافع يدو على اختي بكسرها ليه وفايدة كبرو شنو وهو ما عاقل ولا بفهم ما عندو خشم يتكلم بيو معاها، مالا هي حمارة ولا ما بتفهم لمن يتعامل معاها بالضرب ويمين عظيم يا أمير مرة تانية يدك دي تترفع عليها ولو بهظار اكون ود حرام لو ما كسرتها ليك واديتها لي اختها، سارة بقت تشاكل فيني: كلو بسببك اتنين زي الاخوان الوقت كلو مع بعض نهائي ما بتفارقو الليله واحد رفع يدو على التاني، يوم اسود الجيتي خاشه فيو بيتنا ده الله يطلعك منو ومن حياتنا عشان نرتاح منك ومن مشاكلك الما بتخلص، سفيان قال ليها: تقفل خشمها عشان ما تلقى حقها هي برضو، جريت الشنطة حقتي من غير ما اتكلم مع زول وطلعت، لحقني سفيان وقال لي: انتظري ما تمشي قلت ليه: بعد الحصل ده ماف سبب واحد يخليني اقعد، قال لي: خلاص ما تقعدي بس اصبري شوية اخش اجيب لي كم غيار وامشي معاك، قلت ليه: ماف داعي خليك قاعد في بيتكم وانا اصلا ماشة بيتنا يعني ما مكان غريب علي، قال لي: بيت اختي ما محترمة فيو ما بعتبرو بيتي ومحل انت ماشة انا معاك، لمن لقيتو مصر على رأيو ما اتكلمت معاو تاني، قال لي: خشي انتظريني برا ما تقيفي في الشارع، قلت ليه: البيت ده تاني ماف سبب بخليني ادخلو الا الشديد القوي واخيرا لي اقيف في الشارع بكرامتي، دخل جوا وسامعة امو وسارة بتكلمو معاو وما تمش وانت مالك ومالا.. وخليها لو عايزة تقعد في بيتها هي مخيرة..يعني شنو لو أمير دقاها مالو كتلها وهي لو بتسمع الكلام ما كان حصل ده كلو..ركبت سماعتي عشان ما كنت طايقة اسمع منهم اي حاجه..شوية وحسيت بزول وراي اتلفت وكان أمير ما اشتغلت بيو ولا كأنو قاعد،
أمير: جمان اديني فرصة اشرح ليك.
- ما عايزة اسمع منك حاجه.
= والله يا جمان ما كان قصدي في لحظة غضب بدر مني التصرف ده.
- اوكي.
= ما تقولي اوكي ازعلي كوركي ان شاء الله اضربيني لكن ما تسكتي كده.
- ما حعمل اي حاجه من القلتهم دي، لكن يا خسارة خالص ما اتوقعتها منك انت بالذات.
سفيان جه طالع وهو شايل شنطة في ضهرو ومشينا قدر ما حاول أمير يعتذر مني ما سمعتو مشيت بس، اجرنا لينا عربية من الشارع وصلتنا لحد البيت، لكن اول دخلنا السوبر ماركت جبنا لينا كم حاجه كده عشان التلاجة فاضية، عملت ليه سلطة عجور من غير توم ولا فلفل عشان معدتو ما تقوم عليه، وانا عملت لي اندومي كان بعاين لي وبقول: يا خاينه وانا اموت بالضحك واقول ليه: معليش خليك مع اكلك الصحي انا ما بقدر اجري بيك للمستشفيات في الليل ده، بعد اكلنا قال ما عايز ينوم طوالي ما حاسي بالنعس اديتو اللابتوب حقي يحضر افلام وانا دخلت غرفتي اتصلت على عماد لانو لقيت منو كذه مكالمة،
- عمادي.
= بقى فيها ياء ملكية.
- انت ما ملكي يعني ولا كيف؟!
= ماف اعتراض في الحته دي.
- ها عملت شنو؟
= رجعت البيت انجزت لي كم شغلة كده وقلت اشوفك في الاول افتكرتك نمتي.
- ما نمت والله بس التلفون كان بعيد، وجيت راجعة بيتنا عشان كده.
= بيتكم؟ مع منو؟
- مع سفيان.
= خير حصلت حاجه.
- لا خالص بس ما ارتحت في القعدة معاهم هناك.
= لكن قعدتك في البيت براك ما صعبة.
- ممكن تكون صعبة لكن عايزة اجرب اكون مسؤولة من نفسي ولو لشوية وقت.
= فكرة برضو.
- ما زعلانه الا على سفيان المسكينه ده يحليلو حياكل اكل ما شافو ولا سمع بيو قبل كده.

= ضحك اي والله ليه كل المساندة والدعم.
- لكن لو عاينا ليها من وجهة نظر تانية في الوقت ده ممكن اتعلم كتير عشان بعدين عيني ما تنشرط قدام امك.
= لا ما تشغلي بالك الست إلهام طيبة شديد وما بتركز مع الحاجات دي لانو هي برضو لمن اتزوجت المرحوم ابوي ما كانت بتعرف شيء وهو صبر عليها واكل الما بتأكل.
- الله يرحمه ويغفر ليه، شكلك شايل الحنية منو.
= ياريت يااخ ابوي كان احن قلب في الدنيا لي هسي فراقو عامل لينا صدمة وخصوصي لي مهند لانو كان معاو وقت الحادث.
- معليش يا عمدة ممكن تحكي لي الحصل يعني لو ما بزعجك الموضوع.
= لا عادي، المهم يا ستي نحن كنا عيلة سعيدة شديد والحمدلله قمنا بين اب وام متفهمين لأقصى درجة ومليانين حب، ما اتفرض علينا اي شيء وكان دايما بتاخد رأينا في الصغيرة والكبيرة، يعني من زمان وهم بتعاملو معانا كأننا ناس كبار، وكان حاصل حزب في البيت ومنشقين لي اتنين، انا وامي ومهند وابوي ودايما بتحصل بينا مغارز وكده، لمن اطلع مع امي ونغير جو نتغدا برا ولا نشرب جبنة في النيل، ابوي بحرض مهند ويطلعوا سوا وما بجو لاخر الليالي، وفي يوم كان طلعت مع امي ومشينا عرس واحد صحبي وخليناهم في البيت، قالو لينا بنطلع وما بنجي راجعين ضحكنا فيهم ومشينا، زي الساعة عشرة جاتني مكالمة انو ابوي ومهند عملو حادث وهو في المستشفى، ما كنت واعي وما قدرت اكلم امي خليتها و وصيت واحد من اصحابي يوصلها البيت، لمن وصلت كان ابوي اتوفى ومهند دخلوه عملية عندو كسر في اليد ورضوخ وحاجات وقتها ما كنت قادر استوعبها، لحظة موت ابوي كان اسوء وأصعب لحظة مرت علي في حياتي، لمن شفت الجثمان قدامي لأول مرة حيلي يخذلني وما قدرت اقيف، خليت مهند في المستشفى بعد طلعوا من العملية ورجعت البيت، خبر زي ده ما عرفت كيف اوري امي ولا اسلم طريقة ليه شنو، عموما كنت ديك احلك ايام حياتي الله لا عادها، مهند اكتر من شهر حتى خرجوه ومن هول الصدمة شخصيته اتغيرت 180 درجة، بقى انسان تاني ما نفس البعرفو ولا كأنو اخوي، سهر اصدقاء سوء وعمايل كتيرة ما بتشبهو ولا كان بعملها، ولمن كلامي كتر معاو خلى لينا البيت وطلع ما برد على مكالماتنا وما عارفين عنو حاجه، انقطع مننا فترة وبنسأل اصحابو ما عندو تواصل معاهم، تذكري لمن مشينا الكلية ديك في رحلة المدرسة وقلت ليك كنت بفتش عن اخوي، بعدها بزمن اتصل علي وقال لي هو في مصر ودخل مصح عشان يتعالج من الإدمان، الحمدلله ومن الوقت كده وهو متواصل معاي بنتكلم وياهو لمن جه نزل في البيت ورجع يعيش معانا، وفتح لينا موضوع عرس واستقرار وكلام كبير كده وقال عايز يكمل جامعتو ويرجع يفتح المكتب بتاع الحاج ويشغل فيه، وان شاء الله لمن يتوفق نمشي للبت البحبها دي ونتقدم ليها، وامي اكتر وحده كانت متشوقة تعرف دي منو الخلت مهند يرجع لي عقلو ويبطل الكان بعمل فيو ده، لي هسي ما ورانا ليها لكن الا ما يجي اليوم ده ونحن منتظرنو بفارغ الصبر.

لمن خلص كلامو انا ما كنت قادرة ارد عليه من البكى بشهق وكاتمه صوتي عشان ما عايزة يعرفني، لكن هو حسى بي وقال: انا ما حكيت ليك عشان تبكي من يوم حصل الحادث دي اول مرة افتح السيرة دي الليلة وكنت محتاج اتكلم مع زول واطلع المشاعر الكنت كاتمها جواي الوقت داك كلو.
- معليش ما كان قصدي ازعلك تاني بس اتأثرت.
= عادي ولا يهمك، يلا قومي غسلي وشك واشربي ليك موية.
-حاضر خمسه دقايق وبتصل عليك.
قفلت منو عشان ما كنت قادرة اتحمل اكتر كنت حاسة قلبي بتقطع من الوجع، ورجع عقلي مشوش تاني اذا كان مهند عمل ده كلو بسببي وعشان خاطري واذا كان بحبني للدرجة دي انا مفترض اتصرف كيف ولا اعمل شنو؟ بعد فات الأوان لا يمكن ارجع ليه تاني حتى لو كنت عايزة ده بقى مستحيل، قعدت في السرير وانا بحاول اخد نفسي من الكتمة الحاسة بيها والضيق كأنو في صخرة على قلبي، فجأة تلفوني اتصل وكان "محور الكون" ...

*"مُزن"*

بعد اتغدينا هيما قال لي نطلع بالعربية عشان يبدأ يعلمني اسوق وكده، كنت خايفة ومتوترو لبست لي عباية وتحتها بنطلون لي ما عارفه، المهم طلعنا ومشينا ميدان كده بعيد وشبه فاضي نزل وخلاني اقعد محل السواق، كنت خايفة خوف رغم انو شرح لي بعمل شنو مية مرة لكن اول ما ضغطت على دواسة البنزين زحيت يديني وخليت العربية ماشه ساااي، الله ستر بس وما عملنا حادث انا من الخوف نزلت طوالي وقلت ولا بسوق لا شتين وهو ميت من الضحك فيني، وبقى يحنسني عشان اجي احاول تاني غايتو كانت مغامرة مشوقة، رجعنا البيت متأخرين واشترينا عشاء من برا عشان جعنا، وانا بخت فيو شفت الاء رفعت راسها قلت ليها ارح في طقة نضيفة ما ردت علي، قلت معناها لسه نايمه وما استوعبت قلت ليها شنو، شلت البكفينا وختيت ليهم نصيبهم دخلتو جوا الفرن عشان ما لقيت مكان في التلاجة ولو خليتو برا المطبخ فيو فيران واحتمال ياكلو، رجعت البيت اكلنا وكنا جايبين عصير برضو بعدها حضرنا فلم حتى نمنا.

في الصباح وانا بعمل الشاي لي هيما حسيت بطني واجعاني شديد وكانت طامه، استفرغت لمن حسيت نفسي مهبطة وما قادرة اقيف على حيلي، وكمان جاتني حمه هيما فضل معاي وما كان عايز يمشي الشغل، وبعد تعب حتى اقتنع اني كويسة ودي من اعراض الحمل يعني ماف شيء خطير حتى مشى، رقدت وما قدرت اقوم ولا اعمل شيء لي قريب الضهر كده حتى قمت، بعد رتبت البيت قلت امشي اتونس مع حبوبة شوية من الصباح ما مشيت عليها وقبل ما اصل سمعت الاء بتتكلم معاها عني،
الاء: انا ما عارفه شنو قله الادب والدلع الفاضي العايشة فيو ده، عشان استفرغت ترقد وتعمل فيها خلاص عايزة تموت، وامبارح جابو الاكل وكنت صاحية ولا قالت لي تعالي اكلي ولا هاك ضوقي سااي، كما هي زاتها جيعانه اكل شنو البتعمل فيو كده تقول في بيت ابوها ما شافت اكل غايتو جنس جوع.
ستنا: هوووي يابني طلعي البت دي من راسك رايقة عينها ملانة ما بتعمل كلامك ده، وانت بدوري بالاكل شنو ما التلاجه هديك امشي اكلي العايزة.
الاء: ما قصة التلاجة ملانه ولا فاضية يا حبوبة لكن هي لي تعمل حركاتها دي وتتجوعن، وزاتو هي وقت من هسي تعبانه وما بتقدر تعمل حاجه عايزة تقرا كيف؟ هي قايلة الجامعة دي زي الثانوي ولا الاساس وبعدين زاتو قراية مع حمل ما شفتو الا عندها، هي بتقدر تمشي الجامعة وتجي راجعة تنضف بيتها ولا تتحمل مسؤولية حاجه تاني، ولو حصل شيء وجاتنا مناسبة عايزة تتصرف كيف؟ تخلينا نقوم بيها برانا وهي تجري ورا قرايتها؟
ستنا: مو شغلك هي وراجلها مخيرين.
الاء: انا اخوي ده زاتو عندي معاو كلام، كيف يعني يخلي مرتو تمشي الجامعة وعارف هناك البحصل شنو وقصص الاولاد، هسي ضامن لو مشت ما تتكلم معاهم ولا تصاحبهم وهي كمان راسها خفيف ممكن واحد يغشها بكلمتين ونبقى في الكلام الفارغ الما عايزنو زاتو، البضمنو شنو ما تلعب بي وراو؟
ستنا: مو شغلك يابت انقرعي ولسانك ده اقدري عليو بدل ما اقوم اقصو ليك من اصلو واريحك وخلي بت الناس في حالا.
غايتو اتكلمت كتير وحشت راسها لي حبوبة والكلام القالتو شدة ما وجعني حسيت قلبي لمن تقل، لي تقول فيني ده كلو شافت مني شنو؟ وانا ما شافعة ولا عويرة وعارفة مسؤولية الجامعة، ولا جاهلة عشان الاولاد يغشوني وبعرف كويس كيف اتصرف معاهم، مسحت دموعي ودخلت هي طوالي سكتت طلعت الاكل من الفرن وقلت لي حبوبة امبارح جبنا معانا عشاء لكن انتو كنتو نايمين عشان كده خليت ليكم حقكم، واظن كنت صاحية يا الاء لكن ما رديتي علي لمن ناديتك، كنت عايزة اقول ليك يا حبوبة انا ماشه ناس امي واحتمال ابيت هناك مع السلامة، في لحظة قررت امشي ورجعت بيتي شلت لي كم غيار وضربت لي هيما وريتو، قال لي ما تكوني تعبتي اجي اوديك المستشفى؟ قلت ليو ما تعبانه والله لكن اشتقت لي امي عايزة اقعد معاها يومين تلاته وبرجع، حسى انو في حاجه ما طبيعية لكن ما كتر كلامو معاي وخلاني امشي، ما كنت مكلمة امي ولمن شافتني استغربت قالت لي ما يكون اتشاكلتي مع راجلك؟ قلت ليها ما متشاكلين قلت عايزة اقعد معاك بس، خلطت لي عصير وقالت لي لو جيعانه اعمل ليك اكل قلت ليها ما عايزة شيء خليني ارتاح شوية ودخلت الغرفة جوا، كنت محتاجة اقعد مع نفسي عشان افكر واقدر اتصرف لانو كلام الاء ده لو دخل في راس هيما حتبقى لي مشكلة بالجد، انا واثقة فيو ومتأكدة انو ما بصدق الكلام ده عني لكن برضو تكرار الحكايات حيترسخ في ذهنو لو ما عايز غصب عنو.

*"جُمان"*

سرت قشعريرة في جسمي لمن قريت الاسم المضوي شاشة التلفون "محور الكون" الوقت ده كلو وانا ما غيرت الاسم ولا حتى مسحتو كنت عايشة على اني لو ما اتجاوزت الرهبة البحس بيها كل ما امر بيه معناها لسه عندي مشاعر تجاهو، ايوا انا ما بحبو ولا يمكن ارجع احبو لكن برضو ما بقدر انسى وهو كان اول حاجات كتيرة في حياتي، اول مشاعر حلوة جديدة غربية ما عشتها الا معاه، اول انسان يخليني احس اني طايرة من الفرح لما نكون سوا، في الوقت الكان بتعافى بحبي ليه كان بأذيني لانو حبه كان مرهق مؤذي مدمر ما خلى جواي ولا فرصة تخليني اقدر اسامحو ولا اغفر ليه، مهما وصلت درجة حبه لي ما قدر الألم العشتو في بعدو واللي ما ممكن اسمح ليه يتكرر من جديد، لو في حاجه اتعلمتها من الحصل انو السابك مرة ح يسيبك الف، والغزا السكين في قلبك ما تتوقع يجي يوم يسحبها ويداويك.

رديت عليه في المكالمة التالتة بعد اخدت نفس عميق عشان اقدر اتكلم معاه بهداوة ورواق من غير ما يحس بشيء،
- نعم، عايز شنو؟
مهند: جمان انا تعبان.
- في يدي شنو اعمله ليك؟!
= انا ما قادر اتحمل البحصل قدامي ده.
- ما قادر تتحمل شنو بالضبط؟!
= ما قادرة اشوفك مع اخوي، ما عايز اشوفكم سوا انت ما متخيلة البحصل لي لمن تكونو قدامي.

- حاول تتعود لانك مضطر تشوفنا، في يوما ما حنكون سوا وايدي في ايدو.
= لو انت بتعملي كده عشان تعاقبيني عايز اوريك انو طريقتك غلط وبالشكل ده نحن التلاتة خسرانين.
- لا انت بجد حاسب نفسك محور الكون، مهند انت ما محور حياتي وما اي تصرف ببدر مني بخصك ولا بمت ليك بصلة، عندي تفكيري الخاص وعلاقاتي العايزة احافظ عليها بعيدا عنك، واكرر ليك تاني عمري ما فكرت انتقم منك بالطريقة ولا كان بخطر ببالي انو القدر يكون خاتي لي اخوك عوض عن الانت عملتو فيني، وانا لا يمكن افرط فيه بسببك ومن الاحسن لينا الاتنين ننسى الحصل ولا كأنو حصل.
= انسى الحصل كيف يعني؟
اطلع قلبي اجدعوا؟
ولا افقد الذاكرة؟
ولا اعمل شنو بالضبط عشان انسى؟
لو بتعرفي زر بعد ما تضغط عليه بتنسى وريني.
- ما عارفة يا مهند اتصرف زي ما انا نسيت انت زاتك تنسى وتكمل حياتك، بس المرة دي لمن تحب بت اياك تخليك تعيش الشعور العيشتني ليه لانو مُر وامر من الحنضل.
= والله يا جمان انا ما كنت عايز يحصل كده، اقسم بالله من خوفي عليك وخوفي من مواجهتك وخوفي من مستقبل انت ما فيه هربت، اي جريت وخليتك من غير ما اقول ولا كلمة لكن لو كنت قلت ليك الكان حاصل كان عاينتي لي تاني؟ ولا يمكن تسامحيني، اسف اني اخترت اسلم طريقة بالنسبة لي واسفة اذا اختياري ده هو الخلاك تتوجعي وتتألمي.
- اسف؟!
اتأخرت شديد على الإعتذار، على العموم من الافضل تنسى وياريت ما تتصل علي تاني لانو ما عندي كلام اقولو ليك، فصلت منه الخط قبل ما اسمع رده وحذفت رقمه ومحور الكون اتمسح للأبد، ياريتك لو كنت جيت في وقت ابدر من كده يمكن كان وقتها قلبي قدر يغفر ليك لكن بعد كل الفات ده ولا تحلم.

*"صباحاً"*
*"مُزن"*

" اللهم عافني في بدني ، اللهم عافني في سمعي ، اللهم عافني في بصري ، لا إله إلا أنت . اللهم إني أعوذ بك من الكفر ، و الفقر ، و أعوذ بك من عذاب القبر ، لا إله إلا أنت"

صحيت مرتاحة وحاسة بطاقة كده حلوة شديد، دخلت المطبخ عملت لي شاي لبن ولقيت في باسطة في التلاجة شلت لي منها كم قطعة ورجعت غرفتي، بعد استخرت امبارح اظن لي قراري صاح وبإذن الله اتوفقت فيه، سمعت صوت الباب قلت اتفضل جه داخل عمو سيد وكان شايل صينية في يدو فيها سرمس شاي وكبايتين وجايب باقي الباسطه،
سيد: الله الناس عملت خيانه ولا شنو؟ وانا قلت اجي اغنج معاك ونشرب شاي سوا قبل ما امك تصحى.
ضحكت وقلت ليه: والله لو كنت عارفه بتعمل كده ما قمت سويت الشاي.
= يا زولة اسي ما حصل شيء اشربي تاني ولدي ده ما عايزو يجي ناقص ولا ضعيف.
- حاضر.
قعد يتونس معاي ويضحك فيني ويحكي لي في قصص، يمكن من وقت عرسهم هو وامي دي اول مرة نقعد فيها مع بعض برانا ونتونس، بالجد هو ظريف شديد وانسان هادي ورايق كلامو موزون وبعرف يقول شنو وفي ياتو وقت، لمن امي صحت جات لقينا لسه في قعدتنا و ونستنا،
انتصار: خيانات عظمى.
سيد: النايم حقو في كراعو، وضحكنا عليها.
انتصار: ايوا كويس شوفو الليلة البعمل ليكم فطور منو.
سيد: يابت انت صدقتي معقولة لكن انت لو ما اكلت انا بتتهضم لي لقمة، تعالي هنا جمبي.
لمن عاينت ليو لقيتو بغمز لي نظام كده بتتحنك وفعلا جات قعدت زي الما حصل شيء وشربت الشاي وهو بكسر ليها في التلج، ومن وقت طويل اشوف امي بتضحك من قلبها وهي مبسوطة بجد يارب احفظها لي وما اشوف فيها اي شر.

ضربت لي هيما صبحت عليو وقلت ليو يجيني عشان عايزة اتكلم معاو في موضوع ضروري، حاول يعرف مني الحاصل شنو لكن ابيت اوريو، وكلمت امي انو ماشة بيتي عمو سيد قال لي زهجتي مننا بالسرعة دي؟ قلت ليو ما زهج والله لكن جيت عشان اشتقت ليكم وقلت اشوفكم كيف وهسي راجعة، حنسوني عشان اقعد قلت ليهم بجيكم تاني وده وعد مني، هيما جه سلم عليهم وقعد مسافة تاني مشينا، كان ظاهر عليه التوتر مسكت ايدو وقلت ليو انت كويس؟
هيما: انا كويس انت الكيف؟
- الحمدلله بقيت احسن شديد.
= وعايزة نتكلم في ياتو موضوع.
- خلينا لمن نقعد في مكان هادي ولا وقف العربية هنا.
وقف العربية طرف الشارع وبقى مقبل علي، عاينت ليه مسافه وقلت: انا سمعت كلام كتير من الاء واغلبو ما فيني وعشان ما قالتو قدامي ما اتكلمت معاها، لكن الحصل ده زعلني منها شديد وملى قلبي ما عارفة بتجيب الافكار دي من وين لكن الله يهديها وعشان اكسر الشر وما تلقى طريقة تاني تبهتني بيها انا عايزة اتنقب، وما تفكر انو بس هي السبب لا من زمان الفكرة دي في بالي وشايفة هسي الوقت مناسب، اصلا بحب النقاب والمنقبات واذا انت ما عندك اعتراض نمشي السوق نشتريهم وان شاء الله اكون متنقبة، كان بعاين لي مسافة تاني اخد نفس ومسح وشو قال لي ده الموضوع يعني؟ قلت ليو اي انت قايل شنو يعني؟ قال لي لا ولا شيء لكن ما اتوقعت، المهم كلامك حلو شديد والله وطالما انت مقتنعة انا ما بعارضك، نمشي طوالي ونشتري ليك النقابات العايزاها كلها المهم انت تكوني مبسوطة♡

*"جُمان"*

كنت في المطبخ بعمل لينا شاي الصباح وكالعادة طلع تقيل الا عملت واحد جديد، انا لو اعرف بس اول مرة بجي تقيل لشنو كان ارتحت، جرس الباب رنه وسفيان كان لسه نايمه مشيت فتحت لقيت أمير ومعاه أمنة، ما عاينت ليه خالص قلت ليهم: اتفضلو ورجعت المطبخ، جبت ليم موية وعصير وكنت بعاين لي اضافر يدي بقو طوال ومحتاجين قص،
أمنة: طيب لو انت زعلانه منو انا ذنبي شنو؟
- ما عندك ذنب خالص.
أمنة: اضحكي لي اتونسي معاي قولي اي حاجه.
- معليش يا امون ما رايقة بس.
أمير: عارف بسببي وعارف نفسي غلطان ومستعد اعمل اي حاجه عشان تسامحيني.
- انا قلت ليك كلامي من لما كنا في بيتكم ما تتوقع انسى انك رفعت يدك في وشي.
= والله غصباً عني وفي لحظة غضب.
- طيب.
= شنو هو الطيب؟
- اقول ليك شنو يعني ما خلاص القصة دي انتهت ولو عايز تتكلم فيها اكتر ياريت تتفضل عشان انا ما عندي أخلاق اتحمل زيادة، لمن ما لقى كلام يقولو قام سكت وتاني جرس الباب رن مشيت افتح كان عماد وشايل معاه كمية من الاكياس قال لي: صباح الخير يا عنب، فجأة جه أمير وقف قدامو وعيونو بتطلع شرار وقال ليه: انت جاي هنا تعمل شنو؟!
*💜ابقوا عافيه💜*
*☆عشق'ق☆*
*•••••••••••••••••••••••••••••••••••••••••••••••••••••••••••*
*☆يتبــــــــــــــــــــــــــــــــــــــــــــع☆☆*

*#مُراهقات~ولكن《06》*
*#الجزء~الثاني♡♡*
*#بقلم~ريان~عبدالقادر(عشق"ق)*
*☆ـــــــــــہہہـ٨ـــ٨ــــہہہـ٨ـــ٨ــہہـ٨ــــــــــــ☆*‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‏
‌‌‌‌‌‌‌‌‌‌‌‌‌‌‌‌‏ ‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‏ ‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‌‌‏ ‌‌‌‌‌‌‌‌‌‌‌‌‌‌‏
*"if life is a* *book‚ meeting you was my favorite chapter❤️🌏"*

*"إذا كنت كتاب، فإن لقائي بك كان فصلي المفضل"*

*"جُمان"*

لمن سمعت صوت أمير والطريقة البتكلم بيها مع عماد خفت يحصل بينهم اكشن وخصوصي انو عماد ما لازم يعرف السبب الرجعني البيت بالطريقة دي، فطوالي حاولت أتدخل عشان ألطف الجو واهدي شوية،
- مالك يا أمير؟ انا طلبت منو حاجات وهو جابها لي.
أمير: تطلبي منو لي بقى من باقي اهلك؟
عماد: على ما اعتقد انا خطيبها ويحق ليها تطلب مني كل العايزة.
أمير: خطيبها دي هناك عندكم انتو نحن ما عندنا بنات بتشحد ليها غربة الا اذا كانت عينها فاضية وما شبعت في بيت ابوها.
- انا يا أمير؟!
أمير: ده الشايفو قدامي.
أمنة: أمير ماف داعي للكلام البتقولو ده نحن جينا نحلها ما نعقدها.
أمير: كويس جينا عشان نشوف المقابلات البتحصل في السر دي.
- بجد يا أمير انت بقيت تزودها شديد، وانا ما غالبني ما ارد ليك لكن شوية الاحترام المخلياهم عشان اقدر اشوفك لسه ود عمتي من الافضل تخليني محتفظة بيه عشان لو انتهى تاني ماف شيء بلمنا.
أمنة: خلاص خشو جوا وماف داعي للحساسيات ما بحب جو التوتر ده.
أمير: انت مش مرسل خت مرسالك ولف ارجع.
عماد: معاي انا؟
أمير: لا مع الحيطة الوراك.
- اياك يا أمير ما بسمح ليك تتكلم مع خطيبي كده وفي قدامي، لو ما عايز تحترمو ما تتكلم معاه من الاساس.
عماد: خليه براحته.
- لا ما ياخد راحته يتكلم معاك بأدب ولا يسكت.
أمير: انا اتكلم بأدب ولا اسكت؟ كويس يا جمان ان شاء الله يضوي ليك.
- مضوي زي القمرا.
مشى وهو بعاين لي ونظراتو كانت كلها حقد وغل، كنت واقفة مخلوعة معقولة ده أمير القال بحبني؟ اذا دي تصرفاتو وهو بحبني كيف اذا كان لا؟ استغفرت ودخلنا جوا عماد سلم على سفيان الكان ياداب صحى من النوم وكويس ما حضر الاكشن الحصل ده، ختيت ليهم الشاي وكنت يشوف في الاكياس شنو لقيتو جايب طقم سراويس كلها اكل، قال لي: امي عرفت انك جيتي البيت وقاعدة كم يوم وقالت تعمل ليك اكل عشان ما تتعذبي في الطبيخ ولا ما بتاكلو بايت؟
سفيان: نحن زي الارضى لو لقينا الحجر بنلوكو.
غايتو ضحكنا فيو ضحك قلت ليها طيب بما انك هنا تفطر معانا الاول حتى تمشي، دخلت مع أمنة المطبخ وكنا بنجهز فيو،
أمنة: انت زعلانه مني؟
- ماف سبب يخليني ازعل منك يا أمون، عايزاك تعفي لي لاني خليتك تمشي معاي.
+ اه يابت ما تشتغلي بالموضوع كتير شكله وراحت دمعة وساحت.
- ده شنو يا طفلة.
+ لكن والله دي ما حركات أمير انا بعرف اخوي كويس عمرو ما بقول كده ولا بتصرف كده.
- لو منو ولا من غيرو في النهاية التصرفات دي طلعت بإرادتو.
+ اكيد دي سارة بت اللذينة بتكون هي البتحرش فيو ضدك عشان ما عايزة يكون قريب منك.
- وللاسف نجحت لانو بعد كده أمير لو لقى مني سلام فهو محظوظ.
+ انت كمان ما تعملي كده وتوصليها لي مرادها.
- والله يا أمون انا ما برضى زول يعاملني بالطريقة دي واخوك اتخطى حدودو.
+ اي انا عارفه وهو ندمان سافي التراب.
- اعمل بندمو شنو في الحالة دي؟
+ خلاص نقفل السيرة عشان ما نتشاكل نحن برضو، اعمل السلطة بدكوة ولا زيت؟
- ما عارفه دقيقة اسألهم بحبوها كيف، طلعت برا لقيتهم بتونسو وبحكو في شنو ما عارفه لانو صوتهم كان واطي، قلت ليهم: سلطة بدكوة ولا سااي؟ سفيان قال لي: لو بطين بناكل انت جيبيها ضحكت وقلت ليه: انت اصبحت مهوي شديد البركة في عماد كان مت لي من الجوع على بال ما اجهز لينا شيء، ظبطنا السفر وعملت لينا عصير كمان واخر روقة، وكمان بعد الفطور شاي بنعناع حسيت نفسي بقيت ست بيت ومتحملة المسؤولية، نزلت تحت مع عماد عشان اودعو طلع لي علبة من العربية وقال:
I want more months, years and memories with u<3🦋♥️

"أريد المزيد من الشهور، السنوات والذكريات معكِ"

- يا لهوي على اللطافة.
= يلهوي على جمالك وانت بتضحكي.
- هو في سبب بضحكني غير وجودك معاي.
= الله يخليني ليك.
- امين بحجم السماوات والأرض.
= ما نستغنى لكن وراي شغل.

- اقيف خمسة دقايق تاني.
= عايزة تقولي حاجه؟
- عايزة اشوف عيونك لاني ما بشبع من شوفتها.
= يلهوي يا عيال كبير كده وفصلت.
- احلى من يفصل في الوجود.
= قلبي الصغير لا يتحمل.
- بتحمل بتحمل انت بس خليك في محلك، كان واقف قصادي ومداري الشمس مني بعاين في عيونو قربت احفظ عدد رموشو وضحكتو لما عيني تجي في عينو،
= بالطريقة دي لا انا بمش ولا انت.
- ما تخلينا واقفين نحن ورانا حاجه؟
= وراي شغل بسببو بخليك معاي مدى العمر.
- طب مدام كده امشي ربنا يسهل عليك.
= امين يارب انت كتري من الدعوات دي.
- حاضر.
= يحضر ليك كل خير♡

"مُزن"

هيما فرح اني عايزة اتنقب وده خلاني مرتاحه ما عارفه لي كنت خايفة ما يوافق، لكن حصل العكس وايد الفكرة وطالما انا عايزة كده وحكون مرتاحة هو ما عندو مشكلة، مشينا محل متخصص في بيع النقاب بجميع انواعو عادي ماليزي تركي، كنت بختار الوان هادية رمادي اسود بني سماوي لكن هيما اختار لي كم واحد كده حلوات عديل قال عشان لو طالعين اكون قاشرة، غايتو هيما ده عسل خلاص لمن جينا ندفع اتخلع بالفاتورة وهمس لي السترة مالا بقت غالية كده؟ والله قربت اقع من الضحك ناس المحل الا بقى يتفرجو فينا، ولحد ما وصلنا البيت وهو بقول الناس دي صعبو الحكاية معقولة لكن دي كلها قروش سترة، قلت ليو ما ديل رعاة الفساد يغلو اللبس الساتر ويرخصو المفضوح هسي بالقروش دي لو مشيت السوق تشتري اسكرتيات وبناطلين ما ليهم حد، قال لي الله يعين الجيل الجاي ده والله لو ما بقى واعي مشكلة، قلت ليو الواحد لو ختت في بالها انو ربنا شايفها وعالم بكل تصرف بطلع منها ما بتعمل الا ما يرضيه، والواحدة فينا ما عارفه بتموت متين واي تصرف منها حيكون البتطلع بيه من الدنيا الله يرزقنا حسن الخاتمة، قال لي امين يارب الله يكملك بعقلك ويرزقك زيادة في الفهم، قبل ما ننزل شلت نقاب لبستو وقلت ليو ما تتكلم خلينا نخش كده، اول ما دخلنا لقينا حبوبة والاء ومعاهم ولاء في الحوش،
الاء: دي منو النينجا المعاك دي؟
هيما: زوجتي وقرة عيني البتاخد بيدي الى الجنة.
الاء: والله دي قرة عين دي.
مشيت سلمت عليهم وقلت السلام عليكن اخواتي في الله، كيف حالكن وكيف امضيتن نهاركن؟ ولاء دي اتقعت بالضحك وقالت لي اوعك تعملي كده بتجري الناس منك بقولو ملبوسة، بقيت اضحك انا زاتي وقلت ليها ما الناس متخيلة انو اي بت لابسة نقاب معناها بتتكلم عربي فصحى، حبوبة قالت لي زين عملك يابتي زين وسمح،
الاء: سماحتو شنو هسي هي بتقدر عليو ولا شوبار منها، النقاب ده مسؤولية ما القطعة الخاتها في وشك ده وخلاص.
- انا عارفه ولو ما قدرو ما بتنقب.
الاء: كتار البلبسو وفي الاخر بخلو.
ولاء: بدل كلامك ده ادعي ليها ربنا يثبتها، قالت ان شاء الله ولوت خشمها ما ركزت معاها قعدت اتونس مع حبوبة وهيما رجع الشغل.

"جُمان"

لمن طلعت فوق لقيت أمون لمت العدة وبدت تغسل فيها،
- شجاعة ألف.
أمنة: بكره منظر العدة وهي ما مغسلة.
- انا بكره العدة اساسا ياريت لو الناس تاكل في ورق وتريح نفسها.
+ اريتو قتل الله مخترع العدة.
- لا يابت استغفري.
+ استغفر الله العظيم واتوب اليه.
- هاا مخططاتك شنو لليوم؟
+ والله ماف شيء في بالي لكن ما عايزة اقعد في البيت.
- ولا حتى انا والله محتاجه اطلع اغير جو.
+ نمشي توتي؟
- توتي شنو يابت، نمشي كافي في شارع المؤسسة نشرب ايس كوفي وندلع نفسنا.
+ جنك كافيهات.
- حلمي افتح كافي يكون على البحر فيه طاولات محدودة ومتوزعة بطريقة مميزة بتحفظ الخصوصية، يكون المنيو مميز وفيه كل المشروبات البحبها، اصمم ديكوره بنفسي واشتغل على كل تفصيلة فيه.
+ حلمك حلو والله، انا نفسي افتح ميتم للاطفال يكون كبير وفيه سراير كتيرة، عندهم غرفة للالعاب واكل يكفيهم عشان لو جاعو ياكلو تاني، اعمل ليهم برامج كتيرة واجيب ليهم اساتذة يعلموهم، نفسي اطلع جيل سوي نفسياً واعمل ندوات توعية انو ما يعايروهم بحاجه هم ما ليهم يد فيها، نفسي في حاجات كتيرة يااخ.
- حلمك انساني ونبيل جدنن.
+ بإذن الله ما بتخلى عنو الا يتحقق.
- ربنا يوفقك.
+ هاا بنطلع متين؟
- اكلم سفيان اول ونشوف وقت نطلع لكن ما هسي عشان الشمس حارة.
+ بالجد الليله الجو حار شديد.
- حر الدنيا هين ربنا يقينا حر جهنم.
+ اللهم امين يارب.

بعد صلينا المغرب كل واحد فينا دخل يجهز اخترت لي عباية بيضاء خليجية مشغولة بالفضي وكذلك الطقم بتاعها، كنت لامه شعري كعكة وعملت ايلاينر بعد رسمت حواجبي وعملت قلوس، جهزت اول وحده فيهم وقعدت ربع ساعة منتظراهم أمون طلعت وسفيان لسه،
- سيفو انت بتعمل في شنو لحد هسي؟!
سفيان: الزول ما يطلع انيق يعني؟ ده حسد منك على فكرة.
- معقولة لكن اناقتك تاخد الوقت ده كلو بنجي راجعين متين يعني؟

سفيان: على راحتنا ماف زول واقف في راسنا.
المهم مشينا الكافي ده وكان رهيب شديد اكتر من الوصف بمراحل شفتو وكأنو كافي احلامي، بقيت بصور كل جزء فيه حتى مشيت اتكلمت مع واحدة من الويترز وسألتها لو بتعرف منو العمل ليهم الديكور قالت ما عندها علم، لمن رجعت لقيت عماد ومهند قاعدين مع سفيان وأمنة للحظة كنت قايلة نفسي بحلم، حتى وقفت مسافة استوعب وبعدها سلمت عليهم،
- صدفة ولا متفقين.
عماد: بين هذا وذاك.
مهند: ما عجبتك السبرايز.
- لا معقولة فرحت شديد اني شفت عمدة.
جرا لي الكرسي وقعدت جمبو كان بعاين لي وقرب همس في اذني " الأبيض يليق بكِ" بقيت اضحك وقلت ليه: جد؟ قال لي: جد جدا قلت ليه: حتى انت الرمادي لايق عليك، قال: ما لازم عشان نقيف جمب قمر زيك نتعب على نفسنا، ضحكت تاني وقلت ليه: القمر ما هو إلا انعكاس لضوء الشمس عليه، قحى وقال: يا لطيف ألطف كنا بنتكلم مع بعض ولا دايرين بالبحصل حوالينا لحد ما سفيان قال: انتو جايين تعملو تكتلات مع بعض وتخلوني براي؟ انا زاتي قايم، وفعلا قام شال تلفونو الكان بتصل رده عليه وبعد دقيقة كده جات خاشة بت عسل ياها الشافها في العرس زاتو ومعاها صحبتها،
- اتاري اتأخر وهو بجهز كان عارف نفسو عندو موعد وبستعد ليه.
أمنة: عرفتو ليك من ما اتأخر ناوي على حاجه.
- البت دي ما هينة لكن من عرس سيف شافها هناك ولي هسي معلقة فيها.
أمنة: احلى حب حب النظرة الأولى.
- ما مقتنعة انو في حب زي ده.
عماد: لي؟
- اول نظرة بتكون اعجاب او انجاذب لحاجه بتشدك للشخصية القدامك، لكن الحب ده محتاج جهد وتعب حتى تحس بيه.
مهند: بتحصل مرة بين كل مليون محظوظ بلقى انسانة ملفتة مميزة خاطفة للانظار بتخلي من نظرة وحده متيم بيها.
أمنة: شكلو في وحده خطفت قلبك بنظرة منها.
مهند: حصل والله ولي هسي ما رجعتو.
عماد: نحن لو عرفنا دي منو بنمشي لي نص بيتهم لو ابو يدونا ليها بنشيلا رجالة.
أمنة: انتو صعبين والله.
عماد: العملت في اخوي كده ما هينة.
جه الويترز عشان ينزل لينا الطلبات سأل اسموزي الفراولة حق منو فجأة مهند قال: جمان بتحبو وحلت لحظة صمت وحسيت الجو اتكهرب ولمن بقيت ببلع في ريقي من التوتر، هو لي اتكلم ما كان واعي ولا طلعت منو بشكل عفوي ولا هو كان قاصد؟ كل الأسئلة دي بقت تدور في راسي وما عارفه ليها إجابة،
أمنة: وانت عرفت كيف؟
مهند: سمعتها لمن كانت بتطلب.
أمنة: ايوا انتباهك عالي ما شاء الله.
ما قدرت اتكلم تاني كنت شايلة العصير في يدي وبعاين لمكان بعيد، لفتتني أمون لانو كانت بتصور فينا لزوم الذكرى وكده،
عماد: انت كويسة؟
- اممم، ليه السؤال.
= عايز اطمن عليك.
- كويسة الحمدلله.
= لو في يدي حاجه بقدر اعملها عشانك قولي لي.
- تعمل شنو اكتر من كده؟
= ما عارف اي شيء ممكن يسعدك.
- خليني اعاين ليك في عيونك بس.
= كده انا بفصل.
- احلى من يفصل في التاريخ.

"أمون"

اول مرة اشوف لي ولد ويعجبني للدرجة دي من يوم الخطوبة وانا بفكر فيو، لونو حلو ما بين السمار والصفار ولا طويل ولا قصير، ما معضل لكن جسمو متماسك عندو لحية صغيرة لكن حلوة وبرضو حلاقتو شبابية لكن ما حقت الشماسة، صوتو هادي ورايق وبتكلم بعد يفكر سبحان الله معقولة في زول عامل كده، ظريف وناس بعرف يتكلم مع الناس ويخليهم مرتاحين في التعامل معاو، لمن مشينا بيتهم ما حسيت انو ديل ناس غربة مني حتى امو كانت طيبة وعاملتنا كويس، لو محظوظة بعرس ولدها وتبقى لي نسيبة السرور والخاطر المجبور.

"جمان"

قعدنا قريب ساعتين كده وقمنا عشان نرجع البيت وعماد اصر الا يوصلنا حتى يمشي وسفيان قال اخير نمشي معاو لانو احتمال ما نلقى عربية ولا كده، المهم وصلنا البيت ودعناه تحت ولمن طلعنا لقينا أمير منتظرنا قدام البيت، ما سألتو واقف بعمل في شنو ولا لو عايز حاجه فتحت الباب دخلت وخليتو واقف، قال ليهم: لمو حاجاتكم سرعة راجعين البيت،
أمنة: كلنا؟
أمير: اي كلكم.
سفيان: انا قاعد هنا ما راجع.
أمير: ما على كيفك تخش تلم ملابسك وتنزل تنتظرني في العربية.
سفيان: غصب هو؟
أمير: دي الطريقة البتنفع معاكم وبتفهمو بيها.
كنت قاعدة في الكرسي وماسكه تلفوني ولا شغالة بيو ولا كأنو بتكلم معاي، جرا التلفون من يدي وقال: الكلام ده ليك برضو،
- رجع لي تلفوني وانا من بيتنا ما متحركة شبر.
أمير: ما اعيد كلامي تاني خشي لمي هدومك عشان ماشين.
- وانا قلت ليك ما ماشه بتسمع ولا طرشت؟
أمير: جمان لا إله إلا الله محمد رسول الله لمي حاجاتك بدل ما اتصرف معاك تصرف ما بعجبك.
- لي عايزة تضربي تاني ولا شنو؟ جرب اديني كف في الخد ده عشان المرة الفاتت ما اضرب، سكت وبعدها ما قال ولا كلمة وانا قلعت تلفوني وقعدت في مكاني.
أمنة: يعني هسي ماشين ولا قاعدين؟
أمير: اعملو العايزنو انا تاني ما شغلتي فيكم.
- وده الكان مطلوب منك من البداية.

*"بعد عدة أيام"*
*"مُزن"*

النقاب حلو لكن مرات بحس نفسي اتسرعت في القرار وقتها بستغفر وبقول دي وسوسة شيطان، الطلعة بقت ما زي زمان باخد وقت لغايه ما البسو واظبطو عشان ما يتفكى لي في الشارع ولا يتخرب، ولو اتخرب بزهج شديد لانو ربطو ما هين وكل ما يجي في بالي اقلعو بتذكر كلام امي والاء، امي نهائي ما كانت موافقة اتنقب لي وانا لسه بت صغيرة وعروس في بداية حياتي، لي اكتم نفسي والبس المخمخم ما استمتع زي كل الفي عمري، بعذرهم لانو ما حسو بي لمن اجي ماشع في الشارع والأولاد يزحو لي من الطريق، ولا هالة الفرح الجواي لمن اكون مغطية نفسي في زمن التكشف بقى اسهل شي، كل ما اتذكر كلامها بفكؤ كده و وقتها ما بأثر معاي بالعكس بخليني اثق في قراري والتزم بيه اكتر، حتى جمان وهيما دعموني فيو وجوجو كانت اكتر وحده فرحانه لي ودايما بتقول لي ادعي ليها ربنا يهديها وفي يوم تتحجب وبعدها تتنقب، الشوق واللهفة الكانت بتحكي بيها وبتطلب مني ادعي بيها خلتني متأكدة انها في يوم من الايام ح يجي وهي بذات نفسها تمشي تشتري النقاب وتبقى وحده من اميراتو♡

"جُمان"

غصبا عني رجعت معاهم البيت وبس عشان خاطر بابا لانو ما عايزة يزعل مني وهو في حالة مرض، لكن خالص ما ضحكت معاهم المرة دي ولا رجعت اتعامل زي الاول، لاني ما نسيت كلامهم معاي ولا الطريقة العاملوني بيها وكيف كانو موافقين على تصرف أمير معاي رغم انو لو كان حصل مع سارة متأكدة ما بدو نفس ردت الفعل، كنت فاصلة حياتي عنهم خالص بكون قاعدة في غرفتي فقط لما يجي وقت الاكل بطلع الدكان بشتري اي شيء وبرجع، ومرات سفيان بكون جايب لي معاه اكل من برا وكل ما يشوفو داخل بيه لي بشاكلو، كلمتو الف مرة ماف داعي تجيبو ويخصل نقاشات بقول لي: انت ما خصك خليهم يتكلمو لمن يزهجو انا بعمل البرضي ضميري، مرات كتيرة بحس سفيان ابوي واخوي الكبير ما الصغير، كمية الحب البظهرها لي وبعاملني بيها بتخليني طايرة من الفرح، وهو من الناس البحسبهم حسنات في حياتي وبشكر ربنا عليها وبدعي يديمها لي، وطبعا من جيت أمير ما لمحني ولا نص مرة لما يكون قاعد بقفل غرفتي علي وما بطلع الا بعد اتأكد انو مشى الشغل، حاول كذه مرة يتكلم معاي لكن ما اديتو فرصة لا واتس ولا حتى فيس تو فيس، يحليلها امون هي التعبانه بينا هو يرسلها لي عشان توصل كلامو وانا ارجع ليه كلامي عن طريقها بقت زي الحمام الزاجل، لمن زهجت مننا قالت لينا: لو عايزين ما تتصالحوا لكن خلوني في حالي ما شغالة ببنزين ولا كهربة فترت منكم انا، واستمر الحال كده وخالص ما كنت حابه اصالح أمير عشان يعرف انو بتصرفو ده خرب مكانتو عندي ولا يمكن ترجع زي أول.

حوالي الساعة 11وتلت اتصل علي عماد كان معودني يتصل ابكر من كده لكن شكلو الليلة كان مشغول،
- حبيبي الما فاضي لي اساساً.
عماد: لو بيدي وقتي كلو اخليه ليك لكن مشاغل الدنيا.
- كنت بتعمل في شنو؟
= تصحيح اديتهم اختبار وكنت براجع في الاجوبة عشان اعرف الشيء المفهوم من المبهم.
- بالله عليك خليك عاقل ما تظلم وحده عشان نست الإجابة وتنقص منها تلاته درجات.
= ياااه انت لسه شايلة في قلبك؟!
- ما بنسى والله لانو اليوم داك نبذتك نبذ السنين.
= من يومك لسانك طويل.
- اصلا، انا مشتاقة ليك على فكرة.
= ما اكتر مني والله.
- اها والعمل.
= بكرة مشغول من الصباح ما عندي وقت الا العصر بتقدري تطلعي؟
- اكيد بظبطها واديك تلفون.
= لكن لو بتحصل مشاكل بلاش منها ما عايزك تقلقي ولا تتوتري.
- بقلق واتوتر لما ما اشوفك اما الباقي ما تشغل بالك بيه.
= في الحالة دي اتفقنا بكرة موعدنا.

*"صباحاً"*
*"مُزن"*

" اللهم إني أسألك العفو و العافية في الدنيا و الأخره ، اللهم إني أسألك العفو و العافية ، في ديني و دنياي و أهلي ، و مالي ، اللهم استر عوراتي ، و آمن روعاتي ، اللهم احفظني من بين يدي ، و من خلفي ، و عن يميني ، و عن شمالي ، و من فوقي ، و أعوذ بعظمتك إن أغتال من تحتي "

من صياح الديك طلعت مع هيما عشان نمشي نطلع رخصتي بعد تعب حتى اتعلمت السواق ولازم اخضع لاختبار اول حتى بعد داك اشيلها، كنت متوترة لاخر حده والوقت كلو هيما يهدي فيني ويقولي ادعي واستغفري وختي الرحمان في قلبك وبإذن الله بتقدري، اتوكلت على الله ومشيت وكنت بعمل زي ما الاستاذ طلب مني كلو مرا بسلاسة الا اخر شيء لمن جيت ارجع حركة ورا ما عرفت الا بعد زمن، اتوقعت اني فشلت وملامح وشي حكت لي هيما الحاصل وهو بقى يواسي فيني، لكن سبحان الله ربنا شافني والاستاذ اداني علامة كويسة وبكده بقدر اطلع الرخصة، والله فرحت فرح قربت ارقص عديل لو ما الخجل الحمدلله يارب.

*"جُمان"*

عصريات كده كنت بلبس في فستان جابتو لي أمون هدية وكان حلو شديد، طقمت معاه جزمة بالابيض عالية وفيها كعب وكم اكسسرز مع الشنطة والطرحة، لمن جيت طالعة بس قلت لي سفيان وامون محل ماشة ما اشتغلت بالباقي، لقتني سارة المترصدة قالت لي: ماشة وين ان شاء الله طلعاتك الما بتخلص دي؟ نزلت القلازس عاينت ليها من فوق لي تحت رجعتها لمكانه ومشيت من غير