《踢爆東張西望廣告造假❓》

▌懶人包
近日有疑似判頭喺Facebook招募臨時演員，叫佢哋喺《#東張西望》假扮廣告產品用家，本團隊追查咗一個半月，發現的確有類似廣告喺《東張》播出，因此本團隊相信《東張西望》及其贊助商【#森下仁丹】、【#Return回本】有造假及誤導觀眾之嫌，甚至違反《#商品說明條例》，我哋呼籲有關當局、大眾媒體及讀者正視呢件事。

▌事件1：疑似造假嘅森下仁丹
第一個請人嘅Post喺10月20號出，招募對象係減肥成功嘅3X歲女士，拍攝日期為10月尾，演員需要喺《東張》跟稿回答幾條問題，並且附上「曾經肥胖但減肥成功」嘅照片。

我哋喺11月10號搵到疑似涉事廣告，受訪者阿晴表示自己因為疫情工作量大減，而且因為貪吃而導致體重上升，試過好多方法都減唔到肥，於是喺朋友介紹下食咗【森下仁丹】嘅瘦身產品，三個月後減咗15磅。

跟住，《東張》主持 #吳幸美 訪問咗【森下仁丹】嘅香港代理商（3ChemBio[1]）兼藥劑師Terrence，Terrence聲稱佢嘅產品可以止肥、殺脂及提升新陳代謝率。

【森下仁丹】專頁
https://www.facebook.com/jintan.HK.official
https://pili.app/pg/3ItXkfMuz

▌事件2：疑似造假嘅Return回本
第二個招聘貼文喺10月25號發出，招募對象係「曾有脫髮問題」但「頭頂現在好多BB毛頭髮」嘅3X歲女士，拍攝日期為11月中到尾，演員同樣要跟稿答問題同附上照片。

我哋喺11月30日搵到相關廣告，受訪嘅34歲幼稚園老師Rita表示自己工作壓力大，開始出現脫髮危機，試過做運動減壓無效後，喺朋友介紹下食咗【Return回本】生髮配方。一個禮拜後，梳上面甩出嚟嘅頭髮少咗，四個禮拜後，廁所去水位嘅頭髮少咗，兩個月後，頭頂啲「BB毛」開始生返出嚟。

跟住，《東張》主持訪問咗【Return回本】嘅香港代理商（3ChemBio）兼藥劑師Chris，同樣地，Chris自吹自擂產品點樣幫用家生髮Blablabla。

《東張》嘅植入式廣告鋪排同招聘廣告完全吻合，而且眼利嘅讀者都會發現，森下仁丹同Return都係由3ChemBio代理，係咪真係咁「巧合」呀？

【Return回本】專頁
https://www.facebook.com/ReturnHongKong
https://pili.app/pg/2Fbh29wbR