#Admin專欄 #五千文消費券係監控勿直接用於黃圈 #BigBrotherIsRecordingOurBigData
#請廣傳 @windseasonbro

如果呢一刻政權要大家戴一個可以隨時隨地監控你嘅GPS狗圈，幾個月後畀五千文你，我諗好多人都會反感，直頭唔會要果五千文。

如果政權剩係畀人揀用Wechat pay／支付寶，我諗都有一定數目嘅人會反感，而且都未必用，反而得唔到監控嘅作用。所以佢開放埋八達通／TapNgo，貌似畀你有得揀，但其實係一個心理陷阱———無論你揀邊一種消費券，你都會被佢監控。

而另一個心理陷阱係『政府「派」五千文』。

各位要記住，呢五千文係納我哋稅所得，並唔係所謂嘅派錢。

並唔係所謂嘅派錢。

並唔係所謂嘅派錢。

並唔係所謂嘅派錢。

重要嘢要講三次。

更重要嘅係，如果你比較單純，呢段時間去黃店食嘢都用八達通或其他電子付款方式消費
咁我真係恭喜你，你正中下懷，政權可用嚟收集黃絲數據。記住我唔係叫你哋唔幫襯黃店，而係『唔好用電子消費付款方式喺黃店消費』）

如果我係政府，我會咁樣做：

1⃣ 用支付寶／WeChat Pay可以當係自己人，呢度我諗大概三百萬人，呢堆人可以少D監控（因為本身支付寶／WeChat Pay就係監控）。

2⃣ 選擇TapNgo／八達通者，如到黃店消費實，有消費紀錄，同時政府一定有黃店List，例如一個月內頻繁幫襯黃店者，即刻列入黃絲名單，呢一張名單對之後制定任何政策都有用。

3⃣ 然後就係監控下你交通方式，例如陳小明每日0721登上巴士，0831落車會到另一區食一餐早餐先返工，政府會知道佢行蹤，一兩個人嘅監控無乜意義，但當整個社會都被監控，咁樣政府就會砌好砌圖一樣，睇到個Full Picture，私隱蕩然無存。

風巴畀大家嘅建議係：

只有購買電子產品，政權先無任何監控嘅成果———無論港豬定黃絲藍絲，本土定大中華膠都會用電子產品，當然，如果你要買嚟抗爭，就唔好買，每個電話都有IMEI Code，而電子消費係必定留低Digital Footprint。

當然，有人會話：政府都係想人消費啫，你咁樣咪只會益到豐澤百老匯等藍店？唔通我買完手機又買手機啊？

老實講，呢個方法或多或少都係比較消極，但卻好有用，你諗下，政府見到你用嚟買雪櫃梳化，點估到你藍定黃？可能你會覺得為買而買，喺呢度我只建議真係有實際購買需要嘅人去買，其他人買隻Apple Watch，去Donki買下嘢都五千啦，其實五千唔係好多，佢電子消費券絕對係用嚟建立大數據嘅手段，各位唔好中計。

#請以任何方法廣傳畀你身邊所有朋友同學同事親人，感謝。

#Admin專欄 #五千文消費券係棉花糖實驗更加係爆發通脹危機 @Windseasonbro

唔知大家有無聽過，一九六八年，史丹佛大學嘅Walter Mishel為咗了解小朋友為咗生存而學識如成人一樣自制嘅過渡期，佢做咗一個簡單嘅實驗，就係著名嘅『棉花糖實驗』。

實驗設計係咁嘅，有合共超過1000名嘅四歲小朋友，科學家會請佢哋入一個房間，先派一粒棉花糖畀佢哋，如果喺科學家離開房間之後15-20分鐘忍耐到唔食果一粒棉花糖，科學家返到嚟會再畀粒棉花糖佢食。

結果有三分二嘅小朋友忍唔撚到口，喺科學家離開房間嘅15-20分鐘內就食咗粒棉花糖，只有三分一嘅小朋友會忍得到口，等科學家返嚟前始終唔食粒棉花糖。

你以為自制能力只係關乎食唔食多粒棉花糖嘅問題，無乜實際意義，咁就錯喇。

自制能力影響我哋好多嘢，實驗跟蹤果班小朋友到十五年後。結果顯示，當年自制能力強嘅小朋友嘅人生會更加成功，自制力強即執行力強，抵抗眼前誘惑，喺人生任何階段都係重要嘅能力。

棉花糖實驗同IQ無直接關係，而喺2021年嘅香港，由陳茂波及背後策劃嘅中國政府發起嘅『消費券實驗』，卻搵出香港不論黃藍都有好多IQ低嘅香港人，佢哋諗唔通嘅嘢我今日同大家分析下：

首先，呢五千文係我哋交稅得嚟，唔係『派錢』。更唔好拎之前還一萬畀我哋相比，是次還錢嘅幅度甚至少過平時退稅。

其二，就係三分二人都抵唔住『棉花糖實驗』嘅引誘，結果嘅局面係被一班乘機Mark up賺一筆嘅商家敲詐。

其三，好多人都係唔知道『免費嘅午餐係最貴』，不論黃藍都有人用支付寶，出賣自己資料不特止，而且更有可能出賣通訊錄其他朋友嘅資料。支付寶、各大商場推出嘅所謂早鳥優惠，只不過係令佢哋覺得自己『利益最大化』、『精打細算』、係『棉花糖實驗果三分一嘅成功者』，但其實佢哋都係『棉花糖實驗果三分二嘅失敗者』。

此話何解？

作為普通市民，無必要一窩蜂將消費力耗盡，但政府就係樂於鼓勵你哋『消費救經濟』，其實引嚟嘅，係商家齊心Mark up商品價格嘅時機。

如果無限時消費券，一家商家要Mark up商品會有好多顧慮：即使東家加價，消費者可以買西家。但如今，消費者陷入一個危機，就係政府畀Signal商家：『如果你哋想加價，而家就係時機喇！一齊加嘅話，消費者No Say。』

結果會點？商品價格上升容易下跌難，第一粒棉花糖就係拎果五千文，而最好嘅結果就係喺呢段期間內忍住唔額外消費，先至有第二粒棉花糖（另外嘅五千文／商品價格唔上升）嘅最好結果出現。

不過，社會向來都係少數服從多數，當多數人都係戇鳩鳩拎住果五千文做大爺嘅時候，不但唔會有第二粒棉花糖，而更嚴重嘅係，留喺香港嘅人以後嘅命運只會係經歷大幅度通脹：今日食餐飯五六十，下年可能七八十，而政府或會每年派嘅五千文，只係令香港步入不歸嘅死亡之路。

就好似囚徒困境一樣，因為如今溝通嘅渠道少咗，大家各懷鬼胎，本來可以做最好嘅『團體利益』（唔畀大商家Mark up賺盡)已不可行，因為社會上有一部分人以『個人利益』(所以你明白點解消費券有『限頭1000名登記者』啦？佢就係要做到大家利益不一致，然後香港陷入『鬥快搶著數就係叻仔』嘅困局。)

大家知唔知道香港人對上一次『成功抵擋棉花糖實驗嘅引誘』係幾時？其實就係遲遲都唔打武肺疫苗，政府先不得不『搞疫苗抽獎』呢個『第二粒棉花糖』。

當然，佢抽獎有無內定又係一回事，但係無可置疑嘅就係你愈易受引誘，你Receive offer愈低，你得到嘅嘢愈少。

是日暴風雨巴嘅藍絲親戚同黃絲舊同事Signal Group都紛紛Fwd一堆『消費券資訊』、『XX商場爆滿人流圖片』、『邊個商場邊間舖頭用Alipay平幾多幾多』...

香港人，真係無撚得救。

想同佢哋班人講：『貪字得個貧』、『贏咗粒糖輸咗間廠』...我唔係叫各位懶清高唔撚收政府還嘅果五千文，只係覺得要用得其法。

如何用得其法？

老實講，市區去市區嘅交通費一定用唔晒果五千文，我會盡量去貼近『之前價』嘅超級市場購物，傢私、電子用品如果Mark up咗就鐵定唔買。

如果係我，我會點用果五千文？

我會用嚟買Itune Gift Card，起碼幾時兌現果D錢由我話事，而且IPAD、Apple Watch等等永遠都有購買嘅價值。

我唔會將『電子消費券用喺黃店消費』，以免被trace到係黃絲，建立大數據庫。

我會盡量照常生活，將不必要嘅消費去除，盡量善用果五千文，盡量將佢嘅效果等於退稅。

如果想買貴價嘢，我會『等15-20分鐘』(至少半年)，然後『得到第二粒棉花糖』(商品價格回落少少)。

各位，你會選擇做2/3嘅失敗者，定係1/3嘅成功者？

請以任何方式(fb/ig/wtsapp/tg/signal/mewe/facetoface)廣傳我呢篇Admin專欄畀所有識嘅人，同埋睇埋我Quote嘅呢一篇Admin專欄！感謝！