香港同盟會2.0

#西九龍法院大樓第八庭 (暫代區院)
#嚴舜儀區域法院暫委法官
#續審 [26/34] #1118尖沙咀 #營救理大

下午進度

A1吳(19)/ A2何(23)/ A3陳(22)/
A4高(18)/ A6陳(37)/ A7王(21)/
A8許(22)/ A9洪(24)/ A10陳(43)/
A11鄧(24)/ A12鄭(52)/ A13施(36)/
A14鄭(30)/ A15陳(20)/ A16蔡(28)/
A17程(27)/ A18鍾(28)/ A19江(27)/
A20劉(27)

控罪：非法集結
上述被告被控於2019年11月18日，在香港九龍尖沙咀科學館道一帶，連同其他不知名人士集結在一起，作出擾亂秩序的行為或作出帶有威嚇性、侮辱性或挑撥性的行為，意圖導致或相當可能導致任何人合理地害怕如此集結的人會破壞社會安寧，或害怕他們會藉以上的行為激使其他人破壞社會安寧。

================
[14:05] 開庭

A20 繼續作供

🔹控方盤問

2019年11月17日日間去教會，約6點去到尖沙咀，因要交論文，去揾有關於「全民基本收入」的參考書，上網揾過資料，台灣在呢方面資料比較多，所以去誠品，但揾唔啱，當日無打算去其它書局揾，第二日再揾過。

主問時稱好耐無見朋友，係因為讀書時每星期見幾次，畢業後各有各忙，劉小姐返夜校，朋友晚上有兼職，所以好耐無見。

約在7-11等，朋友到先，見面時佢話有催淚煙味入咗屋，一家搬咗去酒店，無詳細問點樣受影響，唔知搬咗幾耐，酒店係 Hotel Hart，控方呈上酒店相片(MFI 8)，劉小姐確認係呢間，但不能評論是否屬於小型酒店。

劉小姐解釋在主問時講：「好似無車返屋企」，係因為居住的不是市中心，無通宵巴士，知道只有在太子有小巴去小瀝源，當時嗰度無車返屋企，只係做緊兼職，唔會花錢搭的士返屋企。

朋友在教會機構工作，因應唔同嘅活動，會去唔同地點返工，唔記得佢返邊度，離開酒店就分咗手，劉小姐只係做兼職，星期一唔使返工，揀咗最直接返屋企嘅途徑，行去紅磡火車站；在18日之前知道理大有衝突，但唔知到封咗，18號早上唔知紅磡火車站有無封，當時無諗過會封。

控方呈上地圖，叫劉小姐在地圖上畫出由Hotel Hart行到去百週年紀念公園噴水池的路線(D20-2)；因為無睇錶，唔知道幾點離開酒店，行到去漆咸道南，見到無晒車，馬路上有磚頭，眼前無發生衝突，唔覺得好危險，因為在2019年時，各區都有類似情況；劉小姐未試過由Hotel Hart行去火車站，但有試過由尖東行去，未必係同一路徑，都係大概方向，經天橋上去。

唔知幾點去到噴水池，去到都無特別情況，感到口渴，因為之前去過新文華中心和南洋中心之間嘅7–11買嘢，所以去返嗰間買水，唔知道主控所講新文華中心另一邊都有7–11 和OK 便利店，知道新文華中心嗰邊都有位可以上天橋，唔同意一定要經嗰邊上天橋。

唔知幾點行到入去科學館廣場，人來人往嘅意思係好多人在身邊行過，同意廣場近科學館道嗰邊人多啲，包括返工和路人都有，只係望咗一眼，唔見有人聚集，現場好嘈，但唔知講咩，因為無特別留意，只係當背景聲音，無深究原因，因為前邊人多，打算打斜行過去華懋廣場嘅行人路，睇吓行唔行到，行到兩條馬路中間嘅分隔處，左前方有人從車罅之間湧埋嚟，呆咗一呆，講唔到呆咗幾耐，想沿路走，但右後方有人湧埋嚟，只係感覺到無轉過去睇，分隔處空間唔大，只得兩三個人身位，當時身邊已觸及其他人，被夾住走唔到，被迫咗出近華懋廣場嘅馬路，𐳝低、被捕。

主控叫劉小姐在D20-2地圖上畫出身處分隔處的位置，嚴官叫劉小姐在同一地圖上標示出所講嘅左前方和右後方。

現場好嘈，唔知咩聲，唔見科學館道有警察，主控指出劉小姐應見到遮陣，和警方在科學館道近科學館廣場舉黑旗（唔同意），聽到警方用大聲公講非法集結，叫人離開（唔同意），聽到胡椒彈球槍嘅聲（唔同意），聽到「1, 2, 1, 2, …死黑警」（唔同意），見到舉藍旗（唔同意），聽到發射催淚彈嘅槍聲（聽過澎一聲，唔知係咩聲）。

盤問轉去P173藍色外科口罩，P174白色N95口罩，和P176生理鹽水。劉小姐指記憶中自幼稚園起就有鼻敏感，小學開始睇中醫，間中睇西醫，藍色口罩係防塵用，在工廠區戴，白色N95喺防刺激性氣味，當時沙田中心商場裝修，有時搭巴士去沙田轉小巴返屋企會經過，外科口罩防唔到刺激性氣體，帶備經過商場時會戴，N95口罩好焗，唔會代替外科口罩，藍色口罩之前用過，唔記得用咗幾多次。

鼻敏感嘅病會令到劉小姐大部份時間鼻塞，嚴重嘅時候會打乞嗤和流鼻水，好似開水喉咁，當日有兩種防敏感藥係身。

主控讀出8段醫生報告的內容，指出多數係其他病，只有兩次係鼻敏感，劉小姐表示多數睇中醫，主控稱現在中醫都可以寫醫生報告，劉小姐表示唔知，而且中學時睇開嘅中醫已經過身。

劉小姐表示用生理鹽水洗鼻係中醫教嘅，多數睇中醫，唔係唔信西醫，只係唔想用類固醇藥，背囊中嘅生理鹽水唔記得係幾時買；主控再叫劉小姐示範如何沖洗鼻孔，之後指出為何不用另一種有小管插入鼻孔的沖洗器，劉小姐表示知道有該種沖洗器，有放在家中使用，因為要開鹽水，要倒入樽內，使用時比較麻煩，在室外使用支裝生理鹽水較為方便。

主控指為何不使用不含類固醇嘅防敏感噴劑，劉小姐表示知道有呢啲藥，但比較貴。

主控向劉小姐指出控方案情：
- 講去買水呢個原因係講大話
- 嗰日買水唔需要去嗰間7–11
- 口罩和生理鹽水係在現場使用
- 見到傘陣都不離開
- 見到黑旗和藍旗
- 聽到「1, 2, 1, 2」「死黑警」
- 聽到大聲公嗌離開
- 聽到發射催淚彈槍嘅聲（聽到澎一聲，唔知係咩聲）
- 唔係走唔到，係蓄意參與非法集結
- 聽到發射胡椒彈球槍嘅聲
- 見到發射胡椒彈球槍

❌劉小姐全部唔同意

[15:23] 🔸辯方無覆問，劉小姐作供完畢，無其他辯方證人

📍案件管理
A17定於10月24日14:00～15:00 作結案陳辭的口頭補充

嚴官指示小休商議
辯方提議在10月19日和27日為其他被告的結案陳辭作口頭補充，控方在9月27日先交結案陳辭，辯方在10月13日提交陳辭和作回應。

所有仍然需要守宵禁令的被告都申請取消宵禁，亦有被告申請更改報到時間，控方不反對，全部獲得法庭批准。

案件押後至11月25日裁決

40 views23:21