【貓 📻(收音機)】

係入面最大既娛樂除左平常睇書，整嘢食，就一定係聽貓。

所以貓真係一樣好重要既存在，當然啦因為都需要電先可以用得到，所以電池都係一個頗高價值既交易媒介，除左家屬入電池之外，都可以用自己份人工去買既。

入面最多人聽既，都一定係聽歌台，大家腦海中都會有一個時間表，幾時咩台有歌聽。除左咁之外，大家仲會一路聽歌一路寫歌詞，傳比唔同既人睇到底有咩歌好聽，如果大家都識唱就會一齊唱啦，但想要聽人唱，都可以憑你地交情叫佢唱黎聽下既，係日積月累既訓練之下，有啲人其實真係唱得幾好聽。不妨留意下大家既歌喉啦。

咁有一次既事例，因為除左可以自己私人管有既貓之外，都有大衛貓既(即係公開廣播，你可以當係係課室聽人播國歌咁)咁每個倉係特定時段都會有得聽既。

咁個日咁好彩，就係播大家都認識又一定識唱既那些年，係啦，無錯，就係「那些年錯過的大雨，那些年錯過的愛情.......」然後，大家就一齊聽住電台一齊唱，咁諗可能覺得冇咩嘢，但試諗下，百幾個男仔，一齊唱住那些年，其實都幾有另一番風味，嘿。

有啲人話，有酒有心事，我諗係入面就係有歌有心事，憑藉我認知既歌，我諗都勾起大家好多既回憶，聽下大家既戀愛史，係目前階段既愛情，其實都聽到一陣陣心酸。

呢段時間，就快聖誕節，不妨入啲歌詞比各位手足，等佢地唔好咁lonely Christmas 啦。

⛓⛓⛓⛓⛓⛓⛓⛓⛓⛓⛓⛓
——【一釋尚存，同舟共濟】
#寫信師 #2021聖誕活動

一釋尚存 1 Released