「私飯好貴呀，我寧願唔食，留返啲612啲錢比手足打官司…」

我係羅湖同大欖還押左2個月，環境同心理壓力就唔洗多講啦，大家都會知有幾難受，反而我想講下伙食，大棚飯簡直係侮辱食物嘅最好例子：

係牆內，早餐已經食飯，我成日同探我既朋友分享啲米有幾可怕… 啲米硬到可以用一隻筷子舉起成舊飯，我朋友對於我誇張既肢體語言去模仿用筷子插落去個下都笑左出聲，然後笑笑下就笑唔出了。

午餐就食粥，甜鹹隔住咁食，星期日既腐竹粥真係攞我命3000（反而其他手足話好食wtf），我第一次見腐竹粥既時候，我心諗：腐竹唔係配糖水既咩？！頭幾日還押個陣同朋友講講下腐竹粥講到喊左，因為我唔知自己做左啲咩要受啲咁既野。

我媽咪聽完啲劣食食評之後問我：

「你申請私飯啦好冇？」

「私飯好貴呀，我寧願唔食，留返啲612啲錢比手足打官司…」

我初初真係好抗拒私飯，因為真係好貴，大欖大嘅2000蚊一個星期，羅湖就2800… 加埋生果就加多70蚊，唔係橙就蘋果，野飲就包埋既。本身2021 3月頭都仲有4個私飯餐可以揀，但之後懲教就用「保安問題」減到得翻2個（bullshit），羅湖既餐單仲要十世都唔轉一次，每個星期都係嗰2個options.

初初我都捱到唔食私飯，但去到後期真係頂唔順啲「飯」，所以訂左兩次私飯。訂私飯要同福利官申請，佢會比menu你填，填完就比親友交錢。第一次收到menu既時候都幾興奮，因為係小有可以比我地「選擇」既時候。係入面，有得選擇係好稀有嘅事，但其實呢種「選擇」都只係illusion。

批左私飯既話，新一個星期既早午晚飯就會去第二個地方食飯，如果第二個期數既手足都有申請私飯仲可以一齊食（大欖除外），有得食下餐廳野係好過小小既。

以前612都仲可以claim私飯錢，我地都唔會有太多錢銀方面既concern，而家612冇左，唔好講私飯，律師費先最大問題，所以如果大家金錢上support到既，其實有好多唔同途徑都financially support到手足（patreon etc…）

長期對住灰白色既鐵籠，就算只illusional 既「選擇」都可以令入面既人好過些少，唔好忘記每一位付出既人。

#囹羽 #囚權

囹羽 defendersrights