唔好意思，我撐戒連登｜@雙木

見到連登越黎越多打手，又越黎越走向極端，自不然有睇少d嘅習慣。

好多人話放棄連登，咪係等同放棄言論自由呢？

我嘅答案會話，唔係。

響講點解戒連登之前，不如問下大家點解當初唔會上Uwants Discuss 三男二女呢d論壇先？

因為人人都申請到account呀嘛！當時咪一班人開假Account，在呢d 普通論壇到帶風向囉。

當年嘅高登只允許網絡供應商，學校同埋公司嘅EMAIL開Account，對比而家連登開Account係幾咁易？

再加上，而家國安法下，連登Admin係咪100％可以Ban曬政府打手／ 煽動雙方嘅極端人士先？

定已經收到警告，叫佢唔可以郁呢d account，要當睇唔到呢？

如果你話戒連登係自我閹割，咁香港人一早自我閹割左啦！

連登／ 高登之所以在2019年對香港人黎講有一定代表，但係當時嘅環境同而家嘅環境，係咪可以100％相同先？如果係嘅話，監獄唔會有咁多人，外國唔會有咁多逃生艇計劃啦。

利申先，我仲上緊連登，不過係娛樂自己，而唔係咩尋求真理，不過我就唔建議心智未成熟嘅人而家完全依賴連登，甚至以連登價值觀等等作為做人標準。

係架，你會話仆街野度度都講，不過連登有代表性呀嘛，如果抽空時空，淨係講言論自由，不如大家反攻Uwants Discuss 同3男2女啦。

我就覺得，大家應該發展server同admin都繪海外嘅論壇，而佢係可以BAN晒政府同商業打手。雖然咁樣做，都係避免唔到果d真心仆街嘅人，講埋晒d毫無血性嘅野，但繪人數上會見到，果d無人性嘅野有幾多人支持，有幾多人負評囉。

戒還戒，娛樂還娛樂，心智未成熟嘅人好多，可能去到四十幾歲都未成熟嘅，戒連登嘅重點，係叫大家唔會凡事上連登，甚至以連登主流作為自己嘅價值觀，而唔係叫大家唔好上連登。

始終，我都識得太多十幾廿歲嘅朋友，好依賴連登，雖然未會講得出「所有女人都係雞」呢d言論，不過好多處世做人嘅價值觀，都離唔開連登嘅影子囉。

如果你反對戒連登，不如講下點保證大家搵到打手，而連登ADMIN可以響無壓力嘅情況下，刪走呢d打手先。如果無，咁呢一刻連登同Uwants Discuss有咩分別呢？咁點解你唔叫大家反攻Uwants Discuss呢？

#連登 #人性 #冷血 #浪潮 #Long6Ciu4

*

Telegram 又何嘗唔係咁？