Мусофир киши бомдод намозидан кейин айтадиган дуолари

Абу Барза розияллоҳу анҳудан ривоят қилинади: «Расулуллоҳ соллаллоҳу алайҳи васаллам агар бомдод намозини ўқисалар, (ровий: «Сафарда айтганларини биламан, холос», деб айтдилар) саҳобалар эшитадиган даражада

اللهُمَّ أَصْلِحْ لِي دِيْنِي الَّذِي جَعَلْتَهُ عِصْمَةَ أَمْرِي، اللهُمَّ أَصْلِحْ لِي دُنْيَاىَ الَّتِي جَعَلْتَ فِيْهَا مَعَاشِي، اللهُمَّ أَصْلِحْ لِي آخِرَتِي الَّتِي جَعَلْتَ إِلَيْهَا مَرْجِعِي، اللهُمَّ أَعُوذُ بِرِضَاكَ مِنْ سُخْطِكَ؛ اللهُمَّ أَعُوذُ بِكَ، لاَ مَانِعَ لِمَا أَعْطَيْتَ، وَلاَ مُعْطِيَ لِمَا مَنَعْتَ، وَلاَ يَنْفَعُ ذَا الجَدِّ مِنْكَ الجَدُّ

«Аллоҳумма аслиҳ лий дийний аллазий жаъалтаҳу ъисмата амрий, Аллоҳумма аслиҳ лий дуняйаллатий жаъалта фийҳа маъаший», деб уч марта, «Аллоҳумма аслиҳ лий ахиротил латий жаъалта илайҳа маржиъий», деб уч марта, «Аллоҳумма аъузу биридока мин сухтика, Аллоҳумма аъузу бика», деб уч марта, «Ла маниъа лима аътайта, вала муътийа лима манаъта вала йанфаъу зал жадди минкал жадду», деб айтардилар.

Маъноси: «Эй Раббим, ишларимнинг поклагувчиси бўлган динимни ислоҳ эт, яшаётган дунёимни ислоҳ қил. Аллоҳим, Сенинг розилигинг ила ғазабингдан паноҳ тилайман. Аллоҳим, Сенинг номинг ила паноҳ тилайман. Сен берган нарсани ман қилувчи йўқ. Ва Сен ман қилган нарсани берувчи йўқ. Буюклик Сендадир, бошқанинг буюклиги фойда бермайди».

Ибн Сунний ривояти.

✅ Telegram | 💬 Facebook | 📸 Instagram | 📹 Youtube

Таом тортилганда айтиладиган дуо

Абдуллоҳ ибн Амр ибн Осс розияллоҳу анҳудан ривоят қилинади:

«Расулуллоҳ соллаллоҳу алайҳи васалламга таом тортиқ этилса

اللهُمَّ بَارِكْ لَنَا فِيْمَا رَزَقْتَنَا، وَقِنَا عَذَابَ النَّارِ، بِسْمِ اللهِ

«Аллоҳумма барик лана фийма розақтана вақина ъазабан нари, бисмиллаҳи», деб айтардилар».

Маъноси: «Аллоҳим, бизга ризқ қилиб берган нарсангни баракали қил, бизларни дўзах азобидан сақла, Аллоҳнинг исми билан бошлайман».

Ибн Сунний ривояти.

✅ Telegram | 💬 Facebook | 📸 Instagram | 📹 Youtube

Уйга кираётганда ва таом пайтида Аллоҳни зикр қилиш

Жобир розияллоҳу анҳудан ривоят қилинади: «Расулуллоҳ соллаллоҳу алайҳи васалламдан қуйидагиларни эшитдим:

«Ким уйига кираётганида ва таом пайтида Аллоҳни зикр қилса, шайтон шерикларига: «Сизларга ётоқ ҳам, овқат ҳам йўқ», деб айтади. Ким уйига кираётиб, Аллоҳни зикр қилмаса, шайтон шерикларига: «Ётоқларингизга етишдингиз», дейди. Таом пайтида ҳам Аллоҳни зикр қилмаса, шайтон шерикларига: «Овқатга ҳам, ётоққа ҳам етишдингиз», дейди».

Имом Муслим ривояти.

✅ Telegram | 💬 Facebook | 📸 Instagram | 📹 Youtube

Емак ва ичмак пайтида «Бисмиллаҳ»ни айтиш

Умар ибн Абу Салама розияллоҳу анҳудан ривоят қилинади:

«Расулуллоҳ соллаллоҳу алайҳи васаллам менга (овқатланаётганимда) «Аллоҳ исмини зикр қил ва ўнг қўлинг билан егин», деб айтдилар».

Имом Бухорий ва Муслим ривоятлари.

Оиша розияллоҳу анҳодан ривоят қилинади:

«Расулуллоҳ соллаллоҳу алайҳи васаллам: «Агар сизлардан бирингиз (овқат) ейдиган бўлса, ана шу таомнинг аввалида Аллоҳ исмини зикр қилсин (яъни, «Бисмиллаҳ»ни айтсин). Агар аввалида Аллоҳ исмини зикр этишни унутса

بِسْمِ اللهِ أَوَّلَهُ وَآخِرَهُ

«Бисмиллаҳи аввалаҳу ва ахираҳу», деб айтсин», дедилар.

Маъноси: «Овқатнинг аввали ва охирига Бисмиллаҳ».

Абу Довуд ва Термизий ривоятлари.

✅ Telegram | 💬 Facebook | 📸 Instagram | 📹 Youtube

Шайтон Аллоҳ исми зикр қилинмаган овқатни ўзига ҳалол қилиб олади

Ҳузайфа розияллоҳу анҳудан ривоят қилинади: «Агар Расулуллоҳ соллаллоҳу алайҳи васаллам билан бирга овқат тановул қилгани ўтирсак, у зот қўлларини узатмагунларича биз узатмас эдик. Бир гал у зот билан бирга таомда бўлганимизда, бир қиз келиб, овқатга қўл узатишга шошаётганида у зот қўлидан ушлаб четга олиб қўйдилар. Кейин бир аъробий келиб, у ҳам узатмоқчи бўлганида Расулуллоҳ унинг ҳам қўлидан ушлаб, четга олиб қўйдилар. Сўнгра у зот: «Албатта шайтон Аллоҳ исми зикр қилинмаган овқатни ўзига ҳалол қилиб олади. У (шайтон) овқатни ҳалол қилиш учун бу қизча билан келди. Мен унинг қўлидан тутдим. Сўнгра овқатни ҳалол қилиш учун бу аъробий билан келди. Унинг ҳам қўлидан тутдим. Менинг нафсим Унинг қўлида бўлган Зотга қасамки, у (шайтон)нинг қўли улар икковининг қўли билан менинг кафтимдадир», дедилар. Кейин Аллоҳ исмини зикр қилиб, овқат тановул қилдилар».

✅ Telegram | 💬 Facebook | 📸 Instagram | 📹 Youtube

Таомдаги бараканинг калити

Оиша розияллоҳу анҳудан ривоят қилинади:

«Расулуллоҳ соллаллоҳу алайҳи васаллам саҳобалардан олтитаси билан овқатланаётган эдилар. Шунда бир аъробий келиб, ўша овқатдан икки луқма билан ҳаммасини еб қўйди. Расулуллоҳ соллаллоҳу алайҳи васаллам: «Агар у Аллоҳнинг исмини зикр қилганида, сизлар тўяр эдингиз», дедилар».

Имом Термизий ривояти.

✅ Telegram | 💬 Facebook | 📸 Instagram | 📹 Youtube