اسكريبتات حسناء عطوان

🩷🩷

1.63K views💗🫶🏻, 09:52

ضيّ: من الصعب جدًا إنك تكون عبء على حد ودا موقف أنا مش هسمح أنه يحصلي أكتر من كدا

_أنا موافقة يا خالتو
_بجد يا بنتي هتقابلي العريس!
_أيوا يا حبيبتي أنا صليت استخارة ومستريحة فـ هقابله
_ربنا يسعدك يا حبيبتي، بـ بس
_بس إيه؟
_العريس دا يعني
_ماله العريس يا خالتو!
_العريس مش بيتكلم يا بنتي، بس والله راجل وميتعايبش ف حاجة أبدًا

ضيّ: سكتت شوية أفكر وبعدين رديت بابتسامة بسيطة

_ربنا ييسر يا خالتو، هو مقالش هيجي امتى؟
_بكره يا حبيبتي

ضيّ: وإيه يعني مش بيتكلم حاجة متقللش منه بالعكس دي تزيده، بس هي الفكرة إني أنا اللي مش متقبلة فكرة الجواز أنا بحب الوحدة بحب أكون لوحدي مش مربوطة بحد أقوم أتجوز! يعني اللي هو شخص هيشاركـك فـ كل حاجة ف حياتك البيت، الأكل، حتى النوم هيشاركك فيه بس المضطر يركب الصعب، ماهو برضو مينفعش أفضل عبء على خالتو، عايشين من معاش زوجها وأبويا الله يرحمهم و يا دوب مقضينا بالعافية لازم أخفف عنها شوية وخاصةً إنها كبرت ومحتاجة أدوية، وزي ما بتقول محتاجة تطمن عليا ف بيت جوزي، وأنا مش هتعبها أكتر من كدا

_ يلا يا بنتي أدخلي هو قاعد جوا
_طب وأنتِ!
_هقعد في الصالة قدامكم

ضيّ: دخلت وأنا بقدم رجل وبأخر رجل، موقف لا أُحسد عليه بصراحة، قعدت على الكرسي وأنا باصة في الأرض ومرفعتش عيني إلا لما سمعت صوت عمله بصوابعه عشان أنتبه له، فرفعت عيني لقيته ابتسم ابتسامة بسيطة جدًا وطلّع من البليزر اللِ لابسه نوت صغير وقلم وكتب فيه حاجة وبعدين مده ليا أخدته وقرأت المكتوب

"أنا مَجد، عندي ٢٨ سنة، بشتغل محاسب في شركة، عندي شقتي جاهزة الحمدلله لو في سؤال حابة تسأليه قولي أنا بسمع على فكرة"

ابتسمت على جملته الأخيرة_ بتصلي؟
سحب مني النوت وكتب
"الحمدلله، على قد ما بقدر بواظب على صلاة الجماعة في المسجد "

ضيّ: ابتسامتي وسعت وكنت لسه هقوم لقيته مد لي النوت تاني أخدتها وبدأت أقرأ

"موافقة؟ ولو موافقة اسمحي لي نكتب الكتاب مع الخطوبة عشان أقدر أتعامل معاكِ بدون إحراج، عارف إني بستعجل في الطلب دا بس بصراحة هكون مرتاح أكتر لدخولي البيت وكلامي معاكِ"

ضيّ: أخدت القلم المتعلق في ورق النوت وكتبت
"الرد هيوصل مع خالتي بعد صلاة الإستخارة، وإن كان الرد بالموافقة فطلبك مقبول" ، شاف المكتوب وأنا مشيت.

_هاا يا بنتي بقالك أسبوع ومردتيش كل يوم بتصلي إستخارة لو مش مرتاحة بلاها جواا...
_موافقة
_إيه.. بتقولي إيه يا بنتي؟
_بقول موافقة يا خالتو موافقة
_لووولوووي يا ألف نهار أبيض مبروووك يا نن عيني مبروووك
_الله يبارك فيكِ يا خالتو
_هروح أبلغه يا بنتي زمانه على نار

_يلا يا بنتي أمضي عشان المأذون عايز يمشي والعريس عايز يدخل يسلم عليكِ

ضيّ: إيدي بتترعش وأنا ماسكة القلم، أخدت نفس وحاولت أهدي نفسي ومضيت... خلاص كدا بقيت على اسمه، خلاص بقيت الحرم المصون لِ الأستاذ مَجد.. يا اللّٰه

الباب دق واتفتح ب بطئ شديد بدأ يبان من وراه ببدلته الرصاصي وملامحة الهادية اللي ولأول مرة أدقق فيها كان باين عليه التوتر بس غلبت الفرحة عيونه بدأ يقرب وأنا أبعد لحد ما سندت على الحيطة وهو لسه بيقرب، وقف قصادي وبص ف عيني حركة بسيطة من إيده أخدت إيدي للكنبة وقعدتني جنبه، طلع نوت جديدة ومنقوش عليها

"مِيثَاقْ"

فتح أول صفحة وكتب

"بِسمْ اللّٰه نَبدأ حَياتنا علىٰ مَودّة ورَحمة مِن اللّٰه، وحُب مِن قلبي لِـ قلبٍ عَشقتهُ طُوَال حَياتي، قلبّ أَعلمْ جيدًا أَنه يَستَحقْ أَفضل مني بكَثير ولَكنني لا أَرغبْ بِـغيرهُ، أُعاهدكِ يا صَاحبة المَقام الأعلىٰ في قَلبي أنْ أَكون لكِ مَمْلكة وليكُن قَلبي العَرشْ، و أعِدُكِ علىٰ أنْ أُحارب لِـ أَفوز بِـقلبك مَهما كانْ الثَمن، ومَهما كَثُر الانتظَار."

ختم كلماته وقفل النوت وبصلي وعمل بإيده حركة عرفت أنه بيستأذن ل طلب ف هزيت دماغي ب "آه" فَ الإجابة كانت حضن... جسمي أترعش من الخضة أو يمكن من الدفىٰ الغريب اللِ في حضنه اللي هو عكس تمامًا البرودة اللي ف جسمي!

معرفش هل أحنا فضلنا كدا كتير ولا لأ بس أنا فوقت على دق الباب وصوت خالتو وهي بتزرغط، مَجد أستأذن من خالتو عشان نخرج وطبعًا وافقت، لبست خماري ومسحت المكياج وخرجت ب فستاني السماوي، فضل ماسك أيدي من ساعة ما شافني لحد ما وصلنا الكافيه حتى وأحنا راكبين العربية كان كفه حاضن كفي وكأني ههرب، رغم إنه مبيتكلمش بس حسيته قال كلام كتير أوي بعيونه وطبعًا كان فاتح النوت وبيكلمني عن طريقها بس وسط القعدة واحد صاحبه جه يسلم عليه فبدأوا يتكلموا بـ لغة الإشارة وأنا قاعدة ولا فاهمة حاجة، خلص مع صاحبه ورجع يبُصلي تاني لقيته مرة واحدة ضحك جامد واللي اكتشافته إنه كان بيضحك على ملامحي المستغربة من طريقة كلامهم بالإشارة

❤36🥰1

1.71K views💗🫶🏻, 09:52