بسم الله،
النسخة الاولى من برنامج التدريب الصيفي لطلاب كلية الصيدلة.

اعلاه المحاور التي سيتم اعتمادها لتدريب الطلبة في النسخة الاولى من برنامج التدريب الصيفي لعام 2026..
هاني ليث.

السلام عليكم
شكرا الكم لكل الاراء و الكلام الطيب
قرأت كل كلامكم و ان شاء الله ابدي انشر حسب رأي الاغلبية.
بعد قليل المحاضرة الاولى على يوتيوب حسب الجدول اعلاه.

-المحاضرة الاولى-
محاضرة خفيفة جدًا ما تحتاج دراسة مجرد إستماع..
اريدك تسمع الكلام بالڤيديو و تصفن شوية بالمحاور و تحاول تفهم قصدي و تطبق الكلام المذكور قدر الامكان.

اتمنى ان تكتبون رأيكم بتعليقات اليوتيوب بخصوص هذا النوع من المحاضرات حتى بعد فترة انزل الجزء الثاني منها..

https://youtu.be/H-ok-qN4PhY?si=Iyz6MKOBnkeg8NJd

شباب، محاضرات التدريب لكل المراحل من الثاني للخامس…
من اگول المرحلة الاولى، الثانية، الثالثة
ما اقصد بيها مرحلتك بالجامعة.
اقصد هذا التقسيم مالتي بالجدول كـ phases للنشر

السلام عليكم
نزلت محاضرة عن الجهاز الهضمي- حالات الإسهال.

شباب اختصرها عليكم
اذا غايتك من التدريب تحفظ بس اسماء العلاجات، ترى هنَّ بس علاجين
Loperamide, Co-phenotrope
خلص لا تدوخ نفسك..

و اذا تريد تعرف؛
شنو الحالة، شوكت فعلا تقيم هذا المريض عنده إسهال، شوكت لازم تسوي إحالة للدكتور، شوكت تعرف الحالة خطرة و المريض ممكن يموت، منو الفئة الاخطر عليها، شنو مسببات الإسهال، شنو الادوية الي تسوي إسهال، شلون تعلّم المريض يستخدم العلاجات بطريقة صحيحة، شنو هو محلول الارواء الفموي وشنو الجرع؟، وبعد تفاصيل اكثر
شوف المحاضرة.

التدريب الصيفي الصيدلي | هاني ليث
الجهاز الهضمي- قرحة المعدة (حالات سريرية)

السلام عليكم
محاضرة مهمة من محاضرات الجهاز الهضمي بخصوص قرحة المعدة (حالات سريرية) ..
• هاي الحالة ما تگدر انت تتعامل وياها بشكل مباشر بدون تشخيص و وصفة طبيب مختص لكن راح تسمع بالصيدلية بمصطلحات مثل ( العلاج الثلاثي، العلاج الرباعي، العلاج المصاحب والخ..)
•مثلا تشوف بالوصفة
Omeprazole
Clarithromycin
Amoxicillin
طيب هاي الوصفة لمدة شگد؟ شلون المريض ياخذها؟ قبل لو بعد الاكل..
هاي الاشياء من واجبك انت.

بالاضافة الى ذلك تم شرح المسببات و طريقة التشخيص و العلاج اللادوائي و تفاصيل اخرى..
• وعليه ارتأيت ان انطيكم هاي المحاضرة من كورس السريرية لعله ان احد عنده فضول يتعلم هاي التفاصيل.

•رابط المحاضرة على YouTube

https://youtu.be/TLkZhG40RlE?si=jzh_i2kxgD6UZyAd

المحاضرة القادمة نرجع للتعامل المباشر ان شاء الله و ستكون بخصوص الـ GERD (ارتجاع المريء) و الـ Dyspepsia (عسر الهضم).

شو مو هالگد ويا هالمحاضرة شبيكم وياها حتى قليل شافوها و تفاعلوا مو مثل اول محاضرة

صعبة؟ لو هاهي خلص الواهس

اذا ماكو واهس حتى اعطل اني هم

السلام عليكم، توضيح لبعض الاسئلة بخصوص التدريب

اول و اكثر سؤال؛ راح تشرح كل السستمات خلال هذا الشهر؟؟؟؟؟؟

منطقيًا لو نفكر بيها، انت 5 سنوات بكلية الصيدلة و كادر تدريسي كامل و هم ما تاخذون كل شيء بالجامعة و تبقى هواية مواضيع تحتاج self learning

شلون ترهم بشهر واحد اشرح كل السستمات اني وحدي؟
اليوم الاول اكتب المحاضرة بأيدي و احضر الـPdf.
اليوم الثاني اصور المحاضرة اكثر من 3 مرات حتى اختار افضل نسخة.
اليوم الثالث اسوي مونتاج للمحاضرة حتى تجيكم باعلى جودة عرض و صوت و اقصر مدة ممكنة. منطقيًا اني وحدي اسوي هذني كلهن و خلال شهر اشرح كل الصيدلة؟

الشغلة الثانية، ليش المحاضرات طويلة؟؟؟
بعد ما شرحت الك الخطوات الي امر بيها حتى تجيك محاضرة وحدة طولها ساعة، برأيك اني اتونس اذا شرحت اكثر؟ لو يعجبني اگعد بالصيف ساعات اعيد بنفس المعلومات اقل شي ٣ مرات حتى اختار احسن طريقة شرحت بيها؟
لو اتونس اذا اكعد اراجع كل ثانية بالمحاضرة قبل لا انشرها حتى اتأكد خاف شرحت شي بطريقة مو صحيحة او گلت شي خطأ.

راح اختصر كل هالامور على نفسي اذا چانت المعلومات اقل ومن تكون اقل يعني المحاضرات اقصر و يعني راح تصير تسليك و اني مستحيل ارضى بهذا الشيء على نفسي لان احترم الوقت و الثقة الي ينطيها الطالب وهو يشوف محاضرتي و هذا الشيء مو جديد عليه و يعرفوه طلابي بالكورسات…

يا شباب مثل ما انتوا وقتكم مهم اني هم وقتي مهم و مقصر بشغلي و كورساتي حتى اقدم اكثر من الي اگدر عليه بهذا التدريب

•الي يريد يدرس كل الصيدلة بشهر، لا يعتمد على شرحي لان مستحيل اشرحها بشهر.

•الي يريد بس يحفظ اسماء ادوية، هم ما يفيده شرحي لان مو هذا الي اقدمه.

•كورس التدريب ما راح يخلص هالسنة و لا السنة الجاية و راح يبقى مستمر و يتحدث ما دام الله كاتب الي عمر.