- ما تخليش سؤال تعرف جوابه، حتى لو تم الوقت ، ما تخليش كلمة ف قلبك ، حتى لو تمت علاقتكم ، ما تخليش النتيجة توجعك ف الحالتين ،.

- عاداتي تختلف ع عاداته ، لهجته ، تختلف ع لهجتي ، أسلوبه بعيد هلبا ع اسلوبي ، وذوقه ف كل شيء معاكس تماما ل ذوقي ، طريقي وطريقه ، ف نهايتهم ما يتلاقوش ، لكن ،؟ اللي جمع بيناتنا ، شعور أعمق من الحب ، والتعلق ، شعور يخاطب فيا ، ب ان الشخص هذا ليك ، حتى لو كان مختلف تماما عليك ، لعبة البازل ، القطع متاعها ابدا مش متشابهة ، بس تكمل بعض ، وانا وانت ل بعض مكملين ،.♥️💙

- ما بكيتش لما انغصيت ، ومنها وليت مش من لحم ودم ، وما نحسش ، انا حديدية ، يعني لما تضربني ، تحسها انت مش انا ،.

- ما نبكيش ع صحبة وهمية ، انا انسان مش فاضي لهدرجة ،. :)

- اللي يوجعك مش الحب اللي عطيتهولهم وضيعوه ، اللي يوجعك الحب اللي كنت مستنيه يجيك منهم ، ويعطوه ل غيرك ،.

- اللي فات ياريته مات ، بدل ما يعيش ويهلكنا ،.

- لو قدرت توقف ع رموش عيونك ، انا وقتها ح نقدر نسامحك ،.

- لا بأس بالقليل من الراحة ،.

- العتاب مش ديما يجي ع قد المحبة ، لحظات هلبا يجي ع قد الوجع ،.

- العمر فترة مهما طوالت ح تكمل ، وعمري دقائقه مش رخاص باش نضيعهم عليك ،.

- خاف من اللي لسانه مستر بلاوي عليه ، مش اللي لسانه فاضحه ،.

- حسيت ب الذل ، لما استاحشتك ،. :/

- يصير ان ينزرع فيك شعور انك ملك ل شخص ، هو ف النهاية ملك ل غيرك ،.

- ينفع نموت ، ونرجع نعيش من جديد ،؟ نبي نشوف حالهم من بعدي كيف بس ،!

- انا اللين العاصي ، اللي كل ما زاد حبه ليك ، يباعد عليك ،.

- والله مش قصة تأنيب ضمير ، لكن حاسة ان لازم نعاود اولى ثانوي وثانية ثانوي ونصفي المواد ف دماغي قبل الصحيفة باش نفهم اللي قاعدة ناخد فيه ف سنة ثالثة ،. :)

- اقرب الناس ع قلبي ، هما اللي مقدرين أفكاري اللي بعيدة هلبا ع أفكارهم ،.💙

- تبيني نقعد نحترمك ، ما تقولش مصطلح انت نفسك مش فاهمه ، ل غرض "الابهار" ،.

- مافيش مرة شرتلي اختي حاجة ب فلوسها الا وذلتني بيها سنة ولا سنتين ،.

- نموتو ، لكن بتوقف القلب ، مش توقف اشعاراتكم ،. :)

- ما توثقش هلبا من المكانة اللي بنيتهالك ، ب لقطة اخخي يعطيني فيها قلبي اشارة ،؟ يولي التهديم مافيش اسهل منه ،.