الشخص اللي ما يعرفش روحه شن يبي ومتشتت وماعنداش وعيّ بذاته حينحط غصباً عنه تحت ضغط من محيطه ونظرتهم ليه وتوقعاتهم حول حياته اللي هو مش عارف يسيطر عليها
إنك تثبت نفسك في شيء وتكوّن شخصية لروحك وهدف هاذي مش رفاهية ولا إضافة للشخصية ولا باش نعجبوا الناس، لا هي أساس تبني عليه حياتك، احني الأكيد مانبوش نكونوا عاديين والأكيد نفرحوا لما نحسّوا بالتقدير، لكن ما نديروش في هذا كله على خاطر الناس أحني في الأساس مانبوش نكونوا تحت ضغط منهم ومن آراءهم اللي فعلاً حتأثر فينا لو ما كناش في حالة نفسية كويسة ووعي بذاتنا.

كنت نحسابه إن الرضى والصبر حاجات يبدأ يلجأ ليها الإنسان لما يتقدم هلبا في العمر، وإنك طالما صغير في العمر فا أنت خارق ولا عادي عاند وعافر وما ترضاش بأي حاجة لأنك تقدر ادير الهلبا، للأسف كنت في "جحيم الجهل" لأن فوق معاناة الواقع في معاناة تانية كانت تجي من طريقة التفكير هاذي
طلعت الحياة تبدأ بمجرد ما ترضى وتصبر وحتى على اتفه الأمور اللي تعجز تحققها ولا المشاكل اللي تعجز تحلها، اللي حتى عذر تعطيه لنفسك ما عندكش، وماعندكش الا الرضى والصبر بس، الحمدلله.

يا عندي شخصي المفضل يا ماعنديش حد.

الحياة أسهل لما ما تعرضش مميزاتك للناس كلهم، وتكون الشخص العادي اللي مافيشي فايدة ولا جو مليح.

„حالي تغيّر، بالي قصيّر، وعقلي كبير“

مش لازم تكون خبيث باش تحافظ على خصوصيتك، ولا تكون أناني باش تاخد شن تبي، مش لازم تكون اخخي باش تثبت وجودك، وحقك ما يجيش على حساب غيرك وديما في طريقة صح لكل شيء في الحياة، ولو نفسك تبيكش تكون صح لأنك مش عارف تسيطر على الموقف، فا مش عيب إنك تجرب تتعالج.

في حاجات لما تفقدها، تفقد معاها حتى الشغف في إنك تحاول تعوضها، لأنك مؤمن تماماً إنها مكتوبتلك وحترجعلك نفسها في الأخير.

لما شخص يبدأ عالق في موضوع منتهي ليه فترة طويلة ومأثر على نفسيته ومزاجه، مرات مراعاتك لمشاعره تزيد الوضع سوء، ولو تبي تساعده حق لازم تصدمه بالواقع وكيف الحياة ماشية، وحقيقة إن مرات هلبا لما تراعي ظرفك يتمادى عليك وتتحول حياتك من حياة عادية فيها أزمة معينة، لأزمة كبيرة فيها شوية حياة، وتعيش ضحية حاجات مصيرها تموت لكن أنت قعدت تمدد فيها.

ما تضايقش لما يجبدو عليك لانك تعطي في وقت لخدمتك ولا لقرايتك ولا حتى لنفسك، اكتر ما تعطي فيهم في وقت، لما يفوتوك وماعاش يدوروك لا في طلعة لا في خشة لانك تتعذر برسمي وهما فهموها تتسبل، لما يجبدو عليك لأن يبوك تكسد زيهم وانت عندك ما ادير، ما تضايقش وافرح لأن عندك حياة ووقت تستغل فيه بدل ما تضيعه.

الوحدة ما تخوفش، اللي يخوف بجديات هي الزحمة اللي معبية وهم اجتماعي.

ديما حتلقاني متواضع لكن مش معناها إني ديما متوفر.

القيمة حاجة جوهرية هلبا ما تقدرش حتى تعبر عليها ولا تعرضها ولا توريها لحد، فا لو تاخذ في قيمتك من شيء مادي قابل للإشتعال بطريقة مباشرة ولا غير مباشرة، معناها عادي جداً في يوم وليلة أنت وقيمتك تتحولوا لرماد.

Life is.. Just me and my finals.

„هل آراك سالماً منعماً، وغانماً مكرماً، هل آراك في عُلاك، تبلغ السِّماك، موطِـني“

حتى لو تقدر تصلح كل شيء، فا مش كل شيء يبيك تصلحه.

كلنا نحكوا في القصة بجزء مفقود، الجزء هذا مرات متعمدين ندسوه لأنه مؤلم هلبا، ومرات مؤلم هلبا لدرجة مش عارفين نحددوه أصلا ونستغربوا علاش القصة تحولت لعادية واحني نحكوا فيها.

عادي مرات أنت كبرت لقيت روحك شخص تحسد في غيرك وتتحسس وعندك شوية أو هلبا خبث، وهلبا عيوب تانية أنت ما تعرفش أصلها من وين وكيف وعلاش أنت هكي، وعادي مرات عندك ناس يحبوك
واصلا أكثر حاجة نستغربوا فيها احني الناس العادية، هي شعبية الناس اللي هكي

لكن هذا ما يمنعكش ادير دورة على روحك، يعني إنك تكون مش كويس والحياة ماشية معاك كويس هاذي اخطر وأكثر حاجة تخوف لأن عمرك ما حتفكر تصلح من نفسك

في الحقيقة أنت وأنا وكلنا مش مطلوب منا نكونوا بمعايير معينة، هو معيار واحد والتطبيق عليه عملي هلبا
وهو إنك توصل للنسخة اللي لما حد يدعيلك إن ربي يعطيك على قيس نيتك تقدر تقول آمين بلا ما تخاف، وبلا ما يمر عليك الشريط المظلم متاعك.

مافيش حاجة جتني بالساهل ومافيش حاجة عطيتها بالساهل، فا ديما عندي جانب متمسك هلبا، لكن الحياة والناس ما يقدروش في الشيء هذا، وأنت ماعاش صغير باش تبكي وتاخد شن تبي، فا تمام يعني اخسر حاجتك وأنت ساكت.

كنت ديما unlimited for you مع إني عشت حياتي كلها نتجاهل ونقمع في رغبة التواصل الطبيعية عند كل حد و limited مع كل حد قابلته لدرجة إنك وقت عرفتني، عرفتني كشخص وحيد لكن لأن هذا اختياري مش لأن مافيش حد يبي يكون معاي، وكوني قعدت شخص متاح ليك للنهاية فا لأنك كنت اختياري الوحيد مش لأني أنا هكي.

مافيش حد ماعنداش شيء يخسره، لكن في حد جرب يخسر هلبا فا بدي متوقع إنه يخسر أي شيء وفي أي وقت فا ماعاش تفرق هلبا.