- ايام خاطري نمسحها من ذاكرتي :

- يوم اعترفنا فيه ب حبنا ل بعض.
- يوم سهرتنا اللي كانت كلها وعود.
- يوم سمعنا اصوات بعض اول مرة.
- يوم سامتحك ع اول غلطة.
- يوم كتبتلي رسالة طويلة ووثقتها وخليتها ذكرى.
- يوم اعطيتني اغنية وقلتلي تحكي علينا.
- يوم قلتلي انتِ سري اللي مش ح نحكيه ل حد.
- يوم نهينا علاقتنا .
- يوم شفتك.
- يوم تعرفت عليك.

..!

- صح احني الزوز مشينا ، لكن انا نمشي ونتلفت صدقني ،.

- كنتم سند ، بس سند هش ، هش .. ! هذا علاش طحنا وانكسرنا..

- باهي انا نبيهم كلهم يختفو ، ويحضر بابا بس ! :(💔

- راضية تاخدو نصيبي من الفرح وتعطوهولها !

- انتهت قصتنا قبل ما تبدا ، انتهت قصتنا قبل ما نشبع فيك حب !

- "ما كانش يحبني"

كان يحب سؤالي عليه ، من دونهم كلهم.
كان يحب اهتمامي بتفاصيله اللي هو بروحه مش ملاحظهم.
كان يحب مكالمتي متاع نص الليل اللي كلها وصايا من خوفي عليه.
كان يحب وقفتي معاه ، ومساندتي ليه ، وقت تضيق بيه.
كان يحب هدرزتي عليه ، ومدحي ليه قدام كل من يعرفنا.

كان يحب فكرة إني نحبه ونخاف عليه من دقة الشوكة ، وفكرة إني مستعدة ندير اي حاجة ، غير المهم يكون هو بخير .. هو ما كانش يحبني كان "يحب كل حاجة تنفع روحه" ،.

- كلهم فاتو عادي ، الا هو وقف ف نص حياتي وقلبي وعقلي ، وطبعا انا ما اعترضتش ،.♥️

- كـان جيشها اللي ضامنة بيه فوز كل معـركة تخوضها ، ما كانتش تعرف ان المعـركة فـ الاصـل بينها وبين جـيشها ، اللي حـ تطلع منها مكـسورة قلب ، وجناح .. !

- رقـد مزعلها ، ناض لقـي ورقة مكتوب فيها 'رضيت عيونك النعسانة هي اللي رضتني' ،.♥️

- تعرف !
لحظات هلبا نتمنى لو كانت توقعاتهم فيك غلط ، وان هما شايفين الصورة الغلط وانا اللي شايفة الصورة الصح ، نتمنى ان طلعت نفس الشخص اللي رسمته فـ خيالي ،ونكون فعلا عارفاتك ، وان هما عمرهم ما عرفوك.
تمنيت تكون الشخص الصح ،.

- ""عشمنا قلوبنا ب للي فات ، ونسينا نعيش"".

لـ صـورة القناة .💙

- ظلام بلاك ، تعالى ، نبي نشوف النور.

- ياريتك حطيت شوك ف قلبي بدال حبك ، ممكن وقتها ما كنتش ح نزعل لو مشيت .. وتباعدت .. !

- ما ننفخش روحي عليك ، وانا نقدر نحرقك ب كل تواضع ،.

- لو ما تفكرتنيش ف الوسع ؟ الاحسن انك ما تتفكرنيش ف الضيق ،.

- ما كانش حبيب ، كان عافية.♥️

- ياريتكم ما قلتوش الكلام اللي خلانا نبنو عليه هلبا احلام ، واللي نباتو ليالي ، وليالي نراجعو فيه ، ب عيون تلمع ، وفم يضحك ، ياريتكم تبكشتو وقتها ولا قلتوه ، ولا ياريتنا انطرشنا وما سمعناه،.

- ماتت الحاجات اللي كانت تبث ف الروح فينا ، ومتنا بعدها ،.