رحلتي من المريخ إلى كوكب الأرض 🙄
#رسايل_توون

دخل خلاص شهر ذي القعدة وهو من الأشهر الحُرم اللي ربنا قال عنهم "فَلَا تَظْلِمُوا فِيهِنَّ أَنفُسَكُمْ ۚ"
والأشهر الحرم هي (رجب، ذو القعدة، ذو الحجة، محرم)

يعني احنا داخلين على ٣ شهور المعصية فيهم مش زي باقي السنة
وفيهم كمان موسم من مواسم الطاعة اللي هو عشر ذي الحجه فلازم نستعد من دلوقتي

- وأول وأهم خطوة دلوقتي ...ترك أي ذنب أي ذنب
أي ذنب مهما كنت شايفه صغير ..لازم تسيبه
اقطع أي حاجة ماترضيش ربنا( البنت اللي بتكلمها ، الشاب اللي ماشية معاه ، اي حاجه بتشوفها او بتسمعها وانت عارف انها ماترضيش ربنا)

- تاني حاجه هنحارب عشان نرجع أي عبادة وقعت مننا بعد رمضان

- يعني ..الصلاة على وقتها
والسنن ، والضحى ، والقيام

- وأذكار الصباح و المساء
مع الأذكار بعد كل صلاة

- القرآن....لازم كل يوم ورد محدد (كمية محددة تقرئها ) وكل ماتزود انت الكسبان

- صيام الاثنين وخميس والأيام القمرية (١٣ و١٤ و١٥ من الشهر الهجري )

وغيرهم طاعات كتيييير ...بس دول خليهم خط أحمر ماتفرطش فيهم
بدأت الأشهر الحرم واقترب موسم جديد للطاعة فاستعد ليه صح

#رسايل

هتحضر/ي حفلة التخرج ؟؟!!
حبيت أفكركم إنها مش مجرد كام ساعة وتعدي
لا ده كام ساعة هيبقوا تقال اوي في ميزانك
ياشاركت في الحفلة والاختلاط اللي فيها والأغاني وكل الحاجات اللي ماترضيش ربنا وبقت كل الليلة دي وأي حد عمل زيك في ميزان السيئات
ياإما بقيت إيجابي وماحضرتش وشجعت غيرك انه مايشاركش في حاجة تغضب ربنا
بقيت أيجابي وعرفت زمايلك إن شكر نعمة التخرج إننا نفرح من غير مانغضب ربنا اللي وفقنا ووصلنا للحظة دي
وياسلام لو جمعتوا المبلغ اللي هيتدفع في الحفلة وجبتوا جهاز في مستشفى باسم دفعتكم او اي صدقة جارية
تفضل فرحتها في الدنيا والاخرة

خد قرارك واثبت إنك ماتعملش اللي يغضب ربنا وخد أجر المهاجر اللي النبي قال عنه:
"والمهاجرُ من هجر ما نهى اللهُ عنه"
شجع غيرك مين عارف مش يمكن تكون حسنة ليك أجرها وأجر كل من عمل بها إلى يوم القيامة 🥰

#رسايل

الكف
الخرزة الزرقاء
خمسة وخميسة
.........مالهم ؟؟!!
كل دي حاجات شركية ياجماعة
_ماينفعش تلبسي حاجه فيها خرزة زرقاء عشان تبعد عنك الحسد ❌
_ماينفعش تعلق الكف أو خمسة وخميسة في محلك ولا في عربيتك عشان تحميك من العين ❌
ماينفعش ياجماعة لحديث النبيﷺ((من تعلَّقَ تميمةً فقد أشرك.))

✋طيب أنا لابسها أو معلقها زينة بس ومش بقول أنها بتحمي من الحسد ولا حاجة ..
_برضو حرام وماينفعش ❌..
ماينفعش تلبس او تعلق حاجه فيها شرك وتقول مش قصدي ....لأنك كدة بتنشر اعتقاد شركي

✋ طب أنا بستعمل الخرزة الزرقاء عشان اللون الازرق بيدي طاقة ايجابية بس ..مش عشان الحسد
_ماهو الطاقة الايجابية دي مصدرها ايه...هل النبيﷺ قال عليها ..دي حاجات غيبية مانعرفهاش غير بوحي
مافيش حاجه اسمها ده بيجيب طاقة سلبية وبيعمل غم في البيت
وده بيجيب طاقة ايجابية وبيعمل فرح في البيت
الكلام ده مش حقيقي ومالوش اي اصل علمي .
ماتستهونوش بالحاجات دي ياجماعة
ماتقولوش مش هدخل النار عشان لابسه خرزة زرقاء ❌
طالما الدين نهانا عن حاجة نقول سمعنا واطعنا ومانفاصلش ونقول دي معصية صغيرة ودي معصية كبيرة✅

#رسايل

"وتظُن أنَّك لا تُعاقب بذنبك!

وأنتَ حُرمت قيام الليل، ووِردك من القرآن،
حُرمت السنن الرواتب، وانعقد لسانك عن ذكر الله!

طُبع على قلبك شيئًا فشيئًا وأنت لا تشُعر!

وتظُن أنَّك لا تُعاقب لأنك لست مُبتلى في دنياك!
وأي ابتلاء أشد من أن يُحرم الإنسان من الوصل مع الله؟"

#رسايل

"لا يَزالُ قَوْمٌ يَتَأَخَّرُونَ حتَّى يُؤَخِّرَهُمُ اللَّهُ."
تحذير النبي اللي بيقولك..اوعى تتأخر
اوعى ربنا يفتح لك باب طاعة وتتأخر بمزاجك أصل ساعتها فضل ربنا وكرمه هيتأخر عليك
اوعى تختار بمزاجك تكون آخر واحد في كل طاعة
اوعى تأخر الصلاة
اوعي تأخري الحجاب
اوعوا تتأخروا في حفظ القرآن وقراءته
لأن ممكن اووووي ..تُحرموا 😢
ماتنساش ان في يوم من الأيام والنبي خارج لغزوة تبوك
ناس قرروا يقعدوا بمزاجهم وساعتها ربنا قال للنبي:
"فَإِن رَّجَعَكَ ٱللَّهُ إِلَىٰ طَآئِفَةٍۢ مِّنْهُمْ فَٱسْتَـْٔذَنُوكَ لِلْخُرُوجِ فَقُل لَّن تَخْرُجُواْ مَعِىَ أَبَدًا وَلَن تُقَٰتِلُواْ مَعِىَ عَدُوًّا ۖ إِنَّكُمْ رَضِيتُم بِٱلْقُعُودِ أَوَّلَ مَرَّةٍۢ فَٱقْعُدُواْ مَعَ ٱلْخَٰلِفِينَ"
اتحرمووووا نهائي بسبب تأخرهم عن أمر ربنا
عشان كده...
أول ماتسمع أمر ربنا ...نفذ وقول سمعنا وأطعنا
وبلاش تأخير لأي طاعة ياعالم هيتفتح لك تاني فيها ولا ايه👍

#رسايل

لمن لا يصلون السنن!
خلال عام واحد فقط الفرق بين من يصلي السنن الرواتب ومن لا يصليها (٤٣٢٠) ركعة.

والفرق بين من يصلي الوتر ركعةً واحدة يومياً ومن لا يصليها (٣٦٥) ركعة.

والفرق بين من يركع ركعتي الضحى يومياً ومن لا يصليها (٧٣٠) ركعة.

فرق عدد الركعات لمن واظب على السنن ومن لم يحافظ عليها (٥٤١٥) ركعة.

فما بالكم بسنين!
فرق كبير ونحن لا نشعر به أبداً بتكاسلنا عن أدائها، وتذكر أن في كل ركعة سجودين يعني رفعة درجتين في الجنة بكل ركعة.
عن أبي عبداللَّه ويُقَالُ: أبُو عبْدِالرَّحمنِ ثَوْبانَ موْلى رسولِ اللَّهِ ﷺ قَالَ:
(سمِعْتُ رسولَ اللَّه ﷺ يَقُولُ: عليكَ بِكَثْرةِ السُّجُودِ ، فإِنَّك لَنْ تَسْجُد للَّهِ سجْدةً إلاَّ رفَعكَ اللَّهُ بِهَا دَرجَةً ، وحطَّ عنْكَ بِهَا خَطِيئَةً)
رواه مسلم.

وقال عليه الصلاة والسلام بأن السنن يكمل بها النقص في الفرائض يوم القيامة، فعن أَبِي هُرَيْرَةَ رضي الله عنه قَالَ:
(سَمِعْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ يَقُولُ إِنَّ أَوَّلَ مَا يُحَاسَبُ بِهِ الْعَبْدُ يَوْمَ الْقِيَامَةِ مِنْ عَمَلِهِ صَلَاتُه فَإِنْ صَلُحَتْ فَقَدْ أَفْلَحَ وَأَنْجَحَ وَإِنْ فَسَدَتْ فَقَدْ خَابَ وَخَسِرَ ، فَإِنْ انْتَقَصَ مِنْ فَرِيضَتِهِ شَيْءٌ قَالَ الرَّبُّ عَزَّ وَجَلَّ: انْظُرُوا هَلْ لِعَبْدِي مِنْ تَطَوُّع فَيُكَمَّلَ بِهَا مَا انْتَقَصَ مِنْ الْفَرِيضَةِ؟ ثُمَّ يَكُونُ سَائِرُ عَمَلِهِ عَلَى ذَلِكَ).
سنن الترمذي.
النسائي.
يكفي أنها تسد نقص صلاتنا في الفرض!
- منقول

#رسايل

مقااااطع ولا.....
اوعى تكون لسه بتقدم رجل وتأخر رجل في المقاطعة
اهو انت شايف اللي بيحصل كل يوم
الدول المجرمة اللي بتدعم إبادة اخواتك لحد النهاردة لسه فروعهم ومنتجاتهم في بلادنا
لا وايه كمان ...
ده فيه ناس زهقت ووقفت مقاطعة وبيقولوا مش عارفين نعيش
طب ودم إخواتكم ؟؟
صحيح المقاطعة وسيلة ضعيفة ..بس بتحسسنا إن لسه فينا شوية إنسانية
بتحسسنا إن لسه عندنا بقايا من المروءة
وبتوصل صوتك للناس دي والدليل تراجع أرباح أغلب الشركات اللي تم مقاطعتها بجد
قااااطع ..عشانك إنت
قااااطع ..حتى لو لوحدك
قاااااطع وانشر القضية وادعيلهم كتييير ..
عشان تقول يارب عملت كل اللي كنت أقدر اعمله

#رسايل

#علمني_إبراهيم (1) الإيمان والثقة بالله

من قصص الأنبياء اللي بتعلمنا الإيمان والثقة بالله، قصة سيدنا إبراهيم عليه السلام ، لما قومه أمروا بحرقه في النار، هو ما ترددش ولا خاف، بل أظهر إيمان عميق وثقة مطلقة في إن ربنا هيحميه..
القرآن بيقول: "قُلْنَا يَا نَارُ كُونِي بَرْدًا وَسَلَامًا عَلَى إِبْرَاهِيمَ"
ده بيعلمنا إن الإيمان الحقيقي بيظهر في أصعب الأوقات، وإن الثقة في الله هي اللي بتنقذنا من المحن ..
النبي محمد عليه الصلاة والسلام قال: "احفظ الله يحفظك، احفظ الله تجده تجاهك" (رواه الترمذي).

في حياتنا اليومية، ممكن نواجه تحديات صعبة زي فقدان وظيفة أو مرض خطير ، في اللحظات دي، لازم نفتكر إيمان سيدنا إبراهيم ونستمد منه القوة والثبات..
إننا نؤمن إن ربنا فقط هو من له الأمر ، وإنه لا يتركنا في مواجهة الصعاب والمحن ..
الإيمان والثقة في الله بيخلونا نواجه أي تحدي بثقة واطمئنان. ممكن نتعلم من قصة سيدنا إبراهيم إننا نلجأ لله في كل أمورنا ونتوكل عليه، وده هيخلينا نشعر بالأمان والسكينة حتى في أصعب الأوقات.

#رسايل_العشر1445هـ
#افضل_ايام_الدنيا
#رسايل

من أرقىةالعبادات اللي ننميها في قلوبنا
عبادة التسليم 🌱
إنك تفوض أمرك لله ..
ويكون شعارك : "كل ما عند حبيبي فهو حبيبي"
التسليم في كل أحداث حياتك ..
كانت عطاء أو كانت فقد ..
أو أمر شرعي من أوامر الله عزوجل ..
ضرب لينا سيدنا إبراهيم أعلى مثل في التسليم
(إِذْ قَالَ لَهُ رَبُّهُ أَسْلِمْ ۖ قَالَ أَسْلَمْتُ لِرَبِّ الْعَالَمِينَ)
امتى هنقول أسلمنا لرب العالمين ..؟!
امتى وقت مانسمع أمر أو نهي بآية أو حديث هنبطل جدال ..؟!
امتى هنغلب محاب الله عزوجل على محابنا ..؟!
ارفعها شعار
في كل حاجة في حياتك
[ أسلمت لرب العالمين ]

#عبادات_قلبية
#رسايل_العشر1445هـ
#رسايل

نداء إلى النساء في يوم عرفة📣

- يوم عرفة (يوم الوقفة) ده يوم عظيم وليه فضل كبيييير
سيبك من طقوس تنظيف البيت (حتة حتة كرسي كرسي سرير سرير .....حتي تحت السرير 😁)
مش يومه ياست الكل....

- يوم عرفة محتاجة تتفرغي فيه للعبادة والدعاء مش يوم النظافة السنوية

- صيام يوم عرفة بس بيكفر ذنوووب سنتين
قال الرسولﷺ عن صيام يوم عرفة : يكفر السنة الماضية والسنة القابلة) رواه مسلم .

- وكمان أفضل الدعاء دعاء يوم عرفة يعني أمنياتك كلها تجمعيها كده وتقعدي تركزي وتدعي مش تضيعي الوقت في التنظيف
في الحديث : (خير الدعاء دعاء يوم عرفة )

- مش كده وبس ده أكثر يوم يُعتق فيه عباد من النار هو يوم عرفة !

👈إن شاء الله يوم عرفة يوم السبت فلو حضرتك مصممة علي التنظيف يبقا الموضوع ينتهي يوم الجمعة
وتفضي كده يوم السبت للعبادة و الدعاء وبسسس😤
ربنا يتقبل منا ومنكم

#كاريكاتير_رسايل
#رسايل_العشر1445هـ
#أفضل_أيام_الدنيا

رسالة خاصة لمتابعي رسايل
بين يدي يوم عرفة
د.بهاء سكران
#رسايل

تخيل بيوم واحد حياتك كلها تتغير !!
غدًا السبت يطل علينا يوم من أعظم أيام الدنيا ..
يوم عرفة 💚
الله عزوجل يناديك في هذا اليوم ..؛
أيها العاصي ..
أيها المذنب ..
يا من قصرت في جنب الله ..
صيام هذا اليوم العظيم يكفر لك ذنوب سنة سابقة وسنة قادمة ..

• قال النبي صلى الله عليه وسلم والحديث فس صحيح مسلم « صيام يوم عرفة أحتسب على الله أن يكفر السنة التي قبله والسنة التي بعده »

اوعي تفرط في صيام اليوم ده ..
واوعى تفرطي في تضييعه في أكل أو شرب أو تنضيف !

عاوزين في اليوم ده نُرِ الله عز وجل من أنفسنا خيرًا ..

• كمان يقول النبي صلى الله عليه وسلم "خير الدعاء دعاء يوم عرفة"

أفضل وقت تدعوه عزوجل ويستجيب لك ..
هو اليوم ده .. يوم عرفة
ادخل المسجد في هذا اليوم ..
في الخمس صلوات..
بين الأذان والإقامة ..

وارفع يديك وقل يارب اغفرلي ..
يارب سامحني ..

- اللي نفسه يثبُت على الطريق👣
يارب عيني وأعرف أكمل في الالتزام💪

- اللي نفسه ربنا يديله أي شي من أمر الدنيا أو أمر الآخرة🌹
يرفع يديه ويوقن بسماع الله له ويدعو من كل قلبه ..

- اللي عنده مرض 🤕
اللي عنده أي شئ نفسه ربنا بحققهوله..

خير الدعاء دعاء يوم عرفة👌

• وانتي في البيت انجزي كل شغلك وحضري أكلك وجهزي شقتك من بالليل ..
عشان يكون عندك وقت للدعاء والصلاة والتضرع لله عزوجل
ولعل دعوة ترفع إلى الملك سبحانه وتعالى فتغير حياتك كلها 💖

#يوم_عرفة
#رسايل_العشر1445هـ
#افضل_ايام_الدنيا

إيه اخبار لبس العيد يا بنات؟
ياترى مناسب لمواصفات الحجاب الشرعي ولا لا؟
زي ما بتهتمي انه يكون متناسق وشيك متنسيش تتأكدي هل يرضي ربنا ولا لا..
رب العيد هو رب سائر الأيام..
والحرام مبيتحولش لحلال في العيد..
"ولا يبدين زينتهن"
مش معقوله نبقى طالعين من أيام مباركة وان شاء الله يكون اتغفرلنا فيها ذنوبنا وتاني يوم نضيع المغفرة ونعمل نفس الذنوب اللي كنا عوزين ربنا يغفرهالنا..

#رسايل_العيد

س/ ينفع أخد العيد راحة أفصل فيه من العبادات وأرجع أعملها بعد العيد ؟ هي العبادة مهمة في العيد يعني؟
*
ج/ يوم العيد هو يوم فرح وسعادة بس هو كمان من أعظم الأيام عند الله
في الحديث:
"إنّ أعظمَ الأيَّامِ عندَ اللَّهِ تبارَكَ وتعالَى يومُ النَّحرِ ثمَّ يومُ القُرِّ"
يوم النحر اول يوم العيد والقر تاني يوم العيد فعبادتك في الأيام دي أجرها كبييير ، والعبادات كتييييير ...
تكبيرات العيد عبادة ، صلة الارحام بدون اختلاط طبعا عبادة ، محافظتك على الصلاة في وقتها وماتضيعهاش في العيد افضل عبادة ، انك تبعد عن المعاصي والذنوب والحفلات والاغاني والاختلاط في العيد كل ده عبادة
انك ماتنساس فروضك وورد القرآن وركعتين القيام اللي كنت بتصليهم وتكمل عليهم في أيام العيد ....أجره كبيييير وعظيم
افرح بالعيد من غير ماتفصل عن العبادات...ممكن تقل شوية بس ماتفصلش خالص .. وصدقني لو فصلت خالص رجوعك للعبادة هيبقى صعب اوووي

#رسايل_العيد

🤚هاااااام
لو متعود تصوم الأيام القمرية اللي هي 13,14,15من الشهر الهجري...
عاوز أفكرك إن يوم 13ذوالحجة اللي هيكون رابع يوم العيد هو يوم من أيام التشريق اللي يحرم صيامها إلا للحاج المتمتع والقارن اللي ماقدرش يدبح (المتمتع والقارن = عمل عمرة وحج مع بعض في شهور الحج )
لحديث:
"لَمْ يُرَخَّصْ في أيَّامِ التَّشْرِيقِ أنْ يُصَمْنَ، إلَّا لِمَن لَمْ يَجِدِ الهَدْيَ"
❌️يعني ماينفعش تصوم يوم 13 ذوالحجة اللي هيكون الأربعاء الجاي
بس تقدر تصوم 14, 15, 16مثلا أو أي 3 أيام تانيين من الشهر

شير وعرف غيرك بقى عشان تاخد أجور كتير👍

#رسايل

((فَمَا ظَنُّكُم بِرَبِّ الْعَالَمِينَ))

ما ظنك برب رحمته وسعت كل شيء..
ما ظنك برب يتودد إلى خلقه وهو غني عنهم ..
ما ظنك برب رحمته سبقت غضبه ..
ما ظنك برب غفر لرجل قتل مانة فتاب عليه و أدخله الجنة!
ما ظنك برب غفر لامرأة من البغايا ؛ لأنها سقت كلبا...
ما ظنك برب يجزي للرجل نزع عود الشجرة من طريق الناس؟!
ما ظنك برب أدخل امراة إلى الجنة بتمرة أطعمتها بنتيها ؟!
ما ظنك برب يجزيك بالحسنة عشرة أمثالها ثم إلى سبعمائة ضعف؟!
ما ظنك برب يفرح بتوبتك ويضحك من أجل طاعتك ، ويجيب دعوتك ويفرج كربتك!
ما ظنك برب يتنزل إلى السماء الدنيا ويناديك ؛ ليغفر لك ويتوب عليك ويحقق ٱملك وذلك كل ليلة ؟!

ما ظنك برب؟!

( جميل ، لطيف ، حليم ، رحيم ، كريم ، غفور ، شكور ودود .........)
(سبحانه وتعالى) ~

- منقول

#رسايل

بزعل أوي أما ألاقي بنات شكلهم نظيف وبنات ناس بس بيهزروا بألفاظ خارجة أو شتايم بالأب والأم أو حتى كلمات المهرجانات والشباب..
في الحديث "فأخذَ بلسانِهِ، وقال: كُفَّ عليكَ هذا، فقُلتُ: يا نبيَّ اللهِ، إِنَّا لمؤاخَذونَ بما نتَكلَّمُ بِه؟ قال: ثَكلتكَ أمُّكَ يا معاذُ، وَهل يَكبُّ النَّاسَ في النَّارِعلَى وجوهِهِم، أوعلَى مناخرِهم، إلَّا حصائدُ ألسنتِهم"
ليه كده يا بنتي.. بقى انت ربنا يميزك بالحياء والرقة والجمال والهدوء وانت تعملي في نفسك كده؟
انا عارف انه هزار والله.. بس الهزار عمره ما كان مبرر للغلط وللحرام..
كلامك واسلوبك عنوان ليكي..
فخسارة اوي تكوني فعلا مؤدبة ومتعلمة وبنت ناس ويكون ده هزارك في الآخر..

#رسايل

#خدنا_أجاااااااااااازة
وانا بكلمني في مرة كدة لقيتني بقولي :
"مش عيب عليا لما أكون بقالي ١٦ سنة بدرس ..
وخلاص هتخرج من الكلية وهاعمل ماجستير ودكتوراه ..
ولسه مش بعرف اقرأ القرآن صح بالتجويد كما أنزله الله على النبي محمد صلى الله عليه وسلم 😞
ولا حتى حفظت من كلام ربي غير جزء عمّ .. ونسيته كمان❗
وبكروت العبادات المفروضة علي بالبركة وزي ما تيجي ..
ومكلفتش خاطري أتعلم الأحكام الفقهية الخاصة بيها !

- وكل ده كوم .. وإني معرفش عن ربي إلا القليل
حتى أسماؤه وصفاته ماسمعش عنها غير في النشيد ..
اللي بيشغلوه في أول الأفراح !
اتفاجئت أن تعلمي للحاجات دي فرض وواجب علي أتعلمه ..
يعني مادة نجاح ورسوب ، وبتنضاف للمجموع كمان 😮

- وانا براجع معلوماتي الكروية ..
لقيتني حافظ كل أسماء لاعبي الاحتياطي على دكة البدلاء لجميع المنتخبات .. واعرف أسماء أندية الدرجة التانية في كل الدوريات ..
في حين إني معرفش هم مين العشرة المبشرين بالجنة !!
ولا اعرف من أصحاب النبي غير سيدنا أبو بكر وعمر !!
ده حتى مفيش رواية تافهة إلا قرأتها ..
ولا فيلم هابط إلا اتفرجت عليه ..
ولا برنامج سخيف إلا تابعته ..
بالرغم إني ولا قرأت ولا سمعت أي حاجة عن قصص الأنبياء !!

مش بجد حاجة تكسف ؟!
هقابل ربنا اقوله ايه ؟!
لما يسألني عن "عمري" فيم أفنيته ..
وعن "شبابي" فيم أبليته ..؟!

وساعتها أخدت قرار إن العمر مش بعزقة 💪
والوقت أغلى من سوق العقارات في الزمن اللي احنا فيه ده 🤨
وفرصة إن أنا خلصت امتحانات وأخدت الأجازة ..
ابدأ أتعلم ديني واعرف ربي ..
قال رسول الله صلى الله عليه وسلم : "منْ سَلَكَ طَريقًا يَبْتَغِي فِيهِ علْمًا سهَّل اللَّه لَه طَريقًا إِلَى الجنةِ"
وقال أيضًا : "مَن يُرِدِ اللهُ به خيرًا يُفَقِّهْهُ في الدِّينِ"
اللهم علمنا ما ينفعنا.. وانفنا بما علمتنا
ولا تجعل الدنيا أكبر همنا ولا مبلغ علمنا

#رسايل_الصيف
#رسايل

صحيح عشر ذي الحجة خلصت بس ....
الاشهر الحرم ماخلصتش ..احنا لسه في شهر حرام الحسنات والسيئات فيه مش زي في باقي السنة

_فاللي طالع من العيد كسلان وبيضيع صلاته ويكسل عنها ...خد بالك تضييع الصلاة كبيرة طول السنة بس كمان احنا في شهر حرام يعني الذنب فيه مضاعف عن باقي السنة كمان

_واللي من بعد العيد نست الحجاب الشرعي والدنيا حر ومصايف وكده ...خدي بالك الحجاب مطلوب طول السنة بس ذنب عدم التزامك بحجابك في الاشهر الحرم مضاعف اكتر

_واللي خدت الاجازة وبدأت تتابع المسلسلات والافلام...خدي بالك احنا لسه في الأشهر الحرم

🚫ماتخلوش عبادتكم وطاعتكم في المواسم بس 🚫
خلوها طول السنة (احب الأعمال إلى الله أدومها وإن قل ) ولما تكون في شهر حرام خاف من الذنوب اكتر وخاف تظلم نفسك فيهم 👍

#رسايل