يابنات خدوا بالكم..
رجلك لازم تتغطى في الشارع وقدام أي راجل والله
مافيهاش خلاف أصلا
ماينفعش خاااالص تلبسي هيلز وتبقى رجلك مكشوفة كده وحاطة مانيكير كمان
وطبعا ماينفعش خلخال أكيد ....والله ماينفع
والبنات اللي بتلبس جيبات قصيرة مبينة رجلها..بقى ده كلام برضو؟
النبي وصى كل بنت إنها تطولها لبسها وقال "يرخينه ذراعا" تفتكري ده ليه؟؟
عشان رجلك ماتبانش ويبقى حجابك صح
الحجاب مش مجرد غطا للشعر لا ...
الحجاب تغطية للزينة ولأي حاجة ملفتة
ومش معنى اني بقولك ماينفعش تلبسي كده إنك تقولي خلاص مش هلبس الحجاب أو هخلعه
لا برضو ...الصح أظبط حجابي للحاجة اللي ترضي ربنا
ألبس شراب وجيب ودريسات طويلة وأغطي رجلي
والبنات اللي بتلبس شرابات قصيرة اللي هي يدوب بتغطي الكعبين (العضمتين البارزتين على جانبي القدم)
خلو بالكم محتاجين بنطلونات تحت الدريس لان مع الحركة أوحتى لما تقعدي الساقين بينكشفوا فالبسي بنطلون او طولوا الشرابات

ربنا يستركم في الدنيا والآخرة ويجعل حجابكم ستر ليكم من النار🫶

#رسايل

بمجرد إعلاااان نتيجة #الثانوية_العامة و #الثانوية_الأزهرية هتدخلوااا اختبار ثانى ...
وهو الشكر والاعتراف بالنعمة في حالة المجموع العالي
و الصبر والرضا بقضاء الله في حالة المجموع الوحش
الاختبار دا النجاح فيه أهم من حصولكم على أعلى المجاميع

_فلو مجموعك عااااالي ....مبروووووك يابطل 🤝 بس ماتتغرش وتنسب الفضل لنفسك وتقول انا اللي ذاكرت وانا اللي تعبت وده مجهودي ....قول الحمد لله اللي وفقني لانك من غير توفيقه كنت هتضيع ...فانسب الفضل كله لله وحده

_ ولو مش مبسوط من النتيجه ومجموعك وحش ...معلش تقبل نتيجتك بالصبر والرضا و اعرف ان ده الخير ، فرب الخير لا يأتي إلا بالخير🤍...
واصنع انت قمتك بنفسك وأثبت نجاحك في أي طريق 💪🏼
واعرف ان الثانوية العامة مش نهاية الدنيا هي مجرد محطة على الطريق
فلو زعلان النهاردة من النتيجة....ماتقلقش بكرة هتفرح إن شاء الله ..بس صبرك أو سخطك هو ده اللي هيتكتب في ميزانك👌

#رسايل

من الآخر الدنيا همومها مابتخلصش وهنفضل مشغولين بيها
"ألهاكم التكاثر"
بنجري ورا الشهادة والأكل والشغل والشقة والجواز والخلفة وتربية العيال .. وهكذا ..
• هانفضل مشغولين حتى الموت
"ألهاكم التكاثر ، حتى زرتم المقابر"
- ماسمعتش عن طالب الثانوية اللي امتحن بس مات قبل ما يعرف إنه نجح وجاب ٩٨٪ 💔
- والعروسة اللي خلعوها فستان الفرح ولبسوها الكفن 😥
- والشاب اللي مات قبل ما يستلم الوظيفة ..
والراجل اللي مات قبل ما يستلم مفتاح البيت اللي بناه ..
- والمسافر اللي ملحقش يوصل ، واللي كان بياكل وملحقش يبلع اللقمة !
• فاحنا محاصرين بين الدنيا اللي همومها ومشاغلها مابتخلصش ..
وبين الموت اللي بيجي في أي عمر وأي مكان وبدون استئذان 🤚
طيب والحل؟!
أعيش دنيتي ولا أشتري آخرتي؟!
الحل وبدون تعارض زي ما ربنا قال :
"وَابْتَغِ فِيمَا آتَاكَ اللَّهُ الدَّارَ الْآخِرَةَ ۖ وَلَا تَنسَ نَصِيبَكَ مِنَ الدُّنْيَا"
• استغل الحياة ومعطياتها في الطاعات اللي هتنفعك في الآخرة ..
خد من دنياك لأخراك ..
عيش حياتك وشوف مصالحك .. لكن
لما الظهر يأذن وانت في الشغل ..
اقفل المحل وروح صلي ..
اشتغل واعمل فلوس ، وطلع زكاتك وتصدق ..
وانتِ اتزيني في بيتك براحتك ..
واما تيجي نازلة البسي حجابك وغطي الزينة ..
اخرج مع أصحابك واسهر من غير ماتخربها ، وروَّح صلي ٣ ركعات قيام واوعى الفجر يضيع عليك ..
تصفَّح وتابع السوشيال ميديا ، بس ماتنساش تقرأ في المصحف كمان ..
روح مطاعم وكمان صوم ٣ أيام من كل شهر ..
العب جيم وقبل الظهر صلي الضحى صدقة عن جسمك ..
(اوعى تنسى آخرتك)

#رسايل

س/ هو حرام البنت تحط صورها الشخصية أو صور الفرح على مواقع التواصل (فيس ،واتس) ؟

ج /
هو دلوقتي الأصل إن الشرع أمر البنت بالستر عمومًا،بكل أشكاله لدرجة حتى صوتها مايبقاش عالي ولا فيه خضوع ، أمرها تلبس الحجاب واللبس الواسع وتستر جسمها عن عيون أي راجل
لأن مجرد نظر الرجال ليها حرام
طيب لما تحط صورتها ثابتة قدام عينهم مش بس ان فيه مخالفة لمقصد الشرع ده كمان فيه إعانة على الحرام وطبعا هيزيد الذنب أكثر لو النظر بشهوة كمان
****
س/ طب أنا هحط صورتي بالحجاب عادي مش ظاهر غير الوجه ايه الحرام في كده ؟
ج/ فيه فرق كبير بين اللي بيشوفك وانتي في الشارع وبين صورة محطوطة قدام الشباب ليل ونهار، ده كمان ممكن انتي تمسحيها وحد تاني يحتفظ بيها ويتفرج عليها كل شوية وكل ده حرام وهيكون في ميزانك أولا وميزانه ثانيا
****
س/طب أنا منتقبة ينفع أحط صورتي ؟؟
ج/ هقولك نفس الكلام ...مقصد الشرع هو الستر واللي النقاب جزء منه ...فكده بنخالفه
ده غير ان مافيش أي حاجة تستدعي انك تحطي صورتك

الخلاصة:
ماينفعش البنت تحط صورها على مواقع التواصل سواء صور الفرح أو غيرها وسواء بحجابها كامل أو لا

#س_و_ج
#رسايل

ممكن أسألك سؤال ياللي مش ملتزمة بحجابك زي ما ربنا أمر 🙂
- انتي مرتاحة و أنت بعيد عن ربنا ؟!
- مطمنة طيب وانتي حاسه وعارفة انك بتعصيه ؟!🤔

[ ايه في الدنيا يستاهل إن بسببه ربنا يغضب علينا ؟! ]

#ماتقوليش : انتو ايه يا جماعة مكبرين الموضوع .. تيكت ايزي مالكم ❗️
لأ هو الموضوع كبير لوحده ..
وربنا هو اللي شرّع وأمر سبحانه وتعالى ..
🔸الموضوع ان ربنا أمرك .. وانتي شايفه انه عادي يعني عصيته !
🔸الموضوع ان ربنا قال : "يَا أَيُّهَا النَّبِيُّ قُلْ لأَزْوَاجِكَ وَبَنَاتِكَ وَنِسَاءِ الْمُؤْمِنِينَ يُدْنِينَ عَلَيْهِنَّ مِنْ جَلابِيبِهِنَّ"
🔸 الموضوع ان ربنا قال : "وَلَا يُبْدِينَ زِينَتَهُنَّ" وانتي شايفة عادي أخرج بمكياج ولا لبس ضيق مبين كل مفاتن جسمي !

🔸الموضوع كبير لأن النبي صلى الله عليه وسلم يقول :
" صنفان من أهل النار لم أرهما: .... ونساء كاسيات عاريات، مائلات مميلات، رءوسهن كأسنمة البخت المائلة، لا يدخلن الجنة ولا يجدن ريحها"
كاسيات عاريات .. لابسين وكأنهم مش لابسين
لبس مجسم كل مفاتنهم !
مائلات مميلات .. ماشيين بيدلعوا في الطريق !
عقابهم : مش هيدخلوا الجنة ومش هايشموا ريحتها طالما هما ع الوضع ده !

- محتاجين وقفة مع نفسنا والله يا بنات
نفكر كدة ونحسبها صح
عشان ربنا يرضى عنا 💚

#حجابي_حياتي
#رسايل

_لو بتحطي ستوري ليكي ومعاها أغاني ....
_لو بتعزم على واحد بسيجارة...
_لو بتحبي تتكلمي على المسلسلات والأكشن الرهيب اللي فيها وممكن كمان تنزلي مواعيدها (من باب التعاون على الخير يعني 😊)
_لو بتنزل صور أو أغاني وفيديوهات على صفحتك ولا على جروبات الواتس ولا الفيس ..
_لو بتشجعي صاحبتك على لبس الموضة اللي مايرضيش ربنا ...أو بتشجعيها تخلع حجابها..أو بتتريقي على لبسها الواسع

_لو بتعمل/ي حاجه من دول أو بتعملهم كلهم ....
عاوز أفكركم ..
إنك هتتفاجؤا يوم القيامة بجبال سيئات ماكنتش على بالكم أبدا ..
سيئات واحد سمع الأغنية وعجبته وكانت سبب انه فضل يسمع أغاني طول عمره
أو واحد أدمن التدخين بعد كده
أو واحدة خلعت حجابها..
هتلاقي الميزان مليان بحاحات ماكنتش تتوقعها

لو بتعمل/ي المعصية كفاية عليك ذنوبك ..ماتشيليش كمان ذنوب غيرك
وافتكروا دايما ...
(وَلَيَحْمِلُنَّ أَثْقَالَهُمْ وَأَثْقَالًا مَّعَ أَثْقَالِهِمْ)

#رسايل

س/ امتى نرفع إيدينا في الصلاة واحنا بنقول الله اكبر ؟
في أربع مواضع في الصلاة ترفع فيها ايدك مع التكبير :
1️⃣ في بداية الصلاة خالص تكبيرة الاحرام بترفع ايديك وتقول الله أكبر
2️⃣ لما تيجي تركع كل ركعة بترفع ايديك وتقول الله أكبر
3️⃣ لما تقوم من الركوع في كل ركعة بترفع ايديك وتقول سمع الله لمن حمده ربنا ولك الحمد
4️⃣ لما تخلص التشهد الاوسط (الاول )بعد الركعتين وهتقوم تجيب الركعة التالته ترفع ايديك وتقول الله أكبر

👈 رفع الإيد بيكون مكانه قصاد الكتفين أو جنب الأذنين
***
س/طيب وفي باقي الصلاة مش بقول الله أكبر ؟؟
ج/ لا...بتقول الله أكبر بس من غير ماترفع ايديك
***
*ملحوظة*
اسمها الله أكبر
مش الله و أكبر ❌

#س_و_ج
#رسايل

{ أَن تَقُولَ نَفْسٌ يَا حَسْرَتَا عَلَىٰ مَا فَرَّطتُ فِي جَنبِ اللَّهِ }

الآية دي - عافانا الله وإياكم - هيقولها ناس كتير يوم القيامة ..
ناس استهانوا بأوامر الله واستباحوا محرماته 😞

• ناس اتقالها الربا حرام ..
وقالت لا ماتضيقوش علينا والشيخ فلاني قال حلال ..

• ناس اتقالها الأغاني والمسلسلات حرام ..
وكبروا دماغهم وقالوا اومال نسلي نفسنا ب ايه ..؟!

• ناس اتقالها الإختلاط والتساهل في التعامل بين الشباب والبنات لا يجوز ..
وقالا انتو معقدين أهم حاجة النية

• ناس اتقالها اللبس دا لا يرضي الله عزوجل ..
وسخروا وقالوا ربنا رب قلوب
ونسوا إنه "لو صلحت البواطن لصلحت الظواهر" ✋

• ناس اتقالها الصلاة ركن وفريضة ماينفعش نتهاون فيها ..
استهانوا وقالوا هنعمل ايه الوقت مفيهوش بركة ومش بنلحق ، هانسيب أشغالنا ومحاضراتنا ونروح نصلي ازاي ..؟!

» ناس وناس وناس ..
يوم القيامة هايعضوا علي أيديهم من الندم لما يشوفوا أثر تفريطهم في حق الله عزوجل ..

يارب مانكون منهم ..
يارب عافينا يارب وسلمنا ..

#رسايل

هو اللي بيحصل في الأفراح ده بجد ؟؟؟!!
يعني حقيقي فيه عرايس بيخلعوا حجابهم يوم الفرح كده عادي؟؟!!
والعروسة وأصحابها والعريس واصحابه كله بيرقص ده برضو عادي؟؟!!!
والله اللي بيحصل ده مش عادي وعمره ماهيبقى عادي
وذنب الناس دي كلها في الاول هتبقى في ميزان العروسة والعريس اللي قالوا ليلة العمر
هتبقى في ميزان كل اللي سعى ولو بكلمة عشان الفرح يتعمل بالصورة دي

ماحدش قال ماتفرحوش...بس افرحوا بالحلال
ماتبدؤش حياتكم بحاجة تغضب ربنا عشان ربنا يباركلكم في حياتكم
اعملوا فرح بس مافيهوش اختلاط ورقص للبنات قدام الشباب👍
اعملوا اللي عليكم عشان ماتطلعوش من الليلة دي بكمية سيئات مالهاش عدد

#رسايل

{ وَاللَّهُ يُرِيدُ أَن يَتُوبَ عَلَيْكُمْ }

لن تجد ألطف بك من الله!

الله يريد أن يتوب عليك من السجائر والأفلام الإباحية والمال الحرام
الله يريد أن يتوب عليكِ من البنطلونات واللبس الضيق والمكياج
الله يريد أن يتوب عليكم من مكالمات الهاتف والمقابلات

لأنه يريد أن يرحمك ..
يريد أن يدخلك جنته ولا يعذبك ..
يريد لك الخير ..

ليه مُصر تبعد عن طاعته ، وهو يريد بيك الخير ..؟!
ليه مُصرة تعرضي وهو يعلم ضعفك ويعلم أن قوتك بالقرب منه .. ؟!
يمد يده بالليل ليتوب مسيء النهار ..
ويمد يده بالنهار ليتوب مسيء الليل ..
يتودد لنا سبحانه وتعالى وهو مستغن عنا !
لو ان كل الخلق ..
اولهم وآخرهم .. إنسهم وجنهم
كانوا على أتقى قلب رجل واحد منهم ..
مازاد ذلك من ملكه شيء !!

بالرغم من ذلك ..؛
يتودد إليك بقبول توبتك ليلم شعث قلبك بالقرب منه ..
مع غناه عنك وحاجتك إليه

اللهم تب علينا واغفرلنا وارحمنا 💙

#رسايل