Green Way
1.85K subscribers
1.01K photos
1 video
972 links
စိုက်ပျိုးရေး မွေးမြူရေးဆိုင်ရာ နည်းပညာများ
Download Telegram
ဥစားကြက်များတွင် နှုတ်သီးကို သတ်မှတ်အချိန်တွင် ကောင်းမွန်စာ ဖြတ်ပေးခြင်း (beak trimming) ပြုလုပ်ပေးခြင်းဖြင့် အစာလေလွင့်ဆုံးရှုံးမှုကို လျှော့ချနိုင်ပါသည်။
==================

ယေဘုယျအားဖြင့် မွေးမြူရေးခြံတစ်ခြံအတွက် ကုန်ကျစရိတ် စုစုပေါင်း၏ ၇၀ ရာခိုင်နှုန်းဝန်းကျင်ခန့်မှာ အစာအတွက် ကုန်ကျစရိတ် ဖြစ်ပါသည်။ မွေးမြူထားသည့် တိရစ္ဆာန်အမျိုးအစား၊ မွေးမြူနည်းစနစ်တို့ပေါ်မူတည်၍ ကွဲပြားမှုရှိနိုင်သည့်တိုင်အောင်၊ အစာဖိုးကုန်ကျစရိတ်သည် အခြားကုန်ကျစရိတ်များအားလုံးထက် ပို၍ များနေမည်မှာတော့ သေချာပါသည်။

ထို့ကြောင့် မွေးမြူရေးခြံမှ အကျိုးအမြတ်ရရှိနိုင်မှုသည် အစာဖိုး ကုန်ကျစရိတ်ကို မည်မျှ လျော့ချနိုင်သနည်း၊ အစာကို မည်မျှထိရောက်အောင် ကျွေးမွေးနိုင်သနည်း ဆိုသည့် အချက်ပေါ်တွင် များစွာမူတည်နေပါသည်။ အထူးသဖြင့် အစာဈေးနှုန်း မြင့်တက်လာသည့်အခြေအနေတွင် အစာဖိုးကုန်ကျစရိတ် လျှော့ချရေးကို ပိုမို၍ အာရုံစိုက်လုပ်ဆောင်ရန် လိုအပ်လာမည် ဖြစ်ပါသည်။

မွေးမြူရေးခြံတစ်ခြံတွင် အစာဖိုးကုန်ကျစရိတ်ကို ချွေတာနိုင်မည့် နည်းလမ်းများစွာ ရှိနိုင်ပါသည်။ နည်းလမ်းအားလုံးနီးပါးတွင် ဘေးထွက်ဆိုးကျိုး အနည်းနှင့်အများ ရှိကြပါသည်။ ဥပမာအားဖြင့် အစာဖိုးကုန်ကျစရိတ်ကို လျှော့ချရန်အတွက် စက်ရုံထုတ် အသင့်ကျွေးရောစပ်စာ(ကုမ္ပဏီအစာ)များအစား မိမိတို့ဒေသထွက် အစာကုန်ကြမ်းများကို အသုံးပြု၍ တိရစ္ဆာန်အစာ ကိုယ်တိုင်ရောစပ်ထုတ်လုပ်မည် ဆိုပါက ကုန်ကျစရိတ်ကို အတိုင်းအတာတစ်ခုအထိ လျှော့ချနိုင်မည် ဖြစ်သော်လည်း၊ အစာကုန်ကြမ်းများ၏ အရည်အသွေးနှင့် အာဟာရဓာတ်ပါဝင်မှုအား ဓာတ်ခွဲစစ်ဆေးခြင်း၊ အစာမထုတ်လုပ်မီ၊ ထုတ်လုပ်စဉ်နှင့် ထုတ်လုပ်ပြီးချိန်တွင် အရည်အသွေးထိန်းချုပ်ခြင်း၊ အစာဖော်မြူလာများကို တိတိကျကျတွက်ချက်ရန် ခက်ခဲခြင်း စသည့် ပြဿနာများနှင့် ရင်ဆိုင်ရမည် ဖြစ်ပါသည်။

အစာအရည်အသွေးကို ပြည့်မီအောင် မထုတ်လုပ်နိုင်ပါက တိရစ္ဆာန်များအတွက် အာဟာရပြည့်ဝပြီး၊ ဘေးကင်းလုံခြုံသည့်အစာများ ကျွေးမွေးနိုင်မည် မဟုတ်ပါ။ အကျိုးဆက်အနေဖြင့် အသား၊ နို့၊ ဥ ထုတ်လုပ်မှုနှင့် အရည်အသွေးတို့ကို ထိခိုက်စေမည် ဖြစ်ပါသည်။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

⛔️ အစာဖိုးကုန်ကျစရိတ်လျှော့ချရေး နည်းလမ်းများစွာအနက်၊ မဖြစ်မနေ ဆောင်ရွက်ရန် လိုအပ်ပြီး၊ ဘေးထွက်ဆိုးကျိုး လုံးဝမရှိနိုင်သော နည်းလမ်းတစ်သွယ်မှာ “အစာအလေအလွင့် လျှော့ချရေး” ဟူသည့် နည်းလမ်းပင် ဖြစ်ပါသည်။ မွေးမြူရေးခြံအများစု (အထူးသဖြင့် အသေးစားနှင့်၊ အလတ်စား မွေးမြူရေးခြံများ)တွင် အစာများ လေလွင့်ဆုံးရှုံးခြင်းမှာ ကြီးမားသည့် ပြဿနာတစ်ရပ် ဖြစ်ပါသည်။ တချိန်တည်းတွင် မွေးမြူသူများက စနစ်တကျ ကိုင်တွယ်ဖြေရှင်းရန် မေ့လျော့ပျက်ကွက်နေသည့် စီမံခန့်ခွဲမှု တစ်ရပ်လည်း ဖြစ်ပါသည်။

#အစာလေလွင့်ဆုံးရှုံးစေသည့် အကြောင်းအရင်းများ

မွေးမြူရေးခြံများတွင် အစာလေလွင့်ဆုံးရှုံးစေသည့် အကြောင်းအရင်းများစွာရှိရာ ယင်းတို့ကို အုပ်စု ၂ စုအဖြစ် ခွဲခြားလေ့လာကြည့်နိုင်ပါသည် -

တိုက်ရိုက်ဆုံးရှုံးလေလွင့်မှုများ (Direct waste)

• အစာခွက်များပုံသဏ္ဍန်မမှန်ခြင်း၊ ပျက်စီးယိုယွင်းနေခြင်း

• အစာခွက်များကို ထားရှိသည့်နေရာ မှားယွင်းခြင်း

• အစာခွက်မှ လက်ခံနိုင်သည့် ပမာဏထက် ပိုလျှံနေအောင် အစာများ ထည့်ထားခြင်း

• အစာတွင် အမှုန်ပါဝင်မှုမှာ လိုအပ်သည်ထက် များပြားလွန်းနေသဖြင့် ယင်းအမှုန်များမှာ လေထဲသို့လွင့်ကာ ဆုံးရှုံးခြင်း

• ခြံထဲသို့ ကြွက်၊ ငှက် အစရှိသည့် တိရစ္ဆာန်များ ဝင်ရောက်ကာ အစာများကို စားသောက်ကြသဖြင့် ဆုံးရှုံးလေလွင့်ခြင်း

• အစာခွက်ထဲတွင် အစာများ ပိုနေသဖြင့် စွန့်ပစ်ရခြင်း

• အစာ မလတ်ဆတ်ခြင်းနှင့် မှိုများပေါက်ပွားခြင်းကြောင့် အစာအရည်အသွေးကျဆင်းခြင်း

#သွယ်ဝိုက်၍ ဆုံးရှုံးလေလွင့်ခြင်း (Indirect waste)

• အစာမှ အသား၊ နို့၊ ဥ အဖြစ်သို့ ပြောင်းလဲနှုန်း (Feed conversion rate) ညံ့ဖျင်းခြင်း

• တိရစ္ဆာန်၏ အာဟာရဓာတ်လိုအပ်ချက်ထက် ပိုမို၍ ကျွေးမွေးခြင်း

• တိရစ္ဆာန်တွင် ကပ်ပါးရောဂါပိုးများ (ဥပမာ၊ သန်၊ သန်း၊ မွှား အစရှိသည်) စွဲကပ်ကာ အာဟာရဓာတ်များ လုယူစားသုံးခြင်းကို ခံနေရခြင်း

• ရောဂါအချို့ ကူးစက်ခံရပြီးနောက် အစာစားသလောက် ထုတ်လုပ်မှု မကောင်းတော့ခြင်း

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

⛔️ မွေးမြူရေးခြံများတွင် အစာလေလွင့်ဆုံးရှုံးမှု ဖြစ်ပေါ်စေသည့် အချက်အလက်များစွာအနက်မှ အချို့ကိုသာ ဥပမာပေး ဖော်ပြထားခြင်း ဖြစ်ပါသည်။ ဆုံးရှုံးလေလွင့်မှု အုပ်စုနှစ်စုအနက် တိုက်ရိုက်ဆုံးရှုံးလေလွင့်မှုများမှာ မိမိ၏ ခြံကို အနည်းငယ်မျှ အာရုံစိုက်ကြည့်ရှုရုံမျှဖြင့် သတိပြုမိနိုင်သည့် ဆုံးရှုံးလေလွင့်မှုများ ဖြစ်ပါသည်။ သွယ်ဝိုက်၍ ဆုံးရှုံးလေလွင့်မှုများကိုမူ ရေရှည်လေ့လာ သုံးသပ်ကြည့်မှသာ သိရှိနိုင်ပါသည်။

#အစာလေလွင့်ဆုံးရှုံးမှုကို လျှော့ချရန် နည်းလမ်းများ
မိမိ၏ မွေးမြူရေးခြံတွင် အစာလေလွင့်ဆုံးရှုံးမှုကို ဖြစ်ပေါ်စေသည့် အကြောင်းအရင်းကို မှန်မှန်ကန်ကန်ရှာဖွေကာ လိုအပ်သည့်ပြုပြင်ပြောင်းလဲမှုများ ဆောင်ရွက်ပေးခြင်းဖြင့် အစာလေလွင့်ဆုံးရှုံးမှုကို သိသိသာသာ လျှော့ချနိုင်မည် ဖြစ်ပါသည်။ ထည့်သွင်းစဉ်းစားသင့်သည့် အစာလေလွင့်ဆုံးရှုံးမှု လျှော့ချရေး နည်းလမ်းအချို့မှာ အောက်ပါအတိုင်း ဖြစ်ပါသည် -

⛔️ တိရစ္ဆာန်များ ရွေးချယ်မွေးမြူရာတွင် အစာမှ အသား၊ နို့၊ ဥ သို့ ပြောင်းလဲနှုန်း (FCR) ကောင်းမွန်သည့်မျိုးကို ရွေးချယ်မွေးမြူသင့်ပါသည်။

⛔️ မိမိမွေးမြူထားသည့် တိရစ္ဆာန်အမျိုးအစား၊ အသက်အရွယ်၊ အရွယ်အစားတို့နှင့် ကိုက်ညီသည့် အစာခွက်၊ အစာကျွေးသည့် ကိရိယာများကိုသာ အသုံးပြုသင့်ပါသည်။

⛔️ အစာခွက်များ သို့မဟုတ် အစာကျွေးသည့် ကိရိယာများ၊ နေရာများကို ပုံမှန်စစ်ဆေး၍ ပြင်ဆင်မှု လိုအပ်ပါက အချိန်မီ ပြုပြင်ပေးသင့်ပါသည်။

⛔️ အစာခွက်များကို တိရစ္ဆာန်များ အစာရယူစားသုံးရန် လွယ်ကူသည့် နေရာ၊ အနေ အထားတွင် ထားရှိရပါမည်။ တချိန်တည်းတွင် တိရစ္ဆာန်က အစာများကို ဆုံးရှုံးစေသည့် အပြုအမူမျိုး (ဥပမာ အစာခွက်ကို မှောက်ပစ်ခြင်း) မပြုလုပ်ရအောင် စီမံဆောင်ရွက်ထားသင့်ပါသည်။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

⛔️ တိရစ္ဆာန်၏ သဘာဝအရ အစာဆုံးရှုံးလေလွင့်မှု ဖြစ်ပေါ်စေပါက ယင်းသဘာဝကို ပြုပြင်ပြောင်းလဲပေးနိုင်မည့် နည်းလမ်းကို ရှာဖွေသင့်ပါသည်။ ဥပမာ ဥစားကြက်များတွင် နှုတ်သီးကို သတ်မှတ်အချိန်တွင် ကောင်းမွန်စာ ဖြတ်ပေးခြင်း (beak trimming) ပြုလုပ်ပေးခြင်းဖြင့် အစာလေလွင့်ဆုံးရှုံးမှုကို လျှော့ချနိုင်ပါသည်။

တိရစ္ဆာန်အမျိုးအစားနှင့် အသက်အရွယ်အလိုက် သင့်လျော်သည့် အစာပုံစံ (ဥပမာ အမှုန့်၊ အတောင့်) ကို မှန်ကန်စွာ ရွေးချယ်၍ ကျွေးမွေးသင့်ပါသည်။

တစ်ရက်တာအတွင်း တိရစ္ဆာန်များအား ကျွေးမွေးရမည့် အစာပမာဏကို တကြိမ်တည်းဖြင့် စုထည့်ပေးမည့်အစား အစာအနည်းငယ်စီ အကြိမ်ကြိမ်ခွဲ၍ ကျွေးမွေးခြင်းဖြင့် အစာဆုံးရှုံးလေလွင့်မှုကို သက်သာစေပါသည်။

လိုအပ်ပါက မွေးမြူသည့်စနစ်ကို ပြုပြင်ပြောင်းလဲရပါမည်။ ဥပမာ ဥစားကြက်များအား အခင်းထူစနစ်ဖြင့် မွေးမြူခြင်းထက်၊ လှောင်အိမ်စနစ်ဖြင့် မွေးမြူပါက အစာဖိတ်စင်လေလွင့်မှုကို လျော့ကျစေပါသည်။ ကြက်များသည် လှောင်အိမ်ထဲတွင် လှုပ်ရှားသွားလာမှု နည်းသဖြင့် ယင်းသို့ လှုပ်ရှားသွားလာမှုအတွက် လိုအပ်သည့် အာဟာရဓာတ်ကို လျှော့ပေါ့ကျွေးမွေးနိုင်မည် ဖြစ်ပါသည်။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

⛔️ တိရစ္ဆာန်အမျိုးအစာနှင့် အသက်အရွယ်အလိုက် သတ်မှတ်ထားသည့် အာဟာရဓာတ်နှင့် အစာပမာဏကိုသာ ချိန်ဆကျွေးမွေးသင့်ပါသည်။ အစာတွင်ပါဝင်သော အာဟာရဓာတ် ပမာဏသည့် တိရစ္ဆာန်က အမှန်တကယ်လိုအပ်သည့် အာဟာရဓာတ်ပမာဏထက် ပိုများနေပါက အစာဖိုးကုန်ကျစရိတ် ပိုမိုကြီးမြင့်မည့်အပြင်၊ တိရစ္ဆာန်ကလည်း ပိုလျှံနေသည့် အာဟာရဓာတ်များကို အသုံးမချနိုင်ဘဲ စွန့်ထုတ်ပစ်မည်ဖြစ်ရာ ဆုံးရှုံးလေလွင့်မှုကို ကြီးမားစေပါသည်။

အစာသည် အာဟာရဓာတ်ပြည့်ဝရုံမျှမက တိရစ္ဆာန်အတွက် အရသာကောင်းမွန်မှု ရှိရန် လိုအပ်ပါသည်။ သို့မှသာ ကျွေးသမျှအစာကို တိရစ္ဆာန်က အကုန်အစင် စားသောက်ကာ ထုတ်လုပ်မှုကောင်းမွန်မည် ဖြစ်ပါသည်။ အရသာ မကောင်းမွန်ပါက တိရစ္ဆာန်၏ အစာခွက်ထဲတွင် အစာများ ကျန်နေပြီး၊ လေလွင့်ဆုံးရှုံးမှုကို ဖြစ်ပေါ်စေပါသည်။

ခြံတွင် ကြွက်နှိမ်နှင်းရေးကို ဂရုတစိုက်ဆောင်ရွက်ရမည်ဖြစ်ပါသည်။ ငှက်ရိုင်းများဝင်ရောက်မှုမရှိစေ ရေး တားဆီးနိုင်မည့် အစီအမံများကိုလည်း ချမှတ်ဆောင်ရွက်ရပါမည်။ ကြွက်နှင့် ငှက်ရိုင်းများသည် တိရစ္ဆာန်များအား ကျွေးမွေးထားသည့် အစာများကို လုယူစားသုံးရုံမျှသာမက ရောဂါပိုးမွှားများလည်း သယ်ဆောင်လာနိုင်ပါသည်။

အစာကို ကောင်းမွန်စွာ သိုလှောင်သိမ်းဆည်းထားရန် လိုအပ်ပါသည်။ အစာသိုလှောင်သည့်နေရာသည် အပူချိန်မြင့်မားလွန်းပါက အစာထဲတွင် ပါဝင်သည့် အာဟာရဓာတ်များ ပျက်ဆီးကာ ဆုံးရှုံးလေလွင့်မှု ဖြစ်ပေါ်စေပါသည်။ စိုထိုင်းဆများလွန်းပါက မှိုတက်ခြင်း၊ အစာအနံ့အရသာ ပျက်ဆီးခြင်းများ ဖြစ်ပေါ်စေပါသည်။ ထိုသို့ ဖြစ်ပေါ်ပါက တိရစ္ဆာန်များက အစာများကို ကောင်းစွာမစားတော့ဘဲ ပိုလျှံကာ အလေအလွင့် ဖြစ်စေပါသည်။ တပြိုင်နက်တည်းတွင် အာဟာရဓာတ်များ ဆုံးရှုံးသွားသည့်အပြင် မှိုဆိပ်ကြောင့် အစာကို ချေဖျက်စုပ်ယူနိုင်မှုကျဆင်းစေပါသည်။ မှိုဆိပ်သည် ကျန်းမာရေးပြဿနာများကိုပါ ဆက်လက်ဖြစ်ပေါ်လာစေနိုင်ပါသည်။

ကျွမ်းကျင်သည့် တိရစ္ဆာန်ဆေးကုဆရာဝန်နှင့်တိုင်ပင်၍ မိမိ၏ တိရစ္ဆာန်များတွင် ကပ်ပါးရောဂါပိုးများ စွဲကပ်နေခြင်း ရှိ၊ မရှိ စစ်ဆေးသင့်ပါသည်။ အကယ်၍ ကပ်ပါးရောဂါများ စွဲကပ်နေပါက ၄င်းတို့ကို လျင်မြန်စွာ ထိန်းချုပ်ဖယ်ရှားပေးရပါမည်။

ရောဂါကူးစက်မှု မရှိစေရေးအတွက် ဇီဝလုံခြုံမှုမြှင့်တင်ခြင်း၊ ကာကွယ်ဆေးများ ထိရောက်စွာ တိုက်ကျွေးထိုးနှံပေးခြင်းနှင့် တိရစ္ဆာန်များအတွက် ဒဏ် (stress) ကင်းသော ပတ်ဝန်းကျင်ကို ဖန်တီးပေးခြင်းများ ဆောင်ရွက်ပေးသင့်ပါသည်။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။
⛔️ မွေးမြူရေးလုပ်ငန်းများအတွက် ကုန်ကျစရိတ်စုစုပေါင်း၏ အနည်းဆုံး သုံးပုံနှစ်ပုံ ရှိသော အစာဖိုး ကုန်ကျစရိတ်ကို လျှော့ချရာတွင် ပထမဆုံး ဗျူဟာအဖြစ် “အစာလေလွင့်ဆုံးရှုံးမှု လျော့ချရေး” ကို မဖြစ်မနေ စတင်ဆောင် ရွက်သင့်ပါသည်။ အထူးသဖြင့် ယခုကဲ့သို့ အစာဈေးနှုန်းများ ကြီးမြင့်နေချိန်တွင် “မွေးမြူရေးအစာ အလေအလွင့် လျှော့ချရေး အရေးကြီးပါသည်” ဟု တင်ပြလိုက်ရပါသည်။

ရေးသားသူ - သက်ခိုင်
.
.
.
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။

#အစာစရိတ်လျှော့ချနိုင်မည့်နည်းလမ်း
#စိုက်ပျိုးရေး
#မွေးမြူရေး
#အစိမ်းရောင်လမ်း
#Green_Way
https://greenwaymyanmar.com/posts/how_to_reduce_livestock_food
🌿 ဒီသစ်ပင်တွေက ကျွန်တော်တို့ကို ကယ်တင်နိုင်လိမ့်မယ်။ ဒီသစ်တွေဟာ ကျွန်တော်တို့ဘဝအတွက် မျှော်လင့်ချက်ပဲ။
=======================
ဆီနီဂေါနိုင်ငံတောင်ပိုင်းက အမျိုးသားတစ်ယောက်ဟာ လာမဲ့ငါးနှစ်အတွင်း သစ်ပင်ငါးသန်း စိုက်ပျိုးဖို့ဆိုတဲ့ ရည်မှန်းချက်အလွန်ကြီးလှတဲ့ လုပ်ငန်းစီမံချက်တစ်ခုကို ချမှတ်အကောင်အထည်ဖော်နေပါတယ်။

အမြော်အမြင်ကောင်းလွန်းတဲ့ ဒီစီမံချက်ကို 'အဒါနာ ဒီယေမီ' ဆိုသူ စတင်ဖြစ်ခဲ့တာက သူ ဥရောပမှာ နှစ်အနည်းငယ် အလုပ်လုပ်ပြီး ၂၀၂၀ ပြည့်နှစ်က မွေးရပ်မြေ 'ကာဆာမန်စီ' ဒေသကို ပြန်လာစဉ်မှာ ဖြစ်ပါတယ်။

အသက် ၄၈ နှစ်ရှိဖြစ်တဲ့ ဒီယေမီဟာ သူငယ်ငယ်တုန်းက ဧရာမသစ်ပင်ကြီးပေါင်းများစွာနဲ့ ပြည့်နှက်နေတဲ့ ကျေးရွာတွေမှာ ယခုတော့ အပင်ကြီး တစ်ပင်စနှစ်ပင်စလောက်ပဲ ကျန်တော့တာကို ကြည့်ပြီး ထိတ်လန့်အံ့ဩခဲ့ရပါတယ်။

"တချို့ရွာတွေမှာဆိုရင် သစ်ပင်တစ်ပင်မှတောင် ရှာမတွေ့ဘူး။ သူတို့က သစ်ပင်ကို ခုတ်ဖို့လောက်ပဲ သိတာ။ ပြန်စိုက်ဖို့ မစဉ်းစားဘူး" လို့ ဒီယေမီက ဘီဘီစီသတင်းဌာနကို ပြောခဲ့ပါတယ်။

အာဖရိကတစ်ဝန်းမှာ ကန္တာရဖြစ်ထွန်းလာခြင်းက သစ်ပင်တွေ ပြုန်းတီးစေတဲ့ အကြောင်းရင်းများစွာထဲက တစ်ခုဖြစ်ပါတယ်။ ဒါပေမဲ့ ကာဆာမန်စီမြစ်ကြောင်းတစ်လျှောက်မှာရှိတဲ့ ဒီဒေသမှာတော့ သစ်ပင်တွေဟာ အိမ်ဆောက်ဖို့ ဒါမှမဟုတ် မီးသွေးဖုတ်ဖို့ဆိုတဲ့ ရည်ရွယ်ချက်တွေအတွက် ခုတ်ထွင်ခံခဲ့ရတာ ဖြစ်ဖို့များပါတယ်။
စပိန် အန်ဂျီအိုတစ်ခုရဲ့ စီမံကိန်းမန်နေဂျာအဖြစ် ကာဆာမန်စီဒေသမှာ တာဝန်ထမ်းဆောင်နေပြီး စိုက်ပျိုးရေးပညာကိုလည်း စေတနာအလျောက် ပို့ချနေသူ မစ္စတာဒီယေမီက လက်ရှိအဖြစ်သနစ်တွေကို အလုံးစုံပြောင်းလဲပစ်ဖို့ ဆုံးဖြတ်လိုက်ပါတယ်။

သူ့ဆီမှာ ငွေပိုကြေးလျှံ များများစားစား မရှိတာကြောင့် အိပ်မက်ကို အကောင်အထည်ဖော်နိုင်ရေး ရန်ပုံငွေ စတင်ကောက်ခံခဲ့ပါတယ်။ သူကိုယ်တိုင် အိတ်ကပ်ထဲကနေ ဒေါ်လာ ၅၀၀၀ မတည်ပေးပြီး ဒီစီမံချက်ကို အစပြုခဲ့တာပါ။
*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

#Flexing female power
သူဟာ နယ်မြေအတွင်းက ဒေသခံတွေနဲ့ ထိတွေ့နိုင်အောင် ကြိုးစားခဲ့တယ်။ အထူးသဖြင့် အမျိုးသမီးတွေနဲ့ ချိတ်ဆက်တယ်။ ပျိုးပင်တွေ အုံလိုက်ကျင်းလိုက်ကို အောင်အောင်မြင်မြင် စိုက်ပျိုးနိုင်ဖို့အတွက် အမျိုးသမီးတွေကသာ စွမ်းဆောင်နိုင်မယ်လို့ သူ ယုံကြည်ထားပါတယ်။

"ရွာတစ်ရွာမှာ အမျိုးသမီးတွေ တစ်ယောက်မှ မရှိကြဘူးဆိုရင် တကယ်ကို ကပ်ဆိုက်တာပဲ" လို့ မစ္စတာဒီယေမီက ပြောပါတယ်။

"ဒါပေမဲ့ ရွာတစ်ရွာမှာ အမျိုးသမီးတွေချည်းပဲ ရှိတယ်ဆိုရင်တော့ သုခဘုံအလားပါပဲ။ သူတို့ဟာ အလုပ်ကြိုးစားတယ်။ တစ်နေကုန် အလုပ်နဲ့လက်နဲ့ မပြတ်ကြဘူး။ ဒါကြောင့် စီမံချက်တစ်ခု အောင်မြင်ချင်တယ်ဆိုရင် အမျိုးသမီးတွေနဲ့ စတင်ပါ" လို့ မစ္စတာ ဒီယေမီက ပြောပါတယ်။

သူဟာ အပင်များစွာ စိုက်ပျိုးရေးအိပ်မက် အကောင်အထည်ဖော်ရင်း တစ်ဖက်မှာ အမျိုးသမီးတွေ စွမ်းအားမြှင့်တင်ပေးတာကို ကျွဲကူးရေပါ ပေါင်းစပ်‌ဆောင်ရွက်ခဲ့ပါတယ်။ အမျိုးသမီးတွေ တစ်ပိုင်တစ်နိုင်တောင်သူတွေ ဖြစ်လာပြီး သူတို့ကုန်စည်ကို ဈေးကွက်တွေမှာ ရောင်းချလာနိုင်အောင် လေ့ကျင့်သင်ကြား‌‌ပေးနေပါတယ်။
"ပထမတော့ မျိုးစေ့တွေ ဘယ်လိုစိုက်ရမလဲ ကျွန်မတို့ မသိခဲ့ဘူး။ သီးနှံတွေ ကြီးထွားအောင် ဘယ်လိုလုပ်မလဲ မသိခဲ့ဘူး" လို့ စီမံချက်မှာ ပါဝင်တဲ့ အမျိုးသမီးတစ်ဦးဖြစ်သူ ဆာဖီယေတိုက ပြောပါတယ်။

"အခုတော့ ဈေးမှာ ရောင်းချစရာ အသီးအနှံအမျိုးမျိုး စိုက်နိုင်ကြပြီ။ ဘယ်သူ့အပေါ်ကိုမှ မှီခိုစရာ မလိုတော့ဘူး။ အခု ကျွန်မတို့ ဘဏ်အကောင့်ကိုယ်စီနဲ့ ဖြစ်နေကြပြီ။ ဘယ်သူကမှ ကျွန်မတို့ကို ဟိုဟာမလုပ်နဲ့ ဒီဟာမလုပ်နဲ့ လာပြောလို့မရတော့ဘူး။ ဘယ်လောက်ကောင်းသလဲ" လို့ သူမက ပြောပါတယ်။

မစ္စတာဒီယေမီရဲ့ စီမံချက်ကို "Our Trees" လို့ အဓိပ္ပာယ်ရတဲ့ ဒေသိယစကား "Ununukolaal" လို့ ပေးထားပါတယ်။

ယခုအထိ သစ်ပင် ၁၂ မျိုး စိုက်ပျိုးထားပါတယ်။ အဲဒီထဲမှာ စွန်ပလွံ၊ မန်ကျည်း၊ လက်ပံ၊ ရှောက် စတာတွေ ပါဝင်ပြီး ဘယ်ဒေသမှာ ဘာပင်စိုက်ပျိုးတယ်ဆိုတာကတော့ ဒေသနဲ့ မြေအနေအထားအပေါ် မူတည်ပါတယ်။

ပြီးခဲ့တဲ့ သုံးနှစ်အတွင်း ပျိုးပင် ၁၄၂၀၀၀ ကျော်ကို မြေချခဲ့ပြီး ယခုဆိုရင် အမြစ်ခိုင်နေကြပြီဖြစ်ပါတယ်။

ဒီတော့ မစ္စတာဒီယေမီ ရည်မှန်းချက်ပန်းတိုင်ကို ရောက်ရှိဖို့ လာမယ့်ငါးနှစ်အတွင်း အပင်ပေါင်းမြောက်မြားစွာ စိုက်ပျိုးဖို့ လိုအပ်နေပါသေးတယ်။ မစ္စတာဒီယေမီနဲ့ ဇနီး ယိုလန်ဒါ ပီရီနီဂွက်ဇ်တို့ကတော့ ရည်မှန်းချက်မရောက်မှာ မစိုးရိမ်ဘူးလို့ ပြောပါတယ်။

မစ္စပီရီနီဂွက်ဇ်ဟာ အပ်ချုပ်သမတစ်‌ယောက်ဖြစ်ပြီး စီမံချက်အတွက် ရန်ပုံငွေ ရှာတဲ့နေရာမှာ အလွန်အ‌ရေးပါသူပါ။ သူမက တီရှပ်တွေ ဒီဇိုင်းထုတ် ချုပ်လုပ်ပြီး တစ်ထည် ၁၅ ဒေါ်လာနှုန်းနဲ့ ပြည်ပတင်ပို့ရောင်းချကာ ငွေရှာပေးနေပါတယ်။
လုပ်ဖော်ကိုင်ဖက် ရေမွန်ဒီ ကိုလီနဲ့အတူ အပ်ချုပ်စက်ကိုယ်စီ နင်းကာ ဒေသထွက် ပိတ်စတွေကို အသုံးပြုချုပ်လုပ်ကြပြီး အင်္ကျီပေါ်မှာလည်း ထူးခြားထင်ရှားတဲ့အမှတ်အသားအဖြစ် ဇောက်ထိုးသစ်ပင်ပုံ (baobab) ကို ဇာပန်းထိုးထားကြပါတယ်။ တီရှပ်တစ်ထည် ရောင်းရတိုင်း သစ်ပင်ပျိုးပင်ပေါက် ၁၅ ပင်စာ ဝယ်ခြမ်းဖို့ငွေကြေး ရရှိကြပါတယ်။

"ဇောက်ထိုးသစ်ပင်ကို ရွေးဖြစ်တာက အာဖရိကရဲ့ အမှတ်အသား ဖြစ်နေလို့ပါ။ ဒီတီရှပ်တွေဟာ ဥရောပ၊ ကနေဒါ အစရှိသဖြင့် ကမ္ဘာအနှံ့ ရောက်ရှိတယ်ဆိုတာ သိရတဲ့အတွက် ဝမ်းသာပါတယ်။ ဝယ်တဲ့သူတွေကလည်း ဒီသစ်ပင်စိုက်စီမံချက်ကို ကူညီကြတာပါ" လို့ မစ္စပီရီနီဂွက်ဇ်က ပြောပါတယ်။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

#Baobabs to save homes
မစ္စတာဒီယေမီတို့ဟာ လက်ပံအမြစ်ဆုံကို ထွင်းလုပ်ထားတဲ့ သစ်ထွင်းလှေတစီးနဲ့ ကာဆာမန်စီ မြစ်ကြောင်းတစ်လျှောက် လှော်ခတ်သွားကြရင်း သူတို့စီမံချက်ရဲ့ တန်ဖိုးအစစ်အမှန်ကို ဖော်ပြစရာ အရာတစ်ခု တွေ့ရှိခဲ့ပါတယ်။

မြစ်အလယ်က ရေလယ်ကျွန်းရွာလေးတစ်ရွာမှာ မြစ်ရေဟာ ရွာစွန်ရွာဖျားက နေအိမ်အ‌ဆောက်အအုံတွေထဲအထိ ကျူးကျော်ဝင်ရောက်နေပြီး အချို့နေရာတွေမှာ ခြေတံရှည်အိမ်တွေရဲ့ အောက်ထဲအထိ ရေရောက်နေပါတယ်။

လွန်ခဲ့တဲ့ ၁၀ နှစ်လောက်ကဆိုရင် မြစ်ရေအစပ်ဟာ ရွာနဲ့ တော်တော်လှမ်းပြီး မိုးရာသီ အထွတ်အထိပ်ကာလကလွဲလို့ ရွာဆီကို ရောက်လာခဲပါတယ်။
ခုတော့ သေရေးရှင်ရေးအခြေအနေ ဆိုက်ရောက်နေပြီး ဒီထက်ပိုဆိုးလာခဲ့ရင် ရွာခံတွေ အိုးမဲ့အိမ်မဲ့ ဖြစ်ရတော့မဲ့သဘောပါ။

"ဒီရေလယ်ကျွန်းပေါ် နေထိုင်လာကြတာ နှစ်ပေါင်းရာချီပါပြီ။ ဒါပေမယ့် ရေ ဒီထက်ပိုတက်လာမယ်ဆိုရင်တော့ တစ်ရွာလုံး နေရပ်စွန့်ခွာကြရတော့မှာပါ" လို့ ရွာမိရွာဖတစ်ဦးဖြစ်တဲ့ ကွန်နာကရီ ဘက်စီနီက ပြောပါတယ်။

ယခုတော့ ကုန်းမြေပေါ်တင်မက ရေချို ရေငန်မှာပါ ပေါက်ရောက်နိုင်တဲ့ ဇောက်ထိုးပင်တွေကို မြစ်ရေစပ်တစ်လျှောက်မှာ အရန်အတားအဖြစ် စိုက်ပျိုးထားကြပါပြီ။ အပင်ပေါက်တွေဟာ လေနဲ့အတူ တဖျပ်ဖျပ် လှုပ်ခတ်နေပြီး တချိန်မှာ အသီးအပွင့်နဲ့ အရိပ်အာဝါသကောင်းပေးမယ့် အလားအလာကို ပြသနေပါတယ်။

"ဒီသစ်ပင်တွေက ကျွန်တော်တို့ကို ကယ်တင်နိုင်လိမ့်မယ်။ ဒီသစ်တွေဟာ ကျွန်တော်တို့ဘဝအတွက် မျှော်လင့်ချက်ပဲ" လို့ မစ္စတာ ဘက်စီနီက ပြောပါတယ်။
ဝေယံဟိန်း (B.Ag)
Ref: The Senegal man on a mission to plant five million trees - BBC
.
.
.
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။
#သစ်ပင်စိုက်ပျိုးခြင်း
#သစ်ပင်
#စိုက်ပျိုးရေး
#မွေးမြူရေး
#အစိမ်းရောင်လမ်း
#Green_Way


https://greenwaymyanmar.com/posts/five_million_trees_dream_Senegal_man
မေလ ၂၃-၂၄-၂၅ -၂၆ ရက်နေ့များတွင် မုန်တိုင်းအရှိန်သက်ရောက်မှုဖြစ်နိုင်ချေများ
==========
ဘင်္ဂလားပင်လယ်အော် အနောက်တောင်ပိုင်း၊ သီရိလင်္ကာကျွန်းနဲ့ အိန္ဒိယနိုင်ငံတောင်ပိုင်းအစွန်မှာဖြစ်နေတဲ့ မြေပြင်အထက်အမြင့် ၄.၂ ကီလိမီတာမှ အစပျိုးလေဖိအားနည်ရပ်ဝန်း(CYCLONIC CIRCULATION)ဟာ အရှေ့ဘက်ကိုဖြည်းညှင်းစွာရွေ့လျားလျက်ရှိပြီး မေလ ၂၀ ရက် နံနက်ပိုင်းမှာ ဘင်္ဂလားပင်လယ်အော်အနောက်တောင်ပိုင်းပင်လယ်ပြင်ကို ရောက်ရှိလာနိုင်ပါမယ်။

🔸 ဘင်္ဂလားပင်လယ်အော် အနောက်တောင်ပိုင်းနှင့်ဆက်စပ်လျက်ရှိတဲ့ ဘင်္ဂလားပင်လယ်အော်အနောက်အလယ်ပိုင်းအထိ အရှေ့-အရှေ့မြောက်ဘက်သို့ မေလ ၂၄ ရက် ညပိုင်းအထိ ဆက်လက်ရွေ့လျားပြီး၊ မေလ ၂၄ ရက် နံနက်ပိုင်းမှာ မြောက်ဘက်သို့ဆက်လက်ရွေ့လျားနိုင်ကြောင်း၊ အဲ့ဒီအချိန်မှာ မုန်တိုင်းငယ်အဆင့်သို့ရောက်ရှိနိုင်ကြောင်း ခန့်မှန်းထားပါတယ်။

🔸 မေလ ၂၅ ရက်နေ့ နံနက်အစောပိုင်း(မြန်မာစံတော်ချိန် ၄ နာရီခန့်)မှာ အနောက်မြောက်ဘက်ကို ချိုးကွေ့ပြီး မေလ ၂၆ ရက် နံနက်အစောပိုင်းမှာ ဩရိဿပြည်နယ်နဲ့ အန်ဒရာပရာဒက်ပြည်နယ်နယ်စပ်အနီး အိန္ဒိယနိုင်ငံ၊ အရှေ့ဘက်ကမ်းခြေကို ဆိုင်ကလုန်းမုန်တိုင်းအဆင့်နဲ့ ဖြတ်ကျော်ဝင်ရောက်နိုင်ကြောင်း၊ ဆိုင်ကလုန်းမုန်တိုင်းအဆင့်ရောက်လာရင်တော့ အိုမန်နိုင်ငံကပေးထားတဲ့ အလှည့်ကျနာမည် REMAL(အသံထွက် - Re-Mal ရီ-မယ်)ဆိုတဲ့ အမည်ရလာပါလိမ့်မယ်။
*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

🔸 မုန်တိုင်း ဘင်္ဂလားပင်လယ်အတွင်း အရှေ့မြောက်ဘက်သို့ရွေ့လျားစဉ်၊ မြောက်-အနောက်မြောက်ဘက်သို့ချိုးကွေ့ပြီး အိန္ဒိယနိုင်ငံကမ်းခြေသို့ဦးတည်ကာ ကုန်းတွင်းဝင်ရောက်စဉ်အချိန်တွေမှာ မြန်မာနိုင်ငံဘက်ကို မုန်တိုင်းအရှိန်သက်ရောက်မှုများကြောင့် ကမ်းရိုးတန်းဒေသများနဲ့ ဧရာဝတီမြစ်ဝကျွန်းပေါ်ဒေသများမှာ လေပြင်းတိုက်ခတ်ခြင်း၊ မိုးသည်းထန်ခြင်းများဖြစ်ပေါ်နိုင်မဲ့အပြင် တစ်နိုင်ငံလုံးနေရာအနှံ့အပြား မိုးရွာသွန်းနိုင်ကြောင်းကြိုတင်ခန့်မှန်းချက်များမှာတွေ့ရပါတယ်။

🔸 မုန်တိုင်းငယ် > မုန်တိုင်း > ဆိုင်ကလုန်းမုန်တိုင်း ဖြစ်ပေါ်လာနိုင်ချိန်အထိ စောင့်ကြည့်ပြီး မုန်တိုင်းအရှိန်သက်ရောက်မှုကြောင့်ဖြစ်ပေါ်နိုင်မဲ့ မိုးလေဝသအခြေအနေများကို အဲ့ဒီအချိန်မှာ ဆက်လက်တင်ပြပေးသွားပါမယ်။
*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

မေလ ၂၃-၂၄-၂၅ -၂၆ ရက်နေ့များတွင် မုန်တိုင်းအရှိန်သက်ရောက်မှုဖြစ်နိုင်ချေများအနဖြင့်

မေလ ၂၄ ရက် နံနက်အစောပိုင်းမှ စတင်၍ -

မုန်တိုင်းအရွယ်အစား အချင်း ၄၁၈ မိုင်အထိရှိလာနိုင်သည်

၃ နာရီအတွင်း ရွာသွန်းသောမိုးရေချိန် ၁၁ မီလီမီတာအထိ ရှိလာနိုင်သည်

မြစ်ဝကျွန်းပေါ်နှင့်ကမ်းရိုးတန်းဒေသများတွင် လေတိုက်နှုန်း 25mph အထိ ရှိလာနိုင်သည်

ရခိုင်ကမ်းရိုးတန်းမြောက်ပိုင်းတွင် လေတိုက်နှုန်း 30mph အထိ ရှိလာနိုင်သည်

ကမ်းနီးပင်လယ်ပြင်များတွင် လှိုင်းအမြင့် ၈ ပေခန့်အထိ ရှိလာနိုင်သည်

ဧရာဝတီ၊ ရန်ကုန်၊ ပဲခူး၊ မွန်၊ ကရင်၊ တနင်္သာရီ စသည့် ပြည်နယ်တိုင်းများတွင် မေ ၂၄ ရက်နေ့ မိုးများ-မိုးအလွန်များ အချိန်ကြာကြာမိုးသည်းထန်နိုင်ပါမည်။

ရခိုင်ပြည်နယ်တောင်ပိုင်းအစွန်ဒေသအချို့လည်းပါဝင်နိုင်ပါသည်။

(လေဖိအားနည်းရပ်ဝန်းအဆင့်ရောက်လာချိန်တွင် ထပ်မံတင်ပြပေးပါမည်)
.
.
.
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။
#မိုးလေဝသ
#မုတ်သုန်
#ရာသီဥတု
#မုန်တိုင်း
#အပူချိန်
ငါးမုန့်ခြောက်ကို လူတိုင်း တရင်းတနှီးစားဖူးကြပေမယ့် ငါးမုန့်လုပ်နည်းလေးကို သိကြသူ နည်းပါလိမ့်မယ်။ ဒါ့ကြောင့် ငါးမုန့် (Fish Cracker) ပြုလုပ်နည်းလေးကို ပြောပြပေးပါမယ်။
ငါးမုန့် ပြုလုပ်ဖိုအတွက် -
၁။ ငါးခြစ် တစ်မျိုးမျိုး (ငါးကွမ်းရှပ်၊ ပလာတူးငါးကို အသုံးများကြပါတယ်)
၂။ ဆိုဒါ၊ ကော်မှုန့်
၃။ ကြက်ဥ
၄။ ကြက်သွန်နီ၊ ကြက်သွန်ဖြူ၊ ချင်း တိုလိုအပ်ပါတယ်။
ပြုလုပ်နည်းမှာ -
၁။ ပထမဦးစွာ ငါးတစ်မျိုးမျိုးကို အသားချည်းခြစ်ယူပြီး ရေခဲသေတ္တာထဲ ထည့်ထားပါ။
၂။ ချင်း၊ ကြက်သွန်ဖြူ / နီကို ညက်နေအောင်ထောင်းပါ။ ဆိုဒါ နှင့်ကော်မှုန့်တိုကို ရောဖျော်ထားပါ။
၃။ ပြီးစီးပါက ရေခဲသေတ္တာထဲက ငါးခြစ်ကိုထုတ်ယူပြီး ကြက်ဥနှင့် ထောင်းထားသော ချင်း၊ကြက်သွန်ဖြူ/နီတိုဖြင့် သမအောင်နယ်ပါ။
၄။ သမအောင်နယ်ပြီးပါက ဆိုဒါ၊ ကော်မှုန့်အရည်တိုဖြင့် ထပ်နယ်ပါ။
၅။ နယ်ပြီးလျှင် အလုံးရှည်ရှည်လေးဖြစ်အောင် ပြုလုပ်ပါ။
၄။ ပြုလုပ်ပြီးပါက ပေါင်းအိုးဖြင့် (၄၅) မိနစ်ခန့်ပေါင်းပါ။
၅။ ပေါင်းပြီးလျှင် ရေခဲသေတ္တာထဲတွင် ၂ နာရီခန့်ကြာ အအေးခံပါ။
၆။ (၂) နာရီပြည့်လျှင် ထုတ်ယူပြီး အဝိုင်းပါးပါးလေးဖြစ်အောင် လှီးပါ။
၇။ လှီးပြီးပါက နေပူထဲတွင် ခြောက်သွားအောင် လှန်းထားပါ။
၈။ ခြောက်သွားလျှင် ငါးမုန့်အဝိုင်းလေးတွေကို ဆီများများထဲတွင် အနေတော်လေး ထည့်ကြော်ပြီးပါက အရသာရှိရှိ သုံးဆောင်လိုရပါပြီ။
ရေးသားသူ - နှင်းဖြူဖြူ
.
.
.
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။
#ငါးမုန့်
#ငါးမုန့်ခြောက်
#fish_cracker
#မန့်လုပ်နည်း
#အစမ်းရောင်လမ်း
#Green_Way

https://greenwaymyanmar.com/posts/fish_cracker_making
အံ့အားသင့်စရာ အနေနဲ့ သစ်ခွတွေကြိုက်တာ တစ်ခုရှိပါသေးတယ်။ ဘာလဲဆိုတော့ ဘီယာကြိုက်ကြတာပါ။
===================
လူတွေ နေ့စဥ် အစာစားသလို အပင်တွေအတွက် အာဟာရဆိုတာလည်း မရှိမဖြစ်လိုအပ်တဲ့ အရာဖြစ်ပါတယ်။
ယခုဆောင်းပါးလေးမှာ ဆိုရင်တော့ သစ်ခွပင်တွေကိုဘယ်လို အစာတွေကျွေးရမယ်၊ သူတို့ ဘယ်လိုအစာတွေကို ကြိုက်နှစ်သက်တယ်ဆိုတာတွေကို လေ့လာကြရမှာ ဖြစ်ပါတယ်။
#အော်ဂဲနစ် မြေသြဇာ 🌸
သစ်ခွတွေကို အော်ဂဲနစ် မြေသြဇာ ကျွေးလို့ရပါတယ်။ အော်ဂဲနစ် မြေသြဇာတွေထဲမှာ နွားချေး၊ ကြက်ချေး၊ လင်းနို့ချေး၊ ငါးမြေသြဇာနဲ့ ရေမှော်တွေပါဝင်ပါတယ်။ အဆိုပါ မြေသြဇာတွေဟာ နိုက်ထရိုဂျင် (ယူရီးယားဓာတ်) ကြွယ်ဝတာကြောင့် တောင်သူအများစု အကြိုက်တွေ့ကြပါတယ်။ အဲ့ဒီမြေသြဇာတွေရဲ့ မကောင်းတဲ့ အချက်ကတော့ အနံ့အသက်ပြင်းပြီး ပုရွက်ဆိတ်နဲ့ အင်းဆက်ပိုးမွှားတွေကို ဆွဲဆောင်တာပဲ ဖြစ်ပါတယ်။
ဒါကြောင့် အော်ဂဲနစ်မြေသြဇာတွေအသုံးပြုမယ်ဆိုရင်တော့ သင့်ပန်းအိုး အတွင်းပိုင်းထိ ဝင်ရောက်နေရာယူနိုင်မယ့် အင်းဆက်ပိုးမွှားတွေကို ကာကွယ်ဖို့အတွက် ပျိုးခံ (သို့မဟုတ်) ပွားစာကို တစ်လတစ်ကြိမ် အားကောင်းတဲ့ ရေဖျန်းကိရိယာနဲ့ ထိုးပေးရမှာပဲ ဖြစ်ပါတယ်။
သိုးချေး၊ ကြက်ချေး စတာတွေနဲ့ ပြုလုပ်ထားတဲ့ မြေသြဇာ အစေ့တွေလည်းရှိပြီး အဆိုပါမြေသြဇာတွေကတော့ အပင်ကို ရေလောင်းတိုင်း မြေသြဇာကိုနည်းနည်းချင်း ထုတ်လွှတ်ပေးတာပဲဖြစ်ပါတယ်။ အော်ဂဲနစ်မြေသြဇာထဲမှာမှ ငါးမြေသြဇာလို အရာမျိုးသုံးမယ်ဆိုရင်တော့ ၎င်းဟာ ပုရွက်ဆိတ်တွေကို ဆွဲဆောင်ပြီး အိမ်နီးနားချင်းတွေကိုလည်း အနှောက်အယှက်ဖြစ်စေနိုင်တယ်ဆိုတာတော့ သတိပြုရမှာ ဖြစ်ပါတယ်။
နောက်ထူးခြားတဲ့ မြေသြဇာကတော့ လူ့ကျင်ငယ်ရည်ပါ။ ကြားလိုက်လို့ စိတ်မသိုးမသန့်ဖြစ်သွားလောက်ပါတယ်။ ကျင်ငယ်ရည်ထဲမှာဆိုရင် နိုက်ထရိတ်ဒြပ်ပေါင်းတွေ ကြွယ်ဝစွာပါဝင်နေတာကြောင့် အထူးကောင်းမွန်တဲ့ မြေသြဇာပဲ ဖြစ်ပါတယ်။ ကျင်ငယ်ရည်ထဲမှာမှ ကိုယ်ဝန်ဆောင်အမျိုးသမီးတွေရဲ့ ကျင်ငယ်ရည်ဟာ ဟော်မုန်းဓာတ်တွေပါဝင်နေလို့ ပိုကောင်းတယ်လို့လဲ ဆိုကြပါတယ်။
*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။
နောက်တစ်မျိုးကတော့ မီးဖိုချောင်မှထွက်တဲ့ ပစ္စည်းတွေပါ။ ဆန်ဆေးရည်မှာ နိုက်ထရိုဂျင်ပါဝင်တဲ့ အတွက် သစ်ခွပင်တွေကို လောင်းပေးခြင်းအားဖြင့် အကျိုးရှိစေပါတယ်။ အလားတူ ငါးတွေကို ဆေးကြောပြီးလို့ ရရှိတဲ့ ငါးညှီရည်ကိုလည်း လောင်းနိုင်ပါတယ်။ ကြက်ဥခွံ၊ ဘဲဥခွံတွေကိုချေပြီး ထည့်ပေးလို့ရပါသေးတယ်။
အံ့အားသင့်စရာ အနေနဲ့ သစ်ခွတွေကြိုက်တာ တစ်ခုရှိပါသေးတယ်။ သစ်ခွတွေ ဘီယာကြိုက်ကြပါတယ်။ ဒါကြောင့် သောက်ပြီးသား ဘီယာဘူးခွံတွေထဲမှာ ဘီယာအကပ်အသပ်တွေရှိနေသေးတယ်ဆိုရင် မလွှင့်ပစ်ဘဲ သစ်ခွတွေကို တိုက်လို့ရပါတယ်နော်။ တစ်ဆက်တည်းနဲ့ ခရုတွေလည်း ဘီယာကြိုက်ကြတယ်လို့ သိရပါတယ်။ အချို့နိုင်ငံတွေမှာ တောင်သူတွေဟာ ဘီယာနဲ့ အစက်ချပြီး ခရုထောင်ဖမ်းကြတယ်လို့လဲ သိရပါတယ်။
မိမိရဲ့ အိမ်မှာ အီးအမ်ဖျော်ရည်ရှိတယ်ဆိုရင်လည်း သစ်ခွပင်တွေကို အီးအမ်လောင်းပေးလို့ရပါတယ်။ စာရေးသူ အိမ်မှာလုပ်တဲ့နည်းကတော့ ရေသန့် ၁ လီတာ ဘူးထဲကို အီးအမ်အပြင်း ၁ ဇွန်း၊ တင်လဲရည် ၁၀ ဇွန်း၊ ရေမပြည့်တပြည့် ထည့်ပြီး (အေး/မှောင်/ ခြောက်) နေရာမှာ ၅ ရက်လောက်ကြာအောင်ထားပါတယ်။ ၅ ရက်ပြည့်ပြီးရင် ရေဇလား တစ်ခုထဲကို အီးအမ်အရည် ၁ လီတာဗူးရဲ့ တစ်ဝက်လောက် လောင်းထည့်ပြီး သင့်တော်တဲ့ ရေပမာဏနဲ့ ရောလိုက်ပါတယ်။ ပြီးရင် သစ်ခွခြင်းလေးတွေကို ယူလာပြီး ဇလားထဲကို နှစ်ပြီး ခဏစိမ်ပါတယ်။ အဲ့လိုနည်းနဲ့ လုပ်ကြည့်တာ အပင်တွေ သန်စွမ်းသလို ပန်းတွေလည်းပွင့်တာကို လက်တွေ့ မြင်ခဲ့ရပြီး ဖြစ်ပါတယ်။ အီးအမ်ဖျော်ရည်ရှိရင်တော့ စမ်းသပ်ကြည့်စေချင်ပါတယ်။
*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။
#ဓာတ်မြေသြဇာ 🌸
ဓာတ်မြေသြဇာကို အရည်ရော အမှုန့်ပုံစံနဲ့ပါ ထုတ်လုပ်လေ့ရှိကြပါတယ်။ ဓာတ်မြေသြဇာတွေဟာ အနံ့အသက်မရှိတာကြောင့် ပုရွက်ဆိတ်နဲ့ အင်းဆက်ပိုးမွှားတွေကို မဆွဲဆောင်တာကြောင့် တစ်နိုင်တစ်ပိုင်စိုက်တဲ့ သူတွေအတွက် သင့်တော်ပါတယ်။ ဓာတ်မြေသြဇာ ဝယ်တဲ့အခါမှာ NPK အချိုး နိုက်ထရိုဂျင်၊ တီစူပါ၊ ပိုတက်ရှ် ပါဝင်မှုများကို စစ်ဆေးရမှာ ဖြစ်ပါတယ်။ ဥပမာ ၁၉-၂၇-၂၇ ဆိုတဲ့ ဓာတ်မြေသြဇာမှာ တီစူပါနဲ့ ပိုတက်ရှ် ပါဝင်မှုများတဲ့အတွက် ပန်းပွင့်မှုကို အားပေးပါတယ်။
၂၁-၂၁-၂၁ ဆိုတဲ့ မြေသြဇာမှာ အာဟာရဓာတ်တွေ ဆတူ ပါဝင်တဲ့အတွက် အပင်နဲ့ အမြစ် အားသန်စေဖို့အတွက် အသုံးပြုနိုင်ပါတယ်။ ဓာတ်မြေသြဇာတွေ ကျွေးတဲ့ အချိန်မှာ အမျိုးအစား ၂ မျိုးကို တစ်ကြိမ်တည်းမှာ မကျွေးမိစေဖို့ကိုတာ့ သတိပြုရမှာ ဖြစ်ပါတယ်။ မြေသြဇာကျွေးတာများရင် အပင်ကိုပျက်စီးစေတတ်ပြီး နည်းလွန်းရင်တော့ အပင်ကြီးထွားမှုနဲ့ ပန်းပွင့်ဖို့အတွက် ထိရောက်မှုရှိမှာ မဟုတ်ပါဘူး။ ဒါကြောင့်မြေသြဇာ ဝယ်သုံးတဲ့အခါမှာ အညွှန်းကို သေချာဖတ်ဖို့နဲ့ စိုက်ပျိုးရေးသမား အများစုအသုံးပြုတဲ့ တံဆိပ်မျိုးကိုပဲ ဝယ်သုံးဖို့ အကြံပြုချင်ပါတယ်။
ရေးသားသူ - ဇင်ထူးနိုင်
.
.
.
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။
#သစ်ခွ
#ပန်းပင်
#orchid
#စိုက်ပျိုးရေး
#Green_Way
https://greenwaymyanmar.com/posts/learn_to_feed_orchids
🌊 ဖြစ်ပေါ်လာတဲ့ ဆိုင်ကလုန်းမုန်တိုင်း မြန်မာနိုင်ငံသို့ဝင်ရောက်နိုင်ဖွယ်မရှိ
==============

မေလ ၂၁ ရက် မြန်မာစံတော်ချိန် နံနက် ၆ နာရီခွဲတွင် ထုတ်ပြန်သော ထိုင်းမိုးလေဝသဌာန(TMD)၏ Weather Chart အရ ဘင်္ဂလားပင်လယ်အော် အနောက်တောင်ပိုင်းတွင် လေဖိအားနည်းရပ်ဝန်း စတင်ဖြစ်ပေါ်လျက်ရှိကြောင်း တွေ့ရပါသည်။

🔸 ရွေ့လျားနိုင်သည့်အခြေအနေ
အဆိုပါလေဖိအားနည်းရပ်ဝန်းသည် ဘင်္ဂလားပင်လယ်အော် အနောက်တောင်ပိုင်းပင်လယ်ပြင်တွင် မေလ ၂၂ ရက် ည အထိ ဆက်လက်ရွေ့လျားနေမည်ဖြစ်ပြီး၊ မေလ ၂၃ ရက် ညပိုင်းတွင် ဘင်္ဂလားပင်လယအော်အရှေ့အလယ်ပိုင်းသို့ ရွေ့လျားရောက်ရှိကာ၊ မေလ ၂၄ ရက် ညပိုင်းတွင် ပုသိမ်မြို့အနောက်ဘက် ၂၃၅ မိုင်ခန့်သို့လည်းကောင်း၊ မေလ ၂၅ ရက် ည ၈ နာရီခန့်တွင် စစ်တွေမြို့အနောက်ဘက် ၁၃၂ မိုင်ခန့်သို့လည်းကောင်းရောက်ရှိလာနိုင်ပြီး မြောက်ဘက်သို့ ဆက်လက်ရွေ့လျားနိုင်ပါသည်။

🔸 ဆိုင်ကလုန်းမုန်တိုင်းဖြစ်နိုင်ချေ
ECMWF AIFS Weather Chart မှ ရရှိသည့်ကြိုတင်ခန့်မှန်းချက်အရ မေလ ၂၄ ရက်နှင့် မေလ ၂၅ ရက်နေ့များတွင် ဘင်္ဂလားပင်လယ်အော်အရှေ့အလယ်ပိုင်းသိုဝင်ရောက်လာချိန်၌ ဆိုင်ကလုန်းမုန်တိုင်းအဆင့်သို့ရောက်ရှိလာနိုင်ချေ ၁၀၀% ဖြစ်လာကြောင်းတွေ့ရှိရပါသည်။


🔸 ကုန်းတွင်းဖြတ်ကျော်ဝင်ရောက်နိုင်မည့်အခြေအနေ
ယနေ့ရရှိသည့် အသေးစိတ်အချက်အလက်များအရ လေဖိအားနည်းရပ်ဝန်းမှ ဆိုင်ကလုန်းမုန်တိုင်းအဆင့်အထိရောက်ရှိလာနိုင်ပြီး မေလ ၂၆ ရက် ညနေပိုင်းမှစတင်ကာ ဘင်္ဂလား‌ဒေ့ရှ်နိုင်ငံကမ်းရိုးတန်းအား Kalapara မြို့အနီးမှ ဖြတ်ကျော်ဝင်ရောက်နိုင်ကြောင်း ခန့်မှန်းရပါသည်။
*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။


🔸 မုန်တိုင်းမြန်မာနိုင်ငံဘက်သို့ဝင်ရောက်နိုင်ဖွယ်မရှိ
လက်ရှိခန့်မှန်းချက်များအရ ဆိုင်ကလုန်းမုန်တိုင်းဖြစ်ပြီးသည့်တိုင် မုန်တိုင်းသည် မြန်မာနိုင်ငံဘက်သို့ ဝင်ရောက်နိုင်ခြင်းမရှိကြောင်းတွေ့ရပါသည်။ သို့ရာတွင် မြန်မာနိုင်ငံသည် မုန်တိုင်းဖြတ်သန်းရွေ့လျားမည့်လမ်းကြောင်းညာဘက်ခြမ်းတွင်တည်ရှိနေသောကြောင့် မုန်တိုင်းအရှိန်သက်ရောက်မှုပိုမိုနိုင်ပြီး ကမ်းရိုးတန်းဒေသများနှင့် ကုန်းတွင်းပိုင်းဒေသအများစုတွင် လေပြင်းတိုက်ခတ်ခြင်းနှင့် မိုးသည်းထန်ခြင်းများကို မေလ ၂၃ ရက်နေ့မှ မုန်တိုင်းကုန်းတွင်းဝင်ချိန်(မေလ ၂၆ ရက် ညပိုင်းအထိ)ခံစားရဖွယ်ရှိကြောင်း တွေ့ရပါသည်။


🔸 မိုးလေဝသဌာနကြီးများမှ လေဖိအားနည်းရပ်ဝန်းဖြစ်ပေါ်ကြောင်း ယနေ့ မေလ ၂၁ ရက်နေ့တွင် စတင်ကြေညာနိုင်ပြီး စတင်ကြေညာချက်ထွက်ပေါ်လာသည့်အခါ ထပ်မံရရှိသည့်အချက်အလက်များဖြင့် မုန်တိုင်းရွေ့လျားရာလမ်းကြောင်း၊ မုန်တိုင်းအရွယ်အစားနှင့်အင်အား၊ မြန်မာနိုင်ငံအပေါ်မုန်တိုင်းအရှိန်သက်ရောက်နိုင်မည့်အခြေအနေတို့ကို ဆက်လက်တင်ပြပေးသွားပါမည်။


ရေးသားသူ - ဦးဝင်းနိုင်
.
.
.
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။
#မိုးလေဝသ
#မုတ်သုန်
#ရာသီဥတု
#မုန်တိုင်း
#အပူချိန်
This media is not supported in your browser
VIEW IN TELEGRAM
ဖွား၊ ပွင့်၊ ဟော၊ စံ၊ ဗျာဒိတ်ခံတဲ့

ဘုရားဖြစ်ဖို့အတွက် ဗျာဒိတ်ခံယူတဲ့နေ့၊ ဖွားမြင်တော်မူသောနေ့၊ ဘုရားဖြစ်တော်မူသောနေ့၊ ဗုဒ္ဓဝင်အကျဉ်းဟောတော်မူသောနေ့နဲ့ နောက်ဆုံး ပရိနိဗ္ဗာန်စံတဲ့ နေ့အထိ နေ့တွေအားလုံးဟာ ထူးခြားစွာနဲ့ ကဆုန်လပြည့်နေ့ ဖြစ်နေခဲ့ပါတယ်။

ဒီလို ဗုဒ္ဓဘာသာဝင်တို့ရဲ့ အထွတ်အမြတ်ထားရာ ဗုဒ္ဓနေ့ဖြစ်တဲ့ ကဆုန်လပြည့်နေ့မှာ အစိမ်းရောင်လမ်းဆော့ဝဲအသုံးပြုသူ မိတ်ဆွေများအပါအဝင် တစ်နိုင်ငံလုံးမှာရှိတဲ့ ပြည်သူပြည်သားအပေါင်း စိတ်ချမ်းသာ ကိုယ်ကျန်းမာပြီး တောင်းသောဆုတိုင်း ပြည့်ဝကြပါစေကြောင်း အစိမ်းရောင်လမ်းမိသားစုမှ ဆုမွန်ကောင်းတောင်းပေးလိုက်ပါတယ်။
🌧 ယနေ့ ညနေပိုင်းမှစ၍ မြန်မာနိုင်ငံတောင်ပိုင်းဒေသများ လေ/မိုးပြင်းထန်ခြင်းများ စတင်လာနိုင်
==========
လက်ရှိအချိန် မေလ ၂၃ ရက် မွန်းလွဲ ၂ နာရီမှာ ဘင်္ဂလားပင်လယ်အော် အလယ်ပိုင်းသို့ ဦးတည်ရွေ့လျားလာရင်း တဖြည်းဖြည်းအားကောင်းလာတဲ့ လေဖိအားနည်းရပ်ဝန်း(INVEST-99B)က ပတ်ဝင်းကျင်ပင်လယ်ကရော ကုန်းပေါ်ကပါ ရှိသမျှတိမ်ထုတွေကို လေဖိအားနည်းဗဟိုချက်ဆီကို ဆွဲသွင်းပြီး အားယူနေတဲ့အချိန်လဲဖြစ်ပါတယ်။


🔸 ကုန်းပေါ်က မိုးတိမ်တွေထက် တောင်ဘက်က အနောက်တောင်မုတ်သုံအားနဲ့ တွန်းထုတ်လိုက်တဲ့ တိမ်ထုတွေကုန်းတွင်းဝင်လာတဲ့အခါ လေပြင်းကျပြီး မိုးသည်းထန်ခြင်းများ စတင်နိုင်ပါမယ်။


*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။


🔸 ခန့်မှန်း ၂၃ ရက်နေ့ ညနေပိုင်းနဲ့ ညပိုင်းအချိန်တွေမှာ မြန်မာနိုင်ငံတောင်ပိုင်းဒေသများဖြစ်တဲ့ - ပဲခူးတိုင်း၊ ကယားပြည်နယ်၊ ဧရာဝတီတိုင်း၊ ရန်ကုန်တိုင်း၊ မွန်ပြည်နယ်၊ ကရင်ပြည်နယ်နဲ့ တနင်္သာရီတိုင်းတွေမှာ လေ/မိုးပြင်းထန်ခြင်းများ စတင်လာနိုင်ပါမယ်။


🔸 မေလ ၂၇ ရက် မုန်တိုင်းကုန်းတွင်းဝင်ပြီးချိန်အထိ မေလ ၂၃-၂၄-၂၅-၂၆-၂၇ ၅ ရက်မှာ တနိုင်ငံလုံးနေရာအနှံ့အပြားမိုးထစ်ချုန်းရွာပြီး လေပြင်းများကျနိုင်ပါမယ်။ လေပြင်ကျချိန် မြေပြင်မှာ တနာရီ မိုင် ၃၀ အထက်၊ ပင်လယ်ကမ်းရိုးတန်းဒေသတွေမှာတော့ တနာရီ မိုင် ၄၀ အထက်အထိ တိုက်ခတ်နိုင်ပြီး လှိုင်းအမြင့် ၇ ပေ မှ ၁၁ ပေအထိရှိနိုင်မှာဖြစ်ကြောင်း ကြိုတင်ခန့်မှန်းတင်ပြလိုက်ပါတယ်။


ရေးသားသူ - ဦးဝင်းနိုင်
.
.
.
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။
#မိုးလေဝသ
#မုတ်သုန်
#ရာသီဥတု
#မုန်တိုင်း
#အပူချိန်
တိုက်ရိုက်မျိုးစေ့ချစိုက်ပျိုးစနစ်သည် ပျိုးထောင်ကောက်စိုက်စနစ်ထက် ယေဘုယျအားဖြင့် အကျိုးအမြတ်ဝင်ငွေပိုမိုရရှိ နိုင်ပါသည်။

ကျွန်တော်တို မြန်မာနိုင်ငံမှာသာမက အရှေ့တောင်အာရှစပါးစိုက်ပျိုးထုတ်လုပ်သည့် နိုင်ငံအသီးသီးမှာ စပါးစိုက်ပျိုးရာတွင် လုပ်အားခသက်သာရေးကို အထူးအလေးထား လုပ်ကိုင်လာကြသည်ကို တွေ့ရှိရသည်။

သိုဖြစ်၍ စပါးစိုက်ပျိုးရာမှာ ပျိုးထောင်ကောက်စိုက်စနစ်အစား တိုက်မျိုးစေ့ချစိုက်ပျိုးစနစ်ကို ပြောင်းလဲလာကြသည်ကို တွေ့မြင်နိုင်သည်။

အသက်လျင်သည့် အထွက်ကောင်းစပါးမျိုးများပေါ်ပေါက်လာခြင်းနှင့် ပေါင်းမြက်နှိမ်နင်းရာတွင် စိုက်ပျိုးရေးသုံးဓာတုဆေးများ အလွယ်တကူဝယ်ယူရရှိနိုင်ခြင်းတိုကြောင့်လည်း တိုက်ရိုက်မျိုးစေ့ချစနစ်ကို ပိုမိုအသုံးပြုလာခြင်း ဖြစ်နိုင်ပါသည်။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

🌾 တိုက်ရိုက်မျိုးစေ့ချစိုက်ပျိုးခြင်း
တိုက်ရိုက်မျိုးစေ့ချစိုက်ပျိုးရာတွင် ကြဲပက်စိုက်ပျိုးခြင်း၊ မျိုးစေ့ချကိရိယာအသုံးပြု စိုက်ပျိုးခြင်း၊ ကြိုးတန်းလက်ဖြူးချစိုက်ပျိုးခြင်းစသည့် နည်းလမ်းအမျိုးမျိုးကို အသုံးပြကြသည်။ နည်းလမ်းအပေါ်မူတည်ပြီး တိုက်ရိုက်မျိုးစေ့ချစိုက်ပျိုးစနစ်သည် ပျိုးထောင်ကောက်စိုက်စနစ်ထက် လုပ်သားလိုအပ်ချက်ကို ၅၀ ရာခိုင်နှုန်းအထိ လျှော့ချနိုင်သည်ဟု သိရသည်။

ဤသို လုပ်သားလိုအပ်ချက်ကိုလျှော့ချနိုင်ပြီး ကုန်ကျစရိတ်သက်သာခြင်းကြောင့် တိုက်ရိုက်မျိုးစေ့ချစိုက်ပျိုးစနစ်သည် ပျိုးထောင်ကောက်စိုက်စနစ်ထက် ယေဘုယျအားဖြင့် အကျိုးအမြတ်ဝင်ငွေပိုမိုရရှိ နိုင်ပါသည်။

သိုသော် ပေါင်းမြက်ကို ကောင်းစွာနှိမ်နင်းနိုင်ခြင်းမရှိပါက တိုက်ရိုက် မျိုးစေ့ချစပါးသည် ပျိုးထောင်ကောက်စိုက်စပါးထက် တစ်ဧကအထွက်နှုန်းမှာ လျော့နည်းနိုင်သကဲ့သို အကျိုးအမြတ်ဝင်ငွေလည်း နည်းသွားနိုင်သည်ကိုလည်း သတိမူရန် လိုပါသည်။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

🌾 🌾 လိုက်နာရန်အဓိကအချက်
တိုက်ရိုက်မျိုးစေ့ချစပါးတစ်ဧကအထွက်နှုန်းလျော့နည်းခြင်းမရှိစေရေးနှင့် အကျိုး အမြတ်ဝင်ငွေကောင်းစေရေးအတွက် လိုက်နာဆောင်ရွက်ရန်အချက်များစွာအနက် အောက်ပါအဓိကအချက်(၃)ချက်ကို လိုက်နာဆောင်ရွက်ရန် နှိးဆော်လိုပါသည်။

(၁) သင့်တော်သည့်စပါးမျိုးကိုစိုက်ပျိုးခြင်း
(၂) မျိုးစေ့နှုန်းလျှော့ချသုံးစွဲခြင်း
(၃) ပေါင်းသတ်ဆေးကို ထိရောက်စွာသုံးစွဲခြင်းတိုဖြစ်သည်။
(၁) သင့်တော်သည့်စပါးမျိုးကိုစိုက်ပျိုးခြင်း
တိုက်ရိုက်မျိုးစေ့ချစပါးစိုက်နည်းစနစ်အတွက် သင့်တော်သည့်စပါးမျိုးတွင် သီးခြား အရည်အချင်းများရှိရန် လိုအပ်ပါသည်။ ထိုလိုအပ်ချက်များမှာ -

o အစောပိုင်းကာလ အပင်သန်စွမ်းမှုကောင်းမွန်ခြင်း၊
o လေမဲ့(အောက်ဆီဂျင်နည်းသော)အခြေအနေကို ခံနိုင်ရည်ရှိခြင်း၊
o အပင်ယိုင်လဲမှုဒဏ်ခံနိုင်ရည်ရှိခြင်း၊
o မိုးခေါင်မှု(ရေအနည်းဒဏ်)ခံနိုင်ခြင်းနှင့်
o ပေါင်းပင်များကိုယှဉ်ပြိုင်နိုင်မှုကောင်းခြင်းတို ဖြစ်ပါသည်။

(၂) မျိုးစေ့နှုန်းလျှော့ချသုံးစွဲခြင်း
တိုက်ရိုက်မျိုးစေ့ချစိုက်ပျိုးရာတွင် အများစုမှာ ကြဲပက်စိုက်ပျိုးလေ့ရှိသည်။ ကြဲပက် စိုက်ပျိုးခြင်းဖြင့် မျိုးစေ့နှုန်းကို ပိုမိုသုံးစွဲရန်လိုအပ်သည်။ သိုဖြစ်၍ မျိုးစေ့ဖိုး ပိုမိုကုန်ကျပါသည်။

မျိုးစေ့ကုန်ကျမှုသက်သာစေရန် ကြဲပက်စိုက်ပျိုးမည့်အစား သင့်တော်သည့် မျိုးစေ့ချကိရိယာ(Drum Seeder)ကို အသုံးပြုမျိုးစေ့ချစိုက်ပျိုးခြင်းသည် ပိုမိုကောင်းမွန်ပါသည်။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

(၃) ပေါင်းသတ်ဆေးကို ထိရောက်စွာသုံးစွဲခြင်း
ပေါင်းသတ်ဆေးအသုံးပြု၍ ပေါင်းမြက်ကာကွယ်နှိမ်နင်းနိုင်သည့် လုပ်သား လုပ်အားများစွာ လိုအပ်မှုမရှိဘဲ မှန်ကန်စွာအသုံးပြုလျှင် ကုန်ကျစရိတ်မှာ တွက်ချေကိုက် သည်။
လက်ပေါင်းလိုက်ခြင်းကဲ့သို ပေါင်းမြက်ပင်များ ကြီးထွားလာသည်ထိ စောင့်ဆိုင်းရန် မလိုပါ။ ပေါင်းမြက်ပင်ပေါက်ကာစကပင် နှိမ်နင်းနိုင်သည်။

သိုသော် ပေါင်းသတ်ဆေးအသုံးပြုရာတွင် ထိရောက်မှုရှိစေရေးအတွက် ပေါင်းမြက်အလိုက် ပေါင်းသတ်ဆေးအမျိုးအစားရွေးချယ်မှု၊ ဆေးဖျန်းချိန်နှင့် ဆေးနှုန်းထား မှန်ကန်ရန် အထူးလိုအပ်ပါသည်။

လုပ်သားလုပ်အားအခက်အခဲကြောင့် ပျိုးထောင်ကောက်စိုက်စနစ်အစား တိုက်ရိုက်မျိုးစေ့ချစနစ်ကို ပြောင်းလဲဆောင်ရွက်လျက်ရှိသော ယနေ့အခြေအနေတွင် ဖော်ပြပါအဓိကအချက်များကို လိုက်နာခြင်းဖြင့် တောင်သူလယ်သမားအများစု စိုးရိမ်နေရသည့် တိုက်ရိုက်မျိုးစေ့ချစနစ်နှင့် ပျိုးထောင်ကောက်စိုက်စနစ်တိုအကြား အထွက်နှုန်းကွာဟမှုနှင့် အကျိုးအမြတ်ဝင်ငွေခြားနားမှုကို လျှော့ချနိုင်မှာ ဖြစ်ကြောင်း အသိပေးအပ်ပါသည်။

ရေးသားသူ - ဆင်းသီဟ
.
.
.
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။
#စပါး
#တက်ရိုက်မျိုးစေ့ချခြင်း
#paddy
#စက်ပျိုးရေး
#မေးမြူရေး
#အစမ်းရောင်လမ်း
#Green_Way

https://greenwaymyanmar.com/posts/rice_direct_seedling
ပဋိဇီဝဆေး လျှော့ချသုံးစွဲမှုဟာ မွေးမြူရေးကဏ္ဍအနေနဲ့ မဖြစ်မနေ လျှောက်လှမ်းရမယ့် ခရီးပဲ ဖြစ်ပါတယ်။

=================
မွေးမြူရေးကဏ္ဍမှာ ထူးခြားတဲ့ မွေးမြူထုတ်လုပ်ပုံ နည်းစနစ်တွေပေါ်မူတည်ပြီး အဲဒီမွေးမြူနည်းတွေကို နာမည်ပေးလေ့ ရှိကြပါတယ်။ အခုနောက်ပိုင်း နိုင်ငံတကာမွေးမြူရေးလောကမှာ လူပြောများလာတဲ့ မွေးမြူနည်း စနစ် သုံးခု ရှိနေပါတယ်။

အဲဒီ စနစ်သုံးခုဟာ လက်ရှိမှာရော၊ အနာဂတ်မွေးမြူရေးကဏ္ဍမှာပါ မရှိမဖြစ် အသုံးပြုလာကြရမှာမို့ မိတ်ဆက်တင်ပြပေးလိုပါတယ်။ အဲဒီ သုံးနည်းစလုံးဟာ ပဋိဇီဝဆေးယဉ်ပါးမှုကို တိုက်ဖျက်ဖို့ အဓိက ရည်ရွယ်ထားတဲ့ မွေးမြူနည်းစနစ်တွေပဲ ဖြစ်ပါတယ်။

အဲဒါတွေကတော့
Raised Without Antibiotics (RWA)
No Antibiotics Ever (NAE)
No Human Antibiotics (NHA) တို့ပဲ ဖြစ်ပါတယ်။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

(၁) Raised Without Antibiotics (RWA)
RWA နည်းလမ်းကတော့ တိရစ္ဆာန်လေးတွေ မွေးမြူရေးခြံကို စတင်ရောက်ရှိချိန်ကစတင်ပြီး အသားအဖြစ် ထုတ်လုပ်တဲ့အချိန်အထိ မွေးမြူထုတ်လုပ်နေတဲ့ကာလတလျှောက်လုံး ပဋိဇီဝဆေးဝါး ပိုးသတ်ဆေး (Anti-biotics) တွေကို လုံးဝမသုံးစွဲဘဲ မွေးမြူထုတ်လုပ်တဲ့ နည်းစနစ် ဖြစ်ပါတယ်။

ဥပမာအားဖြင့် အသားတိုးကြက်တွေ မွေးမြူမယ်ဆိုရင် ရက်သားကြက်ပေါက်ဘဝကနေ ဈေးကွက်တင်ပြီး ထုတ်ရောင်းချိန်အထိ ပဋိဇီဝဆေးဝါး လုံးဝ တိုက်ကျွေးခြင်း၊ ထိုးနှံခြင်း မပြုဘဲ မွေးမြူတာပါ။ အစာထဲမှာလည်း ပဋိဇီဝဆေးဝါး ထည့်သွင်းအသုံးပြုခြင်း မရှိပါဘူး။ ဒါပေမဲ့ ကြက်ကလေးရဲ့ မိဘတွေကို မွေးမြူထားတဲ့ မျိုးခြံ နဲ့ ဖောက်စက်တွေမှာတော့ လိုအပ်ရင် ပဋိဇီဝဆေးဝါးတွေကို အသုံးပြုမှာ ဖြစ်ပါတယ်။

ဘယ်လိုပဲဖြစ်ဖြစ် ဒီနည်းလမ်းနဲ့ ထုတ်လုပ်နိုင်မယ်ဆိုရင် ပဋိဇီဝဆေးယဉ်ပါးမှုကို လျှော့ချပြီး တဖြည်းဖြည်း တိုက်ဖျက်လာနိုင်မှာ ဖြစ်သလို အသား၊ နို့၊ ဥ တွေထဲမှာ ပဋိဇီဝဆေးကြွင်းတွေ ကျန်ရှိပြီး စားသုံးသူတွေကို ဒုက္ခပေးနိုင်တဲ့ အန္တရာယ်လည်း လျော့ကျသွားမှာ သေချာပါတယ်။ တချိန်တည်းမှာ မွေးမြူသူတွေအနေနဲ့ ပဋိဇီဝဆေးဝါးတွေအတွက် ကုန်ကျစရိတ်ကို လျော့ချနိုင်မှာ ဖြစ်ပါတယ်။

ဒါပေမဲ့ တဖက်မှာလည်း မွေးမြူရေးတိရစ္ဆာန်တွေဆီ ရောဂါပိုးမွှားတွေ ကျရောက်လာတဲ့အခါ ပဋိဇီဝ ဆေးဝါးအကူအညီ မရနိုင်တာမို့ ဆုံးရှုံးမှု ပိုများနိုင်တဲ့ စိန်ခေါ်မှုက ရှိနေပြန်ပါတယ်။

နောက်ပြီး ပိုဆိုးတာက ဒီနည်းလမ်းကို အသုံးပြုတဲ့အခါ ပဋိဇီဝဆေးဝါး လျှော့ချသုံးစွဲတဲ့ အလေ့အကျင့် ကောင်းကို ထုတ်လုပ်သူ အဆင့်တစ်ဆင့်ကပဲ လိုက်နာကျင့်သုံးရသလို ဖြစ်နေတာက သိပ်ပြီး မမျှတလှဘူးလို့ ဆိုရမှာပါ။ မျှမျှတတနဲ့ RWA နည်းလမ်းကို အသုံးပြုချင်တယ်ဆိုရင်တော့ ဒီနည်းနဲ့ မွေးမြူတဲ့ တိရစ္ဆာန်တွေက ရရှိတဲ့ အမြတ်အစွန်းကို ခွဲဝေရာမှာ RWA ကို တကယ်လိုက်နာရတဲ့ မွေးမြူသူတွေအတွက် အမြတ်အစွန်းပိုမိုရရှိစေဖို့ လို အပ်ပါတယ်။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

(၂) No Antibiotics Ever (NAE)
NAE စနစ်မှာတော့ တိရစ္ဆာန်လေးတွေရဲ့ သက်တမ်းတလျှောက်လုံးမှာ ပဋိဇီဝ ပိုးသတ်ဆေးတွေကို လုံးဝ (လုံးဝ) အသုံးမပြုဘဲ မွေးမြူထုတ်လုပ်တာ ဖြစ်ပါတယ်။

မွေးမြူရေးထုတ်ကုန်ရဲ့ တန်ဖိုးကွင်းဆက် တလျှောက်လုံးမှာ ပါဝင်တဲ့အဆင့်တိုင်းဟာ ပဋိဇီဝဆေးဝါးတွေကို လုံးဝ အသုံးမပြုရပါဘူး။ မျိုးခြံကစတင်လို့ ကြက်သားဖြစ်ပြီး စားသုံးသူတွေ ပါးစပ်ထဲ ရောက်တဲ့အချိန်အထိ ပဋိဇီဝဆေးဝါးကို လုံးဝ အသုံးမပြုတဲ့ နည်းလမ်း ဖြစ်ပါတယ်။

ဒီနည်းလမ်းဟာ ဖွံ့ဖြိုးပြီးနိုင်ငံတွေအတွက် ဖြစ်နိုင်ချေရှိပေမဲ့ ဖွံ့ဖြိုးဆဲနိုင်ငံတွေမှာတော့ စိန်ခေါ်မှု ကြီး မားတဲ့ နည်းလမ်းတစ်ရပ် ဖြစ်ပါလိမ့်မယ်။ အဓိကတော့ ကုန်စည် တန်ဖိုးကွင်းဆက် တလျှောက်လုံးကို စောင့်ကြည့် ကြပ်မတ် ထိန်းကျောင်းပေးမယ့် အာဏာပိုင်အဖွဲ့အစည်းတွေ၊ ဓာတ်ခွဲစမ်းသပ်မှုတွေ၊ စနစ်တွေ၊ ငွေကြေးအရင်းအနှီးတွေ လုံလုံလောက်လောက်နဲ့ ဆောင်ရွက်ရမှာ ဖြစ်ပါတယ်။

နောက်ပြီး မွေးမြူရေးခြံတစ်ခြံချင်း အတိုင်းအတာနဲ့ ဆောင်ရွက်လို့မရဘဲ ဒေသတစ်ခုချင်း၊ နိုင်ငံတစ်နိုင်ငံချင်း စသည်ဖြင့် စနစ်တစ်ခုလုံး ကျယ်ကျယ်ပြန့်ပြန့် ဆောင်ရွက်မှ လက်တွေ့ကျတဲ့ ရလဒ်ကို ရရှိနိုင်မှာပါ။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

(၃) No Human Antibiotics (NHA)
NHA နည်းလမ်းကတော့ ကုန်စည်ကွင်းဆက်ရဲ့ ဘယ်အဆင့်မှာ ဖြစ်နေနေ လူသားတွေမှာ အသုံးပြုနေတဲ့ ပဋိဇီဝဆေးဝါးတွေကို အသုံးမပြုတဲ့ နည်းလမ်းပဲ ဖြစ်ပါတယ်။ တကယ်တော့ ဒါဟာ ဘယ်နိုင်ငံမဆို အခုချက်ချင်း စတင်အကောင်အထည်ဖော်ရမယ့် မွေးမြူနည်းစနစ်တစ်ရပ် ဖြစ်ပါတယ်။
လူသားတွေအသုံးပြုနေတဲ့ ပဋိဇီဝဆေးဝါးတွေကို မွေးမြူရေးမှာ အသုံးပြုနေခြင်းအားဖြင့် အဲဒီ ပဋိဇီဝ ဆေးဝါးတွေအပေါ် ရောဂါပိုးမွှားတွေက ယဉ်ပါးလာကြမှာ ဖြစ်ပါတယ်။ အဲဒီ ဆေးယဉ်ပါးမှု ဆိုတဲ့ အစွမ်းသတ္တိတွေဟာ လူသားတွေမှာ ကူးစက်တဲ့ ပိုးမွှားတွေဆီကိုလည်း ရောက်ရှိသွားနိုင်ပါတယ်။ ဒါကြောင့် လူသားတွေကိုပါ ပဋိဇီဝ ဆေးဝါးတွေနဲ့ ကုသရ ခက်ခဲလာမှာ ဖြစ်ပါတယ်။ ဒါကြောင့် NHA နည်းလမ်းရဲ့ အဓိက ရည်ရွယ်ချက်က မွေးမြူ ရေးသုံး ပဋိဇီဝ ဆေးဝါးနဲ့၊ လူသုံး ပဋိဇီဝ ဆေးဝါးကို ခွဲခြားသတ်မှတ်လိုက်ပြီး၊ လူမှာသုံးတဲ့ ပဋိဇီဝဆေးဝါးတွေကို မွေးမြူရေးမှာ မသုံးစွဲဖို့ တားမြစ်နိုင်အောင်ပဲ ဖြစ်ပါတယ်။

ဒါက မဖြစ်မနေ စလုပ်သင့်တဲ့ အနေအထားပေမယ့် လူသုံးပဋိဇီဝဆေးဝါးအားလုံးကို မွေးမြူရေးမှာ လုံးဝ အသုံးမပြုဖို့ ဆိုတာကလည်း သိပ်တော့ မလွယ်ကူလှပါဘူး။ ဒါကြောင့် နိုင်ငံအတော်များများက NHA ကိုပဲ နည်းနည်း အဆင့်‌လျော့ပြီး ကျင့်သုံးကြပြန်ပါတယ်။ လူတွေမှာ အလွန်အရေးကြီးပြီး မဖြစ်မနေ အသုံးပြုရတဲ့ ပဋိဇီဝ ဆေးဝါးတွေ၊ အသက်ကယ်ဖို့ အလွန်အရေးကြီးတဲ့ ပဋိဇီဝဆေးတွေကိုပဲ မွေးမြူရေးလုပ်ငန်းတွေမှာ အသုံးမပြုဖို့ စတင်ပြီး တားမြစ်လာကြတာ ဖြစ်ပါတယ်။ မြန်မာနိုင်ငံမှာလည်း အဲဒီစနစ်ကိုပဲ ကျင့်သုံးနေတာ ဖြစ်ပါတယ်။

အနှစ်ချုပ်
မွေးမြူရေးကဏ္ဍဟာ ပဋိဇီဝဆေးယဉ်ပါးမှုကို တိုက်ဖျက်ဖို့ အဓိကကျတဲ့ ကဏ္ဍတစ်ရပ်ဖြစ်ပါတယ်။ အဲဒီလို ဆေးယဉ်ပါးမှုကို တိုက်ဖျက်ရာမှာ ပဋိဇီဝဆေး လျှော့ချသုံးစွဲမှုကလည်း အဓိကနေရာက ပါဝင်နေပါတယ်။ ပဋိဇီဝဆေး လျှော့ချသုံးစွဲမှုဟာ မွေးမြူရေးကဏ္ဍအနေနဲ့ မဖြစ်မနေ လျှောက်လှမ်းရမယ့် ခရီးပဲ ဖြစ်ပါတယ်။ အဲဒီ ခရီး ကို အရှိန်နဲ့ ပန်းတိုင်ရောက်အောင်သွားဖို့ မဖြစ်နိုင်ပါဘူး။ ဒါပေမဲ့ တဆင့်ချင်းစီ လျှောက်လှမ်းရမှာပါ။

လတ်တလောမှာတော့ အရေးကြီး လူသုံးပဋိဇီဝဆေးဝါးတွေကို မွေးမြူရေးကဏ္ဍမှာ အသုံးမပြုဘဲ ရှောင်ရှားတဲ့ အဆင့်ကို ရရှိထားပါတယ်။ အဲဒီကနေမှတဆင့် No Human Antibiotics (NHA) ကို မဖြစ်မနေ တက်လှမ်း ဖို့ လိုအပ်ပါတယ်။ အဲဒီကနေ RWA ကို ဆက်ပြီး တက်လှမ်းနိုင်အောင် ကြိုးစားရမှာပါ။ နောက်ဆုံးမှာတေ့ NAE ကို မဖြစ်မနေ အရောက်သွားကြရမှာပါ။

ဒီအတွက် မွေးမြူရေးသမားတွေသာမက၊ မွေးမြူရေးကဏ္ဍကြီးတစ်ခုလုံးအပြင် အာဏာပိုင်အဖွဲ့အစည်း တွေက တက်တက်ကြွကြွ ဆောင်ရွက်ကြဖို့ လိုအပ်ပါတယ်။
ရေးသားသူ - သက်ခိုင်
.
.
.
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ကို ထည့်ပေးပါရန် မေတ္တာရပ်ခံအပ်ပါသည်။
#ဆိတ်
#ဝက
#နွား
#ကြက်
#မွေးမြူရေး
#စိုက်ပျိုးရေး
#မွေးမြူရေး
#အစိမ်းရောင်လမ်း
#Green_Way

https://greenwaymyanmar.com/posts/Modernized_3_farming_systems
ရေဓာတ်ကို ပြန်လည်ဖြည့်တင်းဖို့အတွက် အသင့်သောက်သုံးနိုင်တဲ့ အချိူရည်တွေအစား အုန်းရည်ကို ဦးစားပေးရွေးချယ်သင့်ပါတယ်။

===============
“အုန်းစိမ်းရည် ချိုချိုလေး” ကို ကြိုက်နှစ်သက်တဲ့သူတွေ ရှိပါသလား..?
ကြိုက်သည်ဖြစ်စေ၊ မကြိုက်သည်ဖြစ်စေ အုန်းရည်ဟာ အာဟာရဓာတ်များစွာပါဝင်ပြီး ကျန်းမာရေးအရ သောက်ကိုသောက်သုံးသင့်တဲ့အထိ သူ့မှာ ကျန်းမာရေးကောင်းကျိုးတွေအများကြီးရှိပါတယ်..။ နှလုံးကျန်းမာရေး ကောင်းစေတယ်၊ အရွယ်တင်နုပျိုစေတယ်၊ ကိုယ်တွင်းအဆိပ်အတောက်တွေကို ဖယ်ရှားပေးတယ် စသဖြင့်..စသဖြင့် အများကြီးရှိလို့ အသေးစိတ်ပြောပြပေးသွားပါမယ်..။

အုန်းသီးနဲ့ အုန်းရည်ဆိုတာက ကျွန်တော်တို့ နေ့စဉ်စားသုံးနေတဲ့ အစားအသောက်တွေနဲ့ ရိုးရာမုန့်တွေထဲမှာ ပါဝင်နေတာကြောင့် လူတိုင်းနီးပါးကတော့ ကြိုက်နှစ်သက်ကြမယ်လို့ ထင်ပါတယ်။ အုန်းရည်ဟာ အနည်းငယ် ချိုတဲ့အရသာရှိပြီး လူကိုလည်း လန်းဆန်းစေပါတယ်။ တစ်ချို့က သရေစာ (သောက်စရာ) အနေနဲ့ သောက်သုံး ကြသလို တစ်ချို့ကတော့ အုန်းရည်ရဲ့ ကောင်းကျိုးတွေကိုသိလို့ ကျန်းမာရေးအတွက် သောက်သုံးကြတာ ဖြစ်ပါတယ်။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

🥤 ဘယ်လို ကျန်းမာရေးဆိုင်ရာ အကျိုးကျေးဇူးတွေကို ရနိုင်တာလဲဆိုတော့…
အုန်းရည်မှာပါဝင်တဲ့ အာဟာရဓာတ်များ
အုန်းရည်မှာဆိုရင် ရေဓာတ် ၉၄ ရာခိုင်နှုန်းနဲ့ အဆီ အနည်းငယ်ပါဝင်ပါတယ်။ အခြားပါဝင်တဲ့ ဓာတ်တွေကတော့
ကယ်လိုရီ
သကြားဓာတ်
ကာဗိုဟိုက်ဒရိတ်
ဗီတာမင် စီ
ကယ်ဆီယမ်နဲ့ မဂ္ဂနီဆီယမ်
ပိုတက်စီယမ်
ဖော့စဖောရပ် စတဲ့ဓာတ်တွေ ဖြစ်ပါတယ်။

🥤 ရေဓာတ် ပြန်လည်ဖြည့်တင်းပေးခြင်း
အားကစားလုပ်တဲ့သူတွေနဲ့ လေ့ကျင့်ခန်းပြုလုပ်တဲ့သူတွေအတွက် အုန်းရည်ဟာ သင့်တော်တဲ့ သောက်စရာတစ်မျိုးဖြစ်ပါတယ်။
ရေဓာတ်ကို ပြန်လည်ဖြည့်တင်းဖို့အတွက် အသင့်သောက်သုံးနိုင်တဲ့ အချိူရည်တွေအစား အုန်းရည်ကို ဦးစားပေးရွေးချယ်သင့်ပါတယ်။ အချိုရည်တွေဟာဆိုရင် အနံ့အရသာများကို ပြုပြင်ပြောင်းလဲထားသလို သကြားဓာတ်တွေလည်း ပါဝင်တာကြောင့် ရေရှည်မှာကျန်းမာရေးကို ထိခိုက်နိုင် ပါတယ်။
အုန်းရည်ကတော့ ရေဓာတ်ကို ပြန်လည်ဖြည့်တင်းပေးနိုင်သလို ခန္ဓာကိုယ်အတွက်အရေးပါတဲ့ ပိုတက် စီယမ်နဲ့ ဆိုဒီယမ်ဓာတ်တွေလည်း ပါဝင်တာကြောင့် ရွေးချယ်သောက်သုံးသင့်ပါတယ်။ ကယ်လိုရီနဲ့ ကာဗို ဟိုက်ဒြိတ် ပါဝင်မှုလည်းနည်းတာကြောင့် ကျန်းမာရေးကို အထောက်အကူပြုစေပါတယ်။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။

🥤 ဓာတ်တိုးဆန့်ကျင်ပစ္စည်းများပါဝင်ခြင်း
လတ်ဆတ်တဲ့အုန်းရည်မှာဆိုရင် ဓာတ်တိုးဆန့်ကျင် ပစ္စည်းတွေကြွယ်ဝစွာ ပါဝင်ပါတယ်။ ဒါ့အပြင်အုန်းရည်ဟာ ဗီတာမင် စီ ကြွယ်ဝတဲ့ အရင်းအမြစ်တစ်ခုလည်း ဖြစ်ပါတယ်။ ဓာတ်တိုးဆန့်ကျင်ပစ္စည်းတွေပါဝင်နေခြင်းဟာ ခန္ဓာကိုယ်တွင်း ဆဲလ်များပျက်စီးခြင်းကို ကာကွယ်ပေးနိုင်ပါတယ်။ ဒါ့အပြင် အရောင်အမျိုးမျိုးရှိတဲ့ သစ်သီး တွေနဲ့ ဟင်းသီးဟင်းရွက်တွေ စားသုံးပေးခြင်းဖြင့်လည်း ဓာတ်တိုးဆန့်ကျင် ပစ္စည်းတွေကို ရရှိနိုင်ပါတယ်။

🥤 ကိုလက်စရောများလျော့ကျစေခြင်း
အုန်းရည်သောက်ခြင်းဟာ ကိုလက်စရော ပမာဏကို ကျဆင်းစေပါတယ်။ ဒါ့အပြင် အုန်းရည်ဟာ အဆီပါဝင်မှု လည်း နည်းတဲ့အတွက် နှလုံးရောဂါ ဖြစ်ပွားနိုင်မှုကိုလည်း လျှေော့ချပေးနိုင်ပါတယ်။

🥤 ကျောက်တည်ခြင်းအား ကာကွယ်ပေးခြင်း
အုန်းရည်သောက်သုံးပေးခြင်းဟာ ဆီးလမ်းကြောင်းကို သန့်စင်ပေးနိုင်သလို ကျောက်တည်တာမျိုးတွေနဲ့ ဆီးလမ်းကြောင်းပိုးဝင်တာမျိုးတွေကိုလည်း ကာကွယ်ပေးနိုင်ပါတယ်။ အုန်းရည်မှာ ပါဝင်တဲ့ ပိုတက်စီယမ် ဓာတ်ဟာ ကိုယ်အတွင်းမှာရှိတဲ့ အဆိပ်အတောက်တွေကို ဆီးအဖြစ်နဲ့ ဖယ်ရှားပေးနိုင်ပါတယ်။ ဒါ့ကြောင့် ကျောက်တည်ခြင်းကို ကာကွယ်ပေးနိုင်ပြီး ကျောက်ကပ်ရဲ့ ကျန်းမာရေးကိုလည်း အထောက်အကူ ပြုပေးနိုင် ပါတယ်။

🥤 သွေးတွင်း သကြားဓာတ်ကို လျှော့ချပေးနိုင်ခြင်း

အုန်းရည်မှာ အမိုင်နိုအက်စစ်နဲ့ အမျှင်ဓာတ်တွေပါဝင်တာကြောင့် သွေးတွင်းသကြားဓာတ် ပါဝင်မှုကို ထိန်းညှိပေးနိုင်ပြီး ဆီးချိုရောဂါဖြစ်ပွားမှုကို ကာကွယ်ပေးနိုင်ပါတယ်။ ဒါ့အပြင် သွေးလည်ပတ်မှုကိုလည်း ကောင်းစေပါတယ်။ ဆီးချိုသမားတွေ သောက်သုံးဖို့ သင့်တော်ပါတယ်။

🥤 နှလုံးကျန်းမာရေးကို ကောင်းစေခြင်း
အုန်းရည်သောက်သုံးခြင်းဖြင့် နှလုံးကျန်းမာရေးကိုလည်း အထောက်အကူပြုတဲ့အပြင် လေဖြတ်တာကိုလည်း ကာကွယ်ပေးနိုင်ပါတယ်။ အုန်းရည်မှာပါဝင်တဲ့ ပိုတက်စီယမ်ဓာတ်ဟာဆိုရင် ခန္ဓာကိုယ်ထဲမှာ မလိုအပ်ဘဲ ပိုလျှံနေတဲ့ ဆိုဒီယမ်ဓာတ်တွေကို ဆီးထဲကနေတဆင့် ပါသွားအောင်ဖယ်ရှားပေးနိုင်ပါတယ်။ ပိုတက်စီယမ်ဓာတ် ပါဝင်နေခြင်းဟာ သွေးဖိအားကို ကျဆင်းစေတဲ့ အကြောင်းအရင်းတွေထဲက တစ်ခုဖြစ်ပြီး နှလုံးကျန်းမာရေး ကိုလည်း အထောက်အကူပြုတာ ဖြစ်ပါတယ်။

*စိုက်ပျိုး၊ မွေးမြူရေးနဲ့ ပတ်သက်တာ အစိမ်းရောင်လမ်းဆော့ဝဲမှာ မေးပါ။
🥤 အရွယ်တင်စေခြင်း
အုန်းရည်ထဲမှာ ဆဲလ်နဲ့ တစ်ရှူးတွေကို အိုမင်းရင့်ရော်မှုကနေ ကာကွယ်ပေးနိုင်တဲ့ ဆိုက်တိုခိုင်နင် ဆိုတဲ့ ဓာတ်တွေပါဝင်ပါတယ်။ အုန်းရေသောက်ခြင်းကြောင့် ရေဓာတ်နဲ့ အာဟာရဖြည့်တင်းပေးနိုင်ပြီး သွေးလည်ပတ်မှုလည်း ကောင်းစေကာ အသားအရည်ကို ကျန်းမာပြီး စိုပြေစေပါတယ်။ အုန်းရည်မှာ ဓာတ်တိုးဆန့်ကျင် ပစ္စည်းတွေလည်းပါဝင်ပြီး သဘာဝအတိုင်း ကော်လာဂျင်ပါဝင်မှုကို လှုံ့ဆော်ပေးတဲ့ ဗီတာမင် စီ ပါဝင်တာကြောင့် အသားအရည်ကို နုပျိုမှု ရရှိစေနိုင်ပါတယ်။
ရေးသားသူ - ဇင်ထူးနိုင်
.
.
.
ဆောင်းပါးများ/သတင်းများ ပြန်လည်ကူးယူဖော်ပြလိုပါက "အစိမ်းရောင်လမ်းမှ ကူးယူဖော်ပြပါသည်" ဟုထည့်ပေးပါရန် မေတ္တာရပ်ခံအပ်ပါသည်။
#အုန်းသီး
#အုန်းရည်
#Cocout_juice
#စိုက်ပျိုးရေး
#မွေးမြူရေး
#အစိမ်းရောင်လမ်း
#Green_Way

https://greenwaymyanmar.com/posts/coconut_juice_health_benefit