#كيف_أدرس_في_رمضان (منشور طويل بس ان شاء الله بفيد💚)

بدايةً: بدنا نتكيّف مع موضوع أنه رمضان يمرّ علينا ونحن مشغولين بشي؛ بالدراسة، بالإقامة، وبغيره من الامور

انا شخصياً امتحان البكالوريا، امتحان التحضيرية، امتحان السنة التانية،... كلها عملتها برمضان.. والحمد لله ع طول كانت النتائج حلوة

وفي شي حلو برمضان هالسنة انه الجو ربيعي حلو، وعدد ساعات النهار أقل من غيره
.............
طيب لندخل بالمهم:
في أمور لازم نحطها ببالنا ونركز عليها لأن للأسف في عادات غلط منتشرة ويمكن تكون هي السبب بأنه ممكن نستصعب إنجاز شي برمضان.. وهالعادات اللي برأيي غلط:

- اولاً: مسألة السهر من الليل وحتى أذان الصبح (وخاصة إذا كان هالسهر ع شي بلهّي أو الأكل أو وسائل التواصل..)
- ثانياً: إهمال البعض لوجبة السحور وعدم الانتباه لمسألة شرب الماء الكافي أثناء فترة الإفطار
- ثالثاً: مسألة أنه يروح معظم اليوم بتحضير وجبة الإفطار 🙃
..........
فهون من وجهة نظري الشخصية لازم نركّز ع الآتي: (نوم كافي + أكل وشرب كافي دون إفراط) يعني ما يلي:

- تحصل ع ساعات نوم كااافية... ع سبيل المثال: تنام الساعة ١٢ وتفيق الساعة ٤ للسحور.. ترجع تنام عالساعة ٥ ونص إلى ال٩ (هيك بتكون نمت شي ٧ ساعات ونص بالليل مع قيلولة ساعة بالنهار)

- ركزوا ع وجبة السحور وأخّروها.. لا تهملوها.. هي رح تعطيكن جزء كبير من الطاقة خلال اليوم

- #إذا #إذا قدرت ما تحضر ستاجات هالشهر وتقلل طلعاتك من البيت فافعل...
وفي حال اضطر الشخص لخروج طويل من البيت فبيرجع ينام شوي ليشحن همته

- بفترة الإفطار (من ال٨ المغرب لل ١٢ مثلا) تأكد من انك تشرب ع الاقل ٨ كاسات ماي.. وزّعهم ع فترة الإفطار.. كل ساعة مثلا كاستين ماي.. ولحتى تتذكر خلّي جنبك قنينة ماي ع طول
طبعا نحن أطباء والمفروض نعرف انه إدخال الطعام على الطعام داء

- هي النقطة إلنا نحن البنات: خلّينا نوصّل فكرة لأهالينا أنه ما ضروري يومنا برمضان كله يروح ع تحضير الاكل 😅 رمضان للعبادة (ولسا زاد عليه دراسة الوطني) ومو للأكل..

- #وطبعا ما في داعي ذكّر أنه ما في شي بقاموسنا اسمه مسلسلات وبرامج ترفيهية ..يا دوب الوقت يكفّي التزاماتنا فما في داعي نحرق اوقاتنا وحسناتنا بشي تافه
......
🌟خطة مقترحة (لدراسة ٥-٦ ساعات باليوم)

((#تنبيه: هاد مجرد مقترح.. ممكن يلهمك ببعض الافكار لتنظيم الوقت.. بس بيبقى لكل شخص جدول يومه اللي برتبه حسب أعماله وأولوياته ))

- نوم عال١٢ ..
- سحور عالساعة ٤ + صلاة + قرآن إلى ال٥ ونص
- استيقاظ عال٩-٩ ونص

● أثناء اليوم حدد فترتين او ٣ فترات دراسية بتعرف من نفسك انك متفرغ فيهم.. مثلا:
الأولى: من ال ٩ ونص الصبح لل١
الثانية: من ٣ لل٥ العصر
الثالثة: من ال١٠ لل١١ المسا

والمتبقي من الأوقات: عبادات + مساعدة اهلك + شغل + راحة ونوم
............
#ملاحظة: إذا كنت ملحّق دراسة أو دراستك سريعة فممكن تخفف عدد ساعات الدراسة باليوم وتبدّلها بأمور تانية أنت بتلاقيها اهم (شخصياً كنت ادرس برمضان قريب ال ٣ ساعات)
.........
ولا تنسوا تدعوا رب العالمين كل يوم أنه يوفقكم ويبارك لكم بأوقاتكم 🌷

والله يجعل رمضان شهر بركة علينا.. وينعاد عليكم وع احبابكم بكل خير ❤️❤️