АЗ БОБОТОҲИРИ УРЁН БИХОНЕМ...
_____________________________________________

Дарахти ғам ба ҷонум карда реша,
Ба даргоҳи Худо нолум ҳамеша.
Рафиқон қадри якдигар бидонед,
Аҷал санг асту одам мисли шиша.
♥️
Агар ёри маро дидӣ ба хилват,
Бигӯ: Эй бевафо! Эй бемурувват!
Гиребонам зи дастат чок-чок аст,
Нахоҳам дӯхт то рӯзи қиёмат!
♥️
Ҳар он кас ошиқ аст, аз ҷон натарсад,
Яқин аз банду аз зиндон натарсад.
Дили ошиқ бувад гурги гурусна,
Ки гург аз ҳайҳайи чӯпон натарсад.
♥️
Бимирам то ту чашми тар набинӣ,
Шарори оҳи пурозар набинӣ.
Чунон дар оташи ишқат бисӯзам,
Ки аз ман ранги хокистар набинӣ
♥️
Зи дасти дидаву дил ҳар ду фарёд,
Ҳар он чӣ дида бинад, дил кунад ёд.
Бисозам ханҷаре нешаш зи фӯлод,
Занум бар дида, то дил гардад озод!
♥️
Баҳор омад ба саҳрову дару дашт,
Ҷавонӣ ҳам баҳоре буду бигзашт.
Сари қабри ҷавонон лола рӯя,
Даме, ки маҳвашон оян ба гулгашт.
♥️
Диле дирам, харидори муҳаббат,
К-аз ӯ гарм аст бозори муҳаббат.
Либосе бофтам бар қомати дил,
Зи пуди меҳнату тори муҳаббат.
♥️
Шаби сармову сангистону мо маст,
Қадаҳ аз дасти мо афтиду нашкаст,
Нигаҳдорандааш некӯ нигаҳ дошт,
Вагарна сад қадаҳ н-афтода бишкаст.
♥️
Ду зулфонат бувад тори рубобам,
Чи мехоҳӣ аз ин ҳоли харобам.
Ту, ки бо мо сарӣ ёрӣ надорӣ,
Чаро ҳар нимашаб ойӣ ба хобам.
♥️
Сиёҳии ду чашмонат маро кушт,
Дарозии ду зулфонат маро кушт.
Ба қатлам ҳоҷати тиру камон нест,
Хами абрӯву мижгонат маро кушт.
♥️
Ба қабристон гузар кардам каму беш,
Бидидам қабри давлатманду дарвеш.
На дарвеш бекафан дар хок рафта,
На давлатманд бурда як кафан беш.
♥️
Магар шеру палангӣ, эй дил, эй дил,
Ба мо доим ба ҷангӣ, эй дил, эй дил.
Агар дастам фитӣ, хунат бирезам
Бибинам то чи рангӣ, эй дил, эй дил.

✍️БОБОТОҲИРИ УРЁН

https://t.me/gazaltj

Модар, модар ёди парешон МОДАР,
Модар, модар чароги сӯзон МОДАР.
Афсурдаву хушкида дар чашми тарам.
Пайваста чу шохаи шукуфон МОДАР.

Пармоли Қизилқалъа ҳама зарду кабуд,
Зардаш ҳама зардобу кабудаш ҳама дуд.
Рӯзе, ки анори боғҳо пӯхта расид,
Зардоби дили модари ман ру зада буд.

Мегуфт балои сари ту дар ҷонам,
Носудаву саргашта балогардонам.
Дардам ба дилаш гирифту доғам ба ҷигар,
Зардобу заҳир гашта модарҷонам.

Найзори раҳи хонаи модар ҳама дам,
Фарёди найи хушки найистон ба алам.
Рафтам раҳи найзору бидидам модар,
Қадраш шуда афзуну мадораш ками кам.

Носуда замистону баҳорон МОДАР,
Нодида ҷаҳони нобасомон МОДАР.
Бишкуфта гули умеду гулдонаи ӯ,
Хушкида ба мисли шохи райхон МОДАР.
(Назри Яздони)

https://t.me/gazaltj

Барбод рафт, дар ғаму ҳасрат ҷавониям.

https://t.me/gazaltj

Себе ба даруни чорбоғ аст имсол,
Сандуқи дилам пур аз фироқ аст имсол.
Гуфтам биравам себа канам сараки сол,
Ин соҳиби себ дар зери хок аст имсол.
***
Э, очаи ҷон, чиба калонам кардӣ,
Кӯза додиву ба об равонам кардӣ.
Аввал ба ширу қаймоқ калонам кардӣ,
Кӯзача шикаст, ситам ба ҷонам кардӣ.
***
Боми ҳама бому боми мо дар соя,
Ёри ҳама дуру ёри мо ҳамсоя.
Ҳаргиз-ҳаргиз ёри ҳамсоя нагир,
А пушти дараш очаш раҳ мепоя.
***
Қади ту ниҳолаю рухат чун лола,
Як лаҳза ҷудогият ба ман сад сола.
Қасам мехӯрам, агар ту бовар накунӣ,
Ин чеҳраи зарди ман гувоҳи ҳола.
***
Ман садқа шавам бунафшаи кӯҳира,
Ман садқа шавам ҷӯраи раҳдурира.
Ҳамиҷа будем ҷангу ҷадал мекардем,
Ҳоли мекашем ҷафои раҳдурира.
 
Аз китоби «Фолклори тоҷик». 

https://t.me/gazaltj

БА МУНОСИБАТИ РӮЗИ МАВЛОНО

Ё ҲАЗРАТИ МАВЛОНО!

Ганҷинаи ирфонӣ, ё Ҳазрати Мавлоно!
Гулбоғи шукуфонӣ, ё Ҳазрати Мавлоно!

Наҷме ба Самарқандӣ, нуре ба Бухороӣ,
Хуршеди дурахшонӣ, ё Ҳазрати Мавлоно!

Бар ташнадилон наҳрӣ, бар гӯшашинон шаҳрӣ,
Шодии фаровонӣ, ё Ҳазрати Мавлоно!

Сад қарн ту барноӣ, сад қарн ту доноӣ,
Донандаи Қуръонӣ, ё Ҳазрати Мавлоно!

Дар базми тараб имрӯз, бо чеҳраи дилафрӯз,
Пайдоиву пинҳонӣ, ё Ҳазрати Мавлоно!

Эй хонаи меҳри дил, ганҷури сипеҳри дил,
Дар мағзи дилу ҷонӣ, ё Ҳазрати Мавлоно!

«Девони кабир» ҳастӣ, бо «Маснавӣ» сармастӣ,
Ҷон нею ту дар ҷонӣ, ё Ҳазрати Мавлоно!

Ту ёри Худо бошӣ, аз ӯ на ҷудо бошӣ,
Бар ёр санохонӣ, ё Ҳазрати Мавлоно!

Дар назм зи худ растӣ, дар наср қавидастӣ,
Дурру гуҳари конӣ, ё Ҳазрати Мавлоно!

Дур аз ҳама оинӣ, воло ту ба ҳар динӣ,
Худдону Худодонӣ, ё Ҳазрати Мавлоно!

Маъвои ту дар дилҳост, ҳар ҳарфи тарат саҳбост,
Ғамхор ба ёронӣ, ё Ҳазрати Мавлоно!

Ихлосу вафо дорӣ, боғию сафо дорӣ,
Ин сонию инсонӣ, ё Ҳазрати Мавлоно!

Дар Вахши дилам ҷоӣ, дар Балхи дилам поӣ,
Гавҳар ба кӯҳистонӣ, ё Ҳазрати Мавлоно!

Дар Қуния гар хобӣ, дар дидаи мо тобӣ,
Бо мо ту ҳамемонӣ, ё Ҳазрати Мавлоно!