Hogvartsning yangi davri boshlanmoqda

Agar siz “Uzuklar hukmdori” yoki “Garri Potter” haqidagi kitoblarni o‘qigan bo‘lsangiz, bilasiz kitobning ilk sahifalarida tarjimon tomonidan “bu kitob to‘liq to‘qima va hech qanday haqiqatga ega emas, sehr-jodu esa shirk va bid’atdan o‘zga narsa emas” degan mazmunga yaqin ogohlantirishlarga ko‘zingiz tushgan bo‘lishi mumkin.

Ammo bu aynan tarjimonning so‘zlari ekaniga shubham bor ehtimol muharrirlar yoki nashriyotlarning o‘zi bu bandni qo‘shgandir. Axir har qanday o‘quvchi bu kitobni mutolaa qilar ekan undagi voqealar real hayotga mos kelmasligini ich-ichidan juda yaxshi tushunadi.

Shunday ekan kitob mazmunini boshidanoq qoralab qo‘yishning nima keragi bor? Axir bu turdagi asarlarning asl maqsadi sehr-jodu yoki cho‘pchaklarni targ‘ib qilish emas-ku. Aksincha, ularning ichida do‘stlik, sevgi, oila kabi qadriyatlar yashirinadi. Yovuzlik baribir jazolanishi, yaxshilik esa o‘z mohiyatini namoyon qilishi haqida gapiriladiku.

Bizda esa go‘yo kitobdan oldin uning ustidan hukm chiqarib qo‘yishadi. Bu xuddi siz sevimli ovqatingizni buyurganingizda, ofitsiant uni olib kelib, “bu ovqat aynigan” desa, ishtahangiz yo‘qolib, uni yemay qo‘yishingizga o‘xshaydi.
O‘quvchilarning ham ishtahasini bo‘g‘mang, ruhiyatini o‘ldirmang.