➡️Ադոբ-Ավտոսան

Թիմերը իրար մոտ ուժերի թիմեր էին և խաղը տեմպով ստացվեց, եղան փոխադարձ սխալներ, Ադոբն ավելի ձեռագրով ֆուտզալ էր խաղում, թե շարժումները և թե գրոհներն ավելի մտածված էին։ Ավտոսանի մոտ շատ էին ուղղահայաց գրոհները, երբ փորձում էին 2-3 փոխանցումով արդեն հարվածային դիրք դուրս գալ։ Խաղը փոխվեց, երբ Ավտոսանը սկսեց 5-ով գրոհել, գրոհները դարձան ավելի համակարգված և ոչ շտապողական ինչն էլ բերեց հաշվի հավասարեցման, որից հետո հոգեբանական առավելություն ստանալով Ավտոսանը կարողացավ հաղթել 4-2 հաշվով, կատարելով այսպես ասած քամբեք։

➡️Վան-Լոռի 6-1

Խաղի սկզբնամասը դժվար ստացվեց Լոռիի թիմի համար, այնքան էլ չէր հաջող չէր դասավորվում խաղը, բայց այս թիմը ակնհայտ ավելի ուժեղ է Վանի թիմից և սպասելի էր, որ Լոռին կհաղթի Վանին։ Երկրորդ կեսի մինչև միջնամաս հաշիվը բացված չէր, այնուհետև մեկական գոլերով փախանակվեցին։ Լոռիի երկրորդ գնդակից հետո Վանի խաղը դարձավ ավելի հախուռն, փորձում էին 5-ով գրոհել, բայց շատ չհամակարգված, ինչը բերեց միանգամից մի քանի գնդակ ընդունելուն և այսպիսով Լոռիի թիմը կարողացավ հաղթանակ տանել Վանի նկատմամբ։

➡️Հավաքականի խաղի մասին։

Տեսագրությունը նայելուց հետո կարելի է ասել, որ երկու շատ տարբեր խաղակեսեր ունեցանք։ Առաջին կեսում կարծես տրամադրվածությունը, կռիվ տալու ցանկությունը մինիմումի էին, կենտրոնացվածությունն էլ այն չէր։ Հենց սկզբում Աղաջանովը կորցրեց դարպասը և շատ հասարակ գնդակ ընդունեցինք` դա հենց խոսում է խաղի դուրս գալ առանց խաղի մեջ լինելով։ Հետո եղավ Խրոմիխի հեռացումը, ինչը ևս առաջին կեսի վրա ազդեցություն ունեցավ։ Ազդեցություն ունեցավ նաև շատ լավ դիրքերից վրիպումները։

Երկրորդ կեսում արդեն սկսեցինք միանգամից 5-ով գրոհել, ինչը ռիսկային էր և արդարության համար 2 անգամ ուղղակի փրկվեցինք, հակառակ դեպքում անչափ դժվար կլիներ։ Երկրորդ կեսում ամբողջությամբ խաղը մեր ձեռքում էր, բայց Շվեդիան էլ լավ պաշտպանվեց։ Զգացվում էր Նեվեդրովի առայժմ վատ մարզավիճակը և Սանոսյանի բացակայությունը։ Լավն այն էր, որ կարողացանք 0-4-ից հետ գալ և գոնե 1 միավոր վաստակել։

➡️ՊրոԴեվ-Աթլետիկ 5-5

Ինչպես արդեն նշել էի այս մրցաշրջանում ՊրոԴեվն ավելի վստահ տեսք ունի, թեկուզ միայն վստահությունն ու լարվածության պակասը բավական այլ որակ են հաղորդում խաղին։ Անցած մրցաշրջանի առաջին հատվածում թիմը նոր էր և կամաց-կամաց բավական վստահություն ձեռքբերեց, բայց հետո առաջնության երկրորդ հատվածում կարծես ձեռքբերածը չկարողացան պահել, տեսնենք այս տարի թիմը ինչպես կխաղա առաջին և երկրորդ հատվածները։ Այս խաղի առաջին գնդակը ՊրոԴեվի կատարմամբ շատ գեղեցիկ էր և ընդհանրապես առաջին կեսը շատ հաջող դասավորվեց ՊրոԴեվի համար, Աթլետիկը գնալով տեմպը բարձրացրեց, բայց ՊրոԴեվը համբերատար պաշտպանվելով և հակագրոհներ որսալով 4 գնդակ խփեց, ինչին Աթլետիկը կարողացավ պատասխանել ընդհամենը մեկ անգամ խաղավարտից վայրկյաններ առաջ։

Երկրորդ կեսը արդեն հաջող սկսվեց Աթլետիկի համար մեծ տեմպով սկսեցին և միանգամից շատ գեղեցիկ գոլ խփեցին ՊրոԴեվի դարպասը և արդեն սկսեց Աթլետիկի առավելության խաղը, տեմպը բարձրանալուն պես սկսեցին գոլեր խփել և հաշիվը արդեն դարձրեցին 5-4 Աթլետիկի օգտին, տեմպի բարձր լինելու պատճառով նաև լինում էին սխալներ, այդ թվում նաև Սարգիս Կադրջյանը ՊրոԴեվի դարպասապահ երկու անգամ սխալվեց և գոլ ընդունեց ՊրոԴեվը, բայց խաղավերջում էլ արդեն ՊրոԴեվը կարողացավ հավասարեցնել հաշիվը։

Այս խաղը շատ դիտարժան ստացվեց և հիշեցնում էր որևէ եզրափակիչ հանդիպում։

➡️Թիմ Ագրո - Ալաշկերտ

Այս խաղը ևս պայքարով էր, Ալաշկերտը կազմի թարմացնելուց հետո ուժեղացել է և մի քանի խաղացող երի որակային առումով նաև գերազանցում է Ագրոյի թիմին։ Հաշիվը բացեց Ագրոն ու երկու թիմերի կողմից բավական բաց ֆուտզալ էր ընթանում, փոխադարձ գրոհներով` երևի մի քիչ ավելի շատ Ալաշկերտի առավելությամբ, իսկ Ալաշկերտի դարպասապահ Սուրեն Ղազարյանի հեռահար կրակոց գոլը շատ տպավորիչ էր և առաջին կեսն ավարտվեց 1-1:

Երկրորդ կեսը ևս սկսվեց փոխադարձ գրոհներով և կրկին թիմերը դիտարժան պահեցին խաղը, բայց թիմերից ոչ մեկին էլ չհաջողվեց հաշվի մեջ փոփոխություն մտցնել։ Կարծում եմ այս խաղի շատ տրամաբանական հաշիվ էր, քանի որ գրեթե հավասար խաղ եղավ երկու թիմերի կատարմամբ։

➡️Սահֆին-Ալֆա Ֆարմ 3-0

Սահֆինը ինչպես նշել էի շատ ուժեղ կազմ է հավաքել և այս առաջնության ցանկացած թիմին լուրջ մրցակից է, այդ թվում նաև Վեգային։ Այս թիմը ճիշտ է երկարպատմություն ունեցող թիմ չէ, բայց բոլոր խաղացողներն առանձին վերցրած շատ մեծ ֆուտզալային փորձ ունեն ու տարբեր ժամանակներում էլ իրար հետ խաղալու փորձ ունեն նաև։ Դեռ թիմային կազմակերպվածության, խաղային տակտիկայի պլանում հստակ համակարգված ձեռագիր չկա, բայց սխալ կլինի ասել, որ ձեռագիր չունի թիմը` կարելի է ասել թիմի ձեռագիրը հիմնված է փորձառու խաղացողների փորձի վրա։ Այս թիմը հստակ պարապմունքներ ունենալու դեպքում շատ ավելին կկարողանա անել, քան այս պահին է։ Թիմն ունի բավական ամուր պաշտպանություն և հարձակման գծում էլ թե արագ խաղացողներ, թե ուժեղ հարվածով, թե տեխնիկապես շատ լավ զարգացած և թե խաղը ներքևում հանգստացնող։ Եվ պատահական չէ, որ Ալֆա Ֆարմի հետ Սահֆինը կարողացավ ամուր պաշտպանվել, իսկ արդեն գրոհների կամ հակագրոհների ժամանակ ստեղծել ու իրացնել իր պահերը, այդ թվում օգտվելով նաև Ալֆայի սխալներից։

Ալֆա Ֆարմը թիմի կազմի առումով կորուստներ ունի և դա հստակ արտահայտվում է խաղի վրա, ունեն նաև համալրումներ, բայց եթե օբյեկտիվորեն ենք գնահատում իրավիճակը այս կազմով Ալֆային չափազանց դժվար է լինելու պայքարել չեմպիոնության համար։ Թիմին պակասում է թե արագություն, թե փոխանցումների որակ և թե գոլային պահերի ստեղծում ու իրացում։ Խոսքը գնում է չեմպիոնական պայքարի մեջ մնալու մասին, եթե ընդհանուր առմամբ ենք նայում Ալֆայի թիմը բավական ամուր թիմ է, իր ձեռագրով և խաղային ոճով։ Կարծում եմ թիմին պետք է ևս գոնե 2 շատ որակյալ խաղացող, որպեսզի թե քառյակներն ավելի հավասարազոր դառնան և թե ուժեղ մրցակիցների դեմ խաղալիս, գոնե 1.5 ուժեղագույն քառյակ ունենալ և խաղալ հերթով փոխվելով ընդհանուր ուժը պահելու համար։

Այսօրվա խաղն ընդհանուր առմամբ շատ հետաքրքիր ու դիտարժան էր և հաճելի էր դիտել երկու թիմերին էլ։

➡️Վելլես - Սինոփսիս 2-3

Այս խաղում Սինոփսիսը ի սկզբանե ֆավորիտ էր համարվում, բայց սպասվում էր, որ ավելի վստահ հաղթանակ կտանեն։ Վելլեսը հիմնականում խաղում է ֆիզիկական տվյալների և որոշակի թիմային գործողությունների հաշվին, բայց անկախ դրանից բավականին մեծ ցանկությամբ և պայքարում են մինչև վերջ։ Սինոփսիսի կազմը ևս փոփոխվել է և անցած մրցաշրջանի համեմատ ավելի թուլացել է թիմը։ Այսօր անկեղծության համար կարող էր ավելի լավ ստացվել խաղը, բայց ինչ որ բան կարծես պակասում էր, դրվագներն էլ ստեղծում էին, մոտենում դարպասին, բայց վերջին գործողությունը կարծես չկար։ Այս տարի շատ դժվար է լինելու Սինոփսիսին վերևի հորիզոնականների համար մրցելիս, քանի որ ավելի արագ և որակյալ խաղացողներով թիմերի դեմ անհրաժեշտ է լինելու թե ամուր պաշտպանություն և թե որակյալ գրոհներ ու եզրափակումներ։ Սպասենք առաջնության ընթացքին, արդեն թիմերը մտնում են տեմպի մեջ և կարծում եմ դեռ ամենաթեժն առջևում է։

➡️Սյունյաց Լեռնագործներ - Վելլես 10-1

Ավելի շատ հախուռն պայքար էր, երկու թիմերն էլ չունեն հստակ ֆուտզալային խաղաոճ, իհարկե Սյունիքն ավելի մոտ է համակարգված խաղալուն և որակային էլ ավելի ուժեղ էր։ Հաշիվն արդեն իրենով բնութագրում է խաղը, սովորաբար այսպիսի հաշիվներ լինում են հենց այն դեպքում երբ կամ մի մրցակիցը էական ավելի ուժեղ է մյուսից կամ երբ հստակ համակարգված ֆուտզալ չկա` երբ գրոհները ու հատկապես պաշտպանությունը չունի պլանավորում։

➡️ՊրոԴեվ-Ադոբ 4-4

Խաղը շատ հետաքրքիր և լարված ստացվեց, միայն այն, որ խաղի ավարտին մնացել էր մեկ րոպեից էլ քիչ ու թիմերը փոխանակվեցին մեկական գոլով արդեն ամեն ինչ այս խաղի մասին ասում է։ Խաղն անցավ փոխնիփոխ գրոհներով, փոխադարձ 5 խաղացողների միացումներով, սխալներով և գեղեցիկ դրվագներով։ Ադոբը շատ լավ տպավորություն է թողնում, բավական համառ թիմ է թե պաշտպանվելիս, թե գրոհելիս, իսկ ՊրոԴեվը կամային հատկանիշներ դրսևորեց և կարծես անընդհատ հետապնդողի դերում էին, բայց չհանձնվեցին և խաղավարտից 25 վայրկյան առաջ հավասարեցրեցին հաշիվը։ Դիտարժան խաղ ստացվեց և թիմերը վաստակում են մեկական միավոր։

➡️Սինոփսիս-Քոգնայզ 4-4

Կրկին սկսվեց թվային տախտակի խնդիրները, հաշիվը ֆիքսել են համաձայն վերջին պահին հայտնված տախտակի։ Խաղը նայելիս անչափ անհարմար է նաև հաշվել գոլերը և խաղի հաշիվը։

Խաղի մասին կրկին երկու ՏՏ ընկերություններ էին հանդիպել և կրկին պայքարը լարված էր, խաղասկիզբը անչափ վատ սկսեց Սինոփսիսը, բազմաթիվ սխալներ, փոխանցումների վատ որակ, լարվածություն, իսկ Քոգնայզը հակառակը շատ վստահ էր սկսել և արագ երկու գոլ էլ խփեցին։ Քոգնայզում ստանդարտների խաղարկումը արդեն հստակ ձեռագիր է դարձել։
Հետո Սինոփսիսը վերագտավ իր խաղը և կարողացավ հետ գալ խաղ ու հավասարեցնել հաշիվը։ Ընդհանրապես այս տարի Սինոփսիսը կարծես խաղին վստահ մոտենալու խնդիր ունի, նկատվում է լարվածություն և անվստահ գործողություններ։ Քոգնայզի մոտ կարծում եմ խնդիրներն ավելի շատ որակային բնույթ են կրում` սկսած փոխանցումների որակով և անհատական որակներով։

➡️Սահֆին-Ամերիա 2-1

Այլ որակի հանդիպում էր, շատ դիտարժան, որակով և պայքարով։ Սահֆինի կազմում թույլ խաղացողներ չկան, իսկ Ամերիան խաղում է արդեն հստակ ձեռագրով, մտածված պաշտպանությամբ և գրոհներով։ Ի սկզբանե Սահֆինը ֆավորիտ էր, բայց Ամերիայի գրագետ խաղի շնորհիվ խաղը շատ բարդ ու լարված ստացվեց, մինչև վերջին վայրկյանները համիվը հավասար էր և միայն վերջում Սահֆինին հաջողվեց հաղթանակ կորզել։
Հաճելի է դիտել այսպիսի խաղերը, որտեղ սխալները քիչ են և որակը շատ։ Սահֆինի թիմին դժվար է լինելու հատկապես Վեգայի դեմ, քանի որ այս թիմը չունի հստակ խաղի պլանավորում, այլ խաղում են միայն խաղացողների անհատական փորձի ու վարպետության հաշվին։ Բայց այն որ այս թիմը չեմպիոնական պայքարի մեջ է, դա ակնհայտ է։

➡️Ալֆա Ֆարմ-Ինթրասթ 7-2

Այս խաղում կարգերի և որակների տարբերությունը մեծ էր, ինչն էլ արտացոլվեց հաշվի մեջ։ Ալֆա Ֆարմը վստահ հաղթանակ տարավ։ Ինթրասթը վատ թիմ չէ և ունեն նաև բավական որակյալ խաղացող եր, բայց խաղային տեմպը, արագությունները, փոխանցումների որակը միանշանակ զիջում էր Ալֆայի թիմին, զիջում էին նաև գոլային պահերն իրացնելու հարցում, այնպես չէ որ առաջին կեսում էլ, երկրորդում էլ շատ լավ պահեր չունեցավ Ինթրասթը, բայց չկարողացան դրանք գոլի վերածել։
Ալֆան այսօր վստահ էր խաղում, բայց նաև նկատելի են որոշակի սխալներ, մանավանդ պաշտպանության հատվածում թե 5 խաղացողի դեմ պաշտպանվելիս, ինչի ժամանակ էլ գնդակ ընդունեցին և թե առհասարակ։ Սխալներ կային նաև գրոհի սկսելու պրոցեսում կամ գնդակը խլելուց պաշտպանութան ֆազայից հարձակման անցնելու ժամանակ, երբ վերջին խաղացողը փորձում է պարզ խաղալու փոխարեն այլ լուծումներ գտնել, այս սխալը արդեն մեկ խաղ չէ, որ նկատվում է, անցած խաղում նույպես թիմը նման սխալից գոլ ընդունեց։ Գրոհի փուլում այսօր Ալֆայի մոտ կարելի է ասել ամեն բան ստացվեց, բայց պաշտպանությունը և պաշտպանությունում խլած գնդակով գրոհ սկսելը կարծում եմ դեռ լուրջ հարցեր է թողնում, եթե արդար գտնվենք առաջին կեսից սկսած Ինթրասթը եթե ավելի որակյալ գտնվեր մի քանի անգամ կարող էր պատժել։ Իսկ ավելի ուժեղ թիմերի դեմ այս խնդիրը արդեն նկատելի է լինելու։

➡️Լեո-Պիկսարտ 1-5

Այստեղ ևս կարգերի և փորձերի տարբերություն կար և Պիկսարտը խաղ խաղի վրա բարելավում է խաղային որակը։ Այս թիմը ևս պայքարում է բարձր դիրքերի համար և մրցակցելու է Սահֆինի, Վեգանի, Ալֆայի հետ։ Խաղում շատ վստահ տեսք ուներ թիմը և այդ հանգստությամբ էլ հաղթեցին։ Լեոյի մասին նորից կրկնեմ, որ լավ տվյալներով թիմ է, բայց խաղային փորձը, ֆուտզալային ձեռագիրը շատ է խանգարում թիմին ցույց տալու իրական հնարավորությունները, հուսանք թիմը կմնա, կաշխատի խաղաոճի վրա և կտեսնենք իրական պոտենցիալը։

➡️Վաղարշապատ-Վեգա 0-8

Առաջին վայրկյաններից Վեգան ցույց տվեց իր կարգը և ուժային հարաբերակցությունն էլ ակնհայտ տարբեր էր, այս խաղի մասին շատ խոսել երևի թե պետք էլ չի, քանի որ ակնհայտորեն Վեգան գերազանցում էր։ Կուզեի գոնե մյուս մրցաշրջանում Վեգային տեսնել բարձրագույն խմբում, այս թիմը նորից նշեմ այսպիսի առաջնության համար չէ, և ինչքան երկար մնան Ա լիգայում ու չփորձեն զարգանալ, այնքան խաղային նահանջ է նկատվելու, մոտիվացիայի պակաս։

➡️Կոնվերս-Ավտոսան 5-2

Խաղը լարված էր ոչ միայն ֆուտզալային առումով այլ խաղավերջում կրքերը ևս բորբոքվել էին և նյարդ էր նկատվում երկու թիմերում էլ։ Մինչև երկրորդ կեսի միջնամաս խաղը հավասար էր, բայց վերջում Կոնվերսը ավելի կենտրոնացած գտնվեց։ Ավտոսանում կան փորձառու ֆուտզալիստներ ի դեմս Սարո Մարդանյանի, ովքեր կարողանում են խաղ վերցնել իրենց վրա, բայց դա բավարար չէ ամբողջ խաղը հաղթելու համար, ընդհանուր թիմի ձեռագիրը և որակը զիջում էր Կոնվերսի թիմին, իսկ Կոնվերսը երկար ժամանակ մարզվում է ու ձեռագիր ունի և դա շատ նկատելի էր այսօր թե պաշտպանությունում, թե գրոհների ժամանակ։

➡️Այսօր բարձրագույն խմբում ունենք հետևյալ խաղերը։