أهم 3 كلمات لازم تاخدهم مبدأ في أي موقف في حياتك "متخافش-متقارنش-مش لازم تبقى شخص مثالي"
لو فكرت فيهم هتلاقيهم شاملين معظم الأخطاء اللي بتقع فيها في مواقف كتير في حياتك
فـ مثلًا..متخافش.. إيمانك فعلا ان مفيش حاجه تستاهل الخوف وانك فعلا قادر تاخد خطوه معينه فيها انجاز جديد الخوف كان عامل زي جدار فاصل بينك وبين تحقيق الهدف ده هيخليك قادر انك تاخد أول خطوة فعليه تجاه الموضوع وهيكسر خوفك من المجهول أو من التجربة.
متقارنش ..في الحقيقة المقارنة بعيدا عن ان هي مشاعر سلبيه مش هتقدمك كتير وهتخليك واقف مكانك بتتفرج على اللي حواليك هي بردو من أسوأ المشاعر السلبيه اللي هتأثر على نفسيتك وتقبلك للوضع الحالي اللي بتمر بيه
مقارنات مقارنات مقارنات وكأنك داخل حرب مع ناس هما مش مهتمين لوجودك من الأساس ومكملين في السعي وانت كل اللي بتعمله انك واقف مكانك بتفكر ازاي تسبقهم ، مش مهم عندك مين بدأ الأول ،اجتهدوا أكتر منك ولا لأ، كان في عوامل تساعدهم انهم يوصلوا لده ولا لأ كل اللي فارق معاك النتيجة النهائية
فـــ متقارنش وخلي المقارنه الوحيده في حياتك هي مقارنة نفسك قبل وبعد وفي تطور فعلا ولا لأ.
مش لازم تبقى شخص مثالي.. مين فينا مبيحاولش يبقى شخص مثالي؟ وهي فعلا صفه كويسه وصفه محموده مش وحشة ولا حاجه، بس الحقيقة انت مش مطلوب منك ده ولا أصلا في حد وصل للمثالية ده قبل كدا غير سيدنا محمد وده طبيعتنا كبشر
اه انت هتحاول توصل للمثالية دايما ومش هتمل من ده ودا السعي اللي في الدنيا بس مش هتوصل للمثالية الكاملة! عادي تبقى علاقتك بربنا كويسه بس في ذنب مش عارف تبطله
عادي تبقى حد شخصيته وأخلاقه كويسه بس فيك صفة مش حاببها ، عادي تبقى متميز في الدراسة بس في ماده مش بتفهمها ، عادي أًصلا متبقاش مميز في الدراسة ككل بس مميز في حاجه تانيه..المهم انك فعلا تحاول تغير من الجزء السلبي ده في نفس الوقت متسمحش للموضوع ياخد وضع نفسي أكتر من اللازم.

يومًا ما هتدرك ان الموضوع ال مزعلك مكنش مستاهل العناء النفسي ده ولا كان يستاهل يشغل وقتك أو تفكيرك، لو كان الموضوع ده حد معين فكل شخص ليه مرحلة ف حياتنا وأكيد هتخلص وعادي الدنيا م هتقف هتعرف ناس غيره وتتعلق بيهم وحياتك هتمشي، لو كان موقف معين زعلان عليه ف هي ده طبيعة الدنيا والغريب أصلا لو حصل عكس ده خليك مؤمن ان ربنا م هياخد منك حاجه عزيزة عليك الا وهيعوضك عليها خير سواء أدركت بعدين ليه ربنا بعد عنك الحاجه ده أو لا، أحيانا كتير بنزعل ع مواقف ونقول ليه ونكتئب ونخش ف أوجاع نفسيه وبعد فتره ربنا بيظهر لينا حقيقة الأمر وليه مكنش خير لينا كان كل المطلوب منك بس تصبر ومتسخطش ع قضاء ربنا وأمره وأكيد كلنا مرينا بمواقف مشابهه لده كتير، ف.. اصبر دلوقتي وان شاء الله خير ليك🤎

كان هيبقا أفضل ف ظل تغييرات المناهج ده ولما خلو الاحصاء ماده مضافة للمجموع كانو يخلو الدين ماده مضافة للمجموع ويعدلوا المنهج لأن الجيل ال طالع معظمهم لا يفقه شيئ أصلًا عن الدين ودا شيئ سلبي

مفيش شك ان محدش فينا بيحب المسؤوليات، سواء كانت مذاكره..شغل..او حتى مسؤولية شخصية.. هنا بييجي دور الشغف، الشغف هو ال بيحركنا، هتلاقي نفسك بتعمل حاجات مكنتش متوقع تعملها، عشان كد لازم تجدده كل يوم وتصحى باهداف معينه♡
تجديد الشغف ده حاجه من اتنين اما انت ماشي كويس وعلى خطى ثاابته كمل ال بدأته، اما انك تكاسلت شويه ومكنتش ماشي كويس ف ده ف حد ذاتها م مشكلة..المشكلة انك متبدأش دلوقتي، كلم نفسك اول ماتصحى انا عندي كذا كذا، متنامش الا ونت عملت ال عليك وصدقني من هنا بييجي توفيق ربنا🫶🏽

ازيك يجميل.. لازم تدرِك ان م لازم تبقا طول الوقت بيرفيكت.. لازم هييجي عليك لحظات ضعف ف فترة من فترات حياتك سواء انت موجود فيها حاليا أو لسا هتمر بيها، بس في فرق بين واحد ناضج وبيقرأ كتابات يحيى وعارف ان ده ماهي إلا مجرد فترة وهتعدي وهيرجع زي الأول وأحسن، وواحد تاني استسلم للأمر الواقع وكأن خلاص ده حياته.. موضوع الإستسلام دا مصيبه ف حد ذاته.. يعم وأناا هبطل ليه أنا كدا كدا ف النار انت م شايف أنا عملت ذنوب اد اي، انا ضيعت كتير ف المذاكرة وخلاص معدش في وقت انا عرفت اغش تمام معرفتش انا م فالح ف تعليم أصلا، وحاجات كتييير بنسمعها وكأن الانسان خلق صخرة ف جبل يطل ع المحيط الهادي.. فيها اي لو بدئت تستعيد ذاتك واحدة واحدة.. آه أنا ف فترة صعبه والدنيا بتبوظ مني بس انا ستيل ف ايدي الفرصه اني احاول تاني وامشي ع خطى ثابته اني اتغير للأحسن أيًا كان السبب ال وصلني لليأس ده.. راجع نفسك قبل ماتضيع وف الآخر م هتلوم الا نفسك.

استخرج نرجسية من العبارة السابقة🫣

في دعاء ومن أهم الأدعيه ال لازم تضمّنه ف صلاتك وهو "اللهم إنا نعوذ بك من فواجع الأقدار" .. ببساطه فواجع الأقدار ده هي انك تتفاجئ من قدر ربنا قدره، او بمعنى أصح تتصدم، أنا مؤمن ان أغلبية الزعل بييجي من الصدمه اكتر منه الموقف نفسه، يعني مثلًا كلنا مؤمنين بالموت وانه وارد ف اي وقت نخسر أهلنا وصحابنا والناس ال بنحبهم وال ميقتنعش بده هو م بس كافر لا هو عبيط😆، ال بيخلينا زعلانين جزء كبير منه الصدمه، وده هتشوفها أكتر لو الشخص توفى من غير سبب أو مرض وهتلاقي كل كلامهم انه ازااي دا كان كويس؟!!!
الموضوع بيختلف شويه لو واحد كان مريض ومرضه طوّل أهله بيبقو زعلانين طبعًا لأنهم خسرو حد عزيز عليهم بس م بنفس مقدار الزعل لأنهم كانو مهيئين لحاجه زي ده.. لو حد ف علاقة واكتشف ان الطرف التاني كان بيخونه مثلا او كان توكسيك ف العلاقة ممكن يكون كرهه خلاص بس زعلان بسبب الصدمه ال اتصدمها فيه.. في أمثلة كتير ع الموضوع فكر فيه هتلاقي نفسك عرفت لي زعلت ع الموضوع المعين رغم انك بتفتكره بتحس انك عبيط، او ليه أحياناً م بنحس بزعل حد ونشوفه عبيط بردو.. بس الأهم من الماسدچ انك تُدرك أهمية دعاء فواجع الأقدار وتدعيلي معاك🤎