آنة ضيعتك،
لأن ما والمتني
لا تظن ذنبك ضياعي
لا عرفت اتحبني گد حبك لعيني
ولا كسر گلبك وداعي
ردت انافسني برحيلك
حتى من تبرد علية تدفي نار اجفاك گاعي
شبّعت عمّري انتظارك
لا هلي الرادولي غيرك
لا هلك دزولي ساعي
چنت اگلهم
ما يخليني اشكي كسرة گلبي لله
وما يسويها،، حبيب الروح واعي!

وصلتني لنقطة آنة الصرت اعوفك
رغم بيدك تطفى ناري
گمت اخافن يگضي عمري ولسة ما گاضي انتظاري
تعمّدت تزغر بعيني
وهذا مو گدرك بروحي
ولا ازغاريتك اگداري
وانة چي جيت اروي گاعك
ما ركد چفك بچفي،
ومنجلك صبّح اسواري!

_فرح حسن

جيتني امن الـلا وعي
ومسيّت شوگي..
وما گدرت اثنيك چي طاغي اعتذارك
وآنة گتلك لا تجيني
وبختياري يصير فگدك
چي امجافاي اختيارك
وعفت خلگي اوياك بارد
ليش حتى ارحم لهفتك
ما رحم گلبي انتظارك؟؟
عيشتّني بـ وحِدة، حد ما شبّ صفاري
والخريف البية ما حرّك خضارك
ونجم مصلوبة ونطرت يزول ليلك
چان حلمي انشاف من يفز نهارك

وچان حلمي يضيع خوفي وتحتويني
آنة زحمة انگاد للما يشتريني
وانة گتلك
عيشتّني بفگدك بديرة مدامع
يعني اذا ما حاطلي اچفوفك گناطر لا تجيني


_فرح حسن

ما لگيتك جاي من طشّت غربتي
وانة ردتك مدن ما ردتك مسافة
لا تجيني .. وفگدك اهوّن
شلّي بالوّد اليشبعنّي حسافة
وگبل لا تنزل مطر لمّيت گاعي
وكل نشد يلفيني منك گمت اخافة
وصح احن، بس ما اردلك
والبچي الطاح اعلة فگدك
باچية بسِدك اضعافة


_فرح حسن

واصفن عالضوة الملموم حدر الباب
هلبت ظلّك ايكسرة

هلبت واشبگ اضلوعك شبگ لرگاب
من تحوطها الغترة

وجنت ما هامك گلبي
مثل حفنة كتب ب ارفوف
يم إنسان مايقرة

وهلبت من تجي تحنلي
تجي متغير وتارس اكتارك شوگ
ومن امكابرك تبرة


_فرح حسن

يعني اذا ما كاسر امتونك فراغي
وظرف من مبچاك جايب
چا بياهي يطيب جرحي؟
وعامل بهجرك عمايل ما مسويتها النوايب
تزغر اعيوني و الك مبچاي يكثر
جيب اليلّم حزني عن فگدك يخايب
وآنة مو بس دمع گمت ابچيك شَعري
ومو خصل يـ احبيّب ابچيلك گصايب
وامن اهد وجهك .. درت وجهي لقسمتي
ولا غريب الجاس گلبي ولا احنا اولام الگرايب

وصحبتي الشافوني احنلك
شالوا اسمك من حچيهم
ولوداعك زوگوني
وكثر حضني لصورتك صرتلها حايط
گفة اصوّرك علگوني..
وماحچيت لبشر عنك ،شافوا اسمك بالقصايد
وانتَ من خمّوا غرفتك،
بالدفاتر ما لگوني!!




_فرح حسن

اجيك امحملة انة اهموم وعتاب
وتتلگاني مثل النسمة بالباب

واحضنك والبنفسج منك يفوح
عطرك چن ورد خزامى جذّاب

نبع ،ورّدت يم مجراك الـ اجروح
اثر ما باقي ،مو بس الجرح طاب

واجيبك كون لجل اعيوّنة اسبوح
نطيح بعِلة اذا وجهك ولك غاب

ومثل گذلة ابـ هِوية اگليبي مفضوح
اطيرن هچي من طاريْك ينجاب

واغار ولو الحّ اعليك مسموح
واضّمك عن نظرهم ،صورة بـ اكتاب

من إتمر تظل نسوانّة اتنوح
مثلك لأن ما شافن گبل شاب

النسيم الـ على اچتافك غافي مشتول
يشجرة خيزران بطول خلاّب

ابريسم ، خضّريت اگبال عاگول
نخاف اعليك من اچفوف الـ اغراب

اخافن فوگ حايط غيرنا تطول
واخافن تعلى عن حدّك يـ لبلاب


منو امخلّي الزعل بيناتنا يجول؟
ورجلك ليش طولانة اعلة الـ اغياب

اعتذرنا وبلكي طيب امسامح ننول
هــاي الــروح حنـتـلك يـحباب

ونجي لمگفاك .. ونبوسك يمدلول
كتر قفل الگلادة ، بمگفة الـ ارگاب



_فرح حسن

آخر شوگ الك وتفض
اسد الباب واطيوفي
ولا خليك بـ أزلوف العمر تركض
ولا اخليك مهدار لضحك وجهي،
عشگك بس حزن يفرض
ولو كلفة
چنها (االله يرحمه) المات
هينة بحلگ كل الناس
وبحلگ اليحب تعرض
وخل بيناتنا المرسال
انة حنيتلك گد ما
بضلوعي الـ اغياب ايرّض

احس روحي نشاز ابلاك
شذرة بثوب
لمّن توگع اينّشز..
يالعشگك ترس وجهي..
ترس ريتي ..
شبعد من عندة روحي تفز؟
عزيزي انتة..
وابد لا تظن گلبي بيوم غيرك يا عزيز ايعز
الضِمة اميبسهن اسنيني
اريد اروة
اريد اتكحل بشوفة صبح وجهك
يبعد ارسومنا الحلوة
صرنالك شعر ، واكتاب ، وامتاع
ودعة وغنوة

هني اغيابك عسة ترد منة سالم شوگ
لا تحتار يمهنّة
سلوة الدمع بمجافاك ظلّ النة
وگمت ما سولفك لله
شيردلياك
خردل بين صم اتراب ضاعلنة
شيردلياك
حزني اعليك چن سلسال
ونّة اتچلب بـ ونّة

يبعد اچفوفنا الگظتها تكتبلك
فراغ العمر من دونك
فراغ بدنيتي، بگلبي،
بأصابيعي
بكثر ما جافية اعيونك..

بعدني ابلاك اطوف الوّد
ادوّر عن مراسيلك
بعدها اعيوني ما هدّت تفاصيلك
بعدني ومن افز غبشة
الخضار البيها مسگي بفيض گد ما عيني تبچيلك
بعدك ما معلمني اعلة نسيانك
بعدك ما معلمني..
اروح ليا كتر بالطيف ويذبني اعلة بيبانك
بعدك ما زغر طرواك ،
كبر شبسرعة هجرانك؟

وتظل روحي تلوب اعليك واتنطّر
واگولن مثلي ما جايس اعيونك نوم
اگولن مثلي يتحسر
تحز بية الليالي الباردة ابلياك
تحز واتوچة الك واسهر
وهذا آخر مراسيلي
يجيك امبلل وبي شوگ وامعطر

صدگ مالك بروحي اعتاب؟
صدگ ننتهي وچفك ما يدك الباب؟
هذا آخر وجع للروح؟
حاچيني الوجع چذاب
سولفلي الدمع چذاب
رد لية القدر چذاب
بس انتة الصدگ بيهن
ي احبيّبي البچي خلّف ابعيني اصواب
شبدر من گلبي وانغثيت ..
خاطر تملي عمري اغياب؟


واصفن عالضوة الملموم حدر الباب
هلبت ظلّك ايكسرة

هلبت واشبگ اضلوعك شبگ لرگاب
من تحوطها الغترة

وجنت ما هامك گلبي
مثل حفنة كتب ب ارفوف
يم انسان مايقرة

وهلبت من تجي تحنلي
تجي متغير وتارس اكتارك شوگ
ومن امكابرك تبرة



_فرح حسن

چذاب
ما طرّزت بوساتي بـ نحر
ولا وادعت حضني بحضن
مو گتلك اكتاري عطش
حطني اعلة نهرانك سفن
حطيتني اولاية شمس
يم الشمس
وانة ندة بساع انسحن
گتلك الروح امعلعلة
وخليها يمك تستچن
گتلك اچتافك ريح ،مو مال انتچي
وگتلي انتچي..
وما هيّستهن من طحت،
من فرزنتهن گمت اوّن
ولطيوري من ردتك شجر
ما طاحن ادموعك غصن
هاي انة، ناطرتك تجي
وشباچي فك روحه هلا
وهاي انة ، بستاني گحط
لو يشب طولك لو بلا
وخطّيتلك فوگ الدرب ، هذا الدرب
چي ردت مِسرع توصلة
ومن شفت خطواتك بطت ، ما حسّبتلك ما تجي
ضيّعت ظّني البوصلة
وهاي انة فزّ طولي شلب
من رادوا يبيعون صوغاتك نذر
صيّحت ،، عوفوهن الة
وذاك انتَ ديرتكم گِطع
والبعد عدكم جندلة
والـ يشح ، عدكم بي بخت
واليّحن مابي مرجلة



_فرح حسن

(رثاء)


يلمض شرارة وجمر.. لهّاب
حزني الاعلگّنة ورة الباب
اطفيْه بدمعي ويغدي عِطّاب
واصوابه چوية عظم ما طاب

حسّاس وتغثة المحاچي
ويلمع مثل شذرة تراچي
لو فاض حزني ياهو احاچي
ابچيك؟ شتسوي البواچي؟

وما خلص مو كله بچيته
وياريته فاد الدمع ريته
البارحة ما لفة لبيته
الحلو اليستثگل مشيته

وبعدها روحي تحنله وتلوم
وهم بعدة گلبي بموته ملچوم
ولكم
لا اگدر اقرة الفاتحة اعليه
ولاريد اگولن عنه مرحوم

مو بيدي ولكم موش هيّن
الاحچيلكم عنه الـ احنيّن
روحه الاحبها بيا سمة تهيم
وبيا نجم ضحكته تبيّن ؟


غمضت! وجهة شلون ينجاس
عجزت تجيسه اعيونّة الياس
وها حشى اترابك كون ينداس
حنيتلك،
بس ياهو الينام؟
ظلت بفگدك گاعدة الناس

و للـ بالنجف والگاع الـ اتفور
ما چودرت لو گالوا نزور
ولگبورهم ما ماخذة انذور
ومن طولة نام ،
ابين الـ اگبور
اندگيت يم اترابته ابخور

امناشغ رحتله وما بچالي
ولا گعد يشكي ولا حچالي
الـ صبّر اگليبي بنومته هناك
چي راسه بارد .. گلبه خالي

والتربة ابــــد مـا لا يگتله
گـوم اكشخ اعلة الدنيا گتلة
وما گعد چـم مرة رحتلة
الظاهــر النـومة حلتـله

الـ بعيني چانت ضحكته انجاز
الـ من يغلط انة لجانبه انحاز
چا هو ياهو الياخذة الموت ؟؟
وين التفضله انتَ اعلة الاعزاز !

الـ ضِحكْاته تسوة،
وصوته أغاتي
الـ حنيته حنية امهاتي
الـ چم ركعة اصليلة بصلاتي
مو بچي،
امثوبتله حلاتي

ولك
مد ايده حزني لگلبي، جابك
وظل شابگ اعيوني سرابك
ميت ، ووجهك ياخذ الروح
يالسابي ديرتنا بشبابك

يحليو ، كون الموت يندار
نتبادل انة اوياك الادوار
ابچيلي ، وانة وگبرك اگدار
وآخذ وحشتك عني، وياي
وابقى انتَ لـ چفوف اختك اسوار

وموش انة، هذا الوجع ينخاك
موش انة ، گلبي الجوة ينعاك
والعمر هم ما يگصر يطول
ليا حدّ اعيش ابلاك مشتول!
كون المنية اتجيبني احذاك...

يم گبره هوّدوا، ونصوا الـ اصياح
ساكت اوليدي ،
الحچّيه قدّاح
عمره سفينة ، وگلبه ملاّح
خلوها روحه شوية ترتاح
خِلْصت امعارك وية الـ ارياح

وجبته النعي لمرقدك زاير
وربعك بچوا يمك جگاير
بزلف أمهاتك شيب صاير
ما لوّنن عگبك ضفاير

وعالصوّر طرزنة الدمع طوگ
وبعدك ولك ما ضحكن احلوگ
واعيونك، التارسهن الشوگ
من الموت كون نبوگهن بوگ

مرت سنة، وفگدك اشراعي
شدلاّه الموت؟ وجاس گاعي
بعدني بيك امن الله اداعي
اولا بطّلت بعدك نواعي

يوليدي سِد بيبان الـ عيون
واغفى بهداوة
، وكِف الـ اظنون
ضاع اوية چفك ، فيّ الـ امتون
لا بالسجن، ويزورك الـشوف
گمت اندعيلك كون مسجون

ولك
جرّة حناجر من الـ ارگاب
لا ينسي ، ولا يهدة الـ صواب
فگدك ارياح ، وعمري مو باب
وموت الـوصل لنياطك شلون
خلّة الورد ينگالّه اتراب!

وريت الدمع مايتلف العين
رايد بعد، ما كفّن اثنين
وعالوجع هذا الـ بعدك يصير
عالگبر نكتب عايش بخير
وكون احنة ينگاللنا ميتين!

وطافي الوجع،
بضلوعنا يهيم
وچادرّك چمّل ضيم، عالضيم
واحنا حِضر ما نلطم بخيم
إحنا الگبل ما نعرف الـ آآخ
و اوداعك أول گطرة للغيم

_فرح حسن

اتخطيت،، بس شيكض الأحلام!
وينشاف شحمل مو گلب جام
امن الدنيا لمّن ردتك اولام
من وزعّت عالوادم احظوظ
ما ضمتك لينة اوية مضمام

شمدريني گلبي ببحرك يموت
ماگدر يوصل ظلمتك حوت
وشلون اجاك وغيرنا شجاب!
ولگلبك تمنيت احط باب
چا ماگدر هجرانك يفوت

خاييني دمعي الينزل ابساع
وما تبچي كون اعيوننا اسباع
شوازاك واتشلبيت الـ اوداع
اتعودت تدفعني امن الآشيك
هالمرة موش لحضنك، لگاع!

كلشي الـ وگع ، زلفي وشگاره
شطاح اعلة فگدك، مو خسارة
شـ أذّاك ؟ واتدخْن بمرارة
لو ضجت چانت شفتي ترويك
ما مسّت اشفافك جگارة



_فرح حسن

(غير مكتملة ان شاء الله يجي يوم واكملها)

اچفيلي حِملي ، وطشلي ضحكات
مو مالت ابچي ، ادموعي خشنات
اغنيني عن الـ طيبهم مات
وگرّبني يم اگلوب لينات

الـ بروحي تدري، بوجهي ينشاف
هالـگد وضوحي وگلبي شفّاف
واخطوط اديّ بعدهن انظاف
افنيني ، من الموت ما خاف
انة التخوّفني الخطيئات

واحميني منّي ، ومن الاوزار
ومن فوضويتي ،وسوء الأفكار
ماخافن توديني للنار
بس خوفي لطفك عنّي يندار
وبوجهي تنسّد السماوات

وبالليل من تچل الأحلام
ثبّتني افز بگلب محتام
اكسر بگلبي شحاوية اصنام
واسجد لحد ما تخوة الاجدام
واستغفر بكل العبارات

وابچيلك شعندي ، وشريدن
واطلب من اليچوّن ، يهيدن
لينة اني مو من اليكيدن
لا صير صيدة ولا اصيدن
وبـ ظِلك اتعدّى الخسارات


انتَ التعرِف النية يا لون
مو هينة عندي ، وعندك تهون
ارحمني ، يا رب هاي الـ اعيون
وفك روحي من اقيود الـ اظنون
وعوّضني عن كسري انجبارات


_فرح حسن

ضايگة الروح ووسع كلش حزنها
تسدة من الصبح دكان البواچي
وتفتح العصرية ونّها..
لا غنة يوگّف نزفها
ولا دعة يزيح المكاوت هذا عنها

ألمن احچي؟
وازت كل هذا الوجع طيرة لبريدة
ومحد يهم لنزفها
تگول جام، اتلفلفت روحي بجريدة
وكون أَعَرْف الفرح يم يا شجرة يگعد
حتى اجيبه لگلبي صيدة
الخوف من شباچنا اتشلبة لغرفتي
وخنگ كل الريح بيدة

ومن رسمتلهم الخوف البية ،لاگِدرْت تشوفه اعيون مثلي ،
ولا گدر چفهم ينولة
وخاف اوصْفلهم الوِحدة شلون
ويصوّچون گلبي
وهالوجع مو مال اگوله
وابچي الـ بعيني ، و أرّد ارثي صديقي
الما شبع قمصان طولة

ومو امصايح
ماكو خامة ونّ تردّة
ينحسب دخان
ما يلفي امن اصيحه

لا عِرفت أرگص بـ زفْة الفرح عدهم
ولا لطم تعِرف اچفوفي،
هنَّ بس دمعاتي سبگتني لضريحه

وآنة من شبّيت شفت الصدگ طولي
چاا لبست الچذب ثوب
وما عشت عمري صريحة

وچا كتبتلهم الروح بخير
ما كشّفت حزني،
وچا گلت ، هاي النعاوي
البـ القصايد مو صحيحة

وبلكي من أكتب حزنها
يهيد ونها
وعمري يشعل مصابيحه


وبلكي من أتخطّى حزني
يموت شيبي
ويرجع لـ شَعري شگارة

وبلكي يندلني الحبيب الـ دوم أرسمه لصاحباتي ،
الـ يعرف الله ، وما خطى اشفافه جگارة

الـ ما دنت نفسه اعلة كاس
انترست الدنيا سكارة


_فرح حسن

آنة ضيعتك، لأن ما والمتني
لا تظن ذنبك ضياعي
لا عرفت اتحبني گد حبك لعيني
ولا كسر گلبك وداعي
ردت انافسني برحيلك
حتى من تبرد علية تدفي نار اجفاك گاعي
وآنة تعبني انتظارك
لا هلي الرادولي غيرك
لا هلك دزولي ساعي
چنت اگلهم
ما يخليني اشكي كسرة گلبي لله
وما يسويها !! حبيب الروح واعي!

ووصلتني لنقطة آنة الصرت اعوفك
رغم بيدك تطفى ناري
گمت اخافن يگضي عمري ولسة ما گاضي انتظاري
تعمّدت تزغر بعيني
وهذا مو گدرك بروحي
ولا ازغاريتك اگداري
وانة چي جيت اروي گاعك
ما ركد چفك بچفي،
ومنجلك صبّح اسواري!

چان سديت الابواب البيّنا وتوبّت گلبي
وما ارحم شوگي اليجيبك
وعبتك وكفيت نبضة
وگتله ما يرهم حبيبك.
ماشفت غيرك ضوة وگدته لوحْدتي،
وانتَ چي مو يمي احسّن فگدي عيبك..
وكون ما تتهنى بالضحكة الـ بدوني
وهاي حوبة عمري شيبك

وكون لا شفت الخضار بغير عيني
ولا ربيعك فتح بابه
انة ثقيت وصرت شذرة اعلة جنحك
من گلتلي الدنيا غابة
وانتَ طفيت الضوة اليلمض بروحي،،
وما تدنتلي الذيابة
باچر انساك ويموت بعيني طيفك،
وفوگ رف گلبي يزيد اسمك ترابة
شگد دعيت تصير فوگ إچتافي خيمة ،،
وما لگيتك،،
چان فگدانك دعوتي المستجابة



_فرح حسن
2026/5/28

عزيز ، وبسمك نلم الفراشات
وغيابك ، يگص من فرّاشنا اجناح

بوجودك ، ترگص اوية اثيابنا الريح
ومّن امناطري الـ شباچ يرتاح

وجفيت وسيطر اعلة ازلوفنا الشيب
وشگار الـ بالگصايب بعدك انزاح

وبقيت اتأمل تفز الشمس بيك
ورمادك منتظرته ايصير قداح

صبرت اوياك گلت يعِدلك الشوگ
ومثل ما أنتَ طبع المجفة ما راح

وخلص صبري ، وگلت ما تعّب الروح
شـ الية بسفن بيها الريح ملّاح

الـ ردته يصون ودي وخاطري يطيب
واصّبح يم ضحكته بخوش مصباح

أثاري ايكسّر بگلبي السنادين
ويم شتلات غيري ايصير فلاح

الـ گبل من أذكر اسمه ، تجيبة الـ اظنون
فهموني شعجب ما جابه الـ اصياح؟

وصحت حدما اتوچّى الريح عالصوت
ووگع من صوتي بـ اسباگ اليصيحون

وعفتها تخلّف الدمعات دمعات
بچي لحد ما تفطّر شوف العيون

وأنوح وبس اله ، يتفنن النوح
وبس هوَ اليعرف ايخيْب الـ ظنون

ومنّه و إله ، اعيوني ، وجرحي الاوساع
وشيّنسنّه غيري ، ايامنا بساع؟

وعمر كثر الندة ، ما بلل الگاع
بغياب الـمطر شيعوض الـيعطشون؟

شيعوضه ويا شذر عن عيني يغنيه!
وشله بعيون وادم ما يلمعون!

وچتفه ليا زلف يتّفصل امخاد؟
حبيبي الـعلى اچتافه انهد الـ امتون

گبل بالطيف اطرزه لحضني قمصان
وكت صارت بگلبه اعيوننا اتهون

وكت مو يمي صار ايوّسد الراس
احبيبّي الـ من تكسرة الدنيا، والناس
اشوفه بحضني چن ابني الزغيرون



_فرح حسن

2023/7/22

2021/4/18

دفتك .. لحد ما خدرت ايدي
وخليتك بتوت لوريدي
عيدك املاگة ..وفرگة عيدي
ويجري الدمع نهران بيدي

وضاعت اعلومك ياهو اليجيب؟
واتحزمتلك وكت الـ انحيب
گالوا يعوفك گلت ماخيب
تصبرني بغيابه المكاتيب


وعاندت وكتي بمطر صيفة
چي جيتني بطولك سگيفة
طولك ازماطي اليشفي حيفة
لو حد علية الوكت سيفة

و روّحت چي تميت راخي
انغريت عاليلفيك ناخي
گلبك الما يسمع صراخي
بهتانه يلمع من طواخي

شيتغير بفرگاك حالي؟
يمك وأحسّن مالي والي
هد ايدي ما ظل النا تالي
اكرهني بس خل امشي غالي


گربك دوة وفرگاك عِلة
ودربك نهر .. ما بية اكملة
وخليت گلت انساه .. و ولىّ
ظنيتها ابلياك سهلة
مطرت عليّ دونك دواليب


لا عابرة ولا ناسية الفات
وجروحي جوة اسيوفك تبات
ما مات حبك بية.. ما مات
صاير خشب گلبك.. حرامات
ما اجة بموتي اوية المعازيب

وجيت بوكت دفاني بادي
وشفادنا ؟ اعنادك ؟ اعنادي!
شوگك اخذني لگبري حادي
بلكي الثرى يخفف ودادي


البعيونة جانت وگفتي تميل
ماريد دمعه بموتتي يسيل
شتضيف لترابي التواسيل
گلولة..
خل يقرة المراسيل
كاتبله .. بلكن خاطرة يطيب

بگد ما
بلاية اقيود ردتك
بگد ما
بقيت ابلا ضحكتك
بگد
خيبت اظنوني لرجعتك
اعذرني.. چي وحدك تركتك

وفزيت وانة بگبري هبهاب
يم بابي
شفتك منزرع باب
احضني وك لا تحضن اتراب
ركزتّ بيك شصايبك خاب
كبران ماكل راسك الشيب


_فرح حسن

2022/2/7

زاعلتها اعيونك الحلوات ما خلتلي خاطر
والطريق الما عبرته بيوم دونك گمت اعبرة..

وگلبي بيت ابيض غسلته ببير منك
لا اريد ترد ، ولا انساك ابقى لگلبي عِبرة

وانة شنسى ؟
وانتَ چنك ماي خطواتك على التربان مجرى

وگمت ادوّر وين جرحك حتى اشِبرة ادموع..
وابچي بعتبة عتبة
وحزني منك ما گدرت اشكيه لغيرك..
كمت اكتبه
أنتَ يا كل البچي الباچيته عنك صدگ .. باقي ادموعي چذبة.

گمت اشخبط حسرتي لفگدك بكاغد
وادعي هلبت توصلك قوة سكوتي
ويم بريد الصوت دگيت اذني ثاية
لمّن اشتاگيت ينشبچن ولك صوتك وصوتي
وين راجع ؟ خنجرك خط برگبتي
وانة متعودك حنين
شلون ساومت اعلة موتي؟

شلون تنطي اچفوفي فرصة تعوف چفك،
شگلت؟ من سألوك ويني
وانتَ من هذا الظلام الباگ وجهي
بيا زوية الگاك عيني ؟
بيا ظرف تلفيني ردّي
وياكل ايامك حنيني
ليش خليت الضوة يباريني عنك
وآنة ما ردت الصبح گبلك يجيني
وانة ما ردت الهوة يحارش گذلتي
ويكشف شـ صاير عيني


وبان ضعفي بخلِّتك … چي حيلي بايد
من گلت ناسيته عرفوا بية اچذّب
لمن لمحوها برگبتي امچودرة عيونك گلايد
وانتَ چلماتك اسهامي
وتالي صابن خاطري وحزّت بروحي
وگمت ذبيت الگلايد
وانة چي ما اكدر احچيلك ولا تفهم شعوري
اهنانة اچوّملك قصايد


وچي ضباب اوجوههم بس انتَ اميزك
دونهم وجهك.. احط اعليه دوائر


هسة وين أنتَ؟ دخيلة
العافك بگلبي تصير انسان عابر

ومن بديت استذكر انتَ شعيشتني؟
دنيا متروسة ابتسامات ومشاعر..

والمعاناة الورة ضحكاتي منك
والبچي السواني شاعر..
.
.
وآنة عيشتك بمأمن
من صراعاتك، واذية الناس، واهلك
صرت لمداواك ساعي

ذني زغرن بيك بس بروحي كبرن
جرحك الخلاني اصير انسان واعي

وظلن بلاية جواب ، " الما اهمك"
والجفة المالة مبرر ، .. والبرود المالة داعي !!



_فرح حسن

ابلا حلم .. بالليل اسيّر
يمي اجيبك تنچفي .. وبدموعي ازيحك

رايدة اتخطّاك واتعب..
وانتَ لو وجهك صدى ليلية اصيحك..

وكون كل اقدارنا اعلة الشوگ تنحط،
ويستجاب لدمعي ربي
رايدة اگداري حبيبي،
الـ غيرة موش اگدار گلبي
رايدة يحِل لنصيبي
وينچفي اعلة اچتافه تعبي
انة لو ما گادرة اتجاوز وحِدْتي..
بطيفك الما عاف راسي
جان هسة اعيوني رهمت للـ بلا تفكير اخذته
وكاعدة بدمعاتي اواسي
انة كل هاي السنين المرت اعلية بدونك جاي اتاني
لحضنك تردني الجناسي

وامس من فز الضوة بشباچي سمتك بالمناشغ
هاك دمعي وجيب ولفي الما نبض شوگي بـ وريدة

وكلها واستني بفرگتك
وحدة من ضمن الرسايل
.. "إنسي حتى يعوضچ احسن ،
من الـ أحلامچ تريده"
وانة لو كون العوض يرجعلي وجهك لو بلاها وما اريدة"

ومن قروا كحلي الوگع فوگ الچفافي
شگال عنك؟
شگال عنك؟

"انة باچيلة لأن ما جاس حزني
و ما مسح دمعاتي بيدة

وانة باچيلة لأن متخطي لجله اوجوه احبها
وهوة يومية يسد افراگ وجهي بكل الوجوه الجديدة"

انة ابچيلك .. واظم حزني بقصايد
وانتَ سبع اسنين احبك ما گمت غنيت بـ اسمي
استكثرت بية قصيدة!!



غير كون تگلي،، ما اصلح لفگدك ! حتى ابقيك بمنامي اطيوف، واقنع روحي هذا الطيف خِلها

ووين ما الگاك جمرة إخيال اسّير
غير كون تگلي نارك، من تشب يموت ضِلها


لا ولا ادري من اشوفك ،
تحز نحر امكابري بخنجر لهفتك
وين ما رايدتك ادوة ، تفزز الچويات كلها

وانة ما ادري من اشوفك ينبض إسمي
وتنهض بروحي الموّدة الماتت بشوغات اهلها


ووجهك التارسلي حزني يفكلي حزني
ويعرض اعلة الگلب شوگك والرجيف ايصير ساعي

وانتة شمغيرك وصاير ماي زمزم
چنت اظن امسومر الوجنة اعلة فگدي وحاط مگدار لوداعي

هذا المأذيلي روحي بنرجسيته وكل محطات البواچي بداخلي امخليتله داعي

وابچي لو أعرف ينام بخير دوني
وانة ليلي من ارد انامه يسيّر لعيني اوية ناعي

ويضحك وتنطفي اعيونه، ويضوي گلبي
اعيونه بيتي وچفه گاعي..


وجنت اخاف يعوفني،
وعيّشني خوفي!
وگلبي ما متعلم افارگ ،هاي اول فرگة شايف!

وانة ويني ووين فگدك
گوّة من عن صورتك شلت الشفايف

وبالمرّوة اتهدّة كسرك
غير خلف الله لصحبتي
الـ دمعي فوگ إچتافهن ليلية ناشف

ومن بعد سنتين فرگة،،
تزيح كل هاي الهداوة،
بنظرة منك،

بنظرة منك ،، رجعتني انسان خايف



_فرح حسن
2022/8/26

منو التحلالك امن اجفي ؟
منية التستحق تتبدة فوگاها
بغنج تگعدلك تروفك
منو مثلي نبي تشوفك؟
منو تستاهل توسدها بچفوفك؟
عزيز انتة ..
حرام تبات عد اجفون ما تنسام بطيوفك

ويحلى بعينهم طولك ، يفيّ طولي
لگيتك بالصوّر حليان ، واعيونك يلالولي
وبهت زعلي، ونفضت اجروحي عالنسيان
واندگتلك احجولي
آنة الدعواتي ما تخطيك
گمت انخاهم ، ادعولي

عِزيزي انتَ
وسبيلي انتَ
وهلي،
وأخواني ، وأصحابي
تعال بكل رضة اتلگّاك
الدرب حسبة هلة لبابي
بس دزلي العذر بوسات، وآنة ارضة
يـ الأنتة الـ بالعمر حظي،
يحبيّبي الزعل شنهي؟ ويِبعّد ابنادم وحظّة؟
مو تدري؟
ولك تدري!
بدونك بالدمع هالوجنة تتشضّى

انة اتمناك تبچيلي
...وتفگدني .... وتدوّرني
لچن تبقى الاحلام احلام
يالـ حچيّك يعورني

يـ الإسمك حتى يم الغربة موضوعي
..امنيتي تغثّك دموعي..!
واشوفك خايف ومغتاض
تلبد جوة بضلوعي

اشبهك بيمن واستغنة عن لونك؟
يمحبوبي
الگمر ما شايل عيونك..!




_فرح حسن
2018/3/14