أظن يكفي لليوم ، في امان الله أصدقائي ، أي استفسار تفضلوا بطرحه 🫶🏻✨️

السلام عليكم 🎀🫣

دي المرة صح صح طولت الغياب 🥹🤌🏻 ، و عندي ظروفي ، المهم طلبكم راه على مادة الفلسفة بزاف ، و انا وعدتكم ، راني وجدت ملخصات تاعي باش نعطيكم أمثلة ، غدا بإذن الله نشارك معكم الطريقة ، يشهد الله أني لا أبخل عليكم بشيء لكني حقا مشغولة ، وفقكم الله ، نلتقي غدا 🩷🩷

اعذروني حقا طولت عليكم و تركتكم في فترة كهذه ، لكن كالعادة أي حاجة حطوها هنا باش تنبهوني إذا غفلت عنكم 💗🥹

أن تصل متأخرا خير من أن لا تصل 😭🥹🤌🏻🤌🏻🤌🏻

بسم الله ، طريقتي في دراسة مادة الفلسفة :
_ أول حاجة نفتح الفيديو من يوتيوب قدامي على المقالة لي رح نقراها ، نختار أستاذ متمكن ، ننصحكم و بشدة بالاستاذ عادل مقرود شرحه ممتاز و الحجج اللي يقدمها مميزة و رح تبهر المصحح ، يعني باختصار حجج مقنعة ، إذا ما ناسبكمش تقدرو تشوفوا أستاذ هواري
_ في تفس الوقت نفتح الكتاب أو الكتب الخارجية لي عندي فالمقالة لي راني باغية نقراها
_ نحط قدامي ورقة و نبدا نسمع الأستاذ شا يقول و نسجل فقط الحجج لي فهمتها و انا شخصيا اقنعت بيها ، ما تسجلوش كل الحجج !!!! فقط لي فهمتوها لأنو لاحقا رح تتوسعو فيها من عندكم و تزيدو أمثلة و شروحات أكثر ، ليق تقتنع بالفكرة باش تقدر تقنع بيها المصحح
_ سجلوا عشوائي ، عادي أمثلة مع حجج مع أقوال ، ابداو الموقف الأول ، زيدو النقد ثم الموقف الثاني و نقده إلخ
_ الآن كي تكملوا تقدرو تكتبو المقالة و إذا حسيتو الحجج ناقصة زيدو من الكتب الخارجية لي راهي قدامكم و اقراو المقالة لي فيها باش تدو فكرة عامة و اي حجة أو فكرة أو قول عجبكم تقدرو تزيدوه ، في البداية نعم ننصحكم تكتبو مقالات كاملة بالمنهجية ، لكن بعد ما تتمكنوا صاي اكتبوا ملخص على شكل رؤوس نقاط فقط ‼️ ( دك نشارك معكم المثال )
هكا تكونوا كتبتوا المقالة تاعكم ، بالنسبة للحفظ ، صدقوني كي تفهموا حاجة الحفظ يجي ساهل ، احفظوا فقط الموقفين ، التعريفات ، و الحجج على شكل نقاط و لاحقا توسعوا من الفهم تاعكم و زيدو أمثلة و شروحات من عندكم المهم تكون صحيحة ✅️

نصائح عامة :
_ المنهجية ثم المنهجية ثم المنهجية ، هي أول حاجة قريتها بالتفصيل من عند الأستاذ عادل مقرود ، اقراو كل المنهجيات و احفظوهم حفظ ، قادر تضيع مقالة كاملة صحيحة بسبة منهجية خاطئة
_ الحجة التي لم تقنعك لن تقنع المصحح تفادوا كتابة أفكار ما راكش مقتنع بها شخصيا ، لأنو رح تكتبها بسطحية و الأساس في الفلسفة هو التوسع ثم التوسع ، كي تشرح من قلبك و تبين للمصحح فكرة نتا راك مقتنع بها رح تقنعه
_ في المنهجية الجدلية تبناو فكرة أنك تبني الموقف الأول بقوة لدرجة نتا شخصيا تقتنع بيه مع ترك بعض الثغرات لي تقدر تحطم بها الموقف فالنقد و كذلك دير نفس الشي فالموقف الثاني
_ اكتب بزاف و زيد قد ما تقدر لكن بمنطقية و اكتب حاجة راك مقتنع بها ⚠️
_ زيد من عندك شروح و أمثلة قد ما تقدر و ما تقولش كتبت بزاف شكون رح يقرا دير لي عليك و الباقي ما يهمكش
_ عمرك ما تروح بمنهجية وحدة ، مستحيل تحفظ كل المقالات و لكن تقدر تتمكن من كل المنهجيات و تجهز نفسك لجميع المفاجئات
_ مشي وقت المقترحات أبدا ‼️‼️ اقراو أي حاجة راكم ديروها و عادي تبقاو متأخرين
_ اقراو الفلسفة من قلبكم اعطوها وقت و جهد و مارحش تخيبو ، راهي مادة شابة بزاف فالحق ، و مشي صعيبة نهائيا ، مواضيع لي فيها تبقى ممتعة بزاف لنا + ما تخافوش من كتابة المقال مهما كان نوع المنهجية

منبعد تعلمت ما نكتبش مقالة كاملة و لكن نكتب فقط النقاط المهمة و نقسم الموقف الأول و الثاني و نكتب فكرة عامة لكل حجة + الأقوال ضمن المقالة

كنت نكتب الحجة و فكرة عامة ليها تحت في حالة نسيت الفكرة تاعها ، دي المقالة خاصة كتبت فيها بزاف بزاف حجج ، لكن فقط حفظت عناوين الحجج ، و الشرح و الأمثلة من عندي لأني ببساطة كنت فاهمة كل حجة كتبتها هنا + لونت الأقوال بلون مختلف باش نحفظهم وحدهم

في حالة لقيت فكرة من مصدر آخر و عجبتني و لا مثال إضافي كنت نزيده كيما راكم تشوفو ، بالنسبة للحفظ ما قدرتش نحفظ كلشي ، و لكن كنت نحفظ قدر ما نطيق ، نحفظ عشر حجج مثلا و ننسى ثلاثة أفضل من اني نحفظ خمس حجج و ننسى ثلاثة 🙃

النقد تعملت نكتبه على شكل نقاط ، و ما يكونش فيه بزاف أقوال و أمثلة المهم يكون نقد قوي يهدم كل ما ذكرته سابقا ⚠️

صاي كي دخلنا الأشهر الأخيرة اعتمدت الطريقة التالية :
تعرفي الموضوع ، تقسيم الموقفين ، كل موقف نكتب تحته الحجج تاعه على شكل نقاط و نزيد اي ملاحظة جانبية فقط ، بدون أقوال
الأقوال نكتبهم فالآخر أيضا مقسمين حسب الجزء لي رح نكتبهم فيه

ممكن مازال ما تدخلوها لكن بالنسبة لمنهجية الإستقصاء بالوضع لي تخوف معظم التلاميذ ( أعلى علامة ديتها فالقسم كانت في اختبار الفصل الثاني منهجية استقصاء بالوضع 17 ✨️🙂 ) يعني مشي مستحيل أبدا و لا صعبة المهم تحكموها غاية غاية و تعرفو الحجة المطلوب منكم الدفاع عنها ، كاين فيديو للأستاذ عادل مقرود لكيفية تحويل مقالة جدلية للإستقصاء بالوضع 👍

ممكن قبل اختبارت الفصل الثاني بإذن الله نشارك معكم المقالة ( لازلت فخورة بها كانت ممتازة 😭🤌🏻 )
ببساطة حفظت الحجج على شكل نقاط + أقوال و أمثلة و كنت موجدة روحي لأي منهجية ممكن تجي 🙂👍

و أخيرا الفلسفة ليست مادة فهم و لا مادة حفظ ، هي مزيج بينهم يعني تفهم غاية غاية كل حجة توظفها و تكتب ملخصاتك و أخيرا تحفظ الحجج باختصار مع التعريفات و الأقوال بالطبع
المنهجيات مهمة كثيرا و تأكدوا تدوها من مصدر موثوق ( نرشح الأستاذ عادل مقرود ) و تحفظوها غاية غاية ✅️
و أخيرا خذوا وقتكم في كل مقالة ، بديت فلسفة مع بداية العام و رحت للباك بأقل من عشر مقالات ( ليس مقترحات فقط ) ما رحت تقدرو تقراو كل المقالات ، اقراو الآن بالشوية كي يقرب الباك ركزوا ⚠️ على المقترحات و من مصدر موثوق كذلك

https://youtu.be/LniruIoRbTs?si=pFfmWzLTeP0Xg1ko
هذا الفيديو لي قتلكم عليه ⬆️⬆️⬆️

نظن هذا كل ما عندي بخصوص الفلسفة ، أي استفسارات ؟ ⬇️⬇️⬇️