س/ هو ليه لو تابعت المذاكرة مع بنت رسايل بس حرام طالما مش بنتكلم غير في الدراسة وكدا.. ما هي كدا كدا زميلتي وبتعامل معاها ..

ج/
- ما لك مش مركزة ؟!
- أبدا مضايقة بس شوية
- سلامتك .. من ايه ؟
- لا ما تشغلش بالك

بعد شوية ..

- أنا فعلا حاسك مضايقة بزيادة .. وأنا مش عارف أركز في المذاكرة
- هبقى كويسة .. ما تقلقش :)

تاني يوم ..

- يا رب تكوني رقت
- عادي .. ده الطبيعي
- ليه بس كده ؟!
- بلا بلاااا بلاااااا (أي حاجة تزعل يعني)
- بلااااا بلااااا بلااااا (كلام مواساة وكده)

طول الليل تفكر هي أد إيه أنت لطيف .. وأنت تبدأ تسرح بخيالك وليه ما تكونش هي .. دي حتى رقيقة وحساسة ومحتاجة اللي يحتويها !

ومن تالت يوم .. يبدأ يتضاف كلام كده متحفظ ومؤدب جنب المذاكرة ..
وفي يوم ما تتسرب (حبوب الشجاعة) للمحادثة فيكون هناك اعتراف بريء بذلك الشعور المختلف من كليهما !
حاجة كده جميلة .. إنه الحب !

ويحصل عهد مقدس بإننا هنكون لبعض .. وهنتشطر عشان نقدر نقنع أهالينا ..

ووقت الجد أنت أمام خيار من السيناريوهات المتعددة.... يا أنت طلعت عيل (لا مؤاخذة) .. لا هي ادتك صابونة (لا مؤاخذة برضه) .. يا صمدتم فعلا بس اتصدمتم بأهالي متعنتين متحجرين .. واضطررتم لوداع بكثير من جراح ..

أقل الخسائر الممكنة هي استنزاف مشاعر كان ينبغي حفظها لوقتها، وفوات أيام كان يمكن استغلالها فهذه المرحلة من العمر لن
تعود !

يبقى لما نقفل الباب من أوله = مش أسلم وأريح ؟!

صدقني يا غالي .. كل المشاكل تبدأ بنية سليمة..

#الحب_وسنينه
#رسايل

[ إنَّ اللهَ لَيَعجَبُ مِنَ الشابِّ ليست له صَبْوةٌ ] 📘حديث حسن

🖇مرحلة الشباب هي القوة والفتوة في الإنسان، وهي مظنة التهور والانغماس في شهوات الحياة الدنيا، فإذا تغلب الشاب على شهواته، وأطاع الله، وشغل نفسه بذلك؛ فهو دليل على قوة الإيمان، والاستقامة على طريق الحق.

🖋وفي هذا الحديث يقول النبي صلى الله عليه وسلم: "إن الله ليعجب من الشاب ليست له صبوة"، أي: ليس له ميل إلى الهوى والمعصية؛ لحسن اعتياده للخير، وقوة عزيمته في البعد عن الشر في حال الشباب ..

📍والعجب صفة من صفات الله عز وجل الفعلية الخبرية الثابتة له بالكتاب والسنة، وهو من الله ليس كالتعجب من المخلوقين، ومردود هذا العجب منه سبحانه أنه يستحسن عمل هذا الشاب، فيعظم قدره عنده، فيجزل له أجره؛ لكونه ليس له خطيئة ولا إصرار على معصية .

📌 وخص الشاب؛ لكونه مظنة غلبة الشهوة؛ لما فيه من قوة الباعث على متابعة الهوى؛ فإن ملازمة العبادة مع ذلك أشد، وأدل على غلبة التقوى.

🔖وقد صح عن النبي صلى الله عليه وسلم كما في الصحيحين من حديث أبي هريرة رضي الله عنه في السبعة الذي يُظلِّهم الله في ظلِّه يوم لا ظِلّ إلا ظلّه – ومنهم - : ( وشاب نشأ في عبادة ربه )

#رسايل_ضد_الإباحية

موقف صعب أوي يوم القيامة لما تكتشف إن كل العلاقات اللي أنت كنت طاحن نفسك عشانها في الدنيا و مكتئب بسببها و مضايق و مخنوق طلعت كلها " حلم " لا شئ ! ، يعني في ناس قايمة نايمة تفكر في العلاقات و تعبانة بسبب العلاقات و كارهه الحياة بسبب علاقة عشان الطرف التاني مش مهتم أوي زي ما أنت عايز، و خنقة دايمًا و إحباط و هروب بالنوم الكتير و أمراض و كل ده بسبب علاقات !

صعب أوي لما الآية تيجي تقولك :

{ يَوْمَ يَفِرُّ الْمَرْءُ مِنْ أَخِيهِ (34) وَأُمِّهِ وَأَبِيهِ (35) وَصَاحِبَتِهِ وَبَنِيهِ (36) لِكُلِّ امْرِئٍ مِنْهُمْ يَوْمَئِذٍ شَأْنٌ يُغْنِيهِ (37) }

- ايه ده ؟

يعني كل العلاقات اللي أنا مكتئب بسببها و مضيع طاقتي و جمال روحي في الزعل عليها يوم القيامه هتكون صفر، كله هيفر ؟

هي دي حقيقة بس مش كله كله يعني ، قال تعالى { الْأَخِلَّاءُ يَوْمَئِذٍ بَعْضُهُمْ لِبَعْضٍ عَدُوٌّ إِلَّا الْمُتَّقِينَ }

- ربنا يجعلنا منهم - 🌹

#بإختصار :✍️🏻 الله المستعان

ارضي ربنا في العلاقات كلها اللي حواليك و حبهم و تعامل بأحسن ما عندك، بس متعظمش أوي من حد في حياتك لأن كلنا بنمتحن ، و في الأخرة محدش هيبقى ليك " غيرك " .. متضيعش أيام عمرك الـ هتتسأل عليها في تعلق شديد بالناس و تركيز مبالغ فيه معاهم، و أحلى نصيحة معلمتي قالتها ليا زمان :

شيلي رأس اللي قدامك و حطي " هي لله" ، و تعاملي .

- منقول
#رسايل

‼️انتكست من جديد

✅ ج/ تُب من جديد..

🚪باب التوبة لا يُغلَق إلا ببلوغ الروح الحلقوم عند الموت، وأنت لا زلتَ بعدُ حيا..

🌤 أو طلوع الشمس من المغرب، وهذه لم تأت بعد، فما يمنعك من إعادة الدخول؟ ونيل رضا الله والقبول؟!

📛 اليأس أعظم فخاخ إبليس يوقع فيه المذنبين والتائبين، ولذا قرنه الله بالكفر ليزجرنا عنه، فقال:
(إنه لا ييأس من روح الله إلا القوم الكافرون).

🔍 ومع هذا ..
ادرس سبب سقوطك، وتجنبه في المرة القادمة، وخطِّط لها جيدا، واستعد لجولة مع شيطانك، تبدؤها بطاعات تكفِّر بها سيئاتك، وتسترد بها عافيتك الإيمانية، وثقتك بنفسك (إن الحسنات يذهبن السيئات)..

أبشر! 🌷

#رسايل

صحيح الكلام ده يا شباب؟!
جاتلتا أخبار بتقول إن البنات هي اللي بقت بتتحرش وبتشقط الشباب..!!
تفتكر ده عذر ليك إن هي اللي رمت نفسها عليك؟!
يعني لو بتشتغل ديليفري وصاحبة الأوردر عرضت عليك علاقة..
لو انت شغال في الموبايلات واللابات وصاحبة الموبايل طلبت علاقة..
لو صنايعي حارس عمارة أو سائق.. وصاحبة البيت هي اللي عاوزة منك كدة!
ما هي حصلت قبل كدة.. مع سيدنا يوسف عليه السلام..
كانت ملكة متوجة في القصر..
وهي اللي بتقوله هيت لك..
يا أنا يا السجن.. يا الزنا يا السجن..
ورغم كده قال يوسف : "قَالَ رَبِّ السِّجْنُ أَحَبُّ إِلَيَّ مِمَّا يَدْعُونَنِي إِلَيْهِ"
انت بقى الهانم بتهددك بإيه؟!
ماسكة عليك زلة مثلا؟!
اجمد كدة واثبت وادعي ربنا يصرف عنك كيدها :
"وَإِلَّا تَصْرِفْ عَنِّي كَيْدَهُنَّ أَصْبُ إِلَيْهِنَّ وَأَكُن مِّنَ الْجَاهِلِينَ"

#الحب_وسنينه
#رسايل
رسايل

قصة كليم الله 1️⃣
كانت بداية قصة كليم الله موسى عليه السلام قبل مايتولد بسنين كتيييير
لما استقر أولاد سيدنا يعقوب واللي اسمهم بني إسر$ائيل في مصر وكان في الوقت ده اللي بيحكم مصر بيطلق عليه فرعون
وفي الوقت ده كان بيحصل اضطهاد لبني إسر$ائيل وتشغيلهم زي العبيد كده
وفي يوم من الأيام فرعون شاف حلم إن نهايته هتبقى ع إيد واحد من بني إسرا$ئيل
وعلى الفور أصدر فرعون أوامره بقتل أي ولد ذكر يتولد عند بني إسرا$ئيل
ومرت الأيام وبدأ أصحاب الوجاهة يشتكوا هو احنا كده بنقتل كل ولاد بني إسرائيل طب مين هيشتغل عندنا بعد كده ؟؟!!
الأعمال الصعبة اللي بيعملوها كده احنا اللي هنعملها😱
فيقوم فرعون يخفف قراره من القتل الكلي لأولاد بني إسرائيل ويخليه إن سنه هيقتل فيها كل الأولاد الذكور وسنة هيسيبهم عايشين
وبالفعل اتولد سيدنا هارون أخو سيدنا موسى في السنة اللي مافيهاش حكم بالقتل
أما سيدنا موسى فكان في السنة اللي هيتنفذ فيها الحكم بقتل الأولاد
ايه اللي هيحصل بعد كده؟؟!!!
يتبع ..،،،

#قصة_موسى_عليه_السلام
#رسايل

قصة كليم الله 3️⃣
كبر سيدنا موسى في بيت عدوه وهو اللي رباه بنفسه
بس طبعا سيدنا موسى كان من بني إسر$ائيل اللي كانوا مستضعفين وكان القبط بستعبدوهم
القبط دول هم الطبقة العليا في الوقت ده واللي كان بيطلع منهم الوزراء وأصحاب المناصب
لكن وجود سيدنا موسى في قصر فرعون كان مخليه ليه قدر عالي حتى لو مش من القبط
وفي يوم من الأيام سيدنا موسى يلاقي اتنين بيتخانقوا
واحد من بني إسرا$ئيل اللي هم أهله وجماعته الأصلية والتاني من القبط أصحاب الدرجة الأولى في البلد
وبعد استغاثات الراجل ده
سيدنا موسى حاول يبعد الراجل اللي من القبط فلكمه بايده👊
لكن كان سيدنا موسى قوي وكانت اللكمة دي كفيلة إنه تقتل الراجل ده
تاني يوم نفس الراجل اللي من بني إسر$ائيل بيتخانق مع واحد تاني من القبط وبيستغيث بسيدنا موسى
سيدنا موسى قاله لا كده إنت اللي غوي مبين يعني كتير المشاكل وشديد الضلال
وساعتها الإسرائيلي ده افتكر إنه هيقتله وقاله إنت عاوز تقتلني زي ماقتلت الراجل امبارح
سمع الكلام ده الراجل اللي من القبط وطار الخبر في المدينة إن موسى قتل واحد من القبط
وكان سيدنا موسى خايف ومترقب ياترى إيه اللي هيحصل بعد الحادثة دي؟؟!!
يتبع....،،،

#قصة_موسى
#كليم_الله
#رسايل

قصة كليم الله4️⃣
في الوقت اللي كان فيه سيدنا موسى خايف ومترقب اللي هيحصل بعد خبر قتله للقبطي ...
جاله راجل من آخر المدينة بيجري ومعاه الخبر اليقين
قاله إن فرعون وجنوده في حالة استنفار تام عشان يقتلوك ولازم تخرج من مصر حالا
سيدنا موسى خرج من مصر مش عارف يروح فين عمره ماخرج منها
فضل يمشي ويبعد ولازالت عمليات البحث عنه جارية
وبعد مدة ربنا يعلمها وصل سيدنا موسى لمكان اسمه مدين
وهناك ...
لقى مجموعة من الناس بيسقوا غنمهم لكن كان فيه بنتين بيبعدوا غنمهم عن الناس
سيدنا موسى صاحب المرؤة سألهم عن سبب إنهم حاجزين أغنامهم عن الناس وكان الرد
إنهم ضعاف وأبوهم شيخ كبير في السن فبينتظروا الناس تمشي عشان أغنامهم تشرب
وكان رد الفعل الفوري من كليم الله إنه أخد أغنامهم وسقاها وسابهم
وراح تحت شجرة يرتاح من تعب المشي ومن تعب قلة الأكل
ورفع إيديه للسماء وقال: "رب إني لما أنزلت إلي من خير فقير" يارب محتاجك
وصل البنتين لأبوهم وحكوا له اللي حصل فبعت واحدة منهم لسيدنا موسى تقوله إنه عاوز يحاسبه على المعروف اللي عمله معاهم
وبالفعل ..
سيدنا موسى راح والشيخ الكبير ده طمنه وقاله إنك هنا في مدين بره مكان سيطرة الناس اللي انت خايف منهم
وعرض عليه إنه يتجوز واحدة من بناته بس يشتغل هو أجير لمدة 8 أو 10 سنوات وده مهرها
وافق سيدنا موسى على العرض ع طول
وفي نفس الليلة اللي رفع ايديه للسماء وهو جعان وخايف وتعبان وبيقول يارب فقير لخيرك
في نفس الليلة بات مطمن شبعان وكمان متجوز وعنده شغل
كل ده بكرم الكريم سبحانه
لكن لسه ماخلصتش قصته ...هيحصل ايه بعد كده؟؟!!
يتبع....،،،،

#قصة_موسى
#كليم_الله
#رسايل

"إِنَّ اللَّهَ اشْتَرَىٰ مِنَ الْمُؤْمِنِينَ أَنفُسَهُمْ وَأَمْوَالَهُم بِأَنَّ لَهُمُ الْجَنَّةَ"
صفقة الأحلام والله
لما يكون التمن الجنة واللي بيشتري هو الله تعالى ... يبقى مستني ايه ؟؟!! مش يلا حالا تقول تم البيع ولا ايه؟؟!!
صفقة الأحلام ....إنك تشتري الجنة تمليك دايم ...تدفع فيها كام دي ؟؟!!!
تدفع كام قصاد انك تشوف سعادة مافيش حزن بعدها أبدا وصحة مافيش مرض بعدها أبدا، تدفع كام قصاد إنك تعيش ملك خالد مخلد إلى ما لانهاية ؟؟؟!!
كل اللي هتدفعه انك تعيش في الدنيا دي تعمل اللي ربنا أمرك بيه وتبعد عن اللي نهاك عنه
- تمن الجنة هو صلاتك اللي لازم تحافظ عليها جماعة في وقتها وتحافظي عليها وماتكسليش
- تمن الجنة هو حجابك اللي بتصبري عليه رغم الحر وكلام الناس اللي بيضايقك
- تمن الجنة هو انك تبعد عن أي مصدر دخل حرام سواء ربا أو رشوة أو غيرهم
- تمن الجنة إنك تغض بصرك وتبعد عن أي علاقة مع بنت خارج الجواز لأنها حرام
- تمن الجنة إنك تصبر وتستحمل بس في الاخر هتستلم جنة تستاهل التعب💙
يلا عاهد ربنا وخليك زي الصحابة اللي قالوا للنبيﷺ "لانقيل ولا نستقيل " ...يعني مافيش رجوع في البيعة دي بأي شكل ... يلا امضي على عقد البيع انت كمان ...ده التمن جنة
ربنا يرزقنا وإياكم الجنة

#رسايل_تدبر