Buyuk ajdodlarimiz

Bir necha yuz yillar avval yashagan ajdodlarimiz bilan faxrlanishga undash muhim propagandalaridan biri. Alisher Navoiy, Amir Temur, Al-Xorazmiy, Al-Buxoriy, Abu Ali Ibn Sino, Fargʻoniy va hokazo allomalarimizni uzoq sanashimiz mumkin. Albatta, hamma xalqlarning ham oʻz qahramonlari mavjud.

Bir tomondan, insoniyat rivojlanishiga katta hissa qoʻshgan ajdodlarni xotirlash va ularning nomini abadiylashtirish — yaxshi gʻoya. Lekin, men ular bilan faxrlanish va toʻxtamasdan ularni yoshlarga misol sifatida koʻrsatishga salbiy qarayman. Allomalar, albatta, buyuk ishlar qilishgan va asosiy fikr bu aynan “qilishgan”. Oʻtgan zamonda. Yuzlab yil oldin.

Afsuski, biz allomalarimiz bilan qancha faxrlanganimiz bilan:

- Dunyodagi eng yaxshi tibbiyot biznikimas, Ibn Sino bizning ajdodimiz boʻlishi va uning nomi bilan butun boshli bitta soha (fan) atalganiga qaramay.
- Eng kuchli dasturchilar, injenerlar, AT sohasi mutaxassislari bizdamas. Al-Xorazmiy matematika rivojlanishiga katta hissa qoʻshganiga qaramay.
- Adabiyotimiz ahvoli haqida biror narsa ham deyolmayman, chunki, birorta odamdan soʻnggi yillarda yozilgan biror asar boshqa tillar va davlatlarda muhokama boʻlganini eslolmayman. Bu ham Alisher Navoiyning hissasiga qaramay.
- Geografik joylashuvimiz juda noqulay. Amir Temur buyuk sarkarda boʻlgani va davlat chegaralarini kengaytirganiga qaramay. Bundan tashqari, u qurgan binolar va ularning atrofini yaxshi saqlab qolishni ham eplolmayapmiz.

Men esa zamonamiz qahramonlari bilan faxrlanishni xohlardim:

- Kimdir Nobel mukofoti olsa.
- Jurnalistlarimiz Pulitser mukofotini oladigan darajada kuchaysa.
- Mamlakatimizda kuchli xalqaro AT-kompaniyalar paydo boʻlsa. Yandex, Wargaming, EPAM, MacPaw, Grammarly va hokazolar kabi. Atayin sobiq Sovet davlatlaridan misol keltirdim, sal boʻlsa ham adolatli solishtiruv boʻlsin, deb.
- Yoki Telegram, TikTok, Pixelmator kabi mahsulotlar ishlab chiqarilsa.
- Odamlar davolanish uchun falon pul sarflab Hindiston, Isroil kabi davlatlarga bormasa.
- Fazoni oʻzlashtirish uchun hissa (hech boʻlmasa sunʼiy yoʻldosh) qoʻshsa.
- New York Times keltiradigan “bestseller” kitoblar paydo boʻlsa.
- Xalqi erkin va boy yashaydigan, adolatli saylov boʻladigan, korrupsiya va monopoliyalar kam davlat quradigan amaldorlar paydo boʻlsa.
- Biror filmimiz Oskarga nomzodi qoʻyilsa.
- Insoniyat darajasida hissa qoʻshadigan odamlar paydo boʻlsa: Bill Geyts, Elon Mask, Li Kuan Yu kabi.

Yana bir qancha narsalarni sanashim mumkin, lekin roʻyxatni uzaytirgandan foyda yoʻq. Yuz yillar oldin yashagan odamlarning muvaffaqiyati haqida oʻylashdan koʻra aynan hozir odamlar yuqoridagi kabi muvaffaqiyatga erishishi uchun nima qilayotganimiz yoki qilmayotganimiz haqida qaygʻurishimiz lozim.

📹 Shanba videolari - 4

Microsoft qurilmalari
Kompaniya oxirgi vaqtlar juda zoʻr rivojlanyapti va mahsulotlari ham odamni qiziqtiradigan. Microsoft bemalol Apple, Google, Sony, Slack va hokazo kompaniyalar bilan bemalol raqobat qiladigan kompaniyaga aylandi. Shu hafta taqdim qilgan qurilmalarining dizayni ham, videolari ham yaxshi. Hatto bulutli platformalar sohasida ham Amazonʼdan keyin ikkinchi oʻrinda turadi. Yagona oqsayotgan tomoni — oʻzining smartfoni yoʻq. Lekin bu ketishida keyinroq Android yoki Windows asosida Surface Phone chiqarishi ham ehtimoldan holi emas.
- Microsoft Surface Go 2 — kichikroq va narxi atigi $399 boʻlgan planshet-noutbuk.
- Microsoft Surface Book 3 — toʻlaqonli noutbuk. MacBook Pro kabilar bilan raqobat qiladi.
- Microsoft Surface Earbuds — simsiz naushniklar. Hozir deyarli hamma qurilma ishlab chiqaruvchilar AirPodsʼga raqobatchi chiqaryapti.
Bu qurilmalarni Chaqmoq FMʼning keyingi sonida muhokama qilamiz.

Robot kamera
Ilya Birman kanalidan oldim: Markes Braunli robot kameraning taqrizini tayyorlabdi. Hozir juda katta sifatda va juda tez oladigan kameralar ommaviylashayotgandek tuyulyapti. Oskar taqdimotidagi Bred Pittning videosiga koʻpchilikning koʻzi tushgan boʻlishi kerak. Videolar oʻziga xos effektli chiqadi. Birinchi video Markesdan, qolganlari Kol Valizer ismli operator ishlari.
- Dope Tech: Camera Robots!
- Brad Pitt is the coolest guy on the GlamBOT!
- Best of Glambot: 2020 Grammys
- Best of Glambot: 2020 Golden Globe Awards

The Last of Us Part II
Bu 2013-yilda chiqqan, juda koʻp geymerlar tomonidan yuqori baholangan, taʼsirchan oʻyinning ikkinchi qismi. Konsollarini sottiradigan oʻyin, degan termin bor. The Last of Us — shunaqa oʻyin. Oʻyin parazit qoʻziqorin mutatsiya boʻlib odamlarga tarqagan, ular zombiga aylangan dunyoda ikki qahramonning sarguzashtlari haqida. Ikkinchi qismi 19-iyunda chiqadi. Birinchi video — treyleri, ikkinchisi — yangi qismi taqdimotidagi auditoriyaning reaksiyasi.
- The Last of Us Part II | Story Trailer | PS4
- The Last of Us Part II - Reveal Reactions

Inside XBox
Yana oʻyinlar haqida. Yuqorida aytganimdek, Microsoft tobora boshqacha. Yangi avlod konsollari raqobatiga yaxshi tayyorgarlik koʻryapti bu safar. Shu hafta ular Xbox Series X deb nomlangan yangi konsoliga chiqadigan oʻyinlarni koʻrsatishdi.
- First Look Xbox Series X Gameplay

Ves Anderson
Bu rejissorning filmlarini yoqtiraman. Juda. Ayniqsa bularni: “Grand Budapesht” mehmonxonasi, Itlar oroli, Oʻxshashi yoʻq mister Foks. Ves Andersonning filmlaridagi kadrlar, sahnalar, yozuvlar, kameraning oʻtishlari, hikolayash kabilar juda ustalik bilan ishlanadi. Masalan, u kabi simmetriyani yaxshi koʻradigan rejissorni topolmaysiz. KinoPoisk turli kino odamlari haqida yaxshi videolar qilyapti soʻngga paytlarda.
- Как снимает Уэс Андерсон

Avvalgi soni: https://t.me/FarLives/353

#shanba_videolari #youtube @FarLives 🌀

Hurmatli Beeline, bugun Oʻzbekistonda gʻalabaning 75 yilligini nishonlasmas, Xotira va qadrlash kuni.

@FarLives 🌀

Yoʻl qismidagi harakat mashina, velosiped, piyoda va jamoat transporti tomonidan boʻlgandagi oʻtkazuvchanlik (soatiga nechta odam).

https://twitter.com/urbanthoughts11/status/1259080757861134336?s=21

#shahar

​​Qoʻlda yozilgan matn

Troll.uzʼning yozishicha, baʼzi oliy oʻquv yurtlarining rektorlari talabalardan diplom ishini qoʻlda yozib, keyin uni skaner qilib yuborishni soʻrayotganmish:

Баъзи бир давлат олийгоҳларида ректорлар ва деканлар диплом ишларини қўлда ёзиб, кейин сканнер қилиб жўнатишни талаб қиляпти экан.
Шундай ректорларга 19 асрдан алангали саломлар!
https://t.me/trolluz/7101

Keyingi postda hazil sifatida matnni koʻchirib yozadigan mashinachani koʻrsatgan: https://t.me/trolluz/7103

Bechora talabalar bu axmoqona talabni onlayndagi baʼzi servislardan foydalanib ham bajarishi mumkin. Masalan, aynan konspektlarni qoʻlda yozilganini imitatsiya qilib beradigan handwrittner.ru servisi mavjud (quyidagi fotoda misol). Hatto bir nechta shriftlardan birini tanlash imkonini beradi.

Dasturlashni biladiganlarga esa Habrʼdagi maqolani tavsiya qilaman: https://habr.com/ru/post/316404/

Yana-da yalqovlar uchun esa Pikabu saytida tayyor shriftdan foydalanish boʻyicha qoʻllanma keltirilgan: https://pikabu.ru/story/konspekt_dlya_lenivyikh_4093825

Iloji boricha hamma ishni avtomatlashtirish kerak. Qimmatli vaqtni bunaqa axmoqona talablarni bajarishgamas, foydaliroq faoliyatlarga sarflash lozim.

@FarLives 🌀

Menimcha, Oʻzbekiston jahon matbuoti erkinligi kunini aynan bugun, 14-mayda nishonlashi kerak.

https://t.me/massmediauz/100

#matbuot @FarLives

Sardoba suv ombori fojeasi

Sardobadagi ofat va fojea haqida yetarlicha yozildi. Quyida mening oʻzim oʻqigan va meni shu mavzu boʻyicha fikrlarimni boʻlishishga undagan xabarlar.

- davletovuz: ​​«Ўзбекгидроэнерго» ва “TO’PALANG HPD HOLDING” МЧЖ болалари ҳақида
- Troll.uz: Oʻzbekgidroenergo va Toʻpalang kompaniyalar guruhi haqida
- Gazeta.uz: Кто строил Сардобинское водохранилище
- Kun.uz: Sardoba fojiasi: «Asr o‘pirilishi» aybdorlari suvdan quruq chiqa olmasligi shart

Bu yerda bir qancha fikrlarimni bildirishim mumkin edi, lekin ular ortiqchaligini tushundim. Lekin masalaga boshqa tomondan yozdashsam…

Yaqinda bir doʻstim bilan shu fojeani muhokama qilish davomida Oʻzbekistonda qurilishi rejalashtirilayotgan atom elektrostansiyasi yodimizga tushdi. Tasavvur qiling, bizdagi joriy korrupsiya, oʻgʻirlik, tanish-bilishchilik, ochkoʻzlik, loqaydlik bilan biz odamzodning eng xavfli texnologiyalaridan biri — atom energiyasi bilan bogʻliq texnologiyaga qoʻl urishimiz qanchalik xavfli. Bu haqida oʻtgan yili Farhod Fayzullayev toʻliqroq yozgandi:

Битта оддий уйни ёлғондан берадиган мутасаддилар бор жойда атом реактори қуриб бўладими? Эртага, Худо кўрсатмасин, портлаб кетса, ЎзТВ яна чиройли далаларни кўрсатиб, «реактор, қанақа реактор, ҳеч нарса бўлгани йўқ» деб ўтиради.

Mana, hozir shunaqa bir fojeaning guvohi boʻldik. Agar atom elektrostansiyasi ham “Mustaqillikkacha bitarkan”, “Prezident kelib koʻrarkan”, “nechtasi hovli qurib inomarka oldi” kabi iboralarni qoʻllay oladigan qilib qurilsa natija qanaqa boʻlishi meni qoʻrqitadi juda. Chernobildagidek falokatni yuzlab yillar davomida ham tuzatib boʻlmaydi. Biz butun regionni zaharlab, odam yashab boʻlmaydigan hududga aylantirishimiz mumkin.

Xullas, eʼtiborni nisbatan xavfsiz va tavakkali kam boʻlgan energiya ishlab chiqarish texnologiyalariga qaraganimiz yaxshi: quyosh va shamol. Suvni ham qoʻshmoqchiydim, lekin endi ikkilanib qoldim.

Men shu Sardoba fojeasining sabablarini oʻrganish jarayoni toʻlaqonli ochiq boʻlishini juda xohlardim. Hukumat komissiyasidan fojeaga qisman boʻlsa ham javobgar boʻlishi ehtimoli bor odamlarni olib tashlash lozim: Abdugʻani Sanginov, qurilishda qatnashgan odamlar, balki hokimlar. Aks holda, bu surishtiruv toʻlaqonli adolatli boʻlishi shubha bilan qarayman: bu odamlarda xalq tomonidanmas, davlat tomonidan berilgan kuch va huquq mavjud, va bu chiqariladigan xulosalarga yaxshigina taʼsir qilishi mumkin.

@FarLives 🌀

Rossiyaning Visual Science kompaniyasi koronavirusning uch oʻlchovli modelining animatsiyasini qilishibdi. Model 3 oy davomida turli ilmiy maʼlumotlar asosida qurilgan. Virusning strukturasi shunchalik murakkabligi odamni hayron qoldiradi.

Meduzaʼdan olindi: https://meduza.io/feature/2020/05/14/teper-koronavirus-mozhno-rassmotret-so-vseh-storon-dazhe-bez-mikroskopa-i-vse-blagodarya-detalnoy-3d-modeli-nad-kotoroy-rabotali-tri-mesyatsa

@FarLives 🌀

Davlat imidji

Men davlatlarni katta korporatsiyalarga oʻxshatgim keladi:

– fuqarolar – shu korporatsiyaning mijozlari;
– davlat ishchilari — korporatsiya xodimlari;
– prezident, vazirlar va hokimlar – top menejerlar (yuqori mansabdagi boshqaruvchilar).

Adolatli, toʻgʻri bozor iqtisodiyoti va demokratiya rivojlangan mamlakatlarda korportiv imidj — juda muhim koʻrsatkich. Bu koʻrsatkich kompaniyaning kelajagiga katta taʼsir qiladi: imidji juda buzilgan kompaniya hatto bozordan chiqib ketishi mumkin. Imidj esa kompaniya koʻrsatayotgan xizmatlar yoki ishlab chiqarayotgan mahsulotlarining sifati, mijozlariga qanaqa foyda keltirayotgani, kompaniyaning ichidagi madaniyat va qadriyatlari, top menejerlarning oʻzini tutishi kabilardan kelib chiqib baholanadi.

Davlat imidji ham xuddi shunday koʻrsatkich. Lekin bozordagi kompaniyalardan farqli ravishda, mamlakat ichida bitta hukumat odatda monopol boʻladi. Hozirgi dunyoda hamma xalqda ham yomon imidjga ega hukumatni almashtirish imkoniyati yetarlimas.

Har qanday kompaniya kabi, hukumat ham aqlli odamlar va xalqning (mijozning) boyishi uchun kurashadi. Xalq boy — hukumat boy. Chunki, hukumat turli xizmatlarni (xavfsizlik, himoya, tibbiyot, taʼlim, yashash sifati va turli boshqa imkoniyatlar) koʻrsatadi va shular uchun xalq topadigan daromaddan ulush (soliq) oladi. Shu xizmatlar yomonlashsa, davlat imidji tushadi. Yaxshilansa — koʻtariladi.

Men yuqorida hukumat mamlakat ichida monopol, dedim, lekin aslida hukumat boshqa davlatlarning hukumatlari bilan raqobat qiladi. Va bu raqobat, asosan, odamlar uchun boʻladi.

Davlatda roʻy berayotgan turli voqealar, hukumat fuqarolarga qilayotgan yoki qilmayotgan munosabati, jinoyatchilik darajasi, ochiqlik yoki yopiqlik siyosati, hukumatdagi amaldorlar kimlarning huquqini himoya qilayotgani, adolatning kuchi, oddiy odam qanaqa yashayotgani, ekologiyaga munosabat, xalqning boy yoki kambagʻalligi kabi juda koʻp faktorlar davlat imidjini maʼlum bir guruhdagi odamlar uchun koʻtarishi yoki tushirishi mumkin. Imidjdagi bunaqa oʻzgarishlarni birinchilardan boʻlib soha mutaxassislari, boshqa davlatda bemalol yashab keta oladigan (til biladigan), erkin fikrlaydigan, ochiqlikni qadrlaydigan odamlar sezadi. Davlat imidji quyiga qarab ketyaptimi, marhamat: aqlli odamlar sekin “surishni” boshlaydi. Chunki, ularda tanlov bor va ular hayoti qadrlanadigan joyda yashashni afzal koʻrishadi.

Tanganing boshqa tomoni — jamiyatning qadriyatlari. Agar jamiyatning qadriyatlarida maqtanchoqlik, ochkoʻzlik, kalta va ibtidoiyroq oʻylash, insonlarning tanlovini hurmat qilmaslik, oʻzgacharoq fikrlaydigan odamlarga yovvoyi munosabat koʻp boʻlsa, davlat imidji oʻz-oʻzidan yomonlashadi. Erkin odamlar erkin yashashni xohlaydi va bunaqa jamiyatda ular muvaffaqiyatli boʻlishi juda qiyin. Va bu ham aqlli odamlar davlatdan chiqib ketishiga olib keladi. Xalqning kuni esa shu jamiyatdan chiqadigan amaldorlarga qoladi: “kunim keldi”, deb bilgan ishini qiladigan, toʻymaydigan, faqat qarindosh-urugʻlari va tanishlarining huquqi va boyligi haqidagina qaygʻuradigan.

XXI-asrda dunyo yetarlicha ochiq. Va hamma davlatlar uchun aqlli va bilimli odamlar zarur. Imidji yuqori davlatlar bu raqobatda yutib chiqaveradi. Chunki, buyuk kelajakni umrining oxirigacha kutishga hammaning ham sabri chidamaydi. Bundan tashqari, davlat imidji yomonlashib ketayotgan holatda kamida bolalarning kelajagi haqida ham oʻylash lozim: nega ular erkin va ochiq davlatda yoki jamiyatda yashamasligi kerak?..

Shu mavzuda: Mustaqillik va erkinlik.

@FarLives 🌀

Dunyoda odamlar bemalol dronlarni ishlatib turli videolar olib, bolalar ular orqali tajribalar oʻtkazayotgan bir paytda bizdagi “qovun qonun” orqasidan Andijonda bir operatorni 3 yilga sudlashibdi. Bu Andijonda Digital City nomli texnopark ochilganiga rosa mos yangilik. Prezidentga hayotimizning bu tomonini ham kimdir koʻrsatishsin: “janob prezident, mana, biz xalqqa, texnologik rivojlanishga qarshi ishlaydigan qonunlar chiqarib odamlarni bemaʼni narsalar uchun jazolayapmiz”, deb.

Oʻzbekistonda kam boʻlgan haqiqiy, sotilmagan, paxta qoʻymaydigan deputatlardan biri Rasul Kusherbayev juda toʻgʻri yozyapti:

Бунда тенгсизлик тугаб, тенглик бўлишининг моҳияти шундаки, янги йил кечасида Тошкентда одамлар устида учган “дронлар шоуси” давлат ва жамият учун ҳеч қандай хавф туғдирмади, деб қаралгани каби клип олиш учун дрондан фойдаланишнинг оқибати ҳам ўша “дронлар шоуси” каби бахоланиши керак. Чунки моҳиятан битта ҳолатга иккита кўз билан қўшстандарт услубида қараш адолатсизлик, деб тушунилади.

Оддий айтганда хатто жарима солишга ҳам тормайдиган бу каби жазоларни жиноят қонунчилигидан бутунлай чиқариш ва нари борса маъмурий тартибдаги жавобгарликка ўтказиш вақти аллақачон етиб келган. Бу гапим мантиқсиз “тонировка” чекловига тегишлимас, уни бутунлай бекор қилиш керак.

https://t.me/deputat_kusherbayev/826

Aytgandek, mart oyida “Mening fikrim” portaliga dronlardan bemalol foydalanish boʻyicha joylashtirilgan taklif lozim boʻlgan 10 000 ta ovozni toʻplolmay bekor qilingan. Afsus.

@FarLives 🌀

Andijon viloyatida ochilgan texnopark haqidagi maqolada tasodifan devorga chizilgan illyustratsiyaga koʻzim tushdi. Biror rassom vaqt sarflab oʻylab topganiga koʻzim yetmadi va Googleʼning rasmlar qidiruvidan “UI vs UX” deb izladim. Birinchi sahifadayoq “UI vs UX — The Yin & Yang of Product Design” nomli maqola va undagi illyustratsiya chiqib keldi.

Bizning bechora noʻnoqlar shuni ham eplab koʻchirolishmagan. “Qoʻli qiyshiq” rassom perspektivani, soyalarni, chiziqlarni, odamlarning fiziologiyasini va eng asosiysi — “UI vs UX” yozuvini buzib qoʻyaqolgan. Bunaqa nusxa olishda originalga sal boʻlsa ham hurmat bildirish lozim. Kulgili.

#dizayn @FarLives 🌀

Elon Maskning SpaceX kompaniyasi ikkita astronavtni Xalqaro fazo stansiyasiga (XFS) uchiryapti. 2011-yildan beri astronavtlar XFSga Rossiyaning “Soyuz” kemalarida uchishgan. Endi SpaceX kompaniyasining Crew Dragon nomli fazo kemalari yordamida ham uchish yoʻlga qoʻyilyapti. Bugungi parvoz muvaffaqiyatli boʻlishiga juda katta umid qilamiz.

YouTubeʼdagi jonli efir:
https://youtu.be/rjb9FdVdX5I

Bu fazoni oʻrganishdagi juda muhim qadam. Shu paytgacha fazoni oʻrganish, asosan, turli davlatlarning maqsadlariga siyosat va harbiy ehtiyojdan kelib chiqib qoʻshilgan. SpaceX esa aniq maqsadga ega boʻlgan xususiy kompaniya: Marsni kolonizatsiya qilish. Elon Maskka ham ishonsa boʻladi; katta maqsadlar qoʻyib ularni amalga oshiradigan, butun insoniyat kelajagiga hissa qoʻsha oladigan odam.

Bundan tashqari, bu va boshqa xususiy kompaniyalar fazoni isloh qilishni asta-sekin arzonlashtirib boryapti: katta yukni orbitaga olib chiqish, yukni orbitaga olib chiqishdagi birinchi bosqichni qayta yerga (platformaga) qoʻndirish kabi.

Xullas, bu SpaceX uchun kichik qadam, lekin butun insoniyat uchun katta sakrash.

#fazo #kosmos

StackOverflow sayti dunyo boʻylab oʻtkazadigan soʻrovnomaning natijalarini eʼlon qilibdi. Unda deyarli 65 000 ta dasturchilar ishtirok etgan.

https://insights.stackoverflow.com/survey/2020

Qiziq faktlar:
- Rust, TypeScript va Python eng sevimli dasturlash tillarining uchligida;
- dunyo boʻyicha yillik maosh 41 000 dan 92 000 AQSh dollarigacha, AQShning oʻzida esa 100 000 dan 152 000 gacha; medianasi hisoblangan;
- Oʻzbekistondan 36 ta odam soʻrovnomada ishtirok etgan, Qozogʻistondan 60 ta, Qirgʻizistondan 18 ta, Tojikiston va Turkmanistondan 6 tadan;
- eng koʻp ishtirokchilar AQSh ichida (19,49%), keyin Hindiston (13,12%), Buyuk Britaniya (6,09%) va Germaniya (6,08%).

Soʻrovnoma 2011-yildan boshlab oʻtkaziladi. Avvalgi yillar uchun natijalar: https://insights.stackoverflow.com/survey/

Topilma uchun Darxonbekka @TenXEngineer rahmat.

@FarLives 🌀

🔥 Coursera universitet va kollej talabalariga kurslarini bepul beryapti. 31-iyulgacha roʻyxatdan oʻtish lozim va 3 800 ta kurs 30-sentabrgacha ochiq boʻladi.

https://www.coursera.org/for-university-and-college-students

@FarLives 🌀

Twitter’dagi mashhur (270 mingta kuzatuvchi) Earth akkauntida Shohi Zinda maqbarasi:

https://twitter.com/earth/status/1268684413086416899?s=21

Yana yaxshi fotosurat: Dragon fazo kemasidan koʻrinish.

https://twitter.com/Astro_Doug/status/1270847503332712455

#fazo #kosmos

📹 Shanba videolari - 5

Sony PlayStation 5
Sal kechga qolgan “Shanba videolari”ning bu sonini haftaning asosiy anonsi — Sony PlayStation 5 bilan boshlayman. Bu yil oʻyin konsollarining joriy avlodi (PlayStation 4, XBox One, Nintendo Switch) tugayapti. Joriy avloddagi gʻolib, albatta, PlayStation 4 boʻldi. Sony oʻyin konsoli uchun yaxshi oʻyinlarni taqdim qiloldi. Yangi avlod uchun Microsoft ham qiziq oʻyinlarni chiqaradi, lekin odatda, XBox uchun chiqariladigan oʻyinlar konsol uchun eksklyuziv boʻlmaydi: kamida shaxsiy kompyuterlarda paydo boʻladi keyinroq. Sony oʻzining ekskyuzivlarini yangi konsol uchun davom ettiryapti.

Xullas:
- Sony kompaniyasining taqdimoti bu yerda (1 soatdan koʻproq): FULL Sony PS5 Future of Gaming Reveal Event
- The Verge nashri tayyorlagan qisqaroq (22 minut) video: Playstation 5 event in 22 minutes (hardware + games)
- Rus tilida Anton Logvinov strimi: Презентация PlayStation 5 - С русским переводом. Будущее игр. Horizon 2 и другие.

Unreal Engine 5
May oyida Epic Games kompaniyasi oʻzining Unreal Engine deb nomlangan oʻyin yaratish uskunasining (“game engine”, “игровой движок” soʻzlarining oʻzbek tiliga aniq tarjimasini bilmayman) yangi versiyasidagi imkoniyatlarni koʻrsatdi. Ushbu videoga qarab yagona olinadigan tassurot: yaqin orada kinolardagi va oʻyinlardagi grafika sifati bir xil boʻladi. Avvallari kompyuterda soatlab hisoblanadigan yorugʻlik tarqalishi hozirgi videoxarita va yangi avlod konsollarida real vaqtda hisoblanyapti.
- PS5 Unreal Engine 5 Tech Demo

Turli usulda tuxum pishirish
Oxirgi paytlarda ovqat pishirishga qiziqishim koʻpaygan. Miyani dam oldiradigan juda qiziq mashgʻulotga aylandi. Yangi retseptlarni oʻrganishning asosiy vositasi — YouTube. Quyidagi videoda tuxumni turli usullarda pishirish koʻrsatilgan. Umuman, Tasty yaxshi koʻrsatmalar qiladi.
- How To Cook Perfect Eggs Every Time

Moskva metrosi qanday qurilgan
“MASTER КЛАСС” kanali Moskva metrosining qurilishi va tuzilishi haqida yaxshi videolar tayyorlabdi. Shahardagi jamoat transporti va ozroq shaharsozlikka qiziqadiganlar uchun foydali video. Harqalay, Moskva metrosi katta, murakkab, oʻziga xos tizim.
- Как строилось московское метро?
- Строительство метро / Как создавалась схема?
- Метро будущего / Строительство тоннелей

Lo-fi hip-hop, deep house, chill-out music
Soʻnggi paytlarda baʼzida kechroq (tunda) biror narsaning ustida ishlasam yoki biror mavzuga chuqurroq kirishimga toʻgʻri kelsa, YouTubeʼda cheksiz davom etadigan radiolarni eshitaman. YouTubeʼdagi bu videolarda tasvir muhimmas, musiqasi esa odamga xalaqit bermaydigan. Koʻpida takrorlanib turuvchi videolar qoʻyilgan boʻladi. Shulardan baʼzilari quyida.
- coffee shop radio // 24/7 lofi hip-hop beats
- lofi hip hop radio - beats to sleep/chill to
- lofi hip hop radio - beats to study/relax to 🐾
- 24/7 Live Radio | Best Relax House, Chillout, Study, Running, Gym, Happy Music
Sarlavhadagi kalit soʻzlar orqali izlaganda YouTubeʼda yana bir qancha videolar chiqib keladi.

Avvalgi soni: https://t.me/FarLives/363

#shanba_videolari #youtube @FarLives 🌀

📹 Shanba videolari - 6 (yakshanbagisi)

Bugun ushbu ruknning kechikkan qismi chiqyapti. Asosiysi, chiqyapti 😅

Chegaralar yopiq boʻlganda sayohat
Anton Ptushkinga barakalla (videolari yaxshi). Pandemiya va karantin paytida yolgʻiz sayohat qilishni vatanidan boshlagan. Bir qismi Ukrainaga toʻgʻri keladigan Karpat togʻlariga sayr qilib qiziq bir video tayyorlagan. Avvalo, soʻzsiz olingan video Liziqi videolariga oʻxshaydi (spoyler: oxirida gapiradi). Juda ajoyib.
- Путешествия с закрытыми границами

Kreyg Adams
Anton aytishicha, u Kreyg Adams videolaridan ilhom olgan. Kreyg shunaqa soʻzsiz videolar tayyorlaydi: ularda Kreyg biror togʻli hududga piyoda koʻtariladi. Masalan, Islandiyadagi videosini 3 milliondan ortiq tomosha qilishgan.
- Hiking 60 Miles Alone in Hornstrandir Iceland
- Hiking 80 Miles Alone on the Torres Del Paine Trail in Chile
- First Time in Japan

Nikolay Ironov
Artemiy Lebedev studiyasi dizayn bilan shugʻullanuvchi sunʼiy intellektni eʼlon qilishdi: bir yil davomida u 20 ga yaqin loyihalarda ishtirok etgan. “Ekspress dizayn” orqali chiqarilgan va turli shov-shuvlarga sababchi boʻlgan dizaynlarning koʻpini shu sunʼiy intellekt qilgan. Bu dizaynda qiziq yoʻnalishning boshlanishi boʻlishi mumkin.
- Saytida: https://www.artlebedev.ru/ironov/
- Николай Иронов

WWDC 2020
Apple kompaniyasi 24-iyunda boshlangan konferensiyasida oʻzining operatsion tizimlarining yangi versiyalarini taqdim qildi. Asosiy katta oʻzgarishlar iOS va macOS operatsion tizimlarida. Bundan tashqari, Apple Mac kompyuterlarida oʻzining chipini ishlatishni boshlarkan. Bu yilgi taqdimot avvalgilaridek sahnada tomoshabinlar bilanmas, deyarli boʻsh kompaniya kampusida oʻtkazildi. Yaqinda Chaqmoq FM podkastida bu haqida batafsil gaplashamiz.
- WWDC 2020 Special Event Keynote — Apple
- Apple WWDC 2020 keynote in 18 minutes

Cyberpunk 2077 geympleyi
Vedmak oʻyinining ijodkorlaridan yangi, kiberpank janridagi oʻyin. Juda koʻp odam intizorlik bilan kutyapti. Bu hafta CD Projekt Red studiyasi 25 minutlik geympleyini koʻrsatdi. Oʻyindagi shahar — ajoyib. Aytgandek, oʻyinda Gollivud xalq artisti — Keanu Rivz ham ishtirok etgan.
- CYBERPUNK 2077 NEW Gameplay Demo 20 Minutes 4K

Hayayo Miyadzaki
Ushbu rejissyorning animatsion filmlari orqali men anime dunyosi bilan tanishganman. Deyarli har bir filmi qanaqadir samimiy, mehribon, bolalar oʻzini kattalardek, kattalar bolalardek tutadigan, yapon mifologiyasi va zamonaviy-kelajak texnologiyalarini birlashtirgan, stimpank elementlari qoʻshilgan. Hayayo Miyadzaki — filmi Oskas mukofotini olgan yagona yapon anime rejissyori. Menga eng yoqqan filmlari: “Laputa: osmondagi qasr”, “Shamol kuchayyapti”, “Yuruvchi qasr”, “Ruhlar olib ketganlar”, “Mening qoʻshnim Totoro”.
- Как снимает Хаяо Миядзаки
- The Philosophy of Miyazaki – Wisecrack Edition

Omon boʻling! ✌️

Avvalgi soni bu yerda: https://t.me/FarLives/380

#shanba_videolari #youtube @FarLives 🌀