🤔 ZAMONAVIY ELEKTROMOBILLAR – ENERGETIKLAR ISH SAMARADORLIGI YO‘LIDA

Iste’molchilarni elektr energiyasi bilan barqaror hamda sifatli ta’minlash, xizmat ko‘rsatish jarayonlarini yanada takomillashtirish maqsadida “Hududiy elektr tarmoqlari” AJ tomonidan “Farg‘ona hududiy elektr tarmoqlari korxonasi” AJga 30 ta, “Energosavdo” Farg’ona bo’limiga esa 4 ta zamonaviy elektromobillar topshirildi.

Mazkur transport vositalari energetika tizimida xizmat ko‘rsatish tezkorligini oshirish, mutaxassislarning elektr ta’minoti obyektlariga qisqa vaqt ichida yetib borishini ta’minlash hamda ishlab chiqarish jarayonlarini yanada samarali tashkil etishga xizmat qiladi. Bu esa hududlarda elektr ta’minoti bilan bog‘liq masalalarga tezkor munosabat bildirish imkonini yaratadi.

Ayniqsa, elektr tarmoqlarida yuzaga kelishi mumkin bo‘lgan nosozliklarni bartaraf etish, profilaktik ko‘rik va texnik xizmat ishlarini o‘z vaqtida amalga oshirishda ushbu elektromobillar muhim ahamiyat kasb etadi.

Transport vositalarining yana bir afzalligi shundaki, ular brigada a’zolari bilan bir qatorda zarur elektr jihozlari va uskunalarni ham bir vaqtning o‘zida manzilga yetkazish imkonini beradi. Bu esa avariya holatlariga tezkor javob qaytarish va ish jarayonini samarali tashkil etishda muhim omil hisoblanadi.

Shuningdek, ekologik toza transport vositalaridan foydalanish atmosferaga chiqariladigan zararli chiqindilarni kamaytirishga xizmat qilib, atrof-muhitni muhofaza qilish hamda “yashil iqtisodiyot” tamoyillarini qo‘llab-quvvatlashga munosib hissa qo‘shadi.

Bugungi kunda “Hududiy elektr tarmoqlari” AJ tomonidan sohada zamonaviy texnika va innovatsion texnologiyalarni joriy etish, ish jarayonlarini takomillashtirish hamda xodimlar faoliyati uchun qulay shart-sharoitlar yaratish borasidagi ishlar izchil davom ettirilmoqda. Mazkur sa’y-harakatlar esa hududlarda elektr ta’minoti barqarorligini yanada mustahkamlashga xizmat qilmoqda.

⚡️ t.me/farhetk_admin

YOSHLAR KUNI MUNOSABATI BILAN AMALIY KO‘MAK KO‘RSATILDI

Bugun mamlakatimizda Yoshlar kuni munosabati bilan yoshlarni qo‘llab-quvvatlash, ularning bandligini ta’minlash va mustaqil hayotga qadam qo‘yishiga ko‘maklashish borasida keng ko‘lamli ishlar amalga oshirilmoqda. Bu borada “Farg‘ona hududiy elektr tarmoqlari korxonasi” aksiyadorlik jamiyati tomonidan ham tizimli ishlar olib borilmoqda.

Xususan, Toshloq tumanida istiqomat qiluvchi kam ta’minlangan hamda ishsiz yoshlarni qo‘llab-quvvatlash maqsadida korxona bosh direktori Azizbek Saydaliyev tomonidan 16 nafar yosh homiylikka olingan. Ushbu tashabbus doirasida yoshlar bilan muntazam uchrashuvlar o‘tkazilib, ularning muammolari, ehtiyojlari hamda kelajakdagi rejalari o‘rganib kelinmoqda.

Ko‘rsatilgan amaliy yordam natijasida ushbu yoshlarning 5 nafari ish bilan ta’minlandi. Natijada ular doimiy daromad manbaiga ega bo‘lib, o‘z hayotini barqaror yo‘lga qo‘yish imkoniyatiga ega bo‘ldi.

Shuningdek, bugungi kunda qolgan 11 nafar yoshning qiziqishi, ehtiyoji hamda qaysi sohada faoliyat yuritish salohiyatidan kelib chiqib, ularga turli texnik jihozlar xayriya tariqasida topshirildi. Mazkur jihozlar yoshlarning o‘z kasbini yo‘lga qo‘yishi, daromad manbai yaratishi hamda tadbirkorlik faoliyatini boshlashiga xizmat qiladi.

Tadbir davomida yoshlar o‘zlariga qaratilayotgan e’tibor va qo‘llab-quvvatlash uchun minnatdorlik bildirib, yaratilgan imkoniyatlardan samarali foydalanishlarini ta’kidladilar.

“Farg‘ona hududiy elektr tarmoqlari korxonasi” aksiyadorlik jamiyati tomonidan yoshlarni qo‘llab-quvvatlash, ularning bandligini ta’minlash va kelajakda mustahkam o‘rin egallashiga ko‘maklashish borasidagi ishlar izchil davom ettiriladi.

⚡️ t.me/farhetk_admin

ENERGOTEJAMKORLIK — BUGUNNING USTUVOR VAZIFASI

Buvayda tumanidagi “Xilolko‘l” fermer xo‘jaligida tasarrufida transformator punktlari hamda elektr uzatish tramoqlari mavjud bo'lgan fermer xo'jaliklariga "Energiya samaradorligini oshirish hamda elektr energiyasidan oqilona foydalanish masalalari"ga bag‘ishlangan amaliy seminar tashkil etildi.

Bugungi kunda Buvayda tumanida 320 dan ortiq fermer xo‘jaliklari faoliyat yuritmoqda. Shundan 211 tasining tasarrufida transformator punktlari hamda elektr uzatish tarmoqlari mavjud bo‘lib, ularning ekin maydonlari asosan suv nasoslari orqali sug‘oriladi. Bu esa elektr energiyasidan samarali va tejamkor foydalanish masalasini yanada dolzarb etmoqda. Shu bois energiya resurslarini tejash, mavjud elektr tarmoqlaridan oqilona foydalanish hamda texnik yo‘qotishlarni kamaytirish bugungi kunning muhim vazifalaridan biri sifatida e’tirof etilmoqda.

“Farg‘ona hududiy elektr tarmoqlari korxonasi” AJ mutaxassislari tomonidan transformator punktlari va elektr uzatish tarmoqlariga ega fermer xo‘jaliklarining elektr ta’minoti hamda energiya samaradorligi o‘rganilganda, ularning 114 tasida elektr energiyasidan foydalanishda belgilangan me’yorlardan ortiqcha yo‘qotishlar mavjudligi aniqlangan.

Mazkur muammolarni bartaraf etish maqsadida o‘tkazilgan seminar davomida energiya yo‘qotishlarini kamaytirish, elektr tarmoqlaridan samarali foydalanish hamda energiya tejamkor texnologiyalarni joriy etish bo‘yicha aniq amaliy tavsiyalar berildi. Bu boradagi ishlar “Xilolko‘l” fermer xo‘jaligi misolida amaliy tarzda namoyish etildi. Unda elektr uzatish tarmoqlarini to‘g‘ri ekspluatatsiya qilish, transformator punktlarini muntazam texnik ko‘rikdan o‘tkazish hamda nasos uskunalarining samaradorligini oshirish masalalari yuzasidan atroflicha tushuntirishlar berildi.

Seminar davomida tasarrufida transformator punktlari hamda elektr uzatish tarmoqlari mavjud bo‘lgan fermer xo‘jaliklariga mavjud elektr uzatish tarmoqlari va transformator punktlarini mukammal joriy ta’mirlash, ularning texnik holatini yaxshilash hamda energiya yo‘qotishlarini keskin kamaytirish bo‘yicha aniq vazifalar belgilab berildi.

Seminar yakunida fermer xo‘jaliklari rahbarlari tomonidan berilgan savollarga soha mutasaddilari tomonidan batafsil javoblar berildi.

Mazkur amaliy seminar nafaqat elektr energiyasidan samarali foydalanish madaniyatini oshirishga, balki fermer xo‘jaliklarining barqaror rivojlanishi, ishlab chiqarish samaradorligining ortishi hamda qishloq xo‘jaligi tarmog‘ining yanada mustahkamlanishiga xizmat qiladi.

⚡️ t.me/farhetk_admin