YANGI TRANSFORMATOR – BARQAROR ELEKTR TA’MINOTI GAROVI

Mamlakatimizda aholi farovonligini oshirish, hududlarda muhandislik-kommunikatsiya infratuzilmasini modernizatsiya qilish masalalariga alohida e’tibor qaratilmoqda. Bu boradagi amaliy ishlar Marg‘ilon shahrining “Qirguli” mahallasida ham izchil davom etmoqda.

Mahallada elektr energiyasiga bo‘lgan ehtiyoj yildan-yilga ortib borayotgani bois, mavjud transformator punkti yuqori yuklama ostida faoliyat yuritib kelayotgan edi. Aholini barqaror va sifatli elektr energiyasi bilan ta’minlash maqsadida hududda zamonaviy transformator punkti o‘rnatildi.

Yangi transformator mavjud tarmoqqa qo‘shimcha quvvat sifatida ulanib, elektr yuklamasini teng taqsimlash imkonini beradi. Natijada kuchlanishdagi pasayishlar, uzilishlar va ortiqcha zo‘riqishlarning oldi olinadi. Loyihaga muvofiq, mahalladagi eskirgan elektr tarmoqlari ham bosqichma-bosqich yangilanmoqda.

Amalga oshirilayotgan ushbu chora-tadbirlar nafaqat bugungi ehtiyojni qondiradi, balki kelgusida yangi uy-joylar va tadbirkorlik subyektlari ishga tushirilishi bilan ortib boradigan yuklamani ham qamrab oladi.

Mazkur ishlar “Qirguli” mahallasida olib borilayotgan ijtimoiy-iqtisodiy islohotlarning amaliy ifodasi bo‘lib, aholi turmush sifatini yaxshilashga xizmat qilmoqda.

⚡️ t.me/farhetk_admin

✍️“L-PM” YUQORI KUCHLANISHLI ELEKTR UZATISH TARMOG‘IDA TA’MIRLASH ISHLARI OLIB BORILMOQDA

Viloyatimizda elektr ta’minoti barqarorligi va ishonchliligini ta’minlash maqsadida yuqori kuchlanishli elektr uzatish tarmoqlarida rejali ta’mirlash ishlari izchil davom ettirilmoqda.

Jumladan, Farg‘ona, Rishton, Bag‘dod, Buvayda hamda Oltiariq tumanlarining ayrim hududlarini elektr energiyasi bilan ta’minlab kelayotgan “L-PM” yuqori kuchlanishli elektr uzatish tarmog‘ida nosoz izolyatorlarni yangilash va ta’mirlash ishlari amalga oshirilmoqda.

Mutaxassislar tomonidan o‘tkazilgan texnik ko‘riklar davomida xizmat muddati tugagan, tashqi ta’sirlar natijasida shikastlangan hamda xavfsizlik talablariga javob bermaydigan izolyatorlar aniqlanib, ular bosqichma-bosqich yangilariga almashtirilmoqda.

Shuningdek, tarmoq ustunlari va uskunalarining texnik holati ham sinchkovlik bilan ko‘zdan kechirilmoqda.

Ushbu ishlar elektr uzatish tarmoqlarida avariya holatlarining oldini olish, kuchlanish barqarorligini saqlash va iste’molchilarni uzluksiz elektr energiyasi bilan ta’minlashga xizmat qiladi.

Bu kabi rejali profilaktik tadbirlar kelgusida yuklamalar oshgan sharoitda ham tarmoqning ishonchli ishlashini ta’minlashda muhim ahamiyat kasb etadi.

⚡️ t.me/farhetk_admin