በመቐለ አሉላ አባነጋ አውሮፕላን ማረፊያ አንድ አውሮፕላን መጠነኛ እክል አጋጠመው

አዲስ አበባ፣ ሐምሌ 9፣ 2017 (ኤፍ ኤም ሲ) የኢትዮጵያ አየር መንገድ የበረራ ቁጥር ET-298 የሆነ አውሮፕላን በዛሬው ዕለት በመቐለ አሉላ አባነጋ አውሮፕላን ማረፊያ ካረፈ በኋላ ከመንደርደሪያው መጠነኛ የመንሸራተት እክል አጋጥሞታል።

አየር መንገዱ ባወጣው መግለጫ አውሮፕላኑ ከአዲስ አበባ ተነስቶ ወደ መቐለ በመብረር አሉላ አባነጋ አውሮፕላን ማረፊያ ሲደርስ ዝናብ እየዘነበ ነበር ብሏል።

እስካሁን ባለው መረጃ በመንገደኞች ላይ ምንም አይነት ጉዳት ያልደረሰና በሰላም ከአውሮፕላኑ እንዲወርዱ መደረጉን ገልጿል።

በሁለት የበረራ ሰራተኞቻችን ላይ መጠነኛ ጉዳት በማጋጠሙ ለተጨማሪ የህክምና ዕርዳታ በአቅራቢያ ወደሚገኝ የህክምና መስጫ ተቋም ተወስደው ከታከሙ በኋላ ወደ ሆቴል እንዲሄዱ ተደርጓል ሲል አስታውቋል።

አየር መንገዱ ለተፈጠረው መጉላላት ይቅርታ በመጠየቅ ተጨማሪ መረጃ ሲኖር የሚያሳውቅ መሆኑን ጠቁሟል።