مسحتك .. بعد ماكو..
بالذكريات
إلك عندي ذكرى .. التمر بالذهن
وإذا صدفة
طيفك يجيني بمنام
يحايلني بلكي .. الوصالك أحن
وحق ليلي ذاك السهرته بجفاك
إلك ما افك..
لحظة باب الجفن
الحمد لله گلبي اليدگ إستراح
عزفته ، وعزفني . . وحفظنه
اللحن
الينكره ، الوطن
فترة يصبح غريب
ويضوگ المرارة اعله ظهر السفن
وراها يعيش .. الحياة من جديد
وعگب حضنه ينفكله مية
حضن
المدينة .. التگلك هلا بكل صباح
النفس بيها ،
يسوه جميع المدن
عشتها وشفت مايفيد الجناح
اذا بيها صارت سماك بسجن
د. فلاح الزيدي

اسألك يا إلهي بحوبة آذانك
عجل خل يجينه بساع طوفانك
__
طوفانك بطه خل يجي يرد الروح
ولو ماعدنه واحد مثل عبدك نوح
ضاع الدوه علينه وعدنه كومة جروح
وبس عندك دوانه يرب سبحانك
__
مو شط خل يفيض اعله الارض شطين
وجوه الناس ما يغسلها بس الطين
انت اللي رسمت الهالخلگ خطين
واحنه اللي مشينه الغير عنوانك
__
مابيه حيل يرفع مايك الناعور
وبامرك اريد يفور كل تنور
الماخذ دورك اعله الارض كون تدور
عليه ارضك ويعرف عدل ميزانك
__
عندك علم يارب باليسبونك
عدنه هواي مو مثل اليلبونك
سفينة 🚢 كون تنزل لليحبونك
تصعدهم وبيهم يلطف احسانك
__
اذا فعلا يجينه برحمته الطوفان
من كل زوج لتصعد يعالي الشان
ناس هواي تصعد تحت هالعنوان
بوجههم كون اريدك تسد بيبانك
__

يابياض عيوني گلي شتستفاد
من تلم غيمك وتمطر عالسواد
ياعطر يوصلي منهم يا قميص
يمي چا نو للأسف بس هسه غاد
چنت شجرة الهم وتارسني الخضار
الريح ماترحم اذا اتمر برماد
مو نبي خاطر أسولف (بالتهون)
ياجرحهم منه مل حته الضماد
ياوجه مر بيهم اتلگاه واصيح
اتدنه خل اتلمسك واطلب مراد
متت بس طاريهم الخلاني اعيش
وغير خبزة طيفهم مامرني زاد
شايل الهم لهفة أم واحد غريب
سنين غايب عنها ويگللها راد
ياحرارة حضني بس الهم تلوگ
مني تطلع طافحة بنار البعاد
إتشم ثرى دروب التودي وماتجيب
بلكي ذكرى الهم تخضر عالبراد
وهو مو كل ملگه يرهم ياضواي
عورة السنبل تبين بالحصاد
ويرفس بصدري حچي ابن ادم حنين
موادعه يفشل وملگه عيونه حاد
شچم گمر حط اعله متني وگتله روح
شما نگص ضي نجم حبكم عدي زاد
تهيم روحي وتعرض صوركم واطيح
وغير واديكم أبد ماعدي واد

اسمحلي استطعم اسمك يا ارق والطف
" حسن " والحسن يومك ضوگاني الطف
خنگة ونار تسعر بالگلب والراس
البحر ينشف وعيني اعليك ما تنشف
صوتك تارس الدنيا او وحشتك نار
مو مضنوك گلب الحبك امزرف
هواي انطاك ربّك شبّهك بحسين
من ادورك ياحسن الگاك بأول صف
انت وياه بنفس الرمح مطعونين
وبالشام الجرحكم يدگ نفس الدف
ياسورة جلالة بوكت ما بيه خير
اعراب وما تريدك ياضوه المصحف
تدافع عن كرامة ناس مهيونين
عبيد وما الهم غير العصا والچف
ولأنّك صوت حر من الجنوب انصاح
طبيعي اسماعهم وياك ما تنظف
اهل بيت اللهو والطرب والتزييف
وي اهل بيت النبي تاريخهم أجوف

#شوية_من_حسچتنا
____
موش عدلة الدنيا غم دستورها
تحله ما تحله الخرايب دورها ؟
ناعمة ورگطة وخبيثة وسمها حار
ندري بيها ونرگض الزاغورها !
تنطي ماتنطي بذنايبها الحماد
وذاك من ذاك الحصد بسدورها
واحنه عِلگة ونارها تدور اليبيس
وبينه شاجر ما هفت تنورها
صويحب الدنيا اله صدر المضيف
وبالطرف تلگه الطلع من طورها
الباز بيها مچتف بگن ماله باب
بس سماها انحجزت الزرزورها
دوم تفتر ماتظل الها اعله حال
وما تعب من الغرف ناعورها
ليش اجيناها وعليمن عايشين
نخلي لبها ونركض اعله گشورها
وجوهنا التلمع يناطرها التراب
وماكو راس السلم من طبشورها
تعيش وحدك ياخذك ليلك غريب
زادك الوحشة ونديمك جورها
لو نعرف نحب عبرناها بسلام
شراعنه مشگگ وظلمة بحورها
وجوهنا تضحك دواخلنا شتگول؟
اليحزن تدگه دوه المسرورها
فارغة سلال المحبة وكلها ليل
والحرامي مأمن بناطورها
من تحب صوتك يگلولك نشاز
وتنحر ابلبل احساسك بورها
درگة مايسلم الچف البيها فات
وعسل ماتلگه بحلگ زنبورها
راحة مابيها التعب وياها جاي
بكل درب موجود أثر عاثورها
بيها تلگه اليضحك بگاعه وسماه
وماسلم من ذبته بمحذورها
العاقل بهالدنيا ابد مايستراح
الراحة بيها انخلقت الممذورها
وياك لاصاحب يظل لاخل يدوم
الكوخ عبرة وكت وي قصورها

امنيتي انظفك ياوطن من كل عار
وامسح شكو تراب اعله وجهك والجام
والزم إديك وامشي مرتاح وياك
واقبل إذا تتعب على ذراعي تنام
ومن عندك آخذ ياوطن وصلة گاع
ازرعلي بيها بكل ركن حقل الغام
قوت المواطن بيها صمين شعير
وشوية اذرة حايلة من العام
وراتب الجندي البيها 4 تالاف
وجيش القدس يرجع وذيچ الافلام
وشارعها امليه امن واستخبارات
وبنصها اخلي كل فدائي الصدام
وشاشتها الونها بوجه "عبدحمود"
من الصبح حد ماتنعس وتنام
وطبان ارجعه الها واعين مزبان
وبرزان بيها ايوقع اعله الاعدام
وانطيهم الضاگته عيون "ام حسين "
من لگت گرة عينها چيس عظام
وعداي ارجعه الها بلا عكازات
وانصبله كرسي ابين مروة وانغام
واهديلها محمد سعيد الصحاف
هو الوحيد اليفتهم بالإعلام
لادش يطب للبيت لا انترنيت
لافيس لاوتساب لا انستغرام
الرجال بيها يخاف من ام البيت
يلتفت حتى بطبته للحمام
هالدولة اسويها لاولاد #ام_تقرير
والبعده يحچيلي إبطولة هدام
واللبسوا الزيتوني بايام الخير!!!
وكل واحد يحن الهذيچ الايام

عاتبتني ورسمت الدنيا بكحلها
وسولفتلي شضامه الحسرة
بگلبها
وحيرتني
شرد أجاوبها وشگلها ؟
خاف أراويها الچفوف البيها مرتاح التعب
يكثر زعلها
وخاف تجفل
من أچشفلها المتون الفوگهن دنيا القهر دگت رجلها
يابنيه وداعة عيونچ هذني ..
الدنيا وي المثلي ماتخطي بنبلها
انت حسبالچ المثلي ينام ليله بحلم وردي ؟
ويگعد يناغي العصافير بمحلها
لا.. يا آخر سالفة تحط اعله هدبي
لا.. وحگ ذيچ الگصيبة الچانت تلمني من أفلها ..
آنه ابن وادم مشه بدمها الحصار
وبالصبخ ذبت شتلها
آنه من ديرة .. الهلاهل عدها عيب
والتريد تفوت بيها مايخلوها برسلها
والتمس زلوفها خيوط الضوه
تموت بأملها
والتسمّع صوت خطوتها
الحبيب
تشنق بأول مسافة عيون ضحكتها بحجلها
يابنية…
ريحة الدم بقميصي تگلي وين ؟
والچفوف الفرهدت تين الولاية تگلي وين ؟
والرصاص النايم بخاصرتي هم يگلي وين ؟
والعيون التجدح بليل المحلة تگلي وين؟
وآنه ماشايل
بجيبي غير سالفتچ وأصلها
خاف أضحك .. ينتبه شرطي المحلة ويوگف يفتش ضحكتي
وخاف أبچي .. ينتبهلج مومن الجامع اليمنه ويوگف يكفر دمعتي
هو هذا آخر سطر خله الرواية
تموت من اول فصلها

اسألك يا إلهي بحوبة آذانك
عجل خل يجينه بساع طوفانك
__
طوفانك بطه خل يجي يرد الروح
ولو ماعدنه واحد مثل عبدك نوح
ضاع الدوه علينه وعدنه كومة جروح
وبس عندك دوانه يرب سبحانك
__
مو شط خل يفيض اعله الارض شطين
وجوه الناس ما يغسلها بس الطين
انت اللي رسمت الهالخلگ خطين
واحنه اللي مشينه الغير عنوانك
__
مابيه حيل يرفع مايك الناعور
وبامرك اريد يفور كل تنور
الماخذ دورك اعله الارض كون تدور
عليه ارضك ويعرف عدل ميزانك
__
عندك علم يارب باليسبونك
عدنه هواي مو مثل اليلبونك
سفينة 🚢 كون تنزل لليحبونك
تصعدهم وبيهم يلطف احسانك
__
اذا فعلا يجينه برحمته الطوفان
من كل زوج لتصعد يعالي الشان
ناس هواي تصعد تحت هالعنوان
بوجههم كون اريدك تسد بيبانك
__

مشتاق إلها ...
ياهو المن عدكم يندلها ؟
محتاج ابن آدم يفهمني
ياخذ مكتوبي..
المنزلها.. ويگل الها
مشتاقلها ..
مشتاقة چفوفي ال لمستها
ومشيتها المنقوشة ابالي
وضحكتها ورقّة همستها
ال گالتني..
وما أظن گايلها..
كل ما مر نورس گدامي
من وحدها عيوني تغمض
وتاخذني تحطني إعله جناحه
أتخيل شايلني وشايلها
بكل عش أتخيلها گبالي ..
بكل…
مراية بكل فانوس..
أشرب ضحكتها وتاخذني
النشوة وأبقه أضحك عالكوس
ضحكتها أشربها وآكلها
مشتاق الها
بت هذا المحروگ بگلبي
ال ما آدري شلون يغازلها
ما ادري شلون يغافلني
ويبدي يسولفلي بوگفتها
ويرسم حاجبها اعله جروحي ..
ويسكّني بفي شفتها
ويگلي ..
وياي إتأملها
ياگلبي .. شگد مشتاق الها
لو أعرف واحد بالدنيا
يطشر شمس… الله
بسد ظلها..
چا ما ظليت أكتب وأحرگ
ولا بالطيف أبقه أتوسلها
بس آنه اعرفها وتعرفني
وتستاهلني وأستاهلها
مشتاق إلها

#شيء_من_الغزل
_
اتغزلت بيها وشفتها بعينها
وخدر حتى الهوا البيني وبينها
لانه من ذوله اليحبون اليطيح
گبل وكته ومالي شغلة بدينها
ولالي ايد التمتد تلوح البعيد
يمها اگولن روحي الله يعينها
مستحي وخايف وعود انا ابن ابوي
گلبي يرجف اقوى من چفينها
فوگ من رموشها يغفي الحمام
وغبشة الله التمت بنص عينها
گطرة من ناگوط حب بصيف حار
هيچ احس بروحي يم في تينها
تناغي للنسمة وضوه الله بدمها حار
وانا جاي أحچي ببرودة طينها
اغنية چنها موش مالة هالزمان
مدري وين اليا نده مغنينها
سنبلة مخوصرة وحل وكت الحصاد
مدنگة وانا مسودن اعله سنينها
تميل وي النفس لو رادت تميل
سنيني طاحت كلها يم عشرينها
…………………………………… ..

تصارحنه وعرفت شضاملي بگلبه
سهلة عليه چانت بس علي صعبة
من گالالي احبك بيه مدري شصار
شفت بعيونه لون الوطن والغربة
اليشرب مستحه عيونك يذكرك بيك
من اتغير ملامح وجهك النگبة
حب النظرة الأولى يخوف البيه روح
بهذا الحب تعيش الرغبة والرهبة
المنجل دوه السنبل حتى لو بيه موت
والچويه المسويه الصيت للگصبة
الحب اليجي بسرعة يروح بأول ليل
من تلم الدمع وبإيدك تشربه
اليضحكلك وعينه تناظر الشباچ
بيك يسد فراغ يريد لا تجربه
الحب لذة نبي واگف ابابه إنسان
عاصي ورايده يشهدله عالتوبة
أجمل من " احبك" رجفة التهواه
إذا دربك تصادف مرة وي دربه
والأجمل بعد سكتته التلهج بيك
وحرورة چفوفه ولهفته العذبة
ورموشه التريد تطير للشافوك
لليم ريح ذكرك ينگلب رگبة

غيب براحتك..
شتشوفني مچلب؟
منو گلك فراگك ياهوه ايتعب؟
عادي..
أگطع وراك الماي وي الزاد
وأحاول الگه چارة
"الخنگة المغرب"
ضحكتك😞
مو مهم حافظها وين تروح ؟
الضحگتك..
خلگ عندي وي الضوه مسرب ..
رفعة حاجبك!
لمعة عيونك ذيچ
دلالك
رقتك
صوتك البيه اطرب!
الگاهن هذن باول قصيدة عليك
اكتبها
وحلو داعيك من يكتب !
خل يثگل..
شويه الگلب مابيه حيل
ادريبه الگلب💔
يستخف من يحب
"احبك"
مو مهم أسمعها گبل النوم
الهوه م نشوفه
بس ايبين من يهب
الرسايل🌹
والضوه الطافح من الشباچ 🦋
خل يچوني
هم الگه الجمرهن طب
الحلم….
طارش عيونك وانه مشرع الباب
والبگلبك
يضيف إيعرفه المعزب
واذا ينباگ لوني گبال المرايات !
ورمشي الفوگه شلتك
يانده يشيب ؟
وشنو يعني انعزل .؟
.ما استلذ بالناس
وبعوچية
اعدل ظلي المحدب؟
إگصي..
بشمس هجرك انا اريدك حار
العثگ لوما
حرورة آب ميرطب ..

خادمك وبحبك أتحول امير
انت يابو حسين عيد الله الچبير
__
"إنت " حي اعله الصلاة" وانت الأمل
وبيك گمت اشتم عطر خير العمل
الدين ناقص چان بس بيك اكتمل
والك يشهد ياعلي بهاي الغدير
__
الك يشهد ياعلي ذاك الهتاف
وماكو غيرك شاله طه اعله الچتاف
انت أكبر من مواضيع الخلاف
والاختلفوا بيك ماعدهم ضمير
__
فاز بالجنات من كان معك
انت من صدر النبي يطگ منبعك
زحمة أجادل عالسأل عن موضعك
انت الأول وانت الاوسط والأخير
__
انت باء البسملة وصاد الصلاة
بغير حبك مو حلو طعم الحياة
اعليك متفقة الكتب وي الرواة
للنبي غيرك فلا يصلح وزير
__
ياعلي " بخ لك " انگالت چذب
وابراها ضدك اتشكل حزب
الخشن حصتك غيره ماتعرف تحب
وانت اول زاهد بدين الحرير
__
" أنت مني .." انگالت گبال المله
وغير شخصك ماحظه بهالمنزلة
وعلي لو ما انت دين الله انوله
بدولة الحق انت المنصب سفير
__
حروف اسمك نقط لحروف الخبز
طه صدر المعرفة وانت العجز
يا ابو هالأمة يل اسمك لغز
الهالسبب عمر اليحبونك گصير

العمر خلصان وانت انطيته قيمة
يبو الروح التسولف بالعزيمة
حضرتك بيد وحدة وما انجريت
ولا دنگت راسك بالهزيمة
من اهلنه شكثر شايل وجهك اوصاف
ضحكتك دافية ونفسك كريمة
شكثر حاولوا شيطنتك لچن لا
تساميت اعله النفوس الرجيمة
وياك اتنفسينه العزة بالقول
ولمسنه الشرف بالصولة الحكيمة
اكبالك گاموا اصحابك يطيحون
بمواقف كلها احس چانت اليمة
گلبك ينعصر وبچفك يصير
ولهب نارك يجر عشب الهضيمة
وانت بكل ثباتك ترسم حسين
ومهر صبرك يسولف بالظليمة
تفگتك فگست اعيون الشياطين
وگفتك ياعلي كلش عظيمة

گبل لاتبچي وتهل دمعة العين
إسأل ليش ضحى بروحه الحسين
حتى الظلم ميدوم ،، نذبح عالغبره مظلوم
وقدم كل شي عنده النصرة الدين
-----
حسين مو بس دمعة تنزل ،، من يهل شهر المصيبة
حسينا بلسم سماوي ،،، الكل جرح أيس طبيبة
شوف ليش بكربلاءك ،،، الله نزل هالعجيبة
گبل لاتبچي المصابة
ركز شويه بخطابه
وإسأل المن الله جابة
وليش حز السيف نحره ،، وشيبته من الدم خضيبة
إخذ من شيبته ونحره العلامة
لا للذل نعم بس للكرامة
خط حسين مفهوم ،، حتى الظلم ميدوم
------
لاتبايع لاتهادن ،،،،،، لاتساوم عالهوية
عيش حر وموت حر ولاتخاف من المنية
شويه فك ذهنك حبيبي هو هذا أصل القضية
ركز بدم كل شهيد
تلكه حرية وعبيد
هنا حسين هنا يزيد
دقق بكل ارض تلكه ذكر من الغاضرية
نحر حسين بعده يردد الصوت
الشهيد يعيش من غصبا على الموت
الشهيد بطيحته يگوم ،، حتى الظلم ميدوم
،،،،،
گبل جية حسين للطف ،،، موحش الدين وسبيلة
والارض چانت خفيفة ،، ومن اجه صارت ثگيله
يدري بالقرآن أمانة ،،،،،،، والجبل بطل يشيلة
والوفه من فرهدوه
رجعه بچفوف إخوه
وعفيه زينب بت إبوه
للصبر خلت علامة ،، وآه ياصبر العقيلة
زينب من إجت مو بس للايتام
الغاية توضحت من طبت الشام
الشام تحولت شوم ،، حتى الظلم ميدوم
من تريد تزور كبره ،، إخذ من عندي النصيحة
عيش بإحساسك ثورته ،،گبل لاتدخل ضريحة
وكول ليش ثلث ليالي ،،،،،،جثته ظلت طريحه
وسافر بذاك الالم
وگول ليش اعله الحرم
حرگت النار الخيم
كل مصيبة رماد تصبح يم حبيب الله وذبيحه
حسين يريد منك تذبح الخوف
گبل لا بالضريح تباشر تطوف
العزة بعزته تدوم ،، حتى الظلم ميدوم

وين المشكلة من اتسلم اسلاحك
ليلك مو حلو من يطرد اشباحك
واذا جيرانكم لازملك السچين
رگبتك ما توالم دين ذبّاحك
سكوتك من ذهب هيچ الفتاوي تگول
نريد نذبحك وما نسمع صياحك
كلش واگفة تلزم حدودك زين
الحلو بس من نشوفك لازم اصفاحك
شريكك بالسكن يختنگ من يشوف
قفل بيتك مأمن بيد مفتاحك
رغيفك يوصلك بس بالقهر مديوف
دريخك خله الك بس اطنه مرواحك
حلو وكت الجسم من توگف اعله الذيل
ويوگف على العين الباگ مسطاحك
شطك مانحب ينملي بطير الماي
وعلى اليغرگ بعد لا يطب سبّاحك
نوارس عالجرف ما الك حق بهاي
فروض الطاعة خلصها اعله تمساحك
الصبح شسوي بيه عدنه الحضرتك ليل
عمرك بيه يگضي وعمر مصباحك

#قصة_قصيرة

رجلٌ يتأمل في لوحة..
___
كانَ كبيرَ السنِّ ويمشي ..
في الشارعِ مثل السكران
يحملُ في عينيه سؤالاً ..أكبر من كلِّ البلدان
يمسكُ خاصرةً أتعبها
عطشُ البحث ِ عن العنوان
يقرأ وجه الليل ويمضي
نحو المجهول بإتقان
لا يدري أين ستقذفه .. منفياً ريحُ الأزمان ؟
وقفت قدماه لتخبره
عن شيءٍ فوق الجدران
لا يقوى ان يسحب ظله .. كي يقرأ ما في الإعلان
حاول أن يقطع تذكرةً .. ليرى أعمال الفنان!
بعض اللوحات تراوده ..
لتقولَ له قف وتأمل
وارحل في لغة الألوان
موجٌ غنته شواطئه.. أشرعة بين الخلجان
ليلٌ يسكرُ في غانية
وطيور فوق الأفنان
ضوء وجسور ومياه .. وقصور في كل مكان
مزج الألوان بدمعته ..
كسجين خلف القضبان
كلُّ اللوحات تعذبه .. إذ لا شيء بها يعجبه
مسكينٌ هذا الإنسان
قرَّر أن يخرج مبتئساً..
لكن.. في احد الاركان .. نادته إحدى اللوحات
ثمة صوت يخرج منها
تصحبه..
نارٌ ودخان
طفلٌ معصوب العينين
ماءٌ يشرب رملاً مغلي
وجهٌ تصفعه كفان
إمرأةٌ تأكل ثدييها
تنور يخنق فورته .. اذ لانوح ولا طوفان
إشتغل الشيخ برؤيتها
قرر ان يشتري اللوحة
ليسافر فوق الألوان
لا مال لديه ليأخذها .. فبها رائحة الأوطان
مر الوقتُ عليه ثقيلا .. إذ بيعت كل اللوحات
وبقت تلك اللوحة تبكي
في زحمة تلك الأثمان
جاء الرسام ليخبره ..
( اللوحة ليست للبيع )
خذها مني بالمجان !

بالك لاتكن ملفت للانظار
وحياتك عيشها بكل التفاصيل
جمال الشكل عابر احچي بالروح
التميزني وتميزك عالتماثيل
صديق الكل تشوفه بكل الالوان
يموت وينبت بطين التواسيل
أكبر إنتهازي اليمشي عالماي
ويرش الوادم بدم المچاتيل
الغرور البيه سرور يخسرك اثنين
عزيز النفس والما يعرف يميل
وافرح لو لگيته يسولف وياك
ضميرك وحي يصير تگله جبريل
وخزته اللي تسلبك لذة النوم
هاي اغلى وأعز من المواويل
واحفظ گطرتك تلگه العطش خير
سل تصير الك هالگطرة اذا اتسيل
ولا اتساوم اعليها احفظها للموت
لو صبوا بحلگك دجلة والنيل
اليخافك من تربحه تعيش خسران
شيل ولا عليك احبابك اتشيل
اليريد يگضي عمره بثوب هارون
اليكرهه بعيشته دين البهاليل
افتح گلبك وشوف انت شتريد
الشوف العين يحتاج النه تبديل

إذا باگوا أحلامك من وسط عينك
كون السالفة تظل بينك وبينك
وإذا ردوا عليك وخذوا منها الشوف
خل تتعود أعله الدرب چفينك
دمعتك تنفضح من تسمح إلها تطيح
عمرك مو إلك شسوي بسنينك
منو گلك اليمك رايد يغطيك
يگطعهن تره بس تمد رجلينك
ياهو الگالك تنطي الشجرتك ماي
وإتاني الثمر والطين مو طينك
قرآنك براسك والرمح مو زين
من تصلي الفجر تنطعن ياسينك
الدين الحلل الحرية ما مرغوب
هضيمة بسجن دينك ينسجن دينك
ماكو مشكلة بالسهم لا بالماي
الذبح عبد الله ما ضايع إعله حسينك

حِبني وإخذ مني، الما أنطيه ل أحد
من تحبني أصيرن إلك عين وخد
وضوگني ضواك الضامه من الناس
الشبابيچ الصبح مو حلوة من تنسد
وانضحلي من اصيحك دوم اريدك حار
تره الگلب . اليحب مو زين من يبرد
يصاحب خاطري الياخذ الصفنة بعيد
شما تگرب علي صفنتي . تصير ابعد
حرارة ، حيرتي ، عيونك البيها يلوح
المنفى ، والوطن ، والكاس ، والمعبد
المغرب والنِفَس متعاندات وياي
اكو ابيناتهن ثارات ماتنعد
الشمس تگصر ولكن مغربيتي تطول
بالف ياعلي الينزل بالصدر يصعد
شتخسر من تحب إنسان عايش بيك
وبنفس الوقت ميت عليك شگد
شگد صعبة الأحلام الحدها جفن العين
وي اقل ذكره إعله خدك دمع تتفرهد
واصعب موقف يمر بيه العنده إحساس
من يخلي إيده بإيد تنگط صد
الچفن مو شرط أبيض لون خامه يصير
ومو كل الجنايز بالحبل تنشد
الظرف اصفر يصير اعله الرسالة ام روح
من ينشگ گبال الشاد روحه برد