أحقاً شبتَ يا أحلى الشبابِ؟ وغطى الثلجُ رأسكَ في غيابي؟
وضنَّ الناسُ أنكَ صرتَ كهلاً وما علموا بـأنكَ في عذابي
غريبٌ أنتَ في عينِ الليالي تُكابرُ جرحَنا خلفَ الضبابِ
أما زالتْ بقايا الشوقِ فينا تُحاصرُنا وتطرقُ كُلَّ بابِ؟
أما زلنا نُفتشُ عن زمانٍ تَوارى في المدى مثلَ السرابِ؟
لقد كُنا نُحيلُ الصمتَ حُباً ويُزهرُ حُلمُنا في كُلِّ غابِ
فلا تحزنْ فإنَّ الشيبَ نورٌ يُضيءُ العمرَ في ليلِ الغيابِ
سيبقى فيكَ قلبي كُنتَ طفلاً يُغني للرياحِ وللسحابِ

جواب حلو عل شعر السابق 🔥


غريبٌ أنتَ في عينِ الليالي
تُكابرُ جرحَنا خلفَ الضبابِ
فدعني أحضنُ الشيباتِ دعني
أقبلُ في المدى وجهَ السحابِ
أرى فيهِ حكاياتٍ تمادتْ
وأزمنةً مضتْ خلفَ الضبابِ
فلا تهتمَّ بالأقوالِ كُلاًّ
فأنتَ لعينيَ سرُّ الشبابِ

كل انسان بداخله أشياء يريدها بقوة وتشوفه يحاول حتى يحصلها وتكون شاغله تفكيرة 24 ساعه
ويمر الوقت وما يحصلها او ياخذها ويموت الأندفاع ويكوم يشوفها شي كلش عادي
وحتى ممكن يستغرب انو ليش جان يريدها لهاي الدرجه !

هنا نستنتج انو احنه ما نتحكم بتفكيرنا وإنما نخلي عواطفنا تتحكم بالتفكير ف نكوم نحس انو قراراتنا ناتجه عن تفكير و قناعة بس هي بالمحصلة ناتجه من اندفاع عاطفي مزيف


ممكن يكون هذا الشي انسان !


فيصل الأوحيد 🖊️

كلنا لازم نكون على درايه انو شكد الحياة قصيرة وشكد ما الها قيمه
من نصفن ونفكر بعد الموت اكو جنه واكو نار وأعمالنا بالدنيا هيه تحدد احنه وين راح نكون بعد رحمه رب العالمين

هاي السوالف كلها نعرفها
بس محد بينا فكر انو بعد الموت اكو خلود
زين شنو الخلود !؟
انو نكون بالجنه إلى الأبد
زين شلون إلى الأبد !
يعني لا اكو مرض ولا موت ولا نهايه

التفكير بالخلود بصورة عميقة راح يسوي عندك إيعاء ذهني تحس دماغك يوكف وهو فعلاً شي عضيم جداً انو انت تخلد !!

عاد هنا راح ندرك مدى تفاهة الدنيا
وليش اتعارك ويه شخص
ليش أشيل بقلبي عل شخص
ليش احاول انتقم من شخص
ليش ما اصلي ؟؟
ليش ما أصوم ؟
ليش ما اكون خوش (وكلمه خوش صعب الأنسان يحصلها )
ليش ما اكون مسالم ؟ وليش وليش وليش ……

وهيه الدنيا كلها مجرد وسيله ايام معدودة والغايه هيه الخلود بالجنه

نحتاج نغير افكارنا اتجاه الحياة 🫱🏻‍🫲🏾



فيصل الأوحيد 🖊️

كل شخص قريب مني وأحبه اكيد سامع مني هاي الجمله ( ان شاءالله نلتقي بالقمة )

شنو هيه القمة؟

رغم النِعم الي احنا بيها والحياة الي عايشيها وفضل الله سبحانه وتعالى علينا هواااي

لكن نبقى نتقدم ونبقى نحاول نكون افضل
افضل من نسختك هسه مو افضل من الأشخاص المحيطين بيك لازم تبقى تطور من نفسك وتسعى نحو الأفضل بكلشي وتحاول تعيش حياة افضل من الي انت عايشها

واهم شي تسعى تكون قريب من رب العالمين لان هذا اهم طريق حتى تنجح بباقي الطرق ✨🫀

ف الهدف هوة القمه والقمه انو يوم عن يوم اكون افضل من الي قبله بكلشي


فيصل الأوحيد 🖊️

اُلله ربي لا أُشركُ بهِ شيئى

اليحب الگمر
ميگلب النجمات
مادام الگمر ما طاح متعلي

كل انسان يسعى لتحقيق شيء معين في هذه الحياة او أشياء عده
ليس النهايه دائماً سعيدة وليست كما نرغب دائماً

لكن يجب انو تكون على درايه اني مجرد السعي للتحقيق فهو إنجاز يُفتخر به

لماذا ؟

لان السعي يتطلب روحاً قويه صلبه وليس كل انسان يمتلك هذه القوه ف امتلاكك القوة هوة نجاح بحد ذاته …


فيصل الأوحيد 🖊️

شنو ترجع للبيت منتهي تعبان بس تريد تلزم المخدة
تتمدد يصير عندك ارق وما تنام للفجر

هذا السيناريو يحدُث يومياً 🗿💔

ضَاقَتْ فَلَمَّا اسْتَحْكَمَتْ حَلْقَاتُهَا ... فُرِجَتْ وَكُنْتُ أَظُنُّهَا لَا تُفْرَجُ

اول مرة بحياتي ارجع من المحل للبيت بهيج وقت ✨✨

شعور غريب والله

ليش يوم الخميس يكون مميز وبي راحه نفسيه وكلنا ننتضرة ؟!!

هل لأنو هوة ليلة الجمعة والجمعة مباركه

ام لأنو الجمعة الصبح كلها ما عدها شغل ونايمه

اشتياق كبير لهذيج اللحضه وهذاك المكان الي اخذت بي هاي الصورة ✨✨

وبقدرِ ما في هذه الدنيا الكئيبةِ مِن مللْ
شكراً لحبكِ
كان أجملَ ما حصل..

#حذيفة_العرجي

رَحِمك الله يا قرة عيني ويا فَخري ويا عزوتي
رَحمك الله يامن كنت سنداً

الف الحمدلله صيتك لحد الأن يُذكر وبنيت النا بناء ما ينهدم وكلنه نمشي عل خُطاك

جان يكلي فيصل ياب كلمه خوش مو سهله من يكولون فلان خوش هاي تجي بعد تضحيه وبعد زرع وبعد مواقف الأنسان يزرعها وياب فيصل اليزرع يحصد أبقى أزرع طيب وابقى اشحذ طيب كتله جد شنو اشحذ طيب
كال إصلاح ذات البين يحتاج واحد يشحذ طيب من طرف حتى يحل مشكله وربي فضل عليه انو اكون سبب احل مشاكل الناس

وكلي فيصل ياب لا تصطدم بالمجتمع خليك سهل تعيش مطمأن

وجان يسولف للطرائف يكول اني وجدتك 50 سنه سويه ما صارت مشكله كتله جد شلون
كال إذا الأكل مالح اكللها ضيفي جك ماي
واذا الجاي فاهي اكللها خلي شكر واذا فديوم ما سوت أكل اكللها اني مسوي حُميه غذائية (قصدة روجيم) يكلي ف الحياة تمشي ابني واليترك طيب بين الناس بعدين الله يرحمه لان ربك كال السنه الخلق بأقلام الحق

وجان من يكعد يشرحلي عل عشاير يكلي احنه العائلة السامرائية وكلنا ولد عم وما نفرق بين عشيرة وعشيرة
وفيصل ياب كل بستان بي دغل لابد اكو أشخاص مو خوش هذمي نتجنبهم مو خوفاً بس حتى ما يخربون سلامنا




بعد عيني جد كل جمله جان يكولها الها وزنها وثقلها

الله يرحمك ويسكنك الفردوس الأعلى يارب 🫀✨

17/9
بدايه سنه جديدة من حياتي
كل عام واني بخير يارب وكل عام واني أتقدم نحو اهدافي
اسأل الله انو يمدني بالقوه والصحة ويهديني لكلشي بي خير الي

الأيام تركض و السنين صرنا ما نحس بيها ما متخيل انو اني أتممت 23 سنه لكن الفضل لله انو اتذكر واستذكر هواي أشياء زينه سويتها بحياتي وان شاءالله اكون مُرضي رب العالمين اولاً و ابويه وامي ثانياً واكون خفيف ضل بحياة كل الي عرفوني واكون تركت اثر طيب بيهم

احب نفسي للأبد 🫱🏻‍🫲🏾

الانشغال نعمة خفية تحمل في طياتها هدوءا داخليا لا يراه إلا من تذوق مرارة الفراغ فهو ليس مجرد امتلاء للوقت بل هو ستر للروح عن التشتت وحماية للعقل من الغرق في دوامة الأسئلة الثقيلة حين ننشغل بأمر نافع نتخفف من قسوة التفكير المستمر في ما لا نستطيع تغييره ونجد أنفسنا نزرع في أرض أيامنا بذورا صغيرة تتحول مع الصبر إلى ثمار تمنحنا معنى أجمل للوجود إن الانشغال يعلّمنا أن الحياة تتحرك دائما وأن أجمل ما نصنعه لأنفسنا أن نتحرك معها لا ضدها

فيصل الأوحيد 🪶

طبعاً كاعد اگلب بالريلز بالأنستجرام ف طلعتلي مقوله عميقة ل احمد توفيق
گال (لو لم أُجازف و أقترب كُنت سأضلُ اعتقد بأن شيئاً جميلاً فاتني )

صفنت بيها ولكيت بيها شي من الواقعيه

رغم انو هواي قرارات نأخذها بحياتنا حتى ما نِقدم على أمور مُعينه تكون ناتجه عن تفكير عميق
لكن اكو هواي أشياء ما تدرك خطورتها او سوءها اله تقترب منها او تجرّبها

بالمحصلة إذا عشت ايام او مواقف او لحضات حلوة ف اشكر نفسك لان جان قرارك او تعيشها
اما إذا عشت ايام و لحضات مو حلوة ف لا تندم واشكر نفسك انو جانت درس او تجربه خلتك تعرف انو هيج لحضات مو حلوة

لا تندم عل شي انت اختاريت تعيشه

فيصل الأوحيد 🖊️

في وصف دقيق ومبهر عن الخير والشر يقول الكاتب البرتغالي افونسو كروش:
"لا أستطيع أن أقول عن إنسان أنه طيب إلا إذا كان لديه القدرة على فعل الشر ولم يفعل.
يجب أن يكون لديك الخيارات لتعرف حقاً من أنت"