خـايف من نظرة الناس ليك؟
خايـف تفشل في حياتك؟
خايـف تكون انسان عادي وجودو ما مهم؟
خايـف تكون وحيـد؟
خايـف وخايف وخايف! !!!

… ممكــن توقف قرايـة البوست دا وتفكر شويه ليييييه انت خايف؟
.
.
.
نواصــل : -
ربنــا اداك روح وح يسألك منها في يـوم
فليه تشقيها وتعذبها معاك
للاسف نحن في مجتمــع كل همـو تنمـر واحبـاط ويحسسوك انك م مهـم (الا من رحم ربي)
… في حاجات ربنا ميزك بيها عن غيرو وزي ما اصابع اليد ما واحد معناه وجهات النظر ما واحد
ما تخلي زول سلبي يأثر عليك لانو مـر بتجااارب خلتو يكون سلبي فبعكس الجواااو عليك
ونفس الزول الايجابي بعكس ايجابيتو عليك
لكن انت بيدك تحدد عايز شنو في حياتك
عايز تكون شنو
؟!!!!

اولا من الصبـاح لمن تصحـى خت في بالك انو اليـوم ح يكون حلو وظابط زي م انت عايز واحمد ربنا ع نعمة انو رد ليك روحك ... احمد ربنا ع ابسسسط حاجه
نعمـة انك بتتنفس وبتحس وممكن تتحرك
احمد ربك انـك بين اهلك او بين ناس بتحبك
احمد ربك ع كل كبيره وصغيــره
ح تلقى نفسك جذبت كل الطاقه الايجابيــه

لو صحيت وبقيت مركز في الحاجات الناقصاك ما ح تحس بنعمة الحاجات العندك

… طيـب انـت ح تثق في نفسك كيف ؟؟؟؟
- قيم نفسك واتقبلها بكل المساوي الفيها
- عندك قيم ومبادئ راجعها وشوف الصاح واصل فيو وعدل الخطأ
-اذا فشلت ما توقف، وااااصل واصل لانو الفشل الحقيقي هو الاستسلام
-فكر بايجابيه اذا عملت الحاجه الفلانيه ونجحت شعورك شنو (التصووور)
-فكر بايجابيه اكتر واتأثر بالايجابيات
-احترم نفسك عشان غيرك يحترمك

… كليمنت استون الاب الروحي قال
"ما يدركه العقل ويعتقده يمكن ان يحققه عن طريق اتخاذ موقف فكري ايجابي "
وسيرفانتيس قال
"لا تحب ما انت عليه، بل حب ما يمكن ان تكون عليه"

………… خايف تكون وحيـد ليييه؟
ربنا معاك معناه انت ما وحيد
نفسك معاك معناه انت ما وحيد
شوف اقول ليك حاجه طووول ما انت بتخاف من حاجه ح تحصل ليك دي حاجه بديهيه يعني
وعايزه اقول حاجه تانيه كمان
اووعك تحس انك مخلوق عادي، لا ابدا
انت مخلوق ربنا اداو عقـل مفكر ما تابع
واقلب الطاوله معاي وخلي في بالك انك ما ح تخسر زول بالعكي انت تتخسـر
اي زووول وجودو مصدر ضيق ليك اتخطااااو
اي زول وجودو ما اساسي وحاسي انو بحبطك اتخطااااو
اي زول حاسي انو ماااا زولك بالمختصر المفيد يعني اتخطاااااو

وما تسعى عشان تكسب قلوب الناس، خلي افعالك هي البتعكس كدا
ح تلاقي حولك ناس شبهك بالظبط

واتذكر انو ااااي حاجه محتاج ليها هي جوااااااك 💚✨💚


#فـــاديــه محمــد الخالــدي

فـي ذات صبــاح أستيقظـت على هيئة رثــه أجرجر أزيال الحزن المكدس علـى قلبي
ثم أقـف على حافـة أصابعـي على تلك الغرفه التي تسمـى مطبخ
وضعت الركـوه ونظراتــي مصوبـة علـى ذرات المـاء وهي تتدافع بعضها نحو بعـض كأنها هنود حمـر يتصارعـون للبقاء على قيـد الحيـاه
لكن ما داخلـي يفوق مقياس ريختـر للزلازل فبعض الذكريات تخرج من العقـل أمنـه لكنها تعود للقلـب طعنـه
ذهـبت إلـى باحـة المنـزل وبيـدي كتـاب (حليـب أسـود )
ما الذي تقصـده إليـف شافاق بقولـها "الظروف تدرسنـا كيـف نولـد حشـدآ غفيرآ من الدلالات بكلمات قليله " ؟!!!!

فإنـي بلغـت من الحـب عتيـآ ولم يغدو النحـيب مبـاح أمام انعكاسات النافـذه
وضعـت الكـتاب وأنا أتامـل أزهار الياسميـن حولـي، لماذا خصصت كل إهتمامي بها
أيعقـل لو كنت موضعها وأستقبلت إهتمامك أصبح بجمالها ورونقها ؟

إليــك أكتــب : -
لـو عشـت حيـاتـي معـك وأنجبنـا أطفال يحملـون ملامحـك وسذاجتي … يركضـون في فنـاء المنزل او دعنـي أقـول في زوايا حبنـا السرمـدي، هل يبدو إليك المشهـد لطيـف ؟ !!!

إليــك أكتـب :-
السفـن تبحــر وظننت أن الشاطئ يحمل أثار أقدامنا لكنه لفظها عند اول مـوج
مثلك تمـامـآ لفظـت حبنـآ عنـد أول مشكلـه بيننـا

إليــك أكتــب: -
الليــل مربوط بالظـلام ،وسرعان ما يتخلله شـروق شمـس تربت على الطيـور السكينـه
لكـن ماذا عن ظلام حيـاتي بدونك، هـل أنتظـر شروق حبك يربـت علـى ضحكتـي بسكينـه؟ !!!

إليـك أكتـب: -
في ذات بــوح أخبـرتني عن جمـال عيني وكم تعش لمعتها عند النظـر اليـك
لـو كنـت أمامي أيها الغائب الحاضـر، ستعشق الهاله السوداء التي تحفها؟

اليـك اكتـب: -
إن ما بداخلي لا تحتويـه دفاتر ورقيـه او إلكترونـيه
ما بداخلي مبعثــر يشعرني بغربــة ذاتيـه

وبعـد :-
أعلـم أنـك تقـرأ وتعـلم أنـك المقصود لكـن لا عليـك عزيـزي، سيــأتي يـوم أواجـه قلبـي وأتبـع العقل فيخزلني وسأحبــك أكـثـر فشخـص مثلك لا يليق به غير الحـب الأبـدي

#فـــاديــه محمـد الخالــدي

قـــالـــت : -
مـــريـت بفتـره صعبه في حياتي او الانا كنت مفتكراها صعبه ما عـارفه
كميـة ضغوطات خياليـه وكلما اطلع من مشكله بلقى نفسي دخلت في مشكلـه
بعـدت من النـاس وع طول سرحانه وبالي بعيـد …
وفي نص الجوطـه دي كان هو معـاي لكن انا البعدت نفسي منو وبقت علاقتي معاو عباره عن نقاش من طرفي، والغريبه هو ما بدي ااااي ردة فعـل
بالعكس متمسك اكتـر
وكل يـوم بقـول ليو
*نحن نسيب بعض ما ينفع نكمـل
#منو قرر؟
*انا قررت
#ايواااا والسبب؟
*ما قادره اخليك قريب مني … كل يوم نقاش وكل يوم مشكله جديده … ح تستحمل لمتين؟
#ما تخليني قريب ما مشكله، بس انا ح اخليك قريبه … والنقاشات عاديه ، حصـل يـوم شكيت ليك؟
*ح يجي يوم تزهج وتخليني
#بتجيبي الكلام دا من وين !!!! ، انا ما لقيتك بالساهل عشان اخليك لاسباب ما تستاهل … يابتـي انا تعبت عشان اصـل لعيونك
*كلكم بتقولو كدا ومن اقل موقف ح تتسحبو
#مستعد اسحب كل المواقــف وما افكر لحظه اني اتسحب من حياتك، برجع بكرر اني ما لقيتك بالسـاهـل
*طيب بالنسبه للاغلاط الكتيبيره العملتها في حقك؟
#بالنسبه لي ما شايفها اغلاط وياستي اغلطي زي ما انتي عايـزه كفايـه اني واثـق فيـك، ح اسامحـك ما دام فيني نفس داخل وطالع
*ح تكون معاي يعني؟
#ح اكون في كل خطواتك وكل ضحكاتك وزعلك ونرفزتك … ما عندي غيـرك وح اسعى لسعادتك
*ليه بتحبني للدرجه دي؟
#لانك مخلوقه عشـان تتحبـي … دعواتي استجابت لمن بقيتي لي
*يعني انا بهمك صح؟
#هههههه بس كدا !!! انتي كل شي بالنسبه لي … والله بتهمني سعادتك اكتر من سعادتي … بخاف عليك من نفسي قبل الناس وبخاف ع زعلك ولو يوم ضايقتك بالغلط … بهمني اشوفك محققه طموحاتك ومبسوطه … طيب اقول ليك حاجه؟ انا فخـور بنفسي لاني وصلت ليك

…………… ومابيـن كل الناس اخترتـو هـو لانو مميـز وما حصـل حسسني انـي تقيله عليو او فارضه نفسي … وجودو في حيـاتي اكبر نعمه … اهتمامو ومسامحتو لـي ع اكبر اغلاطي بتخليني احبو اكتـر …💚

#حبـو بعـض 🌸

#فـــاديــه محمـــد الخالـــدي

عقـارب الزمـن تشيـر الى اقتـراب ظـلام الليـل
النـوم يحمـل هـم النعـاس والعكـس
فـي كل ليـله أسمـع صـراخ مبحـوح وخربشـات على زجـاج نافـذتي لولا الشـك لقـلت اطـار سيـاره يحتك بقـوه تفاديـآ لوقوع حادث سيـر

حــادث ؟؟؟؟
يا لغرابـة الكلمـه ومن يسمعها يشعر بالإلفـه
منـذ أعـوام وتضـاريس الاوهـام تتصارع مع قوقعـة الواقـع
بئــر يلتهم الماره … كهـف يبتلع من يدخله بفضـول … شجـرة عملاقـه تخنق من يستظل بهـا … قـط يختلـس النظـر لبرهـة من الزمن ثـم يقفـذ في وجهـك … أشبــاح تتناوب فيفزع العقـل منها ليتهم بالجنـون

الــجنــون ؟؟؟؟؟
ضحكـات تتعانق في ظلال الشموع الحمـراء لتجعل رمـاد الخـوف يشيـر الى اقتـراب الاجــل بخـطوات بطيئة

خـطوات بطيئة ؟؟؟؟
تسمع الاذن خطوات يخيـل انهـا خشبيه، ربما لمجهول مبتور الساقين مصطنعه
يجـر خلفـه كتلـه نحاسيـه مدببـة باسنـان حاده، يرتضم بها رأس فريستـه بوحشيـه
تغلق الاعيـن مجبـره وقطرات العـرق تتسلل من مسامات الجسـد المرتعـش … الخـوف يغـزو الاورده ودقـات القلب ترتفع مع سرعـة التنفـس
انـه يحبـو نحـوي، لا استطيـع الحركه ما الذي حـدث لـي واين انا
؟؟؟؟؟

هـل تـؤمن بوجـود الارواح ؟ واذا كانت اجابتك لا، فانتظـر قـدومي الليـله

#فـــاديــه محمــد الخالــــدي