ما ذگرتچ الا والدمعات صبت ..
ما ذگرتچ الا والسهلات صعبت !
عود سيجتچ بروحي
والمنايا عليچ مدري شلون طبت ..
- كاظم اسماعيل الگاطع

خسرني وگدر ينساني
خسرني الجان لو صدفه يدگ الباب
انه واهلي واحد يسبگ الثاني
وما الومه لان ما حاس بالطيبه
صعبة يعيش وانه ادري
تخاف جفوفه من الضلمه الـ بجيبه ..
شلون انطاه گلبه وانه اتلوه ؟
گبل اضحك لوحدي وگالوا شصاير
واگللهم ضحك حسيته هستوه !
وقبل لا يحجي عينه تسولف غيابه
جاب من المحطة وداع
وبعدهه حرورة الجنطة ؏‎ ثيابه ..
وجانت كسرتي فذه !
رض بضلوعي شيدگ گلبي اتأذه !
ومثل الماتوا اهله
شيطلب الدفان اگله اخذه ..
- عزت عباس

انه احجي هاي المره وانتِ تسمعين
گالولي مو متخطيه ، جاي تحبين !!
هم گاعد تگليله قلل تدخين ؟
لمن يسئلج قبلي حبيتي انسان
بس مو بگدك هيج راح تگولين ؟
بكل فلم تابعته انتظر دورج بي
بگد ما عليه بكلشي جنتي تمثلين ..
- محمد قصي

الوحدة ، سلوك يلازمك من تفتهم حجم الخسارات
من تفقد احساس الطعم باخر بدايات
لانك فاقده بـ اولى النهايات ..
الوحدة ، حذر من موقف يذكرك
هروبك من تفاصيل الوداعات الاخيرة
شرود عيونك من عيون ما مستوعب تكسرك ..
- زيد الهاجري

الي ما سامع فلسفة زيد
عمره ليگول اني سامع شعر

"أعرف جيّدًا تلك اللحظة التي تأتي بها الصفعة من مكان إيمانك، الصفعة التي تصبح بعدها شحيح الثقة."

لگيتك نار تسعر واعتنيتك عود
ورسومي الحرگ خرب معانيهن
وبكثر ما غورگن بالدمع ردن طين
جا ذني الشرنك تالي تعميهن ؟
عايف چم عطر ومگابلك دخان
ولك ذني المخبل يقتنع بيهن ؟
- علي سعدون

متونسين وجرحي يناشغ
وخنجرهم يضحك لذنوبه
جا يمته العباس يشور ؟
كلش طالت ، مامش حوبه ؟
- عبد الكريم القصاب

ما تجين ؟
شضل بعد ولمن بعد تتأملين ؟
انتحرت النجمه بسمانه
وانذبح زاجل هوانه
واعلن البلبل حداده
وطائر النورس حزين
ما تجين ؟
بيه واهس سندباد
وذاك جتفه الماتعب من ياسمين
- ابراهيم الرائدي

الروح تدعي من ذنبها
كون تتغير حياتي
( مثل ما تتغير الناس الاحبها )
- محمد كريم

هلبت تقتنع ترجع
اريد ابچيلك مربع
اريد تشوفني من امشي
اطيح بالدمع رمشي !
عظيمة ايام هجرك ، ياهو الها ؟
سنة بوداعك يسكتون بيه ..

مطبور راس الكرار يا فاطمة الحزينه ..

غلط كل احنه مفتهمين
علي ما موتته الطبرة
علي ميت قبل هالضربة ، من فترة
گله شلون ؟ ، گله اسمع
علي مو تدري بي فلاح ؟
الفلح تزرع ورد و تداريه و تكبرة
و علي عكس الفِلح كلهم ، دفن زهرة
- باهر الجنديل

تگلي انساني هسه وذكرياتك وين ؟
تفاصيلك ، عيونك گلي شنسيهن ؟
شينسيني ولك كد ما عشت وياك
بلابل بيتكم حافظ اغانينهن !
- علي سعدون

عوف الشلونك خاب مو زين
عين بصوركم وابچي تك عين
طردة الباب تريد رجلين ..
بالدين مامش نوم بالدين ؟
ولا ضل علاج ولا علگ فاد
گاطع صلاتي وگاطع الزاد
ينعاد نفس اليوم ينعاد
يوميه اشر وجوه المخاد
- مالك الباوي

لتهدد بفرگه وهالثقه ضمها
بحياتي انتَ ادخلت دخلت شضية بعين
تضل ، تطلع مضلمها ..
- كرار سعيد

كون تجمعنه الصدف باقرب وقت
صار تقريباً سنة ما ملتقين ، ماتحس تأخرت ؟
- سامي الموسوي

مجاي اگدر اتحمّل وضعك المُزري
تره المفروض متونسين الـ بعمري
اذا ما تدري ، شي يوجع
و الأكبر لو چنت تدري ...
- عبدالله بيان

شكثر حليان بغيابي
شكثر تعبان من بعدك
واكو شامه شفتها بناس خوانين
گلي شجابها لخدك ؟
- منتظر فلاح