Поўнае відэа размовы Мікалая Латышонка, памочніка Аляксандра Лукашэнкі, з пратэстоўцамі ля Палаца Незалежнасці

Пра курс долара і пратэсты, смяротнае пакаранне, крымінальныя справы сярод сілавікоў, Каардынацыйную раду. Ёсць моманты, калі Латышонку проста няма чаго адказаць на рэплікі людзей. Ён стаіць, маўчыць і чакае пытання, па якім усё ж сможа хаця б нешта сказаць.

https://www.youtube.com/watch?v=nPKaWv5kk9c

Кароткія высновы рэдакцыі @euroradio. 30 жніўня, безумоўна, можна занесці ў актыў пратэстоўцам:

— нягледзячы на дрэнны прагноз надвор'я, іх сабралася відавочна больш, чым у мінулую нядзелю;

— сілавікі не пусцілі пратэстоўцаў на плошчу Незалежнасці, спрабавалі рассеяць па дарозе і нават зладзілі хапун побач з гатэлем "Мінск". Але пратэстоўцаў было так шмат, што АМАП і ўнутраныя войскі вымушаныя былі зняць усе ланцугі, якія стрымлівалі марш;

— 23 жніўня да плошчы Дзяржаўнага сцяга пайшлі тысячы; 30 жніўня — дзясяткі тысяч;

— ля Палаца Незалежнасці пратэстоўцы сустрэліся з вадамётамі і машынамі "Рубеж", але не сталі дэманстраваць сілу і проста размаўлялі з байцамі АМАП;

— Аляксандра Лукашэнку блізу 16:00 сфатаграфавалі з аўтаматам — нібыта ён ішоў у бок пратэстоўцаў. Але з тэрыторыі Палаца Незалежнасці ён так і не паказаўся;

— да незадаволеных людзей выйшаў "парламенцёр" — Мікалай Латышонак, памочнік Лукашэнкі па агульных пытаннях. Ён спрабаваў упэўніць мітынгоўцаў, што Лукашэнка ўсё роўна застанецца і пратэсты трэба згортваць. Але людзі не згаджаліся, і чыноўнік сышоў, махнуўшы на іх рукой.

— абласныя гарады: Брэст, Гродна, Магілёў — таксама выйшлі на шматтысячныя пратэсты.

Але былі і негатыўныя моманты.

— сітуацыя на праспекце Незалежнасці, калі людзі, абураныя гвалтоўнымі затрыманнямі, усё ж не стрымаліся і ўступілі ў канфлікт з сілавікамі;

— 140 затрыманых: магчыма, гэтыя людзі на нейкі час выбываюць з пратэставага руху;

— улады па-ранейшаму не жадаюць пачуць пратэстоўцаў. Мікалай Латышонак выйшаў да іх не для таго, каб выслухаць, а для таго, каб выказаць пазіцыю, якую, на яго думку, усім давядзецца прыняць.

Мінск. 15 хвілін таму ад Палаца Незалежнасці з'ехала і калона БТРаў.

30 жніўня ў Мінску — чацвёртую нядзелю запар — прайшла масавая акцыя пратэсту. Сілавікі ад пачатку спрабавалі перашкодзіць правесці яе, але людзей сабралася так шмат, што ні вадамётамі, ні калючым дротам зрабіць нічога не атрымалася. Карэспандэнты @euroradio увесь гэты дзень працавалі для вас у самых гарачых кропках. Вось наш выніковы відос — такою мы запомнім нядзелю, 30 жніўня 2020 года!

https://youtu.be/vdxMMqDlarM

"Захапілі свядомасць", "не разумеюць": улады тлумачаць масавыя пратэсты тым, што беларусамі лёгка кіраваць

Увечары 30 жніўня дэпутаты і чыноўнікі актыўна выказваліся ў дзяржСМІ пра масавыя пратэсты на вуліцах беларускіх гарадоў. Дэпутат Палаты прадстаўнікоў Марына Лянчэўская патлумачыла жаночы пратэст — вялікі марш, якім жанчыны прайшлі па Мінску ў суботу — тым, што імі маніпулююць, а яны гэтага не разумеюць.

"Жанчыны нават не разумеюць таго, што збольшага імі маніпулююць. Лічаць, што яны самастойна выйшлі, прыгожа сталі з кветкамі. Але, на самой справе, гэта маніпуляванне, безумоўна, іх свядомасцю".

Начальнік Навукова-даследчага інстытута Узброеных Сіл Беларусі Віктар Тумар даў інтэрв'ю праграме "Галоўны эфір" на "Беларусь 1". На яго думку, людзі ва ўзросце да 30 гадоў, якія "карыстаюцца гэтым інтэрнэтам", робяцца "палівам рэвалюцыі".

"Калі захапілі свядомасць грамадзян пасродкам телеграм-каналаў, у якіх асвятлялася негатыўная інфармацыя супраць сілавікоў, супраць дзяржслужачых, супраць журналістаў, не кажучы пра тое, што неабходна зрабіць, каб гэты негатыў прыбраць, пасля гэтага яны ўключылі пэўнае кіравальнае ўздзеянне", — заяўляе Тумар.

"Нашымі людзьмі стала лёгка кіраваць", — дадае вайсковец.

Уночы затрыманага футбаліста "Крумкачоў" на хуткай завезлі з міліцыі ў лякарню

Па адных звестках, у Сяргея Казекі зламаны пазваночнік, па іншых — шматлікія траўмы: удар правай почкі, закрытая траўмы жывата, гематомы па ўсім целе. Ён у 4-й гарадской клінічнай лякарні.

Нагадаем, учора клуб паведаміў, што ў Мінску ў раёне Гарадскога Вала затрыманыя футбалісты "Крумкачоў" Сяргей Казека і Павел Расолька. Хлопцы вярталіся з трэніроўкі. Іх адвезлі ў Ленінскі РУУС. Папярэдне, іх падазраюць у нападзе на міліцэйскі аўтамабіль.

⚡️ Салігорск. Стачкам "Беларуськалія" паведамляе пра затрыманне аднаго з арганізатараў забастоўкі Анатоля Бокуна.

⚡️Мінск. Аліна Корбут звольненая з пасады рэктара ўніверсітэта культуры і мастацтваў па ініцыятыве наймальніка — Мінкульта.

Гэта @euroradio пацвердзілі ва ўніверсітэце. Хто будзе выканаўцам абавязкаў, пакуль невядома.

Шыкоўная інфаграфіка, усё расстаўляе па сваіх месцах. Паглядзіце, якія сцягі фашысты выкарыстоўвалі ў розных частках былога СССР падчас Другой сусветнай вайны і якія сцягі гэтыя краіны выкарыстоўваюць цяпер.

Думка пра тое, што беларускі нацыянальны сцяг нечым апаганены, — штучная і культывуецца выключна ў мэтах прапаганды. Усе нашы постсавецкія суседзі без праблем выкарыстоўваюць свае гістарычныя сімвалы.

Заблакаваны ў Беларусі ў мінулую пятніцу сайт Naviny.by пераехаў на новую пляцоўку. Цяпер ён адкрываецца па адрасе https://naviny.media.

Заблакаваны тады ж сайт "Нашай Нівы" не працуе, рэдакцыя вырашыла сканцэнтравацца на сваім тэлеграм-канале @nashaniva.

З 9 жніўня ў Беларусі быў абмежаваны доступ больш як да 70 інфармацыйных рэсурсаў і VPN-сэрвісаў. У тым ліку і да нашага сайта Euroradio.fm. Аднак ва ўладаў не атрымалася спыніць Еўрарадыё. Мы пераехалі на "люстэрка" https://euroradio.pl/. Наш тэлеграм-канал @euroradio з 9 жніўня вырас у 8 разоў, а ютуб-канал Euroradio Live — у тры разы.

Пакажыце гэтае паведамленне сваім сябрам, распаўсюджвайце ў чатах у Viber і іншых месенджарах, каб яшчэ больш людзей атрымлівала доступ да праўдзівай інфармацыі пра тое, што адбываецца ў Беларусі.

Дзякуй, што вы з намі!

"Ніякіх каментароў нідзе. Ні сваякам, ні наогул. Вы нічога не бачылі, нічога не ведаеце!"

"Як у фільме "Людзі ў чорным": дастаць акуляры і — піў!"

Слухачы Еўрарадыё перадалі ў рэдакцыю відэа, запісанае пад вокнамі ўчастка для галасавання №9 у Партызанскім раёне Мінска. Запіс зроблены 9 жніўня, у асноўны дзень галасавання на беларускіх прэзідэнцкіх выбарах.

https://euroradio.pl/i-zabyli-usyo-yak-u-lyudzyah-u-chornym-vyasyolaya-narada-paslya-vybarau

У "Комсомольской правды в Беларуси" новы галоўны рэдактар. Замест Андрэя Ляўкоўскага, які кіраваў рэдакцыяй апошнія 10 гадоў, прыходзіць Марына Бунакова. Яна была рэдактарам "KP.RU в Хабаровске", потым працавала ў асноўным офісе ў Маскве.

https://euroradio.pl/galounym-redaktaram-gazety-kp-v-belarusi-stala-rasiyanka

Мікалай Лукашэнка забраў дакументы з Ліцэя БДУ. Супрацоўнікі навучальнай установы пацвердзілі гэта @euroradio на ўмовах ананімнасці.

У афіцыйным каментары дырэктар Ліцэя БДУ Ігар Варакса не пацвердзіў і не абверг нам гэтую інфармацыю.

"Мы не каментавалі, калі пайшла інфармацыя, што Мікалай Лукашэнка нібыта збіраецца ў нас вучыцца. Адпаведна, і цяпер няма сэнсу ў каментаванні. У Ліцэй ён паступаў, дакументы прыносіў. А што адбывалася далей — толькі ў асабістым кабінеце вядома тым, хто паступаў.

Мы ніякія вынікі [іспытаў] не публікуем. У нас паступала 1739 чалавек, і мы не распавядаем ні пра каго".

Ліцэй БДУ — наймацнейшая ўстанова сярэдняй адукацыі ў Беларусі. Сярод яе вучняў і выпускнікоў — шэраг пераможцаў міжнародных Алімпіядаў па школьных прадметах.

Пры канцы жніўня, калі скончылася ўступная кампанія ў Ліцэй, з'явілася інфармацыя, што туды паступіў малодшы сын Аляксандра Лукашэнкі. Ён абраў клас біялагічнага профілю.

Сотні тысяч на пратэставых акцыях у Мінску ужо сталі звыклай з’явай. Як і дзясяткі тысяч на маршах пратэсту ў іншых буйных гарадах краіны. Але пратэсты, як гэта ні дзіўна, закранулі і малыя гарады. Пра якія кажуць, што там усе адно аднаго ведаюць.

Наколькі шырока закранулі пратэставыя настроі малыя гарады і як там людзі свой пратэст выяўляюць? Ці адрозніваецца затрыманне ў сталіцы ад затрымання ў Нясвіжы і якое стаўленне да затрыманых у мясцовых РУУС і судзе? Грамадская салідарнасць — ці ёсць яна і як выяўляецца?

Адказвае Анжаліка Мельнікава.

⚡️ Літва, Латвія і Эстонія ўвялі супольныя візавыя санкцыі ў дачыненні да беларускіх афіцыйных асоб, адказных за дапушчаныя на выбарах парушэнні і гвалтоўнае задушэнне пратэстаў. Публікуем поўны спіс — і хто ёсць хто:

Кіраўнік Беларусі і Адміністрацыя прэзідэнта

Аляксандр Лукашэнка, Віктар Лукашэнка, Ігар Сергеенка, Максім Рыжанкоў, Вольга Чупрыс, Дзмітрый Крутой, Генадзь Богдан.

Цэнтрвыбаркам

Лідзія Ярмошына, Вадзім Іпатаў, Алена Дмухайла, Святлана Кацуба, Ігар Плішэўскі, Алег Сліжэўскі, Ірына Цалікавец.

Сілавікі

Генеральны сакратар Савета бяспекі Андрэй Раўкоў
Генпракурор Аляксандр Канюк
Старшыня КДК Іван Церцель
Старшыня КДБ Валерый Вакульчык
Старшыня Следчага камітэта Іван Наскевіч і трое яго намеснікаў — Аляксей Волкаў, Сяргей Аземша, Андрэй Смаль
Міністр унутраных спраў Юрый Караеў і чацвёра яго намеснікаў — Генадзь Казакевіч, Аляксандр Барсукоў, Сяргей Хаменка, Юрый Назаранка
Іншыя людзі са структуры МУС: Раман Мельнік, Іван Кубракоў, Алег Шаблыка.

Рэдактар Еўрарадыё Зміцер Лукашук трапіў у шортліст журналісцкай прэміі "Вольнае слова". У намінацыі "Інфармацыйныя жанры" адзначаны яго праект "Кандыdating".

Тут поўны спіс галоўных тэкстаў беларускай журналістыкі за 2020 год па версіі Беларускай асацыяцыі журналістаў.

Дзяржаўны пагранічны камітэт не стаў каментаваць Еўрарадыё, якія прэтэнзіі мае да кіраўніка Каталіцкай царквы ў Беларусі Тадэвуша Кандрусевіча. Удзень 31 жніўня беларускія памежнікі не пусцілі іерарха ў Беларусь, калі ён вяртаўся з адпачынку з-за мяжы.

Тадэвуш Кандрусевіч у публічных выступах неаднаразова называў грахом фальсіфікацыю вынікаў выбараў. На мінулым тыдні ён асудзіў блакаванне людзей у Чырвоным касцёле ў Мінску падчас разгону сілавікамі пратэставай акцыі на плошчы Незалежнасці.

https://euroradio.pl/kiraunika-belaruskih-katalikou-tadevusha-kandrusevicha-ne-upuskayuc-u-belarus

Каля паўгадзіны таму была затрыманая сяброўка Каардынацыйнай рады, медыятарка Лілія Уласава. Затрыманне ажыццяўлялі супрацоўнікі ДФР КДК. Адбыўся ператрус у яе доме.

Вядома, што сённа да 15-й гадзіны Уласава была выкліканая ў Цэнтральны РУУС па факце ўдзелу ў несанкцыянаваным мітынгу. У бліжэйшы час Каардынацыйная рада зробіць заяву з нагоды затрымання.

Пакуль жа ў прэс-службе КР адзначаюць, што Уласаву затрымалі напярэдадні паседжання пашыранага складу Каардынацыйнай рады, якое мусіць адбыцца ўвечары 31 жніўня.