Большая частка вагнераўцаў будзе накіраваная ў Афрыку. Пра гэта са спасылкай на крыніцы піша расійскі праўладны тг-канал, звязаны з вайсковымі структурамі.

"Са слоў крыніцы, калі асноўная маса ваяроў ПВК выязджала з Беларусі, камандзірам у строгім сакрэце было абвешчана, што адпачынак будзе доўжыцца 3 тыдні, а потым большая частка групы паедзе ў Афрыку", — піша тг-канал.

Гэта відавочна супярэчыць словам Лукашэнкі пра тое, што ў Беларусь прыедуць 10 тысяч вагнераўцаў. Але гэта лагічна: што ім рабіць у Беларусі, калі можна нават пасля забойства шэфа зарабляць неблагія грошы на абслугоўванні афрыканскіх дыктатур?

"Фармальная адсутнасць саставу (злачынства) — гэта не нагода ігнараваць парушальніка", — так ГУБАЗ патлумачыў, чаму карае за падпіску на "экстрэмістаў".

Сілавікі прызнаюць, што злачынства — не чытанне, а распаўсюд. Але ўжо тры гады як "не да законаў".

Мяжа ЕС з Беларуссю пакуль не будзе закрытая. Пра гэта заявіў кіраўнік МУС Латвіі Марыс Кучынскіс.

Міністры з Латвіі, Літвы і Польшчы сёння будуць ацэньваць сітуацыю на беларускай мяжы.

Так выглядае зал мінскага кінатэатра "Мір" пры спробе набыць квіткі на расійскі прапагандысцкі фільм "Сведка": усе месцы вольныя. Абурэнні Бондаравай не дапамаглі зацікавіць гледачоў.

Наскрозь фальшывы фільм з фантазіямі расійскай прапаганды пра "ўкранацыстаў" беларусам не патрэбны ад слова "зусім". А ябацькі не праяўляюць актыўнасці, пакуль іх не пачнуць цэнтралізавана звозіць на сеансы аўтобусамі.

У Беларусі распрацоўваюць вакцыну… для алкаголікаў. Як кажа кіраўнік "БелВітуніфарм", прэпарат — не супраць алкагалізму.

"Гэтая вакцына для таго, каб чалавек заставаўся чалавекам, не пагаршаючы якасць жыцця, ужываючы алкаголь. Гэта значыць, мы будзем змагацца з вынікамі п'янства, а не з самім п'янствам", — сказаў ён.

То бок, тое, што ў Беларусі зніклі лекі для хворых на анкалогію і ад гепатыту, нікога не турбуе. Галоўнае — вакцына для алкаголікаў.

⁉️ ПОШУК! У каментарах да аднаго з нашых стрымаў беларуска распавяла, што цалкам адмовілася ад расійскіх тавараў. Цікавы кейс, а ці ёсць сярод вас тыя, хто таксама правярае краіну вытворчасці і не набывае расійскае?

Напішыце нам пра свой досвед у акаўнт @euroradio_minsk, гэта ананімна!

"Адзінкавыя выпадкі", — так загадчыца кафедры інфекцыйных захворванняў ГДМУ Алена Казарэз адказала на пытанне пра колькасць новых выпадкаў COVID-19 в Беларусі. Лічбаў яна не назвала.

Новы варыянт каранавіруса, які прывёў да росту колькасці захворванняў у шэрагу краін Еўропы, ЗША і Азіі, па словах доктаркі, можа з'явіцца ў Беларусі ўжо ў бліжэйшыя тыдні. Але праблем ці пагроз яна ў гэтым не бачыць.

Пакарайце рэжым, а не народ — Святлана Ціханоўская выказалася з нагоды магчымых абмежаванняў для беларусаў.

"Пасля пачатку вайны я бачу небяспечную тэндэнцыю ў еўрапейскай палітыцы, маўляў, давайце забаронім беларускім грамадзянам атрымліваць візы, атрымліваць стыпендыі. Гэта няправільна. Гэта толькі дапаможа Пуціну і Лукашэнку.

Спыніце транзіт тавараў. Увядзіце санкцыі супраць дзяржаўных банкаў. Але дапамажыце народу захаваць сувязь з Еўропай", — заявіла Ціханоўская на Еўрапейскім форуме ў Альпбахе, яе цытуе BNP.

МУС Літвы прапануе закрыць яшчэ два пункты пропуску на мяжы з Беларуссю — Лаварышкес і Райгардас. Рашэнне будзе прымаць урад.

Гэта можа стаць сур'ёзнай праблемай: па той бок ад Лаварышкес — беларуская Катлоўка, ад Райгардаса — Прывалка.

Калі гэтыя пункты будуць закрытыя, на мяжы з Літвой будуць працаваць толькі два: Беняконі і Каменны Лог.

Польшча, Літва і Латвія вызначыліся, пры якіх умовах цалкам закрыюць мяжу з Беларуссю. Іх усяго дзве:

▪️ узброеная правакацыя на мяжы;
▪️ арганізаваны масавы выезд мігрантаў;

Калі любая з гэтых умоў будзе выкананая на мяжы з любой з краін, будзе дадзеная ацэнка, ці з'яўляецца гэта пагрозай нацыянальнай бяспецы. Калі так — урады трох краін прымаюць рашэнне аб закрыцці ўсіх пунктаў.

Літва ўжо закрыла два пункты на беларускай мяжы і плануе зрабіць тое самае яшчэ з двума. Ужо цяпер на выезд стаяць шалёныя чэргі.

Над хунтай, якая захапіла ўладу ў Нігеры, навісаюць хмары. Прэзідэнт Францыі Эмануэль Макрон заявіў, што яго краіна гатовая падтрымаць групу заходнеафрыканскіх дзяржаў Ecowas, калі тыя рэалізуюць сваю пагрозу аднавіць законнасць у Нігеры вайсковым шляхам.

У хунты цяпер толькі адзін саюзнік — ПВК "Вагнер", ды і тыя без кіраўніцтва мала што могуць.

Кіраўнік Адміністрацыі Лукашэнкі даў парады, як трэба рабіць боршч. На думку Ігара Сергеенкі, ён мусіць быць "смачным, гарачым і якасным".

Сваімі думкамі наконт таго, як трэба рабіць, з бураком ці памідорам, кіраўнік АП чамусьці не падзяліўся.

А як вы гатуеце боршч? Падзяліцеся рэцэптамі!

МУС Польшчы: "мы патрабуем ад рэжыму Лукашэнкі, каб ПВК "Вагнер" неадкладна пакінуў тэрыторыю Беларусі і, каб неадкладна пакінулі памежную зону мігранты, сабраныя там беларускімі службамі".

Кіраўнік МУС дадаў: "… мы будзем распрацоўваць такія механізмы, такія каналы, каб кожны, каму пагражаюць рэпрэсіі ў Беларусі ў сітуацыі, калі ўсе памежныя пераходы зачыненыя, мог бяспечна дабрацца да нашых краін".

Ілана Маска асвісталі на відэагульнавым турніры Valorant Champions 2023. Ён быў на мерапрыемстве са сваім сынам — яго на некалькі секунд паказаў аператар на адной з трыбун.

Натоўп хорам запатрабаваў "вярнуць Twitter", які Маск не так даўно перайменаваў у "X".

Межы пакуль адкрытыя для беларусаў, але ўжо закрытыя для афганак — #ІхНоравы

Беларусы чакалі 28 жніўня, каб даведацца, ці закрыецца назусім мяжа паміж імі і цывілізаваным светам.

Але мяжа пакуль застаецца адкрытай. Таму няма прычын закрывацца і ад навін са свету (цывілізаванага і не толькі). Вельмі хутка раскажам вам пра галоўныя міжнародныя навіны гэтага дня.

Чытаць тут: euroradio.fm/mezhy-pakul-adkrytyya-dlya-belarusau-ale-uzho-zakrytyya-dlya-afganak-ikhnoravy

А гэтая спасылка адкрыецца і без VPN

У Беларусі працягвае скарачацца колькасць занятых у эканоміцы. Пра гэта піша Reform.by.

У ліпені 2023 года ў беларускай эканоміцы было занята 4,147 млн чалавек. У параўнанні з чэрвенем гэтага года іх колькасць скарацілася яшчэ на 1,1 тысячу чалавек.

У параўнанні з ліпенем 2022 года колькасць занятых у эканоміцы зменшылася на 50,2 тысяч чалавек. Агулам за тры гады з ліпеня 2020 года іх стала менш на 162,4 тысячы.

Пацвердзілася затрыманне Андрэя Паротнікава. Мяркуючы па кадрах "расследавання", якое збіраюцца выпусціць прапагандысты, вайсковы аналітык быў трапіў у рукі сілавікоў яшчэ ўвесну.

Паротнікаў зразумеў, што над ім навісла небяспека, і спрабаваў з'ехаць з Беларусі. Але яго размовы праслухоўваліся. Затрыманне адбылося ў Расіі, калі ён быў на шляху да бяспечнай краіны.

Па непацверджанай інфармацыі, цяпер Паротнікаў знаходзіцца ў СІЗА КДБ.

Нічога незвычайнага. Проста так выглядае чарга па выезд з Беларусі праз памежны пераход "Брэст-Тэрэспаль".

Ад Купалаўскага тэатра патрабуюць ставіць больш спектакляў патрыятычнай тэматыкі. Гаворка пра гэта ішла на сходзе калектыву тэатра з нагоды пачатку новага тэатральнага сезона.

У сходзе прыняла ўдзел скандальна вядомая Ірына Дрыга. Цяпер гэтая чыноўніца ўзначальвае Галоўнае ўпраўленне дзяржаўных спецыяльных культурных мерапрыемстваў і прафесійнага мастацтва. Яна ў сваім выступе звярнула ўвагу, што тэатр павінен больш зарабляць і пашырыць геаграфію сваіх гастроляў. Таксама чыноўніца заявіла пра "неабходнасць узбагачэння рэпертуару спектаклямі патрыятычнай тэматыкі".

Украінская валанцёрка Наталля Захаранка знікла ў Беларусі. Пра гэта паведамляюць яе блізкія.

Жанчына дапамагала ўкраінскім уцекачам выязджаць з Беларусі дадому. З 19 ліпеня яна не выходзіць на сувязь.

"Колькі і куды я ні пісала — у амбасаду, пракуратуру, МЗС. У амбасадзе мне адказалі, што сярод затрыманых яе няма. Я не ведаю, куды ісці і да каго звяртацца. У мяне ўжо няма ніякіх сіл", — расказвае маці зніклай валанцёркі Надзея.