"በአረንጓዴ ዐሻራ አትርፈናል፤ በቡና አትርፈናል፣ በፍራፍሬ አትርፈናል፤ በሻይ ልናተርፍ ነው፤ የድህነትና የችግር ምልክት የሆነችው ኢትዮጵያ ያ መልኳና ስሟ እየተቀየረ ነው። ያ የሚቀየረው ግን ደክመን ነው፣ ጭቃ ነክተን ሰርተን ነው፤ ማንም ሊሰራልን አይችልም"- ጠቅላይ ሚኒስትር ዐቢይ አሕመድ (ዶ/ር)

ከመስከረም እስከ መስከረም መጽሐፍ፣ 8ኛ ቅጽ፣ገጽ 243

የህዳሴ ግድብ በሀብታችን የመጠቀም ጅማሮ እንጂ መጨረሻ አይደለም ሲሉ የውሃ ምህንድስና ተመራማሪው ገለጹ
+++++++++++++++++

#ጋዜጣ_ፕላስ፡ ኢትዮጵያ በዓባይ ወንዝ ላይ የገነባችው ግድብ ጅማሮ መሆኑንና ገና በርካታ ሥራዎች ሊከናወኑ እንደሚችሉ በአዲስ አበባ ዩኒቨርሲቲ የውኃ ምሕንድስና መምህሩ ፕሮፌሰር ይልማ ስለሺ ገለጹ።

የውኃ ምሕንድስና መምህሩ ፕሮፌሰር ይልማ ስለሺ ለጋዜጣ ፕላስ እንደገለጹት፤ ኢትዮጵያ ከዓባይ ወንዝ ገና መጠቀም ጀመረች እንጂ የማንንም ጥቅም አልነካችም። ኢትዮጵያ የራሷን የተፈጥሮ ሀብት ተጠቅማ የሕዳሴ ግድብን በመገንባቷ ምንም ዓይነት ቅሬታ የሚያስነሳባት ጉዳይ እንደሌለም ተናግረዋል።

የዓባይ ወንዝ 45 ሺህ ጊጋ ዋት ኃይል ማመንጨት የሚያስችል አቅም እንዳለው የጠቆሙት ፕሮፌሰር ይልማ፤ ኢትዮጵያ በሕዳሴ ግድብ ላይ የምታከናውናቸው ሥራዎች የተደበቁ ሳይሆኑ በግልጽ ለሁሉም በሚታይ መልኩ የሰፈሩ መሆናቸውን ገልጸዋል።

የዓባይ ወንዝ ከኢትዮያ የሚነሳ ሀብቷ ቢሆንም የታችኛውም ሆነ የላይኛው ተፋሰስ ሀገራትን በሚጠቅምና ምክንያታዊ በሆነ መንገድ መጠቀም ኢትዮጵያ በተደጋጋሚ ያስቀመጠችው እውነታ እንደሆነም አብራርተዋል።

ኢትዮጵያ ዓለም አቀፉን ሕግ የተላለፈችበት ጊዜ እንደሌለ የገለጹት ፕሮፌሰር ይልማ፤ አሁንም ቢሆን ፍትሐዊና ምክንያታዊ በሆነ መንገድ ወንዙን ለሌሎች አገልግሎቶች የመጠቀም ሙሉ መብት እንዳላት አስረድተዋል።

የግብፅ ጩኸት የውኃ መጠን ቀንሶባት ሳይሆን ቀደም ሲል በበላይነት የመጠቀም አሠራሯ እንዳያበቃ ከመስጋት የመነጨ መሆኑንም ፕሮፌሰሩ አክለው ገልጸዋል።

የህዳሴ ግድብ ጳጉሜ 4 ቀን 2017 ዓ.ም ተመርቆ ወደ ሥራ መግባቱና ኃይል ማመንጨት መጀመሩ ይታወሳል።

በልጅዓለም ፍቅሬ
#ጋዜጣፕላስ #ዓባይወንዝ #የሕዳሴግድብ #የውኃምሕንድስና #ኢፕድ #ኢትዮጵያ

ኢትዮጵያ የውጪና የገቢ ምርቶቿን ለማቀላጠፍ በ83 ቢሊዮን ብር ወጪ 16 መርከቦችን ልትገዛ ነው
++++++++++++++++

#ጋዜጣ_ፕላስ | ኢትዮጵያ አሁን ካሏት 10 መርከቦች በተጨማሪ በ83 ነጥብ 1 ቢሊዮን ብር በላይ ወጪ 16 መርከቦችን ለመግዛት አቅዳ የስድስት መርከቦች ግዥ በሂደት ላይ መሆኑን የኢትዮጵያ ባሕር ትራንስፖርትና ሎጂስቲክስ አስታወቀ፡፡

የኢትዮጵያ ባሕር ትራንስፖርትና ሎጂስቲክስ የዕቅድ ዝግጅትና ክትትል ዋና ክፍል ሥራ አስኪያጅ አቶ ስንታየሁ ኃይለማርያም ለአዲስ ዘመን ጋዜጣ እንደገለፁት፤ ኢትዮጵያ ለወጪና ገቢ ምርቶች ከምትጠቀምባቸው 10 መርከቦች በተጨማሪ 16 መርከቦችን ለመግዛት አቅዳለች፡፡

መርከቦቹን በቀጣይ አምስት ዓመታት ለመግዛት የታቀደ ሲሆን፤ ለዚህም 83 ነጥብ1 ቢሊዮን ብር በጀት መያዙን ገልፀው መርከቦችን በግዥ የኢትዮጵያ የማድረግ ሥራ የተቋሙ የስትራቴጂክ ዕቅዶች መካከል አንዱ መሆኑን ጠቁመዋል። በዚህም ስድስት መርከቦች ሕጋዊ የግዥ ሥርዓት በሂደት ላይ መሆኑን ገልጸዋል፡፡

በአሁኑ ወቅት በሥራ ላይ የሚገኙ መርከቦች ጠቅላላ የመሸከም አቅም ከ25ሺ እስከ 28ሺ ሲሆን፤ የአዳዲሶቹ መጫን አቅም ከቀድሞቹ አንጻር ሲታይ ግዙፍና ከ50ሺ እስከ 63ሺ የመጫን አቅም ያላቸው ናቸው ብለዋል፡፡

የመርከቦቹ ግዥ በሀገሪቱ ስትራቴጂክ የሆኑ ግብዓቶችን ጨምሮ በርካታ ምርቶች ወደ ሀገር ውስጥ ለማስገባት እንዲሁም ወደ ውጭ የሚላከውን በቅልጥፍናና በወቅቱ በመላክ የሎጂስቲክስ እንቅስቃሴን ውጤታማነት ለማሳደግ ጉልህ ድርሻ ይኖረዋል ብለዋል፡፡

ተቋሙ በበጀት ዓመቱ በድርጅቱ መርከቦች፣ በስሎትና በኪራይ መርከቦች ብትን ዕቃን ጨምሮ 4 ነጥብ 2 ሚሊዮን ቶን ገቢ ዕቃ ለማጓጓዝ ታቅዶ 3 ነጥብ 9 ሚሊዮን ቶን አጓጉዟል።

ኢትዮጵያ የባሕር በር ባለቤት የመሆን ሕልሟን ለማሳካት ዘርፈ ብዙ ጥረት እያደረገች መሆኗን የገለጹት አቶ ስንታየሁ፤ ይህን ውጥን ታሳቢ ያደረጉ ተግባራትን ከግምት ውስጥ በማስገባት እየሠራ መሆኑን አብራርተዋል፡፡

በክፍለዮሐንስ አንበርብር

የኢትዮጵያ ፕሬስ ድርጅት#ጋዜጣፕላስ #መርከብ ግዥ#ገቢና ወጭ ምርቶች#ንግድ #ኢኮኖሚ#ኢትዮጵያ