በሶማሌ ክልል በበጋ መስኖ ከ16 ሚልየን ኩንታል በላይ ምርት ይጠብቃል
********************
(ኢ ፕ ድ)
በሶማሌ ክልል በዘንድሮ የበጋ መስኖ ልማት ከ16 ሚልየን ኩንታል በላይ ምርት እንደሚጠበቅ የክልሉ ግብርና ቢሮ አስታወቀ።

የቢሮው ምክትል ሀላፊ አቶ አህመድኑር አብዲ ለኢፕድ እንደገለፁት፤ ለበጋ መስኖ ልማት ትኩረት በመስጠት በዘንድሮው የበጋ መስኖ ልማት ከ16 ሚልዮን ኩንታል በላይ ምርት ለመግኘት ታቅዶ ወደ ተግባር ተገብቷል።

በክልሉ የመስኖ ልማት በከፍተኛ ደረጃ መስፋፋት አርብቶ አደር የነበረውን የአካባቢውን ማኀበረሰብ ወደ ከፊል አርሶ አደርነት በመቀየር የምግብ ሉዓላዊነትን ለማረጋገጥ የላቀ ፋይዳ እንዳለው ተናግረዋል፡፡

በክልሉ በመስኖ ሊለማ የሚችል ከ2 ነጥብ 5 ሚሊዮን ሄክታር በላይ መሬት መኖሩን አመላክተዋል፡፡

በሌላ በኩል በክልሉ በመኸር ወቅት ዝናብ የሚያገኙ ዞኖች ሁለት ብቻ ናቸው። በእነዚህ ሁለት ዞኖች በምርት ዘመኑ 246 ሺህ ሄክታር መሬት በማረስ 4 ሚሊዮን 900 ሺህ ኩንታል ምርት ተሰብስቧል ብለዋል።

በክብረአብ በለቸው
ታህሳስ 14 ቀን 2017 ዓም

ኢትዮጵያና ጅቡቲ በድንበር አካባቢ የሚንቀሳቀሱ ጸረ-ሰላም ኃይሎችን ለመግታት የጋራ ግብረ-ኃይል ለማቋቋም ተስማሙ
********
(ኢ ፕ ድ)
የኢትዮጵያ ብሔራዊ መረጃና ደኅንነት አገልግሎት እና የጅቡቲ ሪፐብሊክ የሴኪዩሪቲ ዶክመንቴሽን ሰርቪስ በሁለቱ ሀገራት ድንበሮች አካባቢ የሚንቀሳቀሱ ጸረ-ሰላም ኃይሎችን ለመግታት ከሚያደርጉት የመረጃ ልውውጥ ባሻገር የጋራ ግብረኃይል አቋቁመው ስምሪት ለማከናወንና ወንጀለኞችንም አሳልፎ ለመስጠት መስማማታቸውን ገለፁ።

በጅቡቲ ሪፐብሊክ የሴኪዩሪቲ ዶክመንቴሽን ሰርቪስ ዳይሬክተር ጀነራል ሐሰን ሰይድ ካይራ የተመራ የልዑክ ቡድን ለይፋዊ የሥራ ጉብኝት ወደ ኢትዮጵያ ሲገባ በብሔራዊ መረጃና ደኅንነት አገልግሎት ከፍተኛ አመራሮች አቀባበል ተደርጎለታል፡፡

የብሔራዊ መረጃና ደኅንነት አገልግሎት ዳይሬክተር ጀነራል አምባሳደር ሬድዋን ሁሴንና የተቋሙ ከፍተኛ አመራሮች በጅቡቲ ሪፐብሊክ የሴኪዩሪቲ ዶክመንቴሽን ሰርቪስ ዳይሬክተር ጀነራል ሐሰን ሰይድ ካይራ ከተመራው የልዑካን ቡድን አባላት ጋር በጸጥታ፣ በደኅንነትና በተያያዥ መስኮች ትብብራቸውን ወደ ላቀ ደረጃ ለማሳደግ የሚረዳ ምክክር ማድረጋቸውን መረጃው ገልጿል፡፡

የሁለቱን ሀገራት የጋራ ስጋቶች መመከት የሚያስችሉ እንዲሁም ቀጣናዊ መረጋጋትን ለማምጣት የሚረዱ ጉዳዮች ዋንኛ የምክክሩ አጀንዳዎች እንደነበሩ የጠቆመው የአገልግሎት መሥሪያ ቤቱ መረጃ፤ ድንበር ተሻጋሪ ወንጀሎችን በተለይም ሕገ-ወጥ የሰዎችና የጦር መሣሪያ ዝውውርን ለመግታት፤ ሕገ-ወጥ ስደተኞችንም ለመከላከል የሚደረገውን ትብብር ለማጠናከር መስማማታቸውን አመልክቷል፡፡

ኢትዮጵያ በጅቡቲ ወደብ በኩል የምታከናውነው የወጪ ገቢ ንግድ ላይ የሚስተዋሉ የደኅንነት ችግሮችን መፍታት የሚያስችል ውይይት መካሄዱንም የብሔራዊ መረጃና ደኅንነት አገልግሎት ለኢፕድ በላከው መረጃ አመልክቷል፡፡

ታህሳስ 14 ቀን 2017 ዓም

ኢትዮጵያ የአንካራውን ስምምነት ሙሉ በሙሉ ለመተግበር ቁርጠኛ ነች- አምባሳደር ምስጋኑ አርጋ
*******************
(ኢ ፕ ድ)
ኢትዮጵያ የአንካራውን ስምምነት ሙሉ በሙሉ ለመተግበር ቁርጠኛ መሆኗን የውጭ ጉዳይ ሚኒስትር ዴኤታ አምባሳደር ምስጋኑ አርጋ ገለጹ።

በሶማሊያ የውጭ ጉዳይና ዓለም አቀፍ ትብብር ሚኒስትር ዴኤታ የተመራ ልዑክ በኢትዮጵያ የሥራ ጉብኝት እያደረገ ነው።

ኢትዮጵያ እና ሶማሊያ መካከል የተፈጠረውን አለመግባባት እልባት ለመስጠት በተርክዬ አሸማጋይነት ታኅሣሥ 2/2017 ዓ.ም ስምምነት ላይ መደረሱ ይታወቃል።

በዚህም መሰረት የአንካራውን ስምምነት ጠቅላይ ሚኒስትር ዐቢይ አሕመድ (ዶ/ር) እና የሶማሊያው ፕሬዝዳንት ሐሰን ሼኽ ሞሐመድ ፈርመውታል።

የአንካራውን ስምምነት በማፅናት በሁለቱ ሀገሮች መካከል ያለውን ግንኙነት ለማጠናከር በሶማሊያ የውጭ ጉዳይና ዓለም አቀፍ ትብብር ሚኒስትር ዴኤታ አሊ ኦማር የተመራ የልዑካን ቡድን አዲስ አበባ ገብቷል።

የሶማሊያ የልዑካን ቡድን በውጭ ጉዳይ ሚኒስትር ዴኤታ አምባሳደር ምስጋኑ አርጋ ከተመራ ልዑክ ጋር ውይይት አድርጓል።

የውጭ ጉዳይ ሚኒስትር ዴኤታ አምባሳደር ምስጋኑ አርጋ እንዳሉት፤ የሶማሊያ ልዑክ የስራ ጉብኝት ከአንካራው ስምምነት በኋላ የመጀመሪያው ነው።

የአንካራውን ስምምነት ገቢራዊ በማድረግ የሁለቱን ሀገራት ግንኙነት ለማጠናከር ቀጣይነት ያለው ውይይት እናደርጋለን ብለዋል።

የሶማሊያ ሰላም የኢትዮጵያ ሰላም መሆኑን ገልጸው፥ ሽብርተኝነትን በመከላከል በቀጣናው ሰላም ለማስፈን ትብብራችን ተጠናክሮ ይቀጥላል ነው ያሉት።

የሶማሊያ የውጭና ዓለም አቀፍ ትብብር ሚኒስትር ዴኤታ አሊ ኦማር ከወንድሜ አምባሳደር ምስጋኑ አርጋ ጋር ፍሬያማ ውይይት አድርገናል ብለዋል።

ከአንካራው ስምምነት በኋላ የመጀመሪያ ጉብኝታቸው መሆኑን ገልጸው፥ ስምምነቱን ገቢራዊ ለማድረግ የሚያስችል ውይይት ማድረጋቸውን ተናግርዋል ሲል ኢዜአ ዘግቧል።

የአረንጓዴ አሻራ እና የተጎሳቆለ መሬት ማገገሚያ ልዩ ፈንድ ማቋቋሚያና አሥተዳደር አዋጅ ፀደቀ
********
(ኢ ፕ ድ)
6ኛው የህዝብ ተወካዮች ምክር ቤት በ4ኛ ዓመት የስራ ዘመን 12ኛ መደበኛ ስብሰባው የአረንጓዴ አሻራና የተጎሳቆለ መሬት ማገገሚያ ልዩ ፈንድ ማቋቋሚያና አሥተዳደር ረቂቅ አዋጅን መርምሮ በሙሉ ድምጽ አጽድቋል።

የፕላን፣ በጀትና ፋይናንስ ጉዳዮች ቋሚ ኮሚቴ ያቀረበውን ሪፖርትና የውሳኔ ሀሳብ ከመረመረ በኃላ በሙሉ የምክር ቤት አባላት ተወያይተው ነው አዋጁን ያደቁት፡፡

የምክር ቤቱ አባላት የአረንጓዴ አሻራና የተጎሳቆለ መሬት ማገገሚያ ልዩ ፈንድ ማቋቋሚያና አስተዳደር አዋጅ ቁጥር 1361/ 17 መሬት መራቆት እንዳይኖር፣ የደንሽፋን እንዲስፋፋ የአዋጁ መውጣት ጠቃሚ ነው ብለዋል፡፡

የአየር ንብረት ለውጥን ለመከላከል የሚመደብ ፈንድን በስፋት አግኝቶ ለመጠቀም ከፍተረኛ አስተዋጽኦ እንዳለው የምክር ቤቱ አባላት ተናግረዋል፡፡

ለትግበራው ከመንግስት በጀት እንዲመደብ የሚያስችል መሆኑም ተጠቁሟል፡፡ ደኖችን ለመንከባከብና ለማልማት የሚጠቅም ነው ሲሉም የምክር ቤት አባላት ተናግረዋል፡፡

በኢትዮጵያ 54 ሚዮን ሄክታር የተጎዳ መሬት መኖሩን የጠቆሙት የፕላን፣ በጀትና ፋይናንስ ጉዳዮች ቋሚ ኮሚቴ ሰብሳቢ ደሳለኝ ወዳጅ፤ ከዚህ ውስጥ 11 ሚሊዮን ሄክታሩ ፈጣን ምላሽ የሚፈልግ መሆኑን ጠቁመዋል፡፡

ለትግበራው በቋሚነት እና በተቀናጀ አግባብ የፌደራል መንግስት የበጀት ድጋፍ የሚያደርግበት እንዲሆን፣ ክልሎችም የበኩላቸውን አስተዋፅዖ ማድረግ በሚያስችል መልኩ እንዲደግገፉ የሚያስችል መሆኑ ተጠቁሟል፡፡

ኢትዮጵያ በደን ዘርፍ ከልማት አጋሮችና ከሌሎች ዓለም አቀፍ የአየር ንብረት ለውጥ ፋይናንስ ሰጪ ምንጮች እና ከካርበን ግብይት ስርዓቶች የምታገኘውን ድጋፍና ጥቅም ለማሳደግ የሚያስችል መሆኑም ነው የተገለጸው፡፡

በዘላለም ግዛው
ታህሳስ 15 ቀን 2017 ዓም