ኢትዮጵያ በአማካኝ ከሚያስፈልጋት 12 የልብ ህክምና ማዕከላት ያላት አንድ ብቻ ነው

✍️ ከሰባት ሺህ በላይ ዜጎች የልብ ህክምና ለማግኘት ወረፋ ይጠብቃሉ፣

✍️ በ11 ወራት ለ542 ህሙማን ነጻ የልብ ቀዶ ህክምና ተሰጥቷል፣

✍️ ማዕከሉ በዓመት አንድ ሺህ 300 የሚደርሱ ታካሚዎችን ይቀበላል፣
****
(ኢ ፕ ድ)

ኢትዮጵያ በአማካኝ ከሚያስፈልጋት 12 የልብ ህክምና ማዕከላት ያላት አንድ ብቻ መሆኑ ተጽዕኖ እያሳደረ ነው ተባለ፡፡

ያለው የልብ ህክምና ማዕከልም መስጠት ከሚችለው አገልግሎት ከ50 በመቶ በታች እየሰራ መሆኑ ተመላክቷል፡፡

የኢትዮጵያ የልብ ህሙማን ህጻናት መርጃ ማዕከል ዋና ስራ አስፈጻሚ ህሩይ አሊ ለኢፕድ እንደገለጹት፤ ለ10 ሚሊዮን ህዝብ በአማካኝ አንድ የልብ ህክምና ማዕከል እንደሚያስፈልግ በቅርቡ የተጠና ዓለም አቅፍ ጥናት ያመለክታል፡፡

በ10 ሚሊዮን ህዝብ አንድ የልብ ህክምና ማዕከል ቢያስፈልግም ያለው አንድ ብቻ መሆኑን አስታውቀዋል፡፡

በሀገሪቱ ያለው የልብ ህክምና ማዕከል አንድ ብቻ መሆኑ ዜጎች አገልግሎቱን በተገቢው ጊዜና ቦታ እንዳያገኙ አድርጓል ያሉት ዋና ስራ አስፈጻሚው ከሰባት ሺህ በላይ ዜጎች የልብ ህመም ህክምና ለማግኘት ወረፋ ይጠብቃሉ።

እኤአ በ2024 11 ወራት ለ542 ህሙማን ነጻ የልብ ቀዶ ጥገና ህክምና ተሰጥቷል። በዓመት አንድ ሺህ 300 የሚደርሱ ታካሚዎችን ከተለያዩ የሕክምና ተቋማት በሪፈራል እንደሚቀበል ተመላክቷል፡፡

በ11 ወራት ለ10 ሺህ 938 ሰዎች ከቀዶ ጥገና በፊትና በኋላ የህክምና ክትትል አገልግሎት ተሰጥቷል ብለዋል፡፡

ለሕክምና የሚያገለግሉ ግብዓቶች በሀገር ውስጥ ባለመገኘታቸውና በሌሎች ምክንያቶች መስራት ከሚችለው ከ50 በመቶ በታች አቅሙ እየሰራ መሆኑን ተናግረዋል፡፡

ለህክምና አገልግሎት የሚውሉ ግብዓቶች በሀገር ውስጥ ገበያ አለመኖራቸውና የገንዘብ እጥረት ማዕከሉ በሙሉ አቅሙ እንዳይሰራ ምክንያት መሆናቸውን ተናግረዋል፡፡

ችግሩን ለመፍታት በሀገር ውስጥና በውጭ ሀገራት ከሚገኙ ተቋማትና ግለሰቦች በተለያዩ አማራጮች ድጋፍ የሚያደርጉበትን ምቹ ሁኔታን በመፍጠር አገልግሎቱን ተደራሽ ለማድረግ እየተሰራ እንደሚገኝ አመላክተዋል፡፡

የልብ ማዕከሉ በማዕከል ደረጃ ከተቋቋመ ጀምሮ ለስድስት ሺህ 800 ታካሚዎች ነጻ የልብ ቀዶ ጥገና አድርጓል።

በሀገሪቱ ያለውን የልብ ህክምና ማዕከል እጥረት ለመፍታት ከባለድርሻ አካላት ሰፊ ጥረት እንደሚጠይቅ ገልጸዋል፡፡

በሄለን ወንድምነው

ታህሳስ 3 ቀን 2017 ዓም

“በአማራ ክልል ግጭቶች ባልነበሩባቸው ጊዜያት ከሚደርሰው የበለጠ ማዳበሪያ አድርሰናል”
-ግርማ አመንቴ (ዶ/ር) የግብርና ሚኒስትር
*******
(ኢ ፕ ድ)

አምና በአማራ ክልል ግጭቶች ባልነበሩባቸው ጊዜያት ከቀረበው የበለጠ ማዳበሪያ አድርሰናል ሲሉ የግብርና ሚኒስትር ግርማ አመንቴ (ዶ/ር) አስታወቁ፡፡ የምርጥ ዘር አቅርቦት በሁሉም አካባቢ እጥረት መኖሩን ጠቁመዋል።

ግርማ አመንቴ (ዶ/ር) ለኢፕድ እንደገለፁት እንደ ግብርና ሚኒስቴር ግጭት ያሉባቸው አካባቢዎች የግብርና ግብዓቶችን ማድረስ ይጠበቅብናል። አምና አማራ ክልል ተደራሽ ያደረግነው ማዳበሪያ እስካሁን በክልሉ ግጭቶች ባልነበሩባቸው ጊዜያት ከሚደርሰው ማዳበሪያ የበለጠ ማድረስ ተችሏል።

ማዳበሪያ ለማድረስ የተከፈለው ዋጋ ቀላል አለመሆኑን የጠቀሱት ሚኒስትሩ፣ ማዳበሪያውን ለማጓጓዝ በጸጥታ ኃይል እጀባ እየተደረገ መሆኑን አሰታውሰው፣ ለዚህ ዋና ምክንያቱ አርሶ አደሩ ማረስና መዝራት ስላለበት..... https://press.et/?p=142797

በኦሮሚያ ክልል ከ800 ሺህ ቶን በላይ የቡና ምርት ተሰበሰበ
*****
(ኢ ፕ ድ)
በ2017 የምርት ዘመን ከ800 ሺህ ቶን በላይ የቡና ምርት መሰብሰቡን የኦሮሚያ ክልል ግብርና ቢሮ ገለጸ፡፡

በምርት ዘመኑ ከአንድ ነጥብ ስድስት ሚሊዮን ቶን በላይ የቡና ምርት ለማግኘት መታቀዱም ተጠቁሟል።

የክልሉ ግብርና ቢሮ ምክትል ኃላፊ እና የቡናና ፍራፍሬ ልማት ዘርፍ ኃላፊ አቶ መሐመድ ሳኒ አሚን ለኢፕድ እንደገለጹት፤ ከመስከረም ወር ጀምሮ የቡና ምርት የመሰብሰብ ሥራ ተጀምሯል፡፡ ከመስከረም ወር እስከ ኅዳር ወር 2017 ዓም መጨረሻ ድረስ ከ800 ሺህ ቶን በላይ ቡና መሰብሰብ ተችሏል፡፡

ባለፈው ዓመት አንድ ነጥብ ሁለት ሚሊዮን ቶን የቡና ምርት እንደተገኘ ጠቅሰው፤ በዘንድሮ የምርት ዘመን አንድ ነጥብ ስድስት ሚሊዮን ቶን ቡና ለማግኘት ታቅዷል ብለዋል፡፡

ከዚህ በፊት በክልሉ የቡና ምርት ከጥቅምት መጨረሻ ወይም የኅዳር ወር አጋማሽ ሳይደርስ መሰብሰብ.......

https://press.et/?p=142864

ሥራ ፈላጊ ነዎት❓
መልካም ዕድል‼️
ለተጨማሪ የመረጃ አማራጮች‼️
ትዊተር https://twitter.com/PressEthio
ድረ ገጽ https://www.press.et

ኤርትራዊያን ስደተኞች ክፍያ እንደሚጠየቁና ዲፖርቴሸን እንደሚፈጸምባቸው ተደርጎ የተሰራጨው መረጃ ሐሰት ነው

👉 በርካታ ኤርትራዊያን በኮንትሮባንድ፣ ፍልሰተኞችን በማዘዋወር እና በሌሎች ህገወጥ ተግባራት ሲሳተፉ ተገኙ
*******
(ኢ ፕ ድ)

ኤርትራዊያን ስደተኞች በኢትዮጵያ ያለአግባብ ክፍያና ዲፖርቴሸን እንደሚፈጸምባቸው ተደርጎ የሚሰራጨው መረጃ ሃሰተኛ መሆኑን የኢሚግሬሽንና ዜግነት አገልግሎት አስታውቋል፡፡

በርካታ የኤርትራ ዜግነት ያላቸው ግለሰቦች የኮንትሮባንድና ሌሎች ህገወጥ ተግባራት ሲያከናውኑ ተገኝተዋል ብሏል።

የኢሚግሬሽንና ዜግነት አገልግሎት የህግ ጥሰት የፈፀሙ የውጭ ዜጎችን በተመለከተ በሰጠው ማብራሪያ በርካታ የኤርትራ ዜግነት ያላቸው ግለሰቦች የተለያዩ ሸቀጣ ሸቀጦች ከዱባይ፣ ከኤርትራ፣ ከኡጋንዳ በማስገባትና በማስወጣት የኮንትሮባንድና ሌሎች ህገወጥ ተግባራትን ሲያከናውኑ ተገኝተዋል።

ህጋዊ የመኖሪያ ፈቃድና የስራ ፈቃድ ሳይኖራቸው ሐሰተኛ ማንነት በመያዝ እንደሚንቀሳቀሱም ተጠቁሟል፡፡

በተለይ ለውጭ አገር ዜጎች ባልተፈቀዱ የስራ መስኮች ተሰማርተው እንደሚገኙና በርካታ ፍልሰተኞችን በህገወጥ መንገድ ሲያዘዋውሩ መገኘታቸውን አመላክቷል።

ለሕገወጥ ተግባራት የሚያገለገሉ ሐሰተኛ የጉዞና የይለፍ ሰነዶች፣ ማህተሞች፣ የባንክ ቡኮች ማዘጋጀት ህገወጥ ተግባራት ሲፈጽሙ መገኘታቸውን ጠቅሶ ከህግ ውጭ ሰነዶችን መጠቀምና የገንዘብ ዝውውር እንደሚያከናውኑ ገልጿል።

ማንኛውም የውጭ አገር ዜጋ የአገሩቱን ህግ ተላልፎ ከተገኘ በህግ ተጠያቂ እንደሚሆን አሳስቧል።

ኢትዮጵያ የኤርትራ ዜግነት ያላቸው ስደተኞችን ጨምሮ የበርካታ አገራት ዜጎች እንድሚገኙ ይታወቃል።

ታህሳስ 4 ቀን 2017 ዓም

የአዲስ አበባ ከተማ አሰተዳደር ካቢኔ ባካሄደው መደበኛ ስብሰባው ውሳኔዎች አሳለፈ
****
(ኢ ፕ ድ)
የአዲስ አበባ ከተማ አሰተዳደር ካቢኔ በ4ኛ መደበኛ ስብሰባው በአጀንዳዎች ላይ ተወያይቶ ውሳኔ አሳልፏል።

በዚህ መሠረት፤

👉 የወንዝና የወንዝ ዳርቻ ልማት ብክለት መከላከል ረቂቅ ደንብ ላይ ተወያይቶ ለከተማዋ ነዋሪዎቻ ጤና፣ ፅዳትና ውበት ወሳኝና ጠቃሚ መሆኑን በማረጋገጥ ደንቡን በሙሉ ድምፅ አፅድቋል፡፡

👉 በከተማ ፕላን ልማት ቢሮ የተዘጋጁና የሚዘጋጁ የአካባቢ ልማት ፕላን ዝግጀት፤ አፈፃፀም ቁጥጥር፤ ደንብ ማሻሽያን መርምሮ በሙሉ ድምፅ አፅድቋል፡፡

👉 የአዲስ አበባ ከተማ አስተዳደር የኤሌክትሪክ አውቶቡሶች ማቅረብ በመጀመሩ የኤሌክትሪክ አውቶቡሶች አገልግሎት አስተዳደር ረቂቅ መነሻ ሀሳብ ላይ በመወያየት በመንግስትና የግል አጋርነት እንዲተዳደሩ፣ በከተማዋ የመንግስትና የግል ትራንስፖርት አገልግሎት እስከ ምሽቱ 4፡00 ድረስ አግልጋሎት እንዲሰጡና በሁሉም የኮሪደር ልማት በሚተገበርባቸው ቦታዎች የትራንስፖርት አገልግሎት እለታዊ የጊዜ ሰሌዳ እንዲጠቀሙ ይደረጋል።

👉 በሁሉም የከተማዋ ዋና ዋና መንገዶች ያሉ የንግድና የአገልግሎት መስጫ ተቋማት እስከ ምሽቱ 3፡30 ለህብረተሰቡ የተሟላ አገልግሎት እንዲሰጡ ወስኗል።

👉 ሁሉም ዋና መንገድ እና መጋቢ መንገድ ላይ ያሉ ተቋማት ህንፃዎች፣ የግልና የመንግስት ቢሮዎች የምሽት መብራት ማጥፋት እንዲከለከልና የመብራት አገልግሎት እንዲኖር ውሳኔ አስተላልፏል፡፡

ታህሳስ 4 ቀን 2017 ዓም

በሙስሊም ኤይድ የተደረገው ድጋፍ በሆስፒታሎች የሚታየውን የህክምና ግብዓት እጥረት ለመፍታት ያግዛል
*******
(ኢ ፕ ድ)

በሙስሊም ኤይድ ዩ.ኤስ.ኤ የተደረገው ድጋፍ እንደሀገር በሆስፒታሎች የሚታየውን የህክምና ግብዓት እጥረት ለመፍታት የሚያግዝ መሆኑን የኢትዮጵያ እስልምና ጉዳዮች ጠቅላይ ምክር ቤት ፕሬዚደንት የጽሕፈት ቤት ኃላፊ ዑስታዝ አቡበከር አሕመድ ገለጹ፡፡

ዑስታዝ አቡበከር አሕመድ እንደተናገሩት ዛሬ በሙስሊም ኤይድ ዩ.ኤስ.ኤ የተደረገው ድጋፍ ግምታዊ ዋጋቸው ከ750 ሚሊዮን ብር በላይ (6 ነጥብ 4 ሚሊየን ዶላር) የሚሆን የኢመርጀንሲ ኪቶች ሲሆኑ ጥራታቸው በዓለም ጤና ድርጅት የተረጋገጡና የአውሮፓን ስታንዳርድ ያሟሉ ናቸው፡፡

ሙስሊም ኤይድ ዩ.ኤስ.ኤ ለአምስት ጊዜያት በኢትዮጵያ የተለያዩ አከባቢዎች በርካታ የህክምና መድኃኒቶችንና ግብዓቶችን ድጋፍ አድርጓል። ባለፉት ዓመታት ግምቱ 15 ሚሊዮን ዶላር የሚጠጋ የህክምና ቁሳቁሶችን መለገሳቸውን ጠቁመው የዛሬው ለሰባተኛ ጊዜ መሆኑን ገልጸዋል፡፡

በትራንዚት መዘግየት ምክንያት በጁቡቲ ወደብ ላይ አምስት ኮንቴነር መድሃኒትና የህክምና ቁሳቁሶች መኖራቸውን የገለጹት ዑስታዝ አቡበከር፤ ቁሳቁሶቹ ወደ ሀገር ሲገቡ ለተቀሩ አከባቢዎች እንደሚከፋፈል ተናግረዋል።

በቀጣይ ምክር ቤቱ ያለምንም ቅድመ ሁኔታ ለማህበረሰብ የሚጠቅሙ ግብዓቶችን የማፈላለግ ስራዎችን እንደሚሰራ ጠቁመዋል፡፡ ሌሎች ለጋስ ድርጅቶችና በውጭ የሚኖሩ ኢትዮጵያዊያን ይህንን ፈለግ በመከተል ኃላፊነታቸውን ሊወጡ ይገባል ብለዋል፡፡

የሙስሊም ኤይድ ዩ.ኤስ.ኤ ግብረ ሰናይ ድርጅት ላደረገው ድጋፍ፣ የጤና ሚኒስቴር፣ የገንዘብ ሚኒስቴር፣ የገቢዎች ሚኒስቴርና የጉምሩክ ኮሚሽን ቁሳቁሶቹ በአጭር ጊዜ እንዲደርሱ በማድረግ ላደረጉት አስተዋጽኦ አመስግነዋል።

በርክክብ ስነስርዓቱ ላይ የኢትዮጵያ እስልምና ጉዳዮች ጠቅላይ ምክር ቤት ፕሬዚደንት ሸይኽ ሐጂ ኢብራሂም ቱፋን ጨምሮ የጤና ሚኒስትር የጽህፈት ቤት ኃላፊ ዶክተር ማብራቱ ማሴቦ እና ድጋፍ የተደረገላቸው ሆስፒታል ተወካዮች ተገኝተዋል፡፡

በአማን ረሺድ

ታህሳስ 4 ቀን 2017 ዓም

ለተጨማሪ የመረጃ አማራጮች
ትዊተር https://twitter.com/PressEthio
ቲክቶክ https://www.tiktok.com/@ethiopianpressagency...
ድረ ገጽ https://www.press.et