ለዓባይ ግድብ ግንባታ ከ311 ነጥብ አምስት ሚሊዮን ብር በላይ ተሰበሰበ
*******
(ኢ ፕ ድ)

በበጀት ዓመቱ አራት ወራት ለዓባይ ግድብ ግንባታ ከ311 ሚሊዮን ብር በላይ መሰብሰቡን የታላቁ ህዳሴ ግድብ ማስተባበሪያ ፕሮጀክት ጽህፈት ቤት አስታወቀ፡፡

ግድቡ ከተጀመረ ጀምሮ እስከ ጥቅምት 30 ቀን 2017 ዓም ድረስ ከ20 ነጥብ ሁለት ቢሊዮን ብር በላይ ተሰብስቧል።

የታላቁ ህዳሴ ግድብ ማስተባበሪያ ፕሮጀክት ጽህፈት ቤት የፐብሊክ ዲፕሎማሲ ህዝብ ግንኙነትና ኮሙኒኬሽን ስራ አስፈጻሚ ሰለሞን ዳንኤል ለኢፕድ እንደገለጹት፤ በ2017 በጀት ዓመት አራት ወራት ለግድቡ ግንባታ ከ311 ሚሊዮን 573 ሺህ ብር በላይ ተሰብስቧል፡፡

የግድቡ አጠቃላይ የግንባታ ሂደት 97 ነጥብ 6 በመቶ ደርሷል ያሉት ስራ አስፈጻሚው፤ የዲያስፖራው ማህበረሰብ ቦንድ በመግዛትና በተለያዩ ዌብ ቤዝድ መተግበሪያዎችን በመጠቀም ድጋፍ ማድረግ እንደሚችሉ ገልጸዋል፡፡

በተጨማሪም ላይ በተመሳሳይ ከየትኛውም አካባቢ የሚገኝ ዲያስፖራም ይሁን ሀገር ውስጥ የሚገኝ ዜጋ አፕሊኬሽኑን በማውረድ እና ስልካቸው ላይ በመጫን በየጊዜው መደገፍ ይችላሉ ብለዋል፡፡

በሀገር ውስጥም በውጭም የሚገኙ ኢትዮጵያውያን ቦንድ በመግዛት፣ በ8100 ላይ A ብለው በመላክ፣ የኢትዮዳይሬክት የሞባይል መተግበሪያን በመጠቀም ድጋፍ ማድረግ እንደሚችል ጠቁመዋል፡፡

ዓባይ ግድብ የወል ትርክት በመሆኑ እንድነታችንን ከሚያጠናክሩ እሴት መካከል አንዱ የታሪክ አሻራ ነው ብለዋል፡፡

በሄለን ወንድምነው

ህዳር 24 ቀን 2017 ዓም

የፖለቲካ ፓርቲዎች የጋራ ምክር ቤት የውይይት አጀንዳቸውን ለሀገራዊ ምክክር ኮሚሽኑ አስረከቡ
******
(ኢ ፕ ድ)

የኢትዮጵያ ፖለቲካ ፓርቲዎች የጋራ ምክር ቤት የውይይት አጀንዳቸውን ለሀገራዊ ምክክር ኮሚሽን አስረክበዋል።

የሀገራዊ ምክክር ኮሚሽን ዋና ኮሚሽነር ፕሮፌሰር መስፍን አርዓያ በወቅቱ እንደገለፁት፤ የፖለቲካ ፓርቲዎች ለሀገራዊ ምክክር ሂደቱ ተባባሪ አካላት ናቸው።

በዚህም የጋራ ምክር ቤቱ ተወያይቶ ያፀደቀውን የውይይት አጀንዳ በዛሬው ዕለት አስረክቧል ብለዋል።

ሀገራዊ ምክክሩ የተሳታፊ ልየታ፣ መረጣና የአጀንዳ የማሰባሰብ ሥራዎችን በማጠናቀቅ ላይ ነው ብለዋል።

በቀጣይ ቀናት የፌዴራል ባለድርሻ አካላትና ተቋማት መንግስትን ጨምሮ አጀንዳ እንዲያስረክቡ ይደረጋል ያሉት ፕሮፌሰሩ፤ በአማራ፣ በኦሮሚያና በትግራይ ክልሎች ቀሪ ሥራዎችን ለማጠናቀቅ እየተሠራ መሆኑን ገልፀዋል።

የኢትዮጵያ ፖለቲካ ፓርቲዎች የጋራ ምክር ቤት ሰብሳቢ አቶ ሰለሞን አየለ በበኩላቸው፤ ምክር ቤቱ ያስረከበው አጀንዳ በጠቅላላ ጉባኤው የፀደቀ ነው። በዚህም ታሪክና ትርክት፣ የሀገርና የተቋማት ግንባታ፣ የማንነትና የአስተዳደር ጥያቄዎችን መሠረት ያደረጉ አጀንዳዎች ለኮሚሽኑ መግባታቸውን ተናግረዋል።

ከሀገራዊ ምክክር ኮሚሽኑ በጋር እንደሚሰሩ ገልፀው፤ በመተባበርና በመከባበር ሀገርን በጋራ እንገነባለን ብለዋል።

እውነተኛ ዲሞክራሲ ለመገንባት የፖለቲካ ፓርቲዎች ሚና ወሳኝ መሆኑን አጽንኦት ሰጥተዋል።

በሳሙኤል ወንደሰን

ህዳር 25 ቀን 2017 ዓም

ሥራ ፈላጊ ነዎት❓
መልካም ዕድል‼️
ለተጨማሪ የመረጃ አማራጮች‼️
ትዊተር https://twitter.com/PressEthio
ድረ ገጽ https://www.press.et

በጃል ሰኚ ነጋሳ የተመሩ የኦሮሞ ነፃነት ሠራዊት አባላት ከከንቲባ አዳነች አቤቤ ጋር ተወያዩ
******
(ኢ ፕ ድ)
ከኦሮሚያ ክልል መንግስት ጋር የሰላም ስምምነት ላይ የደረሰው በኦሮሞ ነፃነት ሠራዊት ከፍተኛ አመራር ጃል ሰኚ ነጋሳ የተመሩ የሠራዊቱ አባላት በአዲስ አበባ የዓድዋ ድል መታሰቢያንና ሌሎች የልማት ሥራዎችን ጎብኝተዋል፡፡

በውይይቱ የአዲስ አበባ ከተማ ከንቲባ አዳነች አቤቤ፣ የሰላም መንገድ አማራጭ የሌለውና ሁሉንም ተጠቃሚ የሚያደርግ መንገድ መሆኑን በመረዳት መንግስት ላደረገው ጥሪ የኦሮሞ ነፃነት ሠራዊት አባላት የሰጡት ምላሽ የሚያስመሰግን መሆኑን ገልጸዋል።

ስምምነቱ የፖለቲካ ልዩነቶችን በውይይት በመፍታት ለሌሎች አርአያ የሚሆን ተግባር መሆኑን ገልጸዋል።

ጃል ሰኚ ነጋሳ በበኩላቸው፣ የሰላም ጥሪውን የተቀበሉት የህዝብን ጉዳት ለመቀነስና የሰላም አማራጭን መቀበል ብልህነትና አዋቂነት መሆኑን በመረዳታቸው እንደሆነ ተናግረዋል።

ለተደረገላቸው አቀባበል ማመስገናቸውን የከንቲባ ጽ/ቤት መረጃ ያመላክታል፡፡

ህዳር 25 ቀን 2017 ዓም

ለተጨማሪ የመረጃ አማራጮች
ትዊተር https://twitter.com/PressEthio
ቲክቶክ https://www.tiktok.com/@ethiopianpressagency...
ድረ ገጽ https://www.press.et