የክልሉ ህዝብ ነገ በሚካሄደው የአንድ ጀምበር አረንጓዴ አሻራ መርሃግብር በነቂስ እንዲሳተፍ የሀረሪ ክልል ርዕሰ መስተዳድር አቶ ኦርዲን በድሪ ጥሪ አቀረቡ
*********************
(ኢ ፕ ድ)

የሀረሪ ክልል ርዕሰ መስተዳድር አቶ ኦርዲን በድሪ ነገ ሐምሌ 10 ቀን 2015 ዓ.ም በአንድ ጀምበር 500 ሚሊየን ችግኞችን ለመትከል በሚካሄደው ዘመቻ የክልሉ ህዝብ በነቂስ እንዲሳተፍ ጥሪ አቅርበዋል።

በአረንጓዴ አሻራ መርሃግብሩ መሳተፍ የተሻለች ኢትዮጵያን ለመፍጠር እና ለትውልድ ለማስተላለፍ እጅግ አስፈላጊ ተግባር መሆኑን ጠቁመው በመርሃግብሩ ላለፉት አመታት እንዳደረግነው ሁሉ ነገም የሀይማኖት፣ የብሔርና የፖለቲካ አመለካከት ልዩነት ሳይገድበን በነቂስ በመውጣት ስለሀገራችን ብለን የምንሳተፍበት ተግባር ነው ብለዋል።

በክልላችንም በአንድ ጀምበር ለሚካሄደው የአረንጓዴ አሻራ መርሃግብር አስፈላጊውን ዝግጅት ያጠናቀቅን በመሆኑ ነገ ሐምሌ 10 ከማለዳው 12:00 ጀምሮ በተዘጋጁ የችግኝ የመትከያ ስፍራዎች እንዲሁም በየአካባቢው ችግኝ በመትከል ሀገራዊ ሀላፊነቱን እንዲወጣ ጠይቀዋል።
ሐምሌ 9 ቀን 2015 ዓ.ም

ሙሽሮቹ የጋብቻ ስነ-ስርዓታቸውን ችግኞችን በመትከል አከበሩ
*****
(ኢ ፕ ድ)

በሀድያ ዞን ሾኔ ከተማ ጋብቻቸውን ዛሬ የፈፀሙት ጥንዶች የጋብቻ ስነ-ስርዓታቸውን ችግኞችን በመትከል አሳልፈዋል።

ጥንዶቹ የችግኝ ተከላውን ከሚዜዎቻቸው ቤተሰቦቻቸውና አጃቢዎቻቸው ጋር "ነገን ዛሬ እንትከል" የሚለውን መርህ በመከተል መሆኑም ተገልጿል።

በሾኔ ከተማ ሊቻ ቀበሌ ነዋሪ የሆነው ሙሽራው አቶ ረታ ወልቃ ለኢዜአ በሰጠው አስተያየት እንደገለጸው ችግኝ መትከል የሰው ልጆችን ህይወት ጤናማ እንደሚያደርግ ነው።

“በሀገር አቀፍ ደረጃ የተጀመረው የአረንጓዴ አሻራ መርሃ-ግብር ትግበራ የሀገሪቱን የግሪን ኢኮኖሚ ተጠቃሚነት ከማሳደግ በተጨማሪ ሁለንተናዊ ጉዞዋን ለማሳለጥ የሚያግዝ በመሆኑ በተግባሩ በመሳተፍ ላይ ነኝ” ሲል ገልጿል።

ነገ በሀገር አቀፍ ደረጃ በአንድ ጀምበር የሚተከለውን አምስት መቶ ሚሊዮን ችግኝ ተከላ መርሀ-ግብርን በማሰብ ዛሬ የሰርግ ስነ-ስርዓቱን ችግኞችን በመትከል ለማሳለፍ መነሳሳቱን አብራርቷል።

ሙሽሪት ወይዘሮ ፍሬህይወት ብርሃኑ በበኩሏ የሀገርን ልዕልና አስጠብቆ ለማስቀጠል ቅድሚያ መሰጠት እንዳለበትና የጊዜና የቦታ ወሰን ሊገድብ እንደማይገባ ተናግራለች።

አረንጓዴ አሻራ መርሃ ግብር የሀገራችንን ከፍታ ለማረጋገጥ ታቅዶ በመተግበር ላይ ያለ በመሆኑ የሰርግ ስነ-ስርዓታቸውን ከሚዜዎቻቸው፣ ከአጃቢዎቻቸውና ከቤተሰቦቻቸዉ ጋር ችግኝ በመትከል ለማሳለፍ ከባለቤቷ ጋር ቀድመው የተተስማሙበት መሆኑን ተናግራለች።

የተከሉትን ችግኝ በመንከባከብ ለታቀደው ዓላማ እንዲውል የሚጠበቅባቸውን ኃላፊነት እንደሚወጡ ገልጸዋል።

የሾኔ ከተማ ብልፅግና ፓርቲ ፅህፈት ቤት ኃላፊ አቶ አበራ በዶሬ በከተማው በአንድ ጀምበር ከ 100 ሺህ በላይ የተለያየ ዝርያ ያላቸውን ችግኞች ለመትከል ቅድመ ዝግጅት ማጠናቀቃቸውን ተናግረዋል።

ዛሬ የጋብቻ ስነ-ስርዓታቸውን የፈፀሙት ጥንዶች በሰርጋቸው ላይ የተለያየ ዝርያ ያላቸውን ችግኞች በሾኔ ከተማ ቴክኒክና ሙያ ትምህርትና ስልጠና ኮሌጅ በመትከል ማሳለፋቸውን ተናግረዋል።

የጥንዶቹ ድርጊት ለአረንጓዴ አሻራ መርሐግብር ትግበራ የሰጡትን ትኩረት የሚያመላክት ከመሆኑ በተጨማሪ የጋራ ሃሳቡ ሊጠናከር እንደሚገባም ገልጸዋል።

ሐምሌ 9 ቀን 2015 ዓ.ም