በመላው ሃገሪቱ በተገነቡት ኢንዱስትሪ ፓርኮች በተፈጠረ የገበያ ትስስር ከ300ሺ በላይ አርሶ አደሮችን ተጠቃሚ ማድረግ መቻሉ ተገለጸ
*****
(ኢ ፕ ድ)

በመላው ሃገሪቱ በተገነቡት የአግሮ ፕሮሰሲንግ ኢንዱስትሪ ፓርኮች አካባቢ ያሉ አርሶ አደሮች የግብርና ምርቶቻቸውን በኢንዱስትሪ ፓርክ ውስጥ ላሉ አምራቾች እንዲያቀርቡ በማድረግ ሰፊና ዘላቂ የገበያ ትስስር በመፍጠር ተጠቃሚ ማድረግ መቻሉ ተገለጸ።

የኢንዱስትሪ ፓርኮች ልማት ኮርፖሬሽን የማርኬቲንግና ኮሙኒኬሽን መምሪያ ኃላፊ አቶ ዘመን ጁነዲን እንደገለጹት፤ በገበያ ትስስሩ ከ 15 ሺህ በላይ አርሶ አደሮች በጅማ ኢንዱስትሪ ፓርክ የአቮካዶ ዘይት ምርት በማምረት ለተሰማራ ኩባንያ የአቮካዶ ፍራፍሬ በማቅረብ ላይ ይገኛሉ።

እንደ ኃላፊው ገለጻ፤ በደብረ ብርሃን እና ቦሌ ለሚ ኢንዱስትሪ ፓርኮች ደግሞ ለቢራ አምራች ካምፓኒዎች ብቅል የማቅረብ ስራ ለሚሰሩ አምራቾች የቢራ ገብስ በማቅረብ በኩል ከ280 ሺህ በላይ አርሶ አደሮች የገበያ ትስስር ተፈጥሮላቸዋል፡፡

በኢንዱስትሪ ፓርኮቹ የአካባቢውን ነባራዊ ሁኔታ ከግምት ውስጥ ያስገባ ስራዎችን በመሰራት ላይ እንደሚገኙ የገለጹት አቶ ዘመን በቅርቡም በአፋር አካባቢ ያለውን የግመል ወተት በግብዓትነት የሚጠቀም ካምፓኒ በሰመራ ኢንዱስትሪ ፓርክ እንዲሁም አማራ ክልል አካባቢ ያለውን የበቆሎ ምርት በግብዓትነት የሚጠቀም አምራችም እንዲሁ በባህር ዳር ኢንዱስትሪ ፓርክ ገብተው ለመስራት የሚያስችላቸውን ስምምነት ፈጽመው ግንባታ በማካሄድ ላይ ይገኛሉ ብለዋል፡፡

በአዳማ ኢንዱስትሪ ፓርክ የተልባ እግርን በግብዓትነት የሚጠቀም ካምፓኒ ጋር የገበያ ትስስር ስራዎች ለመስራት የዘር ብዜትና የምርምር ስራዎች በመሰራት ላይ እንደሚገኙ የገለጹት ኃላፊው በቀጣይም የዘር ብዜቱን ለአርሶ አደሩ በማሰራጨት በስፋት ወደ ምርት እንዲገቡ የማድረግ ስራዎች እንደሚሰሩ አብራርተዋል፡፡

በኢንዱስትሪ ፓርኮች በአልባሳትና ጨርቃ ጨርቅ፤በአግሮ ፕሮሰሲንግ፤በፋርማሲዩቲካል ዘርፎች ተሰማርተው እንደሚገኙ የገለጹት አቶ ዘመን በተለይም ከፕሪቶሪያው የሰላም ስምምነት በኋላ ያለው የኢንቨስትመንት ፍሰት በከፍተኛ ሁኔታ መነቃቃቱንና የባለሃብቶች ኢንቨስት የማድረግ ፍላጎትም በከፍተኛ ሁኔታ መጨመር መቻሉን ተናግረዋል፡፡

በኮርፖሬሽኑ አሁን ላይ 11 ኢንዱስትሪ ፓርኮች ሙሉ በሙሉ በስራ ላይ የሚገኙ ሲሆን የመቀሌ ኢንዱስትሪ ፓርክን ወደ ስራ ለመመለስም የተለያዩ ተግባራት ሲከናወኑ መቆየታቸውን የተናገሩት አቶ ዘመን በተለይም ፓርኩን ወደ ነበረበት ለመመለስ የነበሩ ባለሃብቶችን የማወያየት እና በተለያዩ ጉዳዮች ላይ መግባባት ላይ መድረስ መቻሉን አቶ ዘመን ከኢዜአ ጋር በነበራቸው ቆይታ ተናግረዋል፡፡

3ኛው ዓመታዊ የፓርላማ ጥናትና ምርምር ኮንፈረንስ እየተካሄደ ነው
****
(ኢ ፕ ድ)

የኢፌድሪ ህዝብ ተወካዮች ምክር ቤት 3ኛው ዓመታዊ የፓርላማ ጥናትና ምርምር ኮንፈረንስ "ህግ አወጣጥ፣ ክትትልና ቁጥጥር እንዲሁም የሕዝብ ውክልና" በሚል መሪ ሃሳብ እየተካሄደ ነው፡፡

በኮንፍረንሱ የመክፈቻ ንግግር ያደረጉት የኢፌድሪ የህዝብ ተወካዮች ምክር ቤት ዋና አፈጉባዔ አቶ ታገሰ ጫፎ፤ ምክር ቤቱ የተጣለበትን ከፍተኛ ኃላፊነት ለመወጣት በጥናትና ምርምር ላይ የተመሰረቱ ተግባራት ማከናወን ያስፈልጋል ብለዋል፡፡

ባለፉት ዓመታት ምክር ቤቱ በጥናትና ምርምር ላይ የተመሠረተ ውሳኔዎች እያስተላለፈ ይገኛል ያሉት አቶ ታገሰ፤ በዘንድሮ ዓመትም ከ60 በላይ ጥናት ቀርቦ 13 የሚሆኑት መሥፈርቱን አሟልተው ተገኝተዋል ብለዋል፡፡

አቶ ታገሰ አክለውም፤ የሚደረጉ ጥናትና ምርምሮች ምክር ቤቱ ለሚያከናውናቸው ተግባራት ትልቅ ግብዓት እንደሚሆኑና ምክር ቤቱ ትክክለኛና በእውነታ ላይ የተመሰረተ ውሳኔ እንዲያስተላልፍ እንደሚያግዝ ተናግረዋል፡፡

የኢፌድሪ ፍትህ ሚኒስትር ጌዲዖን ጢሞቲዎስ (ዶክተር) በበኩላቸው፤ ምክር ቤቱ በህዝብ የተጣለበትን ኃላፊነት በአግባቡ እንዲወጣ የጥናትና ምርምር ሥራዎች በእጅጉ ጠቃሚ ናቸው ብለዋል፡፡

ሚኒስትሩ አክለውም ፓርላማው በጥናትና መርምር ሥራዎች ላይ መድረክ መፍጠሩ ለተመራማሪዎችና ለሙሁራን ለወደፊት ስራቸው እንዲጠናከርና አዳዲስ የጥናትና ምርምር ሥራዎች እንዲፈጠሩ እድል እንደሚፈጥር ጠቁመዋል፡፡

በኮንፍረንሱ የኢፌድሪ የህዝብ ተወካዮች ምክር ቤት ዋና አፈጉባዔ አቶ ታገሰ ጫፎን ጨምሮ ሚኒስትሮች፣ የክልልና የከተማ አስተዳደር አፈጉባዔዎች፣ የዩኒቨርስቲ ፕሬዝዳንቶች፣ የቀድሞ የህዝብ ተወካዮች ምክር ቤት ከፍተኛ የስራ ኃላፊዎች እንዲሁም ጥሪ የተደረገላቸው እንግዶች ተገኝተዋል፡፡

ሰኔ 24 ቀን 2015 ዓም
በልጅዓለም ፍቅሬ