ባለሀብቶች በአቪዬሽን ኢንቨስትመንት እንዲሰማሩ ጥሪ ቀረበ
**************
(ኢ ፕ ድ)

ለትራንስፖርት ተደራሽ ባልሆኑ የአገሪቱ የቱሪዝም መዳረሻዎች ላይ በትንንሽ አውሮፕላኖችና ሄሊኮፕተሮች ለመድረስ እንዲቻል ባለሃብቶች በአቪዬሽን ኢንዱስትሪው እንዲሰማሩ የኢትዮጵያ ሲቪል አቪዬሽን ባለስልጣን ጥሪ አቀረበ።

የኢትዮጵያ ሲቪል አቪዬሽን ባለስልጣን ዋና ዳይሬክተር አቶ ጌታቸው መንግስቴ በሰጡት መግለጫ የአየር ትራንስፖርት ለማህበራዊ፣ ኢኮኖሚያዊና ሁለንተናዊ እድገት ሚናው የጐላ ነው። በአሁኑ ወቅት በአገሪቱ አራት አለም አቀፍ ኤርፖርት ደረጃ የተሰጣቸውን ጨምሮ 22 መደበኛ አገልግሎት በመስጠት ላይ ይገኛሉ።

ኢትዮጵያ ካላት የቆዳ ስፋትና የህዝብ ቁጥር አንጻር በቂ አይደለም ያሉት ዋና ዳይሬክተሩ ተደራሽነቱን ለማሳደግ ባለሃብቶች ለትራንስፖርት ተደራሽ ባልሆኑ የአገሪቱ የቱሪዝም መዳረሻዎች ላይ በትንንሽ አውሮፕላኖችና ሄሊኮፕተሮች ለመድረስ የሚያስችሉ ግንባታዎች ላይ እንዲሰማሩ ጠይቀዋል። ለቱሪዝም እድገት የበኩላቸውን ሚና እንዲወጡ ጥሪ አቅርበዋል።

የአቪዬሽን ሬጉሌሽን ዘርፍ ምክትል ዋና ዳይሬክተር ወይዘሮ ምስራቅ ጥላሁን በበኩላቸው፣ በአቪዬሽን ኢንዱስትሪው የሚሰማሩ የከተማ አስተዳደሮች፣ ክልል መስተዳድሮችና የግል ባለሀብቶች ወደ ኢንቨስትመንት የሚሰማሩበት የአሰራር ማቀፍ መዘጋጀቱን ተናግረዋል።

የኢትዮጵያ ሲቪል አቪዬሽን ባለስልጣን በቅርቡ ከኢትዮጵያ ኢንቨስትመንት ኮሚሽን ጋ የመግባቢያ ሰነድ መፈረሙ የሚታወስ ነው።

በሞገስ ተስፋ

በበጀት ዓመቱ ስድስት ወራት ውስጥ 397 ኪሎሜትር የአስፋልት መንገድ ግንባታ ተከናውኗል
********************
(ኢ ፕ ድ)

በበጀት ዓመቱ ስድስት ወራት ውስጥ 397 ኪሎሜትር የአስፋልት መንገድ ግንባታ መከናወኑን የኢትዮጵያ መንገዶች አስተዳደር አሰታወቀ።

አሰተዳደሩ ባለፉት ስድስት ወራት የስራ አፈፃፀምና በቀጣይ ስራዎች ላይ ያተኮረ ውይይት አካሄደ።

በበጀት ዓመቱ ስድስት ወራት ውስጥ 397 ኪሎሜትር የአስፋልት መንገድ ግንባታ ተካሂዷል። በመደበኛ፣ ወቅታዊና ከባድ ጥገና በአጠቃላይ 5,123 ኪ.ሜ የመንገድ ጥገና ስራ ተከናውኗል።

በበጀት አመቱ የመጀመሪያ 6 ወራት ለተከናወኑ ተግባራት 26.27 ቢሊየን ብር ወጪ ተደርጓል።

የፊታውራሪ ሃብተጊዮርጊስ ዲነግዴ መኖሪያ ቤት የነበረው ታሪካዊ ቅርስ ዕድሳት ተጠናቆ ተመረቀ
*****************
(ኢ ፕ ድ)

የአሜሪካ ኤምባሲ ከዓለም ቅርሶች ፈንድ ጋር በመተባበር በአሜሪካ ግቢ የሚገኘውን በፊታውራሪ ሃብተጊዮርጊስ ዲነግዴ የታነፀ ታሪካዊ ሕንፃ አድሶ አስመረቀ።

በኢትዮጵያ የአሜሪካን ጉዳይ ፈፃሚ አምባሳደር ትሬሲ ጃኮብሰን በምርቃ ሥነ-ሥርዓቱ ላይ እንደተናገሩት፤ የአሜሪካ ኤምባሲ ከዓለም ቅርሶች ፈንድ ጋር በመተባበር ታሪካዊ ቅርሱን የማደስ ሥራ አጠናቆ አስመርቋል። https://www.press.et/?p=92930

የኢትዮጵያ መንግስት በጄኔቫ ከሚገኙ የባለብዙ ወገን ተቋማት ጋር ያለው ትብብር አጠናክሮ እንደሚቀጥል ገለጸ
******************
(ኢ ፕ ድ)

በተባበሩት መንግሥታት ድርጅት የጄኔቫ ቢሮ እና በስዊዘርላንድ የሚገኙ ዓለም አቀፍ ተቋማት የኢትዮጵያ ቋሚ መልዕክተኛ አምባሳደር ፀጋአብ ክበበው በጄኔቫ የተመድ ቢሮ ዳይሬክተር ጄኔራል ለሆኑት ታቲያና ቫሎቫያ የሹመት ደብዳቤያቸውን አስገብተዋል።

አምባሳደር ፀጋአብ ከዳይሬክተር ጄኔራሏ ጋር በነበራቸው ውይይት መንግሥት በጄኔቫ ከሚገኙ ዓለም አቀፍ የባለብዙ ወገን ተቋማት ጋር ያለውን ትብብር ይበልጥ ለማጠናከር ቁርጠኛ መሆኑን ተናግረዋል።

በኢትዮጵያ ወቅታዊ ሁኔታ ላይ ውይይት ማድረጋቸውም ተገልጸዋል።

አምባሳደር ፀጋአብ ከበበው ጄኔቫ ዓለም ዓቀፍ አውሮፕላን ማረፊያ ሲደርሱ ምክትል ቋሚ ተጠሪ አምባሳደር ያኒት አበራን ጨምሮ የሚሲዮኑ ባልደረቦች አቀባበል አድርገውላቸዋል።

አምባሳደር ፀጋአብ በቅርቡ በተደረገው የአምባሳደሮች ሹመት ወደ ጄኔቫ ከመዛወራቸው በፊት በአውስትራሊያ የኢፌዲሪ ልዩ መልዕክተኛና ባለሙሉስልጣን አምባሳደር በመሆን ሲያገለግሉ ቆይተዋል።