ኢትዮ ቴሌኮም እና የኢንዱስትሪ ፓርኮች ልማት ኮርፖሬሽን በኤክስፖርት የጥራት ደረጃ የተዘጋጁ የኢንዱስትሪ ምርቶችን በ'ዘመን ገበያ' ለሀገር ውስጥ ሸማቾች ለማቅረብ የሚያስችል ስምምነት ፈጸሙ።

ይህም በኢንዱስትሪ ፓርኮች ውስጥ የሚገኙ አምራቾች ለዓለም አቀፍ ገበያ የሚያቀርቧቸውን የኤክስፖርት ደረጃቸውን የጠበቁ ምርቶች በቴሌብር 'ዘመን ገበያ' አማካኝነት ለመጀመሪያ ጊዜ ለሀገር ውስጥ ሸማቾች እንዲያቀርቡ የሚያስችላቸውን ታሪካዊ የመግባቢያ ስምምነት ነው።

ይህ ስምምነት በከፍተኛ የጥራት ደረጃ የተመረቱ የጨርቃ ጨርቅና አልባሳትን፣ የቆዳና የቆዳ ውጤቶችን፣ የአግሮ-ፕሮሰሲንግ ምርቶችን፣ የኤሌክትሮኒክስና የቴክኖሎጂ ውጤቶችን፣ የመድኃኒትና የሕክምና ግብዓቶችን እንዲሁም ሌሎች የማኑፋክቸሪንግ ምርቶችን በዘመን ገበያ ላይ ለግብይት የሚያቀርብ ነው።

የግብይት ሂደቱም በመረጃ በተደገፈ ዘመናዊ የክምችትና የሥርጭት አሰራር የሚከናወን በመሆኑ፣ የአምራቾችን የሎጂስቲክስና የኦፕሬሽን ወጪ በእጅጉ በመቀነስ ለሸማቾች ጥራት ያላቸው ምርቶች በተመጣጣኝ ዋጋ እንዲደርሱ ለማድረግ ያስችላል።

ከዚህም ባሻገር አጋርነቱ በኢንዱስትሪ ፓርኮች ውስጥ የሚገኙ አምራቾችን የዲጂታል ክህሎት አቅም በመገንባት፣ ምርቶቻቸውን በሰፊው በማስተዋወቅና አስተማማኝ የገበያ ትስስር በመፍጠር አጠቃላይ የሀገራችንን የንግድ ሥነ ምህዳር ወደ ዘመናዊና ተወዳዳሪ ደረጃ ለማሸጋገር የማይተካ ሚና ይጫወታል።

ይህ ኩባንያችን በነደፈው ስትራቴጂ መሠረት፣ የአምራች ኢንዱስትሪውን ዲጂታላይዝ በማድረግና የንግድ እንቅስቃሴውን በማዘመን በንግዱ ሥነ ምህዳር አስተማማኝና ቀልጣፋ አገልግሎት በማቅረብ የዲጂታል ኢትዮጵያን ጉዞ ለማፋጠን ከፍተኛ አስተዋጽኦ ያበረክታል።

ተጨማሪ፡ https://bit.ly/48SdQgc

ኢትዮጵያን ወደ ታሪካዊ ከፍታ ለማሸጋገር የሚያስችለው ዲጂታል ኢትዮጵያ 2030 ስትራቴጂ ይፋ ሆነ!

የዲጂታል ኢትዮጵያ 2025 የትግበራ ምዕራፍ ይፋዊ የማጠናቀቂያና ኢትዮጵያን ታሪካዊና ዓለም አቀፍ ተወዳዳሪ ወደሆነ ከፍታ የሚያሸጋግረው የዲጂታል ኢትዮጵያ 2030 ስትራቴጂ ክቡር ጠቅላይ ሚኒስትር ዐቢይ አህመድ (ዶ/ር) በተገኙበት በዛሬው ዕለት ይፋ ሆኗል። የዲጂታል ኢትዮጵያ 2030 ስትራቴጂ ሁሉን አቀፍና አካታች የዲጂታል አገልግሎቶች አቅርቦትን አጠናክሮ ለመቀጠል የሚያስችል፣ ፈጠራ የሚያበረታታና ሰው ተኮር ስትራቴጂ መሆኑና ይህም ሙሉ የኢኮኖሚ ትራንስፎርሜሽን ለማምጣት ቁልፍ ሚና እንደሚኖረው በመርሀ ግብሩ ተገልጿል።

በመርሃ ግብሩ ላይ ገለጻ ያደረጉት ዋና ሥራ አስፈጻሚያችን ፍሬሕይወት ታምሩ ዲጂታል ኢትዮጵያ 2025 ስትራቴጂ ትግበራ ባለፉት አምስት ዓመታት መጠነ ሰፊ ትሩፋቶችን ማስገኘቱን ገልጸው በቴሌኮም ዘርፍ የሞባይል ደንበኞች ቁጥርን 97 ሚሊዮን ማድረስ መቻሉን፣ ከዚህም ውስጥ 57 ሚሊዮኑ የኢንተርኔት ተጠቃሚዎች መሆናቸውን፣ አንድ ሺህ ሰለሳ ከተሞችም የ4ጂ ኔትወርክ ተደራሽ መሆናቸውን ገልጸዋል። በዲጂታል ክፍያ መስክ ማሕበረሰባችንን ተጠቃሚ ለማድረግ በተከናወኑ መሰረታዊ የዲጂታል መደላድሎች እና የፓሊሲ ማሻሻያዎች የሞባይል መኒ አካውንት ቁጥርን 162.4 ሚሊዮን መድረሱን ገልጸው ይህም የፋይናስ አካታችነት ለማረጋገጥ የሚደረገውን ጥረት በእጅጉ ማገዙን አስገንዝበዋል….