<<ሀገራዊ የኃይል አቅርቦት ፍላጎትን ለማሟላት የ10 ዓመት የኃይል መሰረተ ልማት ፍኖተ ካርታ ተነድፏል>> ኢንጂነር አሸብር ባልቻ
...///...

የኢትዮጵያ ኤሌክትሪክ ኃይል በቀጣዮቹ 10 ዓመታት የኃይል ማመንጨት አቅምን ለማሳደግ፣ የማስተላለፊያ መሰረተ ልማቶችን ለማዘመን እና አጠቃላይ የግሪድ ሥርዓቱን ለማሻሻል የሚያስችል የ30 ቢሊዮን ዶላር የኃይል ልማት ዕቅድ ይፋ ማድረጉን አስታወቀ።

​የተቋሙ ዋና ሥራ አስፈፃሚ ኢንጂነር አሸብር ባልቻ ለኢትዮጵያ ፕሬስ ድርጅት ጋዜጣ ፕላስ እንደገለፁት የረጅም ጊዜ ሀገራዊ የኃይል አቅርቦት ፍላጎትን ለማሟላት የሚያስችል የ10 ዓመት የኃይል መሰረተ ልማት ፍኖተ ካርታ ተነድፏል።

​ማዕቀፉ በመላ ሀገሪቱ የኃይል አቅርቦት አስተማማኝነትን በማጠናከር ለመኖሪያ ቤቶች፣ ለኢንዱስትሪዎች እና ለንግድ ተቋማት ተደራሽነቱን ለማስፋት ያለመ ነው።

​የኤሌክትሪክ ማመንጨት አቅምን ማስፋፋት የኃይል ብክነትን ለመቀነስ ከሚረዱ ጠንካራ የማስተላለፊያ መስመሮች ጋር ሊጣጣም እንደሚገባም አብራርተዋል።

የኤሌክትሪክ አቅርቦቱን አስተማማኝነት ለማረጋገጥ የኃይል ስብጥሩን ለማስፋት መታቀዱን የጠቆሙት ዋና ሥራ አስፈፃሚው ከጂኦተርማል ብቻ ከ10 ሺህ ሜጋ ዋት በላይ የሚገመት የማመንጨት አቅም መኖሩን ገልፀዋል።

​የታቀደው የ30 ቢሊዮን ዶላር ኢንቨስትመንት ከመንግሥት በጀት፣ ከግሉ ዘርፍ፣ ከአየር ንብረት ፋይናንስ እንዲሁም በመንግሥትና የግል አጋርነት (PPP) ከሚከናወኑ ፕሮጀክቶች በሚገኝ የገንዘብ ምንጭ የሚሸፈን መሆኑንም ተናግረዋል።

ከዚህ በተጨማሪ ቀጣናዊ የኃይል ትስስርን ለማጠናከር ደቡብ ሱዳን እና ሶማሊያን ያካተተ የ1 ቢሊዮን ዶላር ፕሮጀክቶች የአዋጭነት (Feasibility) ጥናቶች እየተካሄዱ ይገኛሉ ብለዋል።

ፕሮጀክቶቹ ኢትዮጵያ በምስራቅ አፍሪካ ያላትን ቀዳሚ የኃይል አቅራቢነት ሚና በከፍተኛ ሁኔታ ለማስፋፋት የተነደፉ መሆናቸውንም ተናግረዋል።

​ይህ ሁሉን አቀፍ ስትራቴጂካዊ ዕቅድ ኢትዮጵያ ለሀገር ውስጥ ዘላቂ ልማት እና ለቀጣናዊ ኢኮኖሚያዊ ትስስር ያላትን ቁርጠኝነት የሚያረጋግጥ መሆኑን ኢንጂነር አሸብር አብራርተዋል።

#የኢትዮጵያ_ኤሌክትሪክ_ኃይል