"للشعر وجهة نظر في غالب الاحيان
‏وانت اغلب الاحيان والشعر والشاعر"
‏__تركي المشيقح.

"وش يحد المنتمي على الذهاب؟
‏ووش يقيد خطوة اللامنتمي؟

‏دام ما له أرض وأصحاب وقراب
‏ولا حبيب فوق صدره يرتمي

‏ليلة مقيم وليلة في غياب
‏ما ولف قلبه من الخلق ادمي

‏أمست الوديان في عينه سراب
‏والفيافي شوك وعيونه عمي

‏عينك تصيبه ويغشاه ارتياب
‏له بها ميتم وحزن موسمي"

"يا ورد يثّر عليه اللمس
طول العمر ليت من شمّه


احتجت حبّ و صباح و همس
و وردّتني صافي الجمّه"

"لو الكلام يفيد.. من غير الأفعال
يمدي على صوت الرعد تنبت الأرض."
__رايد هلال.

«متولمٍ له بالعتب والمشاريه
‏ومخلّيٍ له باب قلبي مسايف»

__منيف الجراش.

"أجي على صوت الوَعَدْ منِّه وفي نفس المصير
‏وأنا أحسب إنِّي كنت في صدره على ذاك الوَعَدْ"
‏__أبعاد التركي.

"وش بلا قلبك من أيّام متضايق
ليه أحبّك — جاتني بصوت حزين

وين أحبّك ذيك يوم الصوت رايق
ونبرتك فيها فرح مدري حنين

عاتبيني : قولي بـ صدري حرايق
قولي اللي بخاطرك لا تسكتين

قولي أكره .. كل عين بك توايق
وكل مدح اللي بقصيدك طايرين

لا يهمونك .. حواليني .. الخلايق
وحدك اللي وسط قلبي تسكنين

والله ان الحزن أبد ما هو بـ لايق
فاقدك بالحيل وأنتي تضحكين!"
– فيصل القاضي

"تمادى الليل بعيون السهر يا الخاطر المكسور
‏و أنا ما اخذت من ماضي زماني غير غربالي "

"بدون أسباب أحب، ‏وصادق شعور بدون أسباب
‏لكن نفسي ليا طابت تطيب وعندي أسبابي"
‏__مي اللافي.

"تميّز بزين وطبع ومقابلٍ مملوح
‏تفوّق على جيله وجيلٍ سمعنا به"

"دربٍ يعز النفس وآخره موتي
‏بمشيه كني شايف الموت —حفلة"

__فارس بدر.

"لو اطيع الندم كان احترقت من العتب بالنار
‏وأنا صبري خشب..صلابته ما تمنع حروقه."

__‏عاطف الحربي.

"كم شفوفٍ خيّمت في نفوس المستحين
‏لين ماتت بين بني الآمال وهدّها"

‏__سعد بن جدلان.

"لي وليفٍ كل هرجه بالخلاف
‏العجب لله درُه من وليف

‏ينكشف لي عن ثناياه الرهاف
‏من رفيف البرق تلقى له رفيف

‏يا لطيف ٍمن حكاياه اللطاف
‏سمني لعيونها عبداللطيف

‏كن وصف جعودها فوق الرداف
‏الهواء والماء من فوق الغريف"

‏ابن لعبون

محدٍ بنصف الليل سلّم على الشمس
‏إلا أنا ساعة نظرتك بعيني

"لا صرت تنشد يا رفيقي عن الحال
مالي على كتمانها عنك حيله

الصبر عن بوح الاحاسيس قتّال
والبوح في بعض المواقف فشيله

لو كل ما يطري على البال ينقال
ما كان شفت ان الثقيلة، ثقيلة

ابطيت أكافح ضيقة البال بالبال
و ادفع بلا هاجوسها كل ليلة

لين اقبلت مثل السحابة بهمال
تشفي غليل اللي تزايد غليله

اشيل حملٍ.. لو يشيلنّه جبال
الله وامانه.. غير تصبح نثيله"

__خلف بن مشعان.

"الرضا والضّيق ما كانت على البال العمُوس
‏من يحوس البال هذا، وْمن يعرف يرتّبه

‏إن فرح ما شالته الأرض وتحلْواه الجلوس
‏وإن زعل عوّد يشيل الأرض عَلى منكبه

‏ليش أفتّش في ملامح ليلتي هذي وأحوس
‏الليالي من ملامحها على وجهي شبه"

‏__ماجد النفيعي.

"سقيت أرض السهر ليلٍ قراح ولا نبت مرقاد
‏وانا بالي جريد للغرام وورقْ هوجاسه

‏تقول ان النظر محسود ورموش التعب حسّاد
‏تقول ان القلق بين المحاني صبّ وسواسه"

‏__نايف صقر.

"له من الليل الهدوء وصوت (متعبّد) بـ آية
‏ولي من الحلم اليتيم، الحلم و اليتم وزماني"

‏__عبدالله الكايد.