ግንቦት 17፣ 2016 | ዙል ቃይዳ 17፣ 1445 ዓ.ሂ
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••••••
በወራቤ ከተማ ለሐጅ ተጓዦች የግንዛቤ ማስጨበጫ ሥልጠና ተሰጠ።
•••••••••••••••••••••••••••••••••••••••••••
ወራቤ |

የማዕከላዊ ኢትዮጵያ ክልል እስልምና ጉዳዮች ከፍተኛ ምክር ቤት ከክልሉ ሰባት ዞኖች እና ሦስት ልዩ ወረዳዎች ለተወጣጡ የሐጅ ተጓዦች በዛሬው ዕለት የግንዛቤ ማስጨበጫ ሥልጠና ሰጠ።

ሥልጠናውን የሰጡት የማዕከላዊ ኢትዮጵያ ክልል እስልምና ጉዳዮች ከፍተኛ ምክር ቤት ፀሐፊ ሸይኽ ሳዲቅ ወጌቦ ናቸው።

በሥልጠናው ላይ ከሐጃጆች የተለያዩ ጥያቄዎች የተነሱ ሲኾን፣ የማዕከላዊ ኢትዮጵያ ክልል እስልምና ጉዳዮች ከፍተኛ ምክር ቤት ተቀዳሚ ምክትል ፕሬዚደንት ሸይኽ አብዱልወሃብ ሸይኽ በድረዲንና ሸይኽ ሳዲቅ ወጌቦ ምላሽና ማብራሪያ ሰጥተዋል።

ዘንድሮ ከማዕከላዊ ኢትዮጵያ ክልል ከ500 በላይ ሐጃጆች ወደ ሁለቱ ቅዱሳን ከተሞች እንደሚጓዙ ሸይኽ ሳዲቅ ወጌቦ ተናግረዋል።

መስተንግዶን በተመለከተ የዘንድሮ ሐጅ ከቀዳሚዎቹ ዓመታት ለየት ያለ፣ ቀልጣፋና ሁሉም አገልግሎቶች በአንድ ማዕከል የተሰጡበት በመኾኑ ከእንግልት መዳናቸውን ሐጃጆች ነግረውናል።

ስለሐጅ አተገባበር በስልጤ ዞን ከፍተኛ ሸሪዓ ፍርድ ቤት ቃዲ ሸይኽ ሙስጠፋ ጀማል ሰፋ ያለ ማብራሪያ ተሰጥቷል።

ፓስፖርት፣ ቲኬት፣ ቪዛና የቢጫ ወባ ክትባት እዚያው ወራቤ ውስጥ እንደተሰጣቸው የተናገሩት ሐጃጆቹ ለዚህም የማዕከላዊ ኢትዮጵያ ክልል እስልምና ጉዳዮች ከፍተኛ ምክር ቤትን አመስግነዋል።

የግንዛቤ ማስጨበጫ ገለጻው እና የክትባት መርኃ ግብሩ የተሳካ እንዲኾን በኡስታዝ ኻሊድ ሙሐመድ እና በወጣት ጀማል ጎችባሮ የተመራው የወራቤ ከተማ ወጣቶች ጥረት የላቀ ሚና እንደነበረው ተነግሯል።

የሐጃጆችን ሽኝትና የቢጫ ወባ ክትባት መርኃ ግብሩን ያስጀመሩት የስልጤ ዞን ዋና አስተዳዳሪ ክቡር አቶ ዓሊ ከዲር ሲሆኑ፣ ሐጃጆች በተቀደሰው ሀገር ለሀገራችን ሰላም እና ልማት ዱዓ እንዲያደርጉ አደራ ብለዋል።

በዚሁ ጊዜ የስልጤ ዞንና የወራቤ ከተማ አሥተዳደር ለሐጃጆች መስተንግዶ፣ የስልጤ ባህላዊ እስካርቭና ኮፊያ ሥጦታ አበርክቷል።

የኢትዮጵያ እስልምና ጉዳዮች ጠቅላይ ምክር ቤት የስልጤ ዞንና የወራቤ ከተማ አስተዳደርን በ1445 ዓ.ሂ. ሐጃጆችና በማዕከላዊ ኢትዮጵያ ክልል እስልምና ጉዳዮች ከፍተኛ ም/ቤት ስም ያመሰግናል።

•••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

ግንቦት 18፣ 2016 | ዙል ቃይዳ 18፣ 1445 ዓ.ሂ
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••••••
"የሀገር አንድነት የሚፀናው ሰላም ሲኖር በመኾኑ ለሀገራችን ዘላቂ ሰላም የበኩላችንን አስተዋፅዖ ማበርከት ይጠበቅብናል።"
• የክብር ዶክተር ሼይኽ ሐጂ ኢብራሂም
•••••••••••••••••••••••••••••••••••••••••••
ኮምቦልቻ |

"የሀገር አንድነት የሚፀናው ሰላም ሲኖር በመኾኑ፣ ለሀገራችን ዘላቂ ሰላም የበኩላችንን አስተዋፅዖ ማበርከት ይጠበቅብናል" ሲሉ የኢትዮጵያ እስልምና ጉዳዮች ጠቅላይ ምክር ቤት ፕሬዚደንት ተናገሩ።

ፕሬዚደንቱ የክብር ዶክተር ሼይኽ ሐጂ ኢብራሂም ቱፋ ይህን የተናገሩት የኢትዮጵያ እስልምና ጉዳዮች ጠቅላይ ምክር ቤት ከአማራ ክልል እስልምና ጉዳዮች ከፍተኛ ምክር ቤት ጋር በመተባበር በኮምቦልቻ ከተማ ባካሄደው ሀገር አቀፍ የአብሮነትና የወንድማማችነት ጉባዔ ላይ ነው።

"አንድነት ማለት አንድ ዓይነትነት አይደለም" ያሉት ፕሬዚደንቱ፣ ሁሉም ባሉት ልዩነቶች ተቻችሎ፣ አንድ በሚያደርጉት ጉዳዮች ላይ ደግሞ ተከባብሮ መሥራት እንደሚጠበቅበት ተናግረዋል ።

በሰዎች መካከል የአስተሳሰብ ልዩነቶች መኖራቸው ተፈጥሯዊ እንደኾነ የጠቀሱት ክቡር ሸይኽ ሐጂ ኢብራሂም፣ ልዩነቶችን ለማጥበብ ተመራጩ መንገድ በጠረጴዛ ዙሪያ የሰከነ ውይይት ማድረግ ነው ብለዋል።

ሁሉም ሰው ባህሉንና እምነቱን ጠብቆ፣ እምቅ አቅሙን በማስተባበር ለጋራ ሀገሩ ዕድገትና ዘለቄታዊ ሰላም የበኩሉን አስተዋጽዖ ማበርከት እንደሚጠበቅበት ክቡር ሸይኽ ሐጂ ኢብራሂም አሳስበዋል።

የእስላማዊ ወንድማማችነት መሠረቱ ላኢላሃኢለልላህ መኾኑን የተናገሩት ሸይኽ ሐጂ ኢብራሂም፣ ሙስሊሙ ማኅበረሰብ እስላማዊ አንድነቱን በዚህ የሃይማኖትና የእምነት መሠረት ላይ መገንባትና ማጠናከር ይገባዋል ብለዋል።

ከዓመታት በፊት ጀምሮ በአማራ ክልል የሚገኙ ሐሪማዎችን ለመጎብኘት እቅድ እንደነበራቸው የተናገሩት ሼይኽ ሐጂ፣ በአካባቢው ባለው ወቅታዊ የሰላም ችግር ሳቢያ ሊያደርጉ ያሰቡት ለጊዜው አለመሳካቱን ተናግረዋል።

በዛሬው ዕለት በኮምቦልቻ ከተማ በሰደቃ፣ በፓናል ውይይትና በተለያዩ ዝግጅቶች ረፋዱ ላይ በጀመረው የአብሮነት፣ የወንድማማችነት እና የሰላም ጉባዔ ላይ የአዲስ አበባና የድሬደዋ ከተማ አስተዳደር የእስልምና ጉዳዮች ከፍተኛ ምክር ቤቶች ፕሬዚዳንቶች፣ ዓሊሞች፣ ዱዓቶች፣ የመንግሥት ከፍተኛ የሥራ ኃላፊዎችና ጥሪ የተደረገላቸው የከተማው ማኅበረሰብ አባላት ተገኝተዋል።

ክቡር ሼይኽ ሐጂ ኢብራሂም ቱፋ በዚሁ ዕለት
በቀጣይ ጊዜያት በኮምቦልቻ ከተማ ለሚገነቡ አዳዲስ ፕሮጆክቶች የመሠረት ድንጋይ አኑረዋል።

በክቡር ሼይኽ ሐጂ ኢብራሒም ቱፋ የተመራዉ የኢትዮጵያ እስልምና ጉዳዮች ጠቅላይ ምክር ቤት የልዑካን ቡድን ዛሬ ጠዋት ኮምቦልቻ ከተማ ሲደርስ ደማቅ አቀባበል ተደርጎለታል።

•••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

ግንቦት 18፣ 2016 ዓ.ል | ዙል ቂዳህ 18፣ 1445 ዓ.ሂ.
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••••••
ሐጃጆች በኢትዮ ቴሌኮም ሲም ካርድ ከመካ እና ከመዲና ወደ ሀገር ቤት ስልክ መደወል በመቻላቸው መደሰታቸውን ተናገሩ።
•••••••••••••••••••••••••••••••••••••••••••
መዲና |

የ1445 ዓ.ሒ. የአሏህ እንግዶች በሐጅ ምዝገባ ወቅት ያስመዘገቡትን የኢትዮ ቴሌኮም ሲም ካርድ በመጠቀም ከመዲና እና ከመካ ወደ ቤተሰቦቻቸው ስልክ ደውለው በሰላም መግባታቸውን መግለጽ በመቻላቸው መደሰታቸውን ተናገሩ።

በሐጅ ጉዞ ላይ ውጣ ውረድና ልፋት መኖሩ የኢባዳ አካል ቢኾንም፣ ጠቅላይ ምክር ቤቱ ለዘንድሮ የአሏህ እንግዶች ተገቢ አገልግሎት በመስጠት ከኢባዳቸው እንዳይዘናጉ ማድረግ በመቻሉ መደሰታቸውን ሐጃጆች ተናግረዋል።

የኢትዮጵያ እስልምና ጉዳዮች ጠቅላይ ምክር ቤት አገልግሎቱን ከጊዜ ወደ ጊዜ እያዘመነ በመሄድ፣ የዘንድሮ የአሏህ እንግዶች የኢትዮ ቴሌኮም ሲም ካርዳቸውን በሳዑዲ ሲምካርድ መቀየር ሳያስፈልጋቸው፣ የሮሚንግ አገልግሎት እንዲያገኙ መደረጉን መዲና የተገኙት የመጅሊሱ የIT ክፍል ባልደረባ አቶ ጀማል ኢብራሂም ተናግረዋል።

ባለሙያው አያይዘው እንደጠቀሱት የኢትዮጵያ እስልምና ጉዳዮች ጠቅላይ ምክር ቤት ለ1445 ዓ.ሒ. ሐጃጆች ብዙ ጠቃሚ አሠራሮችን ሥራ ላይ እያዋለ ይገኛል።

ጠቅላይ ምክር ቤቱ ከኢትዮ ቴሌኮም ጋር በተስማማው መሠረት የ1445 ዓ.ሒ ሐጃጆች የሐጅ ምዝገባ ሲያካሂዱ ያስመዘገቡት ስልክ ቁጥር በሮሚንግ አገልግሎት የተመዘገበ በመሆኑ፣ ሲም ካርዳቸውን ይዘውት በመጓዝ የአገልግሎቱ ተጠቃሚ መኾን እንደሚችሉ አቶ ጀማል ተናግረዋል።

ከኢትዮ ቴሌኮም ጋር በተገባው ውል መሠረት የሮሚንግ አገልግሎቱ ተጠቃሚዎች፣ 150 ደቂቃ የድምጽ እና 500 ሜጋ ባይት ፓኬጅ መጠቀም እንደሚችሉ አቶ ጀማል ተናግረዋል።

ብዙ ሐጃጆች ከመነሻው ቴሌብር ላይ ያለውን የሐጅ ፓኬጅ ገዝተው በመምጣት ስህተት እየሠሩ እንደሚገኙ የጠቆሙት አቶ ጀማል፣ ይህን መጠቀም የሚችሉት ነባር የሮሚንግ አገልግሎት ተጠቃሚ ሐጃጆች ብቻ መኾናቸውን ተናግረዋል።

የሮሚንግ አገልግሎት ተጠቃሚ ያልነበሩ ሐጃጆች፣ በሐጅ ምዝገባ ወቅት ያስመዘገቡት ቁጥር ያለበትን ሲም ካርድ ይዘው በመምጣት የፓኬጁ ተጠቃሚ እንደሚኾኑ ተናግረዋል።

በሐጅ ቆይታቸው በእርሱ ሲጠቀሙ ቆይተው የተሰጣቸው ፓኬጅ ሲያልቅ፣ ቴሌብር ላይ ያለውን የሐጅ ፓኬጅ የሚጠቀሙበት መንገድ እንደሚመቻች አቶ ጀማል ተናግረዋል።

ወደ መዲና ለመሳፈር ተራቸውን በመጠበቅ ላይ የሚገኙ የአሏህ እንግዶች፣ ለሐጅ ሲመዘገቡ ያስመዘገቡት ስልክ ቁጥር ያለበትን ሲም ካርድ ይዘው እንዲሳፈሩ አቶ ጀማል በአጽንዖት አሳስበዋል።

የኢትዮጵያ እስልምና ጉዳዮች ጠቅላይ ምክር ቤት ከኢትዮ ቴሌኮም ጋር በመተባበር ሐጃጆችን የሮሚንግ አገልግሎት ተጠቃሚ ያደረገው፣ አገልግሎቱን ከማዘመን ባሻገር ለራሳቸው ደኅንነት ሲል መኾኑንም ተናግረዋል።

የሮሚንግ (Roaming) አገልግሎት፣ በሐጅ ወቅት ብቻ ሳይኾን፣ በማንኛውም ጊዜ ከሀገር የሚወጡ ሰዎች ከየትኛውም የዓለም ሀገር ኾነው በሀገር ቤት ሲም ካርዳቸው መጠቀም የሚያስችል አገልግሎት ነው።

​•••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

ግንቦት 19፣ 2016 ዓ.ል | ዙል ቂዳህ 19፣ 1445 ዓ.ሂ.
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••••••
አስደሳች ዜና ለ1445 ዓ.ሒ የአሏህ እንግዶች!
•••••••••••••••••••••••••••••••••••••••••••

የኢትዮጵያ እስልምና ጉዳዮች ጠቅላይ ምክር ቤት ከኢትዮ-ቴሌኮም ጋር በገባው ውል መሠረት፣ የ1445 ዓ.ሒ የአሏህ እንግዶች፣ ሀገር ውስጥ በሚጠቀሙበትና በሐጅ ምዝገባ ወቅት ባስመዘገቡት ሲም ካርዳቸው ከሳዑዲ አረቢያ (ከመዲናም ኾነ ከመካ) በሀገር ቤት ከሚገኙ ወዳጅ ቤተሰቦቻቸው ጋር በሮሚንግ አገልግሎት መገናኘት የሚችሉ መኾኑን ያበስራል።

ለዚህ አገልግሎት እያንዳንዱ ሐጃጅ የ150 ደቂቃ የድምፅ እና የ500 ሜጋ ባይት ፓኬጅ ተጠቃሚ እንዲኾን መደረጉን ሲያስታውስ ደስታ ይሰማዋል።

ስለሆነም፣ ሐጃጆች በሐጅ ምዝገባ ወቅት ያስመዘገቡት ስልክ ቁጥርዎ በሚገኝበት ሲም ካርድ ከሳዑዲ ደውለው፣ ሀገር ቤት ከሚገኙ ቤተሰብዎና ወዳጅ ዘመዶችዎ ጋር ይገናኙ።

ሐጅ መብሩር!

የኢትዮጵያ እስልምና ጉዳዮች ጠቅላይ ምክር ቤት።

•••••••••••••••••••••••••••••••••••••••
بِسْمِ ٱللَّهِ ٱلرَّحْمَٰنِ ٱلرَّحِيمِ
Uduu Gammachiisa!!

Hujaajoota Hajji bara 1445 hundaaf
Manni Maree Dhimoota
•••••••••••••••••••••••••••••••••••••••
Islaammumaa Etiyoophia waligalaa walligaltee Etiiyoo Teleekoomi wallin godheen hujaajoonni hajji bara Hijraa 1445 kessumma rahmaan ta'uun gara Sa'uudiitti imalan hundinuu Sa'uudii taa'ani maatiii isaanii waliin akka kaffaltti dabalataa tokko malee walqunamuu kan isaan dandeessisu paakeeji sagalee daqiiqa 150 fi pakeeji roomingii meegaa baytii 500 tti akka fayyadaman carraa ummun kennan gammachuttu nutti dhagayama.

Kanaafuu hujaajnii kammuu lakkofssa bilbilaa yokan Simkaardii etiyoo teleekomii hajji baraa hijraa 1445 galmeessisetti fayyadammun Saudi Arabiyaa irraa maatii isaatiin walqunnamtti akka godhuu danda'uu isin hubachiisna.

Manni Maree Dhimoota
Islaammumaa Etiyoophia waligalaa

ግንቦት 22፣ 2016 | ዙል ቂዳህ 22፣ 1445 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••••••
የ1445ዓ.ሒ የሐጃጆች የሕክምና አገልግሎት አሰጣጥ ስኬት የቡድን ሥራው መጠናከር መኾኑ ተነገረ።
•••••••••••••••••••••••••••••••••••••••••••
መካ |

የአሏህ እንግዶች ለሚገጥማቸው የጤና እክል የቅርብ ክትትል ለማድረግ ከዘንድሮ ሐጃጆች ጋር የተጓዘው የሕክምና ቡድን ባደረገው የጋራ ውይይት የሕክምና አገልግሎቱ ስኬታማ እና ውጤቱ ያማረ የሚሆነው ቅንነትና የቡድን ሥራው ሲጠናከር መኾኑን ተናገረ።

የሐጃጆች የሕክምና አገልግሎት ለመስጠት አስቀድሞ የተጓዘው ቡድን በሕክምናው ዘርፍ በተለያዩ ተጓዳኝ ሙያዎች ልምድ ያካበቱ ባለሙያዎችን ያካተተና ቅንጅት ያለው መሆኑን የሕክምና ቡድኑ መሪ ዶክተር አሚን ሙሐመድ ተናግረዋል።

የሕክምና ቡድኑ ከአገር ቤት ጀምሮ የጋራ ሥልጠና የወሰደና የቡድን መንፈስ ያዳበረ በመኾኑ፣ የእርስ በርስ መግባባቱ ሥራውን በኃላፊነት እንዲወጣ መልካም መደላድል እንደፈጠረለት ዶክተር አሚን ነግረውናል።

የቡድኑ ባልደረባ የኾኑት ዶ/ር ሙሐመድ ሳኒ ቲጃኒ በበኩላቸው፣ ምንም እንኳ የሥራ ውሉ ሕክምናን ብቻ የሚመለከት ቢኾንም፣ የቡድኑ አባላት ክፍሉን ለማደራጀት የመድኃኒቶች ካርቶን እየተሸከሙ ጭምር ሑጃጁን ዝቅ ብለው ለማስተናገድ ጥረት እያደረጉ መሆኑን ተናግረዋል።

የሕክምና ቡድኑ አደረጃጀት ለታማሚው ፈጣን ምላሽና ትኩረት ለመስጠት የሚያስችል መኾኑን የጠቀሱት ዶ/ር አሚን፣ ቡድኑ ከ20 ያላነሱ ባለሙያዎች የተካተቱበት መሆኑን ተናግረዋል።

ጠቅላይ ምክር ቤቱ የ1445 ዓ.ሒ የአሏህ እንግዶች የሐጅ ጉዞ የተሳካ እንዲኾን ለሐጃጆች የሕክምና አገልግሎት ሥራዎችን ለማደራጀት ቀድሞ በመጓዝ ሥራ መጀመሩን ዶ/ር አሚን ጠቅሰዋል።

የሕክምና ቡድኑ በአፍሪካ ከደቡብ አፍሪካ እና ከናይጀሪያ ቀጥሎ በሦስተኛ ደረጃ የሕክምና ጣቢያውን ያደራጀ ሲኾን፣ በቅርቡ ለሁለት ደረጃቸውን የጠበቁ ክሊኒኮች ፈቃድ መሰጠቱንም ዶ/ር አሚን አስታውሰዋል።

•••••••••••••••••••••••••••••••••••••
የኢ.እ.ጉ.ጠ. ም/ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | twitter.com/eiasc

ግንቦት 22፣ 2016 ዓ.ል. | ዙል ቂዳህ 22፣ 1445 ዓ.ሒ.
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••
''ኑስክ" የተሰኘው የሐጃጆች ልዩ መታወቂያ ለሐጃጆች እየታደለ ነው።
••••••••••••••••••••••••••••••••••••••
መካ |

የሳዑዲ አረቢያ የሐጅ ሚኒስቴር ሐጅ ለማድረግ የሐጅ ቪዛ መያዝን ግዴታ ማድረጉን ተከትሎ፣ በሕጋዊ የሐጅ ቪዛ ለተጓዙ ሐጃጆች 'ኑስክ' የተባለ ልዩ የመታወቂያ ካርድ ማደል ጀመረ።

'ኑሱክ' የተባለው ልዩ መታወቂያ ካርድ የሕጋዊ ሐጃጅነት ማረጋገጫ በመኾኑ፣ በጠቅላይ ምክር ቤቱ በኩል ሕጋዊ ሂደቱን ተከትለው ለተጓዙ ኢትዮጵያውያን ሐጃጆች የሚኒስቴሩ ሠራተኞች ማረፊያቸው ድረስ በመምጣት እየሰጧቸው መኾኑ ታውቋል።

ሕጋዊነትን ለማረጋገጥ 'ኑሱክ' የተባለውን ልዩ መታወቂያ ካርድ መያዝ ግዴታ መኾኑን ሚኒስቴሩ ያሳወቀ ሲኾን፣ ከዞን ሁለት ጀምሮ መዲና ለሚገቡ የአሏህ እንግዶች አዉቶብስ ላይ እያሉ መታወቂያው እንደሚታደላቸው የጠቅላይ ምክር ቤቱ ምክትል ፕሬዚደንትና የሐጅና ዑምራ ዘርፍ ተጠሪው ሸይኽ አብዱልአዚዝ ሸይኽ አብዱልዋሊ ተናግረዋል።

በመካ የኢትዮጵያ የሐጅ ጉዳይ ዋና ኃላፊ
የኾኑት ሸይኽ አብዱልአዚዝ የሐጃጆች ልዩ መታወቂያ በሳዑዲ የሐጅ ሚኒስቴር ታትሞ በጽሕፈት ቤታቸው አማካይነት ለሕጋዊ ሑጃጆች የሚታደል በመኾኑ፣ የምክር ቤቱ የሐጅ ክፍል አብሮ ከሚኒስቴሩ ጋር እየሠራ መኾኑን ተናግረዋል።

'ኑሱክ' ልዩ የሐጃጆች መታወቂያ ሥራ ላይ መዋሉ፣ ሚና እና አረፋ ላይ ሕጋዊ ባልኾኑ ሐጃጆች ሳቢያ የሚፈጠርን የመጨናነቅ ጫና ለመቀነስ ታስቦ እንደተዘጋጀ ከሚኒስቴሩ ለመረዳት መቻላቸውን ሸይኽ አብዱልአዚዝ ተናግረዋል።

"ወንድሞቻችን በቴክኖሎጂ ሲስተም ላይ ባደረጉት ጥረት፣ በሐጅ ዙሪያ የነበሩ በርካታ ችግሮች እየተፈቱ መሆኑን የጠቀሱት ሸይኽ አብዱልአዚዝ፣ መካ ላይ ያለው የዞን ድልድል መነሻ ለሚናና ለአረፋ በጣም የሚረዳ ትልቅ ሥራ መሆኑን ተናግረዋል።

የዞን አንድ ሐጃጆች ገብተው እየተጠናቀቁ በመኾኑ፣ ከሁለት ቀናት ባነሰ ጊዜ ውስጥ የዞን ሁለት ሐጃጆች መግባት እንደሚጀምሩ የጠቀሱት ሸይኽ አብዱልአዚዝ፣ በቀጣዮቹ ሁለት ሳምንታት ሁሉም ሐጃጆች ተጠቃልለው ወደ ማረፊያቸው ይገባሉ ብለዋል።

ሸይኽ አብዱልአዚዝ፣ የሳዑዲ የሐጅ ሚኒስቴር የሐጅ ቪዛ ያልያዙ ሰዎች በሐጅ መከወኛ ቦታዎች እንዳይንቀሳቀሱ ስለሚያደርግ፣ በሚና አካባቢ ሊደርስ የሚችለውን ጫና የሰው ኃይላችንን በማቀናጀት በቀለጠፈ መንገድ መልክ እናስይዘዋለን ብለዋል።

"ይህን በማድረግም፣ በአላህ ፈቃድ፣ ''የዘመነ አገልግሎት ለአልረህማን እንግዶች" የሚለውን መሪ ቃላችንን ተግባራዊ እንደምናደርግ ተስፋ አለን" ብለዋል።
​•••••••••••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

ግንቦት 24፣2016 ዓ.ል ዙል ቃዒዳ 24፣1445 ዓ.ሒ

بِسْمِ ٱللَّهِ ٱلرَّحْمَٰنِ ٱلرَّحِيمِ                             

"በአለም አቀፍ ደረጃ የኢትዮጵያ ስም ላስጠሩ ሀፊዞች የ1445 የሐጅ ቪዛ ስጦታ በጠቅላይ ምክር ቤቱ ስም ሳበረክት ደስታ ይሰማኛል"

የክቡር ዶክተር ሼይኽ ሐጂ ኢብራሂም

አዲስ አበባ (ግንቦት 24፣2016 ዓ.ል)
የኢትዮጵያ እስልምና ጉዳዮች ጠቅላይ ምክር ቤት ፕረዚዳንት የክቡር ዶክተር ሼይኽ ሐጂ ኢብራሂም ቱፋ ሀገራችን ኢትዮጵያን ወክለው በሊቢያ በተደረገው አለም አቀፍ የቁርአን ውድድር ላይ ከፍተኛ ዉጤት ላስመዘገቡ ሁለት ወጣቶች የ1445 ዓ.ሒ የሐጅ ቪዛ ፤ በተጨማሪም ለሁለቱ ተወዳዳሪዎች ና ለዘይድ ኢብን ሳቢት የቁርአን ማህበር የምስክር ወረቀት አበረከቱ።

ጠቅላይ ምክር ቤቱ በቁርዓን ውድድር ሀገራቸውን ያስጠሩትን ወጣቶች ከዚህ በደመቀ መልኩ የመቀበል ከፍተኛ ፍላጎት የነበረው ቢሆንም ወቅቱ የሑጃጆች ሽኝት ስራ ላይ ምክርቤቱ ያለ በመሆኑ ደማቅ አቀባበል ማድረግ አለመቻሉን ገልፀዋል።

የሀገራችን ኢትዮጵያዊ ስም ያስጠሩ ወጣቶችንና ዘይድ ኢብን ሳቢት የቁርአን ማህበር ለዚህ ውጤት በመብቃታቸው ሼይኽ ሐጂ ኢብራሒም በራሳቸውና በጠቅላይ ምክር ቤቱ ስም ምስጋናቸውን አቅርበዋል
።
የእለቱን ፕሮግራም በንግግር የከፈቱት የኢትዮጵያ እስልምና ጉዳዮች ጠቅላይ ምክርቤት ተቀዳሚ ምክትል ፕረዚዳንት ሼይኽ አብዱልከሪም ሼይኽ በድረዲን ሱሩር እንደተናገሩት በቁርዐን ውድድር ከፍተኛ ውጤት ያስመዘገቡት ወጣቶችን በክብር ስንቀበል ደስታ ይሰማናል ብለዋል።

ከ60 በላይ ሀገራት በተሳተፉበት በ ሊቢያው አለም አቀፍ የቁርአን ውድድር ላይ ሀገራችን ኢትዮጵያ በሁለት ዘርፍ ተወዳድራ በቂራተል አሸር 1ኛ ከጂግጅጋ አብዱልወሀብ ኢብራሂም ፤በሰላሳ ጁዝ 2ኛ ከአዲስ አበባ ሙሀመድ ማህሙድ በመውጣት አሸናፊ የሆኑት የዛሬ ተሸላሚ ወጣቶች በቀጣይ በመሠል ዉድድሮች ላይ የሐገራቸውን ስም እንደሚያስጠሩ ተስፋ እንደሚያደርጉ ሼይኽ አብዱል ከሪም ገልፀዋል።

የዘይድ ኢብን ሳቢት የቁርአን ማህበር ፍሬ የሆኑት እኚህ ወጣቶች በሊቢያ በተደረገውና ከ60 ሀገራት ከመጡ ተወዳዳሪዎች መካከል ዉድድሩን በድል ማጠናቀቃቸው ታውቋል።

በጠቅላይ ምክር ቤቱ የተደረገላቸውን የሐጅ ስጦታ ና የምስክር ወረቀት ያስደሰታቸው መሆኑን የገለፁት በሊቢያ በተደረገው የቁርዓን ዉድድር አሸናፊ የሆኑት ሁለቱ ወጣቶች ይኽ አይነቱ ማበረታቻ ለቀጣይ ሀገራቸውን ወክለው ለሚወዳደሩ ብርታት እንደሚሆናቸው ተናግረዋል።

ዛሬ በኢትዮጵያ እስልምናን ጉዳዮች ጠቅላይ ምክር ቤት የተደረገው በሊቢያ የቁርዓን ዉድድር አሸናፊዎች የዕውቅናና የሽልማት መርሐግብር ላይ የጠቅላይ ምክር ቤቱ ዋና ፀሐፊ ሼይኽ ሐሚድ ሙሳ : የአዲስ አበባ እስልምና ጉዳዮች ከፍተኛ ምክር ቤት ፕረዚዳንት የክቡር ዶክተር ሼይኽ ሱልጧን ሐጂ አማን : የኦሮሚያ እስልምና ጉዳዮች ከፍተኛ ምክር ቤት ተቀዳሚ ምክትል ፕረዚዳንት ሼይኽ ሚስባህ አብዱልከሪም ጨምሮ ጥሪ የተደረገላቸው ታዋቂ ግለሰቦች ተገኝተዋል።

.***
የኢ.እ.ጉ.ጠ. ም/ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eia

ግንቦት 25፣ 2016 | ዙል ቂዳህ 25፣ 1445 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••
የምክር ቤቱ ምክትል ፕሬዚደንት ከሑጃጅ መስተንግዶ የሥራ ኃላፊዎች ጋር ተወያዩ።
•••••••••••••••••••••••••••••••••••••••
መካ |

የኢትዮጵያ እስልምና ጉዳዮች ጠቅላይ ምክር ቤት ምክትል ፕሬዚደንትና የሐጅና ዑምራ ዘርፍ ተጠሪ በመካ ከሚገኙ የሑጃጅ መስተንግዶ የሥራ ኃላፊዎች ጋር ተወያዩ።

ሸይኽ አብዱልአዚዝ ሸይኽ አብዱልወሊ ከሑጃጅ መስተንግዶ የሥራ ኃላፊዎች ጋር በተወያዩበት ጊዜ የሐጅ ሥርዓትን ለመከወን ወደ መካ የመጡትን የአሏህ እንግዶች በአማና እና በኃላፊነት ለማገልገል የመስተንግዶ እና የአገልግሎት ክፍል ሠራተኞች በግልና በቡድን እያሳዩት ያለውን ትጋት በማድነቅ ምሥጋና አቅርበዋል።

"ለሑጃጁ በምንሰጠው መስተንግዶና አገልግሎት ውጤታማ የምንኾነው፣ ሁላችንም በመግባባት፣ በኃላፊነት ስሜት፣ በአክብሮትና በቅንነት የአል-ረህማን እንግዶችን ማገልገል ስንችል ብቻ ነው" ሲሉ ተጠሪው ተናግረዋል።

በሐጅ ዙሪያ ቅድመ ዝግጅት አድርገን በመዲና እና በመካ ሐጃጆችን መቀበል ከጀመርን በኋላ የዞን አንድ ሑጃጆችን ጨርሰን የዞን ሁለት ሐጃጆችን ወደመቀበል ገብተናል ያሉት ሸኽ አብዱልአዚዝ፣ የዛሬው ውይይትም ሂደታችንን በመመዘን ቀጣይ ሥራችንን ይበልጥ ያማረ ለማድረግ ያለመ ነው ብለዋል።

በውይይቱ ላይ የመዲና ቆይታቸውን ጨርሰው የሐጅ ቀናት እስከሚደርሱ በመካ ቆይታ የሚያደርጉ የአሏህ እንግዶችን በማስተናገድ ዙሪያ ከሥራ ኃላፊዎቹ ጥያቄዎች የቀረቡ ሲኾን አስተያየቶችም ተሰጥተዋል።

በዚህም ጊዜ፣ ለሐጅ አገልግሎት በተቀጠሩ የሳዑዲ ነዋሪ ሠራተኞችና በጠቅላይ ምክር ቤቱ ሠራተኞች መካከል በተዋረድ ያለመናበብ ክፍተት የተፈጠረባቸው ሁኔታዎች እንደነበሩ ተጠቅሷል።

በዚህ ረገድ ለምሳሌ የአዛዥና የሥራ ድርሻ መደበላለቅ የታየባቸው ሁኔታዎች እንደነበሩ ተጠቅሷል።

በተዘረጋው የመስተንግዶ የአሠራር ሥርዓት መሠረት በመካ የሆቴሎች አደላደልም በሦስት ዞን የተከፈለ እንደመኾኑ፣ የዞን አንድ ሐጃጆች ገብተው እንደተጠናቀቁ፣ ወደ ቀጣዩ ዞን የመስተንግዶ ሥራ በመሄድ ላይ ዩመቀዛቀዝ ስሜቶች ታይተው እንደነበረም ተነስቷል።

የወቅቱን ሥራ ሠርቶ መጨረስን ጠቅላላ ሥራውን የጨረሱ አድርጎ የመቁጠር ስሜት ተፈጥሮ እንደነበርም ተጠቅሷል።

በማረፊያ ክፍሎች ድልድል አንዳንድ ሐጃጆች የቤተሰብ (እናትና ልጅ፣ ባልና ሚስት ወዘተ.) መነጣጠልን የመሰሉ ችግሮች እንደገጠማቸው የተጠቀሰ ሲኾን፣ በዚህ ረገድ ከሐጃጆች የተሟላ መረጃ አለመቅረቡ መፍትኄ አሰጣጡ ላይ ጫና መፍጠሩ ተነስቷል።

የምግብና የጤና አገልግሎት ጉዳይን ጨምሮ በውይይቱ ላይ ከሥራ ኃላፊዎቹ ጥያቄዎችና ሐሳቦች የተነሱ ሲኾን፣ ሸይኽ አብዱልአዚዝ የተነሱ ችግሮች ሊፈቱ የሚችሉበትን መላ በመጠቆም የሥራ ኃላፊነትና አቅጣጫ ሰጥተዋል።

በዚሁ ጊዜም ሁሉም የጠቅላይ ምክር ቤቱ የልዑካን ቡድን አባላት በሥራ ላይ የመገኘት አማና እና ኃላፊነት እንዳለባቸው አሳስበዋል።

የዞን ኃላፊዎች በየዞናቸው ያለውን የሠራተኞች ኃይል ከሰው ኃይል ስምሪት ኃላፊው ጋር በመነጋገር የግል እና የቡድን ኃላፊነትን በማቀናጀት የጋራ ውጤት ማምጣት እንደሚገባቸው አቅጣጫ ተሰጥቷል።

የሰው ኃይል ስምሪት ኃላፊው አቶ አለልኝ አበባው ከጠቅላይ ምክር ቤቱ የሐጅና ዑምራ ዘርፍ ተጠሪው በተሰጠው አቅጣጫ መሠረት ሥራውን አንደሚያሳልጡ ተናግረዋል።

የሰው ኃይል ስምሪት ኃላፊው ከዞን ኃላፊዎች ጋር የተቀናጀ አሠራር በመከተል በውይይቱ ላይ ስምምነት የተደረሰባቸውን ጉዳዮች ተፈጻሚ እንደሚያደርጉ ተናግረዋል።

ወቅታዊ ሥራን በጋራ ለመወጣት በጊዜውና በቦታው ላይ መገኘት ለአላህ እንግዶች ቀልጣፋ አገልግሎት መስጠት እንደሚያስችልም ተናግረዋል።

በመጨረሻም፣ የተጠያቂነት አሠራርን በመከተልና ተዋረዳዊ ትዕዛዝን ተግባራዊ በማድረግ የአልረህማን አንግዶችን በቅንነት ለማገልገል በጋራ እንሠራለን ብለዋል።

​•••••••••••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

ግንቦት 26፣ 2016 ዓ.ል | ዙል ቂዳህ 26፣ 1445 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
••••••••••••••••••••••••••••••••••••••••••
በ9933 የሐጅ መረጃ አገልግሎት በሦስት ቋንቋዎች እየተሰጠ ነው።
••••••••••••••••••••••••••••••••••••••••••
አዲስ አበባ |

ለ1445 ዓ.ሒ ሐጃጆች የመረጃ አገልግሎት ለመስጠት የተከፈተው የ#9933 ተጠቃሚዎች ቁጥር እየጨመረ መምጣቱን የጠቅላይ ምክር ቤቱ የመረጃ ክፍል አስተባባሪ ወ/ሮ ሲቱ ሙሐመድ ተናገሩ።

#9933 የሐጅ መረጃ አገልግሎት መስጠት ከጀመረ የወራት ዕድሜ ብቻ ያስቆጠሩ ቢኾንም፣ በአጭር ጊዜ ውስጥ የተጠቃሚዎቹ ቁጥር እያደገ መኾኑን ኃላፊዋ ተናግረዋል።

የመረጃ ክፍሉ በሳምንት ለሰባት ቀናት ከጠዋቱ 1:00 ሰዓት እስከ ምሽቱ 2:00 ሰዓት ድረስ በአማርኛ፣ በኦሮሚፋ እና በሶማሊኛ ቋንቋዎች ለ1445 ዓ.ሒ የተከበሩ የአሏህ እንግዶችና ለቤተሰቦቻቸው ፈጣን መረጃ በመስጠት ላይ እንደሚገኝ ወ/ሮ ሲቱ ተናግረዋል።

የመረጃ ክፍሉ ሠራተኛና በአወሊያ መሰናዶ ትምህርት ቤት የኢንፎርሜሽን ቴክኖሎጂ መምህርት የኾኑት ዑስታዛ ኸዲጃ ሙሐመድ የ9933 የመረጃ አገልግሎት ጠቅላይ ምክር ቤቱ የሐጅ አገልግሎትን ለማዘመን በ1445 ዓ.ሒ. ተግባራዊ ካደረጋቸው አሠራሮች አንዱ መኾኑን አስታውሰዋል።

በሳምንት ለ98 ሰዓታት ለሐጃጆች የመረጃ አገልግሎት በመስጠት ላይ የሚገኘው የ9933 የመረጃ አገልግሎት፣ ኢንተርኔት በማይደርስባቸው የሀገራችን ክፍሎች ለሚኖሩ ሐጃጆች ከበረራ ጋር የተያያዘ ወቅታዊ መረጃን በመስጠት ላይ እንደሚገኝ ዑስታዛ ኸዲጃ ተናግረዋል።

ከአሁን በፊት የሐጅ ምዝገባ በኢትዮጵያ እስልምና ጉዳዮች ጠቅላይ ምክር ቤት ብቻ ይካሄድ በነበረበት ጊዜ መረጃ ለማግኘት የግድ ወደ ጠቅላይ ምክር ቤቱ መምጣት ይጠበቅ እንደነበር ያስታወሱት ዑስታዛ ኸዲጃ፣ ይህም ሑጃጁን ላልተፈለገ እንግልትና ወጪ ይዳርግ እንደነበር አስታውሰዋል።

አንዳንድ ኃላፊነት የጎደላቸው ግለሰቦች ወደ 9933 በመደወል ተገቢ ያልሆኑ ንግግሮች እንደሚናገሩ የጠቀሱት ዑስታዛ ኸዲጃ፣ እኒህ ግለሰቦች ከዚህ ድርጊታቸው እንዲቆጠቡ አሳስበዋል።

​​•••••••••••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

ግንቦት 27፣ 2016 | ዙል ቂዳህ 27፣ 1445 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
••••••••••••••••••••••••••••••••••••••••••••
ጠቅላይ ምክር ቤቱ ለሐጃጆች 2 ሚሊዮን ብር የሚያወጣ መድኃኒት ከሀገር ቤት ወደ መካ አስገባ።
••••••••••••••••••••••••••••••••••••••••••••
መካ |
ጠቅላይ ምክር ቤቱ በተቋማዊ አግልግሎት ረገድ ለትውልድ የሚሻገር ተጨባጭ የለውጥ አሻራ ለመስቀመጥ ጥረት ከሚያደርግባቸው አገልግሎቶች አንዱ የሐጅ ሥርዓቱን ማዘመን መሆኑ ተነገረ።

የሐጃጆች የጤና አገልግሎት መጎልበት የዚህ እቅድ አካል መሆኑን የጠቀሱት የኢትዮጵያ እስልምና ጉዳዮች ጠቅላይ ምክር ቤት ምክትል ፕሬዚደንትና የሐጅና ዑምራ ዘርፍ ተጠሪ ሸይኽ አብዱልአዚዝ ሸይኽ አብዱልወሊ ናቸው።

ሸይኽ አብዱልአዚዝ ይህን የተናገሩት ጠቅላይ ምክር ቤቱ ለሐጃጆች የጤና አገልግሎት የሚውል 2 ሚሊዮን ብር የሚያወጣ መደኃኒት ከሀገር ቤት ወደ መካ ሲያስገባ በተካሄደው የርክክብ ስነ ሥርዓት ላይ ነው።

መጅሊሱ ለሐጃጆች የገዛው መደኃኒት ርክክብ በመካ በተካሄደበት ስነ ሥርዓት ላይ የጠቅላይ ምክር ቤቱ የሥራ አመራሮችም ተገኝተዋል።

በዚሁ ጊዜ፣ የኢትዮጵያ እስልምና ጉዳዮች ጠቅላይ ምክር ቤት የዑለማ ጉባዔ ምክትል ሰብሳቢና የፈትዋ ዐብይ ኮሚቴ ሰብሳቢ ዶክተር ጀይላን ኸድር እና የተለያዩ ክልሎችን የሚወክሉ የዑለማ ጉባዔ አባላት የተሰማቸውን ደስታ በመግለጽ መልዕክት አስተላልፈዋል።

የጠቅላይ ምክር ቤቱን ሁለንተናዊ የለውጥ እንቅስቃሴም አድንቀዋል።

ዶክተር ጀይላን ኸድር በዚሁ ጊዜ ባስተላለፉት መልዕክት መጅሊሱ ለአል-ረህማን እንግዶች በጤናው ዘርፍ እያደረገ ያለው መሻሻል ተቋሙ ለሚያገለግለው ሙስሊም ማኅበረሰብ ያለውን ክብር ከፍ የሚያደርግ ኃላፊነትን የመወጣት ምሳሌ ነው ብለዋል።

የ1445 የአል-ረህማን እንግዶች የሕክምና ቡድን መሪ ዶክተር አሚን ሙሐመድ በበኩላቸው የኢትዮጵያ እስልምና ጉዳዮች ጠቅላይ ምክር ቤት በታሪኩ ለሐጃጆች መዳኃኒት ገዝቶ መካ ሲያስገባ የመጀመሪያ ጊዜው መሆኑን ተናግረዋል።

መጅሊሱ ለአላህ እንግዶች በጤናው ዘርፍ በሰጠው ትኩረት የሕክምና ቡድኑ ልዑካን ቀደም ብለው ገብተው ከሳዑዲ የሐጅ ሚኒስቴር የሕክምና ክፍል ጋር የተለያዩ ፈቃዶችና ውሎችን እንዲፈጽም መደረጉን አስታውሰዋል።

ዶክተር አሚን ሙሐመድ አክለውም፣ "የንጉሥ አብዱልአዚዝ ቢን ሳዑድ ሆስፒታል የልብ ችግር ያለባቸውን ሐጃጆች ሊያክም ቃል ገብቶልናል" ብለዋል።

የኢትዮጵያ እስልምና ጉዳዮች ጠቅላይ ምክር ቤት የሐጅና ዑምራ ዘርፍ በወቅቱ 10,000 (አስር ሺህ) ኢትዮጵያውያን ሐጃጆች ቢኖሩም፣ በሐጅ ወቅት በሐጃጆች ሆስፒታል የታከሙት ከ18 ሺህ በላይ መኾናቸውን የሆስፒታሉ የታካሚዎች የምዝገባ ሰነድ ያሳያል።

ይህ ዳታ ኢትዮጵያውያን ሐጃጆች በትንሹም በትልቁም የጤና መታወክ ወደ ሆስፒታሉ መመላለሳቸውን የሚያሳይ ጤናማ ያልሆነ ዳታ እንደኾነ ተጠቁሟል።

የሕክምናው ቡድን መደራጀትና የመድኃኒቶች አቅርቦት መመቻቸት መጅሊስ በለውጥ ሂደቱ ለአል-ረህማን እንግዶች የሰጠውን ትልቅ ክብር የሚያሳይ ነው ተብሏል።

​•••••••••••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

•••••••••••••••••••••••••••••••••••••••••
በጣም አስፈላጊ እና አስቸኳይ ማሳሰቢያ፣
•••••••••••••••••••••••••••••••••••••••••
بِسْمِ ٱللَّهِ ٱلرَّحْمَٰنِ ٱلرَّحِيمِ

ለውድ የ1445 ዓ.ል. ሐጃጆች።

ከቀደሙት ዓመታት በተለየ፣ የሳዑዲ አረቢያ የሐጅ ሚኒስቴር፣ ለ1445 ዓ.ል. ሐጃጆች ኑሱክ የተሰኘ ልዩ የመታወቂያ ካርድ ወይም ባጅ ማዘጋጀቱ ይታወቃል።

ይህን ልዩ መታወቂያ አለመያዝ ሐጃጁን ከሐጅ ለመታገድና ተይዞ ያልተፈቀደለት ሐጃጅ ተብሎ ከሀገር ሊያስባርረው ይችላል።

በመኾኑም፣ የተከበራችሁ የአሏህ እንግዶች ይህን የሐገሪቱ ሕግ በማክበር፣ የኑሱክ ልዩ የመታወቂያ ካርድዎን በማንኛውም ጊዜ እንዲይዙ እናሳስባለን።

እናመሠግናለን።

​•••••••••••••••••••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

ሰኔ 6፣ 2016 ዓ.ል | ዙልሒጃ 7፣ 1445 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••••••••••••••••
የጠቅላይ ምክር ቤቱ ፕሬዚደንት በዞን አንድ የሚገኙ የአርረህማን እንግዶችን ጎበኙ።
•••••••••••••••••••••••••••••••••••••••••••••••••••••
መካ |
የኢትዮጵያ እስልምና ጉዳዮች ጠቅላይ ምክር ቤት ፕሬዚደንት የክብር ዶ/ር ሸይኽ ሐጂ ኢብራሒም ቱፋ እና የጠቅላይ ምክር ቤቱ ተቀዳሚ ምክትል ፕሬዚደንት ሸይኽ አብዱልከሪም ሸይኽ በድረዲን በሁለት የሐጃጆች ማረፊያ (ሆቴል) ጉብኝት አደረጉ።

የጠቅላይ ምክር ቤቱ መሪዎች ለጉብኝት በተገኙበት የዞን አንድ የሐጃጆች ማረፊያ (ሆቴል) የአርረህማን እንግዶችን አላህ ፈቅዶ እዚህ ለመገኘት በቅታችኋልና ለአላህ ምሥጋና ይገባዋል - አላህምዱሊላህ! ብለዋል።

ከሁሉ በላይ የአርረህማን እንግዶችን ማስደሰት፣ ተገቢውን ግልጋሎት መስጠት አላህ ዘንድ የሚያስገኘው ዳረጃ ከፍ ያለ በመኾኑ፣ ስለምናገኘው የአላህ ውዴታ ስንል በተቻለ መጠን በሐጅ ጉዞ አገልግሎት ላይ ያሉ ችግሮችን ኃላፊነት ከሰጣችሁን ጊዜ ጀምሮ በአላህ ፈቃድ ለማሻሻል ጥረት እየተደረገ መሆኑን አስታውሰዋል።

በዚህ የእንኳን ደህና መጣችሁ ዚያራ ላይ ፕሬዚደንቱ በዞን አንድ ውስጥ ለሚገኙት ከሶማሊ እና ከአፋር ክልሎች ለመጡ የአርረህማን እንግዶች መልዕክት አስተላልፈዋል።

"ከዓመቱ ቀናት በላቁት ቀናት ላይ እንገኛለን። አላህ (ሱ.ወ) ቻይ ነው። አላህ (ሱ.ወ) ሰሚ ነው። አላህ (ሱ.ወ)
የተዓምራት ሁሉ ባለቤት ነው። ያላችሁበት ቦታ 'ዱዓ' የሚሰማበት በመኾኑ፣ የወንድምና ወንድም ደም መፋሰስ እንዲቆም፣ እነርሱም የአርረህማን እንግዶች እንዲኾኑ፣ ስለ ሰላም ስትሉ አጥብቃቹህ ዱዓ ልታደርጉ ይገባል" ብለዋል

በጠቅላይ ምክር ቤቱ ፕሬዚደንት የአርረህማን እንግዶች ጉብኝት ላይ ሐጃጆች ምሥጋና እና የተለያዩ ጥያቄዎች አንስተዋል። በዋነኛነትም 'ኑሱክ' የተባለውን ልዩ የሐጃጅ መታወቂያ ካርድ አለማግኘታቸው እንዳሳሰባቸው ተናግረዋል።

'ኑሱክ' የተባለው ልዩ መታወቂያ ካርድ የሕጋዊ ሐጃጅነት ማረጋገጫ መኾኑን የሳዑዲ የሐጅ ሚኒስቴር ቢገልጽም፣ በሁሉም ሀገር ባሉ ሐጃጆች ላይ የዚህ ቢጣቃ ችግር መከሰቱን ጉዳዩ የሚመለከታቸው ባልደረቦቼ ነግረውኛል ብለዋል።

ይህን ልዩ መታወቂያ ካርድ እስካሁን እርሳቸውም እንኳ እንዳላገኙ ሸይኽ ሐጂ ተናግረዋል።

ችግሩ የተንከባለለ መኾኑን እና ሐጅ በባህሪው ዉጣ ውረድ ያለው በመሆኑ በአገልግሎት አሰጣጥ ፍፁምነት አይጠበቅም ያሉት ፕሬዚደንቱ፣ ችግሮችን በጋራ እየቀረፍን ከፊታችን በሚጠብቀንን የሐጅ ሥርዓት አላህ የሚቀበለን እንዲኾን በአው ፉታ ጀምረን የአርረህማን እንግዶች በመሆናችን ደስ ሊለን ይገባል ብለዋል።

በመጨረሻም የሐጃጆች ጉብኝት ዱዓ ተደርጎ ተጠናቅቋል።

ሰኔ 7፣ 2016 ዓ.ል | ዙልሒጃ 9፣ 1445 ዓ.ሒ.
••••••••••••••••••••••••••••••••••••••••••••••••
ሙስሊሙ ማኅበረሰብ የአረፋን በዓል አቅመ ደካሞችን በመደገፍና በማሰብ እንዲያከብር የጠቅላይ ምክር ቤቱ ፕሬዚደንት አሳሰቡ።
••••••••••••••••••••••••••••••••••••••••••••••••
አዲስ አበባ |

ሙስሊሙ ማኅበረሰብ የ1445 ዓ.ሒ. የዒድ አል-አድኃ (አረፋ) በዓልን ሲያከብር ካለው ላይ ለአቅመ-ደካማ ወገኖቹ እንዲያካፍል የኢትዮጵያ እስልምና ጉዳዮች ጠቅላይ ምክር ቤት ፕሬዚደንት የክብር ዶክተር ሸይኽ ሐጂ ኢብራሒም ቱፋ አሳሰቡ።

ክቡር ሸይኽ ሐጂ ኢብራሒም ቱፋ ይህን ያሳሰቡት፣ የዒድ አል-አድኃ በዓልን ምክንያት በማድረግ አስቀድሞ በተቀረፀ መልዕክታቸው ነው።

ሸይኽ ሐጂ በዚሁ መልዕክታቸው፣ በዙልሒጃ ወር የመጀመሪያዎቹ አሥር ቀናት የሚሥሠሩ መልካም ተግባራት አሏህ (ሱ.ወ.) ዘንድ በሌሎች ቀናት ከሚሥሠሩ መልካም ተግባራት በላጭ ምንዳ እንዳላቸው ከነቢያችን ሙሐመድ (ሶ.ዐ.ወ) ሐዲስ አጣቅሰው ተናግረዋል።

በሙስሊሙ ማኅበረሰብ በጉጉት ከሚጠበቁት የዙልሒጃ ወር የመጀመሪያዎቹ አሥር ቀናት ዘጠነኛዋ ቀን አል ሐጁል አረፋ የሚደረግበትና ማግሥቱ ቀን (የውመል ነሀር) የአረፋ በዓል የሚከበርበት መሆኑን ፕሬዚደንቱ አውስተዋል።

አሏህ (ሱ.ወ.) ሐጅን የወፈቃቸው የዓለም ሙስሊሞች አረፋ ላይ ሲቆሙ፣ ያልወፈቃቸው ወንድሞችና እህቶች ደግሞ በያሉበት የአረፋን ፆም በመፆም፣ ያለፉት ሁለት ዓመታት ወንጀሎቻቸው ከአሏህ (ሱ.ወ.) ምህረት የሚገኝባት ቀን መሆኗን ክቡር ሸይኽ ሐጂ የነቢያችን ሙሐመድ (ሶ.ዐ.ወ) ሐዲስን በማጣቀስ ተናግረዋል።

የአረፋ ቀን አሏህ (ሱ.ወ.) ፀጋውን የለገሳቸው ሙስሊሞች የዑድሂያ እርድ የሚያከናውኑበት መሆኑን የጠቀሱት ክቡር ሸይኽ ሐጂ ኢብራሂም፣ እነዚህ ሙስሊሞች ከሚያርዱት እርድ ለተቸገሩ ወገኖቻቸው፣ በተለይም ለአቅመ ደካማና በተፈጥሮና በሰው ሠራሽ ችግሮች ሳቢያ ከቤት ንብረታቸው ለተፈናቀሉ ወገኖች ማካፈል ይጠበቅባቸዋል ብለዋል።

"እጅግ በጣም አዛኝና ርኅሩኅ የኾነው ጌታችን አሏህ (ሱ.ወ.) ይቅር ባይነትን ይወዳል" ያሉት ሸይኽ ሐጂ ኢብራሂም፣ "ተበድሎ ይቅር ያለን ሰው፣ አሏህ (ሱ.ወ.) የሠራውን ጥፋት ይቅር የሚለው በመኾኑ፣ ሁላችንም ይቅር ልንባባል ይገባል" ብለዋል።

የዘንድሮውን ዒድ አል-አድኃ (አረፋ) ለየት የሚያደርገው የሀገራችን የኢትዮጵያ ልጆች ሀገራዊ ምክክር እያደረጉ የሚገኙበት ወቅት ላይ መሆኑን ጠቅሰው፣ ሀገራዊ ምክክሩ ለጋራ ሀገራችን ሰላማዊነት ጠቃሚ መኾኑን በመረዳት ሙስሊሙ ማኅበረሰብ በያለበት በሀገራዊ ምክክሩ ላይ የነቃ ተሳትፎ እንዲያደርግ ጥሪያቸውን አስተላልፈዋል።

ሀገራዊ ምክክሩ ለሙስሊሙ ኅብረተሰብ የሚኖረውን ፋይዳ በመረዳት ጠቅላይ ምክር ቤቱ የሕግ ባለሙያዎችን፣ ዓሊሞችን፣ ምሑራንን፣ ታዋቂ ግለሰቦችንና ለሀገር የሚያስቡ ሰዎችን በማሰባሰብ የሙስሊሙን ጥያቄዎች (concerns) በማደራጀት ለሚመለከተው አካል መላኩን ፕሬዚደንቱ ሸይኽ ሐጂ ተናግረዋል።

ሰላም የሁሉ ነገር መሠረት መሆኑን የተናገሩት ሸይኽ ሐጂ ኢብራሂም፣ ሁሉም የሰላም ዘብ እንዲሆን ጥሪ አስተላልፈው፣ ለሀገራችንና ለመላው ዓለም ሙስሊሞች በዓሉ የደስታ እንዲሆንላቸው ተመኝተዋል።

•••••••••••••••••••••​
​የኢ.እ.ጉ.ጠ. ም/ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | twitter.com/eiasc1

ሰኔ 11፣ 2016 ዓ.ል | ዙልሒጃ 12፣ 1445 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
••••••••••••••••••••••••••••••••••••••••••••••••••••••••••••
የኢትዮጵያ የሃይማኖት ተቋማት ጉባዔ እና የኢትዮጵያ አየር መንገድ በሰላም ዙሪያ በጋራ ለመሥራት የመግባቢያ ሰነድ ተፈራረሙ።
••••••••••••••••••••••••••••••••••••••••••••••••••••••••••••
አዲስ አበባ |

የኢትዮጵያ የሃይማኖት ተቋማት ጉባዔ እና የኢትዮጵያ አየር መንገድ በሰላም ዙሪያ በቀጣይ አብረው ለመሥራት የመግባቢያ ሰነድ ተፈራረሙ።

ዛሬ በኢትዮጵያ አየር መንገድ ዋና መሥሪያ ቤት የሁለቱ ተቋማት ኃላፊዎች የመግባቢያ ሰነዱን በተፈራረሙበት ወቅት የኢትዮጵያ የሃይማኖት ተቋማት ጉባዔ ዋና ፀሐፊ ሊቀ ትጉኃን ቀሲስ ታጋይ ታደለ የአፍሪካ ኩራት ከኾነው የኢትዮጵያ አየር መንገድ ጋር በሰላም ጉዳይ ላይ አብሮ ለመሥራት የመግባቢያ ሰነድ መፈረማቸው እንዳስደሰታቸው ተናግረዋል።

በሁለቱ ተቋማት ኃላፊዎች የተፈረመዉ የመግባቢያ ሰነድ አየር መንገዱ እያከናወነ ከሚገኘው ሀገራዊ ሥራ በተጨማሪ በቀጣይ ከሃይማኖት ተቋማት ጋር በሀገራዊ ሰላም ዙሪያ የጋራ እሴቶችን በማስቀጠልና ሀገር ተረካቢ ወጣቶች ላይ
በመሥራት ታሪካዊ ኃላፊነትን ለመወጣት ያስችላል ተብሏል።

"የሃይማኖት አባቶች የኢትዮጵያ አየር መንገድ አምባሳደሮች ናቸው" ያሉት ዋና ፀሐፊው፣ 75 ዓመታትን በስኬት ያሳለፈው የኢትዮጵያ አየር መንገድ በቀጣይም ኢትዮጵያዊ ማንነቱን ይዞ በስኬት እንዲያስቀጥል የሃይማኖት አባቶቹ በሚችሉት ሁሉ ከጎኑ እንደሚቆሙ ተናግረዋል።

የኢትዮጵያ አየር መንገድ ዋና ሥራ አስፈጻሚ አቶ መስፍን ጣሰው የአፍሪካ ኩራት የኾነው አየር መንገዱ ከጊዜ ወደ ጊዜ መዳረሻውን እያሰፋ መምጣቱን ጠቅሰው፣ በያዝነው 2016 ዓ.ል 2.6 ሚሊዮን የሀገር ውስጥ መንገደኞችን ማስተናገዱን ተናግረዋል።

አየር መንገዱ ከ26 ሺህ በላይ ለሚኾኑ ሰዎች የሥራ ዕድል መፍጠሩን ያወሱት ዋና ሥራ አስፈጻሚው፣ የሥራ ዕድል ከተፈጠረላቸው ሰዎች አብዛኛዎቹ በአየር መንገዱ የነፃ ሥልጠና ተጠቃሚዎች መሆናቸውን ተናግረዋል።

አየር መንገዱ የቱሪዝም ሥራ በሀገራችን እንዲስፋፋ ደረጃውን ከጠበቀ የሆቴል አገልግሎት በተጨማሪ የውጪ ምንዛሪ ገቢን ለሀገራችን ለማምጣት የስጋ፣ የአትክልት እና ፍራፍሬ ምርቶችን ወደተለያዩ ሀገራት የትራንስፖርት አገልግሎት እየሰጠ መኾኑንም ዋና ሥራ አስፈጻሚው አቶ መስፍን ተናግረዋል።
አየር መንገዱ እነዚህን ተግባራት የሚያከናውነው፣ ደከመኝ ሰለቸኝ በማይሉ ጠንካራ ሡራተኞቹ አማካኝነት መኾኑን ዋና ሥራ አስፈጻሚው ተናግረዋል።

በሁለቱ ተቋማት ከተደረገው የመግባቢያ ሰነድ የፊርማ ስነ ሥርዓት በተጨማሪ የኢትዮጵያ የሃይማኖት ተቋማት የበላይ ጠባቂ አባቶች ወደ ዩኒቨርሲቲ ደረጃ ያደገውን የአየር መንገዱን የምስለ በረራ ትምህርት ክፍል ጎብኝተዋል።

በዚሁ ጊዜም የኢትዮጵያ አየር መንገድ ለሃይማኖት ተቋማት ጉባዔ አራት ነፃ የቢዝነስ የአውሮፕላን ቲኬት አበርክቷል።

•••••••••••••••••••••••
የኢ.እ.ጉ.ጠ. ም/ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | twitter.com/eiasc1

ሰኔ 15፣ 2016 ዓ.ል | ዙልሒጃ 16፣ 1445 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••••••••••••
የጠቅላይ ምክር ቤቱ ልዑካን መካ የሚገኝውን የንጉሥ አባ ጂፋር የኢትዮጵያውያን ሐጃጆች ማረፊያ ሕንፃ ጎበኙ።
•••••••••••••••••••••••••••••••••••••••••••••••••
በክብር ዶ/ር ሸይኽ ሐጂ ኢብራሂም ቱፋ የተመራ የኢትዮጵያ እስልምና ጉዳዮች ጠቅላይ ምክር ቤት የሥራ አስፈጻሚ ቡድን፣ መካ የሚገኝውንና ለብዙ ዓመታት ኢትዮጵያውያን ሐጃጆችን ሲያገለግል የኖረውን የንጉሥ አባ ጂፋር የሐጃጆች ማረፊያ ሕንጻ ጎበኘ።

ለኢትዮጵያውያን ሐጃጆች መቀበያና ማረፊያ እንዲኾን ታስቦ በንጉሥ አባ ጂፋር ዘመን የታነፀውና የኢትዮጵያውያን ሀብት የኾነው ዘመን ተሻጋሪው ሕንጻ በዘንድሮው የሐጅ ወቅት አገልግሎት አለመስጠቱ ታውቋል።

የጠቅላይ ምክር ቤቱ ከፍተኛ የሥራ አስፈጻሚ አባላት ጉብኝት ዓላማም ታሪካዊው የኢትዮጵያውያን ሐጃጆች ማረፊያ አገልግሎት መስጠት ያቋረጠበትን መንስዔ ተረድቶ፣ በልዩ ሁኔታ ችግሩን ለመፍታት ያለመ አቅጣጫ መስጠት እንደኾነ ክቡር ሸይኽ ሐጂ ኢብራሂም ቱፋ ተናግረዋል።

ታሪካዊው የንጉሥ አባ ጂፋር ሕንጻ በ1445 ዓ.ሒ ሐጅ አገልግሎት ያልሰጠው፣ የሳዑዲ አረቢያ የሐጅ ሚኒስቴር የሐጃጆች ማረፊያን አስመልክቶ ያወጣውን የብቃት መስፈርት ባለማሟላቱ መኾኑ በዚሁ ጊዜ ተገልጿል።

ከብረት የተሠራው የሕንጻው የውጪ መወጣጫ ደረጃ ረጅም ዓመታት ሲያገለግል የኖረ ቢኾንም፣ የሳዑዲ አረቢያ የሐጅ ሚኒስቴር ያወጣውን የብቃት መስፈርት ባለማሟላቱ፣ ፈቃዱ ሊታደስ እንዳልቻለ በዚሁ ጊዜ ተነግሯል።

የንጉሥ አባ ጂፋር የሐጃጆች ማረፊያ ሕንጻ ታሪካዊ አሻራውን በሚያጎለብት መልኩ፣ መሟላት ያለበትን በማሟላት በሚቀጥለው ዓመት ችግሩ ተፈትቶ ለአልረህማን እንግዶች ማረፊያነት የተሻለ አገልግሎት እየሰጠ እንዲቀጥል ከወዲሁ አስፈላጊው ጥረት ሁሉ መደረግ እንዳለበት ክቡር ሸይኽ ሐጂ ኢብራሂም አሳስበዋል።

የኢትዮጵያ እስልምና ጉዳዮች ጠቅላይ ምክር ቤት ከሕንጻው አሥተዳደር ጋር በመኾን፣ ችግሩን ለመፍታት እንደሚሠራ ፕሬዚደንቱ ተናግረዋል።

በጉብኝት መርኃ ግብሩ ላይ የምክር ቤቱ ተቀዳሚ ምክትል ፕሬዚደንት ሸይኽ አብዱልከሪም ሸይኽ በድረዲን፣ የጠቅላይ ምክር ቤቱ ዋና ፀሐፊ ሸይኽ ሐሚድ ሙሳ፣ ጥሪ የተደረገላቸው የሀገር ሽማግሌዎችና የተለያዩ የክልል መጅሊስ አባላት ተገኝተዋል።

​•••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

ሰኔ 16፣ 2016 ዓ.ል | ዙልሒጃ 17 1445 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••••••••••••••
93 በግል ከሐጅ ተመላሾች የመልስ ጉዞ መስተጓጎል ገጠማቸው።
•••••••••••••••••••••••••••••••••••••••••••••••••••
መካ |
የ1445 ዓ.ሒ የሐጅ ሥርዓተ አምልኮን ፈጽመው ፈጥነው ወደ ሀገር ቤት ለመመለስ በሳዑዲ አየር መንገድ በግል ቲኬት የቆረጡ 93 ያህል ከሐጅ ተመላሾች በመልስ ጉዟቸው ላይ መስተጓጎል እንደገጠማቸው ታወቀ፡፡

እነዚህ ሐጃጆች በመልስ ጉዟቸው መጉላላት የገጠማቸው፣ ሲገቡ ፓስፖርታቸውን የተቀበላቸው ኩባንያ በሰዓቱ ደርሶ ፓስፖርታቸውን ባለመመለሱ ሳቢያ በረራ ስላመለጣቸው መኾኑን ለማወቅ ተችሏል፡፡

በተጨማሪም፣ ከመካ ወደ ጀዳ የሚወስዳቸው አውቶብስ ዘግይቶ መምጣት፣ የሐጃጆች በሰዓቱ ተጠቃልለው ወደ አውቶብሱ አለመግባት፣ የግል ተመላሽ ሐጃጆች የቲኬት መረጃ በሑጃጅ መስተንግዶ ሲስተም ውስጥ የሚገኝ ባለመሆኑ ያንን ከተመላሾቹ ወስዶ ለማስተካከል የወሰደው ጊዜ የተጓዦችን ጀዳ አውሮፕላን ማረፍያ የመድረሻ ሰዓት ለማዘግየት ምክንያት መኾናቸው ተጠቅሷል።

የኢትዮጵያ እስልምና ጉዳዮች ጠቅላይ ምክር ቤት የመልስ ጉዟቸው ለተስተጓጎለባቸው ከሐጅ ተመላሾች በጀዳ የመቆያ ሆቴል በመከራየት የመልስ ጉዟቸውን ለማሳለጥ አማራጭ የማፈላለግ ጥረት እያደረገ እንደሚገኝ ለማወቅ ተችሏል፡፡

የኢትዮጵያ እስልምና ጉዳዮች ጠቅላይ ምክር ቤት የሐጅና ዑምራ ዘርፍ ከኢትዮጵያ አየር መንገድ ጋር በመቀናጀት የሚያካሂደው የሐጃጆች የመልስ ጉዞ መርኃ ግብር፣ ሐጃጆች ከኢትዮጵያ ወደ ሳዑዲ አረቢያ (መዲና) በተሳፈሩበት ቅደም ተከተል መሠረት የሚከናወን መኾኑ ይታወቃል፡፡

ይህን የመልስ ጉዞ መርኃ ግብር እየጠበቁ መቆየትን የማይመርጡ የተወሰኑ ሐጃጆች፣ በሳዑዲ አየር መንገድ በግል ቲኬት ቆርጠው በጊዜ ለመመለስ እንደሚወስኑ ይታወቃል።

በዚህ መልኩ ወደ ሀገር ቤት ለመመለስ ቲኬት የቆረጡ 93 ያህል ከሐጅ ተመላሾች ከላይ በተጠቀሱት ተደራራቢ ምክንያቶች የመልስ ጉዟቸው እንደተስተጓጎለ የጠቅላይ ምክር ቤቱ የሐጅና ዑምራ ዘርፍ ኃላፊ ሸይኽ አብዱልፈታህ ሙሐመድ ናስር ተናግረዋል፡፡

የእነዚህ ከሐጅ ተመላሾች የመልስ ጉዞ መስተጓጎል ጠቅላይ ምክር ቤቱን እንደሚያሳስበው የጠቀሱት ኃላፊው፣ ‹‹በተቻለ ፍጥነት ተለዋጭ በረራ እንዲያገኙ ጉዳዩ ከሚመለከተው አካል ጋር በመገናኘት ለችግሩ መፍትኄ በማፈላለግ ላይ ነን›› ብለዋል፡፡

የመልስ ጉዞ የቅደም ተከተል ተራን ከመጠበቅ ይልቅ ፈጥነው ለመመለስ የፈለጉ ሐጃጆች ከወትሮው በዛ ማለታቸው በአሠራራቸው ላይ ጫና እንደፈጠረ የጠቀሱት ሸይኽ አብዱልፈታህ፣ ያም ኾኖ ዘርፉ የሚመለከታቸውን አካላት በማነጋገር ለተፈጠረው ችግር መፍትኄ ለማስገኘት ጥረት እያደረገ መኾኑን ተናግረዋል፡፡

የጠቅላይ ምክር ቤቱ የሥራ አስፈጻሚና የሐጅ ዐብይ ኮሚቴ አባል የኾኑት ኢንጅነር አንዋር ሙስጠፋ በበኩላቸው፣ ፈጥነው ወደ ሀገር ቤት ለመመለስ በመሻት በሳዑዲ አየር መንገድ በግል ቲኬት ለቆረጡት 93 የሐጅ ተመላሾች በተለያዩ ምክንያቶች በመዘግየታቸውና ፓስፖርታቸውን የተቀበላቸው ኩባንያም በሰዓቱ ባለመድረሱ በረራ እንዳመለጣቸው ተናግረዋል፡፡

ከሐጅ ተመላሾቹ በረራ ያመለጣቸው ቢሆንም፣ ለበለጠ መጉላላት እንዳይዳረጉ መጅሊሱ በጀዳ ሆቴል ተከራይቶ ሌላ የመመለሻ አማራጭ መፍትኄ የማፈላለግ ጥረት ላይ መኾኑን ኢንጅ. አንዋር ተናግረዋል፡፡

ወቅቱ የሐጅ ተመላሽ ጫና ያለበት፣ የበረራ መደራረብና እጥረት የሚፈጠርበት በመኾኑ፣ መጅሊሱ ባሳደረው ጫና ብዙ ሰዎችን የሚይዝ ግዙፍ አውሮፕላን በመጠቀም በዕለቱ ከሚመለሱት ጋር በረራ ያመለጣቸውን ሐጃጆች ጨምሮ በማሳፈር ችግሩን ለመፍታት እየተሠራ እንደኾነ ኢንጅነር አንዋር ተናግረዋል፡፡

​•••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

ሰኔ 16፣ 2016 ዓ.ል | ዙልሒጃ 18፣ 1445 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••••••••••••••
ምክር ቤቱ 89 የግል ከሐጅ ተመላሾች ወጪያቸው ተሸፍኖ ዛሬ ለሊት ሀገራቸው እንዲገቡ አመቻቸ።
•••••••••••••••••••••••••••••••••••••••••••••••••••
መካ |
በሳዑዲ አየር መንገድ በግል ቲኬት ቆርጠው ትናንት ጉዟቸው የተስተጓጎለባቸው 90 ያህል ከሐጅ ተመላሾች ሙሉ ወጪያቸው ተሸፍኖ ዛሬ ሌሊት ወደ ሀገራቸው እንደሚገቡ ተነገረ።

የጠቅላይ ምክር ቤቱ የሥራ አስፈጻሚና የሐጅ ዐብይ ኮሚቴ አባል የሆኑት ኢንጅነር አንዋር ሙስጠፋ በትናንትናው ዕለት ጉዟቸው የተስተጓጎለባቸውን የ90 ከሐጅ ተመላሾች የመልስ ጉዞ ለማሳካት ከሳዑዲ የሐጅ ሚኒስቴር ጋር በመነጋገር በተደረገው ጥረት 89 የሐጅ ተመላሾች ዛሬ አመሻሹን እንዲሳፈሩ ሁኔታዎች መመቻቸታቸውን ተናግረዋል።

በሐጅና ዑምራ የሲስተም ክፍል ዋና ተጠሪ የሆኑት ኢንጅነር አንዋር ሙስጠፋ አያይዘውም በግል ቲኬት ከቆረጡት 90 ከሐጅ ተመላሾች ወስጥ አንዷ በግል ምክንያት በዛሬው የሳዑዲ አየር መንገድ ተመላሾች ውስጥ አለመካተቷን ተናግረዋል።

በግል ቲኬት ቆርጠው ከበረራው ሰዓት በመዘግየታቸው ሳቢያ የትናንቱ የመልስ ጉዞ ያመለጣቸውና በመጅሊሱ ወጪ ጀዳ በሚገኝ ሆቴል ያረፉት ተመላሾች ሙሉ ወጪያቸው በሳዑዲ አረቢያ የሐጅ ሚኒስቴር ተሸፍኖ በሳዑዲ አየር መንገድ አመሻሹን ወደ ሀገራቸው ለመሳፈር ዝግጅት ማጠናቀቃቸውን ለማወቅ ተችሏል።

ለችግሩ መፍትኄ የማፈላለግ ጥረቱ እንዲሳካ የኢትዮጵያ እስልምና ጉዳዮች ጠቅላይ ምክር ቤት የሐጅና ዑምራ ዘርፍ የሥራ ኃላፊዎች ያደረጉት ጥረት የሚመሠገን እንደሆነ ኢንጅነር አንዋር ተናግረዋል።

​​•••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

ሰኔ 19፣ 2016 ዓ.ል | ዙልሒጃ 20፣ 1445 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
••••••••••••••••••••••••••••••••••••••••
ከሐጅ ተመላሾች ማዑ ዘምዘም ቦሌ አይሮፕላን ማረፊያ ላይ እንደሚሰጣቸው ተነገረ።
••••••••••••••••••••••••••••••••••••••••
አዲስ አበባ |
የሐጅ ሥርዓታቸውን አጠናቅቀው ሀገር ቤት ለተመለሱ ሐጃጆች ቦሌ ዓለም አቀፍ አይሮፕላን ማረፍያ ላይ ማዑ ዘምዘም እንደሚሰጣቸው ተነገረ።

የሐጅ ሥርዓትን አጠናቅቀው በኢትዮጵያ አየር መንገድ ሀገር ቤት ለተመለሱ ሐጃጆች ቦሌ ዓለም አቀፍ አይሮፕላን ማረፍያ እንደደረሱ በነፍስ ወከፍ 5 ሊትር ማዑ ዘምዘም እንደሚታደላቸው በጠቅላይ ምክር ቤቱ የሐጅና ዑምራ ዘርፍ፣ የሐጃጆች አቀባበልና የማዑ ዘምዘም እደላ አስተባባሪ የኾኑት ሐጂ አብዱልፈታህ ብርሃኑ ተናግረዋል፡፡

ጠቅላይ ምክር ቤቱ ለተከበሩት የሐጅ ተመላሾች አቀባበልና የማዑ ዘምዘም ዕደላ ኮሚቴ ማዋቀሩን የጠቀሱት

የመልስ ጉዟቸውን በኢትዮጵያ አየር መንገድ አድርገው ሀገር ቤት ለሚመለሱ ሐጃጆች በነፍስ ወከፍ የሚሰጣቸው 5 ሊትር ማዑ ዘምዘም ከተመላሾቹ ቀድሞ ቦሌ ዓለም አቀፍ አይሮፕላን ማረፍያ እንደሚደርስ አስተባባሪው ሐጂ አብዱልፈታህ ተናግረዋል።

በሳዑዲ አየር መንገድ ጉዟቸውን ያደረጉ የሐጅ ተመላሾች የነፍስ ወከፍ የማዑ ዘምዘም ድርሻቸው ጀዳ አየር መንገድ ላይ እንደሚሰጣቸው ሐጂ አብዱልፈታህ ተናግረዋል።

የተከበሩ የአርረህማን እንግዶችን ወደ ሀገር ቤት የመመለስ ሥራን ሰኔ 18፣ 2016 ዓ.ል የጀመረው የኢትዮጵያ እስልምና ጉዳዮች ጠቅላይ ምክር ቤት፣ እስከ ዛሬ በተደረጉ ጉዞዎች (በኢትዮጵያና በሳዑዲ አየር መንገዶች) የዛሬውን ጨምሮ አንድ ሺህ ስምንት መቶሐጃጆችን ወደ ሀገር ቤት እንዲመለሱ አድርጓል።
••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1

ሰኔ 20፣ 2016 ዓ.ል | ዙልሒጃ 21፣ 1445 ዓ.ሒ
بِسْمِ ٱللَّهِ ٱلرَّحْمَٰنِ ٱلرَّحِيمِ
•••••••••••••••••••••••••••••••••••••••••••••••••••
የሐጅ ተመላሾች ኦፕሬሽን የሥራ ሂደቱን ገምግሞ የሥራ መመሪያ አወጣ።
•••••••••••••••••••••••••••••••••••••••••••••••••••
መካ |

የ1445 ዓ.ሒ የሐጅ ሥርዓትን ፈጽመው ወደ ሀገር ቤት የሚመለሱ የአርረህማን እንግዶችን የአሸኛኘት የሥራ ሂደት የሚገመግም ስብሳባ ተከናወነ።

የሐጅ ተመላሾች አሸኛኘት የሥራ ሂደት ግምገማውን የመሩት የጠቅላይ ምክር ቤቱ የሥራ አስፈጻሚ፣ የሐጅ ዐብይ ኮሚቴ አባል እና የሲስተም ክፍል ዋና ተጠሪ ኢንጅነር አንዋር ሙስጠፋ፣ የአርረህማን እንግዶች የሐጅ ሥርዓታቸውን ጨርሰው ወደ ሀገር ቤት መመለስ ከጀመሩበት ጊዜ ጀምሮ እስከ ዛሬዋ ምሽት ድረስ 2 ሺህ 900 ሐጃጆች ወደ ሀገር ቤት መሸኘታቸውን ተናግረዋል።

በግመገማው ላይ የአሸኛኘት ሂደቱን በሚያሳልጡት አባላት ከተመላሾች በኩል ከሚፈቀደው የሚዛን ልክ በላይ ሻንጣን ማጨቅ፣ በሻንጣ እንዲያዝ የማይፈቀድ እቃ መያዝ፣ የፓስፖርት መጥፋት፣ የመሰናበቻ ጠዋፍን (ጠዋፈል ወዳዕ) በጊዜ አለመፈፀም፣ በሰዓት አለመገኘት ከገጠሙ ተግዳሮቶች መካከል ተጠቅሰዋል።

በሌላም በኩል የመረጃ በአግባቡና በግልፅነት ያለመድረስና መዘናጋት ያስከተለው ችግር በግምገማው ላይ ተነስቷል።

የሐጅ ተመላሾች የአሸኛኘት አገልግሎት አሰጣጡ የነበረበትን ደካማና ጠንካራ ጎኖች በመገምገም፣ ዘልማዳዊ አሠራሩን በመተው ተበታትኖ ያለውን ሥራ ወጥነትና ተመጋጋቢ በኾነ አግባብ የመፈፀም አስፈላጊነትና አፈጻፀሙ ላይ ማብራሪያ ተሰጥቶ የጋራ ግንዛቤ ተይዟል።

በሥራ ሂደቱ ላይ የመረጃ ክፍተት የአገልግሎት አሰጣጡ ዋነኛ እንቅፋት መኾኑ ታምኖበት፣ ይህን ለማረቅ የሚያስችል የሥራ መመሪያ መውጣቱ የተነገረ ሲኾን፣ ለመመሪያው ተግባራዊነት በይዘቱ ላይ የጋራ ግንዛቤ መያዝ የዚህ ግምገማ ውይይት ትልቅ ግብ መሆኑን ኢንጂነር አንዋር ተናግረዋል።

ይህ የግምገማ መድረክ መፈጠሩ ሁሉም በየዘርፉ ያሉ ችግሮችና የአሠራር ሂደት ክፍተቶችን ለማየት እንዲችል መኾኑን የጠቀሱት ኢንጂነር አንዋር፣ ዘልማዳዊ አሠራርን በመተው አሸኛኘቱን ይበልጥ ሊያቀላጥፍ የሚችለውን የአገልግሎት አሰጣጥ መመሪያ በመከተል በጋራ መትጋት የሥራ ሂደቱን ተመጋጋቢ በማድረግ የሐጅ ተመላሾች ጉዞ
ስኬታማ እንዲሆን ያስችላል ብለዋል።

የሐጅ ሥራ በባህሪው የብዙ ባለሙያዎችን ውህደትና መናበብ የሚጠይቅ በመኾኑ የአገልግሎት ሰጪዎችን ቅንነት እና ትዕግስት እንደሚጠይቅ የጠቀሱት ኢንጂነር አንዋር፣ ይህን ከተመላሽ ሐጃጆች ማግኘት በማይቻልበት ሁኔታ እንደ አገልግሎት ሰጪ ከእኛ የሚጠበቀውን በከፍተኛ ትዕግሥት እና አስተዋይነት መከወን ይኖርብናል ብለዋል።

​​•••••••••••••••••••••••••••
የኢት/እ/ጉ/ጠ ምክር ቤት ሕዝብ ግንኙነት
ይከታተሉን | Follow us፡
ፌስቡክ | Ethiopian Islamic Affairs Supreme Council
ቴሌግራም | t.me/eiasc1
ትዊተር | https://x.com/eiasc1